1. Edena dala ai ita diba ta be kara momokani tauna?

 KARA MOMOKANI tauna be ia hekwarahi ena gwauhamata ia badinaia bona hereva momokani ia gwauraia totona. (Sal. 15:4) Taunimanima idia diba ia ese idia do ia durua. Ita ura iseda tadikaka bona taihu ese ita be unai bamona idia laloa. Dahaka ita karaia diba ita idia trast totona?

2. Ma haida ese ita idia trast totona, dahaka ita karaia be namo?

² Ma haida ita doria lasi ita idia trast totona. To iseda kara amo ita hamomokania ma haida be ita idia trast diba. Trast karana be moni ida ita hahegeregerea diba. Ita hekwarahi moni ita davaria totona, to moni ita haboioa haraga diba. Iehova be ita dekenai ia hamomokania ia ita trast diba. Hanaihanai Ia ita trast, badina “ia be mai momokani ida gau ibounai ia karaia.” (Sal. 33:4) Bona Ia ura ia ita tohotohoa. (Efe. 5:1) Iehova ena hesiai taudia haida edia haheitalai mani ita laloa, idia be edia guba Tamana idia tohotohoa bona edia kara amo idia hamomokania ma haida ese idia trast diba. Danu ita ese kara namodia 5 do ita herevalaia, unai ese ita ia durua ma haida ese ita idia trast totona.

3-4. Edena dala ai, peroveta tauna Daniela be mai momokani ida ia kara, bona edena henanadai ita laloa be namo?

³ Peroveta tauna Daniela be mai momokani ida ia kara dainai haheitalai namona ia hahedinaraia. Ena be Babulonia dekenai igui hesiai tauna bamona idia abia lao, to ena kara dainai ma haida ese ia idia trast. Iehova ena heduru amo Daniela ese Babulonia ena king, Nebukanesa, ena nihi ia gwauraia hedinarai neganai, taunimanima be ia dekenai edia trast karana idia  habadaia. Nega ta, ia ese king ia hamaoroa Iehova be ia dekenai ia moale lasi. Momokani, king ta ia ura lasi unai bamona hereva ia kamonai. Nebukanesa be badu bona dagedage tauna, unai dainai Daniela be gari lasi karana ia hahedinaraia be namo! (Dan. 2:12; 4:20-22, 25) Lagani momo murinai, Daniela ese Babulonia ai haba dekenai ia hedinarai toretore ena anina ia gwauraia hedinarai neganai, ia hamomokania taunimanima be ia idia abidadama henia diba. (Dan. 5:5, 25-29) To gabeai, Mede tauna Dariuse bona ena ofesa taudia idia itaia Daniela “ena laloa dalana bona kara be idau momokani.” Idia abia dae Daniela be “ia kara momokani bona ena gaukara ia karaia namonamo.” (Dan. 6:3, 4) Oibe, tomadiho koikoi ena lohia taudia idia laloparara Iehova ia tomadiho henia tauna idia trast diba!

⁴ Daniela ena haheitalai ita laloa dobu lalonai, sibona ita nanadaia: ‘Iehova idia tomadiho henia lasi taudia huanai egu kara be edena bamona? Lau be gaukara karaia namonamo tauna bona ma haida ese lau idia trast diba, a?’ Dahaka dainai sibona dekenai unai henanadai ita henia be namo? Badina ita kara momokani neganai, Iehova ita hanamoa.

5. Dahaka dainai Hananaia be kara momokani tauna?

⁵ Lagani 455 B.C.E. ai, gavana Nehemia ese Ierusalema ena magu ia haginia lou murinai, gaukara goada tatau ia tahua siti idia naria namonamo totona. Ma haida huanai Nehemia ese Hananaia, Magu Aukadia Rumana ena gunalaia tauna, ia abia hidi. Baibel ese Hananaia ia gwauraia “ia kara momokani bona Dirava momokanina ia gari henia, tatau ma haida bamona lasi.” (Neh. 7:2) Hananaia be  Iehova ia lalokau henia bona gari henia dainai, ia abia asainmen ia laloa bada. Unai bamona karadia ese ita ia durua danu Dirava ena hesiai gaukara ita karaia namonamo totona.

