1940 tripantu püle, tañi pu chau estudiaingün Biblia pu Dunguquelu Ineingen Jehová engün. Rupalu chi antü, tañi ñuque elcünui chi estudio, huelu petu llouquefui Ti Huerquen ca ¡Tami quimafel! pingechi revista. Ca 1950 tripantu mu, tañi familia amuingün quiñe fütra trahun mu.

Rupalu chi fütra trahun, quiñe peñi Lawrence Jeffries pingelu eluhui taiñ huitranmayaeteu tañi familia iñchiñ. Fei ayüfui tañi enseñayaeteu iñche tati rüf dungu. Iñche ayüquelafun pu testigo ñi connon mu politica mu ca servicio militar mu. Iñche raquiduamquefun connole hueichan mu pu gringo che, lefcontuaiñmu taiñ pu caiñe piquefun. Ti peñi Jeffries feipiqueneu: “Com pu che mülelu Estados Unidos poyefule ta Chau Dios, fei ¿elpeafui mai tañi huesalcangeal engün?”. Feichi ramtun raquiduameleneu. Fei quimtucun iñche tañi raquiduam huelulcalefui.

Ti revista Ti Huerquen ca ¡Tami quimafel! elungefel tañi ñuque, iñche fentren hora rupan tañi papeltufiel. Papeltufiel tüfa, quimürpun tati rüf dungu. Feimu feipifiñ ti peñi Jeffries tañi enseñayaeteu Biblia ca eluhun ñi amual ti trahun mu. Müna falinturpufiñ tañi quimürpuel Biblia mu. Feimu elungen tañi amuldungual, fei quimürpun Jehová ñi antü püllelepai (Sof. 1:14). Feimu raquiduamhuelan tañi amual ta universidad mu. Doi mai, ayün tañi enseñayafiel tati pu che Biblia ñi rüf dungu.

13 conchi junio 1956 tripantu mu, afi tañi estudio colegio mu. Fei cüla antü mu, fautizahun quiñe fütra trahun mu. Com ñi mongen mu eluhun tañi quimafiel ta Jehová ca tañi enseñacheal Jehová mu. Feimu raquiduamlafun rume tañi fente cümelcangeal.

Cayu cüyen rupalu ñi fautizahun mu, eluhun tañi precursor regularngeal. Diciembre cüyen 1956 tripantu mu, tripai quiñe Ministerio del Reino, gringodungun mu. Fei ta mu feipi pu peñi ca pu lamngen ñi quelluntucual cheu doi duamniengen quellu. Fei iñche raquiduamün tañi quelluntucual (Mat. 24:14).

Fei huiñamtuhun quiñe pichi huaria mu, Edgefield pingelu, Carolina del Sur mapu mu. Feichi trahunche mu, mülefui epu peñi ca epu lamngen müten. Puulu iñche, quechungerpuiñ. Quiñe peñi tañi pieza mu femquefuiñ ti trahun. Feichi mu, iñche amuldunguquen 100 hora fill cüyen. Fentren cüdau niefun, amuldunguquefun ca pepicaquefun tañi asignacion ca tañi hueupin. Doi cüdaulu iñche Jehová mu, doi quimürpun quisu meu.

Quiñe püllelechi huaria mu, iñche chillcatulquefiñ Biblia quiñe ñaña, niequefulu quiñe funeraria. Fei ta elueneu cüdau, fei cüdauquefun quiñeque antü semana mu. Ca areleiñmu quiñe pichi ruca taiñ trahuluhual.

Ti peñi Lawrence Jeffries ñi fotüm, Jolly Jeffries pingelu, huiñamtuhui cheu tañi mülequefel iñche, fei trür amuldunguquefuyu. Fei ca umaquefuiñ quiñe pichi ruca mu taiñ areleteu quiñe peñi.

Sur püle Estados Unidos mu, nehue cüme cullingequelai ta che tañi cüdau mu. Tañi hueni iñchiu cullingequefuiñ epu cam cüla dolar quiñe antü mu. Quiñe rupa, ngillacalu iyael iñche, com gastafiñ pichin plata tañi nieel. Tripalu iñche, quiñe huentru ramtueneu: “¿Cüpa cüdahuimi? Culliaeyu quiñe dolar caque quiñeque hora tami cüdahun mu” pieneu. Cüla antü mu cüdahun ñi liftuafiel quiñe terreno. Jehová quellueneu tañi mülenagal Edgefield huaria mu. Ca pepi amun quiñe fütra trahun mu Nueva York huaria mu 1958 tripantu.

Ti epu antü feiti fütra trahun mu, rupai quiñe ayüfal dungu. Quimfiñ quiñe precursora regular, Ruby Wadlington pingelu, mülelu Gallatin pingechi huaria mu. Iñchiu ayüfuyu ñi misionerongeal. Feimu amuyu quiñe pichi trahun mu, dungungelu Galaad pingechi escuela mu. Pichin rupalu chi tiempo, huirileluuquefuyu ta carta ca mangelngen ñi hulal quiñe hueupin Ruby tañi trahunche mu. Feichi mu ramtufiñ ta Ruby: “¿Ayüafuimi tayu curehuen-ngeal?”. “Mai, ayüafun” pieneu. Fei huiñamtuhun tañi trahunche mu ca niehuiyu 1959 tripantu.

