1. Ek munis visvas dovorpa sarko asa mhunn ami koxim vollkhonk xoktat?

 EK VISVAXI munis apnnem dilʼlem utor samballunk ani sot ulounk khub proitn korta. (St. 15:4) Toxench, to ek visvas dovorpa sarko munis asa mhunn lokank khobor asta. Tor amchea bhav-bhoinnamnim amcher visvas dovorlolo amkam zai zalear ami kitem korunk zata?

2. Ami visvas dovorpa sarkim munxam asat mhunn ami koxem dakhounk zata?

² Amchea kornneamnim ami visvas dovorpa sarkim munxam zaun asat mhunn ami dakhoun diunk zai. Ami visvas, poixeank sor korunk zata. Poixeam bhaxen amkam visvas zoddun gheunk khub vavr korunk poddtta. Punn to hogddavop khub sompem. Visvaxiponna vixim Jehovan amkam sogleam-von borem udharonn dovorlam. Ami sodanch tacher visvas dovrunk xoktat karonn “sogllim Tachim kortutvam visvaxiponnachim.” (St. 33:4) Ani ami pasun tachi dekh ghetloli Jehova Devak zai. (Ef. 5:1) Tor atam, Jehovachi dekh gheun apunn visvas dovorpa sarkim munxam asat mhunn dakhoun dilʼlea tachea thoddea sevokanchim udharonnam polloum-ia. Ani visvas dovorpa sarkim munxam zaunk amkam khoinche panch gunn modot kortole tem polloum-ia.

3-4. Provadi Daniel visvas dovorpa sarko aslo mhunn tannem koxem dakhoilem, ani ami amkanch kosle prosn vicharunk zatat?

³ Provadi Daniel ek visvas dovorpa sarko munis aslo. Taka Babilonant koidi korun vhelʼlo. Punn rokddench, to patieupa sarko munis aslo mhunn tankam kollon ailem. Ani uprant,  Jehovache modotin tannem Babilonacho Raza Nebukadnezzarachea sopnacho orth sanglo tednam lok tacher anikui chodd visvas dovrunk lagle. Ek pavtti, Raza Nebukadnezzar korta tem Jehovak manvona mhunn Danielak taka sangonk poddlem. Ho sondex diunk Danielak khorench khub dhirachi goroz asli. Karonn Nebukadnezzar raza ekdom ragixtt sobhavacho aslo. (Dan. 2:12; 4:17-19, 22) Ani zaitea vorsam uprant, Babilonachea rajmahalachea eke vontticher eka hatan boroilʼlea okxorancho orth, Danielan sarko sanglo tednam to visvas dovorpa sarko aslo mhunn tankam anikui khatri zali. (Dan. 5:5, 25-29) Uprant, Daniel “ojapanche budhin bhorlolo” ani “itlo promannik monis aslo, ki tachea razkarbharant tankam ek-ui chuk mellona zali, nhoi mhonn koslich besarmai” mhunn Darius ani tachea odhikariamnim pasun vollkhon ghetlem. (Dan. 6:4, 5) Khorench, Jehovachi seva korinant tea odhikariamnim pasun, Jehovacho ho sevok visvas dovorpa sarko aslo mhunn vollkhon ghetlem!

⁴ Tor Danielachea udharonnacher ami niall kortat tednam ami amkanch he prosn vicharunk zatat: ‘Jehovachi seva korinant te lok mhoje vixim kitem chintʼtat? Mhaka dilʼlem kam hanv bore toren samballtta ani visvas dovorpa sarko asa, hea nodren tim mhaka polloitat kai?’ Hea prosnam vixim chintop ekdom gorjechem. Karonn ami visvas dovorpa sarkim munxam astat tednam ami Jehovak vakhannʼnni haddttat.

