1. Kunnasi tam makagi nga mapattalakkan i tadday nga tolay?

 MAKAGI tam nga mapattalakkan i tadday nga tolay nu ikaguman na nga kanayun nga kuan i promesa na anna makkagi yayya tu kurug. (Sal. 15:4) Ammu na totolay nga puede ira nga mattalo ta nisa. Kayà tam nga kunnatun i matageno na wawwaragi tam ta nittam. Anni i makoffun tapenu mala tam i pattalo da?

2. Kunnasi tam mapakurug nga mapattalakkan ittam?

² Ari tam nga mafersa i tanakuan nga mattalo ta nittam. Mawag nga ikagumattam nga mala yatun. Aru i makkagi nga megitta ta kuartu i pattalo. Mariga nga mala yatun, ngem mabi laman nga mawawwan. Ngem si Jehova, siguradu nga nala na i pattalo tam. Awan vuluvuga tu rason tapenu mawawwan i pattalo tam ta nisa megafu ta “mekatalo ngamin i kingngua na ira.” (Sal. 33:4) Ekspektan na gapa nga parigattam yayya. (Efe. 5:1) Gigiammuattam i aripan ira ni Jehova nga naparigadda yayya anna napakurug da nga mapattalakkan ira. Ammuattam gapa i lima nga kualidad nga makoffun tapenu mabbalin ittam tu mapattalakkan.

3-4. Kunnasi nga pinakurug ni profeta Daniel nga mapattalakkan yayya, anna anni ira i mawag tu iyavu tam ta baggi tam?

³ Mapattalakkan si profeta Daniel. Maski nu inaripan yayya na Babilonio ira, napeggan lagapa yayya tu reputasion bilang mapattalakkan nga tolay. Mas nga nattalo i totolay ta nisa turi ta nepakanawag na i tatageno na patul na Babilonia nga si Nabucodonosor megafu ta uffun ni Jehova. Ngem mittan, mawag nga ikagi ni Daniel ta patul nga nakaporay si Jehova ta nisa. Magga manaki na patul nga makaginna ta kunnatun nga mensahe.  Mawag ni Daniel i maggutu megafu ta minappata-patu si Nabucodonosor! (Dan. 2:12; 4:20-22, 25) Nappasa i aru nga dagun, napakurug uli ni Daniel nga mapattalakkan yayya turi ta fustu i pangipakanawag na ta misterioso nga mensahe nga nappasingan ta pader na palasio na Babilonia. (Dan. 5:5, 25-29) Tapus turi kua, napansin ni Dario nga Medo anna na sinunno na ira nga ofisial nga egga i “nerumu-ruma nga espiritu” ni Daniel. Napakurug da nga “mapattalakkan yayya, ari tu iresponsable, anna ari tu darogas.” (Dan. 6:3, 4) Nasingan gafu maski na pagano ira nga mammaguray nga mapattalakkan yatun nga maddayaw kani Jehova!

⁴ Pannonopattam i ehemplo ni Daniel, tapus iyavu tam ta baggi tam: ‘Anni i reputasiokku tari ira ta ari tu Saksi? Kilala dà kari nga kukukuakku i responsibilidad ku ira anna mapattalakkan ngà?’ Ngatta iyavu mu yatun ta baggim? Gare, nu mapattalakkan ittam, medayaw tam si Jehova.

5. Ngatta nabbalin tu mapattalakkan si Hananias?

⁵ Kabalin nga nepataddag uli ni Gobernador Nehemias i pader na Jerusalem turi ta 455 B.C.E., nagaleg yayya tu mapattalakkan nga lallaki nga manangngaw tu mapia ta siudad. Si Hananias nga panakallan na Torre i tadday ta napili ni Nehemias. Deskriban na Biblia nga “kuruga mapattalakkan yayya nga lalaki anna mas ikassing na i kurug nga Dios anne ta tanakuan.” (Neh. 7:2) Megafu ta iddeddu ni Hananias si Jehova anna manaki na nga maparaddam yayya, sinerioso na i maski anni nga annungan nga netalo ta nisa. Makoffun gapa yatun ira nga kualidad ta nittam tapenu mabbalin ittam tu mapattalakkan ta passerbi tam ta Dios.