6. Edena dala ai Tukiko ia hamomokania, aposetolo Paulo ese ia trast diba?

⁶ Mani Tukiko ena haheitalai ita laloa, ia be aposetolo Paulo ese ia trast tadikaka ta. Paulo be dibura ruma ai ia noho neganai, Tukiko ia abidadama henia, bona ia gwau ia be “kamonai hesiai tauna.” (Efe. 6:21, 22) Paulo ia abia dae Tukiko be Efeso bona Kolose tadikaka taihu dekenai revareva sibona do ia henia lasi, to idia do ia hagoadaia danu. Tukiko ena haheitalai ese ita ia hadibaia, hari abidadama tadikaka be idia gaukara goada iseda hetura karana Dirava ida idia hagoadaia totona.​—Kol. 4:7-9.

7. Emu kongrigeisen ai, elda bona hesiai taudia idia gaukara goada karana amo dahaka oi dibaia?

⁷ Ita moale badina elda bona hesiai taudia be edia gaukara idia karaia namonamo. Idia be Daniela, Hananaia, bona Tukiko hegeregerena, edia maduna idia laloa bada. Hegeregere, wiki ena hebou ita lao neganai, ita diba elda ese hebou ena kahana ta ta ena asainmen idia haria vadaeni. Bona tadikaka bona taihu ese unai asainmen idia hegaegaelaia bona idia karaia neganai, elda taudia idia moale bada! Danu, wiken ai eda Baibel stiuden ita boiria hebou dekenai idia mai neganai, ita diba ta ia noho pablik tok ia karaia totona. Bona ita diba haroro gaukara totona buka bona magasin do ita abia. Unai abidadama tadikaka ese ita idia naria namonamo, bona idia dainai Iehova ita tanikiu henia! To, edena dala idauidau ai ita hahedinaraia ma haida ese ita idia trast diba?

8. Ma haida edia mauri ai idia vara gaudia ita ura diba neganai, dahaka ita laloatao be namo?

⁸ Iseda tadikaka taihu ita lalokau henia, bona ita ura edia noho dalana ita diba. To, namo lasi edia mauri ai idia vara gaudia ibounai ita ura diba. Aposetolo edia negai ia noho Keristani kongrigeisen lalonai, haida be “idia udu mauri, ma haida edia mauri lalonai idia vara gaudia idia kikilaia, bona do idia herevalaia be maoro lasi gaudia idia herevalaia.” (1 Tim. 5:13) Ita ura lasi idia ita tohotohoa. To bema ta be ita dekenai ena hunia herevana ia gwauraia, bona ita ia noia ma haida dekenai ita herevalaia lasi be edena bamona? Hegeregere, taihu ta be ia davaria gorere eiava hekwakwanai ma haida be ita dekenai ia herevalaia, bona ita ia noia ma haida ita hamaoroa lasi. Namona be ena hereva ita badinaia. * (Aonega Herevadia 11:13 duahia.) Mani gau haida ita herevalaia, unai amo do ita itaia hunia herevadia ita gwauraia hedinarai lasi be mai anina bada.

9. Edena dala ai famili lalonai ta ta ita matauraia be namo?

⁹ Iseda famili ese ita idia trast be namo. Famili lalonai idia vara gaudia be ma haida dekenai ita herevalaia lasi be namo. Hegeregere, reana Keristani hahine be ia karaia karana ta dainai ena adavana ia kiri. Tau be ena hahine ia hahemaraia totona ma haida dekenai unai do ia herevalaia, a? Lasi! Ia be ena hahine ia lalokau henia, bona ena lalona hahisia karana ta do ia karaia lasi. (Efe. 5:33) Matamata taudia idia ura idia ita matauraia. Tama sina ese unai idia laloatao be namo. Idia ese natudia hahemaraia totona ma haida dekenai edia kerere idia herevalaia lasi. (Kol. 3:21) Natudia ese ma haida dekenai edia famili ia hahemaraia gaudia idia herevalaia lasi be namo, unai amo laloa maoromaoro karana idia hahedinaraia. (Deu. 5:16) Famili lalonai idia vara gaudia be  ma haida dekenai idia gwauraia lasi neganai, unai ese famili ena hetura karana ia hagoadaia.

