1. ¿Confiykañ jaqejj kunjamasa?

 CONFIYKAÑ jaqejj promesap phoqañatakejj wal chʼamachasi, cheqwa parlaraki (Sal. 15:4). Mayninakas confiykañ jaqëtap yatipjjewa. Jilat kullakanakajj jiwasat ukham amuyapjjañapwa muntanjja. Jilat kullakanakajj jiwasar confiyapjjañapatakejja, ¿kunsa lursna?

2. ¿Kunjamsa confiykañ jaqëtas uñachtʼaysna?

² Janiw jiwasar confiyapjjañapatakejj mayninakar obligksnati, jan ukasti mayninakajj jiwasar confiyapjjañapatakejj jiwasaw chʼamachasiñasa. Confianzajj qollqer uñtasitawa, ganañajj chʼamawa, aptʼasiñasti facilakiwa. Cheqansa Jehová Diosajj confiykañ Diosätapwa uñachtʼayistu. “Taqe kuntï jupajj lurki ukajj confiykañawa”, ukatwa jupar confiyapunsna (Sal. 33:4). Diosajj jupat yateqassna ukwa muni (Efes. 5:1). Aka yatichäwinjja, Jehová Diosan yaqhep servirinakapatwa parltʼaskañäni, jupanakajj alajjpachankir Awkipatwa yateqasipjjäna, confiykañ jaqëpjjatapwa uñachtʼayapjjarakïna. Kunjam chuymanïñas confiykañ jaqëñatak yanaptʼistani ukwa phesqa toqet yatjjataskarakiñäni.

3, 4. 1) ¿Kunjamsa Daniel profetajj confiykañ jaqëtap uñachtʼayäna? 2) ¿Kamsasas jisktʼasiñasa?

³ Daniel profetajj jiwasatak wali yateqaskañawa. Jupar katuntasin Babiloniar apapkäna ukhajja, jukʼa tiemponakwa confiykañ jaqet uñtʼatäjjäna. Nabucodonosor reyin samkanakapajj kamsañsa muni uk Jehová Diosan yanaptʼapamp qhanañchkäna ukhajja, jukʼamp confiykañ jaqet uñtʼatäjjänwa. Mä kutejja, kuntï mä reyejj jan istʼañ munkaspa ukwa Nabucodonosor reyir yatiyäna. Jehová Diosajj janiw jumatak kusisitäjjeti sasaw yatiyäna.  Niyakejjay uka reyejj wali qhorüchïnjja, Daniel profetajj uk yatiyañatakejj jan ajjsartʼirïñapänwa (Dan. 2:12; 4:20-22, 25). Walja maranak qhepatjja, Babilonia markan palaciopan mä yatiyäwiw perqan uñstäna, uka yatiyäw cheqapar qhanañchasaw Danielajj confiykañ jaqëtap wasitat uñachtʼayäna (Dan. 5:5, 25-29). Qhepatsti Darío sat medo reyimpi, uka reyitak trabajiri jilïrinakampejja, Daniel profetajj ‘suma amuytʼanïtapwa’ amuyapjjäna. Danielajj ‘confiykaña, lurañanakap suma phoqeri, suma apnaqerïtapwa’ amuyapjjarakïna (Dan. 6:3, 4). Jehová Diosar jan adorapkäna uka gobernantenakas Danielajj confiykañ jaqëtapwa amuyapjjäna.

⁴ Danielan sarnaqäwipat amuytʼasajj akham jisktʼasipjjañäni: “¿Jan Testigöpki ukanakajj nayat kamsapjjesa? ¿Confiykaña ukhamarak lurañanakap phoqer jaqet uñtʼatätti?” sasa. Ukham jisktʼasiñajj wali wakiskiriwa, kuna laykutejj confiykañ jaqëtas uñachtʼayktan ukhajja, Jehová Diosaruw jachʼañchtanjja.

5. ¿Kunatsa Hananiasajj wali confiykañ jaqet uñtʼatänjja?

