1. Kouman nou ka wè nou pouvé fè roun moun konfyans ?

 ROUN moun yé pouvé fè konfyans toujou ka fè tousa i pouvé pou di lavérité é pou tchenbé so promès (Ps. 15:4). To pouvé konté asou sa moun-an. É a konsa nou lé nou frè ké sò-ya wè nou. Kisa nou pouvé fè pou yé fè nou konfyans ?

2. Kouman nou pouvé montré ròt-ya ki yé pouvé fè nou konfyans ?

² Nou pa pouvé blijé ròt-ya fè nou konfyans. Asou sa nou ka fè, yé divèt wè ki yé pouvé fè nou konfyans. Zafè konfyans-a, a kou soumaké-a. Sa rèd pou to trapé l’, mé to pouvé pédi l’ fasilman. Si i gen roun moun ki montré ki nou pouvé fè li konfyans, a byen Jéova. I pa ké janmen fè roun bagaj ki ké fè nou arété fè li konfyans, paské « nou pouvé gen konfyans annan tousa i ka fè » (Ps. 33:4). É i lé nou fè kou li (Éph. 5:1). Annan sa artik-a, nou ké wè èkzanp plizyèr sèrvitèr Jéova tan-lontan ki fè kou li. Apré sa, nou ké palé di senk kalité ki ké idé nou sa dé moun yé pouvé fè konfyans.

3-4. Kouman Danyèl montré ki yé té pouvé fè li konfyans, é ki késyon sa divèt fè nou pozé nou kò ?

³ Profèt Danyèl ka bay nou roun bèl èkzanp, paské moun-yan té pouvé fè li konfyans. Menm si Babilonyen-yan té fòrsé l’ vini annan yé koté, i montré ki yé té pouvé fè li konfyans. Moun-yan fè li plis konfyans ankò lò  Jéova idé l’ èspliké sa rèv Nabikodonozòr rwa Babilonyen-an, té lé di. Roun jou, i té gen pou di rwa-a ki Jéova pa té kontan sa i té ka fè. Mé a pa roun bagaj roun rwa kontan tandé. Danyèl té divèt gen kouraj, paské Nabikodonozòr té sa roun moun ki té ka kòlè vit ! (Dan. 2:12 ; 4:20-22, 25). Plizyèr lannen pita, Danyèl montré ankò ki yé té pouvé fè li konfyans lò i byen èspliké roun mésaj ki té parèt asou roun mir annan palè Babilòn-an. Pyès moun pa té pouvé konprann sa sa mésaj-a té lé di (Dan. 5:5, 25-29). Pita, Daryis Mèd-a ké so fonksyonèr wè osi ki « a pa ti entélijans i té gen ». Yé wè ki « moun té pouvé fè li konfyans » é yé pa trouvé « pyès bagaj malonnèt koté li paské i toujou té ka byen fè so travay » (Dan. 6:3, 4). Menm chèf-ya ki té ka adoré fo bondjé wè ki yé té pouvé fè sa sèrvitèr Jéova-a konfyans !

⁴ Toupannan nou ka sonjé èkzanp Danyèl, annou doumandé nou kò : « Kouman sa-ya ki pa Témwen Jéova ka wè mo ? Ès yé ka wè mo kou roun moun ki ka byen fè tousa yé ka bay li fè é kou roun moun yé pouvé fè konfyans ? » Poukisa nou divèt pozé nou kò sa késyon-yan ? Paské lò nou sa roun moun yé pouvé fè konfyans, nou ka louwé Jéova.

5. Poukisa tout moun té savé ki yé té pouvé fè Ananya konfyans ?

⁵ An 455 anvan nou lépòk, apré gouvèrnèr Néémi roufè miray Jérizalèm-yan, i chaché plizyèr mouché i té pouvé fè  konfyans pou okipé di vil-a. Parèkzanp, Néémi chwazi chèf fòrtérès-a, Ananya. Labib-a ka di ki Ananya « té sa roun mouché tout moun té pouvé fè konfyans é ki té gen plis lakrent pou vré Bondjé-a pasé roun patché ròt moun » (Néh. 7:2). A paské Ananya té kontan Jéova é té pè fè li lapenn ki i té ka byen fè tousa yé té ka bay li fè. A sa lanmou-a ké sa lakrent-a osi ki ké fè nou aji pou ròt-ya fè nou konfyans annan nou sèrvis pou Bondjé.

