1. Engtin nge mi chu rinchhan tlâk a ni tih kan hriat theih?

 MI RINCHHAN tlâk chuan a thutiam hlen leh thu dik chauh sawi a tum tlat a. (Sâm 15:4) Mi dangte pawhin an rinchhan thei tih an hria a ni. Kan unaute’n chutiang mi nia min hriat chu kan duh a ni. Kan unaute rin hlawh tûrin engin nge min ṭanpui thei?

2. Engtin nge rinchhan tlâk kan ni tih kan lantîr theih?

² Mi dangte chu min ring tûrin kan tilui thei lo va. Min rin theih nân theih tâwp kan chhuah zâwk tûr a ni. Rinna hi pawisa ang a ni a. Hlawh chhuah a har êm êm a; hloh erawh a awl hle thung. Jehova chu kan ring tak zet a. “A thiltih zawng zawng chu [a] rinawm” avângin, amah kan rinna kan hloh theihna tûr thil a ti ngai lo vang. (Sâm 33:4) Ani chuan amah entawn tûrin min beisei a ni. (Eph. 5:1) An Pa vâna mi entawn a, rinchhan tlâk an nihzia lantîrtu Jehova chhiahhlawhte entawn tûr siam ṭhenkhat i lo ngaihtuah ang u. Rinchhan tlâk ni tûra min ṭanpui theitu mize panga kan hre bawk ang.

3-4. Engtin nge zâwlnei Daniela chuan rinchhan tlâk a nihzia a lantîr a, chu chuan eng zawhnate nge inzâwt tûra min chêttîr ang?

³ Zâwlnei Daniela chuan rinchhan tlâk nihna kawngah entawn tûr ṭha tak a hnutchhiah a. Babulon mite zînga chêng tûra man leh hruai ni mah se, rinchhan tlâk nia mite hriat a hlawh ta thuai a. Babulon Lal Nebukadnezzara mumang a hrilhfiah hnuah phei chuan, mite rin a hlawh lehzual a ni. Ṭum khat chu, Daniela chuan lal hnênah a chunga Jehova a lâwm loh thu a hrilh a ngai a, chu chu lal thu hriat duh zâwng a ni lo ngei ang.  Nebukadnezzara chu mi thinchhe tak a nih avângin chutianga hrilh tûr chuan huaisenna neih a ngai ngei bawk ang! (Dan. 2:12; 4:20-22, 25) Kum tam tak a liam hnuah, Daniela chuan Babulon lal in banga thu inziak mak tak mai chu dik taka hrilhfiahin rinchhan tlâk a nihzia a lantîr leh a. (Dan. 5:5, 25-29) A hnuah, Media mi lal Daria leh hotu atâna a ruatte pawhin Daniela chu “rilru ṭha fawr bîk pu” a ni tih an hria a ni. Chu bâkah, ‘a rinawm êm avângin amahah chuan tihsual emaw, dik lohna emaw hmuh tûr a awm lo,’ tih an hre bawk. (Dan. 6:3, 4) Ni e, milem bia rorêltute ngei pawhin Jehova betu Daniela chu rinchhan tlâk a nihzia an hria a ni.

⁴ Daniela entawn tûr siam chu rilrua vawng rengin heti hian kan inzâwt thei a ni: ‘Jehova Thuhretu ni lote chuan eng ang mi nge nia min hriat? Mahni mawhphurhnate hlen ṭhîntu leh rinchhan tlâk nia hriat ka ni em?’ tiin. Engvângin nge chûng zawhna pawimawh takte chu kan inzawh ang? A chhan chu, rinchhan tlâk kan nihna chuan Jehova chawimawina a thlen vâng a ni.

