Emhiigh 1940 kụ eghị, odẹ r’onhiin amhị umhiigh ni otuughạ aBaibul phọ r’Abugbaanhaạn AZihova. Kuolọ bidị uwilhẹ ni ituughạ phọ, toroboiperolbọ, onhiin amhị aghiọm ni ghisigh asighẹ ghan Watchtower r’Awake! Lhạ phọ 1950 uphạm ni ogbogh ookpomhoghan eephugh epẹ New York City, kụ eghunotu ayoor umheera ni oghị aani.

I/bia bịn Umor phọ Lawrence Jeffries amhiigh oru ghan ophogh ayoor. Odị akạr amhoọgh ḍiḅeraạn olhoghonhaạn amhị ḍighaạgh. Eḅẹl amem mọ, mị ugbakiạn ghan ni r’odị ilọ ipẹ Abugbaanhaạn AZihova ro/dighom ghan bọ raghaạph itooghị ḅilhẹ ro/kị ghan bọ eghạm. Mị uḅenhị ghan nyodị mọ eḍighi maạr dị torobọ oye u/meera ukị eghạm siẹn America, abumulhọgh ḍien kotu ḍio bịn ozuom oomo eelhe phọ ḅilhẹ oboọr iikpọ. R’okparạm, Umor phọ Jeffries agbiran ni r’amhị kụ aḅẹm mọ: “Nạ aatughiạn mọ aZihova Enhaạn phọ kaḍighi ika eḍighi maạr dị oomo America oḍighi we dị rooḅereghị nyodị, kụ abumulhọgh ḍien oru ḍio bịn ozuom?” Iphẹn phọ odị agbiran bọ r’amhị ilhoghonhaạn imhị ḍighaạgh omhiịn mọ ipẹ mị aatughiạn ghan bọ i/meerạ esi. Kụ ipẹ phọ isumeẹny ni ḍiḅeraạn phọ amhị.

Mị ulhọgh ni ibadị awạ aạl ghan igbaany aWatchtower r’Awake! dị onhiin phọ amhị amhaạr aseere. Idiphọ amem mọ rekị bọ, bịn mị aru alhegheri mọ mị ratuughạ ghan igey phọ, esi iduọn phọ mị umheera ni dị Umor phọ Jeffries kutughemhị imhị Baibul phọ. Mị aḅilhẹ kẹn amhiigh oghị ituughạ. Igey phọ eḍigh ekpom amhị, bịn mị aḍighi aani oniin odị rakaạph aani oghaạph iiḅi iinhaghạn phọ. Asiigbu phọ amhị inmia ni mem mọ mị anhaghanhạn bọ mọ “aḍigbogh aḍio phọ aZihova metuman siẹn.” (Zeph. 1:14) Esi iduọn phọ, mị u/wạ oghị ogbogh askul, mị uwạ ghụn olhoghonhaạn aḍighaạgh bunhọn otuughạ igey aBaibul phọ.

Mị umhạn askul phọ amhị June 13, 1956, kụ iraạr aḍughulotu reten bịn mị aḍiiny muụm ookpomhoghan  eghir dị ophạm. Mem mọ opọ phọ, mị u/legheri mọ ibadị aḍisẹph keḍuạ ni emite loor iduọn mị akuọm bọ ghuḍum mọ amhị otuughạ r’otughemhị ilọ aZihova.

Odiiny arunwanyụ reten mem mọ mị aḍiiny bọ muụm mọ, mị uḍighi ni onyọ okọy eten. AKingdom Ministry aDecember 1956, aphạm ni emhuoghaạph dị eḅẹm mọ “Can You Serve Where the Need Is Great?” Emhuoghaạph phọ epẹ phọ ikạr kụ igbolhomaam imhị. Mị umhoọgh ni ḍiḅeraạn oghị olhoghonhaạn aḍighaạgh ekpisi dị abukaaphọm iiḅi iinhaghạn phọ u/kạr ulo.—Mat. 24:14.

Mị uḍuạ ni aghị epẹ Edgefield, South Carolina. Inya abukaaphọm bịn kụ urọl ookpomhoghan phọ, kụ mị roghị kụ eḍighi oogh ayoor. Yoor uphạm ghan ituughạ phọ osoph onyọ umor. Torobọ unwanyụ mị ungọ ghan 100 awạ. Mị umhoọgh ni ibadị aroopoogh siphẹ ookpomhoghan phọ idiphọ oḍiemhiom ghan epẹ erugh phọ, oḍighi yogh asaimẹnt. Kụ iphẹn phọ ilhoghonhaạn imhị ḍighaạgh okuamhị olhegheri aZihova obughẹ.

