1. Малы ми ум паймиське, туннэ адямиослы оскыны секыт шуыса?

 ТА ДУННЕЫСЬ адямиос кинлы оскыны ик уг тодо. Уж бергатӥсьёслэн, кузёослэн но религиозной кивалтӥсьёслэн ужъёсынызы сэрен соослы оскон быремын ини. Тросэзлы секыт оскыны эшъёссылы, бускельёссылы, озьы ик семьязылы но. Но ми талы ум паймиське, малы ке шуоно Библиын азьло ик верамын вал, «берпум аръёсы секыт дыръёс вуозы шуыса». Отын верамъя, адямиос сьӧлыклэсь кышкасьтэмесь, кыл нуллӥсесь луозы, огзэс огзы вузалозы. Мукет кылъёсын вераса, адямиос асьсэды возёзы Шайтан сямен, «та даурлэн „инмарез“» сямен, кудӥзлы нокӧня но оскыны уг луы (2 Тим. 3:1—4; 2 Кор. 4:4).

2. а) Кинлы быдэсак оскыны луэ? б) Кыӵе юанъёссы куд-огъёсызлэн кылдыны быгато?

² Но христианъёс Иеговалы быдэсак оскыны быгато (Иер. 17:7, 8). Ми оскиськомы, со милемыз яратэ но аслэсьтыз эшъёссэ ноку уз кельты шуыса (Пс. 9:11). Озьы ик ми оскыны быгатӥськомы Иисус Христослы, малы ке шуоно со ми понна аслэсьтыз улонзэ сётӥз (1 Пётр 3:18). Ми ас выламы шӧдӥмы, макем пайдаё Библиысь визь-кенешъёс (2 Тим. 3:16, 17). Озьыен, ми быдэсак оскиськомы Иеговалы, Иисуслы но Библилы. Но кинлэн ке таӵе юанъёсыз кылдыны быгато: «Луэ-а котьку оскыны кенешысь агайёслы но сузэръёслы? Луэ ке, малы?»

3. Кыӵе дуно кузьыммы милям вань? (Марк 10:29, 30).

³ Трос миллиард адямиос пӧлысь Иегова милемыз адӟиз но аслаз туж бадӟым семьяяз ӧтиз. Ми туж тау кариськомы солы дуно кузьымез понна! (Лыдӟе Марклэсь 10:29, 30.) Быдэс дуннеын милям вань агайёсмы но сузэръёсмы,  кудъёсыз Иеговаез ярато но солэн курон-косонъёсызъя улыны тыршо. Милям кылъёсмы, сям-йылолъёсмы но дӥськутмы пӧртэмесь ке но, озьы ик ми ноку тодмо ӧй вал ке но, ми одӥг семья кадь. Милемлы туж кельше ваньмы ӵош яратӥсь инмысь Атаймес данъяны но солы ужаны-тыршыны! (Пс. 132:1).

4. Малы милемлы кулэ агайёсмы но сузэръёсмы?

⁴ Туннэ тужгес но кулэ агайёсын но сузэръёсын огкылысь улыны. Соос шуг-секытъёс дыръя милемлы юрттыны быгато (Рим. 15:1; Гал. 6:2). Соос милесьтым мылкыдмес ӝуто азьланяз но Иеговалы ужаны-тыршыны но юн осконэн улыны (1 Фес. 5:11; Евр. 10:23—25). Малпаны ик кышкыт, кызьы ми кенештэк улысалмы! Кенеш милемыз уте но милемлы юрттэ Шайтанлы но солэн лек дуннеезлы пумит сылыны. Ӝоген Шайтан но со пала кариськисьёс Иеговалэн ужась-тыршисьёсыз вылэ урдскозы. Ми туж шумпотомы, со дыре ми вӧзын дуно агайёсмы но сузэръёсмы луозы шуыса!

5. Малы куд-огъёсыз малпало, агайёслы но сузэръёслы оскыны секыт шуыса?

