1. Uga nge kalak si terteki e?

 KALAK si terteki tepatina janjina janah lalap katakenna kai si benar. (Ms. 15:4) Teh kalak maka ia banci iandalken. Ateta min bage perasan turang seninata man banta. Kai si banci silakoken gelah tek kalak e man banta?

2. Uga carata mbuktiken maka kita kalak si terteki?

² Labo banci sipaksa kalak gelah tek man banta. Arus sibuktiken arah perbahanenta maka kita kalak si terteki. Labo menukah jadi kalak si terteki. Enda bali bagi sen, mesera ndatkenca tapi menukah ngkerikenca. Enggo buktiken Jahwe maka Ia banci terteki. Banci lalap kita tek man baNa perban “kerina si lakokenNa banci terteki.” (Ms. 33:4) Ate Jahwe siusih min Ia. (Ep. 5:1) Mari sibahas piga-piga contoh arah umat Jahwe si enggo ngusih Bapakta si i surga janah buktikenna maka ia banci terteki. Sibahas ka kari lima sipat si banci nampati kita jadi kalak si terteki.

3-4. Kai buktina Nabi Daniel kalak si terteki, janah penungkunen kai saja si perlu siukuri?

³ Enggo iban Nabi Daniel usihen si mehuli kerna jadi kalak si terteki. La ndekah kenca ia itaban ku Babilon, enggo tandai kalak ia selaku kalak si terteki. Melala ka perbahanenna si erban kalak reh tekna man bana. Contohna, alu penampat Jahwe, ijelaskenna erti nipi raja Babilon  eme Nebukadnesar. Bas situasi si deban, alu perpang ikataken Daniel man raja maka la senang Jahwe man bana. Pasti la menukah mpeseh berita e man sekalak raja, apai ka Nebukadnesar kalak si menukah merawa ras kejam! (Dan. 2:12; 4:20-22, 25) Ertahun-tahun kenca si e, sanga lit tulisen si itulis alu jari-jari bas dingding istana Babilon, tepat kel penjelasen Daniel kerna erti tulisen e. (Dan. 5:5, 25-29) Bas pudi wari, Raja Darius kalak Media ras pejabatna mperdiateken maka lit ‘kengasupen si luar biasa’ bas Daniel. Akui kalak e maka Daniel “jujur, terteki, janah la pernah salah bas ndalanken tugasna.” (Dan. 6:3, 4) Payo, penguasa-penguasa si la nembah Jahwe pe ngakui maka Daniel banci terteki!

⁴ Janahta ngukuri usihen Daniel, perlu siukuri penungkunen enda: ‘Kalak si uga nge aku iakap kalak si labo Saksi Jahwe? Anggap kalak e nge aku selaku kalak si ertanggung jawap ras terteki?’ Engkai penungkunen-penungkunen e perlu siukuri? Perban, adi terteki kita, Jahwe banci imuliaken.

5. Engkai maka Hanania itandai selaku kalak si terteki?

⁵ Bas tahun 455 SM, kenca ibangun Gubernur Nehemia mulihi tembok Jerusalem, idaramina dilaki si banci iandalken guna ngurus kota e. Salah sada si ipilihna eme Hanania, si igelari “peminpin Kota si Erbenteng.” Bas Pustaka, Hanania ikataken selaku “kalak situhu-tuhu terteki janah mbiar man Dibata si  benar lebihen asangken enterem kalak si debanna.” (Neh. 7:2) Perban keleng ate Hanania Jahwe janah mbiar ia erban Jahwe la senang, tutus atena ngelakoken tugas kai pe si ibereken man bana. Sipat-sipat e pe banci nampati kita jadi umat Jahwe si banci iandalken.

6. Kai buktina Tikikus jadi teman si terteki man Rasul Paulus?

⁶ Usihen si deban eme Tikikus, sekalak teman Rasul Paulus si terteki. Sanga Paulus jadi tahanen rumah, iandalkenna Tikikus. Ikataken Paulus maka Tikikus e kalak si “setia man Tuan.” (Ep. 6:21, 22) Paulus tek man bana labo saja guna ngirimken surat-surat man senina-seninana i Epesus ras Kolose, tapi termasuk guna mpegegehi ras ngapuli kalak e. Bas jamanta pe, lit dilaki-dilaki si ngurus keperlun rohanita. Bali bagi Tikikus, kalak e pe setia ras banci iandalken.​—Kol. 4:7-9.

7. Bas runggunndu, uga pertua ras sinampati runggun terbukti banci terteki?

⁷ Ngata bujur kel kita perban lit pertua ras sinampati runggun si terteki. Bali bagi Daniel, Hanania, ras Tikikus, tutus ate kalak e ndalanken tugasna. Contohna, sanga reh kita ku perpulungen tengah pekan, tek kita maka enggo lit turang senina si itugasken guna mpeseh kerina bagin bas acara e. Ergai pertua kel adi turang senina si ndatken tugas enggo erban persiapen ras pesehna baginna alu mehuli. Selain si e, la kita sangsi ngundang kalak si erlajar Pustaka ku perpulungen akhir pekan perban tek kita pasti enggo lit si mpeseh khotbah. Tek ka kita maka publikasi kai pe si iperluken bas pelayanen pasti enggo isediaken. Pasti ngata bujur kita man Jahwe perban gunakenNa turang senina si setia e guna ngurus kita. Adi bage, uga carata mbuktiken maka kita pe kalak si terteki?