10. Tura korikori ena kara be edena bamona? (Aonega Herevadia 17:17)

¹⁰ Iseda turadia ese ita idia trast be namo. Nega haida, ita ura iseda turana namona dekenai iseda hemami ita gwauraia hedinarai. Nega haida unai bamona ita karaia be auka. Reana do ia auka iseda lalona ai idia noho gaudia be ma ta dekenai ita gwauraia totona, bona do ita lalohisihisi bada bema ita kamonai iseda turana dekenai ita herevalaia gaudia be ma haida ia hamaoroa. To, do ita moale bada bema iseda turana dekenai ita gwauraia gaudia be ma haida ia hamaoroa lasi! Ia be “tura korikori.”​—Aonega Herevadia 17:17 duahia.

11. (a) Edena dala ai elda taudia bona edia adavana be ta ta idia abidadama henia? (b) Elda ta ese kongrigeisen ena hunia gaudia be ena famili dekenai ia herevalaia lasi dainai, ia amo dahaka ita dibaia? (Laulau itaia.)

¹¹ Tadikaka taihu ese ita idia trast be namo. Elda taudia be ma haida dekenai hehuni herevadia idia gwauraia lasi dainai, “lai bada negana ai idia ta ta be hunia gabuna bamona, . . . idia be heau mauri gabuna ta bamona.” (Isa. 32:2) Elda taudia dekenai gau ibounai ita herevalaia, badina ita diba ma haida dekenai do idia gwauraia lasi. Namo lasi iseda hereva dalana amo ita hahedinaraia ita ura elda taudia ese ita dekenai hunia gaudia idia herevalaia. Danu, elda taudia edia adavana ita matauraia, badina edia tau idia nanadaia lasi ma haida edia hunia gaudia idia gwauraia totona. Momokani, elda tauna be ena adavana dekenai tadikaka taihu edia hunia gaudia ia herevalaia lasi dainai, unai ese namo ia havaraia. Elda ta ena adavana ia gwau: “Lau moale badina egu adavana be lau dekenai elda taudia ese idia vadivadi henia taudia ia herevalaia lasi, bona edia ladana ia gwauraia lasi. Egu adavana ese ma haida edia hunia gaudia ia herevalaia lasi dainai lau moale. Unai amo kongrigeisen lalonai tadikaka taihu ida lau herevahereva namonamo diba. Bona lau abia dae momokani egu adavana dekenai egu hemami eiava hekwakwanai lau herevalaia neganai, ma haida do ia hamaoroa lasi.” Oibe, ita ibounai ita ura ma  haida ese ita idia trast. Unai ia vara totona, edena bamona karadia ese ita do ia durua? Mani inai kara 5 ita herevalaia.

12. Lalokau dainai dahaka ita karaia diba? Haheitalai gwauraia.

¹² Lalokau dainai ma haida ese ita idia trast. Iesu ia gwau taravatu badadia rua be, Iehova bona iseda dekena tauna ita lalokau henia. (Mat. 22:37-39) Iehova ita lalokau henia dainai, ita ura iena kara namodia ita tohotohoa. Hegeregere, iseda tadikaka bona taihu ita lalokau henia dainai, edia mauri ai idia vara gaudia be ma haida ita hamaoroa lasi. Ita ura lasi ita herevalaia gauna ese idia dekenai dika ia havaraia, idia ia hahemaraia, eiava hahisia.​—Ioa. 15:12.

13. Edena dala ai manau karana ese ita ia durua ma haida ese ita idia trast totona?

¹³ Manau karana ese ita do ia durua ma haida ese ita idia trast totona. Keristani tauna be ia manau dainai, ia ura lasi ma haida dekenai ia hahedinaraia ia be sivarai ia gwauraia tauna ginigunana. (Fili. 2:3) Ia ura lasi ma haida idia laloa ia be hunia gaudia ibounai ia diba bona ia gwauraia hedinarai lasi. Danu manau karana ese ita do ia durua, haida dekenai sibona iseda lalohadai ita gwauraia lasi, badina unai be Baibel eiava iseda pablikeisen ai idia noho lasi.