6. Kouman Tichik montré ki Pòl té pouvé fè li konfyans ?

⁶ Aprézan, annou palé di Tichik, roun frè apot Pòl té ka fè konfyans. Lò Pòl té fronmen annan so kaz ké gardyen ki té ka véyé l’, i té pouvé konté asou Tichik ; i di ki i té sa roun « sèrvitèr ki fidèl » (Éph. 6:21, 22). I doumandé li alé bay frè ki té Éfèz ké Kolòs plizyèr lèt, mé i té divèt osi ankourajé yé ké konsolé yé. Tichik ka fè nou sonjé frè-ya nou pouvé fè konfyans jòdla, ki ka idé nou rété pròch di Jéova (Col. 4:7-9).

7. Kisa èkzanp ansyen-yan ké asistan-yan ka montré to asou sa to divèt fè pou ròt-ya fè to konfyans ?

⁷ Nou kontan nou ansyen ké nou asistan bokou, paské nou pouvé fè yé konfyans. Kou Danyèl, Ananya ké Tichik, yé ka byen fè tousa yé ka bay yé fè. Parèkzanp, lò nou k’alé annan réinyon-an an mitan simenn-an, ès nou pè yé bliyé bay roun moun fè roun parti annan réinyon-an ? Non. É ansyen-yan byen kontan lò sa-ya ki divèt fè roun sijè ka byen préparé yé kò é ka fè yé sijè ! Ès nou pè envité moun-yan ki ka étidyé Labib-a ké nou pou réinyon lafen simenn-an paské nou pè yé bliyé prévwè roun diskour ? Non. Anplis di sa, nou sir ki nou ké toujou gen tout piblikasyon nou bézwen pou préché. Nou ansyen ké nou asistan ka byen pran swen di nou. É nou ka di Jéova mèrsi pou sa frè-ya ki fidèl ! Annou wè aprézan kouman nou pouvé montré ki yé pouvé fè nou konfyans.

8. Kisa nou divèt panga lò nou ka chaché savé kouman ròt-ya fika ? (Proverbes 11:13).

⁸ Nou kontan nou frè ké sò-ya é nou lé savé kouman yé ka alé. Mé, nou divèt fè atansyon épi toujou rèspèkté yé lavi privé. Roun ran krétyen annan 1^é syèk-a té ka « fè kankan », épi yé té ka « mélé yé kò annan zafè moun » é yé ‘té ka palé di sa yé pa té divèt palé’ (1 Tim. 5:13). Nou pa lé fè menm bagaj-a. Imajiné roun moun ka louvri so tchò pou to é i pa lé to rakonté sa i di to. Parèkzanp roun sò pouvé palé to di roun problèm santé i gen ouben di rounòt traka i ka jwenn, épi i ka doumandé to tchenbé sa pou to. Si a sa i lé, to divèt fè sa i di to * (li Proverbes 11:13). Annou wè aprézan ròt sitiasyon koté to pa divèt répété sa yé di to.

9. Kouman chak moun annan fanmi-a pouvé montré ki yé pouvé fè yé konfyans ?

⁹ Annan fanmi-a. Annan fanmi-a, chak moun divèt panga pou i pa répété bagaj ki divèt rété annan fanmi-a. Parèkzanp, pitèt roun madanm gen labitid fè roun bagaj ki ka fè so mouché ari. Ès i ké palé di sa ké ròt moun, menm si sa pouvé fè so madanm ronté ? Non i pa ké fè sa ! I kontan so madanm é i pa ké lé fè anyen ki  pouvé fè l’ lapenn (Éph. 5:33). Jennjan-yan osi lé yé trété yé ké rèspè. Papa ké manman-yan divèt konprann sa épi pa di ròt moun-yan fot yé timoun ka fè pou yé pa fè yé ronté (Col. 3:21). Kanta timoun-yan, yé divèt anprann tchenbé sa ki divèt rété annan fanmi-a, paské si yé pa ka fè sa, sèrten moun annan yé fanmi ké pouvé jennen (Deut. 5:16). Lò chak moun annan fanmi-a konnèt tchenbé sa ki divèt rété annan fanmi-a, fanmi-a ka vin pi fò.