5. Engvângin nge Hanania chu rinchhan tlâk tak nia hriat a nih?

⁵ B.C.E. 455-a Rorêltu Nehemia’n Jerusalem kulh a sak ṭhat hnu chuan, khawpui enkawltu tûr mi rin tlâk a zawng a. Nehemia chuan mi dang bâkah Kulhbîng hotu Hanania chu a thlang a ni. Bible chuan Hanania chu “tu ma tluk loh, mi rin tlâk tak, Pathian ṭih mi,” tiin a sawi. (Neh. 7:2) Jehova a hmangaihna leh tihlungawi loh a hlauhna chuan Hanania chu a chanvo dawn eng pawh theih tâwp chhuaha thawk tûrin a chêttîr a ni. Chûng  miziate chuan keini pawh Pathian rawng kan bâwlnaah mi rinchhan tlâk ni tûrin min ṭanpui ang.

6. Engtin nge Tukika chuan tirhkoh Paula tân ṭhian rinchhan tlâk a nihzia a lantîr?

⁶ Tirhkoh Paula’n a rin êm êm a ṭhian Tukika entawn tûr siam hi lo chhinchhiah teh. Paula chuan pâwn chhuak thei lova a ina tântîr a nih lai khân Tukika a rinchhan a, “rawngbâwltu rinawm tak” a nih thu a sawi a ni. (Eph. 6:21, 22) Paula chuan Tukika chu Ephesi leh Kolossa khuaa unaute hnêna a lehkhathawn keng tûr chauh ni lovin, anmahni tichaka thlamuan tûr pawhin a ring ngam bawk. Tukika chuan tûn laia kan thlarau lam mamawhte min ngaihsaktu, rinchhan tlâk unaupa rinawmte chu min hriat chhuahtîr a ni.—Kol. 4:7-9.

7. Rinchhan tlâk nihna chungchângah in kohhrana upate leh kohhranho rawngbâwltute hnên aṭangin eng nge i zir theih?

⁷ Tûn laiah pawh, rinchhan tlâk kohhran upate leh kohhranho rawngbâwltute chungah kan lâwm tak zet a. Anni chuan Daniela te, Hanania te, leh Tukika te angin an mawhphurhnate chu an la thutak hle a ni. Entîr nân, chawlhkâr chhûng inkhâwma kan tel hian, chanvo zawng zawngte chu pêk sa vek a ni tih kan hria a. Chu bâkah, unaute’n an chanvo dawnte inbuatsaiha an rawn hlen hian kohhran upate chu an lâwm thei hle! Entîr nân, vântlâng thusawi sawitu tûr chuan a chanvo dawn chu a theihnghilh dâwn lo tih kan hriat avângin, kan Bible zirpuite chu inkhâwma lo tel tûra sâwm kan hreh lo. Chu bâkah, Rawngbâwlna atâna kan mamawh thu leh hla chhuahte chu lâk theihin a awm ang tih kan ring tlat bawk. Chûng unaupa rinawmte chuan min ngaihsak hle a, chûngte avâng chuan Jehova chungah kan lâwm tak zet a ni. A nih leh, eng kawngtein nge rinchhan tlâk kan ni tih kan lantîr theih?

8. Mi dangte chunga ngaihsakna kan lantîr hunah engvângin nge kan inbûk tâwk a ngaih? (Thufingte 11:13)

⁸ Kan unaute chu kan hmangaihin, an dinhmunte pawh kan ngaihven hle a. Mahse, kan inbûk tâwk thiam a ngai a, an mi mal chungchângte chu kan zahsak tûr a ni. Kum zabi khatna hun laia Kristian kohhrana mi ṭhenkhat chuan “thu sawi loh tûr sawiin kamtam leh mite thiltih rêlsak an chîng” hle a. (1 Tim. 5:13) Anmahni ang nih chu kan duh lo ngei ang. A nih leh, tu emawin a mi mal chungchâng min hrilhin, mi dang hnêna sawi chhuak lo tûrin min ngên angah han inchan teh. Entîr nân, unaunu pakhat chuan a hrisêl lohna chungchâng emaw, a hmachhawn mêk fiahna dangte emaw min hrilhin, mi dang hnêna sawi chhuak lo tûrin min ngên pawh a ni thei. A mi ngenna chu kan zahsak tûr a ni. * (Thufingte 11:13 chhiar rawh.) Tûnah chuan, thurûk kan vawn a pawimawhna dinhmun dangte chu i lo sawiho vang u.

