1. Kasi tingamumanya wuli munthu uyo tingamugomezga?

 MUNTHU wakugomezgeka wakuyezgayezga kufiska ivyo walayizga kweniso kuyowoya unenesko. (Sal. 15:4) Ŵanthu ŵakumanya kuti ŵangamugomezga. Ntheura nase ŵabali na ŵadumbu ŵakwenera kutigomezga. Kasi tingachita wuli kuti ŵatigomezgenge?

2. Kasi tingalongora wuli kuti ndise ŵakugomezgeka?

² Tingaŵachichizga yayi ŵanji kuti ŵatigomezgenge. Ivyo tikuchita ndivyo vikwenera kulongora kuti ndise ŵakugomezgeka. Kugomezgeka kuli nga ni ndalama. Ntchakusuzga kuzisanga ndalama, kweni ntchipusu chomene kuluza zose. Yehova wali kutilongora kale kuti ngwakugomezgeka. Nyengo zose tikwenera kumugomezga chifukwa vyose ‘ivyo wakuchita ni vyakugomezgeka.’ (Sal. 33:4) Ndipo wakukhazga kuti nase timuyezge. (Efe. 5:1) Sono tiyeni tiwone viyelezgero vya ŵateŵeti ŵanyake ŵa Yehova, awo ŵakayezga Adada ŵawo ŵakuchanya na kulongora kuti mbakugomezgeka. Tiwonengeso mikhaliro yinkhondi iyo yingatovwira kuti ŵanji ŵatigomezgenge.

3-4. Kasi ntchimi Daniyeli yikalongora wuli kuti njakugomezgeka, ndipo chiyelezgero chake chikwenera kutichiska kuti tijifumbenge mafumbo wuli?

³ Ntchimi Daniyeli ntchiyelezgero chiwemi chomene pa nkhani ya kugomezgeka. Nangauli nayo wakatolekera ku wuzga ku Babuloni, kweni mwaluŵiro wakalongora kuti ngwakugomezgeka. Ŵanthu ŵakamugomezga chomene, apo na wovwiri wa Yehova wakapatawura maloto gha themba la Babuloni Nebukadinezara. Panyengo yinyake, Daniyeli wakakhumbikwiranga kuti wakaphalire themba uthenga uwo lingatemwa yayi kuwupulika. Uthenga  uwu ukaŵa wakuti Yehova wakukondwa nalo yayi themba. Daniyeli wakakhumbikwiranga chikanga kuti wakaliphalire themba uthenga uwu, chifukwa Nebukadinezara wakaŵa mukali chomene. (Dan. 2:12; 4:20-22, 25) Vyaka vinandi vyati vyajumphapo, Daniyeli wakalongoraso kuti ngwakugomezgeka apo wakapatawulira ndendende uthenga wakuzizwiska uwo ukawonekera pa chiliŵa cha nyumba ya themba ku Babuloni. (Dan. 5:5, 25-29) Ndipo pamanyuma Dariyasi Mumedi na nduna zake ŵakawonaso kuti Daniyeli wakaŵa na “mzimu wapadera.” Ŵakazomerezga kuti Daniyeli wakaŵa “wakugomezgeka ndipo wakazerezganga ntchito yayi nesi kuchita upusikizgi.” (Dan. 6:3, 4) Nadi, nanga ni mafumu agho ghakasopanga Yehova yayi, naghoso ghakamanyanga kuti muteŵeti wa Yehova uyu wakaŵa wakugomezgeka.

⁴ Apo tikughanaghanirapo chiyelezgero cha Daniyeli, tingachita makora kujifumba kuti: ‘Kasi nkhumanyikwa na mbiri wuli ku ŵanthu awo Mbakaboni yayi? Kasi nkhumanyikwa kuti nkhuchita milimo iyo napika kweniso ndine wakugomezgeka?’ Chifukwa wuli ntchakuzirwa kujifumba mafumbo agha? Ntchakuzirwa chifukwa chakuti para tili ŵakugomezgeka, Yehova ndiyo wakulumbika.

