1. Wopo wɔkɔnge w’okokaso ndjewa onto w’ɛlama djɛ ndowilela oloko?

 ONTO w’ɛlama djɛ ndjilela oloko nanghaka la wolo djɛ nkotshɛ alaka wande la ntepelaka nsɔsɔlɔ. (Yee. 15:4) Anto ndjewaka ambɔ iwɔ nkoka ndawɛkɛ tende. Iso nkombolaka djɛ wananyɔ l’ankaana yɛso ndawoka nghɔsɔ lá nkambo djɛso. Kɛkɔnge k’okokaso nangha dj’iwɔ ntilela oloko?

2. Wopo wɔkɔnge w’okokaso nyɛnyɛ ente tolekɔ anto w’okokawɔ ndjilela oloko?

² Topakoke ntshinda anto ankina la wolo djɛ ntilela oloko. Iso ladjɛ nyɛnyɛ má nanghedji djɛso ente tolekɔ anto w’okokawɔ ndjilela oloko. Anto efula wangotepelake ambɔ, ndjilela onto oloko alekɔ etengo mfalanga. Ndjalaka wolo djɛ mba; koko wɔdju djɛ ntshutshɛ́. Lá nsɔsɔlɔ iso ndjilelaka Yehova oloko. Lako nkambo djekoka ntotshinda dj’iso ntshika ndowilela oloko ladjikɛnde ‘kenkfumɔ k’onanghakande ndjɛlamaka djɛ ndjilela oloko.’ (Yee. 33:4) Edjinge nde ntɔlɔmbaka dj’iso ndowokola. (Ɛfɛ. 5:1) Nyontshɔ tokoshishima ndjɔmbɔmba imɔtshi y’enkambi wɛ Yehova w’okolisá Papa kɛwɔ kel’olongo la wɛnyisá iyɔmɛlɛ ambɔ walekɔ anto w’okokawɔ ndjilela oloko. Tongoshishima lonkina wekeka atano wakoka ntokotshɛ́ dj’iso ndjala anto w’okokawɔ ndjilela oloko.

3-4. Wopo wɔkɔnge ɔprɔfɛtɛ Danyɛlɛ ndɛnyɛ djɛ nde alekɔ onto w’okokawɔ ndjilela oloko, ko nkambo djɛsɔ okokawɔ ntotshinda djɛ ndawopola weepó wɛkɔnge?

³ Ɔprɔfɛtɛ Danyɛlɛ atotshikelaka ndjɔmbɔmba kɛ wɔlɔ efula k’onto w’okokawɔ ndjilela oloko. Kaanga ndatɔlamá tá lomfumbe  lá Babilɔnɛ, nde ɛnyɛka ante anto nkoka ndawɛkɛ te nde la ndowilela oloko. Anto walekaka ndowilela oloko winá wɔ m’okotshɔ wɔ Yehova, ndasakisola dɔ djɛnisá Nkfumi Nebukadinɛza kelá Babilɔnɛ. Lá mbamba kɛmɔtshi, Danyɛlɛ atshɔka ntoshimela nkfumi ante Yehova apasasanga la nde, ɔsɔ atayala losango lɔ nkfumi okombolande ndjoka. Nkambo djɛsɔ alɔmbamaka ndjala l’oloko wolo, ladjikɛnde Nebukadinɛza ayalaki onto wɔ lopango efula! (Dan. 2:12; 4:20-22, 25) Ɛnɔnyi efula m’ɔkɔngɔ, Danyɛlɛ ɛnyɛka lonkina djɛ nde alekɔ onto w’okokawɔ ndjilela oloko winá wɔ ndasakisola lá lɛdji lɔ djɔ losango lɔmɔtshi lɔ wolo lofunamisá l’epele kɛ mvulu kɛ owandji welá Babilɔnɛ. (Dan. 5:5, 25-29) M’ɔkɔngɔ wɔ lasɔ lonkina, Dariyo dj’ose Mediya nya anto wande wɛnaka lonkina ambɔ Danyɛlɛ ‘ayalaki la nyuma ketshikitanyi.’ Iwɔ wewaki ambɔ Danyɛlɛ alekɔ ‘onto w’okokawɔ ndjilela oloko, wotimɛki akambo yimba la wɔ yotákoká ntana kaanga nkambo djɛ nyɛtshi le nde.’ (Dan. 6:3, 4) Ee, kaanga ewandji w’ampanghano wasipisoyɛka ambɔ, onkambi wɔ Yehova wɔsɔ ayalaki onto w’okokawɔ ndjilela oloko!

