1. Kay ano nga diri kita nahipapausa nga damu yana an naabat nga waray hira matataporan?

 AN MGA tawo ha kalibotan ni Satanas diri maaram kon hin-o an ira matataporan. Pirme hira dismayado ha panggawi han mga negosyante, politiko, ngan lider han relihiyon. Damu liwat an naabat nga diri nira matataporan an ira kasangkayan, mga amyaw, ngan bisan an ira mga kapamilya. Diri kita dapat mahipausa hini. An Biblia nagtagna: “Ha kataposan nga mga adlaw . . . , an mga tawo magigin . . . diri maunungon, . . . parapakaraot, . . . traydor.” Ha iba nga pagkayakan, ipapakita han mga tawo an personalidad ni Satanas, an dios hini nga sistema, nga diri matataporan.—2 Tim. 3:1-4; 2 Cor. 4:4.

2. (a) Hin-o ngan ano an bug-os naton nga matataporan? (b) Ano an bangin hunahunaon han iba?

² Pero sugad nga mga Kristiano, maaram kita nga bug-os naton nga matataporan hi Jehova. (Jer. 17:7, 8) Kombinsido kita nga hinigugma kita niya ngan ‘diri gud niya papabay-an’ an iya kasangkayan. (Sal. 9:10) Matataporan liwat naton hi Kristo Jesus kay iginhatag niya an iya kinabuhi para ha aton. (1 Ped. 3:18) Ngan ha aton mismo mga eksperyensya, nahibaroan ta nga an Biblia naghahatag hin masasarigan nga giya. (2 Tim. 3:16, 17) Sigurado kita nga matataporan ta hi Jehova, hi Jesus, ngan an Biblia. Pero an iba bangin maghunahuna kon pirme ba nira matataporan an kabugtoan. Kon oo, kay ano nga matataporan ta hira?

3. Ano an aton daku nga pribilehiyo? (Marcos 10:29, 30)

³ Ginpili kita ni Jehova nga magin bahin han pamilya nga nagsisingba ha iya ha bug-os nga kalibotan. Daku gud ini nga pribilehiyo nga nagriresulta hin damu nga benepisyo! (Basaha an Marcos 10:29, 30.) Ha bug-os nga kalibotan, may kabugtoan kita nga nahigugma liwat kan Jehova pariho ha aton ngan nagbubuhat  han ira pinakamaopay nga magkinabuhi uyon ha iya mga suruklan. Bangin iba ha ira an aton linggwahe, kultura, ngan pamado, pero hinigugma na naton hira bisan kon bag-o ta pa la hira nga nakilala. Nalilipay gud kita nga makaupod hira ha pagdayaw ngan pagsingba ha aton mahigugmaon nga Amay ha langit.—Sal. 133:1.

4. Kay ano nga kinahanglan naton an aton kabugtoan?

⁴ Yana labaw ha kakan-o pa man, kinahanglan magpabilin kita nga kaurosa han aton kabugtoan. May mga panahon nga ginbubuligan kita nira nga pas-anon an aton mga dinara. (Roma 15:1; Gal. 6:2) Gindadasig liwat kita nira nga magpabilin nga aktibo ha pag-alagad kan Jehova ngan marig-on ha espirituwal. (1 Tes. 5:11; Heb. 10:23-25) Hunahunaa an aton aabaton kon waray kita han proteksyon han kongregasyon basi mabuligan kita nga magin marig-on kontra ha aton mga kaaway—hi Satanas nga Yawa ngan an iya maraot nga kalibotan. Diri mag-iiha, aatakehon na ni Satanas ngan han mga kontrolado niya an mga alagad han Dios. Imadyina an aton magigin daku nga pagpasalamat nga makarawat an suporta han aton kabugtoan!

