مطالعے دا مضمون نمبر 38
اپنے آپ نُوں بھروسے دے لائق ثابت کرو
بھروسے دے لائق بندہ راز نُوں راز ای رکھدا اے۔—امثال 11:13۔
گیت نمبر 101: ایکا رکھو
مضمون تے اِک نظر *
1. اَسی ایہہ کیویں جان سکنے آں کہ اِک بندہ بھروسے دے لائق ہے یاں نئیں؟
بھروسے دے لائق بندہ اپنے وعدے نبھان دی پوری کوشش کر دا اے تے ہمیشاں سچ بول دا اے۔ (زبور 15:4) ایہو جہے بندے تے لوک بھروسا کرن توں نئیں ڈر دے۔ اَسی چاہنے کہ ساڈے بھین بھرا وی ساڈے بارے اِنج ای محسوس کرن پر اوہناں دا بھروسا جتن لئی اَسی کیہہ کرسکنے آں؟
2. اَسی کیویں ثابت کر سکنے آں کہ اَسی بھروسے دے لائق آں؟
2 اَسی دُوجیاں نُوں مجبور نئیں کر سکدے کہ اوہ ساڈے تے بھروسا کرن۔ اَسی کہہ سکنے آں کہ بھروسا پیسیاں وانگوں اے تے ایہنوں وی کمانا پیندا اے۔ ایہنوں کمانا بڑا مشکل اے پر کھونا بڑا اسان۔یہوواہ نے واقعی ساڈا بھروسا جتیا اے۔ اَسی ہمیشاں اَکھاں بند کر کے اوہدے تے بھروسا کر سکنے آں کیونکہ اوہدے سارے کم وفاداری دے نیں۔ (زبور 33:4) اوہ چاہندا اے کہ اَسی وی اوہدے وانگوں بھروسے دے لائق بنئے۔ (اِفسیوں 5:1) آؤ خدا دے کجھ ایہو جہے بندیاں دِیاں مثالاں تے غور کرئیے جنہاں نے اپنے اسمانی باپ دی مثال تے عمل کیتا تے ایہہ ثابت کیتا کہ اوہ بھروسے دے لائق نیں۔ اَسی پنج ایہو جہیاں خوبیاں تے وی غور کراں گے جیہڑیاں بھروسے دے لائق بنن چ ساڈی مدد کر سکدیاں نیں۔
یہوواہ دے اوہناں بندیاں توں سکھو جیہڑے بھروسے دے لائق سن
3، 4. دانیایل نبی نے کیویں ثابت کیتا کہ اوہ بھروسے دے لائق اے تے اوہدی مثال توں سانوں کیہڑی گل تے غور کرن دا موقع مِلدا اے؟
3 بھروسے دے لائق ہون بارے دانیایل نبی نے بوہت ودھیا مثال قائم کیتی۔ بھانویں کہ بابلی اوہنوں اِک غلام دے طور تے اپنے نال لے گئے سن پر چھیتی ای اوہ اِک ایہو جہے بندے دے طور تے مشہور ہو گیا جدے تے پوری طرحاں بھروسا کیتا جا سکدا سی۔ دانیایل تے لوکاں دا بھروسا اوہدوں ہور وی ودھ گیا جدوں یہوواہ دی مدد نال اوہنے بابل دے بادشاہ نبوکدنضر دے خواباں دا مطلب دَسیا۔ اِک وار دانیایل نبی نے بادشاہ نبوکدنضر نُوں ایہہ دَسنا سی کہ یہوواہ اوہدے توں خوش نئیں اے۔ ایہہ اِک ایہو جیہا پیغام سی جنہوں بادشاہ نُوں دَسن دی جرأت کوئی بندہ نئیں کر سکدا سی۔ ایس معاملے چ دانیایل نُوں بڑی دلیری دی ضرورت سی کیونکہ بادشاہ نبوکدنضر بوہت ای گرم دماغ بندہ سی۔ (دانیایل 2:12؛ 4:20-22، 25) ایہدے بوہت سالاں بعد دانیایل نے اِک وار فیر توں ثابت کیتا کہ اوہ بھروسے دے لائق اے۔ اوہنے اوس پیغام دا بالکل صحی مطلب دَسیا جیہڑا بابل دے محل دی دیوار تے لکھیا گیا سی۔ (دانیایل 5:5، 25-29) بعد چ مادی فارس دے بادشاہ دارا تے اوہدے افسراں نے وی ویکھیا کہ دانیایل اِک ایہو جیہا بندہ اے جدے تے بھروسا کیتا جا سکدا اے تے اوہدے چ کوئی بُرائی نئیں پائی گئی۔ (دانیایل 6:3، 4) اوہ بُت پرست حکمران تے اوہدے افسر وی ایہہ گل من دے سن کہ اوہ یہوواہ دے ایس بندے تے بھروسا کر سکدے نیں۔