5. Kasi ntchivichi chikawovwira Hananiya kuŵa wakugomezgeka?

⁵ Mu 455 B.C.E., Kazembe Nehemiya wati wazengaso viliŵa vya Yerusalemu wakasora ŵanalume ŵakugomezgeka awo ŵangapwelelera msumba. Pa ŵanalume awo Nehemiya wakasora, pakaŵa Hananiya mulongozgi wa nyumba Yakukhora. Baibolo likulongosora kuti Hananiya wakaŵa munthu “wakugomezgeka na  wakopa Chiuta waunenesko kuluska ŵanandi.” (Neh. 7:2) Chifukwa chakuti wakatemwanga chomene Yehova kweniso kopa kumukwiyiska, Hananiya wakaŵikangapo mtima chomene pa mulimo uliwose uwo wakapikanga. Mikhaliro iyi nase yingatovwira kuti tichitenge uteŵeti withu mwakugomezgeka kwa Chiuta.

6. Kasi Tikiko wakalongora wuli kuti wakaŵa mubwezi wakugomezgeka kwa mpositole Paulosi?

⁶ Wonaniso umo wakachitira Tikiko, mubali uyo mpositole Paulosi wakamugomezganga chomene. Apo Paulosi wakaŵa pa jele la panyumba, wakagomezganga Tikiko, ndipo wakayowoya kuti ni “muteŵeti wakugomezgeka.” (Efe. 6:21, 22) Paulosi wakamugomezganga pakupeleka makalata pera yayi ku ŵabali na ŵadumbu ku Efeso na ku Kolose, kweniso pakuŵapembuzga na kuŵakhozga. Tikiko wakutikumbuska za ŵanalume ŵakugomezgeka awo ŵakupwelelera ivyo tikukhumbikwira mwauzimu mazuŵa ghano.—Kol. 4:7-9.

7. Kasi mungasambirako vichi ku ŵalara na ŵateŵeti ŵakovwira ŵa mu mpingo winu pa nkhani ya kugomezgeka?

⁷ Mazuŵa ghano tikuwonga chomene kuti tili na ŵalara na ŵateŵeti ŵakovwira ŵakugomezgeka. Nga ni Daniyeli, Hananiya, na Tikiko, milimo yawo ŵakuyiwona mwakupepuka yayi. Mwachiyelezgero, para tikuluta ku maungano ghamukati mwa sabata, tikumanya kuti nkhani zose zikuŵa kuti zanozgeka kale kuti awo ŵadumbenge ŵalipo. Ŵalara ŵakuwonga chomene para ŵabali na ŵadumbu awo ŵapika nkhani pa maungano agha ŵakunozgekera makora na kudumba mwaluso. Kweniso para tachema awo tikusambira nawo Baibolo kuti ŵize ku maungano ghithu gha kuumaliro kwa sabata, tikuŵa na chigomezgo chose kuti walipo uyo wamudumba nkhani yachisanisani. Para tinjirenge mu upharazgi, tikugomezgaso kuti mabuku agho tamupharazgira ghalipo. Ŵabali ŵakugomezgeka aŵa, ŵakutipwelelera makora chomene, ndipo tikuwonga chomene Yehova pakutipa ŵabali aŵa. Ipo kasi nase tingalongora wuli kuti tili ŵakugomezgeka?

8. Kasi tingachita wuli vinthu mwamahara para ŵanyake ŵatiphalira vinthu vyachisisi vyakukhwaskana na iwo? (Zintharika 11:13)

⁸ Tikuŵatemwa chomene ŵabali na ŵadumbu, ndipo tikukhumbanga chomene kumanya umo vinthu viliri pa umoyo wawo. Ndipouli, tikwenera kuchindika vinthu vyachisisi vyakukhwaskana na iwo. Ŵanyake mu mpingo wa Ŵakhristu ŵakwambilira ŵakaŵa “ŵakusesa na kunjilirapo nkhani zaŵene, ŵakuyowoya vinthu ivyo ŵakwenera kuyowoya yayi.” (1 Tim. 5:13) Tikwenera kuŵa nga ndiwo yayi. Kweni wuli usange munyake watiphalira nkhani yakukhwaskana na iyo ndipo wati tingaphaliranga munthu munyake yayi? Kasi tikwenera kuchita wuli? Tiyelezgere kuti mudumbu watiphalira za suzgo linyake ilo wali nalo, kwali mbulwari panji suzgo linyake ilo wakumana nalo, ndipo wati tingaphaliranga munthu munyake yayi. Tikwenera kuchindika ivyo watiphalira. b (Ŵazgani Zintharika 11:13.) Sono tiyeni tidumbiskane vigaŵa vinyake ivyo ntchakuzirwa chomene kusunga chisisi.

