1. მუჭო მეფხვადუთ, მის ოკო ვენდათ?

 ᲡᲐᲜᲓᲝ პიროვნება ოცად, სიტყვა ვა გოტახას დო ირო სიმართლე იჩუას (ფსალმ. 15:4). თეცალ პიროვნებაშ ნდობა შხვეფს ხოლო უღნა. ჩქი ხოლო მოკონა, და დო ჯიმალეფ თაშ მიჩინენდან. მუ მიმეხვარებნა, დევმსახურათ თინეფიშ ნდობა?

2. მუჭო ვოძირათ, ნამდა ვორეთ სანდოეფ?

² შხვეფშე ვამმათხუენა, მენდან, თეს დამსახურება ოკო. შილებე ფთქუათ, ნამდა ნდობა ფარას ქოგჷ. თიშ შიბა ძნელ რე, მარა დინაფა — ადვილ. მუშო ოკო რაგად, იეჰოვაქ დემსახურ ჩქინ ნდობა დო შემლებნა მარადიულო ვენდათ თის, მუშენდა „თიშ არძა საქმე საიმენდო რე“ (ფსალმ. 33:4). თინა ჩქინდე ხოლო ელჷ, ნამდა მივაჸუნუთ თიშ მაგალითის (ეფეს. 5:1). მორთ ქობძირათ, მუჭო მეჸუნდეს ჯვეშ დროს ღორონთიშ ართგურ მსახურეფ თიშ მაგალითის დო მუჭო ოძირანდეს, ნამდა სანდოეფ რდეს. თეს გეძინელ, გუვარჩიენთ ხუთ თვისებას, ნამუთ მიმეხვარებნა თეშ კეთებას.

3, 4. მუჭო დამტკიც წინასწარმეტყველ დანიელქ, ნამდა სანდო რდჷ დო მუ კითხვეფშე ოკო დუმაფიქრან თიშ მაგალითიქ?

³ წინასწარმეტყველ დანიელ სანდოობაშ ჯგირ მაგალითის მარზენა. მართალ რე, თინა ბაბილონშა ტყვეთ იჸუნეს, მარა ხეთე ქიშუ სანდო კოჩიშ სახელ. თიქ ხალხიშ თოლს ხოლო უმოს მეტ ნდობა დემსახურ, მუჟამსით იეჰოვაშ მოხვარათ გენწყჷ ბაბილონიშ მეფეშ, ნაბუქოდონოსორიშ სიზმარეფ. ართშა თის მეფეშა ორაგადე აფუდ, ნამდა იეჰოვა უკმაყოფილო რდჷ თით. თენა მეფეშო გემუან მარჩქილაფარ ვეჸიდ. თე სასტიკ მართველშა თეცალ მუდგარენიშ რაგადის, მუშო ოკო რაგად, გაბედულება  ოკოდ (დან. 2:12; 4:20—22, 25). წანეფიშ უკულ, დანიელქ ხოლო ართშა ქაძირუ, ნამდა თინა სანდო პიროვნება რდჷ, მუჟამსით ზუსტას გენწყჷ თი ნაჭარა, ნამდგაქ ბაბილონიშ სასახლეშ კიდალას მიკორჩქინდჷ (დან. 5:5, 25—29). უმოს გვიანო, დარიოს დო თიშ მსახურეფქ ხოლო, მიდგას უმაღლეს თანამდებობა უღდეს, ქიმეხვადეს, დანიელს მუდგარენ განსაკუთრებულ ძალა ოხვარუდუნ. თინეფს უჩქუდეს, ნამდა თინა „ვართ არდებულო ორთუდ საქმეს დო ვართ მუთუნ აფუდ დაშებულ“. დანიელ სანდო კოჩ რდჷ (დან. 6:3, 4). წარმართ მართველეფქ ხოლო ქოძირეს, ნამდა იეჰოვაშ თე თაყვანიშმცემელშა ინდებედ!

