1. მუშენ ვამკვენა, ნამდა ქვეყნიერებას ადამიანეფს უჭირა ართიანიშ ნდობა?

 ᲡᲐᲢᲐᲜᲐᲨ ქვეყნიერებას ადამიანეფს ვა უჩქნა, მის შილებე ენდან. თინეფს ირიათო აღორენა ბიზნესმენეფ დო პოლიტიკურ დო რელიგიურ ლიდერეფ. ბრელ მუშ მეგობრეფს, მეზობელეფს დო ოჯახიშ წევრეფს ხოლო ვანდჷ. მარა თე ირფელ ვამკვენა, მუშენდა ბიბლიას ნაწინასწარმეტყველებ რე: „ბოლო დღალეფს, ხალხ იჸუაფ, ართგურობა ვა უჩქუნ ფერ, ტყურაშ ეკმაწამებელ, მოღალატე“. შხვა სიტყვეფით ქოფთქუათინ, ადამიანეფ ქაგურუდეს თე ქვეყნიერებაშ ღორონთის, სატანას, ნამდგაშ ნდობა მუთუნით ვეშილებე (2 ტიმ. 3:1—4; 2 კორ. 4:4).

2. ა) მის შემლებნა სრულას ვენდათ? ბ) მუ შილებე ნამთინეს ოეჭვუდას?

² მუჭოთ ქრისტიანეფს, მიჩქნა, ნამდა შემლებნა სრულას ვენდათ იეჰოვას (იერ. 17:7, 8). ჩქი დარწმუნებულ ვორეთ, თის ვუჸორთ დო დღას ვემიოტენს მუშ მეგობრეფს (ფსალმ. 9:10). თეწკუმა ართო, შემლებნა ვენდათ იესო ქრისტეს, მუშენდა თიქ სიცოცხლე გაწირ ჩქინო (1 პეტ. 3:18). თეს გეძინელ, ჩქინ დუდშა მაფნა გიმოცადებულ, ნამდა ბიბლიას სანდო ხემძღვანელობა რე მოჩამილ (2 ტიმ. 3:16, 17). თაშ ნამდა, შემლებნა ვენდათ იეჰოვას, იესოს დო ბიბლიას. მარა ნამთინეს შილებე ოეჭვუდას, ქეშულებ დო ვარ ირიათო ენდას და დო ჯიმალეფს კრებას. მუშენ შემლებნა ვენდათ და დო ჯიმალეფს?

3. მუ დიდებულ პატი მიღნა? (მარ. 10:29, 30)

³ იეჰოვაქ გიშაბგორეს, ნამდა ვორდათ თიშ თაყვანიშმცემლეფიშ მსოფლიო ოჯახიშ ნაწილ. უბრალოთ დეფიქრით, მუშმადიდა პატი რე თენა დო მუშმადიდა ჯგირობუა მოუღ თის ჩქინდა (წეკითხით მარკოზიშ 10:29, 30). მთელ მსოფლიოს ჩქი პჸუნა და დო ჯიმალეფ, მიდგას ჩქინცალო უჸორა იეჰოვა დო ირნერო ოცადნა, იცხოვრან თიშ ნორმეფით. მართალ რე, შხვადოშხვა ნინაშა იფჩიებუთ, შხვადოშხვანერ კულტურა დო მიკაქუნალ მიღნა, მარა მუჟამსით პირველო  ვორწყეთ ართიანს, თე დროს ხოლო გიმიფრჩქინანთ და დო ჯიმალეფიშ ჸოროფას. განსაკუთრებულო მიჸორა თინეფწკუმა ართო ჩქინ მოჸოროფე ზეციერ მუმაშ განდიდება და თაყვანიშცემა (ფსალმ. 133:1).

4. მუშენ მოსაჭირნა და დო ჯიმალეფ?

⁴ ჩქი ასე არძაშ უმოსო მოსაჭირნა ართობა მიღდან და დო ჯიმალეფწკუმა. თინეფ ელამრენა დო მოხვარნა ცხოვრებისეულ ოღალიშ ღალას (რომ. 15:1; გალ. 6:2). თეს გეძინელ, მოხვარნა აქტიურო მიბღათ მონაწილება იეჰოვაშ მსახურებას დო ვა ვოდინუათ სულიერ სიმტკიცე (1 თეს. 5:11; ებრ. 10:23—25). წერმიდგინით, და დო ჯიმალეფ ველამრდანინ, მუჭო გამჭირდუდეს, ქივეწინააღმდეგითკო ჩქინ საერთო ნტერს — სატანას დო უბადო ქვეყნიერებას. მალას სატანა დო თინეფ, მიდგას თინა აკონტროლენს, დუდის ქიგიანთხუნა ღორონთიშ ხალხის. მუნერ მარდულეფ იპჸუაფუთ, მუჟამსით თეცალ დროს ხვალე ვეპჸით დო და დო ჯიმალეფ ელამრდან იჸი.