⁵ Но куд-огъёсызлы секыт оскыны агайёслы но сузэръёслы. Малы? Оло нош, агай яке сузэр мукетъёсызлы вераз сое, мае ми солы гинэ верамы вал. Яке со сётэм кылзэ ӧз быдэсты. Яке кинлэн ке кылъёсыз но ужъёсыз сюлэммес вӧсь каризы. Соин ик адямилэн юанэз кылдыны быгатэ: «Кинлы табере оскод на?» Мар юрттоз милемлы агайёслы но сузэръёслы осконмес юнматыны?

6. Кызьы яратон мукетъёсызлы осконмес юнматыны юрттэ? (1 Коринфъёслы 13:4—8).

⁶ Мукетъёсызлы оскон понна, яратон кулэ. Коринфъёслы нырысетӥ гожтэтын  13-тӥ люкетын верамын, мар пыре яратон пӧлы но кызьы со юрттэ мукетъёсызлы осконмес юнматыны. (Лыдӟе 1 Коринфъёслы 13:4—8.) Кылсярысь, 4-тӥ кылбурын верамын: «Яратон кема чида, гажа-жаля». Тодамы ваёмы, макем Иегова милемыз чида, куке ми сьӧлыкаськомы. Соин ик милемлы но огъя оскисьёсмылы чиданмес возьматоно, куке соос кылъёсынызы яке ужъёсынызы милемыз вӧсь каро. 5-тӥ кылбурын верамын, яратон «уг керӟегъяськы, уродэз-лекез сюлмаз уг возьы». Соин ик ми сюлмамы ум возиське агайёсмылэсь но сузэръёсмылэсь вӧсь карись кылъёссэс яке ужъёссэс. Екклесиастын 7:9 шуэмын: «Вождэ поттыны эн дырты». Нош Ефесъёслы 4:26 гожтэмын: «Шунды пуксьыса медаз вуы, йыркуръяськонды мед кысоз».

7. Кызьы возетъёс, кудъёсыз гожтэмын Матфейлэсь 7:1—5, юртто милемлы агайёслы но сузэръёслы осконмес юнматыны?

⁷ Озьы ик агайёслы но сузэръёслы осконмес юнматомы, соос шоры Иегова сямен учкимы ке. Инмар соосты яратэ но сьӧлыкъёссэс тодаз уг возьы. Милемлы солэсь адӟем кароно (Пс. 129:3). Агайёслэн но сузэръёслэн тырмымтэоссылы саклыкмес висъям интые, милемлы соослэсь умой сямъёссэс адӟыны тыршоно. (Лыдӟе Матфейлэсь 7:1—5.) «Яратон ваньмызлы... юн оске», соин ик ми ум малпаське, агайёсмы но сузэръёсмы милемлы вӧсь карыны малпало вал шуыса (1 Кор. 13:7). Иегова уг возьма, ми ваньмызлы оскомы шуыса. Ми оскиськомы агайёслы но сузэръёслы, малы ке шуоно соос возьматӥзы, соослы оскыны луэ шуыса b.

8. Мар кароно, агайёслы но сузэръёслы оскон понна?

⁸ Агайёс но сузэръёс ужъёсынызы возьматыны кулэ, соослы оскыны но соосты гажаны луэ шуыса. Но со понна дыр кулэ. Нош мар карыны быгатӥськомы ми асьмеос, агайёслы но сузэръёслы оскон понна? Соосын матэгес тодматсконо. Кенешлэн пумиськонъёсаз вераськоно. Ӵош тодытыны ветлоно. Солы, кинэн тӥ умой-умой тодмо ӧвӧл на, тӥ сюлэмдэс уд усьтэ, дыр. Но адямиен матэгес тодматскыса, тӥледлы капчигес луоз солы сюлэм малпанъёстэс вераны (Лука 16:10). Нош мар кароно, агайлы яке сузэрлы осконмы быриз ке? Эн дугдэ соин эшъяськемысь. Солы кӧня ке дыр сётэ. Одӥг адямилэн янгышъёсыз сэрен мукет агайёслы но сузэръёслы оскемысь эн дугдэ. Ойдолэ вераськомы Иеговалэн ужась-тыршисьёсыз сярысь, кудъёсыз кинлэн ке янгышаменыз сэрен мукетъёсызлы оскемысь ӧз дугдэ.