5. Hanani visvas dovorpa sarko munis aslo oxem ami kiteak mhunnonk zata?

⁵ 455 K.X.A.-ant, Rajpal Nehemiasan Jerusalem-acheo vontteo porot bandleo tednam akʼkhea xarachi bori dekhrekh korunk taka visvas dovorpa sarkea munxanchi goroz  asli. Tednam Nehemiasan, heram borabor kottacho mukheli, Hananik vinchun kaddlo. Bible-ant Hanani vixim, to “odik khatrecho ani heram zaiteam poros, Dev-bhiranticho monis aslo” oxem sanglolem asa. (Ne. 7:2) Tor Hananik Jehovacho mog aslo ani Jehovak manvona toslim kamam korchi bhirant asli dekhun taka dilʼlem khoinchem-i kam bore toren korunk to khub vavr kortalo. Amkam pasun Hanani sarke gunn aslear ami Jehovache sevent visvas dovorpa sarkim munxam asat mhunn dakhoun ditolim.

6. Tikikus-an apunn ek visvas dovorpa sarko munis aslo mhunn koxem dakhoun dilem?

⁶ Amkam Tikikus-achem pasun ek borem udharonn asa. Apostl Pauluk Tikikus-acher visvas aslo. Paulu ghorant koidi aslo tednam Tikikus-an taka khub modot keli. Ani hea pasot Paulun to ek “visvaxi sevok” oxem mhunnttlem. (Ef. 6:21, 22) Tikikus-an, Efezant ani Kolosant aslolea bhav-bhoinnank fokot Paulucheo chitteoch pavounk nant, punn tankam bhuzvonn ani urba pasun dili. Hea toren apunn visvas dovorpa sarko munis aslo mhunn tannem dakhoun dilem. Tor ami Tikikus-acho ugddas kortat tednam, Jehova sangata amchi ixttagot ghott korunk modot kortat toslea visvas dovorpa sarkea bhavancho amkam ugddas ieta.—Kol. 4:7-9.

7. Visvas dovorpa sarkim munxam zaunche vixim, tumche sobheche vhoddil ani sobhechea sevokam thaun tumi kitem xikonk zata?

⁷ Aiz amche sobhent aslole visvas dovorpa sarke vhoddil ani sobhechea sevokam pasot ami kitlim upkari asat nhoi! Daniel, Hanani ani Tikikus-a bhaxen te apli zobabdari ekdom bore bhaxen samballttat. Udharonnak, sobheche modle mittingek konn-konn bhag ghetolim tea vixim te adim fuddench tankam kolloitat mhunn amkam kosloch dubhav na. Toxench, mittingent bhag asat tim bhav-bhoinnam aple bhag toiar kortolim ani bore bhaxen ditolim mhunn hea bhavank visvas asta. Ani tim oxem kortat tednam te khub khuxal zatat. Toxench, ami amchea Bible vidʼdheartheank sumanachea xevottache mittingek apoitat tednam, jahir bhaxonn diupi bhavan aplem bhaxonn toiar kelam mhunn amkam khatri asta. Tea bhair, porgottnnechea kamant amkam goroz tim prokaxonam mellonk, bhavamnim manddavoll kelea mhunn amkam visvas asta. Khorench, he visvaxi bhav ekdom bore toren amchi kallji ghetat mhunn ami Jehovak khub upkari asat! Tor ami-i visvas dovorpa sarkim asat mhunn ami koxem dakhounk zata?

