1. O masamaanay a tamdaw ko ngaˈayay pakasoˈlinen hani?

 O CECAY ngaˈayay pakasoˈlinen a tamdaw midofdofay to mikiˈokan, hanaca soˈliˈlinay ko sowal. Mafanaˈay ko tao to ngaˈayay tiˈeren cingra. (ˈOlic 15:4) Makalimay kita itini pinengneng no salikaka o mahaenay a tamdaw kita. Mihaenay, samaan ko pidemak ita hani?

2. Sasamaan ko pidemak ita ngaˈay malo ngaˈayay pakasoˈlinen a tamdaw?

² Cowa kangaˈay kita pacieci to tao pakasoˈlin kitaanan, samanen o pakasoˈlin mamihadak to ˈicel ngaˈ malifokay. Sowal no tamdaw o pakasoˈlin mahecaday o payci, pasangaray malifok, kawra madoloay malahdaw. Ci Yihofa milifokay to masongilaˈay a pakasoˈlin no mita, samanen ‘kihcod a demak Ningra sahtoay ngaˈayay tiˈeren.’ (ˈOlic 33:4) Makalimay Cingra mitodong kita Cingranan. (Ifiso 5:1) Onini a lalakaw mamilengo to pina taˈarawan no madimadiay sikawdan ni Yihofa, mitodongay cangra to kakarayan Wama, misawacay to o ngaˈayay pakasoˈlinen a tamdaw ko niyah. Milengoho ko lalakaw, palahad kita to maanan lima a capeling ho matongal ko pakasoˈlin no tao.

3-4. Pairasolay ci Taniil samaanay misawacay to ngaˈayay tiˈeren ko waywayan no niyah? Onini pakalalokay kitanan misongilaˈ miharateng to maanan a salicay?

³ Itini waywayan malo ngaˈayay tiˈeren, o pairasolay a Taniil patirengay to ngaˈayay taˈarawan. Maholiw no Papilon a tamdaw cingra caka halafin, misawacayay to ngaˈayay tiˈeren ko waywayan no niyah, ngaˈayay pakasoˈlinen. Tiya padamaen ni Yihofa cingra mitadtad to mitiihan no Hongti no Papilon ci Nipukatnicar ikor, matongalay mahapinang no tamdaw konini. Kinacecayay, o papasowal ci Taniil to hongti, cowa ka hemek ci Yihofa cingranan. Onini a sowal maedeng cowa ko mamaolah ko hongti  a mitengil, hanaca hinangolaway ko hongti ci Nipukatnicar, mihaenay sapihadakaw ci Taniil tonini a sowal misaaliay to timolo. (Taniil 2:12; 4:20-22, 25) Ikor no adihayay miheca, mamisongilaˈ ci Taniil mitadtad to tatodong no masadakay i cafeng no lomaˈ no hongti a lihaf, miliyaway misawacay to ngaˈayay tiˈeren cingra. (Taniil 5:5, 25-29) Ikorto, hongti no Mitiya ci Taliyus ato tapang ningra pakahapinangay ‘iraay ko mikiriwiˈay a taneng ni Taniil,’ hanaca mafanaˈay to ‘ngaˈayay tiˈeren ko waywayan ni Taniil, itini tireng ningra awaay makilim ko mimimiming a patelac ato tatiihay a waywayan.’ (Taniil 6:3, 4) Soˈlinayto, ano hongtito no ˈalafang pakahapinangay, onini a madimadiay a sikawdan ni Yihofa o ngaˈayay pakasoˈlinen.

⁴ Midotim kita to taˈarawan ni Taniil i, ngaˈayay licayen ko niyah: “Papotalay no kasakopang a tamdaw samanay ko pilengo takowanan hani? Miharateng ko tao o malalokay to ˈinorong, ngaˈayay pakasoˈlinen a tamdaw han?” Milicay to niyah tonini a salicay hano masakalimlaan hani? Samanen ngaˈay tiˈeren ko waywayan ita, o ngangaˈay paira to ˈdil ato sapakahemek ci Yihofaan.