9. а) Мар юрттӥз Анналы Иеговалы оскыны, Инмарен пуктэм адямиослэн сьӧлыкамзы шоры учкытэк? б) Кызьы Анналэн примерез юрттэ милемлы Иеговалэн организациезлы оскыны? (Учке суредэз.)

⁹ Вал-а тӥляд сыӵе учыръёсты, куке тӥ оскемысь дугдӥды агайёслы, кудъёсыз кенешын дано ужъёсты быдэсъяло? Вал ке, малпаське Анналэн примерез вылын. Со дыре Израильын первосвященник луыса Илий ужаз-тыршиз. Озьы ке но солэсь семьязэ адӟем карымон шуыны уг луы вал. Солэн пиосыз священник луыса ужазы-тыршизы ке но, соос сьӧлыкаса улӥзы. Нош соосты тупатон понна, атайзы номыр ик ӧз кары. Иегова Илиез соку ик кыл ӧз кутыты. Но Анна азьланяз но ветлӥз скинияе, кудаз Илий ужаз-тыршиз. Куке Илий адӟиз Анналэсь  сюлворыса вӧсяськемзэ, со малпаз, та кышномурт кудӟемын шуыса. Ваньзэ пыр-поч валатэк, со Аннаен чурыт кылъёсын вераськиз (1 Экс. 1:12—16). Озьы ке но Анна кылзэ сётӥз, солэн пиез вордӥськиз ке, со сое скинияе ужаны-тыршыны сётоз шуыса. Та кылъёсты веракуз, со тодӥз, Илий солэсь пизэ эскероз-чаклалоз шуыса (1 Экс. 1:11). Нош Илийлэсь пиоссэ кылкутытыны кулэ ӧй вал-а? Кулэ вал. Тупатэм дыре Иегова озьы ик кариз (1 Экс. 4:17). Нош Анналы Инмар Самуил пизэ кузьмаз (1 Экс. 1:17—20).

10. Давидэз матысь адямиосыз вузазы ке но, дугдӥз-а со мукетъёсызлы оскемысь? Валэктэ.

¹⁰ Тӥледыз куке но матысь эшты вузаз-а? Озьы ке, малпаське Давид эксэй сярысь. Солэн Ахитофел нимо матысь эшез вал. Куке Давидлэн пиез Авессалом атаезлэсь кивалтэтсэ ас кияз басьтыны тыршиз, Ахитофел со пала ӧз кариськы. Соку Давидлы туж секыт вал, малы ке шуоно со огдыре пизэ но, матысь эшсэ но ыштӥз. Та шоры учкытэк, Давид мукет адямиослы оскемысь ӧз дугды. Кылсярысь, со азьланяз но оскиз Хусийлы, кудӥз Авессалом пала ӧз кариськы. Давид юнме солы ӧз оскы. Берлогес Хусий возьматӥз, со оскымон эш шуыса. Давид понна со улонзэ но сётыны дась вал (2 Экс. 17:1—16).

11. Кызьы Наваллэн одӥгез ляльчиез мукетъёсызлы оскемзэ возьматӥз?