5. მუშენ შილებე მინშა ნამთინეს უჭირდას და დო ჯიმალეფიშ ნდობა?

⁵ ნამთინეს უჭირს და დო ჯიმალეფიშ ნდობა, შილებე თიშ გურშენ, ნამდა თანამორწმუნექ მუშ საიდუმლო შხვას ქუწუ ვარდა დუნაპირებ ვეშეასრულ. მინშა მიზეზ თინა ხოლო რე, ნამდა თანაქრისტიანქ თიცალ მუდგარენ თქუ ვარდა აკეთ, მუდგათ გურ მანგარო უწყუნუ. თეცალ სიტუაციეფიშ უკულ შილებე ძნელ რდას შხვეფიშ ნდობა. მუ მიმეხვარებნა, გემამნგარათ თანამორწმუნეეფიშ ნდობა?

6. მუჭო შეულებ ჸოროფას მიმეხვარან ნდობაშ გამანგარებას? (1 კორ. 13:4—8)

⁶ ნდობა ჸოროფაშა რე გერსხილ. 1 კორინთელეფიშ მა-13 დუდ ეჭარუნს ჸოროფაშ ბრელ მხარეს, ნამუთ მოხვარნა, გემამნგარათ ვარდა დიფრთინუათ შხვეფიშ მიმართ ნდობა (წეკითხით 1 კორინთელეფიშ 13:4—8). მაგალთო, მა-4 მუხლის ჭარჷ: „ჸოროფა ითვინენს დო ჯგირს აკეთენს“.  იეჰოვა მოთვინებას გიმირჩქინანს ჩქინ მიმართ, მუჟამსით თიშ წინააღმდეგ ვაშენთ. ჩქი ხოლო შემლებნა მუთვინათ და დო ჯიმალეფს, მუჟამსით თინეფ თიცალ მუდგარენს ქოთქუანა ვარდა გაკეთენა, მუთ მოწყინნა ვარდა მუდგაშ გურშენ გურ ალმაჭუნა. მა-5 მუხლის იგრძელებ: „[ჸოროფა] ვეღიზიანებ დო წყენას გურშა ველედვანს“. ჩქი ვამკონა, წყენა გურშა ალებდვათ დო უკულ ქუგუშინათ დაშებულ. ეკლესიასტეშ 7:9 იჩიებ: „ხეთეშე ვეგეწყინას“. მუ ჯგირ იჸუაფ, მივაჸუნათ რჩევას, ნამუთ ეფესოელეფიშ 4:26-ის ჭარჷ: „ჩხანაქ თეშ ვენორთას, ნამდა გურმულირეფქ ქუდოსქიდათ“.

7. მუჭო მიმეხვარებნა მათეშ 7:1—5-ის მოჩამილ პრინციპეფ, გუვამანგარათ შხვეფიშ მიმართ ნდობა?

⁷ ხოლო ართ საშვალება, მუთ მიმეხვარებნა, გემამნგარათ და დო ჯიმალეფიშ ნდობა, თინა რე, ნამდა იეჰოვაშ თოლით ვუჯინათ თინეფს. ღორონთის უჸორს მუშ მსახურეფ დო მთელ ყურადღება თინეფიშ ცოდვეფშა ვაფჷ გინოღალირ. თაშ ოკო ვორდათ ჩქი ხოლო (ფსალმ. 130:3). თიშ მანგიორო, ნამდა ყურადღება და დო ჯიმალეფიშ შეცდომეფშა მაფდან გინოღალირ, ირნერო ვეცადათ, ქობძირათ თინეფიშ ჯგირ თვისებეფ დო პოტენციალ (წეკითხით მათეშ 7:1—5). ჸოროფას „ირფელიშ წანს“, ათეშენ ბჯერა, თინეფს ჩქინდა გურიშ წყუნაფა ვარინ, ჯგირიშ კეთება ოკონა (1 კორ. 13:7). თენა ვა ნიშნენს, ნამდა იეჰოვას ოკო, შხვეფს თოლწკურილო ვენდათ. თეშ მანგიორო, თის ოკო, და დო ჯიმალეფს თიშენ მივენდათ, ნამდა დამტკიცეს თინეფშა ინდებენ. *

8. მუჭო შეილებნა გავითარათ და დო ჯიმალეფიშ მიმართ ნდობა?