5. Hano tada o ngaˈayay tiˈeren ci Hananiya hani?

⁵ ˈAyaw no Kongyen 455 miheca, ikor no miliyaw patireng to lowil no Yirusalim ko ˈAˈideman ci Nihimiya, mamikilim to ngaˈayay tiˈeren a tamdaw mikowan to Yirusalim a niyaroˈ. O cecay mipiliˈan ni Nihimiya i, o ˈAˈideman ci Hananiya. Sowal no Fangcalay Cudad cingra ‘o ngaˈayay tiˈeren, mikikakaay to ˈalomanay tamdaw a mikangodo to Kawas.’ (Nihimiya 7:2) Misongilaˈay ci Hananiya a midemak to ˈinorong, samanen maolahay cingra ci Yihofaan,  matalaway eca ka hemek ci Yihofa. Itini katayal ita ci Yihofaan i ano ira ko mahaenay a waywayan, o mamalo ngaˈayay tiˈeren a tamdaw.

6. Hano mafanaˈ kita o pakasoˈlinan no tarokos ci Pawlo a widang ci Tikikus hani?

⁶ Ci Tikikus o ngaˈayay a taˈarawan, o pakasoˈlinan no tarokos ci Pawlo a ngaˈayay cafay cingra. Tiya mapalit ci Pawlo itini i lomaˈ i, mitadiˈecay to sapadama ni Tikikus, somowalayho ci Tikikusan ‘o madimadiay a sikawdan no tapang.’ (Ifiso 6:21, 22) Cowa ko patorod aca ni Pawlo ci Tikikusan pafeli to tikami to Ifisoay ato Kolosayay a salikaka, miocorayho cingranan pakalalok ato mihinom cangranan. Anini iraay ko ˈalomanay faˈinayan salikaka citatodongay midimokos to saali ita i nofalocoˈan, mahecaday cangra ci Tikikusan madimadiay ngaˈayay tiˈeren.—Kolosay 4:7-9.

7. Pakayni ngaˈayay tiˈeren ko waywayan, mikitini i malohemay malitengay ato dama sikawdan no kasakopang mamananam iso ko manan?

⁷ Anini, adihayay ko ngaˈayay tiˈeren a malohemay malitengay ato dama sikawdan i kasakopang, tada miakoˈiday kita cangranan. Malecad ci Taniilan, ci Hananiya aci Tikikusan, misongilaˈay cangra midemak to ˈinorong no niyah. Tinakoen, mirienang kita to tenok no lipay a saˈopo i, wa ngaˈay pakasoˈlin polong a kamok maharekayto milimasmas. O citatodongay to kamok a salikaka ano misongilaˈ misaday to kamok no niyah, o mamiakoˈid ko malohemay malitengay cangranan. Roma i, wa ngaˈay rihaday ko falocoˈ ita mitahidang to pacekiwan no niyah mirienang to saˈopo i pilipayan, cowa ko cacalemcem to aawa ko mikimaday to pakapapotalay kimad. Pakasoˈlinayho kita, wa madolo miala to sapitosil a cudad. Onini a madimadiay faˈinayan salikaka misongilaˈay midimokos kitaanan, pakayni tonini tada miakoˈiday kita ci Yihofaan. Mihaenay, wa ngaˈay kita itini maanan a pakayraan misawacay to ngaˈayay pakasoˈlinen ko niyah hani?

8. Itini kaciharateng to tao i, mamisinanot kita to manan? (Taneng 11:13)

⁸ Maolahay kita to salikaka, mansa ciharatengay to ngaˈayay ko kaˈorip nangra hokira. Kawra, o mamikangodo kita to notekedan nangra. Itini saka 1 hahekalan kasakopang no Krisciyang, o roma tamdaw ‘maolahay somowal to sanay sanay a sowal, hina capiday to demak, somowalay to cowa kangaˈay sowalen a sowal.’ (1 Timoti 5:13) Caay kaciharateng kita malecad cangranan. Ano ira ko tamdaw pasowalay kitanan to notekedan a demak, hanaca cowa kaolah cingra mafanaˈ ko tao tonini a demak, toniya tatokian sasamaan ko pidemak ita hani? Tinakoen, cecay fafahiyan salikaka pasowalay kitanan iraay ko adada no tireng ningra anca tahalifaay to cecay sapalifet, misaaliay kitanan aka sowalen konini a demak, o hamamitoor kita to sowal ningra a midemak. b (ˈOsien ko Taneng 11:13.) Dotoc mamilengo, itini maanan a pakayraan o mamitafo kita to mahimeday.

