1. Songon dia do halak na dihaporseai i?

 HALAK na boi dihaporseai i ditepati do janjina jala makkatahon na sittong. (Ps. 15:4) Asing ni i, boi do ibana diandalhon. Lomo do rohatta asa songon i pandangan ni akka dongan tu hita. Attong aha do na ikkon taulahon asa porsea halak tu hita?

2. Boha do carana asa boi hita dihaporseai?

² Dang boi tapaksa na asing asa porsea tu hita, jadi ikkon tabuktihon do i sian pambahenatta. Dos do i songon hepeng, maol papunguhon alai mura pahabisson. Ikkon berusaha do hita asa boi dihaporseai. Marsiajar ma hita sian Jahowa. Dibuktihon Ibana do na boi Ibana dihaporseai. Pos do rohatta tu Ibana “alani sude na binahenna”. (Ps. 33:4) Jala lomo do rohana asa tatiru Ibana. (Eps. 5:1) Saonari tabahas ma akka naposo ni Jahowa na maniru Ibana jala na mambuktihon boi do nasida dihaporseai. Tabahas ma muse lima sifat na mambahen hita boi dihaporseai.

3-4. Songon dia do si Daniel mambuktihon na boi ibana dihaporseai, jala sukkun-sukkun aha do na porlu tapikkirhon?

³ Gabe teladan do panurirang Daniel tu hita ala boi ibana dihaporseai. Nang pe tawanan ibana di Babel alai denggan do reputasina disi. Ditanda do ibana halak na boi dihaporseai. Lam denggan do muse reputasina dung diurupi Jahowa si Daniel paboahon nipi ni Raja Nebukadnesar. Sada tikki disuru Jahowa ma si Daniel paboahon tu Raja Nebukadnesar, na so lomo roha ni Jahowa tu raja i. Pasti  dang lomo roha ni raja i mambege hata ni si Daniel on. Ikkon barani do si Daniel lao pasahatton i, alana mura-mura do muruk si Nebukadnesar. (Dan. 2:12; 4:20-22, 25) Martaon-taon dukkon i, dipaboa si Daniel do lapatan ni hata na tarsurat di dinding ni istana Babel, jala tutu do masa sude na didokna i. On ma bukti na asing si Daniel halak na boi dihaporseai. (Dan. 5:5, 25-29) Belakangan, si Darius dohot akka pejabat tinggina pe mandok si Daniel halak na “malo hian”. “Boi do ibana dihaporseai, sai marhasil do ulaonna, jala jujur do ibana.” (Dan. 6:3, 4) Nang pe nasida akka raja na manomba debata na so sittong, alai takkas do diida nasida na boi do dihaporseai si Daniel!

⁴ Sambil mangingot contoh ni si Daniel on tasukkun ma diritta, ‘Songon dia do reputasikku di pandangan ni halak na so Saksi? Ditanda do au halak na martanggung jawab jala boi dihaporseai?’ Penting do tapikkirhon sukkun-sukkun on. Alana molo ditanda hita halak na boi dihaporseai, gabe dipasangap ma goar ni Jahowa.

5. Aha do na mambahen si Hanania gabe halak na boi dihaporseai?

⁵ Di taon 455 SM, dung sae dibangun Gubernur Nehemia tembok Jerusalem, dilului ibana ma akka bawa na boi denggan manjaga kota i. Termasuk ma i si Hanania kepala panjaga Benteng. Bibel paboahon “halak na boi dihaporseai do si Hanania jala ibana do na umbiar tu  Debata na sittong sian akka halak na asing”. (Neh. 7:2) Holong do roha ni si Hanania tu Jahowa jala mabiar do ibana mambahen haccit roha ni Jahowa. I do alana serius si Hanania mandalatton tugas manang aha pe na dilean tu ibana. Tatiru ma akka sifat ni si Hanania on asa boi hita denggan mandalatton tugas sian Jahowa.

6. Sian dia taboto halak na boi dihaporseai do si Tikikus?

⁶ Marsiajar ma hita muse sian si Tikikus. Sahalak dongan na dihaporseai si Paulus do ibana. Tikki gabe tahanan rumah si Paulus, jotjot do dipangido si Tikikus lao mangurupi ibana. Didok si Paulus do molo si Tikikus on halak na “toktong marhobas tu Tuan i”. (Eps. 6:21, 22) Porsea do si Paulus tu si Tikikus. Dang holan mangirim surat tu akka dongan na di Epesus dohot Kolosse ibana disuru si Paulus. Alai disuru do si Tikikus patoguhon jala mangapuli nasida. Si Tikikus na setia on paingotton hita tu akka bawa na martanggung jawab di huria di jamanta saonari.​—Kol. 4:7-9.

7. Songon dia do akka sintua dohot parhobas di huria mambuktihon na boi nasida dihaporseai, jala aha do na diparsiajari hamu sian i?

