1. Yonˍ gʼa ve chaw lehˬ hkʼaˬ hkʼe ve chaw gʼa hpehꞈ ve le?

 Yonˍ gʼa ve chaw lehˬ ka tiꞈ gʼa yeˬ leh awˬ tehˬ ve tawˇ gʼa yaw ve yoˬ. (Chiˇ mvuh ve 15:4) Yawˇ htaꞈ a shu kaꞈ gʼaˇ va gʼa ve tehꞈ shiˍ ve yoˬ. Awˬ viˉ awˬ nyi ngaˬ hui htaꞈ chi hkʼe dawˇ tcuh gaˇ ve yoˬ. Yawˇ hui ngaˬ hui htaꞈ yonˍ gʼa tuˬ aˬ htoꞈ ma gʼa te cawˇ ve le?

2. Ngaˬ hui yonˍ gʼa ve chaw hpehꞈ tuˬ hkʼaˬ hkʼe te hpeuꞈ maw piˇ gʼa tuˬ le?

² Awˬ nu ve chaw ngaˬ hui htaꞈ yonˍ gʼa tuˬ nyiˉ piˇ maˇ gʼa. Ngaˬ hui yonˍ gʼa ve chaw hpehꞈ ve tehꞈ yawˇ mawˬ tuˬ gʼa te cawˇ ve yoˬ. Yonˍ gʼa ve kaꞈ hpu htaꞈ shuˍ ve yoˬ. Awˬ ceuˬ chi ve lehˬ ca gʼa haˍ ve htawˇ, luˬ kʼai sha jaˇ. Yaꞈ hkʼaˇ, ngaˬ hui Yaˬhoˉvaˬ htaꞈ hkʼaˬ htaˆ kaꞈ yonˍ gʼa ve yoˬ. Yawˇ ngaˬ hui maˇ yonˍ gʼa tuˬ maˇ te laˇ jaw. Awˬ lawn kʼo, “yawˇ te taˍ ve kanˉ hkʼa peu˗eˬ daꞈ jaˇ ve yoˬ.” (Chiˇ mvuh ve 33:4) Ngaˬ hui yonˍ gʼa ve chaw hpehꞈ tuˬ, Gʼuiˬ sha htaꞈ gʼa henˇ yuˬ cawˇ ve yoˬ. (Eˇfeˇsuꞈ 5:1) Gʼuiˬ sha ve kanˉ te ve yawˇ htaꞈ henˇ yuˬ ve chaw teˇ hpaˍ ve awˬ lawn, yonˍ gʼa ve chaw hpehꞈ ve teˇ geh henˇ tuˬ yoˬ. Awˬ nu ve chaw ngaˬ hui htaꞈ yonˍ gʼa tuˬ ga piˇ gʼa ve, te hkʼaˇ dawˇ hkʼaˇ 5 ceuˬ htaꞈ teˇ geh henˇ tuˬ yoˬ.

3-4. Tcuh kaˍ paˍ Daˍyeˍlaˆ yonˍ gʼa ve chaw hkʼaˬ hkʼe hpehꞈ ve le? Leh ngaˬ hui a shu yawˇ awˬ to htaꞈ hkʼaˬ hkʼe na nyi cawˇ ve le?

³ Yonˍ gʼa ve chaw hpehꞈ tuˬ tcuh kaˍ paˍ Daˍyeˍlaˆ lehˬ daꞈ jaˇ ve henˇ yuˬ tuˬ hpehꞈ ve yoˬ. Yawˇ Baˍbuˍlonˍ mvuhˇ miˬ lo shu ceˬ te tuˬ yuˬ kʼai ve htawˇ, maˇ maw yawˇ lehˬ yonˍ gʼa ve chaw hpehꞈ leh awˬ meh bvuhˬ ve yoˬ. Baˍbuˍlonˍ jawˇ mawˇ Neˍbuˍhkaˍneˍzaˍ ve zuhꞈ maˆ htaꞈ yawˇ yuˬ tawˆ gʼa tuˬ Yaˬhoˉvaˬ ga piˇ htaˇ, chaw yaˇ kaꞈ yawˇ htaꞈ yonˍ maˇ la ve yoˬ. Teˇ pawˆ htaˇ, Daˍyeˍlaˆ lehˬ Neˍbuˍhkaˍneˍzaˍ htaꞈ Yaˬhoˉvaˬ maˇ dawˇ cawˇ tehꞈ gʼa ca kʼoˆ piˇ ve yoˬ. Chi hkʼe kʼoˆ ve htaꞈ jawˇ mawˇ maˇ kaˇ gaˇ ve yoˬ. Leh chi yawˇ kaˇ ve kʼo, beuꞈ jaˇ tuˬ yoˬ hehˉ. Kanˉ chi te gʼa tuˬ Daˍyeˍlaˆ lehˬ haꞈ hanˉ ve gʼa cawˬ ve yoˬ. (Daˍyeˍlaˆ 2:12; 4:20-22, 25) Laiˉ hkʼawꞈ peuˬ hkʼawꞈ nawˉ  Baˍbuˍlonˍ venˇ gʼoꞈ pa hkʼoˆ lo liꞈ mehˆ bvuhꞈ tawˆ la ve htaꞈ yawˇ yuˬ tawˆ piˇ htaˇ, yawˇ lehˬ yonˍ gʼa ve chaw kʼawꞈ hpehꞈ ve tehꞈ hpeuꞈ maw laˇ ve yoˬ. (Daˍyeˍlaˆ 5:5, 25-29) Meˍdiˆ chaw jawˇ mawˇ Daˍriˆ ve awˬ co˗e gaˬ htaˇ, Daˍyeˍlaˆ lehˬ “cuˇ yiˍ cawˬ leh kanˉ te puiˉ jaˇ ve” htaꞈ jawˇ mawˇ leh a maꞈ lonˉ teˇ hpaˍ gʼa mawˬ ve yoˬ. “Daˍyeˍlaˆ lehˬ maˇ hteˇ maˇ cawˇ ve kanˉ htaꞈ a ciˉ kaꞈ maˇ te ve” tehꞈ yawˇ hui kʼoˆ ve yoˬ. (Daˍyeˍlaˆ 6:3, 4) Yaˬhoˉvaˬ ve kanˉ te ve chaw chi teˇ gʼaˇ yonˍ gʼa ve tehꞈ, Gʼuiˬ sha htaꞈ oˉ kʼoˍ maˇ pui ve aˉ yaˇ cawˬ ve chaw teˇ hpaˍ kaꞈ shiˍ ve yoˬ.