⁴ Winá w’ɔtɔnɔlaso lá ndjɔmbɔmba kɛ Danyɛlɛ, iso nkoka ndawopola ente: ‘Lokumu lɔkɔnge lolekɔ́ la lemi le anto wapalekɔ ewakɛ wɛ Yehova? Langewamake etengo onto wokótshɛka edjito wɛnde la w’okokawɔ ndjilela oloko?’ Lamo oyɛwɔ djonyi iso ndawopola weepó wɛsɔ? Ladjikɛnde iso mpɛyɛka Yehova lomo winá w’ewamaso etengo anto w’okokawɔ ndjilela oloko.

5. Kɛkɔnge kekotshisá Hananiya djɛ ndjala onto w’okokawɔ ndjilela oloko?

⁵ Lá ɔnɔnyi 455 N.D.D., m’ɔkɔngɔ wɔ Guvɛrnɛrɛ Nɛhɛmiya nkalɔ mpika mpele djɛ  Jerusalɛmɛ, nde ahonaka anto w’okokawɔ ndjilela oloko wakokisá nama ngando wɔlɔwɔlɔ. L’anteyi k’anto wa Nɛhɛmiya ndasɔnɛ wasɔ, ndeke oyalisa edjinge Hananiya, owandji wɔ Mvulu k’ekekete. Bible ntepelaka ante Hananiya ‘ayalaka onto w’iyakokaka ndjilela oloko la wokaki Ndjambe kɛ nsɔsɔlɔ wɔma ndeka anto ankina efula.’ (Nɛh. 7:2) Ngandji kɛ Hananiya ndokaka Yehova la wɔma woyalaki lande dj’ipa ndokiyanyɛ k’otshindaka djɛ nangha la wolo djɛ nkotshɛ edjito w’iyɔpɛyɛ. Wekeka wasɔ wangotokotshɛ edjinge iso djɛ ndjala anto w’okokawɔ ndjilela oloko l’olemo w’okambelaso Ndjambe.

6. Wopo wɔkɔnge Tishiko ndɛnyɛ ante nde alekɔ ilongo y’ɔpɔstɔlɔ Poolo ndakokaka ndjilela oloko?

⁶ Tokoshishima ndjɔmbɔmba kɛ Tishiko, ilongo yɛ ɔpɔstɔlɔ Poolo ndilelaka oloko efula. Winá wɔ Poolo ndayalaka lá lokando nde ilelaka Tishiko oloko, la owetaka ante ‘onkambi wɔ nkɔmano.’ (Ɛfɛ. 6:21, 22) Poolo ayawɛkɛki tende ape ngo djɛ ntotshikela wananyɔ welá Ɛfɛsɛ la welá Kɔlɔsɛ enkanda toko, koko lonkina djɛ nkembɛ la nsuka anto ankina. Tishiko ntovungolaka ampame yɛ nkɔmano y’ɛlamá ndawilela oloko yeyakiyanyɛká lá nkambo dj’ehomba wɛso welá nyuma lɔɔko kɛnɛ.​—Kɔl. 4:7-9.

7. Olakanyelo wɔkɔnge w’okokɛ mba me tokokolo la enkambi wekotshɛ́ wel’otshumano wɔko lá kɛnɛ kelendana la onto w’okokawɔ ndjilela oloko?