4 دانیایل دی مثال نُوں ذہن چ رکھ دے ہوئیاں تُسی اپنے آپ کولوں ایہہ سوال پچھ سکدے او: کلیسیا توں باہر لوک مینوں کیہو جیہا بندہ سمجھدے نیں؟ کیہہ لوک مینوں اِک ایہو جہے بندے دے طور تے جان دے نیں جیہڑا اپنیاں ذمےداریاں نُوں چنگی طرحاں پورا کر دا اے تے جدے تے بھروسا کیتا جا سکدا اے؟ اپنے آپ کولوں ایہہ سوال پچھنا ایناں ضروری کیوں اے؟ کیونکہ جدوں اَسی اپنے آپ نُوں بھروسے دے لائق ثابت کرنے آں تے ایہدے توں یہوواہ دی وڈیائی ہوندی اے۔
نحمیاہ نے بھروسےمند بندیاں نُوں ضروری کم دِتے۔ (پیراگراف نمبر 5 نُوں ویکھو۔)
5. حنانیاہ کیہڑی وجہ توں بھروسے دے لائق بندے دے طور تے جانیا جاندا سی؟
5 جدوں 455 قبل از مسیح چ گورنر نحمیاہ نے یروشلیم دِیاں دیواراں نُوں دُبارہ توں بنا لیا تے اوہ کجھ ایہو جہے بندے لبھن لگ پیا جنہاں تے بھروسا کیتا جا سکدا سی تے جیہڑے شہر دا چنگی طرحاں خیال رکھ سکدے سن۔ جیہڑے بندیاں نُوں نحمیاہ نے چُنیا اوہناں وچوں اِک قلعے دا حاکم یعنی حنانیاہ سی۔ بائبل چ اوہدے بارے دَسیا گیا اے کہ اوہ بڑا ایماندار تے دُوجیاں توں زیادہ خدا نُوں منن والا سی۔ (نحمیاہ 7:2) حنانیاہ یہوواہ نال بوہت پیار کردا سی تے اوہنوں دُکھی کرن توں ڈردا سی۔ ایس محبت تے ڈر دی وجہ توں ای اوہنے ہر اوس ذمےداری نُوں چنگی طرحاں پورا کیتا جیہڑی اوہنوں دِتی گئی سی۔ ایہہ گل ساڈی وی مدد کرے گی کہ اَسی یہوواہ دی خدمت چ مِلن والی ہر ذمےداری نُوں پوری ایمانداری نال نبھائیے۔
6. تخِکُس نے کیویں ثابت کیتا کہ اوہ پولُس دا سچا تے بھروسےمند دوست اے؟
6 ذرا تخِکُس دی مثال تے غور کرو جیہڑا پولُس دا دوست سی تے بھروسے دے لائق سی۔ جدوں پولُس نُوں اِک گھر چ قید کر دِتا گیا سی تے اوہنے تخِکُس تے اپنا بھروسا ظاہر کردے ہوئیاں کہیا کہ اوہ وفادار خادم اے تے توانوں سارا کجھ دَس دَوے گا۔ میں اوہنوں تواڈے کول بھیج رہیا واں تاکہ توانوں ساڈا حالچال دَسے تے تواڈے دلاں نُوں تسلی دَوے۔ (اِفسیوں 6:21، 22) پولُس رسول نُوں تخِکُس تے پورا بھروسا سی کہ اوہ نہ صرف اِفسس تے کلسیوں دے بھین بھراواں نُوں اوہناں دے خط پونچائے گا سگوں اوہناں بھین بھراواں دا حوصلہ وی ودھائے گا تے اوہناں نُوں تسلی وی دَوے گا۔ تخِکُس دی مثال تے غور کرن نال ساڈے ذہن چ ساڈے اوہ وفادار بھرا آندے نیں جیہڑے یہوواہ خدا دے قریب رہن چ ساڈی مدد کردے نیں۔—کُلسّیوں 4:7-9۔