⁴ Daˍyeˍlaˆ ve awˬ lawn htaꞈ ngaˬ hui dawˇ nyi htaˇ, ngaˬ hui a shu yawˇ awˬ to htaꞈ na nyi cawˇ ve, ‘Shaˉhkiˆhkanˍ ve chaw maˇ heˆ ve ngaˬ htaꞈ hkʼaˬ hkʼe ve chaw hpehꞈ ve tehꞈ dawˇ ve le? Ngaˬ awˬ vuiˬ htaꞈ a yeˇ yuˬ leh yonˍ gʼa ve chaw hpehꞈ ve tehꞈ yawˇ dawˇ˗aw laˇ?’ Aˬ htoꞈ ma te ngaˬ hui a shu yawˇ awˬ to htaꞈ chi hkʼe na nyi cawˇ ve le? Ngaˬ hui yonˍ gʼa ve chaw hpehꞈ ve kʼo, Yaˬhoˉvaˬ lehˬ chiˇ uiˍ chiˇ mvuh ve htaꞈ gʼa tuˬ yoˬ.

5. Haˍnaˍniˆ yonˍ gʼa ve chaw hpehꞈ tuˬ aˬ htoꞈ ma te piˇ ve le?

⁵ 455 hkʼawꞈ B.C.E. htaˇ, uˉ peunˍ paˍ Neˍhaˍmiˆ Yeˍruˆsaˍlehnˍ lanˇ venˇ kawˍ peuˬ hkʼawꞈ nawˉ, venˇ chi htaꞈ nyi haꞈ shaˉ tuˬ yawˇ chaw ca ve yoˬ. Yawˇ yonˍ gʼa ve hawˉ hkʼaˆ laiˉ gʼaˇ htaꞈ leuˆ ve yoˬ. Chi ve hkʼaw ve teˇ gʼaˇ lehˬ a maꞈ lonˉ Haˍnaˍniˆ yoˬ. Liꞈ hpu hkʼaw kʼoˆ ve, Haˍnaˍniˆ lehˬ “ka tiꞈ yeˬ leh, Gʼuiˬ sha htaꞈ kawˆ puiˉ ve chaw teˇ gʼaˇ hpehꞈ ve yoˬ.” (Neˍhaˍmiˆ 7:2) Haˍnaˍniˆ Yaˬhoˉvaˬ htaꞈ haꞈ leh yawˇ htaꞈ yawˆ yan ve yoˬ. Yawˇ Gʼuiˬ sha nyi hkʼaˇ maˇ suh tuˬ maˇ te piˇ. Hkʼe te leh, yawˇ gʼa taˍ ve awˬ vuiˬ htaꞈ hkʼa dehꞈ te ve yoˬ. Ngaˬ hui Gʼuiˬ sha ve kanˉ te htaˇ, te hkʼaˇ dawˇ hkʼaˇ chi ve teˇ hpaˍ lehˬ, ngaˬ hui yonˍ gʼa ve chaw hpehꞈ tuˬ ga laˇ gʼa ve yoˬ.