5. Kay ano nga bangin makurian an iba nga tumapod ha kabugtoan?

⁵ Pero nakukurian an iba nga tumapod ha kabugtoan, posible kay may bugto nga nagsumat hin kompidensyal nga butang o waray niya tumana an usa nga saad. O bangin may ginyakan o ginbuhat an usa nga igkasi-tumuroo nga nakapasakit gud ha ira. Kon mahitabo ito, bangin makurian kita pagtapod ha iba. Kon sugad, ano an makakabulig ha aton nga tumapod ha aton kabugtoan?

6. Paonan-o an gugma makakabulig ha aton nga tumapod ha iba? (1 Corinto 13:4-8)

⁶ Gugma an basihan han pagtapod. Iginhuhulagway han 1 Corinto kapitulo 13 an damu nga bahin han gugma nga makakabulig ha aton  nga tumapod ha iba o ibalik an aton pagtapod ha ira. (Basaha an 1 Corinto 13:4-8.) Pananglitan, an bersikulo 4 nasiring nga “an gugma pasensyoso ngan buotan.” Hi Jehova pasensyoso ha aton bisan kon nakakasala kita ha iya. Salit kinahanglan magin pasensyoso kita ha aton kabugtoan kon may nayayakan hira o nabubuhat nga nakakaaringit o nakakapasakit ha aton. Siring liwat han bersikulo 5: “[An gugma] diri naaaghat nga masina. Diri ito nag-iihap han karat-an.” Diri naton karuyag ‘mag-ihap han karat-an,’ karuyag sidngon, padayon nga hinumdoman an mga nahimo han kabugtoan nga nakapasakit ha aton. Sumala ha Eclesiastes 7:9, diri kita dapat ‘magdagmit ha pagkasina.’ Mas maopay gud nga sundon an ginsiring ha Efeso 4:26: “Ayaw pabay-i nga matunod an adlaw nga nasisina pa kamo”!

7. Paonan-o an mga prinsipyo nga mababasa ha Mateo 7:1-5 mabulig ha aton nga magkaada pagtapod?

⁷ Mabubuligan liwat kita nga tumapod ha aton kabugtoan kon susubaron naton an panhunahuna ha ira ni Jehova. Hinigugma hira han Dios ngan diri niya gin-iihap an ira mga sala. Diri ta liwat ito dapat buhaton. (Sal. 130:3) Imbes nga magpokus ha ira mga sayop, dapat kita mangalimbasog nga kitaon an ira mag-opay nga kalidad ngan hunahunaon an ira potensyal ha pagbuhat han maopay. (Basaha an Mateo 7:1-5.) Natoo kita nga diri nira intensyon nga pasakitan kita, kay an gugma “natuod ha ngatanan nga butang.” (1 Cor. 13:7) Diri hito karuyag sidngon nga naglalaom hi Jehova nga basta na la kita tumapod ha iba; lugod, naglalaom hiya nga matapod kita ha ira kay iginpakita nira nga matataporan hira. *

8. Paonan-o ka mahibabaro pagtapod ha kabugtoan?

⁸ An pagtapod, pariho han respeto, kinahanglan pagtrabahoan, ngan nagkikinahanglan ito hin panahon. Paonan-o ka mahibabaro pagtapod ha kabugtoan? Kilalaha hira hin maopay. Pakiistorya ha ira ha mga katirok. Pakig-upod ha ira ha ministeryo. Magin pasensyoso ha ira, ngan tagi hira han oportunidad nga ipakita nga matataporan hira. Ha siyahan, bangin limitado la an imo isusumat nga mga detalye parte ha imo ha usa nga ginkikilala mo pa la. Samtang mas nakikilala mo hiya, bangin magin mas komportable ka na ha pagsumat han imo inaabat. (Luc. 16:10) Pero ano an imo mahihimo kon may ginbuhat an usa nga bugto nga nakawara han imo pagtapod? Ayaw dayon taposa an iyo pagkamagsangkay. Lugod, palabya anay an panahon. Ngan ayaw tuguti nga an ginbuhat han pipira makawara han imo pagtapod ha iba pa nga kabugtoan. May kalabotan hini, aton hihisgotan an ehemplo han pipira nga matinumanon nga surugoon ni Jehova nga padayon nga tinapod ha iba bisan kon napasubo hira han pipira.