14. Edena dala ai, laloa namonamo karana ese ita ia durua ma haida ese ita idia trast totona?

¹⁴ Laloa namonamo karana ese Keristani tauna do ia durua dainai, ia diba “herevahereva lasi be mai ena nega bona herevahereva be mai ena nega.” (Had. 3:7) Tano haida dekenai nega momo taunimanima idia gwau, “herevahereva karana be siliva bamona, bona herevahereva lasi karana be golo bamona.” Anina be, nega haida ita herevahereva lasi be namo. Aonega Herevadia 11:12 ia gwau: “Laloa namonamo tauna be hereva ta ia gwauraia lasi.” Mani haheitalai ta ita laloa. Mai ena diba bada elda ta be nega momo idia noia, kongrigeisen ma haida ia durua edia hekwakwanai ia hamaoromaoroa totona. Elda ma ta ese unai elda be inai bamona ia herevalaia, ia gwau, “Ia be kongrigeisen ma haida dekenai idia vara hunia gaudia ia herevalaia lasi.” Elda be ena laloa namonamo karana dainai, ena kongrigeisen ai elda oreana ese idia matauraia. Idia diba momokani edia hunia gaudia be ma haida dekenai do ia gwauraia lasi.

15. Edena dala ai oi kara momokani neganai, oi do idia trast? Haheitalai gwauraia.

¹⁵ Kara momokani dainai ma haida ese ita idia trast. Kara momokani tauna ita trast, badina ita diba ia be nega ibounai hereva momokani do ia gwauraia. (Efe. 4:25; Heb. 13:18) Hegeregere, oi ura emu tok henia dalana oi hanamoa. Unai dainai ta oi noia emu tok ia kamonai bona oi hanamoa daladia ia herevalaia. Daika ese sisiba maorona do ia henia? Oi moalelaia herevadia sibona ia gwauraia tauna eiava oi dekenai mai momokani ida ia hereva tauna, a? Haere be ia hedinarai. Baibel ia gwau: “Ta ena kerere hamaoromaoroa totona oi sisiba henia be namo, to lalokau dainai ta oi sisiba henia lasi be kerere. Turana namona ese oi ia sisiba henia neganai be mai ena hisihisi to unai ia karaia badina oi ia lalokau henia.” (Aon. 27:5, 6) Ena be turana ta be mai momokani ida ita ia durua, matamanai do ia auka ita kamonai totona, to nega ia hanaia lalonai unai ese ita dekenai namo do ia havaraia.

16. Edena dala ai, Aonega Herevadia 10:19 ese ita ia durua sibona ita biagua totona?

¹⁶ Bema ita ura ma haida ese ita idia trast, sibona biagua karana ita hahedinaraia be namo. Ma haida ese ita dekenai hunia herevadia idia gwauraia neganai, sibona biagua karana ese ita ia durua hereva ta ita gwauraia lasi totona. (Aonega Herevadia 10:19 duahia.) Intanet  eiava social media ita gaukaralaia neganai, sibona ita biagua totona be auka. Bema ita naria namonamo lasi, taunimanima momo dekenai hehuni gaudia ita hahedinaraia diba. Bona unai hunia gaudia be intanet ai ita atoa neganai, ma haida ese do idia gaukaralaia dalana eiava do ia havaraia dika ita koua diba lasi. Bema iseda inai taudia ese tadikaka taihu hahisia totona edia infomeisen idia ura diba, sibona biagua karana ese ita do ia durua hereva ta ita gwauraia lasi totona. Iseda gaukara idia koua o taravatua tanodia ai pulisi ese ita idia nanadaia neganai, unai ia vara diba. Unai bamona negadia bona nega ma haida ai, ‘iseda uduna be gau ta amo do ita koua’ ena hakaua herevana ita badinaia be namo. (Sal. 39:1) Namona be ita hahedinaraia iseda famili, turadia, tadikaka bona taihu, eiava ma haida ese ita idia trast diba. Bona unai ia vara totona, sibona biagua karana be mai anina bada.

17. Edena dala ai, kongrigeisen lalonai ta ta dekenai trast karana ita hagoadaia diba?

¹⁷ Ita moale badina Iehova ese tadikaka bona taihu huanai ita ia hakaua lao, idia be ta ta idia lalokau henia bona idia trast! Namona be ita ibounai ita gaukara goada iseda tadikaka bona taihu ese ita idia trast totona. Bema lalokau, manau, laloa namonamo, kara momokani, bona sibona biagua karana ita hahedinaraia noho, kongrigeisen lalonai ta ta dekenai trast karana ita hagoadaia diba. Namona be ita gaukara goada, ma haida ese ita idia trast totona. Iseda Dirava, Iehova, ita tohotohoa bona ita hamomokania ita be kara momokani taudia.