6. Kunnasi nga pinakurug ni Tikico nga mapattalakkan yayya nga kofun ni apostol Pablo?

 ⁶ Ikonsidera i ehemplo ni Tikico. Turi ta nefuku si Pablo ta tadday nga balay, naddepende yayya kani Tikico nga inagalan na tu “napasikkal” onu matalo nga doroban. (Efe. 6:21, 22) Ari laman nga nitalo ni Pablo nisa i pangipatulug ta tura ira para ta wawwaragi ta Efeso anna Colosas, nu ari, maski gapa i pamasikan ta ginnonopadda. Manono tam kani Tikico i matalo anna mapattalakkan nga lallaki nga manangngaw ta espiritual ira nga pakawagattam sangawe.​—Col. 4:7-9.

7. Ngatta makagim nga mapattalakkan i elder anna ministerial ira nga aripan ta kongregasiommu?

⁷ Kuruga appresiattam gapa sangawe i mapattalakkan ira nga elder anna ministerial nga aripan. Kagitta ni Daniel, Hananias, anna Tikico, seriosowadda i responsibilidad da ira. Angngarigan na, nu study ta midweek, siguradu ittam nga dati ngana nga neyasayn i ngamin nga mangitaddag ta parte da. Talaga appresian na elder ira i responsable nga wawwaragi nga mangiprepara anna mangitaddag ta parte da ira! Kunnatun gapa nu study ta weekend. Ari ittam nga magalangan nga imbitan i Bible study tam megafu ta siguradu ittam nga egga i mappalappa. Ammu tam gapa nga available i literatura nga mawag tam ta ministerio. Tattangngawan ittam tu mapia natun ira nga mapattalakkan nga brother, yayya nga ipappabalo tam ira kani Jehova! Ngem anni ira i mawag tu kuattam tapenu mapakurug tam nga mapattalakkan ittam?

8. Kunnasi ittam mabbalin tu balanse nu kumustattam i tanakuan? (Proverbio 11:13)

⁸ Iddeddu tam i wawwaragi tam yayya nga kayà tam nga mammuan nu kumusta ira. Ngem mawag gapa nga balanse ittam anna irespeto tam nakuan i pribadu nga pattoleda. Egga ira karuan ta ollu-siglo nga Cristiano nga kongregasion nga chismosa onu “bebbeg anna uvovugad-da i ari nga mepangngo.” (1 Tim. 5:13) Magga manaki tam nga mabbalin tu kagitta da. Ngem kunnasi gafu nu egga i nangistoria nittam tu sekreto na onu personal nga gannug anna nikiddona nittam nga kattam nga istorian yatun ta tanakuan? Angngarigan na, baka inistoria ta nikaw na tadday nga sister i meyannung ta taki na onu i tanakuan paga nga problema na tapus nikiddona nikaw nga ta nikamu ngana laman dua yatun. Mawag tu irespetom i kiddona. * (Bibbigan i Proverbio 11:13.) Ammuattam i tanakuan paga ira nga situasion nga mawag tu itagu tam i sekreto onu konfidensial nga gannug.

9. Kunnasi nga mapakurug na kada miembro na familia nga mapattalakkan yayya?

⁹ Ta unag na familia. Responsibilidad na kada miembro na familia nga ari ikagi ta tanakuan i pribadu ira nga gannug meyannung ta familia da. Angngarigan na, kunnasi nu egga i nakasanayan nga kuan na tadday nga Cristiano nga babay nga kaggalo para ta atawa na? Iyistoria kari yatun na lalaki ta tanakuan maski nu mepasiranan i atawa na? Siempre ari! Iddeddu na i atawa na, anna magga ari yayya nga magangngua tu maski anni nga makataki ta atawa na. (Efe. 5:33) Kayà gapa na tinedyer ira nga merespeto. Nonopan nakuan yatun na magana ira. Ari da nakuan iyistoria i kamali na ána da ta tanakuan tapenu ari nga mepasiranan i ána da. (Col. 3:21) Mawag gapa nga magimmugug i ána tapenu ari da mekagi ta tanakuan i pribadu ira nga gannug nga awayya na  tu mangipasiran ta kafamilia da. (Deut. 5:16) Nu kuan na kada miembro na familia i parte na tapenu ari nga makannammuan na tanakuan i pribadu ira nga gannug meyannung ta familia da, mas nga maddukko ira ta kataggi-tadday.

10. Kunnasi ittam mabbalin tu kurug nga kofun? (Proverbio 17:17)

¹⁰ Ta kokkofuttam. Egga ira i tiempo nga mawag tu iyistoria tam ta madukko nga kofuttam i mataga-tageno tam. Ngem mariga nga kuan yatun nu karuan. Baka ari ittam gare nga sanay nga iyistoria ta tanakuan i talaga mataga-tageno tam, yayya nga baka madismaya ittam nu mammuattam nga niyistoria na kofuttam ta tanakuan i kinagi tam ta nisa. Ngem kuruga appresiattam nu ari na nga ikagi i sekreto tam ta tanakuan! Yayya ay “kurug nga kofun.”​—Bibbigan i Proverbio 17:17.

