1. Savo tano o pouzdano manuš?

 O POUZDANO manuš ispunini pe obećanja hem vaćeri o ćaćipe (Ps. 15:4). Avera đanena so šaj te osloninen pe upro leste. Amen mangaja amare phralja hem phenja ađahar te mislinen hem amendar. So valjani te ćera te šaj te ovel len poverenje upro amende?

2. Sar šaj te mothova so hijam pouzdana manuša?

² Amen našti te ćhiva averen silaja te verujinen amenđe. O poverenje valjani te zaslužini pe. Phenela pe so o poverenje tano sar o pare – pharo tano te ovel tut, ama lokho šaj te našalji pe. Amen hijam sigurna so o Jehova zaslužini amaro poverenje. Ki Biblija pisini so „sebepi sa odova so ćerela šaj te ovel amen poverenje upro leste“ (Ps. 33:4). O Jehova očekujini amendar te oponašina le (Ef. 5:1). Akana ka dikha sar disave e Jehovase sluge oponašinđe le hem mothovđe so o manuša šaj te verujinen lenđe. Isto ađahar, ka dikha kola panđ osobine valjani te oven amen te šaj avera te verujinen amenđe.

3-4. Sar o prorok Danilo mothovđa soj tano pouzdano hem sostar valjani te razmislina?

³ O prorok Danilo hine pouzdano manuš. Iako hine legardo ko ropstvo ko Vavilon, uduri but sigate mothovđa  soj tano pouzdano manuš. O manuša pana pobuter verujinđe lese ked uzi e Jehovasi pomoć tumačinđa o suno kova dikhlja o vavilonsko kralj o Navuhodonosor. Jekh puti, o Danilo valjanđa te phenel odole kraljese so o Jehova osudinđa oleso ponašanje. Tegani e Danilose valjanđa bari hrabrost, odolese so o Navuhodonosor hine but nasilno hem na sviđinđa pe lese akava so šunđa (Dan. 2:12; 4:20-22, 25). Palo nekobor berš, o Danilo palem mothovđa soj tano pouzdano manuš ađahar so tačno tumačinđa i poruka koja pojavinđa pe ko zido ki vavilonsko palata (Dan. 5:5, 25-29). Kasnije, o Darije Međanin hem o poglavarija primetinđe so o Danilo tano but mudro. On haljilje so o Danilo „hine pouzdano hem našti hine ki olesi buti te arakhi pe nisavi mana niti diso nepošteno“ (Dan. 6:3, 4). Čak hem o vladarija kola na služinđe e Jehovase dikhlje soj tano o Danilo pouzdano manuš.

⁴ Ked razmislinaja ando Danilo, šaj pućaja amen: „Sar upro mande dikhena o manuša kola nane e Jehovase svedokija? Da li hijum penđardo sar odgovorno hem pouzdano manuš?“ Sose valjani te puća amen akava? Odolese so ako hijam pouzdana, ka ana slava e Jehovase.

5. Sose o Ananija hine penđardo sar pouzdano manuš?

⁵ Palo odova so o Nemija obnovinđa o zidija ko Jerusalim ko 455. berš, ov rodinđa disave odgovorna manušen kola  šaj te brininen pe andi diz. Maškaro sa odola manuša, ov birinđa e Ananija kova hine knez andi Tvrđava. Ki Biblija pisini so ov „hine but pouzdano manuš hem darandilo ando ćaćutno Devel pobuter ando avera“ (Nem. 7:2). O Ananija but manglja e Jehova hem darandilo olestar. Odolese, dinđa sa pestar svako zadatko te ćerel šukar. Ako hijam sar o Ananija hem amen ka ova pouzdana manuša.

6. Sose o Pavle hine le poverenje upro Tihik?

⁶ Razmislin ando Tihik, upro kova o Pavle hine le baro poverenje. Ked o Pavle hine ko phanlipe, ov osloninđa pe upro Tihik hem phenđa so verno služini e Jehovase (Ef. 6:21, 22). O Pavle dinđa le na samo te legari o lila e phralenđe ki skupština Efes hem Kolos, nego hem te ohrabrini len hem te utešini len. Avdije, hem amen isi amen phralja kola brininena pe ando amare duhovna potrebe. On tane sar o Tihik, odolese soj tane verna hem pouzdana (Kol. 4:7-9).

7. So šaj te sikljova ando starešine hem sluge pomoćnikija?

⁷ Amen ceninaja but e phralen kola služinena sar starešine hem sluge pomoćnikija, odolese soj tane on pouzdana manuša. Sar o Danilo, o Ananija hem o Tihik hem on dena sa pestar šukar te ćeren pe zadatkija. Ked avaja ko sastanko ko radno dive, amen na pućaja amen da li celo program ka ovel ićerdo. O starešine but ceninena ked o phralja hem o phenja ićerena pe zadatkija ko sastanko. Ked vićinaja e manušen kasa proučinaja te aven ko sastanak ko vikend, amen na daraja so o odgovorna phralja ka bistren te organizujinen neko te ićeri o javno predavanje. Isto ađahar, đanaja so uvek ka oven amen publikacije kola valjanena amenđe asi služba. Amen hijam but zahvalna e Jehovase so dinđa amen akale phralen kola but šukar brininena pe amendar. Ama, sar šaj te mothova so hijam pouzdana manuša?