6. Tuˇhkiˆ lehˬ Pawˇluꞈ yonˍ gʼa ve awˬ chawˇ hpehꞈ ve tehꞈ hkʼaˬ hkʼe te hpeuꞈ maw piˇ ve le?

⁶ Pawˇluꞈ yonˍ gʼa ve awˬ chawˇ Tuˇhkiˆ ve awˬ  lawn htaꞈ teˇ geh nyi sheˍ. Pawˇluꞈ shu ve aˉ hkʼaw lo haw tiˍ taˍ piˇ htaˇ, yawˇ Tuˇhkiˆ ga laˇ tuˬ lawˬ leh yawˇ Tuˇhkiˆ htaꞈ “ka tiꞈ yeˬ ve kanˉ te shehˍ hpaˇ” tehꞈ kʼoˆ ve yoˬ. (Eˇfeˇsuꞈ 6:21, 22) Pawˇluꞈ lehˬ Tuˇhkiˆ htaꞈ Eˇfeˇsuꞈ leh Kawˇlawˇsehˇ venˇ lo awˬ viˉ awˬ nyi htaꞈ liꞈ yuˬ kʼoˍ paˍ ceh shawˍ ve maˇ heˆ. Yaꞈ hkʼaˇ, Tuˇhkiˆ htaꞈ oˇ kaˬ lo ve awˬ viˉ awˬ nyi htaꞈ awˬ gʼaˇ piˇ tcuh ve yoˬ. Chi beuꞈ teˇ co˗e yonˍ gʼa ve awˬ viˉ awˬ nyi hawˉ hkʼaˆ lehˬ, ngaˬ hui yonˍ ve htaꞈ nyi haꞈ shaˉ laˇ leh Tuˇhkiˆ ve awˬ lawn htaꞈ ngaˬ hui dawˇ nyi tuˬ te laˇ ve yoˬ.—Kawˇlawˇsehˇ 4:7-9.

7. Nawˬ yonˍ gʼa ve chaw hpehꞈ gʼa tuˬ Hkriꞈ yaˇ awˬ moˍ hkʼaw nyi haꞈ shaˉ paˍ leh ga piˇ shehˍ hpaˇ ve awˬ lawn ngaˬ hui htaꞈ aˬ htoꞈ ma maˍ laˇ ve le?

⁷ Nyi haꞈ shaˉ paˍ leh ga piˇ shehˍ hpaˇ yonˍ gʼa ve chaw hpehꞈ ve ngaˬ hui awˬ hpfuhˇ shiˍ jaˇ. Yawˇ hui lehˬ Daˍyeˍlaˆ, Haˍnaˍniˆ, leh Tuˇhkiˆ hkʼe, yawˇ hui ve awˬ vuiˬ htaꞈ a yeˇ yuˬ leh a yeˇ uiˍ jaˇ tehꞈ shawˍ ve yoˬ. Tawˇ pa haˉ te kʼo, mvuhˇ hpeuꞈ haˉ hpawnˬ daꞈ ve hkʼaw awˬ vuiˬ hkʼa peu˗eˬ htaꞈ te ve chaw cawˬ ve tehꞈ ngaˬ hui shiˍ ve yoˬ. Awˬ viˉ awˬ nyi teˇ gʼaˇ le le awˬ vuiˬ htaꞈ gu leh gʼa taˍ ve awˬ vuiˬ htaꞈ hkʼa dehꞈ te ve nyi haꞈ shaˉ paˍ awˬ bon uiˍ jaˇ ve yoˬ. Chi hkʼoˆ kaꞈ, hkawꞈ nyi shinˉ nyi ngaˬ hui hpawnˬ daꞈ ve hkʼaw Liꞈ hpu henˇ ve chaw htaꞈ jehˬ laˬ htaˇ, bon maˍ ve chaw cawˬ tuˬ yoˬ tehꞈ ngaˬ hui yonˍ gʼa ve yoˬ. Hto toˇ htaˇ ngaˬ hui liꞈ kʼoˆ hkʼaˬ htaˆ kaꞈ yehˇ tuˬ cawˬ ve tehꞈ yonˍ gʼa ve yoˬ. Awˬ viˉ awˬ nyi hawˉ hkʼaˆ awˬ vuiˬ chi ve hkʼa peu˗eˬ htaꞈ te leh ngaˬ hui htaꞈ nyi shaˉ laˇ daꞈ jaˇ ve, leh yawˇ hui ngaˬ hui htaꞈ ga laˇ ve, chi Yaˬhoˉvaˬ htaꞈ awˬ bon uiˍ jaˇ ve yoˬ. Yaꞈ hkʼaˇ, ngaˬ hui yonˍ gʼa ve chaw hpehꞈ tuˬ hkʼaˬ hkʼe te hpeuꞈ maw piˇ gʼa tuˬ le?

8. Ngaˬ hui awˬ viˉ awˬ nyi htaꞈ dawˇ haˍ ve htawˇ, ngaˬ hui keunˍ lawꞈ cawˇ lawꞈ ve hkʼaˬ hkʼe gʼa cawˬ cawˇ ve le? (Tawˇ naˉ ve 11:13)