8. Amin pe ermediate kita man turang seninata, kai si perlu siinget? (Kuan-kuanen 11:13)

⁸ Keleng ateta turang seninata, janah ermediate kita man kalak e. Tapi, arus siinget maka lit urusenna si la banci sicampuri. Piga-piga kalak bas runggun Kristen abad si pertama “meriah kapna cikurak, campurina urusen kalak, janah cakapkenna kai si la perlu icakapken.” (1 Tim. 5:13) Mon-mon, lit kalak si nceritaken masalah pribadina man banta janah arapkenna gelah ula siceritaken man kalak si deban. Contohna, banci saja ceritaken sekalak turang seninata masalah kesehatenna ntah pe tentangen-tentangen si sangana adapina. Adi pindona gelah ula siceritaken man ise pe, arus siergai pemindonna e. * (Baca Kuan-kuanen 11:13.) Bas situasi kai ka kita perlu njaga rahasia?

9. Kai si perlu iinget tiap anggota keluarga?

⁹ Bas keluarga. Perlu inget tiap anggota keluarga maka piga-piga urusen pribadi keluargana la perlu teh kalak si deban. Contohna, banci saja lit kebiasan sekalak ndehara si lucu akap perbulangenna. Iceritaken perbulangenna nge kerna si e man kalak si deban janah banna  mela ndeharana? Pasti lang. Keleng atena ndeharana, janah pasti la ia nggit ngelakoken kai pe si banci erban ndeharana sakit hati. (Ep. 5:33) Perlu inget orang tua maka biasana anak remaja la senang iban bagi anak-anak. Ula min iceritaken orang tua kesalahen anak-anakna, perban e banci erban anak-anakna mela. (Kol. 3:21) Anak-anak pe perlu erlajar guna njaga rahasia alu la nceritaken kai si erban mela anggota keluargana. (Ul. 5:16) Adi tiap anggota keluarga rusaha asa bancina guna njaga urusen pribadi keluargana, reh kompakna me kalak e.

10. Uga nge teman situhu-tuhu e? (Kuan-kuanen 17:17)

¹⁰ Bas pertemanen. Lit masana, merhat kita nuriken uga perasanta man sekalak teman si ndeher kel ras kita. Tapi, mon-mon mesera siakap ngelakokenca. Banci saja la kita biasa nuriken isi pusuhta man kalak si deban. Janah kecewa kel kita adi kai si enggo siceritaken ceritakenna ka man kalak si deban. Tapi, pasti meriah kel ukurta adi temanta banci njaga rahasia! Kalak si bage me “teman situhu-tuhu.”​—Baca Kuan-kuanen 17:17.

11. (a) Uga pertua ras diberuna mbuktiken maka kalak e banci terteki? (b) Kai pelajaren si banci sidat arah pertua si la nceritaken informasi si rahasia kerna runggun man keluargana? (Nen gambar.)

¹¹ Bas runggun. Pertua-pertua si banci njaga informasi si rahasia banci jadi “ingan cicio” ras “ingan erlindung” man turang seninana. (Jes. 32:2) La kita mbiar ngerana man pertua-pertua kerna kai pe, perban tek kita maka labo ceritakenna masalahta man kalak si deban. La ka kita nggit maksa kalak e nuriken informasi si la banci ceritakenna man banta. Selain si e, siergai kel diberu pertua, perban la usahaken kalak e gelah iceritaken perbulangenna informasi si  rahasia man bana. Kai gunana adi la ceritaken pertua man ndeharana informasi si rahasia? Bagenda nina sekalak diberu pertua, “Ngata bujur kel aku perban la ceritaken dilakiku kai pe kerna kalak si ipermakanina, ntah pe kerna kalak si merluken penampat secara rohani bas runggun. Gelar kalak e pe la katakenna man bangku. Alu bage la latih kuakap ngukuri masalah si la banci kudungi. Selain si e, banci aku bebas ngerana man ise pe bas runggun. Tek aku, sanga kuceritaken perasanku ras masalahku man dilakiku, labo kari ceritakenna man kalak si deban.” Payo, selain pertua, kerina kita merhat itandai selaku kalak si terteki. Sipat kai saja si banci nampati kita? Mari sibahas lima sipat.