Gallatin huaria mu, 23 tripantu nielu iñche elcünungen tañi siervo de congregacion ngeal. Famülque mu, coordinador del cuerpo de ancianos pingequei. Quiñe rupa, huitrancontupaiñmu ti peñi Charles Thompson. Feichi mu ti peñi hue elcünungefui tañi huitrancontumeafiel pu trahunche. Feitachi peñi rume quimchengefui. Femfulu rume, ramtueneu chem ñi duamnien  pu peñi ca pu lamngen. Ca ramtueneu ñi chumün pu huitran-ngepaquechi loncolelu ñi quelluafiel engün. Iñche quiñe falin dungu quimürpun feitachi peñi mu: petu taiñ femnon quiñe dungu, mülei taiñ ramtual ca quimnieafiel com ti dungu.

Mayo 1964 tripantu mu, Nueva York mapu mu, mangelngen ñi amual quiñe escuela mu quiñe cüyen mu cheu ñi pepicangepeyüm pu loncolelu ca pu quelluquelu. Pu quimeltufe quellueneu tañi doi quimürpual Jehová mu ca tañi doi hueniyeafiel ta Jehová.

Enero 1965 tripantu mu, feipingen tañi huitrancontumeafiel pu trahunche Ruby iñchiu. Mülefui tayu amual Knoxville huaria mu, taiñ puhual Richmond huaria mu. Ca huitrancontuquefuyu quiñeque trahunche mülelu Carolina del Norte, Kentucky ca Virginia Occidental mapu mu. Feichi mu, huitrancontuquefuiñ pu trahunche tati mülemum re curüque che. Feichi mu Estados Unidos mapu mu, mülequefui quiñe ley pu curüque che elungequelafui quiñentrür ñi trahuluhual flangque che engün. Pu peñi ca pu lamngen müna pofrelequefuingün, feimu huelucontu eluuquefuiñ taiñ nieel. Quiñe huitran-ngepaquechi loncolelu elueneu quiñe falin ngülam. Fei feipieneu: “Amulmi quiñe trahunche mu, quiñe jefe reque troquiulayaimi. Quiñe peñi reque mülei tami troquingeal, femngechi quelluafuimi pu peñi ca pu lamngen”.

Huitrancontumefilu quiñe pichi trahunche, Ruby estudialfi Biblia quiñe üllcha domo 17 tripantu nielu, ca niefui quiñe pichi domo. Feichi trahunche mu quiñe no rume pepi eñseñalquelafeyu Biblia, feimu Ruby correo mu enseñalquefeyu. Ca rupa, ca huiño huitrancontumetufiyiñ ti trahunche. Com feitachi semana mu, ti domo amui trahun mu. Rupachi antü mu, epu domo precursora especialngelu amuingu ñi quelluntucumeal feichi pichi trahunche mu. Fei amulei tañi enseñalelafiel Biblia feitachi domo. Fei pichi rupalu, fautizahui. 30 tripantu rupalu, 1995 mu, ti Betel ruca mülelu Patterson mu, Ruby dungurumeyu quiñe domo. Feitachi domo tañi püñeñ ürque Ruby tañi enseñalelquefiel Biblia. Feitachi domo tañi püñeñ ñi füta engu, amuingu ti Galaad pingechi escuela mu, ti clase numero 100.

Ca rupa feipingeyu tayu huitrancontumeafiel pu trahunche mülelu ponhuitu Florida mapu mu. Feimu duamniefuyu quiñe auto, fei ngillayu quiñe auto faratulelu. Semana niefilu iñchiu, huesañmahui ti auto. Nielafuyu ta plata tayu cüme eltuafiel. Raquiduamiyu quiñe peñi mu tayu quelluaeteu, fei mütrümfiyu. Fei ti peñi huercüfi quiñe tañi cüdaufe tayu cüme eleltuaeteu tayu auto. Ti peñi pilai tayu culliafiel. Feipieyumu: “Chem rume defeniemulan”. Doyelchi mai quisu regalaeiñmu plata. Tüfa quimeltueyumu Jehová cuidaquefi tañi pu che ca rume falin-ngei hulal taiñ nieel.

Huitrancontumefilu pu trahunche, umañqueiñ pu peñi ca pu lamngen ñi ruca mu. Feimu cüme hueniyeuqueiñ. Quiñe antü huirintucufiñ quiñe informe nütramcalu ti trahunche mu. Fei alcanza deumalafiñ, fei tripan. Acutulu iñche, ngüneduamün ti pichi huentru ñi mülen aucanturquei ca pütafcarquefi tati maquina de escribir. Rupafulu rume fentren tripantu, acordafiel mu ayecauqueyu.

1971 tripantu mu, feipingen tañi superintendente de distritongeal Nueva York huaria mu. ¡Lelilehuiyu! 34 tripantu müten niefun feichi mu. Feichi huaria mu, iñche tati hunen curü superintendente, turpu ngequelafui quiñe. Huelu tati pu peñi ca pu lamngen ayühunquechi llohueneu engün.