⁸ Ngaˬ hui awˬ viˉ awˬ nyi htaꞈ haꞈ leh yawˇ hui htaꞈ dawˇ haˍ ve yoˬ. Yaꞈ hkʼaˇ, ngaˬ hui keunˍ daꞈ cawˇ daꞈ ve gʼa cawˬ ve, gʼa yawˆ yan piˇ ve, yawˇ hui ve awˬ lawn htaꞈ maˇ gʼa shoꞈ shaꞈ piˇ. Awˉ lawˉ peuˇ ve Hkriꞈ yaˇ teˇ hpaˍ lehˬ, “yawˇ hui tawˇ maˇ leh, kʼoˆ maˇ keunˍ ve teˇ hpaˍ htaꞈ yawˇ hui kʼoˆ ve yoˬ. Yawˇ hui htaꞈ maˇ caˉ daꞈ ve shu te kuiˬ htaꞈ ca shoꞈ shaꞈ piˇ ve chaw hpehꞈ ve yoˬ.” (1 Tiˆmoˉseˍ 5:13) Ngaˬ hui chi hkʼe maˇ hpehꞈ gaˇ taˬ. Teˇ pawˆ pawˆ kʼo awˬ viˉ awˬ nyi yawˇ hui ve awˬ lawn ngaˬ hui htaꞈ kʼoˆ maˍ laˇ leh ngaˬ hui awˬ nu ve chaw htaꞈ maˇ kʼoˆ piˇ tehꞈ kʼoˆ piˇ ve yoˬ. Tawˇ pa haˉ te kʼo, awˬ viˉ awˬ nyi yaˇ miˇ teˇ gʼaˇ yawˇ a naˍ teˇ ceuˬ ceuˬ hpehꞈ ve tehꞈ kʼoˆ leh yawˇ shoꞈ shaꞈ ve awˬ lawn aˬ htoꞈ ma gʼa hpuˇ chehˇ ve htaꞈ kʼoˆ maˍ laˇ ve yoˬ. Ngaˬ hui shu htaꞈ taˇ ca kʼoˆ piˇ tehꞈ yawˇ kʼoˆ laˇ ve yoˬ. Ngaˬ hui kaꞈ yawˇ kʼoˆ laˇ ve hkʼe te ve yoˬ. * (Tawˇ naˉ ve 11:13 gʼaw sheˍ.) Ngaˬ hui awˬ nu ve chaw htaꞈ maˇ kʼoˆ piˇ cawˇ ve teˇ ceuˬ ceuˬ kʼawꞈ nyi sheˍ.

9. Yehˬ kʼa hkʼaw ve chaw teˇ gʼaˇ le le yawˇ yonˍ gʼa ve chaw hpehꞈ tuˬ hkʼaˬ hkʼe hpeuꞈ maw piˇ gʼa ve le?

⁹ Yehˬ kʼa hkʼaw ve chaw awˬ lawn. Yehˬ kʼa hkʼaw ve chaw ve awˬ lawn awˬ nu ve chaw htaꞈ maˇ gʼa kʼoˆ piˇ tuˬ gʼa tawnˇ taˍ cawˇ ve yoˬ. Tawˇ pa haˉ te kʼo, awˬ viˉ awˬ nyi yaˇ miˇ gʼuiˬ yawˬ tuˬ cawˬ ve tehꞈ awˬ hpawˇ mawˬ ve pa taw, awˬ nu ve chaw htaꞈ ca kʼoˆ piˇ ve kʼo yaꞈ taw tuˬ te ve piˇ ve yoˬ hehˉ. Yawˇ chi hkʼe maˇ kʼoˆ taˬ. Awˬ lawn kʼo, yawˇ awˬ miˇ ma htaꞈ haꞈ leh nyi ma luˬ tuˬ maˇ te piˇ. (Eˇfeˇsuꞈ 5:33) Yaˇ lehˬ yaˇ nehˬ hpehꞈ htaˇ yawˆ yan ve htaꞈ gʼa tuˬ, awˬ pa awˬ e gʼa tawnˇ taˍ cawˇ ve yoˬ. Yaˇ te yaꞈ taˍ ve awˬ lawn awˬ nu ve chaw htaꞈ kʼoˆ piˇ ve kʼo, yaˇ yaꞈ taw tuˬ yawˇ te piˇ ve yoˬ. (Kawˇlawˇsehˇ 3:21) Yaˇ teˇ hpaˍ kaꞈ tawˇ yaw ve htaꞈ shaˍ tiꞈ gʼa te cawˇ ve yoˬ. Yehˬ kʼa hkʼaw ve chaw ve awˬ lawn yawˇ awˬ nu ve chaw htaꞈ kʼoˆ piˇ ve kʼo, yehˬ kʼa hkʼaw ve chaw teˇ hpaˍ yaꞈ taw tuˬ te piˇ ve yoˬ hehˉ. (Bon maˍ ve 5:16) Yehˬ kʼa hkʼaw ve chaw teˇ gʼaˇ le le yawˇ hui ve awˬ lawn shu htaꞈ maˇ kʼoˆ piˇ ve kʼo, meuˆ daꞈ jaˇ tuˬ yoˬ.

10. Awˬ tehˬ ve awˬ chawˇ lehˬ hkʼaˬ hkʼe hpehꞈ ve le? (Tawˇ naˉ ve 17:17)

 ¹⁰ Awˬ chawˇ ve awˬ lawn. Ngaˬ hui hkʼaˬ hkʼe dawˇ ve meuˆ daꞈ ve awˬ chawˇ htaꞈ kʼoˆ maˍ piˇ gaˇ ve teˇ yanˇ cawˬ ve yoˬ. Yaꞈ hkʼaˇ, teˇ pawˆ pawˆ kʼo sha ve maˇ heˆ. Ngaˬ hui aˬ htoꞈ ma dawˇ ve shu htaꞈ maˇ kʼoˆ maˍ piˇ gaˇ ve yoˬ hehˉ. Ngaˬ hui ve awˬ chawˇ htaꞈ teˇ ceuˬ ceuˬ kʼoˆ maˍ piˇ ve lehˬ, yawˇ awˬ nu ve chaw htaꞈ kʼawꞈ kʼoˆ maˍ piˇ ve kʼo, ngaˬ hui nyi ma luˬ jaˇ tuˬ yoˬ. Ngaˬ hui ve awˬ chawˇ ngaˬ hui ve awˬ lawn awˬ nu ve chaw htaꞈ maˇ kʼoˆ maˍ piˇ ve kʼo, ngaˬ hui ha lehˬ jaˇ tuˬ ve yoˬ. Awˬ chawˇ chi hkʼe ve lehˬ, ‘awˬ tehˬ ve awˬ chawˇ’ hpehꞈ ve yoˬ. Hkʼe te leh, awˬ chawˇ ve awˬ lawn ngaˬ hui awˬ nu ve chaw htaꞈ maˇ kʼoˆ piˇ.—Tawˇ naˉ ve 17:17 gʼaw sheˍ.