11. (a) Kunnasi nga mepasingan na elder ira anna na atawa da nga mapattalakkan ira? (b) Anni i magigiammu tam ta tadday nga elder nga nangasikasu ta konfidensial nga gannug na kongregasion tapus nakavulu na i familia na? (Innan i letratu.)

¹¹ Ta kongregasion. Nu ammu na elder ira i mangitagu tu konfidensial nga gannug, mabbalin ira tu ‘pattaguan nga lugar ta paddag anna lugar nga palliruman’ para ta wawwaragi. (Isa. 32:2) Ammu tam nga meyistoria tam tatun ira nga lallaki i maski anni megafu ta komfiansa ittam nga ari da nga ikagi ta tanakuan i konfidensial ira nga gannug. Ari tam gapa ira nga fersan nga ikagi ta nittam i gannug ira nga mawag tu pattalupaddianadda nga konfidensial. Fuera tatun, appresiattam gapa i atawa na elder ira megafu ta ari ira nga makkiavu tu konfidensial ira nga informasion ta atawa da. Talaga pammakapianan na atawa na elder ira nu ari nga mekagi ta nira i personal ira nga gannug meyannung ta kapangngurug da. Kunnaw i komento na atawa na tadday nga elder: “Pia ngana laman ta ari nga iyistoria niakan na atawà i konfidensial ira nga informasion meyannung tari ira ta i-shepherding na onu tari ira ta uffunan na ta espiritual. Ari na paga lagu ikagi niakan i ngagadda. Mappappabalo ngà ta ari ngà ngana nga mamroblema tari ira ta isyu nga awan mabba tu makuà. Gafu gapa tatun, komfortable ngà nga makistoria ta maski sinni ta kongregasion. Kampante ngà gapa nga nu egga  iyistorià ta atawà meyannung ta mataga-tageno ku onu ta problemà ira, ari na nga ikagi yatun ta tanakuan.” Magga kayà tam ngamin nga makilala ittam bilang tadday nga mapattalakkan. Anni ira nga kualidad i makoffun ta nittam? Ammuattam i lima tatun.

12. Ngatta makagi tam nga nebase ta aya i pattalo? Mangiyawa tu angngarigan.

¹² Nebase ta aya i pattalo. Kinagi ni Jesus nga i dua nga pinaka-importante nga dorob ay i pangaya kani Jehova anna pangaya ta kasittoletam. (Mat. 22:37-39) Megafu ta ayatattam si Jehova, kayà tam nga parigan i perfekto nga ehemplo na ta pabbalin tu mapattalakkan. Angngarigan na, megafu ta ayatattam i wawwaragi tam, ari tam nga istorian ta tanakuan i personal ira nga gannug nga kinagi da ta nittam. Manaki tam nga mangikagi tu maski anni nga makadaral, makepasiran, onu makataki ta nira.​—Juan 15:12.

13. Kunnasi nga makoffun i kinapakalinno tapenu mabbalin ittam tu mapattalakkan?

¹³ Makoffun i kinapakalinno tapenu mabbalin ittam tu mapattalakkan. Nu mapakalinno i tadday nga Cristiano, ari tu yayya i ollu nga mangikagi ta tadday nga gannug gafu laman ta kayà na nga mappasikat. (Fil. 2:3) Ari na gapa ipasingan ta tanakuan nga egga i ammu na nga importante nga gannug, ngem ari na nga puede nga ikagi. Makoffun gapa i kinapakalinno tapenu ari tam nga ikaga-kagi ta aru nga totolay i opiniottam ta gannug ira nga awan mabba tu kinagi na Biblia onu na nebase-Biblia ira nga publikasiottam.

14. Kunnasi nga makoffun i alawa nga appana-panono tapenu mabbalin ittam tu mapattalakkan?

¹⁴ Makoffun ta tadday nga Cristiano i alawa nga appana-panono tapenu mammuan na nu kanni i “tiempo na ari pattannug, anna tiempo na paguvovug.” (Ecl. 3:7) Egga i akkagianan ta karuan nga kultura nga “pira i paguvovug ngem vulawan i ari pattannug.” Kayà kagian natun nga egga ira i tiempo nga mas makasta nu magimammo ittam laman ngana. Yari tu tabarangngan ittam na Proverbio 11:12: “I tolay nga alawa i appana-panono na ay magimammo.” Ikonsidera i tadday nga angngarigan. Egga i ekspiriensadu nga elder nga maruddu nga pakiduffunan na tanakuan nga kongregasion ta mariga ira nga problema da. Kunnaw i kagian na kasi-elder na meyannung ta nisa: “Kanayun yayya nga magimmugug tapenu ari na nga mekagi i konfidensial ira nga informasion meyannung ta tanakuan nga kongregasion.” Megafu ta alawa i appana-panono natun nga elder, nala na i respeto na kasi-elder na ira ta kongregasion na. Siguradu gapa ira nga ari na nga istorian ta tanakuan i konfidensial ira nga gannug na kongregasiodda.