9. Sasamaan ko demak ita ngaˈay malo pakasoˈlinen no paro no lomaˈ a tamdaw?

⁹ Pakayni paro no lomaˈ. O kahacecay no paro no lomaˈ a tamdaw iraay ko ˈinorong mitafo to mahimeday demak no paro no lomaˈ. Tinakoen, miharateng ko cecay faˈinay to cecay nanaman no fafahi masakatawaan, cowa ko ngangaˈay pasowal to tao tonini a demak, mipakangodo to fafahi, samanen maolahay cingra to fafahi, cowa ko mamidemak to midokaˈay to fafahi a demak. (Ifiso 5:33) Haratengen no malo wama winaay, o kapah a tamdaw makalimay kangodoen no tao, mihaenay o wama ato wina aka  itini ˈaˈayaw no tamdaw milengo to raraw no wawa, pakangodo cangranan. (Kolosay 3:21) O wawa o maminanam mihapinang to demak, aka pasowal to potalay tamdaw to notekedan a demak no paro no lomaˈ, ho eca ka pakangodo to paro no lomaˈ. (Limoˈot 5:16) O kahacecay no paro no lomaˈ a tamdaw misaˈicel mitafo to mahimeday a demak no paro no lomaˈ, o kalalaˈed no paro no lomaˈ o mamatongal ko tanektek.

10. Sasamaan ko demak ita ngaˈay malo soˈliˈlinay widang no tao? (Taneng 17:17)

¹⁰ Pakayni i widang. Latekay misaaliay kita mikilim to ngaˈayay widang mifowah to nafalocoˈan, kawra mihaen to demak cowa ko madoloay alatek. Cowa ka nanam kita pasowal to tao to nafalocoˈan ita a harateng alatek. Ano mahapinang ita konini a widang pasowalan ningra ko tao to nano sowal ita cingranan, wa matongalto ko dokaˈ. Kawra, ano patado ko widang mitafo to mahimeday no mita, ‘o soˈliˈlinay a widang’ ita cingra, o mamiakoˈid kita cingranan.—ˈOsien ko Taneng 17:17.

11. (1) O malohemay malitengay ato fafahi nangra sasamaan paihkal to ngaˈayay pakasoˈlinen ko niyah? (2) O cecay malohemay malitengay cowa ka pasowal to paro no lomaˈ to mahimeday a demak no kasakopang. Mikitini tonini mananam iso ko manan? (Nengnengen ko coka.)

¹¹ Pakayni salikaka. Mitafoay to mahimeday a malohemay malitengay malecaday ‘pikiˈadingan to faliyos, ato pikiˈadingan to ˈorad.’ (Isaya 32:2) Ano o mananto a sowal wa ngaˈay pasowalen ita cangra, samanen pakasoˈlinay kita cangranan cowa ko papasowal to tao. Roma i, cowa ko mamiroero kita cangranan, misaali cangranan pasowal to notekedan a demak no tao. Roma i, o fafahi no malohemay malitengay ngaˈayay pakahemeken, samanen cowa ka pisaali cangra to faˈinay mihadak to cowa ko hakafanaˈan no niyah a demak. O malohemay malitengay eca ka pasowal to fafahi no niyah to notekedan a demak no salikaka, soˈlinay o ciepocay. Fafahi no cecay malohemay malitengay sanay ko sowal: “O faˈinay ako patadoay to salikaka mitafo to mahimeday, tada ngaˈayay ko demak ningra saan kako miharateng. Latekay, misaaliay ko salikaka to  sapadama no malohemay malitengay. Ano milisoˈ ko faˈinay ako cangranan ikor, cowa ka pasowal to demak nangra takowanan, ano o nganganto nangra cowa ka pihadak. Mihaenay, cowato ko cacariraw kako to cowa ko mamadangar no niyah a demak, wa ngaˈayho lipahak a malacafay to polong a tamdaw i kasakopang. Roma i pakasoˈlinay kako, ano pasowalen ako ko faˈinay to nafalocoˈan ato pasangaray no niyah, maedeng cowa ko papasowalen ningra to demak ako itini i roma tamdaw.” Manaokaniw, makalimay kita malo ngaˈayay pakasoˈlinen a tamdaw. Mihaenay, palahad kita to manan a capeling, o ngangaˈay malaˈosi konini a patosokan hani? Dotoc mamilengo to lima a capeling.