⁴ დანიელიშ მაგალითშე დაფიქრებაშ უკულ შემლებნა ჩქინ დუდის ქოპკითხათ: „მუნერ რეპუტაცია მიღჷ კრებაშ გალე? ქომჩინენანო თიცალ პიროვნებათ, მით ასრულენს პასუხიშმგებლობეფს დო მიდგაშათ ინდებე?“. მუშენ ოკო ბკითხათ თენა ჩქინ დუდის? მუშენდა იეჰოვას განვადიდენთ, მუჟამსით სანდოეფ ვორეთ.

5. მუშენ იჩინენდეს ხანანიას სანდო პიროვნებათ?

⁵ ჯვ. წ. 455 წანას, თიშ უკულ მუთ, გამგებელ ნეემიაქ, კინ გეიაშენ იერუსალიმიშ გალავან, თინა თიცალ კოჩის გორუნდჷ, მით ჯგირო იზრუნენდჷ თე ქალაქშე. ნეემიაქ თე პასუხიშმგებლობაშო გიშეგორ ციხესიმაგრეშ მთავარ, ხანანია. ბიბლია თიშ გურშენ იჩიებ, ნამდა „თინა არძაშ უმოს სანდო კოჩ რდჷ დო შხვეფშე უმოსო ოშქურუდ ღორონთშა“ (ნეემ. 7:2). იეჰოვაშ ჸოროფაქ დო თიშ შიშიქ, ნამდა გურ ვა უწყუნუკო ღორონთის, მეხვარ  ხანანიას მთელ გურით შეასრულკო მუშა მენდებულ ნებისმიერ დავალება. თე თვისებეფ ჩქი ხოლო მიმეხვარებნა, ვორდათ სანდო, მუჟამსით ღორონთიშ საქმეს ვასრულენთ.

6. სოვრეშე იძირე, ნამდა ტიქიკე მოციქულ პავლეშ სანდო მეგობარ რდჷ?

⁶ გუვარჩუათ ტიქიკეშ მაგალით, ნამუთ მოციქულ პავლეშ სანდო თანამსახურ რდჷ. მუჟამსით პავლე შინაპატიმრობას რდჷ, თინა ონდუდ ტიქიკეს დო თიშ გურშენ ჭარჷ, ნამდა „ართგურ მსახურ“ რდჷ (ეფეს. 6:21, 22). პავლე თის ეფესოელ დო კოლოსელ და დო ჯიმალეფშა ხვალე წერილეფიშ მეღალას ვანდუდუნ, თინა ხოლო დავალ, ნამდა გურშა ელუკინკო დო გამანგარკო თინეფ. ტიქიკე გუმოშინანა თი ართგურ დო სანდო ჯიმალეფს, მით ჩქინ სულიერ საჭიროებეფშე ზრუნენა (კოლ. 4:7—9).

7. მუშ გურაფა შეილებნა სანდოობაშ გურშენ თქვან კრებაშ უხუცესეფ დო მომსახურეეფშე?

⁷ მანგარ მარდულეფ ვორეთ, ნამდა პჸუნა სანდო უხუცესეფ დო მომსახურეეფ. დანიელ, ხანანია დო ტიქიკეცალო, თინეფ ხოლო მთელ გურით ასრულენა მუნეფშა მენდებულ საქმეს. მაგალთო, მუჟამსით შქა მარაშ შეხვალამას ვოსწრუთ, დარწმუნებულ ვორეთ, პროგრამაშ ნამთინ ნაწილ ვა გოჩირთუ. უხუცესეფ აფასენა თის, ნამდა და დო ჯიმალეფ შეხვალამეფშო მუნეფშა მეჩამილ დავალებას ამზადენა. მუჟამსით ბიბლიაშ მაგურაფალს შეხვალამაშა ვაპატიჟენთ, ვა მოშქურნა, ნამდა ჯიმალეფს გეგშასქიდუდეს თე მარას საჯარო მოხსენებაშ დაგეგმება. თეს გეძინელ, დარწმუნებულ ვორეთ, ნამდა მსახურებაშო საჭირო ლიტერატურაშ უმშო ვა დოფსქიდუთ. მანგარ მარდულ ვორეთ იეჰოვაშ თეცალ ართგურ ჯიმალეფშენ, მით ზრუნენა ჩქინდე. მარა ჩქი მუჭო შემლებნა, დუვამტკიცათ, ნამდა ვორეთ სანდოეფ?