11. (a) Nyi haꞈ shaˉ paˍ leh awˬ miˇ ma yonˍ gʼa ve chaw hpehꞈ ve tehꞈ hkʼaˬ hkʼe te hpeuꞈ maw laˇ ve le? (b) Nyi haꞈ shaˉ paˍ lehˬ Hkriꞈ yaˇ awˬ moˍ hkʼaw ve awˬ lawn, awˬ nu ve chaw leh yehˬ kʼa hkʼaw ve chaw htaꞈ maˇ kʼoˆ piˇ ve tehꞈ ngaˬ hui htaꞈ hkʼaˬ hkʼe te hpeuꞈ maw laˇ ve le? (Awˬ han htaꞈ nyi sheˍ.)

¹¹ Hkriꞈ yaˇ awˬ moˍ hkʼaw ve awˬ lawn. Nyi haꞈ shaˉ paˍ shu ve awˬ lawn maˇ ca kʼoˆ piˇ ve lehˬ, “mvuhˇ haw mvuhˇ yeˬ lonˉ laˬ htaˇ, ca vaꞈ taˍ kuiˬ haˉ hpawˇ hkʼa shuˍ hpehꞈ tuˬ yoˬ.” (Iˉsaˍyaˆ 32:2) Nyi haꞈ shaˉ paˍ lehˬ ngaˬ hui ve awˬ lawn awˬ nu ve chaw htaꞈ maˇ ca kʼoˆ piˇ ve tehꞈ ngaˬ hui shiˍ ve pa taw, yawˇ htaꞈ kʼoˆ maˍ piˇ htaˇ ngaˬ hui nyi ma sha ve yoˬ. Leh ngaˬ hui yawˇ hui maˇ kʼoˆ laˇ keunˍ ve awˬ ceuˬ htaꞈ kʼoˆ laˇ tuˬ kaꞈ maˇ na piˇ. Chi hkʼoˆ kaꞈ, nyi haꞈ shaˉ paˍ awˬ miˇ ma lehˬ, awˬ hpawˇ htaꞈ shu ve awˬ lawn kʼoˆ laˇ tuˬ maˇ nyiˉ piˇ ve ngaˬ hui awˬ bon uiˍ jaˇ. Awˬ tehˬ kʼo, yawˇ hui awˬ viˉ awˬ nyi ve awˬ lawn maˇ shiˍ ve lehˬ, yawˇ awˬ pon daꞈ ve yoˬ. Awˬ viˉ awˬ nyi yaˇ miˇ teˇ gʼaˇ kʼoˆ ve, “awˬ hpawˇ awˬ viˉ awˬ nyi htaꞈ ga piˇ chehˇ ve awˬ lawn maˇ heˆ leh awˬ viˉ awˬ nyi htaꞈ awˬ gʼaˇ ca piˇ chehˇ ve awˬ lawn ngaˬ htaꞈ maˇ kʼoˆ maˍ laˇ ve awˬ bon uiˍ jaˇ. Ngaˬ hpawˇ awˬ viˉ awˬ nyi oˇ ve teˇ gʼaˇ ve awˬ meh kaꞈ maˇ kʼoˆ laˇ ve yoˬ. Ngaˬ te maˇ gʼa ve awˬ ceuˬ htaꞈ maˇ shiˍ ve lehˬ daꞈ ve yoˬ. Chi hkʼe hpehꞈ htaˇ ngaˬ Hkriꞈ yaˇ awˬ moˍ hkʼaw ve awˬ viˉ awˬ nyi teˇ gʼaˇ le le htaꞈ tawˇ yaw daꞈ tuˬ, htawˇ dawˇ nawˬ dawˇ maˇ cawˬ. Chi ve ngaˬ yonˍ gʼa tuˬ te laˇ leh, ngaˬ ve awˬ lawn leh ngaˬ hkʼaˬ hkʼe dawˇ ve ngaˬ hpawˇ htaꞈ kʼoˆ piˇ haˆ ve yoˬ. Yawˇ awˬ lawn chi ve awˬ nu ve chaw htaꞈ maˇ kʼawꞈ kʼoˆ piˇ.” Ngaˬ hui kaꞈ awˬ nu ve chaw yonˍ gʼa ve hpehꞈ gaˇ ve yoˬ. Chi hkʼe te gʼa tuˬ te hkʼaˇ dawˇ hkʼaˇ ngaˬ hui htaꞈ ga laˇ gʼa ve  aˬ htoꞈ ma cawˬ ve le? Te hkʼaˇ dawˇ hkʼaˇ 5 ceuˬ htaꞈ teˇ geh kʼawꞈ nyi sheˍ.