9. (a) Paonan-o hi Hana padayon nga tinapod ha kahikayan ni Jehova bisan pa han mga sayop han pipira Niya nga representante? (b) Ano an igintututdo ha imo han eksperyensya ni Hana mahitungod ha pagtapod ha kahikayan ni Jehova? (Kitaa an piktyur.)

⁹ Napasubo ka na ba han panggawi han usa nga tigurang? Kon oo, makakabenepisyo ka ha paghunahuna han ehemplo ni Hana. Hito nga panahon, an hitaas nga saserdote nga hi Eli an nangunguna ha pagsingba kan Jehova ha Israel. Pero an iya pamilya diri maopay nga susbaranan. An iya mga anak, nga mga saserdote, pirme naghihimo hin mangil-ad ngan imoral nga mga buhat; pero haros waray ginhimo an ira tatay para sawayon hira. Waray dayon tanggala ni Jehova hi Eli ha iya katungdanan. Pero waray talikdi ni Hana an kahikayan han Dios pinaagi  ha pagdumiri nga magsingba ha tabernakulo samtang hi Eli an hitaas nga saserdote. Han nakita ni Eli hi Hana nga nag-aampo nga duro an kasakit, sayop nga naghunahuna hiya nga hubog hi Hana. Waray man la niya usisaha kon ano gud an kahimtang; lugod, ginsaway niya inin nasasákit nga babaye. (1 Sam. 1:12-16) Bisan pa hito, nagsaad hi Hana nga kon magkaanak hiya hin lalaki, dadad-on niya an bata basi mag-alagad ha tabernakulo, diin aatamanon hiya ni Eli. (1 Sam. 1:11) Kinahanglan pa ba gihapon tadungon an panggawi han mga anak ni Eli? Oo, ngan ha urhi ginsirotan hira ni Jehova. (1 Sam. 4:17) Hi Hana naman ginbendisyonan han Dios hin anak nga lalaki, hi Samuel.—1 Sam. 1:17-20.

10. Paonan-o hi Hadi David padayon nga tinapod ha iba bisan kon may mga nagtraydor ha iya?

¹⁰ Gintraydoran ka na ba hin duok nga sangkay? Kon oo, hunahunaa an naeksperyensyahan ni Hadi David. Usa han iya kasangkayan amo hi Ahitofel. Pero han gintestingan han anak ni David nga hi Absalom nga agawon ha iya tatay an pagkahadi, hi Ahitofel inupod kan Absalom ha pagrebelde. Sigurado nga nasakitan gud hi David nga mawad-an han suporta han iya anak ngan han lalaki nga iya ginhuhunahuna nga sangkay! Pero waray tuguti ni David ini nga pagtraydor nga makapaundang ha iya ha pagtapod ha iba. Padayon nga tinapod hiya ha usa pa nga maunungon nga sangkay, hi Husai, nga nagdumiri pag-upod ha pagrebelde. May mag-opay nga rason hi David nga tumapod ha iya. Ginpamatud-an ni Husai nga maopay hiya nga sangkay; iginbutang pa ngani niya ha peligro an iya kinabuhi basi buligan hi David.—2 Sam. 17:1-16.