7. تُسی بھروسے دے لائق بنن چ اپنی کلیسیا دے بزرگاں تے خادماں توں کیہہ سکھ سکدے او؟
7 اَسی اپنی کلیسیا دے بزرگاں تے خادماں دی دلوں قدر کرنے آں جنہاں تے اَسی بھروسا کر سکنے آں۔ دانیایل، حنانیاہ تے تخِکُس وانگوں اوہ وی اپنیاں ذمےداریاں نُوں پوری ایمانداری نال نبھاندے نیں۔ مثال لئی، جدوں اَسی ہفتے دے دوران ہون والی عبادت تے جانے آں تے سانوں ایس گل دی فکر نئیں ہوندی کہ پتہ نئیں عبادت چ جنہاں بھین بھراواں دے حصے نیں اوہناں نُوں ایہناں دا پتہ ہوئے گا کہ نئیں۔ بزرگ اوہناں بھین بھراواں دی دلوں قدر کر دے نیں جیہڑے پوری ذمےداری نال اپنے حصے پیش کردے نیں۔ نالے اَسی اپنیاں عبادتاں تے اوہناں لوکاں نُوں وی بلان توں نئیں جھجک دے جیہڑے ساڈے توں بائبل کورس کردے نیں کیونکہ سانوں ایس گل دا ڈر نئیں ہوندا کہ پتہ نئیں عبادت تے تقریر دین لئی کسے بھرا دا بندوبست ہے یاں نئیں۔ سانوں ایس گل تے پورا بھروسا ہوندا اے کہ اَسی مُنادی دے دوران جیہڑیاں کتاباں تے رسالے استمال کرنے نیں اوہ سانوں مل جان گے۔ ایہہ وفادار بھرا بڑی چنگی طرحاں ساڈا خیال رکھدے نیں تے اوہناں لئی اَسی یہوواہ دے دلوں شکرگزار آں۔ پر اَسی کِنہاں طریقیاں نال ایہہ ثابت کر سکنے آں کہ اَسی وی بھروسے دے لائق آں؟
دُوجیاں دے راز نُوں راز رکھن نال ثابت کرو کہ تُسی بھروسے دے لائق او
8. دُوجیاں چ دلچسپی لیندے ویلے سانوں سمجھداری نال کم کیوں لینا چاہی دا اے؟ (امثال 11:13)
8 اَسی اپنے بھین بھراواں نال بوہت پیار کرنے آں تے سانوں اوہناں دی بھلائی چ بڑی دلچسپی ہوندی اے۔ پر ایہہ بوہت ضروری اے کہ اَسی ایس گل دا لحاظ رکھیے کہ کجھ گلاں سانوں اپنے تک رکھنیاں چاہی دِیاں نیں۔ پہلی صدی عیسوی دی کلیسیا چ کجھ لوک فضول گلاں کر رہے سن تے دُوجیاں دے معاملیاں چ دخل دے رہے سن تے نامناسب گلاں کر رہے سن۔ (1-تیمُتھیُس 5:13) بےشک اَسی اوہناں وانگوں نئیں بننا چاہندے۔ فرض کرو کہ کوئی بندہ ایہہ سوچ کہ توانوں اپنے دل دی گل دَسدا اے کہ تُسی ایہنوں دُوجیاں نُوں نئیں دَسو گے۔ مثال لئی، شاید کوئی بھین توانوں اپنے صحت دے کسے مسئلے یاں کسے ہور مشکل بارے دَسدی اے تے توانوں کہندی اے کہ ایہہ گل اپنے تک رکھنا۔ ایس لئی ایہہ بوہت ضروری اے کہ اَسی ایس گل دا لحاظ رکھیے۔ * (امثال 11:13 نُوں پڑھو۔) آؤ ہُن کجھ ایہو جہے حالاتاں تے غور کرئیے جنہاں توں سانوں پتہ چلدا اے کہ دُوجیاں دِیاں کجھ گلاں اپنے تک رکھنا ایناں ضروری کیوں اے۔
9. خاندان دے جی ایہہ کیویں ثابت کر سکدے نیں کہ اوہ بھروسے دے لائق نیں؟