9. Engtin nge chhûngkuaa mi tinte chuan rinchhan tlâk an ni tih an lantîr theih?

⁹ Chhûngkuaah. Chhûngkuaa mi tinte hian chhûngkaw chungchâng thil ṭhenkhatte sawi chhuak lova vawn tlatna kawngah mawhphurhna an nei ṭheuh va. Entîr nân, unaunu pakhat chuan a pasal tâna nuihzatthlâk tak ni thei chîn ṭhan eng emaw a nei mai thei. A pasal chuan a nupui zahna thlen theitu chumi chungchâng chu mi dangte hnênah a hrilh ang em? Hrilh lo ngei ang! A nupui chu a hmangaih a, a rilru tina theitu eng thil mah tih a duh ngai lo vang. (Eph. 5:33) Tleirâwlte pawhin zah thiam taka cheibâwl an duh a. Chu chu  nu leh pate’n an hriat reng a pawimawh hle. An fate chu mi dangte hnêna an thil tihsualte hrilhna hmangin an tizak tûr a ni lo. (Kol. 3:21) Naupangte pawhin an chhûngte tizak theitu thute chu mi dangte hnêna sawi chhuak lo tûrin an fîmkhur an ngai a. (Deut. 5:16) Chhûngkuaa mi tinte’n an chhûngkaw chungchâng thilte sawi chhuak lova an vawn tlat hian, an chhûngkaw inlaichînna chu a nghet lehzual a ni.

10. Ṭhian dik tak nihnaah eng nge tel? (Thufingte 17:17)

¹⁰ Kan ṭhiante chungah. Kan zînga a tam zâwk chuan, kan ṭhian ṭha takte hnênah sawi chhuak tawh lo tûra ka duh kan mi mal chungchângte hrilh duh châng kan nei ngei ang. Chutianga tih chu thil harsa tak a ni thei. Mi dangte hnêna kan rilru chhûng rila awmte sawi chhuah chu harsa kan ti thei a; chu bâkah, kan ṭhianin a hnêna kan thusawite chu mi dangte hnênah a hrilh chhâwng tih kan hre leh a nih chuan kan rilru a na hle ngei ang. Kawng leh lamah chuan, thurûk vawng theitu kan ṭhiante chu kan va ngaihlu tak êm! Chutiang mi chu “ṭhian” dik tak an ni.—Thufingte 17:17 chhiar rawh.

11. (a) Engtin nge kohhran upate leh an nupuite chuan rinchhan tlâk an nihzia an lantîr? (b) Kohhrana unaute thurûkte leh an chhûngkaw chungchâng vawng tlattu upate hnên aṭangin eng zir tûr pawimawh tak nge kan zir theih? (Milem en rawh.)

¹¹ Kohhranah. Thurûk vawng theitu kohhran upate chu an unaute tân “thlipui laka bîkna hmun ang leh thlihrâng laka inhumhimna ang” an ni a. (Is. 32:2) Chûng upate hnênah chuan zalên takin thu kan sawi thei a, kan thusawite chu an sawi chhuak leh tawh lo vang tih kan ring thlap a ni. An hnêna kan sawite chu mi dangte hnêna an sawi chhuah loh tûr thu min hrilh kher a ngai lo. Chu bâkah, kohhran upa nupuite chu an pasalte hnên aṭanga mi dangte chungchâng thurûk hriat an tum loh avângin kan ngaihlu tak zet a ni. Kohhran upa nupui tân unaute mi mal chungchâng hriattîr a ni lo chu malsâwmna a ni tak zet a. Kohhran upa nupui pakhat chuan heti hian a sawi a ni: “Ka pasal hian berâm tlawhna an neihpui unaute leh thlarau lama ṭanpui ngai unaute chanchin  chu min hrilh ngai lo va, an hming tak ngial pawh mi hrilh ngai lo, chûngte avâng chuan a chungah ka lâwm tak zet a ni. Thurûk eng mah min hrilh ngai loh avângin, eng mah tih theih nei si lova rilru hrehawmin ka awm ngai lo. Kohhrana unau zawng zawngte chu pângngai takin ka biak theih phah bawk. Chu bâkah, ka pasal hnênah ka mi mal harsatnate hrilh pawh ni ila, a sawi chhuak lo vang tih ka ring tlat thei a ni,” tiin. Ni e, rinchhan tlâk nia mite hriat hlawh chu kan duh ṭheuh a ni. A nih leh, eng miziate’n nge rinchhan tlâk ni tûra min ṭanpui ang? Chûng miziate zînga panga chu i lo sawiho vang u.