12. Engkai kekelengen iperluken gelah banci jadi kalak si terteki?

¹² Kekelengen me sipat si pentingna si banci nampati kita jadi kalak si terteki. Ikataken Jesus maka lit dua perentah si pentingna, eme engkelengi Jahwe ras engkelengi kalak si deban. (Mat. 22:37-39) Keleng ateta Jahwe janah merhat kita ngusih Ia. Siusih ateta Ia jadi kalak si terteki. Contohna, perban keleng ateta turang seninata, la kita nggit nceritaken informasi si rahasia kerna kalak e. La kita nggit nceritaken kai pe si banci erban kalak e susah, mela, ntah pe sakit hati.​—Joh. 15:12.

13. Engkai maka kita perlu meteruk ukur gelah banci jadi kalak si terteki?

¹³ Sipat meteruk ukur banci nampati kita jadi kalak si terteki. Kalak Kristen si meteruk ukur labo rusaha jadi kalak si pertama nceritaken sada informasi gelah hebat akap kalak ia. (Pil. 2:3) Labo ka usahakenna gelah penting akap kalak ia perban tehna informasi si rahasia. Adi meteruk ukur kita, la sisebarken pendapat pribadita kerna kai si la lit ibahas bas Pustaka ntah pe publikasita.

14. Uga pengertin banci nampati kita jadi kalak si terteki?

¹⁴ Pengertin banci nampati kalak Kristen meteh ‘ndigan waktuna sinik ras ndigan waktuna ngerana.’ (Peng. 3:7) Lit sada istilah si ngataken, “Ngerana e pirak, tapi sinik e emas.” Banci sikataken, mon-mon pangen sinik asangken ngerana. Nina Kuan-kuanen 11:12, “Kalak situhu-tuhu erpengertin, tetap ia sinik.” Cuba ukuri usihen arah sekalak pertua si erpengalamen. Rusur sampatina runggun-runggun si sangana mberat masalahna. Bagenda nina sekalak pertua bas runggunna, “Jagana kel gelah ula sempat ceritakenna informasi si rahasia kerna runggun-runggun si deban.” E erban ia iergai pertua-pertua si lit bas runggunna. Tek kalak e maka labo ceritakenna informasi si rahasia bas runggun kalak e man kalak si deban.

15. Engkai maka perlu kita sipat si jujur gelah banci jadi kalak si terteki? Ban contohna.

¹⁵ Sipat si jujur banci nampati kita jadi kalak si terteki. Tek kita man kalak si jujur perban siteh maka pasti lalap katakenna kai si benar. (Ep. 4:25; Heb. 13:18) Contohna, katakenlah reh ulina atendu carandu ngajar. Emaka pindondu sekalak jelma megiken kam mpeseh khotbah janah mereken saran si erguna man bandu. Man kalak si uga nge kam mindo saran? Man kalak si muji-muji  kam saja ntah man kalak si jujur ras terus terang? Jawapenna pasti man kalak si jujur. Bagenda nina Pustaka, “Persinget si terus terang ulin asangken kekelengen si la icidahken. Luka-luka si iban teman, mbuktiken kesetianna.” (Kua. 27:5, 6) Amin pe tangtangna banci saja mesera siakap ngaloken nasehat si terus terang arah teman si jujur, komentar si bage me si banci tuhu-tuhu erguna man banta.

16. Sesuai ras Kuan-kuanen 10:19, engkai maka perlu kita ngendaliken diri?

¹⁶ Gelah banci jadi kalak si terteki arus banci kita ngendaliken diri. Sipat e banci nampati kita tetap sinik sanga igoda guna nceritaken kai si la perlu teh kalak. (Baca Kuan-kuanen 10:19.) Contohna, perlu kita hati-hati sanga nggunaken media sosial. Adi la kita hati-hati, banci la sengaja enggo sibagiken informasi si rahasia man enterem kalak. Perlu siinget maka, adi siposting sada informasi, lanai banci sikendaliken informasi e. Informasi e banci isalahgunaken kalak janah banci erban mbue masalah. Adi banci sikendaliken dirita, beluh kita ngadapi kalak si nentang. Contohna, sanga isungkuni polisi kita bas daerah si ngelarang pendahinta, la kita nggit mereken informasi si banci mbahayaken turang seninata. Bas situasi e, bage pe situasi si mirip ras si e, padin kita ‘la ngerana.’ (Ms. 39:1) La soal sanga erurusen ras keluargata, teman-temanta, turang seninata, ntah pe kalak si deban, perlu kita jadi kalak si terteki. Gelah jadi kalak si terteki, arus banci sikendaliken dirita.

17. Uga carana ndukung kerina kalak si lit bas runggun gelah jadi kalak si terteki?

¹⁷ Ngata bujur kel kita perban enggo itarik Jahwe kita ku organisasiNa. Enggo lit turang seninata si perkeleng ras terteki. Tapi, kerina kita perlu terus rusaha jadi kalak si terteki. Adi kerina kita rusaha ncidahken kekelengen, sipat meteruk ukur, erpengertin, jujur, ras ngendaliken diri, sidukung me kerina kalak bas runggun jadi kalak si terteki. Mbera-mbera siusih Jahwe Dibatata janah terus sibuktiken maka kita kalak si terteki!