8. Ami dusreanchi khobor ghetat tednam ami kitea vixim chotrai dovrunk zai? (Mhonnʼnneo 11:13)

⁸ Ami amchea bhav-bhoinnancho khub mog kortat dekhun ami tanchi khobor ghetat. Punn oxem kortana, ami tanchea jivitant meter zaunk vo modem poddonk sodhinant. Toxench, ami zannam zaunchi goroz na tosle prosn ami tankam vicharinant. Poilea xekddeantlea Kristi sobhent ‘chaddio sangtat, dusreanchea jivitant ghustat ani naka zalʼlem uloitat,’ toslim thoddim bhav-bhoinnam aslim. (1 Tim. 5:13) Ami tanche bhaxen zaunk sodhinant. Punn amcher visvas dovrun, konnui amkam tanche vixim kitem-i sangta zalear, ami to gutt samballun dovortat ani dusreank sangonant. Udharonnak, ek bhoinn tumkam aple duensa vixim vo tika sosunk poddtta toslea her trasam vixim sangta mhunn chintat. Ani hea vixim ami konnakuch sanglolem tika naka. Tor tika zai toxench ami korunk zai. b (Mhonnʼnneo 11:13 vachat.) Tor atam, ami anik khoinchea poristhitimnim gutt samballop gorjechem tem polloum-ia.

9. Familintlea dor eka sodoxian apunn visvas dovorpa sarko asa mhunn koxem dakhounk zata?

⁹ Tumchea familin tumcher visvas dovrunk zata toslim munxam zaiat. Familint aslolea dor eka  sodoxian, familichea thoddea vixoi-am vixim dusreank sangop sarkem zaunchem na. Udharonnak, aple bailek ek umkich sonvoim asa ani tea vixim dusreank sangop sarkem zauchem na mhunn ticho ghov zannam zalear, tea vixim dusreank sangon to tika lojent ghalchona. Karonn to aplea bailecho mog korta ani tika dukhoita toslem kainch korunk sodhina. (Ef. 5:33) Toxench tornnatteank, tankam dusreamnim resped dilʼlo zai mhunn tanchim avoi-bapui ugddas dovortat. Hea karonnak lagon, aplea bhurgeanchea chukim vixim dusreank sangon tim tankam lojent ghalinant. (Kol. 3:21) Tea bhair, bhurgeamnim pasun xanneponnan vagonk zai ani ghorantlea khobram vixim dusreank sangon tannim familintlea her sodoxiank lojent ghalunk zaina. (D.S. 5:16) Hea toren, familicho dor ek sodoxio familicheo khobro tanchech modem dovorta zalear tanche familicho ekvott ghott zatolo.

10. Ami ek khoro ixtt koso zaunk zata? (Mhonnʼnneo 17:17)

¹⁰ Tumchea ixttamnim tumcher visvas dovrunk zata toslim munxam zaiat. Amkam kednam-na-kednam amchea kallzant kitem asa tem amchea eka lagxilʼlea ixttak sangonk koxem dista. Punn thodde pavtti, oxem korunk amkam kotthin zaunk puro. Tori astana, tumi tea vixim tumchea ixttak sangonk fuddem sortat mhunn chintat. Punn uprant, tannem tem dusreank sanglem mhunn tumkam kollon ieta. Tednam tumkam koxem bhogtolem? Tumkam dhoko bostolo nhoi? Punn dusre vatten, tumcho ixtt tumcho gutt samballun dovorta tednam tumkam kitlem borem dista nhoi! Ani osleach ixttak Bible-ant, “ixtt [“khoro ixtt,” NW]” oso mhunnttla.—Mhonnʼnneo 17:17 vachat.

11. (a) Vhoddil ani tancheo bailo, tim visvas dovorpa sarkim asat mhunn koxim dakhoun ditat? (b) Chitrant dakhoilʼlea vhoddila thaun ami kitem xikonk zata?