12. Aˬ htoꞈ ma te yonˍ gʼa daꞈ ve lehˬ haꞈ pehnˇ ve a yeˇ uiˍ jaˇ ve tehꞈ ngaˬ hui kʼoˆ gʼa ve le?

¹² Yonˍ gʼa daꞈ tuˬ haꞈ pehnˇ ve lehˬ a yeˇ uiˍ jaˇ. Yeˍsuˆ kʼoˆ ve a yeˇ uiˍ jaˇ ve awˬ liˇ tawˇ hkawˇ 2 hkawˇ cawˬ ve yoˬ. Chi lehˬ Yaˬhoˉvaˬ htaꞈ haꞈ leh awˬ nu ve chaw htaꞈ kaꞈ haꞈ ve yoˬ. (Maꞈhtehˍ 22:37-39) Ngaˬ hui Yaˬhoˉvaˬ htaꞈ haꞈ jaˇ. Awˬ nu ve chaw kaꞈ Yaˬhoˉvaˬ htaꞈ yonˍ gʼa ve pa taw, ngaˬ hui kaꞈ yawˇ htaꞈ henˇ yuˬ gaˇ ve yoˬ. Ngaˬ hui kaꞈ awˬ viˉ awˬ nyi htaꞈ haꞈ leh yawˇ hui ve awˬ lawn shu htaꞈ maˇ kʼoˆ piˇ gaˇ. Ngaˬ hui yawˇ hui nyi ma luˬ tuˬ maˇ te gaˇ leh ngaˬ hui htaꞈ pa taw yawˇ hui yaꞈ taw tuˬ maˇ heˆ leh nyi ma luˬ tuˬ kaꞈ maˇ te piˇ gaˇ.—Yoˇhanˬ 15:12.

13. Shu ve awˬ lawn maˇ ca kʼoˆ tuˬ nyi ma nuˇ nehˬ ve lehˬ ngaˬ hui htaꞈ hkʼaˬ hkʼe ga laˇ gʼa ve le?

¹³ Shu ve awˬ lawn maˇ ca kʼoˆ tuˬ nyi ma nuˇ nehˬ ve lehˬ ngaˬ hui htaꞈ ga laˇ gʼa ve yoˬ. Nyi ma nuˇ nehˬ ve chaw lehˬ awˬ lawn teˇ ceuˬ ceuˬ htaꞈ yawˇ awˉ lawˉ shiˍ ve tehꞈ shu dawˇ cawˇ tuˬ maˇ ca kʼoˆ piˇ. (Hpiˇliˇpiˆ 2:3) Yawˇ awˬ lawn teˇ ceuˬ ceuˬ awˬ nu ve chaw htaꞈ maˇ kʼoˆ piˇ cawˇ tehꞈ shiˍ ve pa taw, yawˇ a yeˇ uiˍ ve chaw hpehꞈ ve tehꞈ awˬ viˉ awˬ nyi dawˇ tuˬ maˇ te piˇ. Ngaˬ hui nyi ma nuˇ nehˬ ve chaw hpehꞈ ve kʼo, Liꞈ hpu hkʼaw maˇ heˆ leh Gʼuiˬ sha ve kanˉ hkʼaˇ hkʼaw awˬ lawn maˇ kʼoˆ maˍ laˇ taˍ ve htaꞈ caˉ daꞈ ve awˬ lawn ngaˬ hui hkʼaˇ ngaˬ hui dawˇ leh shu htaꞈ maˇ ca kʼoˆ piˇ toˇ.

14. Ngaˬ hui yonˍ gʼa ve chaw hpehꞈ tuˬ na gʼa ve lehˬ ngaˬ hui htaꞈ hkʼaˬ hkʼe ga laˇ gʼa ve le?

¹⁴ “Taꞈ iˉ gawˬ lehˍ chehˇ tuˬ ve awˬ yanˇ, leh tawˇ yaw tuˬ ve awˬ yanˇ” htaꞈ shiˍ tuˬ na gʼa ve lehˬ ngaˬ hui htaꞈ ga laˇ gʼa ve yoˬ. (Cuˇ yiˍ piˇ ve 3:7) Laˇhuˍ chaw mawˇ hkawˇ kʼo, “taꞈ iˉ gawˬ lehˍ chehˇ ve lehˬ daꞈ ve yoˬ. Taꞈ iˉ maˇ chehˇ puiˉ ve lehˬ naˬ tuˬ te laˇ gʼa ve yoˬ.” Laiˉ pawˆ kʼo ngaˬ hui taꞈ iˉ chehˇ taˍ ve lehˬ daꞈ ve yoˬ. Tawˇ naˉ ve liꞈ 11:12 hkʼaw ngaˬ hui htaꞈ shaˍ tiꞈ peꞈ laˇ ve, “daꞈ ve chaw hpehꞈ ve kʼo, taꞈ iˉ gawˬ lehˍ chehˇ taˍ tuˬ yoˬ.” Awˬ lawn chi ve htaꞈ caˉ daꞈ ve awˬ viˉ awˬ nyi teˇ gʼaˇ ve awˬ lawn ngaˬ hui mawˬ tuˬ te laˇ ve yoˬ. Yawˇ nyi haꞈ shaˉ paˍ hpehꞈ ve pa taw hpehꞈ laˬ jaw ve awˬ lawn cawˬ maˇ jaˇ leh, awˬ nu ve Hkriꞈ yaˇ awˬ moˍ yawˇ htaꞈ nyi ma cawˇ leh shoꞈ shaꞈ ve laiˉ ceuˬ gu laˇ tuˬ lawˬ piˇ ve yoˬ. Awˬ nu ve nyi haꞈ shaˉ paˍ teˇ gʼaˇ lehˬ nyi haꞈ shaˉ paˍ chi teˇ gʼaˇ htaꞈ kʼoˆ ve, “yawˇ lehˬ tawˇ yaw ve awˬ hkʼaw lo shaˍ tiꞈ te puiˉ ve yoˬ. Yawˇ lehˬ Hkriꞈ yaˇ awˬ moˍ hkʼaw ve awˬ lawn awˬ nu ve chaw htaꞈ maˇ ca kʼoˆ piˇ ve yoˬ.” Nyi haꞈ shaˉ paˍ chi teˇ gʼaˇ chi hkʼe hpehꞈ ve pa taw, Hkriꞈ yaˇ awˬ moˍ hkʼaw ve nyi haꞈ shaˉ paˍ teˇ hpaˍ yawˇ htaꞈ yawˆ yan jaˇ ve yoˬ. Nyi haꞈ shaˉ paˍ chi teˇ gʼaˇ lehˬ yawˇ hui ve awˬ lawn awˬ nu ve chaw htaꞈ maˇ ca kʼoˆ piˇ taˍ tehꞈ yawˇ hui yonˍ gʼa ve yoˬ.