Oniin anhịr dị mị atughemhị ghan Baibul amoọgh otu dị roseere ghan iḍim dị kokori oḍi, epẹ Johnston, emhạ dị esighẹ iyạl ikpo itobi ikelhạn iyoor. Odị ulhọgh ni imhị oḍighi dị mị aḍighi ghan iniin asiḍio wiki phọ, kụ aḅilhẹ ungọ iyoor otu odị ophạm ghan ituughạ.

Oọny onyọ umor phọ utughemhị bọ imhị Baibul phọ, Jolly Jeffries, aḍuạ ni aru Brooklyn, New York, kụ iyạl ayoor okọy ghan eten phọ. Yoor uḅophoghạn orugh eniin esi dị onyọ umor ungọ iyoor.

U/kpẹ ghan igey ikpoki oye dị aḍighi oḍighi epẹ South Carolina. Ukpẹ ghan iyoor iyạl obobọ iraạr adollar okpom emhụ aḍio oḍighi. Eniin amem, mị uḍigh ni esi oghooghi ariiḍien bịn ikpoki amhị emhunheen. Mem mọ mị ramite bọ, oniin oye umhiịn ni imhị kụ upuru imhị mọ: “Nạ kaḍighi ni oḍighi ḍughụm? Mị kakpẹ ghan nyinhạ oniin adollar oniin awạ.” Odị ungọ ni imhị iraạr aḍio oḍighi ogbuurogh esi dị rolọgh otu. Ikạr kụ eegholhaan mọ aZihova kụ akạr rulhoghonhaạn imhị ḍighaạgh orọl ephẹn Edgefield. Etigheri iduọn mị u/moọgh bọ ikpoki dị ebụgh, mị ughị ni ogbogh ookpomhoghan eephugh phọ ophạm bọ New York City, lhạ phọ 1958.

Siphẹ omhunhenhiom iyạl aḍio ookpomhoghan eephugh phọ, iyaạr dị egbatanhaạn imite ni. Mị uuzuanhaan ni onyọ umaranhi dị oghol mọ Ruby Wadlington, dị akumuan aani ghan idiphọ okọy eten epẹ Gallatin, Tennessee. Kụ loor iduọn iyạl ayoor omhoọgh bọ ḍiigbu okumuan idiphọ asimisonarị, yoor ughị aani ni ruupuruan ilọ abuphẹ omhoọgh bọ ḍiḅeraạn oghị aani askul aGilead phọ, ophạm bọ siphẹ ookpomhoghan eephugh phọ. Esighẹ rekị bịn yoor omhiigh ogbor oghaaphạn. Umhạgh aani ni imhị oghị ookpomhoghan abidị epẹ Gallatin ongọ oghaạph, kụ mị usighẹ ni eepoogh phọ epẹ phọ apuruom nyodị ilọ ilhom. Mị uḍuạ ni aghị ookpomhohgan abuọ Ruby, kụ yoor aalhạn lhạ phọ 1959.

Mem dị mị amhạn 23 asiạ, umạ ni imhị epẹ Gallatin oḍighi ookpomoghiom aḍita ikumor awe phọ (oghol ghan bọ mọ congregation servant). Yoor kụ oḅẹl ookpomhoghan dị Umor phọ Charles Thompson aghị ophogh mem mọ odị aḍighi bọ opoghom  eghir. Odị mamhiịn ni raraạr agey, kuolọ upuru aani ghan ni imhị ipaanhaạn dị abumor phọ osoman, r’ipẹ abueriphọ abupoghom eghir phọ oḍighi ghan bọ olhoghonhaạn aḍighaạgh bidị. Mị utuughạ ni ḍighaạgh odị mọ enighẹ ni opuru ghan asipuru olhegheri oomo ariphigh phọ kụ ogbi ophạm iphigh araghaạph obobọ osopha osopha.