¹¹ Tumchea bhav-bhoinnamnim tumcher visvas dovrunk zata toslim munxam zaiat. Sobhentle vhoddil soglea bhav-bhoinnank ‘varo suttʼtta tednam asro, ani xeronn vo lipʼpacho zago’ koxe zaun asat. (Iz. 32:2) Karonn amchea kallzant kitem asa tem ami tankam sanglear pasun, te tea vixim konnank sangchenant mhunn amkam khatri asa. Punn ami vhoddilam lagim ukteponnim ulounk xoktat dekhun, tannim  dusreank sangchi nhoi tosli mahiti tanche koddlean zannam zaun gheunk ami tancher dobhav ghalinant. Toxench, vhoddilanchea bailanchi ami tokhnnai kortat. Karonn tim aplea ghovam lagim tannim zannam zaunchi nhoi tosli mahiti vicharinant. Ani ek vhoddil aple bailek oslem kainch sangona tednam tikach faido zata. Hea vixim ek vhoddilachi bail oxem sangta: “Mhozo ghov, to konnak gonvlli bhett diunk voita vo sobhentlea khoinchea bhav-bhoinnank vhoddilanchea modotichi goroz asa tea vixim, vo tea bhav-bhoinnanchim nanvam pasun mhaka sangona mhunn hanv tache khub upkari! Karonn hanv kainch korunk xokona tea vixim mhaka sangon to mhojer anik vozon ghalina. Hea pasot, hanv sobhentlea sogleam bhav-bhoinnam lagim koslich addkholl nastana, ukteponnim ulounk xokta. Itlench nhoi, mhojea kallzant kitem asa ani mhaka kosle uske asat tea vixim hanv mhojea ghova lagim uloita tednam, to tea vixim konnakuch sangchona mhunn tacher aslolo mhozo visvas anikui vaddtta.” Khorench, ami soglim visvas dovorpa sarkim munxam zaunk sodhtat. Oxem korunk amkam khoinche panch gunn modot kortole tem atam polloum-ia.

12. Dusreamnim amcher visvas dovrunk zai zalear amkam tancho mog asop kiteak gorjecho?

¹² Mog. Ami dusreancho mog kelearuch tim amcher visvas dovrunk pavtolim. Ani Jehovacho mog korop, toxench peleacho mog korop, heo donui sogleam-von vhoddleo adnea mhunn Jezun sanglem. (Mt. 22:37-39) Ami Jehovacho mog kortat dekhun, ami tache bhaxen visvaxi zaunk sodhtat. Udharonnak, ami amchea bhav-bhoinnancho mog kortat dekhun tanche vixim dusreank sangonk zaina tosli mahiti ami konnakuch sangonant. Karonn tankam vaitt zalolem, loz zaloli vo dukh bhoglolem amkam naka.—Ju. 15:12.

13. Khaltikai amkam visvas dovorpa sarkim munxam zaunk koxi modot korta?

¹³ Khaltikai. Ek khalto munis visvas dovorpa sarko asta. Dusream hujir vhoddvik melloun gheunk apleak khobor asa ti mahiti dusreank sangonk to abuzponnam korina. (Filp. 2:3) Toxench, dusreank khobor nant tosle mhotvache vixoi apleak khobor asat mhunn dakhounk to proitn korina. Tea bhair, Bible-ant vo Bible-acher adarit aslolea prokaxonamnim sangonk nant tea vixoi-ancher, apleak kitem dista tea vixim to dusreank sangonk bhonvona.

14. Somjikai amkam visvas dovorpa sarkim munxam zaunk koxi modot korta?

¹⁴ Somjikai. Eka somjikaiechea munxak ‘ogi ravunk ek vell, ani ulounk ek vell’ asta mhunn khobor asta. (Up. 3:7) Thodde pavtti, “ulounche poros ogi ravop odik borem” oxem zaito lok mhunntta. Heach pasot, Mhonnʼnneo 11:12-nt oxem sanglolem asa: “Ginean aslolo apli jib damun dhorta.” Hea vixim amkam eka vhoddilachem udharonn asa. Onubhov aslolo ho vhoddil zaite pavtti dusrea vhoddilank tanchea sobhent asloleo oddchonneo suttaveo korunk modot korta. Hea vhoddila vixim anik ek vhoddil oxem sangta: “Dusrea sobhamnim kitem ghoddtta tea vixim amkam sangona zaunk ho vhoddil sodanch chotrai dovorta.” Ani ho vhoddil hea toren somjikaien vagta dekhun tache sobhent aslole her vhoddil taka resped ditat. Toxench, tanche vixim tannem dusreank sangonk zaina tosli mahiti to konnakuch sangchona mhunn tankam tacher visvas asa.