9 خاندان چ۔ خاندان دے ہر جی دی ایہہ ذمےداری اے کہ اوہ اپنے گھر دِیاں گلاں نُوں اپنے گھر تک رکھے۔ مثال لئی، شاید اِک بیوی دی کوئی ایہو جہی عادت اے جنہوں ویکھ کے اوہدے شوہر نُوں بڑا ہاسا آندا اے۔ پر کیہہ اوہ ایہدے بارے دُوجیاں نُوں دَسے گا جدی وجہ توں اوہدی بیوی نُوں شرمندگی ہو سکدی اے؟ بالکل نئیں۔ اوہ اپنی بیوی نال پیار کردا اے تے اوہ کوئی وی ایہو جیہا کم نئیں کرے گا جدی وجہ توں اوہدی بیوی نُوں تکلیف ہوئے۔ (اِفسیوں 5:33) نوجوان چاہندے نیں کہ اوہناں نال عزت نال پیش آیا جائے۔ ایس لئی ماں پیو لئی ایس گل دا خیال رکھنا بڑا ضروری اے کہ اوہ کدی وی دُوجیاں دے سامنے اپنے بچیاں دی غلطیاں نُوں ودھا چڑھا کے نہ دَسن تے نہ ای اوہناں دی بےعزتی کرن۔ (کُلسّیوں 3:21) بچیاں نُوں وی سمجھداری نال کم لینا چاہی دا اے۔ اوہناں نُوں کدی وی دُوجیاں نُوں اپنے گھر والیاں دی کوئی ایہو جہی گل نئیں دسنی چاہی دی جدی وجہ توں اوہناں نُوں شرمندگی ہوئے۔ (اِستثنا 5:16) جدوں خاندان دا ہر جی اپنے گھر دِیاں گلاں نُوں اپنے تک رکھدا اے تے اِنج اوہناں دا رشتہ ہور مضبوط ہو جاندا اے۔
10. سچا دوست ہون دا کیہہ مطلب اے؟ (امثال 17:17)
10 دوستی چ۔ سانوں ساریاں نُوں کدی نہ کدی ایہہ محسوس ہوندا اے کہ اَسی اپنے دل دی گل اپنے کسے قریبی دوست نال کریئے۔ پر اِنج کرنا ہمیشاں اسان نئیں ہوندا۔ شاید سانوں ایہہ عادت نئیں کہ اَسی اپنے دل دی گل کسے نُوں دَسیئے۔ یاں ہو سکدا اے کہ سانوں ایہہ ڈر ہوئے کہ جے ساڈے دوست نے ایہہ گل کسے ہور نُوں دَس دِتی تے ساڈا دل ٹُٹ جائے گا۔ پر اَسی اوہناں دوستاں لئی یہوواہ دے بڑے شکرگزار آں جنہاں نُوں اَسی اپنے دل دی گل دَس سکنے آں تے سانوں پتہ اے کہ اوہ ساڈیاں گلاں کسے دُوجے نُوں نئیں دَسن گے۔ اوہ ساڈے سچے دوست نیں۔—امثال 17:17 نُوں پڑھو۔
بزرگ اپنے گھر والیاں نُوں ایہو جہیاں گلاں نئیں دَسدے جنہاں نُوں راز چ رکھیا جانا چاہی دا اے۔ (پیراگراف نمبر 11 نُوں ویکھو۔) *
11. (الف) بزرگ تے اوہناں دِیاں بیویاں ایہہ کیویں ثابت کر سکدے نیں کہ اوہ بھروسے دے لائق نیں؟ (ب) تصویر دے مطابق اَسی ایس بزرگ توں کیہہ سکھ سکنے آں جیہڑا اِک ایہو جہے معاملے نُوں حل کر رہیا اے جنہوں راز چ رکھیا جانا چاہی دا اے تے بعد چ اوہ اپنے گھر والیاں نال اے؟
11 کلیسیا چ۔ جیہڑے بزرگ دُوجیاں دِیاں گلاں نُوں راز چ رکھدے نیں اوہ بھین بھراواں لئی ہنیری چ پناہ وانگوں تے طوفان چ لکن دی تھاں وانگوں ہوندے نیں۔ (یسعیاہ 32:2) اَسی جاننے آں کہ اَسی ایہناں بھراواں نال کُھل کے گل کر سکنے آں کیونکہ سانوں بھروسا اے کہ اَسی اوہناں نُوں جیہڑی وی گل دَساں گے اوہ اوہنوں اپنے تک ای رکھن گے۔ اَسی اوہناں تے دَبا نئیں پاندے کہ اوہ سانوں راز دِیاں گلاں دَسن۔ ایہدے علاوہ اَسی بزرگاں دِیاں بیویاں دی وی بڑی قدر کرنے آں کیونکہ اوہ اپنے شوہراں توں ایہو جہیاں گلاں جانن دی کوشش نئیں کردیاں جنہاں نُوں راز چ رکھیا جانا چاہی دا اے۔ ایہہ واقعی اِک نعمت اے کہ اِک بزرگ دی بیوی نُوں بھین بھراواں دے راز دے معاملیاں بارے نہ پتہ ہووے۔ ایس بارے اِک بزرگ دی بیوی کہندی اے: ”میں بڑی شکرگزار آں کہ میرا شوہر مینوں اوہناں بھین بھراواں بارے کوئی گل نئیں دَس دا جنہاں دا اوہ حوصلہ ودھان لئی جاندا اے یاں جنہاں دی اوہ یہوواہ دے نیڑے جان چ مدد کردا اے۔ اوہ تے مینوں اوہناں بھین بھراواں دے ناں وی نئیں دَسدا۔ میں ایس گل دی بڑی قدر کرنی آں کہ میرا شوہر میرے اُتے ایہو جہے مسئلیاں دا بوجھ نئیں پاندا جنہاں بارے میں کجھ نئیں کر سکدی۔ اِنج میں جھجکے بغیر کلیسیا دے ہر بھین بھرا نال گل کر سکنی آں۔ نالے مینوں ایس گل دا وی پورا بھروسا اے کہ جدوں میں اپنے شوہر نُوں اپنے مسئلے یاں اپنے دل دی کوئی گل دَساں گی تے اوہ اوہنوں وی اپنے تک ای رکھے گا۔ بےشک اَسی سارے ایہی چاہنے آں کہ دُوجے سانوں اِک بھروسےمند انسان دے طور تے جانن۔ پر اِنج کرن چ کیہڑیاں خوبیاں ساڈے کم آ سکدیاں نیں؟ آؤ پنج خوبیاں تے غور کرئیے۔
ایہو جہیاں خوبیاں پیدا کرو جنہاں دی مدد نال تُسی بھروسے دے لائق بن سکو
12. اَسی ایہہ کیوں کہہ سکنے آں کہ محبت بھروسے دی بنیاد ہوندی اے؟ اِک مثال دَوو۔
12 محبت بھروسے دی بنیاد ہوندی اے۔ یسوع مسیح نے کہیا سی کہ دو سب توں وڈے حکم ایہہ نیں کہ اَسی یہوواہ نال تے اپنے گوانڈھی نال محبت کرئیے۔ (متی 22:37-39) یہوواہ لئی ساڈی محبت ساڈی مدد کر دی اے کہ اَسی وی اوہدے وانگوں بھروسےمند بنئے۔ ایسے طرحاں بھین بھراواں لئی ساڈی محبت ساڈی مدد کر دی اے کہ اَسی اوہناں دے ذاتی معاملیاں نُوں راز چ رکھیئے۔ اَسی کدی وی دُوجیاں نُوں اوہناں بھین بھراواں بارے کوئی ایہو جہی گل نئیں دَساں گے جدی وجہ توں اوہناں نُوں نقصان ہوئے، شرمندگی چکنی پووے یاں اوہناں نُوں تکلیف پونچے۔—یوحنا 15:12۔
13. خاکساری دی خوبی بھروسے دے لائق بنن چ ساڈی مدد کیویں کر سکدی اے؟
13 خاکساری دی خوبی بھروسے دے لائق بنن چ ساڈی بڑی مدد کر سکدی اے۔ اِک خاکسار مسیحی کدی وی ایہہ کوشش نئیں کردا کہ اوہ کسے گل بارے سب توں پہلاں دَس کے دُوجیاں نُوں متاثر کرے۔ (فِلپّیوں 2:3) نہ ای اوہ ایہہ دَس کے اپنے آپ نُوں اہم ظاہر کردا اے کہ اوہنوں راز دِیاں ایہو جہیاں گلاں پتہ نیں جنہاں بارے اوہ دُوجیاں نُوں نئیں دَس سکدا۔ خاکسار ہون دی وجہ توں اَسی ایہو جہے معاملیاں چ وی کوئی رائے نئیں دَواں گے جنہاں بارے بائبل، تنظیم دِیاں کتاباں یاں ویڈیوز وغیرہ چ کجھ نئیں دَسیا گیا۔