¹¹ Табере эскеромы Наваллэн одӥг ляльчиезлэсь учырзэ. Давид аслаз адямиосыныз кӧня ке но дыр ӵоже та узыр израиль воргоронлэсь пудо возьмасьёссэ утьыса улӥз. Берлогес Давид Наваллэсь аслыз но ожгарчиосызлы кӧня ке сиён куриз. Но Навал Давидлы нокӧня но сиён ӧз сёты. Соин ик Давидлэн туж вожез потӥз. Со малпаз Наваллэн коркаысьтыз вань пиосмуртъёсты виыны. Одӥгез ляльчи та сярысь вераз кузёезлэн кышноезлы, Авигеялы. Та ляльчи пегӟыны быгатысал, но со оскиз, та кышномурт солэсь улонзэ утёз шуыса. Со тодӥз: Авигея мар ке но кароз, малы ке шуоно ваньзы тодӥзы, со визьмо кышномурт шуыса. Озьы ик луиз. Кышкасьтэм Авигея Давидэз вир кисьтонлэсь утьыны быгатӥз (1 Экс. 25:2—35). Авигея  ачиз но Давидлы оскиз, со шонер лэсьтоз шуыса.

12. Кытысь адӟиське, Иисус дышетскисьёсызлы, янгышъёссы шоры учкытэк, оскиз шуыса?

¹² Иисус дышетскисьёсызлы оскемысь ӧз дугды, соос янгышазы ке но (Иоанн 15:15, 16). Одӥг пол Иаков но Иоанн куризы сое Инмарлэн Эксэйлыказ дано интыос сётыны. Иисус ӧз малпа, соос Иеговалы шонертэм малпанъёсын ужало-тыршо шуыса, озьы ик апостолъёс пӧлысь но ӧз потты (Марк 10:35—40). Берлогес, куке Иисусэз тушмонъёсыз кутӥзы, вань дышетскисьёсыз сое кельтӥзы (Матф. 26:56). Но Иисус соослы оскемысь ӧз дугды. Со умой тодӥз соослэсь тырмымтэоссэс, озьы ке но «пумозяз соосты яратэмзэ уж вылын возьматӥз» (Иоанн 13:1). Улӟемез бере Иисус 11 оскымон апостолъёсызлы туж кулэ луись уж сётӥз — дышетскисьёсты дасян ужен кивалтыны но дуно ыжъёсыз сярысь сюлмаськыны (Матф. 28:19, 20; Иоанн 21:15—17). Та тырбыдэстэм пиосмуртъёс кулытозязы ик оскымон ужазы-тыршизы. Кызьы ми эскеримы, Анна, Давид, Наваллэн ляльчиез, Авигея но Иисус тырбыдэстэм адямиослы оскизы. Та пумысен соос милемлы туж умой адӟем карон возьматӥзы.

13. Маин сэрен куддыръя мукетъёсызлы оскыны секыт?

¹³ Вал-а тӥляд сыӵе учырды, куке тӥ мае ке агайлы гинэ верады, нош со сое мукетъёсызлы но вераз? Сыӵе дыре сюлэм пуртэн вандэм кадь вӧсь луэ. Одӥг пол сузэр аслаз шуг-секытэз сярысь одӥг тӧролы вераз. Со малпаз, та сярысь нокин но уз тоды ни шуыса. Нош мукет нуналаз солы тӧролэн кышноез жингыртӥз но сое юнматыны тыршиз. Сузэр валаз, тӧролэн кышноез ваньзэ тодэ шуыса. Валамон, та тӧролы оскыны секыт вал ини. Но сузэр шонер лэсьтӥз: аслаз шуг-секытэз сярысь со мукет тӧроен вераськиз. Солэн юрттэмезлы луыса со выльысь тӧроослы оскыны быгатӥз.

14. Мар юрттӥз одӥг агайлы выльысь мукетъёсызлы оскыны?

¹⁴ Одӥг агайлэн кык тӧроосын кема дыр ӵоже валамтэосыз вал. Солэн малпамезъя, соослы оскыны уг луы вал. Но со тодаз вайиз, мар вераз одӥг агай, кудзэ со туж гажаз. Со агай умой вераз: «Милям тушмонмы — Шайтан, нош вын-агайёсмы ӧвӧл». Та кылъёс вылын со кема малпаськиз, вӧсяськиз но собере тӧроосын кусыпъёссэ тупатӥз.