12. Engvângin nge hmangaihna hi rinchhan tlâk ni tûra kan neih ngai mize pawimawh ber nia kan sawi theih? Entîrna pe rawh.

¹² Hmangaihna hi rinchhan tlâk ni tûra kan neih ngai mize pawimawh ber a ni a. Isua chuan thu pêk ropui ber pahnih chu Jehova hmangaih leh vêngte hmangaih a nih thu a sawi a ni. (Mt. 22:37-39) Jehova kan hmangaihna chuan rinchhan tlâk nihna kawnga a entawn tûr siamte zui tûrin min chêttîr a. Entîr nân, kan unaute kan hmangaihna chuan an mi mal chungchângte vawng tûrin min chêttîr a ni. An chunga chhiatna thlen theitu, tizak theitu, leh an rilru tina theitu eng thil mah sawi chhuah kan duh ngai lo vang.—Joh. 15:12.

13. Eng kawngin nge inngaihtlâwmna chuan rinchhan tlâk ni tûra min ṭanpui?

¹³ Inngaihtlâwmna chuan rinchhan tlâk ni tûrin min ṭanpui ang. Kristian inngaitlâwm tak chuan thil eng emaw sawi hmasatu nihna hmanga mi dangte rilru lâk chu a tum lo va. (Phil. 2:3) Sawi chhuah loh tûr thu pawimawhte hria nia lan a tum hek lo. Inngaihtlâwmna chuan Bible emaw, Bible ṭanchhan thu leh hla chhuahte emawa târ lan ni lo, mi mal thlîr dânte sawi darh chînna lakah min vêng bawk a ni.

14. Engtin nge hriatthiamnain rinchhan tlâk ni tûra min ṭanpui?

¹⁴ Hriatthiamna chuan Kristian chu ‘ngawih hun leh ṭawng hun’ thliar hrang thiam tûrin a ṭanpui ang. (Thur. 3:7) Hnam ṭhenkhatah chuan, “Thusawi hi tangkarua ang a ni a; ngawih erawh rangkachak ang a ni,” tia sawi a ni ṭhîn. Thu danga sawi chuan, ṭawng aia ngawih a ṭhat hun a awm tihna a ni. Chumi nêna inmil takin, Thufingte 11:12-na chuan: “Hriatna nei mi erawh chu a ngawi ṭhîn,” tiin a sawi. Entîrna pakhat hi han ngaihtuah teh. Thiltawn ngah tak kohhran upa pakhat chu kohhran dangte harsatna chinfel kawnga ṭanpui tûra sâwm a ni ṭhîn a. Chu kohhran upa chungchângah kohhran upa dang pakhat chuan, “Kohhran dangte thurûk sawi chhuak lo tûrin a fîmkhur thei hle,” tiin a sawi a ni. Chu kohhran upa chu hriatthiamna a ngah êm avângin, a lawina kohhrana upa dangte pawhin an zah hle a. An thurûkte pawh a sawi chhuak ngai lo vang tih an ring tlat a ni.