14. سمجھداری بھروسے دے لائق بنن چ ساڈی مدد کیویں کر سکدی اے؟
14 سمجھداری دی وجہ توں اِک مسیحی ہمیشاں یاد رکھدا اے کہ چپ رہن دا اِک وقت اے تے بولن دا اِک وقت اے۔ (واعظ 3:7) کجھ ثقافتاں چ اِک گل بڑی مشہور اے کہ بولنا چاندی وانگوں اے تے چپ رہنا سونے وانگوں اے۔ ایہدا مطلب ایہہ وے کہ کجھ موقعے ایہو جہے ہوندے نیں جنہاں تے چپ رہنا ای بہتر ہوندا اے۔ ایس بارے امثال 11:12 چ لکھی ایہہ گل بالکل صحی اے کہ سمجھدار آدمی چپ رہندا اے۔ ایہدے بارے اِک تجربہ کار بزرگ دی مثال تے غور کرو جیہڑا اکثر دُوجیاں کلیسیاواں دے مسئلیاں نُوں حل کرن لئی اوہناں دی مدد کردا اے۔ اوہدے بارے اِک بزرگ نے کہیا: ”اوہ بھرا ہمیشاں ایس گل دا خیال رکھدا اے کہ اوہ کسے وی دُوجی کلیسیا دِیاں راز دِیاں گلاں کسے نُوں نہ دَسے۔“ اوہدی سمجھداری دی وجہ توں اوہدی کلیسیا دے بزرگاں دی جماعت اوہدی بوہت عزت کردی اے۔ ایہناں بھراواں نُوں پکا یقین اے کہ اوہ بزرگ اوہناں دی کلیسیا دے اوہناں معاملیاں بارے کسے نُوں نئیں دَسے گا جیہڑے راز چ رکھنے چاہی دے نیں۔
15. اِک مثال دَوو جدے توں پتہ چلدا اے کہ ایمانداری دی وجہ توں دُوجیاں دا بھروسا جتیا جا سکدا اے؟
15 اِک بھروسےمند انسان بنن لئی ایمانداری دی خوبی پیدا کرنا بوہت ضروری اے۔ لوک اِک ایماندار بندے تے بھروسا کر دے نیں کیونکہ اوہناں نُوں پتہ ہوندا اے کہ اوہ ہمیشاں سچ بولے گا۔ (اِفسیوں 4:25؛ عبرانیوں 13:18) فرض کرو کہ تُسی اپنی تلیم دین مہارت چ بہتری لیانا چاہندے او۔ ایس لئی تُسی چاہندے او کہ کوئی تواڈی تقریر سُنے تے فیر دَسے کہ توانوں کتھے بہتری لیان دی ضرورت اے۔ ایہدے لئی تُسی کیہو جہے بندے نُوں چُنو گے؟ کیہہ تُسی کسے ایہو جہے بندے نُوں چُنو گے جیہڑا توانوں اوہ گلاں دَسے جیہڑیاں تُسی سُننا چاہندے او یاں کسے ایہو جہے نُوں جیہڑا توانوں سچ سچ دَسے۔ ظاہر اے تُسی سچ بولن والے بندے نُوں چُنو گے۔ بائبل چ دَسیا گیا اے: چھپی محبت توں کُھلی ملامت بہتر اے تے جیہڑے زخم دوست دے ہتھوں لگدے نیں اوہ وفا دے ہوندے نیں۔ (امثال 27:5، 6) شاید شروع شروع چ سانوں اوہ سچ سُننا چنگا نہ لگے جیہڑا ساڈے دوست نے ساڈے بارے دَسیا اے پر اَگے چل کے سانوں ایہدا بڑا فائدہ ہوئے گا۔
16. امثال 10:19 توں اپنے آپ تے قابو رکھن دی اہمیت بارے کیہہ پتہ چلدا اے؟