10. Kisa roun bon zanmi divèt fè ? (Proverbes 17:17).

¹⁰ Ké nou zanmi. Sa ka rivé nou tout anvi louvri nou tchò pou roun bon zanmi. Mé sa pa toujou fasil. Pitèt nou pa gen labitid di ròt-ya sa ki ofon nou tchò, é nou dé bra té ké kasé si nou té ka vin savé ki nou zanmi alé rakonté ròt-ya sa nou di li. Parkont, nou kontan moun ki pa ka répété nou zafè pou pyès moun ! A sa ki roun « bon zanmi » (li Proverbes 17:17).

11. a) Kouman ansyen-yan ké yé madanm pouvé montré ki yé sa dé moun yé pouvé fè konfyans ? b) Asou zimaj-ya ki k’alé ké sa paragraf-a, nou ka wè roun ansyen ki pa ka di so fanmi anyen asou roun bagaj i fin réglé annan asanblé-a. Kisa sa ka anprann nou ?

¹¹ Annan asanblé-a. Ansyen-yan ki pa ka répété sa yé di yé, sa roun « koté pou séré lò i gen van, roun koté pou séré » pou yé frè ké sò-ya (Is. 32:2). Nou savé ki nou pouvé louvri nou tchò pou yé, paské nou savé yé pa ké alé répété sa nou di yé. Nou pa ka éséyé fè yé di nou bagaj nou pa divèt savé. Anplis di sa, nou kontan yé madanm paské yé pa ka éséyé fè yé mari di yé bagaj yé pa divèt konnèt. É lò roun ansyen pa ka di so madanm sa i pa divèt savé, a roun protèksyon pou li. Men sa madanm roun ansyen ka di : « Lò mo mari ka alé ankourajé roun frè ouben roun sò ouben k’alé idé l’, i pa ka di mo a kimoun i alé wè é i pa ka di mo anyen asou moun-an. Konsa, mo pa ka kasé mo tèt pou roun problèm alòr ki mo  pa pouvé fè anyen pou sa. É mo alèz pou palé ké tout moun annan asanblé-a. Anplis di sa, mo sir ki mo mari pa ké ni alé di ròt-ya ki problèm mo gen, ni répété sa mo di li. » Nou tout lé moun fè nou konfyans. Mé ki kalité ké idé nou divini roun moun konsa ? Annou wè senk kalité.

12. Poukisa nou ka di ki pou i gen konfyans, a pou i gen lanmou ?

¹² Pou i gen konfyans, a pou i gen lanmou. Jézi di ki dé pi gran koumannman-yan, a kontan Jéova ké kontan nou konpanyen (Mat. 22:37-39). Nou toujou pouvé fè Jéova konfyans, é kou nou kontan l’, nou anvi imité l’. É kou nou kontan nou frè ké sò-ya, nou pa anvi répété bagaj moun pa divèt konnèt asou yé. Nou pa lé fè yé mal, fè yé lapenn ouben fè yé ronté ké sa nou ka di ki moun pa divèt konnèt (Jean 15:12).

13. Poukisa imilité-a ka idé nou divini roun moun yé pouvé fè konfyans ?

¹³ Imilité-a ka idé nou pou nou divini roun moun yé pouvé fè konfyans. Roun krétyen ki gen imilité, pa lé sa prémyé moun-an ki ka di roun bagaj pyès moun pòkò savé pou fè moun wè (Phil. 2:3). I pa ka fè kousidiré i konnèt bagaj i pa gen drwa répété, tousa pou bay so kò grad. Anplis di sa, imilité-a ké anpéché nou di sa nou ka pansé asou roun bagaj Labib-a ouben nou piblikasyon pa ka di anyen.

14. Kouman zafè fè diférans ant sa ki bon ké sa ki mové ka idé nou divini roun moun yé pouvé fè konfyans ?

¹⁴ Roun krétyen ki konnèt fè diférans ant sa ki bon ké sa ki mové savé lò a roun « tan pou pa di anyen » ouben roun « tan pou palé » (Eccl. 3:7). I gen roun dolo an fransé ka di « La parole est d’argent, mais le silence est d’or » : sa lé di ki détan, miyò to pa di anyen pasé to palé. Épi Proverbes 11:12 ka di : « Sa-la ki konnèt fè diférans ant sa ki bon ké sa ki mové, pa ka di anyen. » Annou pran èkzanp roun ansyen ki gen bokou èspéryans, épi ròt asanblé ka doumandé li vini idé pou réglé problèm ki pa fasil pou réglé. Men sa roun ansyen annan so asanblé ka di asou li : « I pa ka janmen di nou sa ki ka pasé annan ròt asanblé-ya. » Kou sa frè-a konnèt fè diférans ant sa ki bon ké sa ki mové, ansyen-yan annan so asanblé ka rèspèkté l’. Yé sir ki i pa ké alé palé di sa ka pasé annan yépa asanblé.