8. მუჭო შემლებნა ვორდათ გაწონასწორებულეფ, მუჟამსით შხვეფიშ მიმართ ინტერესის გიმიფრჩქინანთ? (იგავ. 11:13)

⁸ ჩქი მიჸორა და დო ჯიმალეფ დო დაინტერესებულ ვორეთ თინეფიშ ჯგირობუათ. მარა საჭირო რე, გაწონასწორებულეფ ვორდათ, ნამდა თინეფიშ პირად ინფორმაცია შხვას ვა უწუათ. პირველ საუკუნეშ ქრისტიანულ კრებას ნამთინე ჭორიკანა რდჷ, მიშეშ შხვაშ საქმეშა დო თიცალ მუდგარენს გილეჩიებუდ, მუთ ოკო ვა უთქუალუდკო (1 ტიმ. 5:13). მუშო ოკო რაგად, ვა მოკონა, თინეფს ვაგურათ. წერმიდგინით, ნამდა მიდგარენ გინორჩანა პირად ინფორმაციას დო რთხინა, თენა მითინს ვა უწუათ. მაგალთო, და გირაგადნა მუშ ჯამრთელობაშ პრობლემაშ გურშენ ვარდა თიშ გურშენ, მუ სირთულეწკუმა უხვადუ ბრძოლა დო ვაკო, თენა შხვაქ ქიგეგას. თქვა პატი ოკო ცათ თიშ სურვილს * (წეკითხით იგავეფიშ 11:13). ასე გუვარჩუათ შხვადოშხვა სიტუაცია, მუდგაშ დროს მნიშვნელოვან რე კონფიდენციალურობა.

9. მუჭო შეულებნა ოჯახის წევრეფს ოძირუან, ნამდა რენა სანდოეფ?

⁹ ოჯახის. ოჯახის თითოულიშ პასუხიშმგებლობა რე, ნამთინე თი საკითხ, ნამუთ ოჯახის ოხუ, გალე ვეგმიღას. მაგალთო, ოსურს შილებე თიცალ ჩვევა უღდას, ნამდგაშე ქომონჯის აძიცინუაფ. მარა თენა შხვაწკუმა ოკო ვა თქუას, ნამდა უხერხულს ვენაჸათას თინა, მუშენდა უჸორს მუშ ოსურ დო ვაკო, თიცალ მუდგარენ გაკეთას, მუდგათ გურს უწყუნუანდჷ (ეფეს. 5:33). მოზარდეფს ოკონა, პატიცემათ  ოქცუდან. ჯგირ იჸუაფ, მშობლეფს თენა ირო შუდან. თინეფქ ოკო ვა დამცირან სქუალეფ შხვეფწკუმა თინეფიშ შეცდომეფიშ გურშენ ჩიებათ (კოლ. 3:21). ბაღანეფქ ოკო ქიდიგურუან გონიერება დო თიცალ ინფორმაცია ოკო ვა თქუან შხვეფწკუმა, მუთ ოჯახის წევრეფს უხერხულს ქინაჸათანდჷ (კან. 5:16). მუჟამსით თითოულ ხეს შეუნწყუნს, ნამდა ოჯახიშ ამბექ გალე ვეგმორთას, თენა ხოლო უმოსო დაახლოვენს თინეფს ართმაჟიაწკუმა.