⁸ ნდობას, მუჭოთ პატიცემას, დამსახურება ოკო, მუდგას დრო ოსაჭირ. მუჭო შეილებნა გავითარათ და დო ჯიმალეფიშ მიმართ ნდობა? უჯგუშო გეჩინებაფეთ თინეფ, ქუდურაგადეთ კრებაშ შეხვალამეფიშ დროს, დაგეგმით თინეფწკუმა ართო მსახურება, მუთვინით დო ქიმეჩით საშვალება, დამტკიცან, ნამდა რენა სანდოეფ. დუდშე შილებე თქვან პირად საკითხეფიშ გურშენ ირფელ ვა უწუათ თის, მიდგას ასე იჩინებაფუანთ. მარა მუთ უმოსო გეჩინებაფუანთ, შილებე უმოსო გაჸუან გურქ, ქეჩუათ თქვან გრძნობეფიშ გურშენ (ლუკ. 16:10). თანამორწმუნეშ მიმართ ნდობაქ მეიდინეს-და, მუ ოკო აკეთათ? ხეთეშე ვემიოტუათ თიწკუმა ჯგირ ურთიერთობა დო დრო გეგშეშქვით. მუსხირენ ადამიანიშ თეცალ არასწორ საქციელს ვემეჩათ საშვალება, შხვა და დო ჯიმალეფიშ ნდობა ხოლო მეიდინუან. გუვარჩუათ ღორონთიშ ართგურ მსახურეფიშ მაგალითეფ, მიდგას ვა უდინუაფნა შხვეფიშ ნდობა თიშ უმკუჯინუო, ნამდა ნამთინექ გურ გოუტახ.

9. ა) მუჭო ვადინუ ხანაქ იეჰოვაშ ხემძღვანელობაშ ნდობა თიშ ნამთინე წარმომადგენელიშ შეცდომეფიშ უმკუჯინუო? ბ) მუს გოგურუანა ხანაშ შემთხვევა იეჰოვაშ ხემძღვანელობაშ ნდობაშ გურშენ? (ქოძირით სურათ).

⁹ პასუხიშმგებელ ჯიმაშ საქციელს დღას ქუწყუნუაფნო თქვანდა გურ? თაშ ქორენ-და, ხანაშ მაგალითიშ გარჩიება მანგარო მიგეხვარებნა. თი დროს ისრაელს არძაშ უმოს დიდ სულიერ პასუხიშმგებლობა მღვდელმთავარ ელის უღუდ, მარა თიშ ოჯახიშ წევრეფ სამაგალითოეფ ვა რდეს. თიშ ქომოლსქუალეფ, მით მღვდელეფო მსახურენდეს, უზნეო ცხოვრებას მეჸუნდეს დო ელის ბრელ მუთუნ ვა უკეთებ სქუალეფიშ გიშასწორებელო. მარა იეჰოვას ხეთეშე ვემდუღალ თიშა პასუხიშმგებლობა. თეშ უმკუჯინუო, ხანას ოჭიშ ვა ურთინუაფ იეჰოვაშ ხემძღვანელობაშა დო თაყვანს ცენდჷ თის კარავს, თი პერიოდის  ხოლო, მუჟამსით თექ მღვდელმთავარო ელი მსახურენდჷ. გურაკოჭირებულ ხანა ლოცულენდუნ თეშ ქოძირუნ, ელიქ არასწორო იფიქრჷ, შუმილ რენია დო ფაქტეფ ვეგნუმოწმებუნ თეშ გუდღან თე განწარებულ ოსურკოჩის (1 სამ. 1:12—16). ხანაქ აღთქმა დოდვჷ, მუდგაშ მიხედვით ქომოლსქუა ქაშიდ-და, თის იეჰოვას მეუძღვინენდჷ, დო თე აღთქმა ვა უთირუ თიშ უმკუჯინუო, ნამდა სქუა ელიშა აჸიდ ჩაბარებელ (1 სამ. 1:11). ვემუტებნანო ელიშ სქუალეფს უზნეო ცხოვრება? ვარ დო იეჰოვაქ საბოლათ დასაჯ თინეფ (1 სამ. 4:17). ეშობას ღორონთიქ ხანას ქომოლსქუა, სამუელ, ქაჩუქ (1 სამ. 1:17—20).