Unwanyụ aMay 1964, umhạgh aani ni imhị oghị aKingdom Ministry School dị ophạm South Lansing, New York. Kụ askul phọ arọl oniin okpom unwanyụ. Abumor phọ otughemhị bọ uḍighi idị mị amhoọgh eephuạ okuamhị otuughạ obughẹ r’okuamhị oḍuraan otuman aZihova.

Umhạgh ni Ruby r’amhị oḍighi aani oḍighi opoghom eghir phọ January 1965. Eghir phọ ayoor ibụgh ni iboom, imhiigh ephẹn Knoxville, Tennessee, kụ eghị esi Richmond, Virginia. Iḅaramaạm kẹn ni rookpomhoghan aNorth Carolina, Kentucky, ḅilhẹ r’aWest Virginia. Mị uphogh ghan rookpomhoghan phọ ipẹ abuḍiil abumor phọ bịn kụ orọl ghan bọ, loor esi dị epẹ esoorom United States phọ ulhọgh olhogh mọ abuḍiil r’abekeeny kuu/kpomhoghan ghan eniin esi. Abumor phọ u/kạr umoọgh ikpoki, esi iduọn phọ yoor ungọ ghan ni bidị raraạr dị yoor omhoọgh buphẹ ekạr bọ ekuom. Oniin opoghom eghir dị makumuan ni esi ibadị asiạ utughemhị ni imhị eniin ephigh iyaạr, odị uḅenhị imhị mọ: “Ḍighi onyọ umor. Ka/ḍighi oye dị ookpomhoghan phọ komiịn ghan idiphọ ogbo abidị. Nạ katue aloghonhaạn bidị ḍighaạgh eḍighi maạr dị bidị omhiịn nyinhạ idiphọ onyọ umor abidị.”

Mem dị yoor oghị oniin obạm ookpomhoghan, aRuby amhiigh otughemhị oniin anhịr dị amhoọgh obạm onyanhị aḍiniin alhạ. Mem dị oye u/tue ukị ghan utughemhị anhịr phọ, aRuby atughemhị ghan ni esi ogẹ ghan aḍinyạ oghiọm. Mem dị yoor oḅilhẹ oghị ookpomhoghan phọ, anhịr phọ aru ni oomo ituughạ phọ ophạm bọ. Mem dị iyạl abumaranhi dị rokọy eten opọ agbatanhaạn bọ oru siphẹ ookpomhoghan phọ, uḅọgh ni anhịr phọ ongọ bidị kụ oghiọm ghisigh itughemhị phọ, kụ i/bia bịn anhịr phọ aḍiiny muụm. 30 asiạ reten lhạ phọ 1995, epẹ Betẹl aPatterson, oniin oḍoọgh umaranhi aru ni ateẹny Ruby aḅaanhaạn. P’iduọn phọ onyanhị anhịr phọ aRuby atughemhị ghan bọ. Odị r’olom odị uru aani omhunhenhiom 100 ekụ aGilead School phọ.

Omhunhenhiom iyạl eghir phọ usighẹ bọ iyoor oghị iḍighi central Florida. Mem mọ amuphẹ phọ yoor umhoghi omhoọgh amoto, kụ yoor ugho ni oniin, ḍimạ aḍighi. Kuolọ awiki roten bịn aphụ. Ikpoki oselemhiom yoor u/moọgh. Yoor umhạgh ni onyọ umor dị raselemhi ghan simoto olhoghonhaạn aḍighaạgh. Bịn odị arom oniin oye dị r’odị roḍighi ghan kụ aru aselemhi moto phọ, kuolọ iyoor ikpoki o/boọr. Odị aḅẹm bịn mọ, “kee/ḅaghamhiạn loor.” Odị aḅilhẹ ungọ iyoor ghụn ikpoki! Ipẹ phọ ikạr kụ eḍeenhaan ipẹ aZihova rapogh ghan bọ rebenhẹ phọ odị. Iitughianhạm kẹn iyoor mọ yoor unmo ghan bunhọn inmo.