15. Mangiyawa tu angngarigan nu kunnasim nga mala i pattalo na tanakuan nu makkagi ka tu kurug.

¹⁵ Importante gapa i pakkagi tu kurug tapenu mabbalin ittam tu mapattalakkan. Ammu tam nga mapattalakkan i tadday nu kanayun yayya nga makkagi tu kurug. (Efe. 4:25; Heb. 13:18) Angngarigan na, baka kayà mu nga mabbalin tu mas malalaki nga manuddu, yayya nga nakifabor ka ta tadday nga wagi nga ginnan na i palappa mu tapus nakkiddaw ka ta nisa tu suhestion nu kunnasim paga mapakasta yatun. Sinni i pakiyoffunammu? Yari kari ikagi na nikaw i kayà mu laman nga maginna? Onu yari wagi nga masippo nga makkagi tu kurug? Magga ammum nu sinni i piliammu. Kagian na Biblia: “Mas makasta i prangka nga pangitunung anne ta ari mepasingan nga aya. Ivuya naka na matalo nga kofun maski nu mataki yatun.” (Prov. 27:5, 6) Maski nu mariga nga alawatan ta gafu na, meyusam gabbalaman  saw i kurug nga obserbasion na kofummu ta nikaw.

16. Kunnasi ipasigo na Proverbio 10:19 nga kawagattam i pangifugag ta baggi?

¹⁶ Nu kayà tam nga mala i pattalo na tanakuan, mawag tam i pangifugag ta baggi. Makoffun yatun nga kualidad tapenu gaggaddattam i simu tam nu gitta na kakayà tam ngana nga ikagi i konfidensial nga gannug nga nakannammuattam. (Bibbigan i Proverbio 10:19.) Awayya na tu marigatan ittam nga fugaddan i baggi tam nu mas-social media ittam. Nu ari ittam magimmugug, baka egga i me-post tam tu konfidensial ira nga gannug maski nu ari tam mabba nga sadya yatun. Tapus aru saw i makasingan. Sonu nawwara ngana yatun nga informasion ta online, ari tam ngana nga makontrol i pangusa tatun na tanakuan onu i problema ira nga palattuagan natun. Nu purueban gapa ittam nga illokuan na kumokkontra ira, makoffun i pangifugag ta baggi tapenu ari ittam nga mangikagi tu gannug ira nga mamappeligro ta wawwaragi tam. Posible nga mesimmu yatun nu imbestigan ittam na pulis ta nasion nu sitaw megamma onu egga i restriksion na trabahu tam. Ta kunnatun nga situasion onu ta tanakuan paga, awayya tam nga tuttulan i kagian na Biblia nga ‘awan tu kagiattam vuluvuga.’ (Sal. 39:1) Mawag gafu nga mabbalin ittam tu mapattalakkan ta ngamin nga totolay, kafamilia tam man ira, kokkofun, wawwaragi, onu ta maski sinni. Makua tam laman yatun nu egga i pangifugag tam ta baggi.

17. Kunnasi ittam makoffun tapenu mapeggan tu pattalo i wawwaragi ta kataggi-tadday?

¹⁷ Daka-dakal i pappabalo tam kani Jehova megafu ta nipamavulun na nga mabbalin ittam tu parte na familia na mawwaragi nga minaggiddu anna mapattalakkan! Responsibilidad tam ngamin nga mappursigi tapenu mala i pattalo na wawwaragi tam. Nu ikaguman na kada tadday ta nittam nga makkagi tu kurug anna ipasingan i aya, kinapakalinno, alawa nga appana-panono, pangifugag ta baggi, makoffun ittam tapenu mapeggan tu pattalo i wawwaragi ta kataggi-tadday. Mawag nga ikagumattam nga ipasingan nga mapattalakkan ittam. Parigattam nakuan i Dios tam nga si Jehova anna kanayuttam nakuan pakurugan nga mapattalakkan ittam.