12. Ciolahay falocoˈ hano o taˈeneran no pakasoˈlin han ko sowal hani? Tadtaden.

¹² Ciolahay falocoˈ o taˈeneran no pakasoˈlin. Sowal ni Yis, sakakaay kalimlaan a tosa limoˈot maolah ci Yihofaan ato maolah to tao. (Matay 22:37-39) Maolah kita ci Yihofaan, o mamakalim mitodong to taˈarawan Ningra, malo ngaˈayay pakasoˈlinen a tamdaw. Maolah kita to salikaka, wa makalim patado cangranan mitafo to mahimeday, cowa ko papatalahkal to notekedan a demak nangra, midokaˈ anca pakangodo cangranan.—Yohani 15:12.

13. Ano misapoener ko falocoˈ ita, hano madolo milifok to pakasoˈlin no tao?

¹³ Ano misapoener ko falocoˈ ita, wa madolo milifok to pakasoˈlin no tao. Misapoeneray ko falocoˈ a Krisciyang cowa ko papiharateng to tao idahiyay cingra, mikiˈayaw patalahkal to cecay lihaf. (Filipi 2:3) Cowa ko papasowal cingra to tamdaw to mafanaˈay ko niyah to cecay mahimeday a demak, pakayni ko patakaraw to saaroˈan no niyah. O Fangcalay Cudad ato cudad no likakawa ano cowa milengo to cecay a demak, o misapoeneray ko falocoˈ a tamdaw cowa ko mamiyakayak to kafanaˈan no niyah tonini a demak.

14. Mihapinang kita to demak, hano ngaˈay malo ngaˈayay pakasoˈlinen a tamdaw?

¹⁴ Ira ko sapihapinang inaneng, wa mafanaˈ mihapinang to hacowa tatokian ‘tomerep,’ hacowa tatokian ‘somowal.’ (Patnakay 3:7) Itini roma serangawan, marariday ko tamdaw pasowal ‘o somowalay o linkim, o tomerepay o tada ekim,’ tatodong i latekay tomerep ikakaay ko kangaˈay to somowalay. Mihaenay, Taneng 11:12 sanay: ‘Soˈlinay mihapinang to demak i, o tomerepay caka somowal.’ Nengnengen ko cecay tinakoan. O cecay malohemay malitengay kadofahay ko nalifetan, mihaenay ano tahalifa ko roma kasakopang to pasangaray saysayen a demak i, marariday mitahidang cingranan a padama. O roma malohemay malitengay sanay milengo tonini a salikaka: “Tocerid misinanotay cingra, caay patalahkal to mahimeday a demak no roma kasakopang.” Onini a malohemay malitengay samanen mihapinangay to demak, mansa milifokay to pikangodo no romaroma malohemay malitengay i kasakopang. Pakasoˈlinay cangra cowa ko papasowal cingra to roma tamdaw to mahimeday a demak no kasakopang.