Feiti elfal cüdau tañi elungeel, iñche rume ayüquefun tañi quimeltual Jehová mu fütraque trahun mu. Fentren superintendente de circuito mülelu fei mu, doi quimün niequefui iñche mu. Quiñe tüfa huli ti hueupin fautizaulu ta iñche. Cangelu, Theodore Jaracz pingelu, coneltulerpui ti Troquiñ Adniechequelu. Ca mülequefui fentren peñi quimün-ngelu mülelu Betel ruca Brooklyn mu. Pu superintendente de circuito ca pu betelita müna cüme duameleneu engün, feimu mañumtuquefiñ. Cüme pefiñ feitachi pu peñi piuqueyen mu cuidaquefi Jehová tañi pu che. Maneluuquefuingün Biblia ñi feipin mu ca ayühunquechi quelluntucuquefingün Jehová tañi  troquiñche. Tañi ñom piuquengen mu engün cüdautulan tañi superintendente de distritongeal.

1974 tripantu mu, ti Troquiñ Adniechequelu elfalcünufi quiñeque superintendente de circuito tañi superintendente de distritongeal. Huelu iñche, superintendente de circuitongetun Carolina del Sur mapu mu. Feichi mu, pu flang che ca curü che elungetui tañi trahual engün. Feimu pu trahunche ca pu circuito müna ayüucülefuingün.

Epe aflu 1976 tripantu, huercüngen tañi huitrancontumeafiel pu trahunche mülelu Atlanta mapu puulu Columbus mapu mu. Quiñe rupa, quechu curü pichiqueche lüfconi tañi ruca, fei laingün. Fei iñche mülefui tañi hulal quiñe hueupin fei engün mu. Tati ñuque pitalconcülefui tañi lüfün mu. Com pu peñi ca pu lamngen, flang che cam curü chengeafui rume, amuquefui pital mu tañi yafültucumeafiel pu chau. Feimu inaduamün tañi rüf piuqueyehun engün. Huelucontu quelluuliyiñ, chaftuafuiñ chem huesaque dungu rume.

1977 mu, tañi domo iñchiu feipingeyu amual Betel Brooklyn mapu mu quiñeque cüyen müten. Elungeyu quiñe cüdau tayu femal. Epe aflu ti cüdau, epu peñi coneltulefulu ti Cuerpo Gobernante mu trahuluhui tañi nütramcayaeteu. Fei ramtueneu engu: “¿Doi tiempo müleafuimu Betel mu?” pieneu. Femayu llemai pifiyu.

24 tripantu mu iñche cüdahun tati Troquiñche Adcünuquelu ti Amuldungun cüdau. Feita mu, pu peñi fill antü reque mülei ñi huiñoldungual cüdaungechi ramtun. Pu peñi, ¿chumngechi huiñoldunguquefi feitachi ramtun? Ti Cuerpo Gobernante rumel hulquei ngülam Biblia mu tripalu. Tüfa quelluquefi pu peñi tañi huiñoldungual feitachi ramtun. Huelu cafei feitachi ngülam quelluquefi pu peñi ñi pepicayafiel pu huitran-ngepaquechi loncolelu, tati pu loncolelu ca pu precursor. Com feitachi dungu quelluquefi pu peñi ca pu lamngen ñi doi fülconcüleal Jehová mu.

1995 tripantu mu ca 2018 tripantu, huitrancontumefiñ fentren Betel ruca caque pais mu mülelu. Trahuluuquefun pu comité de sucursal, pu betelita ca pu misionero iñchiñ. Yafültucuquefiñ ca quelluquefiñ chem rume duamniefule engün. Com pu peñi ca pu lamngen nütramcaeiñmu com tañi rupan engün, fei ta yafültucuqueiñmu. Por ejemplo, 2000 tripantu mu huitrancontumefiyu ti Betel ruca mülelu Ruanda mapu. 1994 tripantu mu fentren che langümcangefui feichi mapu mu. Fentren peñi, lamngen ca pu betelita langümüñmangei tañi familia. Femngechi dungu rupafulu engün rume, ayüucülefuingün ca maneluucülefuingün Jehová mu. Tüfa puhui tayu piuque mu.

Fachantü doi 80 tripantu nieyu. Epu mari rupachi tripantu mu coneltulen tati Troquiñche Adcünuquelu Betel ruca Estados Unidos mapu mu. Iñche turpu amulafun universidad mu, huelu Jehová ca tañi troquiñche fente cüme pepicaqueneu. Tüfa quellueneu tañi enseñayafiel pu che Biblia ñi feipin, femngechi tañi rumel cümelcangeal engün (2 Cor. 3:5; 2 Tim. 2:2). Pefiñ chumngechi Biblia quelluquefi pu che ñi cüme elcünutual ñi mongen engün ca ñi hueniyeafiel ta Jehová (Sant. 4:8). Ruby iñchiu rumel ngülamtuquefiyu pu peñi ca pu lamngen ñi falintuafiel engün tañi quimürpual Jehová mu ca ñi enseñacheal Jehová mu. Chem cüdau mu no rume trürümfal-lafui.