10. მუჭო ვადინუ დავითიქ შხვეფიშ მიმართ ნდობა გლახა გამოცდილებაშ უმკუჯინუო?

¹⁰ დღას ქოუღალატებნო თქვანდა ხოლოშიან მეგობარს? თაშ ქორენ-და, დეფიქრით, მეფე დავითიშ მაგალითშე. თის ჸუნდჷ მეგობარ, ნამდგას ახითოფელ ჯოხოდ. მუჟამსით დავითიშ ქომოლსქუაქ, აბესალომქ, მინდომ, მეფობა მიდუღკო მუშ მუმას, ახითოფელქ მობუნტეეფიშ მხარეშა გინილ. მუშმანწარა იჸიდ დავითშო, მუჟამსით თის ქოთ სქუაქ დო ქოთ ხოლოშიან მეგობარქ ოჭიშ ქურთინეს. თე შემთხვევაშა დავითის უფლება ვემუჩამ, შხვეფიშ ნდობა ხოლო მეუდინუკო. თინა ონდუდ შხვა მეგობარს, ხუშაის, მიდგაქ ვეგედირთჷ აბუნტებულეფიშ მხარეს. დავითის უღუდ მიზეზეფ, ენდკო ხუშაის, მუშენდა თიქ დამტკიც, ნამდა ჯგირ მეგობარ რდჷ. თიქ დავითიშ გურშენ მუშ სიცოცხლე ხოლო გიორინუ საფრთხეშ თუდო (2 სამ. 17:1—16).

11. მუჭო გიმირჩქინ ნაბალიშ ართ-ართ მსახურქ ნდობა?

¹¹ გუვარჩუათ ნაბალიშ ართ-ართ მსახურიშ მაგალით ხოლო. დავით დო თიშ ხალხ თხილანდეს ისრაელ კოჩიშ, ნაბალიშ, მსახურეფს. ჭიჭე ხანიშ უკულ დავითიქ მუშ ხალხშო ოჭკუმალ ქოთხუ თე მდიდარ კოჩის. მუჟამსით ნაბალქ ვარია უწუ დავითის თე მოკრძალებურ ოთხუალშე, დავითის მანგარო მოურთ გურქ დო გინოჭყვიდ, ნაბალიშ ჸუდეშარეფშე არძა ქომოლკოჩ გეშაჭყვიდკო. ართ-ართ მსახურქ ამბე ქიმუღ ნაბალიშ ოსურს აბიგაილს. მუჭოთ ჸუდეშარეფიშ წევრის, ჯგირო უჩქუდ, ნამდა მუშ სიცოცხლე აბიგაილიშ ხეს რდჷ. ნტებაშ მანგიორო თიქ მიენდჷ აბიგაილს, მუშენდა ჯერდჷ, ნამდა აბიგაილს, ნამდგას გონიერ ოსურკოჩიშ სახელ გეძუდ, შეიალებედ სიტუაციაშ გიშასწორება. მუჭოთ უკულ მიკორჩქინდჷ,  თის მართალო უღუდ ნდობაშ მიზეზ. აბიგაილქ გაბედულო იმოქმედ დო დავითის გეგმეფ დათირაფუ (1 სამ. 25:2—35). თის ჯერდჷ, ნამდა დავით გონივრულო იმოქმედენდჷ.

12. მუჭო ოძირუ იესოქ, ნამდა ონდუდ მუშ მოწაფეეფს თინეფიშ შეცდომეფიშ უმკუჯინუო?