⁵ 455 antes de Cristo maranjja, Nehemías gobernadorajj Jerusalenan murallanakap wasitat saytʼayasajj confiykañ mä qhawqha chachanakaruw uka markat encargasiñapatak uttʼayäna. Jupanakat maynïrejj Hananiasänwa, jupajj Soldadonakatak Jachʼa Utan mä pʼeqtʼirïnwa. Hananiasat parlkasajj Bibliajj akham siwa, “jupajj wali confiykañ chachänwa, yaqhanakat sipansa jupaw cheqpach Diosarojj ajjsartʼarakïna” sasa (Neh. 7:2). Mä responsabilidad katoqasinjja, uk phoqañatakejj Jehová Diosar munasiñampi jupan chuymap jan  ustʼayañ munañampiw yanaptʼäna. Ukham chuymanïñarakiw Diosan wali confiykañ serviripäñasatak yanaptʼistani.

6. ¿Kunjamsa Tiquicojj apóstol Pablon confiykañ amigopätap uñachtʼayäna?

⁶ Jichhajj Tíquico chachat parltʼarakiñäni, jupajj apóstol Pablon confiykañ compañeropänwa. Apóstol Pablojj mä utan llawintatäkäna ukhajja, Tiquicow juparojj yanaptʼäna. Jupajj ‘jan jitheqtas Tatitur serviriwa’ sasaw Pablojj säna (Efes. 6:21, 22). Tiquicorojj janiw Éfeso ukat Colosas markanakankir jilat kullakanakatak cartanak apañapatakik confiykänti, jan ukasti jupanakar chʼamañchtʼañapataki chuymachtʼañapatakiw confiyarakïna. Tíquico chachat parltʼañajja, jichhürunakan Diosat jan jitheqtas servipki confiykañäpkaraki uka jilatanakatwa amtayistu, jupanakaw Diosar serviñan yanaptʼapjjestu (Col. 4:7-9).

7. ¿Kunsa congregacionasankir ancianonakatsa siervo ministerialanakats yateqassna?

⁷ Ancianonakasa, siervo ministerialanakas confiykañ jilatanakäpjjewa, kuntï lurapki uk wali valoranitwa uñjtanjja. Jupanakajj Daniel, Hananías, Tíquico chachanakjamarakiw asignacionanakap wali sum phoqapjje. Ak amuytʼañäni, semanan utjki uka tantachäwir sarktan ukhajja, uka urutak utjki uka programarjamajj taqpachaw asignatäjjpacha sasaw confiytanjja. Ancianonakasti jilat kullakanakan sum wakichtʼasipjjatapatsa, asignacionanakap phoqapjjatapatsa wal yuspärapjje. Ukatjja seman tukuyajj utjki uka tantachäwir Bibliat yateqerinakasar invittʼktan ukhajja, discurso arstʼir mä jilatajj invitatäpachati sasin janiw jisktʼasktanti. Predicañatakejj Bibliat apstʼat qellqatanakajj utjapunistaniwa sasaw confiyaraktanjja. Diosat jan jitheqtir uka jilatanakajj wali sum cuidapjjestu, ukatwa Jehová Diosar yuspärtanjja. Ukampis ¿kunjamsa jiwasajj confiykañätas uñachtʼaysna?

8. Mayninakajj kunjamäsipkisa ukat llakiskstansa, ¿kunanakatsa wal amuyasiñasa? (Proverbios 11:13).

⁸ Jilat kullakanakasarojj munastanwa, kunjamanakans uñjasipjje ukanakats llakisiraktanwa. Ukampis wal amuyasiñasawa, janiw jilat kullakanakan jakäwipar mitisiñasäkiti, jan ukasti respetañasawa. Nayrïr patak maranakan utjkäna uka cristiano congregacionanjja, arunak apnaqeri jaqenakaw utjäna. Jupanakajj ‘yaqhanakan luräwinakaparuw mitisipjjäna, kuntï jan parlapjjañapäkäna ukanakwa parlapjjarakïna’, jiwasajj janiw jupanakjamäñ munktanti (1 Tim. 5:13). Maynejj jumarukiw awistʼasksma sasin jakäwipat cuenttʼistaspa ukham amuytʼañäni. Mä kullakatï usutätap yatiychistu jan ukajj mä jan walin uñjasiskatap yatiychistu, janiw khitirus awisätati sasin sarakchistu ukhajja, jan khitir awisañasatak maykistu uk respetañasapuniwa (Proverbios 11:13 liytʼäta). b ¿Kuna yaqha toqenakansa confiykañ jaqëtas uñachtʼayañasajj wali importanterakejja?