15. Poukisa nou ka di ki nou blijé palé franchman si nou lé ròt-ya fè nou konfyans ?

¹⁵ Nou blijé palé franchman si nou lé ròt-ya fè nou konfyans. Lò roun moun ka palé franchman épi i toujou ka di lavérité, nou ka fè li konfyans (Éph. 4:25 ; Héb. 13:18). Imajiné to lé divini pi vayan annan zafè ansényé-a. To ka doumandé roun moun kouté to diskour pou i bay to déztrwa konsèy apré sa. Dapré to, ki kalité moun ké bay to konsèy franchman ? Roun moun ki abitchwé di to sa to anvi tandé ouben roun moun ki gen labitid di lavérité jantiman ? To byen konnèt répons-a. Labib-a ka di : « Miyò to rouprann roun moun franchman pasé to kontan roun moun é to pa ka di l’ anyen. Menm si sa ka fè to mal, lò roun zanmi ka rouprann to, i ka montré to i fidèl » (Prov. 27:5, 6). Menm si sa rèd pou tandé sa roun zanmi ka di nou franchman, pita sa ké idé nou.

16. Kouman Proverbes 10:19 ka montré nou ki sa enpòrtan pou nou kontrolé nou kò ?

 ¹⁶ Nou divèt kontrolé nou kò osi si nou lé ròt-ya fè nou konfyans. Sa ka pèrmèt nou tchenbé nou lang lò nou anvi répété roun bagaj nou pa divèt répété (li Proverbes 10:19). Pitèt nou pa ka rivé kontrolé nou kò lò nou ka sèrvi rézo sosyal-ya. Mé si nou pa panga, pitèt nou ké di roun patché moun roun bagaj yé pa divèt savé. Anplis di sa, dipi nou mété roun enfòrmasyon asou Entèrnèt nou pa pouvé anpéché moun-yan fè sa yé lé ké li. É si i ka fè déga, a pa anyen nou ké pouvé fè. Nou divèt kontrolé nou kò osi lò nou lèlmi ka mété trap douvan nou pou fè nou di bagaj ki pouvé mété lavi nou frè ké sò-ya an danjé. Parèkzanp, si nou ka viv annan roun péyi koté yé ka anpéché nou adoré Bondjé kou nou lé, pitèt lapolis ké pozé nou késyon. Annan sa sitiasyon-an ouben annan ròt ankò, nou divèt swiv prensip-a ki annan Labib-a ki ka di nou ‘mété roun bagaj asou nou bouch pou anpéché nou palé’ (Ps. 39:1). Donk, ki a nou fanmi, nou zanmi, nou frè ké sò-ya ouben nenpòrt ki ròt moun, yé divèt pouvé fè nou konfyans. É pou moun pouvé fè nou konfyans, nou divèt kontrolé nou kò.

17. Kouman nou pouvé idé pou tout moun annan asanblé-a fè yé konpanyen konfyans ?

¹⁷ Nou ka di Jéova mèrsi paské i fè nou vini òbò li é jòdla nou annan roun fanmi koté tout moun kontan yé konpanyen é ka fè yé konpanyen konfyans. Mé nou divèt fè sa nou pouvé pou nou frè ké sò-ya fè nou konfyans. Si nou ka fè tousa nou pouvé pou nou kontan nou frè ké sò-ya, pou nou gen imilité, pou nou fè diférans ant sa ki bon ké sa ki mové, pou nou palé franchman é pou nou kontrolé nou kò, nou ké idé tout moun annan asanblé-a fè yé konpanyen konfyans. Donk, annou toujou chaché fè bagaj pou nou frè ké sò-ya fè nou konfyans. Annou imité nou Bondjé Jéova, é annou montré ròt-ya ki yé pouvé fè nou konfyans !