15. Yonˍ gʼa ve chaw hpehꞈ tuˬ ka tiꞈ yeˬ ve lehˬ ngaˬ hui htaꞈ hkʼaˬ hkʼe ga laˇ gʼa ve le? Tawˇ pa haˉ kʼoˆ maˍ laˇ sheˍ.

¹⁵ Yonˍ gʼa ve chaw hpehꞈ tuˬ ka tiꞈ yeˬ ve lehˬ ngaˬ hui htaꞈ ga laˇ gʼa ve yoˬ. Yawˇ awˬ tehˬ ve tawˇ htaꞈ hkʼaˬ htaˆ kaꞈ yaw tuˬ ngaˬ hui shiˍ ve pa taw, ka tiꞈ yeˬ ve chaw htaꞈ yonˍ gʼa ve yoˬ. (Eˇfeˇsuꞈ 4:25; Heˍbrehˇ 13:18) Awˬ lawn chi htaꞈ dawˇ nyi sheˍ. Nawˬ Liꞈ hpu maˍ cheuˬ la gaˇ ve kʼo, hpawnˬ daꞈ kuiˬ hkʼaw nawˬ awˬ vuiˬ te htaˇ awˬ viˉ awˬ nyi teˇ gʼaˇ htaꞈ na taˍ tuˬ lawˬ piˇ leh nawˬ hkʼaˬ kaˬ lo gʼa gu cawˇ ve yawˇ beˆ maˍ laˇ tuˬ lawˬ gʼa ve yoˬ. Nawˬ nyi ma sha tuˬ tawˇ yaw laˇ puiˉ leh chiˇ mvuh laˇ puiˉ ve teˇ gʼaˇ maˇ heˆ leh nawˬ awˬ vuiˬ te ve htaꞈ nuˇ nehˬ ve hkʼaw hteˇ˗ehˬ kʼoˆ laˇ ve teˇ gʼaˇ, chi ve nawˬ hkʼaˬ ve teˇ gʼaˇ htaꞈ leuˆ tuˬ le? Nawˬ leuˆ yuˬ tuˬ maˇ haˍ. Liꞈ hpu hkʼaw kʼoˆ ve, “te yaꞈ ve chaw htaꞈ maˇ maˍ piˇ leh taꞈ iˉ gawˬ lehˍ chehˇ taˍ ve aꞈ kehˉ, deˇ maˍ piˇ ve lehˬ daꞈ leuˉ ve yoˬ. Awˬ chawˇ teˇ gʼaˇ dawˆ hpehˇ laˇ ve lehˬ, canˇ paˍ teˇ gʼaˇ boˆ nu laˇ ve aꞈ kehˉ daꞈ leuˉ ve yoˬ.” (Tawˇ naˉ ve 27:5, 6) Ngaˬ hui htaꞈ ka tiꞈ yeˬ ve awˬ chawˇ lehˬ, ngaˬ hui hkʼaˬ kaˬ lo gʼa gu cawˇ ve kʼoˆ laˇ ve yoˬ. Awˉ lawˉ htaˇ kʼo yawˇ kʼoˆ laˇ ve htaꞈ haꞈ yuˬ gʼa tuˬ haˍ ve yoˬ. Yaꞈ hkʼaˇ, chi ngaˬ hui awˬ pon awˬ bon cawˬ ve yoˬ.

16. A shu yawˇ awˬ to htaꞈ yuˬ tiˍ gʼa tuˬ a yeˇ uiˍ jaˇ ve tehꞈ, Tawˇ naˉ ve liꞈ 10:19 hkʼawꞈ ngaˬ hui htaꞈ hkʼaˬ hkʼe ga laˇ ve le?