⁷ Lɔɔko kɛnɛ iso ndjalaka la djedjɛ efula lá wopo wɔ tokokolo la enkambi wekotshɛ́ oyɛwɔ anto w’okokaso ndjilela oloko. Ngo ngete Danyɛlɛ, Hananiya, la Tishiko, iwɔ ndɔsaka edjito wɛwɔ la ntshina. Ndjɔmbɔmba, winá w’ingelaso nsanghanyɛ yɛso yel’anteyi kɛ lobengo, iso ndashikikɛka djɛ ntenyi nkfumɔ djɛ nonghanyi kɛ losanghanyɛ djeshiyɛka nkapanyema. Edjinge tokokolo wangoyalake nsɔsɔlɔ la djedjɛ efula winá wɔ wananyɔ l’ankaana yewisa edjito lá losanghanyɛ oyalɔngɔsɔlawɔ la ɔpɛyɛwɔ asawo wawɔ! Ndjɔmbɔmba, topakaakandaka ndjeta ambeki waso wa Bible lá losanghanyɛ lɔ l’ekomo kɛ lobengo la wɔma w’ente onto wowisá odjito wɔ mpɛyɛ djamba djelá ntshandjawala avungɛka ndɔngɔsɔla. Lonkina tongoyalake l’eshikikelo ente enkanda w’oyɛso la wɛkɔ djonyi djɛ mposa t’olemo w’ipoposanyɛ welekɔ. Wananyɔ wa nkɔmano wasɔ ntoseeyɛka nsɔsɔlɔ ehomba wɛso welá nyuma lá lɛdji lɔ wɔlɔ edjinge iso nkawoyɛka Yehova lokasa lá nkambo djɛwɔ! Ko wopo wɔkɔnge w’okokaso nyɛnyɛ isɔmɛlɛ ente tolekɔ anto w’okokawɔ ndjilela oloko?

8. Wopo wɔkɔnge w’okokaso ndjala l’ikanyi yɛ wɔlɔ winá w’oyakiyanyɛso lá nkambo dj’anto ankina? (Woongo 11:13)

⁸ Iso nkɔpaka wananyɔ l’ankaana yɛso, la iso ndakiyanyɛka lá wɔlɔ wɔwɔ. Koko, iso ladjɛ nɛmɛyɛ akambo wawɔ wa toseke. Anto amɔtshi wal’otshumano w’Akristo wá l’ɛtɛndɔ kɛ ntondo ‘wayalaki anto wa ambɔɔ ante, la w’ingelaki lá akambo wa nkáná.’ (1 Ti. 5:13) Lá nsɔsɔlɔ, topakombola ndjala etengo iwɔ. Ko kɔsa djɛ onto ɔmɔtshi ambotoshimela nkambo djɛnde mɔtshi ko ambɔtɔlɔmba dj’ipa nshimela anto ankina. Ndjɔmbɔmba, nkaana kɛmɔtshi nkoka ntoshimela nkambo dj’olando wɔnde ɔmɔtshi w’otatande kana ohemba onkina w’opomana lande, ko ambɔtɔlɔmba dj’ipa nshimela anto ankina. Iso ladjɛ nɛmɛyɛ kɛnɛ kɛ ndɔmbɔtɔlɔmba. * (Wala Woongo 11:13.) Nyontshɔke winá wɔsɔ toshishimake akambo ankina walɔmbama mbomba iseke.

9. Wopo wɔkɔnge ase nkfumbo okokawɔ nyɛnyɛ ambɔ walekɔ anto w’okokawɔ ndjilela oloko?

⁹ Lá nkfumbo. Onto onkfumɔ welá nkfumbo, alekɔ l’odjito wɔ mbomba toseke telá nkfumbo. Ndjɔmbɔmba, Okristo ɔmɔtshi wɔ omoto nkoka  ndjala l’ekfumbo kɛmɔtshi k’ɔdjɛka womɛnde. Lasɔ, womɛnde nkoka ntosawola nkambo djɛsɔ nya anto ankina ko ndɔpɛyɛ nsɔnyi? Lako! Nde nkɔpaka wadjɛnde, edjinge nde apangɔkɔpa nangha kaanga nkambo djekoka ndokiyanyɛ. (Ɛfɛ. 5:33) Dangala nkombolaka ndananghela akambo la ndambo kɛ dilɛmɛlɔ. Alekɔ djonyi ambotshi mvungɔka nkambo djɛsɔ. Ambotshi wapakoke mpɛyɛka wana wawɔ nsɔnyi má nshimelaka anto ankina evunga wɛ wana wawɔ. (Kɔl. 3:21) Wana ladjɛ ndjeka djɛ mbombaka toseke, la ipa nshimelaka anto ankina akambo waheta lá nkfumbo kɛwɔ wakoka ndɔpɛyɛ ase nkfumbo ankina nsɔnyi. (Mvu. 5:16) Winá wɔ onto onkfumɔ welá nkfumbo onanghande la wolo djɛ mbomba toseke telá nkfumbo, wangoyala la djokanelo djɛ wɔlɔ efula lá nkfumbo kɛwɔ.