10. მუ მიშურს ნამდვილ მეგობრობაშა? (იგავ. 17:17)

¹⁰ სამეგობროს. არძას მიღნა თიცალ მომენტეფ, მუჟამსით ფიფქრენთ, ნამდა საჭირო რე, ხოლოშიან მეგობარს ქივეჩუათ ჩქინ გრძნობეფიშ გურშენ. მინშა თენა ვა რე ადვილ, მუშენდა შილებე მერჩქვანელ ვა ვორდათ შხვეფწკუმა ჩქინ გურს ინოხვილირ გრძნობეფიშ გურშენ ჩიებას. თეცალ შემთხვევას მანგარო ქელმაჭვედეს გურ, მუჟამსით ქიგებგენდით, ნამდა ჩქინ ნარაგად მეგობარს შხვაშა ქუთქუალ. თეშ გინაწონს, მუჭო ვაფასენთ თი მეგობრეფს, მიდგას შემლებნა თავისფალო ვეჩუათ ჩქინ გრძნობეფიშ გურშენ დო ბჯერა, ნამდა სოთინ ვა თქუანა. თეცალ ადამიან „ნამდვილ მეგობარ“ რე (წეკითხით იგავეფიშ 17:17).

11. ა) მუჭო ოძირანა უხუცესეფ დო თინეფიშ ოსურეფ, ნამდა რენა სანდოეფ? ბ) მუშ გურაფა შემლებნა უხუცესშე, ნამუთ კრებაშ კონფიდენციალურ საკითხეფს ვა ურაგად მუშ ოჯახის? (ქოძირით სურათ).

¹¹ კრებას. თი უხუცესეფ, მით ვაცხადენა კონფიდენციალურ ინფორმაციას, და დო ჯიმალეფშო რენა „დუდიშ გითაფორაფალ ქარბორიას დო წყურგილე უწყარე დიხას“ (ეს. 32:2). შემლებნა თავისფალო ვეჩუათ თინეფს ნებისმიერ საკითხშე, მუშენდა ბჯერა, ნამდა ჩქინ ნარაგადის სოთინ ვა თქუანა. ჩქი ვა ვოცადუთ, თიცალ ინფორმაცია ქუვორაგადაფუათ, მუდგაქ კონფიდენციალურო ოკო დოსქიდას. თეს გეძინელ, ვაფასენთ უხუცესეფიშ ოსურეფს, მით ვაცადნა კონფიდენციალურ ინფორმაციაშ გაგებას. მართალო კურთხევა რე, მუჟამსით უხუცეს  და დო ჯიმალეფიშ პირად ინფორმაციას მუშ ოსურს ვა ურაგად. ართ უხუცესიშ ოსურ იჩიებ: „მარდულ ვორექ ჩქიმ ქომონჯიშ თიშენ, ნამდა მუთუნს ვამრაგად თინეფიშ გურშენ, მიდგას სამწყემსო მონახულებას უტარენს ვარდა მიდგას სულიერო მოხვარა ოსაჭირ. თინა თინეფიშ სახელეფს ხოლო ვამრაგად. ვაფასენქ, ნამდა ვა მამონკენს თიცალ პრობლემეფით, მუდგაშ გიშასწორებელო მუთუნ ვა მაკეთებე. თინეფიშ პირად დეტალეფ ვამჩქუნ თიშენ შემლებ და დო ჯიმალეფწკუმა კრებას თავისფალ ურთიერთობა მიღდას. თეს გეძინელ, შემლებ ბჯერდას, ნამდა, მუჟამსით ქომონჯის პირად გრძნობეფიშ ვარდა პრობლემეფიშ გურშენ ურაგადუქ, თეს სოთინ ვა თქუანს“. მუშო ოკო რაგად, არძას მოკონა, სანდო პიროვნებათ მიჩინენდან. მორთ გუვარჩუათ ხუთ თვისება, ნამუთ მიმეხვარებნა თეშ მენჭირნაფას.

12. მუშენ შემლებნა ფთქუათ, ნამდა ნდობაშ საფუძველ ჸოროფა რე?