¹² იესო ონდუდ მუშ მოწაფეეფს თიშ უმკუჯინუო, ნამდა თინეფ ჩირთუდეს (იოან. 15:15, 16). მუჟამსით იაკობ დო იოანექ იესოს განსაკუთრებულ ადგილ თხუეს სამეფოს, თის ეჭვიშ თუდო ვეგურინუაფ თინეფიშ მოტივეფ, მუდგაშ გურშენ იეჰოვას ომსახურდეს დო ვართ მოციქულობაშენ უთქუალ თინეფშა ვარია (მარ. 10:35—40). ჭიჭე ხანშა, ჭოფესინ თიმ სერს, თინა არძა მოწაფექ მიოტუ (მათ. 26:56). მარა იესოს თინეფიშ ნდობა დღას ვა უდინუაფ. თის ჯგირო არჩქილედ, ნამდა მოწაფეეფ არასრულყოფილეფ რდეს დო „ბოლოშა უჸორდჷ“ თინეფ (იოან. 13:1). გათელებურ იესოქ მუშ 11 ართგურ მოციქულს სერიოზულ პასუხიშმგებლობეფ მეჩჷ. თინეფ გიორინუ მოწაფეეფიშ მომზადებაშ საქმეშ ხემძღვანელეფო დო ჩაბარ მუშ ძვირფას შხურ (მათ. 28:19, 20; იოან. 21:15—17). თე არასრულყოფილ კათაშ მიმართ იესოშ ნდობა, ნამდვილო ვა ჸოფე უადგილო. მიწიერ ცხოვრებაშ ბოლოშახ, თინეფ ართგურო ომსახურდეს იეჰოვას. თაშ ნამდა, ხანაქ, დავითიქ, ნაბალიშ მსახურქ, აბიგაილქ დო იესოქ არასრულყოფილ ადამიანეფიშ ნდობაშ მანგარ ჯგირ მაგალით დომტუეს.

13. მუ მიზეზიშ გურშენ შილებე გამჭირდან შხვეფიშ ნდობაქ?

¹³ ქუნორღვენანო სიტუაცია, მუჟამსით ჯიმას კონფიდენციალურ ინფორმაცია გეგნოჩით დო უკულ ქიგეგით, ნამდა თინა შხვაშა ქუთქუალ? თენა მართალო გურიშ გუმატახალ იჸუაფუდ. ართ დაქ პირად საკითხიშ გურშენ ქეჩუ უხუცესის დო ჯერდჷ, ნამდა თინა მითინს ვა უწინდჷ. მარა მაჟია დღას უხუცესიშ ოსურქ დურეკ. თის ოკოდ, გურშა ელუკინკო თე დას. ჩიებაშე გემკორჩქინდჷ, ნამდა თე უხუცესიშ ოსურს ირფელ უჩქუდ. მუ გასაკვირ რე, თის თე უხუცესიშ ნდობაქ მეუდინკო?! მარა თე დაქ სწორას მიქცუ დო მოხვარა შხვა უხუცესის ქოთხუ, ნამდგაქ მეხვარ თის, დირთინუკო უხუცესეფიშ ნდობა, თინეფ შქას თი უხუცესიშ ხოლო, მიდგაქ ოწყინებაფუ.

14. მუქ მეხვარ ართ ჯიმას, დირთინუკო ნდობა?

¹⁴ ართ ჯიმა ბრელ ხანს რდჷ ნაწყენ ჟირ უხუცესშე, ნამდგაშე ფიქრენდჷ, ნამდა ვენდებედ. მარა თიქ ქიდიჭყჷ ფიქრ ჯიმაშ ნარაგადშე, ნამდგას მანგარო აფასენდჷ. თენა რდჷ მანგარ მარტივ, მარა მნიშვნელოვან აზრ: „ჩქინ ნტერ სატანა რე დო ვართ ხოლო ჯიმალეფ“. ჯიმაქ ჯგირო დეფიქრჷ თე საკითხშე დო თიშე ხოლო, მუ აფუდ ოკეთებელ. ლოცვაშ უკულ თის საბოლათ შეიალებუ ჟირხოლო უხუცესწკუმა მშვიდობაშ დორთინაფაქ.

15. მუშენ შილებე ნდობაშ დორთინაფას დრო ოსაჭირდას? ქიმიჸონით მაგალით.

