1. Ki mannyè nou sa sav si nou sa konfyé an moun?

 AN MOUN lézòt moun sa konfyé ka twavay wèd pou tjenn pwonmèt li èk pou toujou palé lavéwité-a. (Sam 15:4) Lézòt moun sav yo sa dépan asou’y. Nou vlé sé fwè èk sè nou-an konfyé nou. Alò, kisa nou sa fè pou yo sa konfyé nou?

2. Ki sa nou sa fè pou moutwé moun sa konfyé nou?

² Chonjé ou pa sa fòsé moun pou konfyé nou. Mé, nou ni pou ba yo bon wézon pou yo konfyé nou. Adan moun ka di konfyans menm kon lajan. I wèd pou twapé’y, mé i ézé pou pèd li. San dout, Jéhova ja ban nou an chay bon wézon pou nou konfyé’y. Nou sav nou “sa mété tout konfyans [nou] an sa i fè”. (Sam 33:4) Konsa i pa kay janmen ban nou wézon pou pèd konfyans an li. Èk i vlé nou imité’y. (Èfés. 5:1) Annou konsidiwé ègzanp déotwa sèvant Jéhova ki té imité’y èk moutwé yo sé moun lézòt moun sa konfyé. Osi, nou kay idantifyé senk (5) kawaktè ki kay édé nou pou vini moun lézòt moun sa konfyé.

3-4. (a) Ki mannyè pwòfèt Dannyèl té moutwé lézòt moun té sa konfyé’y? (b)  Kisa ègzanp Dannyèl sipozé ankouwajé nou pou mandé kò nou?

³ Pwòfèt Dannyèl sé an bèl ègzanp. Moun té sa konfyé’y. Magwé i té an lapwiz an Babilonn, i té moutwé i sété an nonm moun té sa konfyé èk dépan asou. Èk moun koumansé konfyé’y pli, lè Bondyé édé’y pou èspliké sé wèv-la Nèbyoukadnéza Wa Babilonn té ni. Asou yon lokazyon, Dannyèl té ni pou di wa-a Jéhova pa té plè épi’y. Èk sa sé an konmisyon an wa pa té kay vlé tann pyès. Konsa, sa té pwan an chay kouwaj paski Nèbyoukadnéza té ni an mové kòlè èk i té vyolan! (Dann. 2:12; 4:20-22, 25) Plizyè lanné apwé sa, Dannyèl moutwé ankò moun té sa konfyé’y. I fè sa lè i èspliké konmisyon-an ki té pawèt asou masonn-lan an kay wa-a an Babilonn. (Dann. 5:5, 25-29) Pli ta toujou, Wa Darayòs èvèk sé ofisyé’y-la té òbzòvé Dannyèl té ‘byen entélijan’. Yo té jis di i ‘té onnèt èk la pa té ni pyès néglijans ében anyen mal an mannyè-a i té ka fè twavay li’. (Dann. 6:3, 4) Wi, jis kondwitè ki pa té ka adowé Jéhova ki té sav yo té sa konfyé Dannyèl!

⁴ Kon nou mèdité asou ègzanp Dannyèl, i bon pou nou mandé kò nou: ‘Ki wépitasyon mwen ni épi moun ki pa Témwen Jéhova? Ès yo konnèt mwen kon an moun ki ka pwan wèskonsabilité mwen sèwyé èk kon an moun yo sa konfyé?’ Alò, pouki nou sipozé mandé kò nou sé kwèsyon sala? Sé paski lè nou sé moun lézòt moun sa konfyé kondwit nou ka glowifyé Jéhova.

5. Ki mannyè Hannanayah té moutwé moun té sa konfyé’y?

⁵ An lanné kat san senkant senk (455) avan lépòk nou, Gouvènè Néhimaya fini bati bawad wòch-la oliwon Jérouzalèm. Apwé sa, i chwazi nonm i té sa konfyé pou mété yo wèskonsab vil-la. Anpami sé nonm-lan i té chwazi-a, sété Hannanayah. Èk Hannanayah té ja wèskonsab Fò-a. Bib-la di: ‘Hannanayah sété on nonm moun té sa konfyé, èk i té ni kwentif pou Dyé vwé-a pli pasé an chay lòt moun.’ (Néhi. 7:2) Hannanayah té twavay wèd an népòt asaynman yo té ba’y, paski i té enmen èk i té ni kwentif pou Jéhova. Sé kawaktè sala kay osi édé nou twavay wèd an népòt asaynman nou ni an sèvis Jéhova, èk édé nou fè’y byen.