¹² ჸოროფა რე ნდობაშ საფუძველ. იესოქ თქუ, ნამდა ჟირ არძაშ უდიდაშ მცნება რე, მიჸორდან იეჰოვა დო მიჸორდან მოყვას (მათ. 22:37—39). ჩქი მიჸორა იეჰოვა, ათეშენ მოკონა, მივაჸუნათ თიშ სრულყოფილ მაგალითის დო ვორდათ სანდოეფ. მაგალთო, და დო ჯიმალეფიშ ჸოროფა გინმოჭყვიდრაფუანა, თინეფიშ პირად საკითხეფ შხვაწკუმა ვა გუვაცხადათ. ჩქი ვა მოკონა, თინეფს გურ უწყუნუათ დო უხერხულს ქინვოჸოთათ (იოან. 15:12).

13. მუჭო მოხვარნა თანდაბლობა ვორდათ სანდოეფ?

¹³ თანდაბლობა მიმეხვარებნა, ვორდათ სანდოეფ. თანდაბალ ქრისტიან ვაცად, დუდ თით გემკირჩქინას, ნამდა არძაშე უმოს პირველო გაცხადას მუდგარენ ინფორმაცია (ფილ. 2:3). თინა ვაცად, შხვეფს ოფიქრებაფუას, ნამდა თიცალ მნიშვნელოვან ინფორმაცია უჩქჷ, ნამუთ შხვეფშა ვარაგადე. თეს გეძინელ, თანდაბლობა ფთხილანა, ვა გუვავრცელათ პირად აზრეფ თიცალ საკითხეფწკუმა დაკავშირებით, ნამუთ ბიბლიას დო თიშა გერსხილ პუბლიკაციეფს ვა რე გარჩიებულ.

14. მუჭო მოხვარნა ინონჭაფაშ უნარ, ვორდათ სანდოეფ?

¹⁴ ინონჭაფაშ უნარ ოხვარ ქრისტიანს, უჩქუდას, მუჟამ რე „რაგადიშ დრო დო რაგადშე დუდიშ შეკებაშ დრო“ (ეკლ. 3:7). ნამთინე კულტურას არსებენს თეცალ ანდაზა: „ჭკვერულ ჩიება ვარჩხილ რე, მარა ჩიებაშე დუდიშ შეკება — ოქრო“. შხვა სიტყვეფით ქოფთქუათინ, მინშა ჩიებას უჯგჷ, გაფჩერდათ. ათეშენ, იგავეფიშ 11:12-ს ჭარჷ: „ინონჭაფაშ უნარ უღუნ ფერ კოჩ, მუთუნს ვეჩიებ“. გუვარჩუათ თეცალ მაგალით: ართ გამოცდილ უხუცეს ხშირას ოხვარ შხვა კრებეფს, მუჟამსით თინეფს პრობლემეფ უღნა. დეკვირით, მუს იჩიებ შხვა უხუცეს თე ჯიმაშ გურშენ: „თინა ირო ფრთხილას რე, ნამდა შხვა კრებაშ გურშენ კონფიდენციალურ ინფორმაცია ვა გაცხადას“. თიშ გურშენ, ნამდა თე ჯიმა გიმირჩქინანს ინონჭაფაშ უნარს, ჯიმალეფ, მით მუწკუმა ართო მსახურენა უხუცესეფიშ საბჭოს, პატის ცენა თის. თინეფ დარწმუნებულეფ რენა, ნამდა მუნეფიშ კონფიდენციალურ ინფორმაციას თე ჯიმა შხვეფს ვა უწინს.

15. ქიმიჸუნით მაგალით, სოვრეშეთ იძირე, მუჭო უნწყუნს გულწრფელობა ხეს ნდობას.