15. Tinakoen mitadtad, o soˈliˈlinay ko falocoˈ a tamdaw hano ngaˈay milifok to pakasoˈlin no tao?

¹⁵ Soˈliˈlinay falocoˈ milingatay to pakasoˈlin. Wa ngaˈay pakasoˈlin kita to soˈliˈlinay ko falocoˈ a tamdaw, samanen tocerid soˈliˈlinay ko sowal ningra. (Ifiso 4:25; Hipray 13:18) Tinakoen, ano sapacakataw kiso to inaneng no niyah a pasifanaˈ, sapitahidangaw kiso to cecay tamdaw mitengil to kimad iso, dotoc pafeli to sapaini tisowanan, o masamaanay a tamdaw ko kilimen iso hani? Oya ngaˈayay a tengilen ko sowal a tamdaw, anca o tano damsayay a pakayraan soˈliˈlin ko sowal tisowanan a tamdaw hokira? Ihkalay ko caˈof. Sowal no Fangcalay  Cudad: ‘O mihadakan a pirikec, ikakaay to mahimeday a olah. Pakayni i madimadi no widang ko sakapidokaˈ tisowanan.’ (Taneng 27:5, 6) Soˈlin o soˈliˈlinay a sowal no widang satapang aca tatiihay ko harateng iso, kawra ano nengnengen ko noikor, o sapaini ningra o papaira to haepoc no miso.

16. Taneng 10:19 samaanay mitadtad, misaaliay kita to miˈimeray a ˈicel?

¹⁶ Ano sapilifokaw kita to pikangodo no tao, o miˈimeray cowa ka ngaˈay malawa. Latekay, ciharatengay kita sapatalahkalaw to pina mahimeday a demak i roma tamdaw alatek, kawra o miˈimeray wa ngaˈay padama kitanan mitawmec to sasowalen no niyah. (ˈOsien ko Taneng 10:19.) Itini pisakadademak to sapicawmaˈ to widang a wangcan i, sapitafoaw to miˈimeray cowa ko madoloay, ano caka pinaˈon ˈalomanto ko tamdaw mafanaˈ to hahimeden a demak. Onini a lihaf ano pasadaken itini wangcan, sasamaanen no tao misaka dademak konini a lihaf, anca onini a lihaf papaira to hakowaay ka taˈangay no pidokaˈ, cowato ko mamaˈimer ita konini. Roma pakayraan i, ano mikayhid ko misafelitay to kimad a tamdaw kitanan patalahkal to milingatay to salikaka a lihaf i, o miˈimeray wa ngaˈay padama kitanan padotoc a tomerep, midipot to salikaka. Tinakoen, itini makecengay ko mitosilay a tayal anca makecengay a kilac, o laliclicen no dimeng kita milicay alatek. Itini mahaenay pakayraan ato roma pakayraan, wa ngaˈay kita malecad to mitiliday to ˈOlic ‘mitoem to ngoyos no niyah.’ (ˈOlic 39:1) Itini pinengneng no paro no lomaˈ no niyah, widang, salikaka anca tao, o mamalo ngaˈayay pakasoˈlinen a tamdaw kita. Sakalaˈosiaw konini a demak, kalimlaan ko miˈimeray a ˈicel.

17. Ngaˈay samaan ko pidemak ita paˈicel to masasipakasoˈlinay a harateng no kasakopang?

¹⁷ Pairaan ni Yihofa itatihi ita ko ˈalomanay matomesay to olah ngaˈayay pakasoˈlinen a salikaka, tada miakoˈiday kita Cingranan. Kita polong a tamdaw iraay ko ˈinorong milifok to pakasoˈlin no salikaka. O kahacecay tamdaw ano misaˈicel palahad to ciolahay falocoˈ, misapoeneray falocoˈ, sapihapinang a inaneng, soˈliˈlinay falocoˈ ato miˈimeray a capeling, wa ngaˈay paˈicel to masasipakasoˈlinay harateng no kasakopang. Patireng to pakasoˈlinay harateng o padadotocay a demak. Nanay padadotoc kita mitodong to Kawas ci Yihofaan, malo ngaˈayay pakasoˈlinen a tamdaw!