9. ¿Kunjamsa familiankirinakajj confiykañäpjjatap uñachtʼayapjjaspa?

⁹ Familian confiykañäpjjañäni. Kunanakatï utan paski ukanakatjja, familiankirinakajj janiw taqpachjja yaqhanakar parlapjjañapäkiti. Mä chachatï esposapan laruyirjam costumbrenïtap amuychi ukhajja, janiw uka toqet yaqhanakar parlañapajj walïkaspati. Niyakejjay esposapar munaschejja, janipuniw kuntï chuym ustʼaykaspa uk lurañ munkiti (Efes. 5:33). Awk taykanakajj ak amtapjjañapawa, waynitunakas tawaqetanakas respetompi uñjatäñwa munapjje, ukhamajj janiw pantjasitanakap  yaqhanakar yatiyasajj jiskʼachapjjañapajj walïkaspati (Col. 3:21). Wawanakajj amuytʼasirïñwa yateqapjjañaparaki, kunanakatï familiat maynir phenqʼachkaspa ukanak janiw yaqhanakar parlapjjañapäkiti (Deut. 5:16). Kunanakatï familian paski ukanak yaqhanakar jan yatiyañatak taqen chʼamachasipjjani ukhajja, familiajj jukʼamp mayachtʼatäniwa.

10. ¿Mä cheqpach amigojj kunjamasa? (Proverbios 17:17).

¹⁰ Amigonakasampejj confiykañäpjjañäni. Taqeniw mä suma amigosar llakinakas cuenttʼañ muntanjja, ukampis awisajj uk lurañajj chʼamakïspawa. Kunjamas chuyma manqhasan jikjjatastan ukanakat mayninakar parlañ inas jan yatitäkstanti. Jiwasatï amigosar yatiysna, ukat amigosajj yaqhanakar parlatap yatjjaraksna ukhajja, wal chuyma ustʼayassna. Ukampis mä amigosatï kunanaktï jupar cuentktan ukanak yaqhanakar jan parlkchi ukhajja, wal yuspärtanjja. Jupajj ‘mä cheqpach amigowa’ (Proverbios 17:17 liytʼäta).

11. 1) ¿Kunjamsa ancianonakas esposanakapas confiykañäpjjatap uñachtʼayapjje? 2) Mä ancianorojja, kuntï jan yaqhanakar yatiyañapäki ukwa congregacionan cuenttʼapjje, jupajj janiw familiapar uk yatiykiti, ¿kunsa uka ancianot yateqassna? (Fotonak uñjjattʼäta).

¹¹ Congregacionan confiykañäpjjañäni. Mä kun cuenttʼatas yaqhanakar jan yatiyapki uka ancianonakajja, jilat kullakanakapatakejj ‘thayat jarkʼaqasiñatak mä imantasiñ lugarjamäpjjewa’ (Is. 32:2). Ukham ancianonakarojj confianzampiw taqe kuns cuenttʼsna, kuna laykutejj janiw jupanakajj kuntï cuentktan ukanak yaqhanakar parlapkaniti. Kunanaktï jan parlapjjañapäki ukanak jiwasar awisapjjañapatak janiw obligañasäkiti. Ancianonakan esposanakaparojj wali valoranitwa uñjaraktanjja, kuna laykutejj janiw esposonakaparojj kunanaktï jan arsupjjañapäki ukanak jupanakar yatiyapjjañapatak waytʼapkiti. Kunapachatï ancianonakajj jilat kullakanakan jakäwinakapat esposanakapar jan yatiyapki ukhajja, mä bendicionäpjjewa. Mä ancianon esposapajj akham siwa: “Esposojajja pastoreo lurki uka jilat kullakanakatsa jan ukajj Diosar  serviñan yanaptʼki uka jilat kullakanakatsa, janiw kuns awiskituti. Ukham luratapatjja, wal jupar yuspärta. Janiw uka jilat kullakanakan sutinakaps awiskituti. Esposojatejj jilat kullakanakan problemanakapat awisitaspa ukhajja, janiw nayajj kun lurañs puedkiristti, ukatwa esposojar yuspärarakta. Ukhamatwa taqe jilat kullakanakampejj sumak parltʼasta. Esposojar mä problemajata jan ukajj kunjamas jikjjatasta ukat cuenttʼa ukhajja, janiw khitirus yatiykaniti, janiw ukat payachaskti” sasa. Cheqas taqeniw confiykañ jaqet uñtʼatäñ muntanjja, kunjam chuymanïñas ukatakejj yanaptʼistani uk jichhajj phesqa toqet uñjañäni.