¹⁵ გულწრფელობა ხოლო უნწყუნს ხეს, ვორდათ სანდოეფ. ჩქი ვონდუთ თეცალ ადამიანს, მუშენდა ბჯერა, ნამდა თინა ირო მართალს იჩიებ (ეფეს. 4:25; ებრ. 13:18). მაგალთო, წერმიდგინით, ნამდა გოკონა, გაუჯგუშათ გურაფაშ უნარეფ, ათეშენ შხვას თხინთ, ქუმურჩქილუას  თქვან მოხსენებას დო ქიმერჩან რჩევეფ, მუ მხარეს გოსაჭირნა გაუჯგუშება. მის ენდებუდით თე გულწრფელ შეფასებას? თის, მით მუდგაშ მორჩქილა გოკონან, თის გიწინდეს დოვარ თის, მით სიმართლეს ვაიფულუნდეს დო თეს გემუანო გაკეთენდჷ?! პასუხ არგამა რე. ბიბლია იჩიებ: „ფულირ ჸოროფას არგამათ შეგონებაშ მეჩამა უჯგჷ. მეგობარშე ჭრილობა ართგურობაშ ნიშან რე“ (იგავ. 27:5, 6). მართალ რე, დუდშე რთულ რე მეგობარშე გულწრფელ შეფასებაშ მორჩქილაფა, მარა იშო-იშო აწმოდირთუნა.

16. მუჭო იძირე იგავეფიშ 10:19-შე, ნამდა საჭირო რე დუდშეკება?

¹⁶ დუდშეკება აუცილებერ რე შხვეფშე ნდობაშ მიოღებელო. თე თვისება მოხვარნა, ჩქინ დუდის ვემეფჩათ თიშ რაგადიშ უფლება, მუდგაშ გურშენ მიწის, ნამდა ვა გუვაცხადითკო. შილებე ვატყუაფდათ, ნამდა სოციალურ მედიაშ გიმორნაფაშ დროს, ძნელ მაფნა დუდშეკებაშ გიმორჩქინა (წეკითხით იგავეფიშ 10:19). ფრთხილას ვეპით-და, შილებე გურუგუჩამუო კონფიდენციალურ ინფორმაცია გუვავრცელათ. მუჟამსით ელექტრონულო გუვავრცელენთ ინფორმაციას, უკულ ვაგმაკონტროლებენა, მი მუჭო გიმირინუანს თის დო მუ შედეგის მიღანს თენა. თე თვისება თიმ დროს ხოლო მოხვარნა, მუჟამსით მოწინააღმდგეეფ ოცადნა, გეგწობტყურან თიცალ ინფორმაცია, მუთ საფრთხეს ქინაჸათანდჷ და დო ჯიმალეფს. თექ შილებე ქუმოხვადას, მუჟამსით თიცალ ტერიტორიას ფცხოვრენთ, სოდეთ ჩქინ საქმიანობა ვარიებულ რე დო პოლიციას დაკითხვაშა ვაფუთ ჭანაფილ. თე დო შხვა სიტუაციას შემლებნა მივაჸუნათ პრინციპის: „პიჯის ალიკაპის ეუდვანქ“ (ფსალმ. 39:1). ოჯახის, სამეგობროს, და დო ჯიმალეფწკუმა დო საერთოთ არძაწკუმა სანდოეფ ოკო ვორდათ. თეშო საჭირო რე დუდშეკება.

17. მუჭო შემლებნა ხე შეუნწყუათ, ნამდა კრებას რდას ნდობა?

¹⁷ მანგარ მარდულ ვორეთ იეჰოვაშ, ნამდა პჸუნა საჯიმალო, სოდეთ მოჸოროფე დო სანდო ხალხ რე. მუჟამსით თითოულ ვოცადუთ, გიმიფრჩქინათ ჸოროფა, თანდაბლობა, ინონჭაფაშ უნარ, გულწრფელობა დო დუდშეკება, ხეს უნწყუნთ, ჩქინ კრებას რდას ნდობა. ნდობაშ გავითარება დღას ვეთებ. მორთ არძაქ მივაჸუნათ ჩქინ ღორონთ იეჰოვაშ მაგალითის დო ირიათო დუვამტკიცათ, ნამდა ვორეთ სანდოეფ.