9. Kasi ŵanthu mu mbumba ŵangalongora wuli kuti mbakugomezgeka?

⁹ Mu mbumba. Munthu waliyose mu mbumba wali na udindo wakusunga nkhani zinyake za mu mbumba kuŵa zachisisi. Mwachiyelezgero, muwoli Wachikhristu wangaŵa na chizgoŵi icho mfumu wake wakukondwa nacho yayi. Kasi mfumu wake wangaphalira ŵanji vyakukhwaskana na muwoli wake na kumulengeska?  Wangachita nthena yayi. Ndipo wangachita yayi chinthu icho chingalengeska muwoli wake. (Efe. 5:33) Ŵawukirano nawo ŵakukhumba kuti tichitenge nawo vinthu mwantchindi. Ŵapapi ŵangachita makora kumanya fundo iyi. Ŵakwenera yayi kuŵalengeska ŵana ŵawo mwakuphalira ŵanji ivyo ŵakubudiska. (Kol. 3:21) Ŵana nawo ŵakwenera kusambira kuchita vinthu mwamahara, mwakuleka kuphalira ŵanji nkhani izo zingalengeska ŵanji mu mbumba yakwawo. (Doto. 5:16) Para waliyose mu mbumba wakusunga chisisi, ŵanthu mu mbumba ŵakutemwana chomene.

10. Kasi mubwezi wanadi wakuchita wuli? (Zintharika 17:17)

¹⁰ Paubwezi withu. Kanandi vikuchitika kuti nyengo zinyake tikuwona kuti ntchiwemi kuti tiphalireko mubwezi withu umo tikujipulikira. Kweni nyengo zinyake chikuŵa chakusuzga kuchita nthena, ndipo vingatipweteka chomene para tingamanya kuti mubwezi withu wakaphaliraso munthu munyake ivyo tikamuphalira. Ndipouli, tikukondwa chomene para tili na mubwezi uyo wangatisungira chisisi pa ivyo tamuphalira. Wakulongora kuti ni “mubwezi wanadi.”—Ŵazgani Zintharika 17:17.

11. (a) Kasi ŵalara na ŵawoli ŵawo ŵakulongora wuli kuti mbakugomezgeka? (b) Kasi tingasambirako vichi kwa mulara uyo wapweleleranga nkhani yachisisi ya mu mpingo ndipo pamanyuma nkhani iyo wandaphalire mbumba yake? (Wonani chithuzi.)

¹¹ Mu mpingo. Ŵalara awo ŵakusunga chisisi, ŵali nga ni “malo ghakubisamamo mphepo” gha ŵabali na ŵadumbu ŵawo. (Yes. 32:2) Tingaŵaphalira ŵalara chilichose chakukhwaskana na ise chifukwa tikumanya kuti ŵatisungirenge chisisi. Ndipo tikuŵachichizga yayi kuti ŵatiphalire vinthu ivyo ni vyachisisi. Kweniso tikuŵachindika ŵawoli ŵa ŵabali ŵalara chifukwa ŵakuŵanyengelera panji kuŵachichizga yayi ŵafumu ŵawo kuti ŵaŵaphalire nkhani zachisisi za kukhwaskana na ŵanji. Nadi, ntchamahara chomene kuti muwoli wa mubali mulara wakuphalirika yayi nkhani zachisisi zakukhwaskana na ŵabali na ŵadumbu. Muwoli wa mulara munyake wakati: “Nkhuwonga chomene kuti mfumu wane wakuniphalira yayi nkhani  zachisisi zakukhwaskana na ŵabali na ŵadumbu awo ŵakuŵayendera pa maulendo ghauliska nanga ni mazina ghawo. Nakuti nkhuwonga chomene kuleka kuzimanya nkhani izi izo palije chakuti ningachitapo nanga ningazimanya. Pa chifukwa ichi, nkhuŵa wakufwatuka kuyowoyeskana na waliyose. Ndipo nkhuŵanga na chigomezgo chose kuti para mfumu wane nkhumuphalira vya ku mtima kwane, nkhumanyaso kuti wanisungirenge chisisi.” Mbunenesko kuti tose tikukhumba kuti ŵanyithu ŵatigomezgenge. Kweni kasi ni mikhaliro wuli iyo yingatovwira kuti ŵanji ŵatigomezgenge? Tiyeni tidumbiskane mikhaliro yinkhondi.