⁷ Mandok mauliate do hita tu Jahowa ala adong akka sintua dohot akka parhobas di huria na boi tahaporseai. Berupaya do nasida maniru si Daniel, si Hanania, dohot si Tikikus. Denggan do nasida mandalatton tugas ni nasida. Contohna, di parpunguan tonga pokan dipastihon nasida do nungnga adong na pasahatton tiap bagian. Molo adong na mandapot tugas sikkola di parpunguan, dipuji akka sintua do nasida ala denggan paradehon dohot pasahatton bagian ni nasida. Asing ni i molo naeng taundang parsiajar Bibelta tu parpunguan di ujung ni minggu, dang hea mabiar hita dang adong annon na pasahatton jamita. Jala pos do rohatta sai adong do publikasi na tersedia lao tapakke di ulaon marbarita. Jadi boi do tahaporseai nasida. Mandok mauliate do hita tu Jahowa ala denggan hita dijaga nasida. Alai songon dia do hita mambuktihon na boi hita dihaporseai?

8. Songon dia do carana asa unang tacampuri urusan ni na asing? (Poda 11:13)

⁸ Holong do rohatta tu dongan sahaporseaon. Lomo do rohatta mamboto songon dia keadaan ni nasida. Alai ikkon manat do hita asa unang sappe tacampuri na so urusatta. Adong do piga-piga halak Kristen di abad na parjolo na lomo rohana “pahata-hata halak, mangattoi na so urusanna, jala mangattoi na so ulaonna”. (1 Tim. 5:13) Pasti dang lomo rohatta songon nasida. Alai boha ma molo adong sahalak donganta na paboahon masalah pribadina tu hita? Contohna dipaboa tu hita masalah kesehatanna manang masalah na asing. Dipangido ibana ma tu hita asa unang tapaboa i tu halak na asing. Ikkon taargai do pangidoan ni donganta i. b (Jaha Poda 11:13.) Saonari taida ma piga-piga situasi na mambahen hita ikkon manjaga rahasia.

9. Songon dia do setiap anggota keluarga mambuktihon na boi nasida dihaporseai?

⁹ Gabe anggota keluarga na boi dihaporseai. Sude anggota keluarga martanggung  jawab do manjaga rahasia ni keluargana. Contohna, sahalak suami tottu dang olo paboa-boahon kebiasaan ni istrina tu na asing na boi mambahen maila istrina i. Holong do rohana tu istrina jala dang olo ibana mambahen haccit roha ni istrina i. (Eps. 5:33) Ikkon diargai natua-tua do perasaan ni gellengna naung remaja. Jala unang ma dipaboa-boa nasida hahurangan ni gellengna tu na asing. (Kol. 3:21) Akka dakdanak porlu do marsiajar asa boi manjaga rahasia. Unang dipaboa-boa nasida masalah keluarga na boi mambahen maila keluargana. (5 Mus. 5:16) Molo sude na di keluarga berupaya manjaga rahasia, pasti gabe kompak ma nasida.

10. Songon dia do dongan na boi dihaporseai i? (Poda 17:17)

¹⁰ Gabe dongan na boi dihaporseai. Sipata alani susana olo do tahilala porlu tapaboa perasaanta tu dongan akrabta. Alai dang sai mura i. Bisa jadi dang terbiasa hita paboahon perasaanta tu na asing. Manang olo do ra hea hita kecewa dibahen donganta. Tapaboa tu ibana perasaanta hape dipaboa ibana muse tu na asing. Alai pasti las do rohatta molo adong ale-ale na boi dihaporseai jala na boi manjaga rahasia.​—Jaha Poda 17:17.

11. (a) Songon dia do akka sintua dohot istrina mambuktihon na boi nasida dihaporseai? (b) Songon dia do sahalak sintua manjaga rahasia ni huria sian anggota keluargana? (Ida gambar.)

¹¹ Gabe dongan sahaporseaon na boi dihaporseai. Dipatudos do akka sintua songon “inganan partabunian sian alogo, songon inganan parlinggoman sian udan haba-haba”. (Jes. 32:2) Alani i ma leluasa do hita paboahon manang aha pe tu akka sintua. Alai unang ma tapaksa nasida paboahon informasi rahasia. Asing ni i, mandok mauliate do hita tu akka istri ni sintua ala dang olo nasida mamaksa suamina paboa-boahon rahasia ni akka dongan di huria. Sabotulna molo dang  dipaboa-boa sahalak sintua informasi rahasia tu istrina, on patuduhon na parduli do ibana tu istrina i. Adong do istri ni sintua na mandok, “Molo mulak suamikku sian penggembalaan, dang olo ibana paboahon aha na dihatai nasida. Bahkan dang olo ibana paboahon ise na digembalahon nasida. Las hian do rohakku ala dijaga suamikku masalah pribadi ni akka dongan. Gabe dang porlu au dohot mamikkiri masalah i. Gabe boi ma au tetap berpikkiran positif tu sude dongan na di huria jala pos do rohakku dang paboa-boaon ni suamikku masalah pribadikku tu na asing.” Pasti lomo do rohatta ditanda gabe halak na boi dihaporseai. Saonari tabahas ma lima sifat na mangurupi hita asa boi dihaporseai.