8. Ko so valjani te pazina? (Poslovice 11:13)

⁸ Amen mangaja amare phralen hem phenjen. Odolese mangaja te đana sar tane. Ama, amen valjani te poštujina olengi privatnost. Disave hrišćanija ko prvo veko „mešinena pe [hine] ko tuđa buća hem vaćerena odova so na bi isminena“ (1. Tim. 5:13). Amen sigurno na mangaja te ova sar olende. Ama, zamislin so jekh phen phenđa tuće so isi la disavo zdravstveno problemi ili disavo aver problemi hem zamolinđa tut te na vaćere nikase odolestar. Tu valjani te ćere odova so zamolinđa tut. b (Čitin Poslovice 11:13.) Hajde akana te dikha nekobor situacije ko kola tano but važno te na vaćera averenđe o poverljiva informacije.

9. Sar svako andi porodica šaj te mothovi so šaj te verujini pe olese?

⁹ Ki porodica. Sare valjani te pazinen save buća andi pi porodica ka vaćeren averenđe, a save na. Na primer, zamislin so jekh romni isi la disavi navika koja olake romese tani hari smešno. Da li ov ka vaćeri averenđe odolestar hem ađahar te marel laće muj? Sigurno na! Ov mangela pe romnja hem niked ne bi ćerela diso sovaja bi povredini la (Ef. 5:33). O tinejdžerija  isi len potreba avera te poštujinen len. O roditeljija na valjani te bistren odova. Odolese on na valjani anglo avera te vaćeren olenge greške, sose ađahar šaj te ponizinen len (Kol. 3:21). O ćhave valjani te pazinen te na vaćeren averenđe diso so šaj te povredini nekas andi olengi porodica (Pon. zak. 5:16). Ked svako pazini te na vaćeri o privatna buća andi pi porodica, tegani sare ka oven popaše jekh jekheja.

10. So značini te ove šukar amal? (Poslovice 17:17)

¹⁰ Ov pouzdano amal. Podijekh puti, isi amen potreba te vaćera amare amalese sar osetinaja amen. Ama, nane uvek lokho te vaćera averenđe ando amare problemija. Odolese, ako kasnije šunaja so amaro amal vaćerđa averenđe odova so phenđam lese, odova šaj but te povredini amen. Ćaće hijam but bahtale ked isi amen „šukar amal“ kase šaj te vaćera amare problemija hem ked hijam sigurna so na ka vaćeri len averenđe. (Čitin Poslovice 17:17.)

11. (a) Sar o starešine hem olenge romnja mothovena soj tane pouzdana? (b) So sikljovaja ando starešina kotar slika ki 11. strana?

¹¹ Ki skupština. O starešine kola tane pouzdana tane „sar zaklon andi bavlal [hem] sar zaklon andi oluja“ (Is. 32:2). Amen šaj sa te vaćera e starešinenđe, odolese so đanaja so on na ka vaćeren odova averenđe. Isto ađahar, na mangaja te ćhiva len te vaćeren amenđe disave poverljiva informacije. Amen but ceninaja e starešinenge romnjen odolese so on na ćhivena pe romen te vaćeren lenđe disave poverljiva buća e phralendar hem e phenjendar. But tano šukar ked e starešinenge romnja na đanena o poverljiva buća ando phralja. Jekhe starešinasi romni phenđa: „Me hijum zahvalno so mo rom na vaćeri maje kase ki skupština valjani e starešinengi pomoć, a ked  đala ki pastirsko poseta čak ni na phenela maje koro kaste ka đal. Odolese so na đanava odola buća, me na valjani te brininav man ando problemija ko kola našti te utičinav hem šaj opušteno te vaćerav e phralencar. Sebepi odova, isi man poverenje upro mo rom so ako vaćerava lese me problemija, ov na ka vaćeri averenđe.“ Sare amen mangaja te ova penđarde sar pouzdana manuša. Hajde akana te dikha kola panđ osobine ka pomožinen amen te ova penđarde sar asavke manuša.

12. Sose šaj te phena so o mangipe šaj te pomožini amen avera te ovel len poverenje upro amende? Vaćer jekh primer.

¹² O mangipe šaj te pomožini amen avera te ovel len poverenje upro amende. O Isus phenđa so o duj najbare zapovestija tane: te manga e Jehova hem te manga amare pašutnen (Mat. 22:37-39). Amen mangaja e Jehova hem mangaja te ova pouzdana sar oleste. Mangaja hem amare phralen hem phenjen, odolese na vaćeraja averenđe o buća kola on phenđe amenđe ko poverenje. Niked na mangaja te phena diso so ka povredini ili ka lađaćeri amare phralen (Jov. 15:12).