6. Ki mannyè nou sav zapòt Pòl té ka konfyé Tichikòs?

⁶ Annou konsidiwé ègzanp Tichikòs. I sété on fwè zapòt Pòl té ka konfyé. Lè moun an lotowité pa té pèwmité zapòt Pòl pou kité kay li, i té sa dépan asou Tichikòs. I di, Tichikòs “ka fè twavay Senyè-a épi tout tjèʼy”. (Èfés. 6:21, 22) Pòl té ni si tèlman konfyans an Tichikòs, i ba’y pòté sé lèt-la i té ékwi bay sé fwè-a an Èfésòs èk an Kòlòsé. Èk osi i ba’y wèskonsabilité-a pou ankouwajé yo èk soulajé yo. Tichikòs ka fè nou chonjé sé nonm fidèl-la jòdi jou ki ka twavay wèd pou édé nou tjenn wilasyon nou épi Jéhova fò.​—Kòl. 4:7-9.

7. Pouki nou sa konfyé sé ansyen-an èk sé sèvant ministiriyal-la?

⁷ Menm kon Dannyèl, Hannanayah, èk Tichikòs, sé ansyen-an èk sé sèvant ministiriyal-la ka pwan wèskonsabilité yo byen sèwyé èk ka twavay wèd an asaynman yo. Konsa, nou ka vwéman apwésyé èk konfyé yo. Pou ègzanp, lè nou atandé sé mitin-lan nou asiwé nou kay ni tout sé pa-a asou pwogwanm-lan. Èk lè nou envité moun pou atandé mitin, nou pa ka pè sé fwè-a kay mantjé on pòsyon asou pwogwanm-lan. Osi sé anyen-an ka apwésyé lè tout moun ki ni asaynman, pwépawé èk pwézanté asaynman yo byen! Lè’y vini pou minis-la, nou asiwé nou kay ni sé piblikasyon-an nou bizwen pou fè twavay nou. Wi, sé fwè-a ka otjipé nou byen, èk nou ka wimèsyé Jéhova pou yo toubonnman! Kanmenm, an ki mannyè nou sa moutwé moun yo sa konfyé nou, menm kon nou ka konfyé sé ansyen-an èk sé sèvant ministiriyal-la?

8. Pouki nou sipozé pwan pokosyon lè nou ka moutwé lantéwé an sè fwè èk sè nou-an? (Pwovèb 11:13)

⁸ Nou vwéman kontan sé fwè èk sè nou-an, èk nou antéwésé an yo. Mé nou ni pou pwan pokosyon. Nou pa vlé di lòt moun zafè yo, sitou si sé bagay nou sipozé tjenn an sigwé. An pwèmyé syèk-la, la té ni Kwityen ki té “ka palé moun mal épi fouyé kò yo an zafè moun, ka di bagay yo pa sipozé di”. (1 Tim. 5:13) Alò nou pa vlé swiv ègzanp sala. Pou ègzanp, on sésé pé di nou konsèné on pwoblenm i ni épi santé’y, ében konsèné on difikilté i ka èspéyansé. Mé si sésé-a pa vlé nou di pyèsonn sa i di nou, nou vlé tjenn sigwé’y. b (Li Pwovèb 11:13.) Apwézan annou diskité lòt sitiwasyon koté nou sipozé tjenn on sigwé.

9. Kisa chak moun an fanmi-an sa fè pou fanmi’y sa konfyé’y?

⁹ Fanmi’w sipozé sa konfyé’w. Chak moun an fanmi-an sipozé pwan pokosyon pou pa palé konsèné sèten bagay ki ka fèt an fanmi-an. Pou ègzanp, pitèt on madanm ni on labitid ki ka fè mawi’y wi. Ès mawi-a kay di lézòt konsèné labitid sala épi fè madanm li hont? Mé non! I enmen madanm li, konsa i pa té kay fè anyen pou blésé’y. (Èfés. 5:33) Osi kon manmay ka pwofité yo vlé moun wèspèkté yo, èvèk pawan ni pou wéyalizé sa. Konsa, yo pa kay di moun konsèné lèwè ich yo pou fè yo hont. (Kòl. 3:21) Èvèk manmay ni pou apwann pou pa palé konsèné sèten bagay ki ka fèt an fanmi-an, paski yo pa vlé anbawasé pyèsonn an fanmi-an. (Dito. 5:16) Anfen, lè chak moun an fanmi-an fè tout sa yo pé pou pa palé konsèné sèten bagay an fanmi-an, fanmi-an kay vini pli pwé yonn a lòt.