11. Ha ano nga paagi nagpakita hin pagtapod an usa nga surugoon ni Nabal?

¹¹ Hunahunaa liwat an ehemplo nga iginpakita han usa nga surugoon ni Nabal. Mahigugmaon nga ginproteksyonan ni David ngan han iya mga tawo an mga surugoon han Israelita nga hi Nabal. Paglabay han panahon, ginhangyo ni David an riko nga hi Nabal nga maghatag ha mga tawo ni David hin anoman nga pagkaon nga sobra ni Nabal. Han nagdumiri hi Nabal hinin simple nga hangyo, nasina gud hi David salit nagdesisyon hiya nga pamatayon an tanan nga lalaki ha panimalay ni Nabal. Iginsumat han usa nga surugoon an sitwasyon ha asawa ni Nabal nga hi Abigail. Kaapi hiya han panimalay, ngan maaram  hiya nga hi Abigail an makakatalwas han iya kinabuhi. Imbes nga pumalagiw, tinapod hiya nga matutuhay ni Abigail an kahimtang. Nagkaada hiya hito nga pagtapod kay hi Abigail kilala nga maaramon nga babaye. Nakita ha sunod nga nahitabo nga may basihan an iya pagtapod. Maisugon nga ginios hi Abigail pinaagi ha pagkombinse kan David nga diri idayon an iya plano. (1 Sam. 25:2-35) Tinapod hiya nga magios hin maaramon hi David.

12. Paonan-o iginpakita ni Jesus nga natapod hiya ha iya mga disipulo bisan pa han ira mga sayop?

¹² Hi Jesus tinapod ha iya mga disipulo bisan pa han ira mga sayop. (Juan 15:15, 16) Han naghangyo hira Santiago ngan Juan kan Jesus hin espesyal nga posisyon ha Ginhadian, waray niya kwestyona an ira motibo ha pag-alagad kan Jehova o tanggala hira ha pagin mga apostol. (Mar. 10:35-40) Ha urhi, ginbayaan hi Jesus han tanan niya nga disipulo han gab-i nga gin-aresto hiya. (Mat. 26:56) Pero waray hiya mawad-i hin pagtapod ha ira. Maaram gud hiya han ira mga kaluyahan; kondi “ginhigugma niya hira tubtob ha kataposan.” (Juan 13:1) Gintokahan pa ngani han binanhaw nga hi Jesus an iya 11 nga matinumanon nga apostol han importante nga responsabilidad nga manguna ha panhimo hin disipulo nga buruhaton ngan mag-ataman han iya presyoso nga mga karnero. (Mat. 28:19, 20; Juan 21:15-17) Waray hiya magsayop ha pagtapod hinin diri perpekto nga kalalakin-an. Hira ngatanan matinumanon nga nag-alagad tubtob nga natapos an ira kinabuhi ha tuna. Sigurado nga hi Hana, hi David, an surugoon ni Nabal, hi Abigail, ngan hi Jesus nagpakita hin maopay nga ehemplo ha pagtapod ha diri perpekto nga mga tawo.

13. Ano an posible makaulang ha aton ha pagtapod ha iba?

¹³ May igintapod ka ba nga kompidensyal nga impormasyon ha usa nga brother, ngan ha urhi nahibaroan mo nga iginsumat niya ito ha iba? Makasurubo gud ito. Makausa, may sister nga nagsumat hin personal nga butang ha usa nga tigurang. Kinabuwasan, tumawag an asawa han tigurang basi dasigon an sister, ngan klaro nga maaram hiya han pribado nga iginsumat ha tigurang. Diri urusahon nga nawara an pagtapod han sister hito nga tigurang. Pero ginbuhat la gihap niya an tama ngan nangaro hin bulig. Nakiistorya hiya ha iba nga tigurang, nga binulig ha iya nga maibalik an iya pagtapod ha mga tigurang.

14. Ano an nakabulig ha usa nga brother nga maibalik an iya pagtapod?

¹⁴ Usa nga brother an maiha na nga nasisina ha duha nga tigurang nga para ha iya diri niya matataporan. Pero ginhunahuna niya an ginsiring han usa nga brother nga iya gud ginrirespeto. Ini an simple pero mapwersa nga mga pulong: “Hi Satanas an kaaway, diri an aton kabugtoan.” Ginhunahuna ito hin maopay ngan igin-ampo han brother, ngan ha urhi nakigmurayaw hiya ha duha nga tigurang.