¹⁵ კრებას პასუხიშმგებლობეფ ხომ ვა რდინაფნა? თენა თქვანო ადვილ ვეჸუაფუდ. 1930-იან წანეფს გრეტა დო თიშ დიდა ართგურო ომსახურუდეს იეჰოვას ნაცისტურ გერმანიას, მუჟამსით თექ ჩქინ საქმიანობა ვარიებულ რდჷ. გრეტა ხიოლით გინობეშტანდჷ „გინაჯინალ კოშკიშ“ ასლეფს თანამორწმუნეეფშო. მარა მუჟამსით ჯიმალეფქ ქიგეგეს, ნამდა თიშ მუმა მოწინააღმდეგე რდჷ, გინოჭყვიდეს გრეტას მეტო ვა უბეშტუდკო ჟურნალეფ, თიშ შიშით, ნამდა თიშ მუმას კრებაშ გურშენ ინფორმაცია მოწინააღმდეგეეფშა ვეგნუჩამუდკო. მარა გრეტაშ პრობლემა ხვალე თენა ვა რდჷ. მთელ მაჟია მსოფლიო ომიშ პერიოდის ჯიმალეფ გრეტას დო თიშ დიდას ვანდუდეს ჟურნალეფს დო შარას ქეშეხვადუდესინ, დუდის ურიდანდეს თინეფწკუმა ჩიებას. თე ირფელქ გრეტას მანგარო ქელაჭუ გურ. თის დიდ დროქ დესაჭირ, ნამდა ქაპატუკო თე ჯიმალეფს დო დირთინუკო თინეფიშ მიმართ ნდობა. დროშ მიკულაწკუმა ართო, თიქ ქიმეხვად, ნამდა იეჰოვაქ აპატუ  თე ჯიმალეფს დო მუქ ხოლო ოკო აპატუკო. *

16. მუშენ ოკო გივორჯგინათ ირნერ დაბრკოლებას, ნამდა დიფრთინუათ შხვეფიშ მიმართ ნდობა?

¹⁶ თეცალ გურიშ გუმატახალ შემთხვევა თქვა ხოლო ქოიღდეს-და, ქეცადით, დირთინუათ ნდობა. შილებე დროქ დეგესაჭირან, მარა თენა ღირჷ მონდომაშა. მაგალთო, დღას ოჭკუმალით მობწამალეთ-და, უკულ უმოს ფრთხილას გიშაბგორუნდითკონ იჸიდ, მუს ბჭკუმუნდით. მარა ართ ოჭკუმალქ მეცილესინ თიშ გურშენ, ჭკუმუას ხომ ვემვოტენთ? თეშნერო, ართ გლახა შემთხვევას ვემეფჩანთ უფლებას, მემდინუან არძა და დო ჯიმაშ ნდობა, მუშენდა მიჩქნა, არძა არასრულყოფილ ვორეთ. შხვეფიშ მიმართ ნდობას დიფრთინუანთ-და, უმოს ბედნერეფ იპჸუაფუთ დო უჯგუშო შემალებენა თიშა გეგნიბღათ ყურადღება, ჩქი მუ შემლებნა ვაკეთათ, ნამდა კრებას ხე ქეშუნწყუათ ართიანიშ ნდობას.

17. მუშენ რე ნდობა მანგარ მნიშვნელოვან დო მუს გუვარჩიენთ ანწიან სტატიას?

¹⁷ სატანაშ ქვეყნიერებას ადამიანეფ იშვიათო ონდუნა ართიანს. მარა ჩქი ვონდუთ და დო ჯიმალეფს, მუშენდა ნდობა გერსხილ რე თი ჸოროფაშა, მუთ ჩქინ საჯიმალოს უღჷ. თეცალ ნდობა ამდღა ხიოლს დო ართობას უნწყუნს ხეს დო დოფთხილანა მომავალ განსაცდელეფიშ დროს. მიდგარენქ გურ გოიტახ დო თიშ მიმართ ნდობა ქუგაფ დინაფილ-და, მუ ოკო აკეთე? ქეცად, სიტუაციას იეჰოვაშ თოლით ქუჯინე, მიაჸუნე ბიბლიურ პრინციპეფს, გავითარე და დო ჯიმალეფიშ მიმართ დიდ ჸოროფა დო ქიდიგურუე ბიბლიურ მაგალითეფშე. ჩქი შემლებნა გივორჯგინათ გურიშ გოტახუას დო დიფრთინუათ შხვეფიშ მიმართ ნდობა. თაშ გუვაკეთენთ-და, გეფხარენთ ბრელ მეგობარით, მით „ჯიმაშე უმოს ართგურ რე“ (იგავ. 18:24). ნდობა ჟირხოლო მხარეშე ოკო მიშას. უკულიან სტატიას გუვარჩიენთ, მუჭო შემლებნა დუვამტკიცათ, ნამდა ივმსახურენთ და დო ჯიმალეფიშ ნდობას.