12. Chifukwa wuli tingati chitemwa ndicho chingatovwira chomene kuti tiŵe ŵakugomezgeka? Yowoyani chiyelezgero.

¹² Chitemwa ndicho chingatovwira chomene kuti tiŵe ŵakugomezgeka. Yesu wakati malango ghaŵiri ghakuru chomene, nkhutemwa Yehova na ŵazengezgani ŵithu. (Mat. 22:37-39) Chitemwa chithu pa Yehova chikutituma kuti timuyezge pa nkhani ya kugomezgeka. Mwachiyelezgero, chitemwa chithu pa ŵabali na ŵadumbu, chikutituma kuti tiŵasungirenge chisisi pa nkhani zawo zachisisi. Tikwenera yayi kuyowoya nkhani izo zingaŵapwetekeska, kuŵalengeska, panji kuŵaŵinya.—Yoh. 15:12.

13. Kasi kujiyuyura kungatovwira wuli kuti tiŵe ŵakugomezgeka?

¹³ Kujiyuyura kungatovwira kuti tiŵe ŵakugomezgeka. Mkhristu uyo ngwakujiyuyura, wakuyezga yayi kuti wakondweske waka ŵanji pakuŵa munthu wakwamba kuphalira ŵanji vya nkhani yinyake. (Fil. 2:3) Wakuyezga yayi kupangiska ŵanji kuti ŵawonenge kuti iyo wakumanya nkhani zachisisi izo ni zakuti wangaziyowoya yayi. Kujiyuyura kutovwirengeso kuti tileke kuthandazga maghanoghano ghithu pa nkhani izo Baibolo lindayowoyepo panji mabuku ghithu ghakulongosora Baibolo ghandayowoyepo.

14. Kasi umanyi ungatovwira wuli kuti ŵanji ŵatigomezgenge?

¹⁴ Umanyi ungawovwira Mkhristu kumanya “nyengo ya kukhala chete na nyengo ya kuyowoya.” (Muph. 3:7) Ku vigaŵa vinyake kuli mazgu ghakuti “kuyowoya kuli nga ni siliva ndipo kukhala chete kuli nga golide.” Tingayowoyaso kuti pali nyengo iyo ntchiwemi kukhala waka chete kuluska kuyowoya. Lekani lemba la Zintharika 11:12 likutiphalira kuti: “Uyo wali na umanyi wenecho wakukhala chete.” Wonani chiyelezgero ichi. Mulara munyake kanandi wakupempheka kuti wakawovwire mipingo yinyake iyo yili na masuzgo ghanyake. Wonani ivyo mulara munyake wakayowoya vya mulara uyu. Iyo wakati: “Nyengo zose mulara uyu wakuŵa maso kuti waleke kuvumbura nkhani zachisisi zakukhwaskana na mipingo yinyake.” Umanyi ndiwo wawovwira mulara uyu kuti ŵalara ŵanyake awo wakuteŵetera nawo mu wupu wa ŵalara ŵamuchindikenge. Ŵakuŵa na chigomezgo chose kuti wangavumbura yayi nkhani zawo zachisisi ku ŵanthu ŵanyake.