16 دُوجیاں دا بھروسا جتن لئی اپنے آپ تے قابو رکھنا بوہت ضروری ہوندا اے۔ ایس خوبی دی وجہ توں اَسی اوہدوں وی اپنی زبان نُوں قابو چ رکھاں گے جدوں کسے نُوں کوئی راز دی گل دَسن تے ساڈا دل کر رہیا ہوئے۔ (امثال 10:19 نُوں پڑھو۔) اپنے آپ تے قابو رکھنا اوس ویلے بڑا ضروری ہوندا اے جدوں اَسی انٹرنیٹ استمال کر رہے ہنے آں۔ جے اَسی دھیان نئیں رکھاں گے تے شاید اَسی اَنجانے چ لوکاں نُوں کوئی ایہو جہی گل دَس دَئیے جنہوں راز چ رکھیا جانا سی۔ اِک وار جدوں اَسی اِنٹرنیٹ تے کوئی گل پھیلا دینے آں تے فیر ایہہ ساڈے ہتھ چ نئیں رہندا کہ لوک اوس گل نُوں کیویں استمال کرن گے تے اوہدے توں کِنّاں نقصان ہوئے گا۔ اپنے آپ تے قابو رکھن دی خوبی دی وجہ توں اَسی اوس ویلے وی خاموش رہواں گے جدوں مخالف بڑی چالاکی نال ساڈے کولوں ایہو جہی معلومات حاصل کرن دی کوشش کردے نیں جدی وجہ توں ساڈے بھین بھراواں دی جان نُوں خطرہ ہو سکدا اے۔ اِنج شاید اوہدوں ہو سکدا اے جدوں اوہناں علاقیاں چ پولیس بھین بھراواں توں پچھگچھ کر دی اے جتھے ساڈے کم تے پابندی لگی ہوئی اے۔ ایہو جہے حالاتاں چ اَسی بائبل دے ایس اصول تے عمل کراں گے: میں اپنے موُنہہ نُوں لگام دے کے رکھاں گا۔ (زبور 39:1) سانوں اپنے گھر والیاں، دوستاں، اپنے ہمایماناں دے نال نال دُوجے لوکاں لئی وی بھروسے مند ہون دی ضرورت اے۔ ایہدے لئی اپنے آپ تے قابو رکھن دی خوبی دا ہونا بڑا ضروری اے۔
17. اَسی اپنی کلیسیا چ ایہو جیہا ماحول کیویں بنا سکنے آں جدے چ بھین بھرا اِک دُوجے تے بھروسا کر سکن؟
17 اَسی یہوواہ دے بڑے شکرگزار آں کہ اوہنے سانوں اِک ایہو جہے خاندان دا حصہ بنایا اے جدے چ پیار کرن والے تے بھروسے مند جی نیں۔ ایہہ ساڈے ساریاں دی ذمےداری اے کہ اَسی اپنے بھین بھراواں دا بھروسا جتئے۔ جدوں اَسی محبت، خاکساری، سمجھداری تے ایمانداری دی خوبی ظاہر کرنے آں تے اپنے آپ تے قابو رکھنے آں تے ایہدے توں کلیسیا چ ایہو جیہا ماحول بن جاندا اے جدے چ بھین بھرا اِک دُوجے تے بھروسا کر سکدے نیں۔ اپنے آپ نُوں بھروسے دے لائق ثابت کرنا اِک ایہو جیہا کم اے جیہڑا کدی نئیں رُکدا۔ دُعا اے کہ اَسی اپنے خدا یہوواہ دی مثال تے عمل کریئے تے ثابت کر دے رہیے کہ اَسی بھروسے دے لائق آں۔
گیت نمبر 34: وفا دی راہ تے چلو
^ جے اَسی چاہنے آں کہ دُوجے ساڈے تے بھروسا کرن تے پہلاں سانوں ایہہ ثابت کرنا ہوئے گا کہ اَسی بھروسے دے لائق آں۔ ایس مضمون چ اَسی سکھاں گے کہ اِک دُوجے تے بھروسا کرنا ایناں ضروری کیوں اے تے کیہڑیاں خوبیاں بھروسے دے لائق بنن چ ساڈی مدد کر سکدیاں نیں۔
^ جے سانوں پتہ چلدا اے کہ کلیسیا چ کسے نے بوہت وڈا گُناہ کیتا اے تے سانوں اوہنوں کہنا چاہی دا اے کہ اوہ ایہدے بارے کلیسیا دے بزرگاں نُوں دَسے۔ پر جے اوہ اِنج نئیں کردا تے سانوں یہوواہ خدا تے کلیسیا لئی فرمانبرداری ظاہر کرنی چاہی دی اے تے بزرگاں نُوں ایہدے بارے دَسنا چاہی دا اے۔
^ تصویر دی وضاحت: اِک بزرگ اِک معاملے نُوں حل کر رہیا اے پر اوہ گھر آ کے اوہدا ذکر اپنے گھر والیاں نال نئیں کر رہیا۔