10. Kɛkɔnge kesakisola ndjala ilongo yɛ nsɔsɔlɔ? (Woongo 17:17)

¹⁰ L’anteyi kɛ tolongo. Lá winá ɛmɔtshi kana enkina, tongoyalake la djonyi djɛ nshimela ilongo yɛso yɛ ma ma wopo woyawokaso. Lá mbamba imɔtshi, nkambo djɛsɔ nkoka ndjala wolo. Apalekɔ nkambo djɛ wɔdju nshimela onto akambo walendana laso, lonkina tokoka ndokiyana m’ɔkɔngɔ ntsha tombewa ente ilongo yɛso ashimelaka anto ankina akambo w’isoshimela. L’onkoko onkina, iso ndjalaka la djedjɛ efula te onto w’owomba toseke! Ɔsɔ ndeke ‘ilongo yɛ nsɔsɔlɔ.’​—Wala Woongo 17:17.

11. a) Wopo wɔkɔnge tokokolo la wadji wawɔ okokawɔ nyɛnyɛ ambɔ walekɔ anto w’okokawɔ ndjilela oloko? b) Olakanyelo wɔkɔnge w’okokaso mba me ikokolo yekandola akambo wa toseke wal’otshumano ko masɔ apashimela nkfumbo kɛnde? (Lenda ntshango.)

¹¹ L’otshumano. Tokokolo tewaka mbomba toseke ‘walekɔ etengo edjena k’isamelo winá wɔ lompopo, edjena k’ewombelo’ le wananyɔ wawɔ. (Iza. 32:2) Iso ndjewaka ente iso nkoka ndjipolela ampame yɛsɔ eloko wɛso, l’eshikikelo ente kɛnɛ k’ashimelaso kengowombama ngo lewɔ. Topakoke ndatshinda dj’iwɔ ntoshimela akambo w’oyɛwɔ ladjɛ mbomba etengo toseke. Má djiko djɛ lasɔ, tolekɔ la djedjɛ efula te wadji wa tokokolo tɔso ladjikɛnde iwɔ wapahonaka djɛ wame wawɔ ndashimela toseke t’anto ankina. Lá nsɔsɔlɔ, alekɔ itondo  y’ɔtshɔkɔ le wadji wa tokokolo dj’ipa ndjewa toseke tɔ wananyɔ l’ankaana yɛwɔ. Wadjɛ ikokolo imɔtshi atepelaka ante: “Ndekɔ la djedjɛ efula lá wopo wɔ womɛmi ndopanshimelaka toseke tolendana l’ɛnkɔkɔ wowembolande kana tɔ waalekɔ́ la djonyi dj’okotshɔ welá nyuma ayale kaanga nshimela lemi wiina wawɔ. Lemi nsasangaka dj’ipa mbɛmba odjito w’akambo wamopalekɔ́ la lotshungɔ lɔ ndjewa la wa mapokoke nangha kaanga nkambo. M’ɔtɛ wɔ nkambo djɛsɔ, ndekɔ l’akoka wa nsawola l’onto onkfumɔ wel’otshumano ipa l’okakasano. Ndekɔ lonkina l’eshikikelo ente, winá w’oshimelami womɛmi nkambo djɛmi mɔtshi kana okakasano wɔmi ɔmɔtshi, nde apangotoshimela anto ankina.” Lá nsɔsɔlɔ, isankfumɔ nkombolaka ndjewama etengo anto w’okokawɔ ndjilela oloko. Ko wekeka wakɔnge wakoka ntokotshɛ́ djɛ nkotshɛ okoma wɔsɔ? Nyontshɔ tokoshishima wekeka atano l’anteyi kɛwɔ.

12. Lamo okokaso ntepela ente ngandji alekɔ djekeka djɛ djonyi djekoka ntokotshɛ́ djɛ ndjala anto w’okokawɔ ndjilela oloko? Pɛyɛ ndjɔmbɔmba.