15. Sot uloilolean dusrim tumcher kiteak visvas dovrunk xoktolim tem somzonk ek udharonn diat.

¹⁵ Sot ulovop. Sot uloitat tancher visvas dovrunk amkam sompem zata. (Ef. 4:25; Heb. 13:18) Udharonnak, tumi tumchi xikounchi kola vaddounk sodhtat mhunn chintat. Tor tumi toiar kelʼlo bhag aikonk ani tumi khoim sudharnni korunk zai tea vixim sangonk, tumi konna lagim solʼlo magtolim? Tumi aikonk sodhtat tench sangtolo tache lagim, vo tumkam sot sangtolo  tache lagim? Hea vixim Bible-ant oxem sanglolem asa: “Fosoitolea moga mukar tonddar sangon xittkavop odhik borem.” (Mho. 27:5, 6) Tor to munis sot sangta tednam amkam poilim ghoddie vaitt disonk xokta. Punn tacho solʼlo apnnailear, vell voita toso sudharnni korunk amkanch modot zatoli.

16. Ami svotacher tabo dovrop gorjechem mhunn Mhonnʼnneo 10:19 koso dakhoita?

¹⁶ Ap-domaunni vo svotacher tabo dovrop. Dusreamnim amcher visvas dovorpa sarkim munxam zaunk anik ek mhotvacho gunn mhunnttlear svotacher tabo dovrop. Dusreank sangonk zaina tosli mahiti dusreank sangonk koxi dista tednam ho gunn amkam modot korunk xokta. (Mhonnʼnneo 10:19 vachat.) Punn thodde pavtti amkam svotacher tabo dovrunk kotthin zaunk xokta. Udharonnak, ami social media uzar kortat tednam chotrai dovornant zalear ami chukon, sangonk zaina tosli mahiti zaitea lokank sangonk xoktat. Ani hi mahiti ek pavtti sanglea uprant, dusrim ti koxi uzar kortolim vo tea pasot kitlem vaitt zaunk pavtolem tacherui amcho tabo urona. Toxench, ami anik eke poristhitint svotacher tabo dovrop vo ogi ravop gorjechem. Tem mhunnttlear, amchea kamacher bondi aslolea zageancher amche virodhi, zoxe pulis, amchea bhav-bhoinnancho jiv dhokeant ghaltat tosle prosn vicharun amkam fosounk xoktat. Oslea ani her poristhitimnim ami Stotrant dilʼlem totv apnnaun amchea “onttank bandpas” ghalunk zai. (St. 39:1) Tor amche familiche sodoxio, amche ixtt, amchim bhav-bhoinnam vo her konnam-i sangata ami asum, ami sodanch visvas dovorpa sarkim munxam asonk zai. Ani oslim munxam zaunk ami svotacher tabo dovrunk zai.

17. Sobhent eka-mekacher aslolo visvas ami koso vaddounk zata?

¹⁷ Khorench, Jehovan amkam itlim mogall ani visvas dovorpa sarkim bhav-bhoinnam aslolea songottnnecho bhag zaunk oddun haddleant mhunn ami kitlim upkari asat! Ani amkam sogleank, amchea bhav-bhoinnancho visvas zoddun gheunchi zobabdari asa. Amche modlo dor eklo mogan, khaltikaien ani somjikaien vagonk, toxench sot ulounk ani svotacher tabo dovrunk proitn korta tednam sobhent eka-mekacher aslolo amcho visvas anik vaddttolo. Punn ami visvas dovorpa sarkim munxam zaunk vavr korit ravonk zai. Tor Jehovachi dekh gheun ami visvas dovorpa sarkim munxam mhunn dakhoun diunk nichov korum-ia!