15. Kay ano nga bangin mag-iha anay antes maibalik an pagtapod? Paghatag hin ehemplo.

¹⁵ Nawad-an ka na ba hin pribilehiyo? Mahimo ito magin masakit nga eksperyensya. Hi Grete ngan an iya nanay maunungon nga mga Saksi ha Nazi Germany ha dekada han 1930 han igindidiri an aton buruhaton. Nakapribilehiyo hiya nga mag-type hin mga kopya han The Watchtower para ha iya mga igkasi-tumuroo. Pero han nahibaroan han kabugtoan nga an iya tatay nakontra ha kamatuoran, gintanggalan nira hiya hito nga pribilehiyo, kay nahadlok hira nga an iya tatay maghahatag ha mga parakontra hin impormasyon parte ha kongregasyon. Diri la ito an nagin problema ni Grete. Ha bug-os nga panahon han Girra ha Kalibotan II, waray tapuri han kabugtoan hi Grete ngan an iya nanay nga magkaada mga kopya han mga  magasin ngan nadiri pakiistorya ha ira kon nagkakatapo ha dalan. Masakit gud ini kan Grete, ngan nag-iha anay antes niya mapasaylo ito nga kabugtoan ngan taporan hira utro. Pero ha urhi, iya ginkarawat nga sigurado nga napasaylo na hira ni Jehova, salit dapat liwat niya ito buhaton. *

16. Kay ano nga kinahanglan naton lamposan an mga ulang ha pagkaada pagtapod?

¹⁶ Kon nagkaada ka puropariho nga masakit nga eksperyensya, pangalimbasugi nga maibalik an imo pagtapod. Bangin magkinahanglan ka hin panahon, pero magigin sulit an imo mga paningkamot. Ha pag-ilustrar, kon nakaeksperyensya na kita nga mag-uro-suka tungod han aton nakaon, bangin magin mas mahirot na kita ha aton kakaunon. Pero diri tungod kay nahitabo ito ha aton, diri na kita makaon. Ha pariho nga paagi, diri ta dapat tugotan an usa nga maraot nga eksperyensya nga magpaluya han aton pagtapod ha tanan naton nga kabugtoan, nga maaram kita nga diri perpekto. Kon iginbabalik ta an aton pagtapod, magigin mas malipayon kita ngan mas makakapokus ha puydi naton buhaton basi magkaada pagtapod ha sulod han kongregasyon.

17. Kay ano nga importante gud an pagtapod, ngan ano an aton hihisgotan ha sunod nga artikulo?

¹⁷ An pagtapod talagsahon na la ha kalibotan ni Satanas, pero an pagtapod nga iginbase ha gugma nakikita ha aton nga magburugto ha bug-os nga kalibotan. Nakakadugang ito han aton kalipay ngan pagkaurosa yana ngan magigin proteksyon kon makaeksperyensya na kita hin mga kakurian ha tiarabot. Ano man kon may nakapasubo ha imo ngan nawara an imo pagtapod ha iya? Pangalimbasugi nga subaron an panhunahuna ni Jehova, iaplikar an mga prinsipyo ha Biblia, kultibara an hilarom nga gugma ha kabugtoan, ngan mahibaro tikang ha mga ehemplo ha Biblia. Mahimo ta malamposan an aton nasakitan nga pagbati ngan maibalik an pagtapod ha iba. Kon bubuhaton ta ito, makakarawat naton an bendisyon ha pagkaada damu nga kasangkayan “nga mas maunungon pa kay hin bugto.” (Prob. 18:24) Pero diri igo nga tumapod kita ha iba; kinahanglan ipakita liwat naton nga matataporan kita. Ha sunod nga artikulo, hihisgotan ta kon paonan-o naton mapapamatud-an nga matataporan kita han aton kabugtoan.