12. Confiykañ jaqëñatakejj kunatsa munasiñajj wali wakiskirejja uk qhanañchtʼam.

¹² Confiykañ jaqëñatakejj munasiñaw wakisi. Jehová Diosar munasiñampi jaqe masisar munasiñampiw jukʼamp importante mandamientonakajja sasaw Jesusajj säna (Mat. 22:37-39). Jehová Diosjam wali confiykañajj janiw yaqhajj utjkiti, niyakejjay jupar munasstanjja, jiwasajj jupjamäñwa muntanjja. Jilat kullakanakasar munasiñaw kunanaktï jupanakajj jakäwinakapat cuenttʼapkistu ukanak yaqhanakar jan parlañasatakejj yanaptʼistu. Kunanakatï jupanakar chuym ustʼaykaspa phenqʼachkarakispa ukanakat janipuniw yaqhanakar parlañasäkiti (Juan 15:12).

13. ¿Kunjamsa humilde chuymanïñajj confiykañ jaqëñasatakejj yanaptʼistu?

¹³ Confiykañ jaqëñatakejj humilde chuymanïñaw yanaptʼistani. Humilde chuymani mä cristianojja, mä noticia yatisajj janiw jupajj nayraqat yaqhanakar yatiyañ munkaniti (Filip. 2:3). Wali importante toqenakats yatkaspa, janis ukanakat yatiyañapäkarakispa ukham janiw yaqhanakar amuyayañ munkarakiniti. Maysa toqetjja, jiwasatï humilde chuymanïñäni ukhajja, janiw amuyusarjamak kuns parlkañäniti, mä arunjja janiw kunatï jan Bibliankki ni Bibliat apstʼat qellqatanakasankki ukanakat parlkañäniti.

14. ¿Kunjamsa amuytʼasirïñajj confiykañ jaqëñasatak yanaptʼistu?

¹⁴ Kunapachas ‘amuktʼañ tiempojja’, kunapachas ‘parlañ tiempojja’ uk yatiñatakejja, amuytʼasirïñaw mä cristianorojj yanaptʼani (Ecl. 3:7). Yaqhep cheqanakanjja, jaqenakajj akham sañ yatipjje: “Parlañajja qollqewa, amuktʼañasti qoriwa” sasa. Uka arunakajja, parlañat sipansa amukïñaw awisanakajj wakisi sañwa muni. Ukatwa Proverbios 11:12 textojj akham sispacha: “Khititï suma amuytʼasirïki ukajja amukïskiwa” sasa. Experienciani mä anciano jilatat parltʼañäni, juparojj sapa kutiw yaqha congregacionanakar yanaptʼañapatak mayipjje, ukhamat wali chʼamäki uka asuntonak atiendiñapataki. Yaqha ancianojj uka jilatat akham siwa: “Jupajj wali amuytʼasiriwa, kunanaktï yaqha congregacionanakat jan parlañapäki ukanakjja, janiw khitirus yatiykiti” sasa. Experienciani uka ancianorojja, amuytʼasirïtapat congregacionapankir ancianonakajj respetapjjewa, kunanakatï jan parlañapäki ukanak janiw yaqhanakar parlkaniti, uk jupanakajj sum yatipjje.