15. Rinawmnain mi dangte rin ngam ni tûra min ṭanpui dân entîrna pe rawh.

¹⁵ Rinawmna hi rinchhan tlâk ni tûra kan neih ngai mize pawimawh tak dang pakhat a ni a. Mi rinawm chuan thu dik chauh a sawi reng dâwn tih kan hriat avângin ani chu kan ring a ni. (Eph. 4:25; Heb. 13:18) Entîr nân, zirtîr thiamna kawnga hmasâwn i duh angah han inchan teh. Chuvângin, tu emaw hnênah kohhran inkhâwma i thusawite ngun taka lo ngaithla tûr leh hmasâwn i ngaihna laite chungchângah rawtna ṭangkai takte pe tûr chein i dîl a ni. A nih leh, i mamawh tak thurâwn pe tûr chein tu nge i rin ang? I hriat duh zâwng hrilhtu tûr che nge ni ang a, ngilnei taka thu dik tak hrilhtu tûr che? A chhânna chu a chiang reng mai. Bible chuan: “Hmangaihna  inthup ai chuan a langa zilhhauna a ṭha zâwk. Ṭhian min hliamna chu a tak,” tiin a sawi a ni. (Thuf. 27:5, 6) Kan ṭhianin thu dik tak a sawite chu a tîr chuan ngaihthlâk hrehawm deuh mah se, nakin leh zêla kan hlâwkpui tûrte a ni ṭhîn.

16. Engtin nge Thufingte 10:19-nain insûmtheihna neih a pawimawhzia a târ lan?

¹⁶ Insûmtheihna hi mi dangte rin ngam ni thei tûra thil pawimawh tak dang leh a ni a. Chu mizia chuan thurûkte sawi chhuah châkna kan neih hunah pawh sawi chhuak lova vawng tlat tûrin min ṭanpui ang. (Thufingte 10:19 chhiar rawh.) Social media kan hman hunah insûmtheihna lantîr chu a harsa thei a. Kan fîmkhur loh chuan, tum loh deuhvin mi tam tak hmaah thurûkte kan sawi chhuak palh thei a ni. Chu bâkah, social media-a vawi khat thu kan phoh chhuah tawh chuan, mi dangin an hman chhâwn dân tûr leh chumiin chhiatna a thlen dân tûrte chu kan thunun thei tawh lo. Insûmtheihna chuan min dodâltute’n kan unaute dinhmun hlauhawma dah theitu thute sawi chhuak tûra min thlêm hunah pawh, ngawi renga awm tûrin min ṭanpui bawk a ni. Chutiang dinhmun chu kan rawngbâwlna khuahkhirh a nihna rama police-te man kan tawh hunah a thleng thei a. Chutiang dinhmunah leh dinhmun dangahte pawh: “Ka ka hi hmui phuarnain ka phuar ang,” tih thu bul hi kan nunpui thei a ni. (Sâm 39:1) Kan chhûng te, kan ṭhian te, kan Kristian unau te, a nih loh leh tute tân pawh rinchhan tlâk kan nih a ngai a. Chutianga rinchhan tlâk ni tûr chuan, insûmtheihna kan neih a ngai a ni.

17. Engtin nge kohhranah inrin tawnna kan awmtîr theih?

¹⁷ Hmangaihna nei tak leh rinchhan tlâk mite hmanga din unaute zînga tel tûra Pathian Jehova’n min hîp avângin kan va lâwm tak êm! Kan za hian, kan unaute tâna rinchhan tlâk ni tûra theih tâwp chhuah tûrin mawhphurhna kan nei ṭheuh va. Hmangaihna te, inngaihtlâwmna te, hriatthiamna te, rinawmna te, leh insûmtheihnate lantîr tûra mi mal taka theih tâwp kan chhuah hian, kohhranah inrin tawnna kan awmtîr tihna a ni a. Mi dangte tâna rinchhan tlâk ni reng tûr chuan theih tâwp kan chhuah zawm zêl a ngai a ni. Chuvângin, Pathian Jehova entawn a, mi rinchhan tlâk tak nih reng chu i tum tlat ang u!