¹² Ngandji k’okaso onto ndeke lototshindaka djɛ ndowilela oloko. Yeso atepelaka ante ɛlɛmbɛ epe wɛ Yehova weleka nkekete nde ndjoka Yehova ngandji la ndjoka winaso onto ngandji. (Mat. 22:37-39) Ngandji k’okaso Yehova ntotshindaka djɛ ndjokola ndjɔmbɔmba kɛnde kɛ djɔ kelendana la ndjilanela oloko. Ndjɔmbɔmba, ngandji k’okaso wananyɔ l’ankaana yɛso ntotshindaka djɛ mbomba toseke tɔwɔ. Topakoke lotshinda ndjisola akambo wawɔ wa toseke wakoka ndananghela nyɛtshi, ndapɛyɛ nsɔnyi, kana ndakiyanyɛ.​—Dj. 15:12.

13. Lá wopo wɔkɔnge okitshakitshɛ okokawɔ ntokotshɛ́ djɛ ndjala onto w’okokawɔ ndjilela oloko?

¹³ Okitshakitshɛ wongotokotshɛ dj’iso ndjala anto w’okokawɔ ndjilela oloko. Okristo wolekɔ́ l’okitshakitshɛ apananghe akambo djɛ nkamoyɛ anto ankina má ndjala onto wɔ ntondo wɔ ndawisola nkambo mɔtshi. (Flp. 2:3) Nde apahonaka ndapɛyɛ lomo amboleka má nshimela anto ankina djɛ nde ndjewaka iseke imɔtshi yɛ ndopalekɔ la lotshungɔ lɔ ntepela. Okitshakitshɛ wongotokotshɛ lonkina dj’ipa ntshanghanyɛ nsango y’akambo wapalekɔ má Bible kana m’enkanda wɛso wesakisola Bible.

14. Wopo wɔkɔnge ntɔnɔ otokotshɛwɔ djɛ ndjala anto w’okokawɔ ndjilela oloko?

¹⁴ Ntɔnɔ ngokotshɛ Okristo djɛ ntshikitanyɛ ‘winá wɔ ntshikala vu la winá wɔ ntepela.’ (Los. 3:7) Djongo mɔtshi ntepelaka ante “ntepela alekɔ mfɛsa, koko mvumba vu alekɔ paonyi.” Kɛsɔ nkɔpaka nsakisola ante, lá winá ɛmɔtshi ntshikala vu ndekaka ntepela wɔlɔ. Djɛkondeke, Woongo 11:12 otepelande ante: ‘Onto wolekɔ́ la ntɔnɔ djɛ nsɔsɔlɔ ntshikalaka vu.’ Tokoshishima ndjɔmbɔmba kɛmɔtshi. Mbala efula wangetake ikokolo imɔtshi yelekɔ́ la balo djɛ ntokotshɛ́ ntshumano nkina djelekɔ́ l’ekakasano. Lá kɛnɛ kelendana l’ikokolo yɛsɔ, ikokolo imɔtshi atepalaka ante: “Nde mbadjɛka winá enkfumɔ dj’ipa ndjisola toseke tolendana la ntshumano nkina.” Ntɔnɔ mbokotshɛ́ ikokolo yɛsɔ djɛ wananyɔ wakamba esanga lande l’iloyi yɛ tokokolo ndowilela oloko. Walekɔ l’eshikikelo ambɔ, nde apangotisola toseke tɔwɔ le anto ankina.