Torobọ amem dị yoor oghị ophogh ookpomhoghan, yoor urọl ghan ruutu abumor phọ. Esi iduọn phọ, yoor umhoọgh ni ibadị arighirị. Ḍiniin aḍio, mi uwilhẹ ni ḍinyạ dị mị agẹ ilọ ookpomhoghan siphẹ atypewriter phọ amhị. Mem mọ mị aḅula bọ ogbạl aḍulhe, mị umhiịn dị oḅumoọny iraạr asiạ siphẹ olhoghotu phọ mazuughị atypewriter phọ bịn ageeghị inhọn ikpo igẹ alhọgh. Iḅilhẹ eghịgh mudị odị ulhoghonhaạn imhị ḍighaạgh ogẹ aḍinyạ phọ omhạn. Kụ imhoghi mọ mị uḅilhẹ ugẹ ḍinhọn aḍinyạ. Eten ephegh, mị uutughianhạm ghan ni nyodị ipẹ odị uḍighi bọ imhị esi ibadị asiạ.

Lhạ phọ 1971, umạ imhị oḍighi opoghom eephugh epẹ New York City. Iḍighi ni unmam! Mem mọ amuphẹ phọ, mị amạn 34 asiạ bịn. Mị kụ uḍighi oḅẹl oḍiil oye dị aḍighi opoghom eephugh epẹ New York City. Esi iduọn phọ abumor phọ ukạr kụ ughuraam imhị.

Idiphọ opoghom eephugh, mị ukạr kụ aghelhọm ghan otughemhị ilọ aZihova torobọ eekunha awiki mem dị ophạm ookpomhoghan eghir. Ibadị abupoghom eghir ulhegheri ni ibadị araraạr upu imhị. Oniin onyọ abidị kụ angọ oghaạph oḍiiny amuụm mọ amhị. Onhọn onyọ umor pọ Theodore Jaracz, opọ onyebel roten aḍighi aani bọ oniin Aloor Phọ Repogh Bọ. Abunhọn abumor dị momhiịn raraạr oḅilhẹ omhoọgh olhegheri iyaạr urọl li dị okumuan ghan siphẹ Betẹl aBrooklyn. Mị ukạr kụ asereghiạn iduọn abupoghom eghir ḅilhẹ r’abunhọn dị rokumuan siphẹ aBetẹl phọ oḍighi bọ idị mị u/kiilhaan. Mị ukạr kụ amhiịn mọ bidị oḍighi bupoghom iyool Enhaạn dị obeḍenhọm Ekpo Onhụ phọ Enhaạn, ḅilhẹ oḅạr oḅilhẹ obakị ookpomhoghan phọ. Osooromhi aloor phọ abidị kụ aḍighi bọ idị idughanhaan imhị okumuan idiphọ opoghom eephugh.

Lhạ phọ 1974, Aloor Phọ Repogh Bọ umạ ni egu abupoghom eghir dị kokumuan idiphọ abupoghom eephugh, kụ bidị oḅilhẹ umạ imhị oḍighi opoghom eghir—kuolọ egi phọ ephẹn phọ mị kakị epẹ South Carolina. Dị eḍighi ni iyaạr oḅaạl olhoghi, tutụ reteẹny bọ mem mọ amuphẹ phọ, abuḍiil phọ r’abekeeny phọ momhiigh roḅophoghạn kophạm ituughạ koḅilhẹ oghị ookpomhoghan eghir, iphẹn phọ ikạr kụ eḅeraạn bumor phọ.

Reteẹny bọ eekunha alhạ 1976, usighẹ ni imhị oghị eghir aGeorgia, igbo Atlanta r’aColumbus. Mị aatughiạn ni, epẹ phọ mị ungọ ni oghaạph amaḍi oogh ibạm anmụny abuḍiil dị omhugh mem dị oye aru asụ otu abidị. Onhiin anmụny phọ abuẹn phọ aḍighima ni iyaạr, loor esi iduọn phọ, usighẹ ni nyodị oghimọm otu arookonhom. Aḍita Abugbaanhaạn AZihova buḍiil r’abuphalhaḅaạl ughị ghan ni siphẹ otu arookonhom mọ oodereghị odẹ r’onhiin anmụny phọ. Mị ukạr kụ amhiịn mọ ephomhoghiạn abumor phọ ekạr kụ egbatanhaạn. Odọ igbiririph phọ iphẹn phọ ketue ni eloghonhaạn ḍighaạgh rebenhẹ phọ Enhaạn okaran amem ogbagarạ odẹgh ophogh.