10. Ki mannyè ou sa moutwé ou sé on bon jan? (Pwovèb 17:17)

¹⁰ Jan’w sipozé sa konfyé’w. Nou tout bizwen on bon jan pou palé épi. Mé sa pa toujou ézé pou fè, paski délè nou ni pou palé konsèné bagay ki ofon tjè nou. Èk délè nou ka katjilé mannyè i té kay kwazé tjè nou si moun-lan nou palé épi-a, di lézòt moun sa nou té di’y an konfyans. Kanmenm, nou ka apwésyé lè nou ni on jan nou sa konfyé èk ki pa kay di pyèsonn sa nou di’y! Wi on jan kon sa, sé ‘an bon jan.’​—Li Pwovèb 17:17.

11. (a) Ki mannyè sé ansyen-an épi madanm yo sa moutwé nou sa konfyé yo? (b) An pòtwé-a, yon ansyen adan on mitin, èk apwé i épi fanmi’y. Kisa nou sa apwann an ègzanp ansyen sala?

¹¹ Sé fwè èk sè-a sipozé sa konfyé’w. Ansyen ki pa ka di lòt moun sa nou di yo an konfyans, ‘menm kon on plas pou moun séwé hòd van-an, èk yon plas moun sa twapé pwotèksyon’. (Izay. 32:2) Nou sav nou sa palé épi sé ansyen-an ofon tjè nou, èk nou ni asiwans-lan yo pa kay di lòt moun sa nou di yo an konfyans. Osi nou pa ka ba yo chalè pou yo ban nou enfòmasyon yo sipozé tjenn an konfyans. An plis di sa, nou ka apwésyé madanm sé ansyen-an paski yo pa ka fouyé mawi yo pou twapé enfòmasyon konsèné bagay yo pa sipozé konnèt. Vwéman, i sé on bennédiksyon lè madanm yon ansyen pa konnèt enfòmasyon pèsonnèl konsèné sé fwè èk sè-a. Madanm yon ansyen di: “Mwen si tèlman kontan mawi mwen pa ka di mwen anyen i sipozé tjenn an konfyans konsèné sé fwè èk sè-a yo ka bay èd. I pa ka menm di mwen non sé fwè èk sè sala. Mwen ka apwésyé sa, paski mwen pa ni pou twakasé lidé mwen konsèné sé bagay sala. Èk paski i pa ka di mwen zafè sé fwè èk sè-a mwen pa ka santi jennen lè mwen ka palé épi yo. Osi mwen ni asiwans-lan, lè mwen di mawi mwen on bagay pèsonnèl mwen sav i pa kay di pyèsonn sa mwen di’y.” Kanmenm, nou tout vlé vini moun sé fwè èk sè-a sa konfyé. Ki kawaktè ki kay édé nou fè sa? Annou konsidiwé senk (5) an sé kawaktè sala.

12. Poutji nou sa di si nou ni lanmityé moun kay sa konfyé nou? Ban yon ègzanp.

¹² Lanmityé sé pli enpòtan kawaktè-a ki sa édé nou vini moun lézòt sa konfyé. Jézi di sé dé (2) pli gwo koumandman-an sé, lanmityé pou Jéhova èk lanmityé pou vwézinaj nou. (Maf. 22:37-39) Nou sav nou sa konfyé Jéhova. Konsa, si nou ni lanmityé pou Jéhova nou kay vlé imité’y pou lézòt moun konfyé nou osi. Pou ègzanp, si nou ni lanmityé bay sé fwè èk sè nou-an, nou pa kay di moun sa yo di nou an konfyans. Èk, nou pa kay vlé wévélé pyès enfòmasyon ki kay blésé tjè yo, ében fè yo santi hont.​—Jan 15:12.

13. Ki mannyè imilité kay édé nou pou vini moun lézòt sa konfyé?

¹³ Si nou ni imilité moun kay konfyé nou. An Kwityen ki ni imilité pa kay kouwi douvan pou di moun konsèné bagay ki fèt pou fè yo kwè i enpòtan. (Filip. 2:3) Épi i pa kay fè akwèdi i konnèt sèten enfòmasyon pou fè moun kwè i pli enpòtan pasé i yé. Osi, si nou ni imilité nou pa kay di moun lopinyon nou konsèné sèten bagay Bib-la épi sé piblikasyon nou-an pa ka diskité.

14. Ki mannyè bon jijman sa édé nou vini moun lézòt sa konfyé?

¹⁴ Bon Jijman sa édé an Kwityen pou konnèt ‘lè-a pou pa palé èk lè-a pou palé.’ (Éklé. 3:7) An sèten kilti, moun ka di: “Pou palé sé dajan, mé pou pa palé sé lò.” Sa vlé di la ni lè, lè’y pli mèyè pou pa di anyen, pito ou palé. Èk Bib-la ka dakò épi sa. Pwovèb 11:12 ka di: ‘Yon moun ki ni bon jijman pa ka di anyen.’ Annou konsidiwé an ègzanp. La ni yon ansyen ki ni an chay èspéyans, èk i ka asisté lòt kongwigasyon lè yo ni pwoblenm. Mé tann sa an lòt ansyen di konsèné ansyen sala. I di, “fwè-a ka toujou pwan pokosyon pou pa bay lézòt moun enfòmasyon konsèné sé kongwigasyon-an i ka édé-a. I ka tjenn enfòmasyon sala an konfyans.” Fwè sala ka sèvi bon jijman, épi sa ka annékòz sé ansyen-an an kongwigasyon’y pou ni an chay wèspé pou’y. Yo asiwé, i pa kay wévélé enfòmasyon i sipozé tjenn an konfyans.