12. Sifat aha do na ikkon tapatudu asa gabe halak na boi dihaporseai?

¹² Asa gabe halak na boi dihaporseai, ikkon tapatudu do holong. Jesus mandok dua paretta na umbalga, i ma makkaholongi Jahowa dohot makkaholongi akka dongan. (Mat. 22:37-39) Molo holong rohatta tu Jahowa, pasti berupaya do hita maniru Ibana na boi dihaporseai. Jala molo holong rohatta tu akka dongan, pasti berupaya do hita asa unang manceritahon masalah pribadi ni nasida. Dang olo hita mambahen nasida maila manang mambahen haccit rohana.​—Joh. 15:12.

13. Boasa boi serep ni roha mambahen hita gabe halak na boi dihaporseai?

¹³ Serep ni roha mambahen hita gabe halak na dihaporseai. Molo serep roha ni sasahalak, dang olo ibana paboahon sada informasi penting asa terkesan halak tu ibana. (Plp. 2:3) Dung i dang olo muse ibana mambahen halak marpikkir ibana ma halak na paling mamboto sude informasi na terbaru. Asing ni i, halak na marserep ni roha dang olo paboa-boahon pandangan pribadina na so adong dasarna sian Bibel manang sian publikasi.

14. Songon dia do bisuk mangurupi hita gabe halak na boi dihaporseai?

¹⁴ Molo marbisuk sasahalak diboto ibana do “adong do tikkina hohom, adong do tikkina makkatai”. (Pjm. 3:7) Sipata dumenggan do hohom sian apala makkatai. Alani i ma di Poda 11:12 didok, “Sai hohom do halak na mamboto dia na sittong dohot dia na sala.” Adong do sahalak sintua na berpengalaman na jotjot dipangido lao mangurupi huria na asing pasaehon masalah. Donganna sintua mandok, “Sai manat do donganta i, asa unang sappe paboa-boahon informasi rahasia taringot huria na asing.” Ala marbisuk do donganta sintua i, gabe diargai akka donganna sintua ma ibana. Pos do roha ni nasida dang mungkin dipaboa-boa donganta i informasi rahasia di huria ni nasida tu na asing.

15. Boasa ikkon jujur hita asa gabe halak na boi dihaporseai? Paboa ma contohna.

¹⁵ Asa boi gabe halak na dihaporseai, ikkon jujur do hita. Pos do rohatta tu halak na jujur ala taboto sai na sittong do dihatahon ibana. (Eps. 4:25; Heb. 13:18) Bayakkon ma jo situasi on. Hamu naeng berupaya maningkatton caramuna mangajari. Jadi dipangido hamu ma donganmuna mambege jamitamuna jala mangalehon saran tu hamu. Ise do halak na dipillit hamu lao mangalehon saran? Pasti dipillit hamu do halak na barani paboahon na sasittongna, dang holan mangalehon pujian asa las rohamuna.  Bibel mandok, “Tumagon do takkas pinaboa hahurangan ni sasahalak, sian apala adong holong ni roha di iba alai dang pinatudu. Tumagon do haccit roha ala dipissang dongan na setia.” (Poda 27:5, 6) Bisa jadi di mulana dang lomo rohatta mambege saranna i, alai molo taulahon i marguna do i di ngolutta saleleng ni lelengna.

16. Sesuai tu Poda 10:19, boasa porlu hita mangarajai diri?

¹⁶ Ikkon boi do hita mangarajai diri asa boi dihaporseai na asing. Sifat on mangurupi hita asa unang paboahon rahasia tikki ditekan. (Jaha Poda 10:19.) Alai dang sai mura mangarajai diri, khususna tikki mamakke media sosial. Molo dang hati-hati hita, olo do dang sengaja tasebarhon rahasia tu godang halak disi. Berbahaya do i, alana dang boi be takendalihon aha na masa molo nga tersebar rahasia di media sosial. Asing ni i, sifat mangarajai diri mangurupi hita asa unang paboahon rahasia manang informasi taringot akka dongan tu polisi di daerah na mangorai ulaon ni Saksi Jahowa. Di situasi sisongon i, taterappon ma prinsip ni Bibel na mandok, “Jagaokku do babakku jala tutupokku do i.” (Ps. 39:1) Jadi asa boi hita dihaporseai, tarajai ma diritta tikki berurusan dohot keluarga, dongan sahaporseaon, dohot akka na asing.

17. Songon dia do carana asa boi hita dihaporseai akka dongan di huria?

¹⁷ Mandok mauliate do hita ala dipillit Jahowa gabe bagian sian keluargana na marsihaholongan jala na boi tahaporseai. Alani i, berusaha ma hita sude asa boi dihaporseai akka donganta di huria. Torus ma tapatudu holong, serep ni roha, bisuk, jujur ma hita, jala tarajai ma diritta. Toktong ma tatiru Jahowa jala torus ma tabuktihon sian tindakanta na boi hita dihaporseai.