15. Pelekani chiyelezgero icho chikulongora chifukwa icho ŵanji ŵatigomezgerenge usange tikuyowoya unenesko.

¹⁵ Kuyowoya unenesko ntchinthu chinyake icho chingatovwira kuti ŵanji ŵatigomezgenge. Tikugomezga munthu uyo ni munenesko chifukwa tikumanya kuti nyengo zose wakuyowoya unenesko. (Efe. 4:25; Heb. 13:18) Tiyelezgere kuti mukukhumba kusazgirako luso lwinu lwakusambizga. Ntheura mukupempha munthu munyake kuti wategherezge nkhani yinu na kumupani masachizgo apo mungakhumbikwira kuti muchite makora. Kasi mungapempha njani kuti wamuphalirani uwo mbunenesko? Kasi mungapempha uyo wangamuphalirani ivyo mungatemwa kupulika nakale, panji uyo wangamuphalirani unenesko? Apa zgoro ndakumanyikwirathu.  Baibolo likuti: “Ntchenyo yapakweru njiwemi kuluska chitemwa chakubisika. Vilonda vyakufuma kwa mubwezi ni vyakugomezgeka.” (Zinth. 27:5, 6) Nangauli pakwamba chingaŵa chakusuzga kupulika, kweni ulongozgi wa mubwezi uyo watiphalira unenesko ndiwo ungatovwira.

16. Kasi lemba la Zintharika 10:19 likulongora wuli zakukhumbikwa kwa kujikora?

¹⁶ Kujikora ni mukhaliro unyake uwo ngwakuzirwa chomene uwo ungatovwira kuti ŵanji ŵatigomezgenge. Mukhaliro uwu ukutovwira kukhala chete para tayezgeka kuti tiyowoye nkhani yinyake iyo njachisisi. (Ŵazgani Zintharika 10:19.) Chingaŵa chakusuzga chomene kujikora para tikugwiliskira ntchito malo ghakuchezgerapo gha pa Intaneti. Para tingaŵa maso yayi, tingavumbura nkhani yachisisi ku ŵanthu ŵanandi. Ndipo para tathandazga waka nkhani yachisisi pa malo ghakuchezgerapo gha pa Intaneti, vingachitikaso yayi kuti titondeske ŵanji kuthandazga vya nkhani iyo panji kutondeska masuzgo agho ghangaŵapo. Kujikora kukovwiraso kuti tikhale chete para ŵakususka ŵakutinyengelera kuti tivumbure vinthu vyachisisi ivyo vingaŵika ŵabali na ŵadumbu ŵithu pangozi. Ivi vingachitika usange tikukhala mu charu icho mulimo withu ngwakukanizgika, ndipo tingasangana na ŵapolisi awo ŵangatifumba mafumbo. Pa nkhani za nga izi na zinyake, tingalondezga waka ulongozgi wakuti “nisungenge mulomo wane, [ndipo] niwukakenge.” (Sal. 39:1) Ntheura kwali tikuchita vinthu na ŵamumbumba yithu, ŵabwezi ŵithu, ŵabali na ŵadumbu ŵithu, panji na waliyose waka, tikwenera kuŵa ŵakugomezgeka. Ndipo kuti tiŵe ŵakugomezgeka, tikwenera kuŵa ŵakujikora.

17. Kasi tingakhuŵilizga wuli mzimu wakugomezgana mu mpingo withu?

¹⁷ Tikuwonga chomene kuti Yehova wali kutiguzira pakati pa ŵabali na ŵadumbu awo ŵakutitemwa chomene kweniso mbakugomezgeka. Tose ni udindo withu kuchitapo kanthu kuti ŵabali na ŵadumbu ŵatigomezgenge. Para tose tikugwilirapo ntchito kuti tilongorenge chitemwa, kujiyuyura, umanyi, kuyowoya unenesko, kweniso kujikora, tikukhuŵirizga kuti mu mpingo withu tigomezganenge yumoza na munyake. Tikwenera kulutilira kuyezgayezga kuti tilongore kuti ndise munthu uyo ŵanji ŵangamugomezga. Tiyeni tiyezge Chiuta withu, Yehova, na kulongora kuti ndise ŵakugomezgeka.