 ¹⁶ Awˬ nu ve chaw ngaˬ hui htaꞈ yonˍ gʼa tuˬ a shu yawˇ awˬ to htaꞈ yuˬ tiˍ ve lehˬ a yeˇ uiˍ jaˇ. Teˇ pawˆ pawˆ kʼo, ngaˬ hui ve awˬ lawn shu htaꞈ kʼoˆ maˍ piˇ gaˇ ve htawˇ, ngaˬ hui a shu yawˇ awˬ to htaꞈ yuˬ tiˍ gʼaˇ ve chaw hpehꞈ ve kʼo, maˇ kʼoˆ maˍ piˇ. (Tawˇ naˉ ve 10:19 gʼaw sheˍ.) Ngaˬ hui in˗teu˗neꞈ yehˇ htaˇ a shu yawˇ awˬ to htaꞈ yuˬ tiˍ gʼaˇ tuˬ maˇ sha. Ngaˬ hui shaˍ tiꞈ maˇ te ve kʼo, maˇ dawˇ maˇ gaˇ ve hkʼaw ngaˬ hui ve awˬ lawn chaw maˇ maˇ htaꞈ kʼoˆ piˇ la ve yoˬ. Chi hkʼe kʼoˆ piˇ˗oˬ htaˇ, awˬ lawn chi ve htaꞈ a shu teˇ gʼaˇ hkʼaˬ hkʼe te yuˬ yehˇ ve ngaˬ hui yuˬ tiˍ maˇ gʼa˗o ve yoˬ. Leh chi ve ngaˬ hui htaꞈ hkʼaˬ hkʼe taw heuˆ la kuiˬ cawˬ ve maˇ shiˍ. Chi hkʼoˆ kaꞈ, ngaˬ hui a shu yawˇ awˬ to htaꞈ yuˬ tiˍ gʼaˇ ve kʼo, tawˍ taˍ paˍ ngaˬ hui ve awˬ lawn htaꞈ maˇ shiˍ gʼa ve pa taw, awˬ viˉ awˬ nyi htaꞈ kawˆ tuˬ te piˇ maˇ gʼa. Maˇ heˆ leh Gʼuiˬ sha ve kanˉ maˇ te tcuh laˇ ve mvuhˇ miˬ hkʼaw ngaˬ hui chehˇ ve kʼo, taˍ nuꞈ (paˍ leˆ) na laˇ htaˇ ngaˬ hui ve awˬ lawn maˇ kʼoˆ piˇ. Awˬ yanˇ chi hkʼe htaˇ maˇ heˆ leh awˬ nu ve awˬ yanˇ htaˇ ngaˬ hui Liꞈ hpu hkʼaw ve awˬ liˇ awˬ hkʼaˇ htaꞈ hkʼaˬ htaˆ kaꞈ gʼaꞈ te tuˬ yoˬ. Oˇ kaˬ lo kʼoˆ ve, “haiˬ ve chaw teˇ hpaˍ ngaˬ awˬ paˇ neˇ lo chehˇ taˍ htaˇ, ngaˬ teꞈ chiˉ ca kʼoˆ tuˬ ve maˇ heˆ.” (Chiˇ mvuh ve 39:1) Yehˬ kʼa hkʼaw ve chaw, awˬ chawˇ, Hkriꞈ yaˇ awˬ moˍ hkʼaw ve awˬ viˉ awˬ nyi maˇ heˆ leh teˇ gʼaˇ le le ngaˬ hui htaꞈ yonˍ gʼa tcuh cawˇ ve yoˬ. Leh awˬ nu ve chaw ngaˬ hui htaꞈ yonˍ gʼa tcuh gaˇ ve kʼo, a shu yawˇ awˬ to htaꞈ gʼa yuˬ tiˍ gʼaˇ ve yoˬ.

17. Hkriꞈ yaˇ awˬ moˍ hkʼaw ve awˬ viˉ awˬ nyi ngaˬ hui htaꞈ hkʼa dehꞈ yonˍ gʼa tuˬ hkʼaˬ hkʼe ga piˇ gʼa ve le?

¹⁷ Yaˬhoˉvaˬ ngaˬ hui htaꞈ gʼawˬ veu laˇ leh, awˬ viˉ awˬ nyi yonˍ gʼa daꞈ ve leh haꞈ daꞈ ve cawˬ tcuh laˇ ve ngaˬ hui ha lehˬ jaˇ. Teˇ gʼaˇ le le coˇ caˇ leh awˬ viˉ awˬ nyi yonˍ gʼa tuˬ te cawˇ ve yoˬ. Haꞈ pehnˇ ve, nyi ma nuˇ nehˬ ve, na gʼa ve, ka tiꞈ yeˬ ve, a shu yawˇ awˬ to htaꞈ yuˬ tiˍ gʼaˇ ve, chi ve teˇ hpaˍ hpeuꞈ maw piˇ ve kʼo, Hkriꞈ yaˇ awˬ moˍ hkʼaw awˬ viˉ awˬ nyi teˇ gʼaˇ leh teˇ gʼaˇ yonˍ gʼa daꞈ tuˬ ngaˬ hui ga piˇ ve yoˬ. Yaꞈ hkʼaˇ, awˬ nu ve chaw ngaˬ hui htaꞈ yonˍ gʼa tuˬ caˉ leh gʼa te kʼai ve yoˬ. Ngaˬ hui Yaˬhoˉvaˬ htaꞈ henˇ yuˬ leh yonˍ gʼa ve chaw hpehꞈ ve tehꞈ hpeuꞈ maw piˇ sheˍ.