15. Pɛyɛ ndjɔmbɔmba kɛnyɛ wopo wɔ ndjala la nkɔmano okokawɔ ntokotshɛ́ djɛ ndjala anto w’okokawɔ ndjilela oloko.

¹⁵ Nkɔmano dekɔ djekeka nkina djetokotshɛ́ djɛ ndjala anto w’okokawɔ ndjilela oloko. Iso ndjilelaka onto wolekɔ́ la nkɔmano oloko ladjikɛnde angotepelake nsɔsɔlɔ winá enkfumɔ. (Ɛfɛ. 4:25; Heb. 13:18) Ndjɔmbɔmba, k’ɔsa djɛ ɔkɔpa mfudjɛ akoka wako wa ndakanyɛ, ko ɔmbɔlɔmba onto ɔmɔtshi djɛ nkekameyɛ winá w’ɔpɛyɛ djamba ko masɔ nde ndɔkɔpɛyɛ alako w’oyɛ la djonyi djɛ ndawɔngɛ. Onto wɔkɔna w’okokɛ ndjilela oloko ente angɔkɔpɛyɛ alako wa nsɔsɔlɔ? Onto wokoshimela ngo wayi wɔkɔpɛ  ndjoka ndo koko onto wokoshimela nsɔsɔlɔ? Nsakiso k’okama papoo. Bible ntepelaka ante: ‘Lopango lɔ lá ntshandjawala ndeka ngandji kɛ wisisá wɔlɔ. Ampota yekohotadjisá ilongo ilekɔ nkɔmano.’ (Woo. 27:5, 6) Kaanga okokaso ndjala l’okakasano wɔ ndjawola nkambo djɛsɔ má bango, alako w’ime ilongo yelekɔ́ la nkɔmano ntoyakalaka wapɔ efula.

16. Wopo wɔkɔnge Woongo 10:19 ɛnyɛnde djonyi djɛ ndapekala?

¹⁶ Ndapekala alekɔ djonyi ntsha iso nkɔpaka dj’anto ankina ntilela oloko. Djekeka djɛsɔ ntokotshɛka djɛ mvumba vu winá w’ohembamaso djɛ ndjisola iseke imɔtshi yɛ yatoshimela. (Wala Woongo 10:19.) Nkoka ndjala okakasano ndjala la ndapekala winá w’okambaso la réseau sociaux. Ntsha topawadjisa, tokoka ndjisola akambo amɔtshi wa toseke le anto efula ipa la ndjewa. Winá w’ilaso nkete lá ɛntɛrnɛtɛ topalekɔ lonkina l’akoka wa ndjewa wopo w’iyongokamba la nkete djɛkɔ kana mbalaka kɛ nkambo djɛsɔ okokawɔ mposɛ. Ndapekala ntokotshɛka lonkina djɛ ntshikala vu winá w’antonyi ototshindawɔ djɛ ndjisola akambo wakoka ndjila wananyɔ l’ankaana yɛso lá mbalaka. Nkambo djɛsɔ nkoka nanghema winá wɔ ampoloshi yel’owila wɔ yomboshimba olemo wɔso kana wɔ yombilá ɛlɛmbɛ ɛmɔtshi lá nkambo dj’olemo wɔso otopolawɔ weepó. Lá mbamba kɛ nghɔsɔ kana inkina, iso nkoka nkamba la ikfɔ yetepela ante ‘lemi langodjipa ɔlɔmɔ wɔmi l’ekete k’odjipakawɔ mvɔ ɔlɔmɔ.’ (Yee. 39:1) Iso ladjɛ ndjala onto wɔ anto ankfumɔ ayale ase nkfumbo kɛso, tolongo tɔso kana wananyɔ l’ankaana yɛso okokawɔ ndjilela oloko. Edjinge djɛ ndjala onto w’okokawɔ ndjilela oloko, iso ladjɛ ndjewaka ndapekala.

17. Wopo wɔkɔnge w’okokaso nkotshɛ́ djɛ ikanyi yɛ ndjilelana oloko ndjala l’otshumano wɔso?

¹⁷ Tolekɔ nsɔsɔlɔ la djedjɛ efula te Yehova lá wopo wɔ ndatosepe lá nkfumbo kel’andja w’otondo k’anto w’okanaka ngandji la w’okokawɔ ndjilela oloko! Isankfumɔ tolekɔ l’odjito wɔ nangha la wolo djɛ wananyɔ l’ankaana yɛso ntilela oloko. Ntsha onto l’onto wɔ l’anteyi kɛso ndjila welo djɛ ndjala la ngandji, l’okitshakitshɛ, la ntɔnɔ, la nkɔmano, la ndjewa ndapekala, tongokotshɛ́ djɛ ikanyi yɛ ndjilelana oloko ndjala l’otshumano wɔso. Iso ladjɛ nkindjɛ ndjila welo djɛ nyɛnyɛ ente tolekɔ onto w’anto ankina okokawɔ ndjilela oloko. Djɛkondeke nyontshɔ tokole Ndjambe kɛso Yehova, la tokindjɛ nyɛnyɛ ente tolekɔ anto w’okokawɔ ndjilela oloko.