15. Bay an ègzanp ki ka moutwé, lè nou sé moun ki onnèt sa ka édé moun pou konfyé nou.

¹⁵ Lè nou sé moun ki onnèt sa sé an lòt bagay ki ka fè moun konfyé nou. Nou sa konfyé an moun ki onnèt paski nou sav i kay toujou palé lavéwité. (Èfés. 4:25; Hib. 13:18) Pou ègzanp, annou di ou vlé vini an pli mèyè titja an minis-la. Konsa, ou vlé mandé an moun pou kouté an pa ou pwépawé pou mitin-lan. Èk ou vlé moun-lan ba’w konsèy asou mannyè ou sa fè pa-a pli mèyè. Ki moun ou té kay konfyé pou kouté pa-a épi pou ba’w konsèy? An moun ki kay di’w lavéwité-a adan an mannyè ki janti, èben an moun ki kay annèk di’w sa yo kwè ou vlé tann? San dout, ou kay chwazi an moun ki kay di’w lavéwité-a. Bib-la di: ‘I pli bon pou’w kowijé an moun an pwézans lézòt, pasé pou’w enmen an moun èk ou pa moutwé’y sa. On jan ki fidèl kay kowijé’w, menm si ou pa enmen sa.’ (Pwov. 27:5, 6) Èk pitèt i pa kay ézé pou’w tann lavéwité-a, mé sé sa ki kay vwéman édé’w.

16. Silon Pwovèb 10:19, poutji i enpòtan pou nou kontwolé kò nou?

¹⁶ Lè nou sa kontwolé kò nou sa ka édé nou pou vini moun lézòt sa konfyé. Alò, i byen enpòtan pou nou kontwolé kò nou, si nou vlé lézòt moun konfyé nou. Si nou sa kontwolé kò nou, nou pa kay di lézòt moun sa an moun té di nou an konfyans. (Li Pwovèb 10:19.) Mé i pa toujou ézé pou kontwolé kò nou, sitou lè nou ka mété bagay asou intannèt-la. Si nou pa pwan pokosyon, nou pé bay an chay moun enfòmasyon nou pa sipozé ba yo san nou wéyalizé. Èk, dépi nou mété an bagay asou intannèt-la, nou pa sa kontwolé mannyè moun kay sèvi enfòmasyon sala, ében ki otan donmaj i kay annékòz. Délè, moun ki ka opozé nou pé éséyé pou kwennen nou pou fè nou ba yo enfòmasyon nou sipozé tjenn an konfyans. Pou ègzanp, pitèt sé polis-la an péyi koté twavay nou anba bann pé éséyé pou fè nou ba yo enfòmasyon konsèné sé fwè èk sè nou-an. Mé, si nou ka kontwolé kò nou, nou pa kay di yo anyen ki kay mété sé fwè èk sè nou-an an danjé. An sitiwasyon kon sa i kay bon pou nou swiv pwensip-la ki an Sam 39:1, èk ‘mété an bwid asou bouch nou.’ Wi, ki nou ka aji épi fanmi nou, jan nou, sé fwè èk sè nou-an, ében népòt lòt moun, nou ni pou moutwé nou sé moun lézòt sa konfyé. Èk si nou vlé moun konfyé nou, nou ni pou kontwolé kò nou.

17. Kisa nou sa fè pou fè’y pli ézé pou nou konfyé yonn a lòt an kongwigasyon-an?

¹⁷ Pa dé kontan nou kontan Jéhova ban nou an chay fwè épi sè oliwon latè-a ki enmen nou, èvèk nou sa konfyé yo. Mé chak di nou ni wèskonsabilité-a pou vini an moun sé fwè èk sè-a sa konfyé. Kon nou tout twavay pou moutwé lanmityé, imilité, bon jijman, épi pou moutwé nou onnèt èk nou ka kontwolé kò nou, sa ka fè’y pli ézé pou nou konfyé yonn a lòt an kongwigasyon-an. Wi, nou ni pou kontiné twavay wèd pou moutwé nou sé moun lézòt sa konfyé. Alò, annou imité Dyé nou Jéhova, épi kontiné moutwé nou sé moun lézòt sa konfyé.