Lhạ phọ 1977, umhạgh ni iyoor oghị aBetẹl okumuan esi iyạl ikpo arunwanyụ. Arunwanyụ phọ r’emhunheen bịn iyạl abumor siphẹ Aloor Phọ Repogh Bọ umhạgh imhị opuru mughumọ keḅeraạn ni Ruby r’amhị oghiọm aghisigh okumuan siphẹ aBetẹl phọ. Yoor umheera mọ ii.

Esi 24 asiạ, mị ukumuan ghan r’Ekpịgh Phọ Repogh bọ Rukumuan Epẹ Erugh Phọ. Abumor phọ rokumuan ghan bọ agạ arukumuan phọ iphẹn phọ, ropanyanhaạn ghan ni igbagarạ r’iphigh asipuru dị opuru. Kuolọ k’asiạ phọ, Aloor Phọ Repogh Bọ ungọ ghan ni iyoor iiḅakiọm dị edaphạn sinhị iilhogh aBaibul phọ osighẹ okumuanham. Iiḅakiọm mọ iphẹn phọ reloghonhaạn ghan ḍighaạgh bumor phọ ophanyanhaạn asipuru phọ. Rosighẹ ghan kẹn iiḅakiọm mọ iphẹn phọ kotughemhiọm bupoghom eghir, ikumor awe, ḅilhẹ r’abukọy eten. Arinyạ iiḅakiọm mọ iphẹn phọ melhoghonhaạn kẹn ḍighaạgh ibadị oḍighi aKristẹn dị mosianhaan. Kụ mekparamhị kẹn ookpomhoghan phọ aZihova.

Emhiigh lhạ phọ 1995 kụ esi 2018, mị ughị ni aaphoghogh ilạ agadạ kirokirọ idiphọ omeerạ enye emhụ agadạ phọ, oghol ghan bọ mọ zone overseer. Mem dị mị asi olạ agadạ phọ, mị ukparamhị ghan ni Buphẹ Ropogh Bọ Olạ Agadạ phọ, buphẹ rokumuan bọ siphẹ aBetẹl phọ, ḅilhẹ r’asimisonarị phọ aḅilhẹ angọ ghan iiḅakiọm ilọ atorobọ ogbolhomaam dị bidị omhoọgh. Ḍieriphọ aḍighaạgh phọ, ikparamhị aani ghan ni Ruby r’amhị mem dị bidị oghaạph uḅenhị aani iyoor idị emitenhaan bidị. Esi omaạm, lhạ phọ 2000, yoor ughị ni ophogh bumor phọ epẹ Rwanda. Iḅọgh ni iyoor mem mọ bidị uḅenhị bọ iyoor idị abumor ḅilhẹ r’eghunotu aBetẹl phọ okaran mem dị eghạm emite eelhe phọ abidị lhạ phọ 1994. Ibadị uroph ni buọ ephomhoghiạn abidị esi aḍuugh. Etigheri ipẹ bidị okaran bọ, abumor phọ abuẹn phọ uḍeenhaan ookiạ omheeraam, oḍuomolhoghi, ḅilhẹ r’ibo.

Nyiidiphọ, aRuby r’amhị mopel 80 asiạ. Esi 20 asiạ, mị rakumuan aani ghan siphẹ Ekụ Phọ Repogh Bọ Olạ Agadạ phọ United States. Ii, mị u/kị ogbogh askul dị oḅẹm mọ ikị kụ emhiịn; kuolọ, mị amoọgh olhegheri iyaạr dị apeleghiom olọ ogbogh askul ḍighaạgh aZihova ḅilhẹ r’ookpomhoghan phọ odị. Iphẹn phọ mikparamhị imhị otughemhị aani abunhọn igey aBaibul phọ kengọ bọ bidị suọ k’agee-pọ. (2 Kọr. 3:5; 2 Tim. 2:2) Mị mamhiịn kẹn ni idị adom aBaibul phọ melhoghonhaạn ḍighaạgh we onhighemhị adọl aghuḍum mọ abidị ḅilhẹ r’ooneghị asiya dị ekpạr r’Olemhiạ phọ abidị. (Jems. 4:8) ARuby r’amhị rosighẹ ghan ni torobọ eepoogh dị emite kokparamhiọm bunhọn, osereghiạn ghan eepoogh otuughạ ilọ aZihova ḅilhẹ r’otughemhị aani igey aBaibul phọ bunhọn—ephẹn kụ egbogh eepoogh dị ebenhẹ aZihova katue akelhọm!