13. Sar i poniznost pomožini amen te ova penđarde sar pouzdana manuša?

¹³ I poniznost ka pomožini amen te ova penđarde sar pouzdana manuša. Jekh hrišćanin kova tano ponizno na ka mangel uvek prvo te vaćeri averenđe diso so desinđa pe (Fil. 2:3). Ov na vazdela kokri pes ađahar so ćhivela averen te mislinen so ov đanela disave poverljiva buća kola na ismini te vaćeri. O ponizno manuš na ka širini po lično mišljenje ando buća kolendar na vaćeri pe ki Biblija hem ko publikacije.

14. Sar i razboritost pomožini amen te ova pouzdana?

¹⁴ I razboritost ka pomožini amenđe te haljova so „isi vreme ked trajini pe hem vreme ked vaćeri pe“ (Prop. 3:7). Jekh poslovica phenela so o ćutibe tano sar zlato. Odova značini so podijekh puti tano pošukar te ćutini pe nego te phenel pe diso. Odolese ko Poslovice 11:12 pisini: „A okova kova tano ćaće razborito ćutini.“ Razmislin ando jekh primer. Jekhe iskusno starešina avera skupštine često pućena aso savet ked valjani te rešinen disavo problemi. Olestar jekh aver starešina phenđa: „Ov uvek pazini te na vaćeri disave poverljiva informacije ando avera skupštine.“ Odolese soj tano mudro, o starešine andi olesi skupština but poštujinena le. On tane sigurna so ov na ka vaćeri disave poverljiva buća averenđe.

15. Vaćer jekh primer kova mothovi so avera ka ovel len poverenje upro tute ako hijan iskreno.

¹⁵ I iskrenost tani pana jekh važno osobina koja ka pomožini amen te ova penđarde sar pouzdana manuša. Amen verujinaja jekhe manušese kova tano iskreno, odolese so đanaja so uvek ka vaćeri o ćaćipe (Ef. 4:25; Jevr. 13:18). Na primer, zamislin so mangeja te ove pošukar govorniko. Tu šaj ka zamoline jekhe phrale te šunel to govor hem palo odova te del tut savet ko so šaj te popravine tut. Kastar bi rodeja savet? Da li nekastar kova ka vaćeri tuće okova so te kana mangena te šunen ili nekastar kova iskreno ka phenel tuće ko so valjani te ćere? O odgovor tano jasno. Ki Biblija pisini: „Pošukar tano o phravdo ukor nego o garavdo  mangipe. O udarcija ando amal mothovena olesi vernost“ (Posl. 27:5, 6). Iako ki početka šaj na ka ovel amenđe sa jekh ked ka dobina savet, ako šunaja le sigurno but ka pomožini amenđe.

16. Premalo Poslovice 10:19, kobor tano važno te mothova samokontrola?

¹⁶ I samokontrola valjani amenđe ako mangaja avera te ovel len poverenje upro amende. Akija osobina ka pomožini amen te na vaćera averenđe disave poverljiva buća kola đanaja. (Čitin Poslovice 10:19.) Ama, šaj te ovel amenđe pharo te mothova samokontrola ked hijam ko društvena mreže. Ako na pazinaja šaj nenamerno te ćhiva diso ko društvena mreže hem ađahar but manuša te dikhen odova. Na valjani te bistra so ako jekh puti ćhivaja diso ko društvena mreže, amen na đanaja so o manuša ka ćeren odoleja hem save problemija odova šaj te ćerel. Podijekh puti šaj te desini pe so o protivnikija ka roden te phena lenđe disave poverljiva buća ando phralja hem phenja, tegani valjani te mothova samokontrola. Ko phuvja kaj tano amaro delo ili disave ando amare aktivnostija zabranime, i policija šaj te rodel amendar disave poverljiva informacije ando phralja. Tegani valjani te da sa amendar te kontrolišina amari ćhib (Ps. 39:1). Amen valjani te ova pouzdana đi vaćeraja averencar, bizo obzir da li tane on amare amala ili tane deo andi amari porodica ili skupština. A te šaj te ova pouzdana, valjani te mothova samokontrola.

17. Sar šaj te ovel amen poverenje jekh upro jekheste?

¹⁷ Amen hijam but zahvalna e Jehovase so hijam deo andi organizacija kuri isi pouzdana manuša. Sare valjani te da sa amendar te šaj avera te ovel len poverenje upro amende. Ked svako amendar mothovi mangipe, poniznost, razboritost, iskrenost hem samokontrola, tegani ka ovel amen poverenje jekh upro jekheste. Odolese, valjani te da sa amendar te oponašina amare Dade, e Jehova, hem te ova manuša upro kaste šaj te verujini pe.