15. Kunjamsa cheq parlañajj jiwasar confiyapjjañapatak yanaptʼistu uk mä uñachtʼäwimp qhanañchtʼam.

¹⁵ Cheq parlañaw confiykañ jaqëñasatakejj yanaptʼarakistu. Cheq parlir jaqenakajja, kunatï cheqäki ukpunwa parlapjje. Jupanakar confiyañas facilakiwa (Efes. 4:25; Heb. 13:18). Mä jilatas discursonak jukʼamp sum arstʼañatak mejorañ munkaspa ukham sañäni. Jupatejj yaqha jilatar discursop istʼañapataki, kunans mejorañapa uk sañapatak yanaptʼayasiñ munchi ukhajja, ¿khitimpis yanaptʼayasini? ¿Kunjamtï jupajj munki ukarjam ewjjtʼkaspa ukampit yanaptʼayasini? Jan ukajj ¿khititejj  munasiñamp cheq siskani ukampich yanaptʼayasini? Cheq siskani ukampiw yanaptʼayasini. Bibliajj akham siwa: “Maynir qhanpach cheqañchañaw jukʼamp sumajja, munasir jaqëkasin jan munasiñ uñachtʼayañat sipansa. Mä amigon ewjjtʼapajj ustʼayaspawa, ukampis ukham ewjjtʼasajj jan jaytjasirïtapwa uñachtʼayi” sasa (Prov. 27:5, 6). Mä amigojj kunanakans mejorañasa uk qhan sistu ukhajja, qalltan uk katoqasiñajj chʼamakïspawa, ukampis qhepatjja, wal yanaptʼistani.

16. Proverbios 10:19 textojja, ¿kunjamsa lakas controlañajj wali wakiskirïtap uñachtʼayistu?

¹⁶ Mayninakajj jiwasar confiyapjjañapatakejja, lakas controlañajj wali wakiskiriwa. Ukaw kuntï jan arsuñasäki uk parlañ munkañäni ukhajj amüskañatak yanaptʼistani (Proverbios 10:19 liytʼäta). Redes sociales ukanakar mantktan ukhaw lakas controlañajj chʼamäspa. Jan amuyasksna ukhajja, jan munkasaw kunatï jan yatiyasiñapäki uk waljanir yatiyjjsna. Uk aptʼayjjsna ukhajja, janiw kamachañs puedjjsnati, kuna jan walinaktï utjaykani ukanaks janiw askichañ puedjjsnati. Enemigonakasajj kunatï jilat kullakanakar jan waltʼaykaspa ukwa engañomp arsuyañ munapjjestaspa, ukhaw lakas controlañajj amukïñatak yanaptʼarakistaspa. Predicacionajj jarkʼatäki uka markanwa jilat kullakanakasat ukham arsuyañ munapjjestaspa. Ukhamanakansa yaqha ukhamanakansa, “lakajsti mä ñukumpiw ñuktʼasëjja” siski uka wiñay yatichäwiw yanaptʼistaspa (Sal. 39:1). Familiaranakasatakisa, amigonakasatakisa, jilat kullakanakasatakisa, yaqha jaqenakatakisa, confiykañ jaqëñasawa. Ukatakejj lakas controlañajj wali wakiskiriwa.

17. ¿Kunsa taqenis congregacionan confianza utjañapatakejj lursna?

¹⁷ Jehová Diosajja, jupanakkam munasiri confiykaña jilat kullakanak taypinkañasatakiw invittʼistu, ukatwa jupar wal yuspärtanjja. Jilat kullakanakajj jiwasar confiyapjjañapatakejja, taqeniw sapüru chʼamachasiñasa. Sapa maynitï munasiñ uñachtʼayañataki, humilde chuymanïñataki, amuytʼasirïñataki, cheq parlañataki, lakas controlañatak chʼamachasiñäni ukhajja, congregacionan confianza utjañapatakiw yanaptʼañäni. Jehová Dios Awkisat yateqasipjjañäni, confiykañ jaqëtas uñachtʼayasipkakiñäni.