15. Малы, агайёслы выльысь оскон понна, трос дыр ортчыны быгатэ? Вералэ пример.

¹⁵ Тӥледыз кенешын куке но дано ужъёстэк кельтылӥзы-а? Сыӵе дыре туж вӧсь луэ. 1930-тӥ аръёсы Грета сузэр но солэн анаез Иеговалы оскымон ужазы-тыршизы Германиын, куке отын нацистъёс кивалтӥзы. Соку со шаерын ужмес нуыны уг лэзё вал. Грета туж кулэ луись ужез быдэсъяз: огъя оскисьёсызлы «Возьмаськон башнялэсь» копиоссэ лэсьтылӥз. Но берлогес агайёс тодӥзы, солэн атаезлы Адӟись-Ивортӥсьёс уг кельшо шуыса. Соос кышказы, атаез ваньзэс вузалоз шуыса. Соин ик Греталы та ужез нуыны ӧз лэзе ни. Со сяна, Кыкетӥ дунневыл ож дыръя агайёс солы но анаезлы нокыӵе журналъёс ӧз сётъялэ. Озьы ик урамын ӧз но ӟечбуръяське. Пуктэ син азяды, кыӵе солы вӧсь вал! Солэн сюлмыз туж куректыса улӥз. Греталы кема дыр ӵоже секыт вал та агайёсты простить карыны но соослы оскыны.  Но, дыр ортчыса, со адӟиз, Иегова соосты простить кариз шуыса. Соин ик со но озьы ик карыны малпаз c.

16. Малы дышетсконо агайёслы но сузэръёслы оскыны?

¹⁶ Тӥ но та выллем учыръёсын пумиськиды ке, киостэс эн лэзе. Лэсьтэ ваньзэ, мае быгатӥськоды, мукетъёсызлы выльысь оскон понна. Со понна дыр кулэ. Но тыршемды трос пайда ваёз. Кылсярысь, тӥ сӧриськем сиён сииды ке, азьланяз эшшо но сакгес учкоды, мае сииськоды. Тӥ номыр сиытэк уд улэ ук! Ӵапак озьы ик одӥг адямилэн янгышез сэрен тӥ мукет агайёслы но сузэръёслы оскемысь уд дугдэ, малы ке шуоно ми ваньмы тырбыдэстэмесь. Куке ми мукетъёсызлы выльысь оскыны дышетскиськомы, соку шудогес луиськомы. Со юрттэ милемлы валаны, мар милям кареммы луэ, кенешын ог-огмылы оскыны мед быгатомы шуыса.

17. Малы туж кулэ мукетъёсызлы оскыны но мае ми эскеромы вуоно статьяын?

¹⁷ Шайтанлэн дуннеяз адямиос кинлы оскыны ик уг тодо ини. Но милям духовной семьяямы озьы ӧвӧл, малы ке шуоно ми ог-огмес яратӥськомы. Ог-огмылы оскон шумпотыса но огкылысь улыны юрттэ. Вуоно шуг-секытъёс дыръя но со милемыз утёз. Нош мар кароно, кинлы ке осконмы быриз но соин сэрен милемлы туж вӧсь луэ ке? Ваньмыз шоры Иеговалэн синъёсыныз учкыны тырше. Библиысь возетъёсты уже кутэ, агайёсты но сузэръёсты золгес яратэ но Библиысь примеръёс вылын дышетске. Тӥ быгатоды вӧсь луондэс вунэтыны но мукетъёсызлы выльысь оскыны. Соку тӥляд луозы трос эшъёсты, кудъёсыз тӥледыз ӵыжы-выжыостылэсь но золгес яратозы (Мад. 18:25). Со сяна, туж кулэ, мукетъёсыз но милемлы мед оскозы шуыса. Вуоно статьяысь тодомы, мар со понна кароно.