Afta long yia 1940, perens blong mi i stat stadi Baebol wetem ol Witnes blong Jehova. Be afta oli no moa gohed. Nating se i olsem, mama i stap kasem ol Wajtaoa mo Wekap! Long 1950 i gat intenasnal asembli long Niu Yok, mo mifala i go.

Afta long taem ya, Brata Lawrence Jeffries i kam visitim mifala. Hem i traem pulum mi blong lanem trutok. Long stat, mi ting se i moa gud ol Witnes blong Jehova oli joen long politik mo ami. Mi talem long hem se, sipos evri man Amerika oli no wantem joen long faet, bambae i isi blong ol enemi oli tekova long ful kantri. Be long kaen fasin, brata Jeffries i askem se: “?Yu ting se Jehova God bambae i mekem wanem, sipos evri man Amerika oli wosipim hem nao ol enemi oli kam blong atakem olgeta?” Hemia i mekem mi luksave se tingting blong mi i rong, mo mi intres blong lanem trutok blong Baebol.

Mi spenem plante aoa blong ridim ol olfala Wajtaoa mo Wekap! we mama i putum long wan storum. Sloslo mi luksave se hemia trutok, ale mi talem long Brata Jeffries se mi wantem stadi Baebol. Mo tu, mi stat blong go long ol miting. Mi laekem tumas ol samting we mi stap lanem, mo biaen mi kam wan pablisa we i no baptaes. Taem mi kasemsave se “!bigfala dei blong Jehova i klosap finis!” tingting we mi gat long saed blong samting we mi wantem mekem long laef i jenis. (Sef. 1:14) Mi no moa wantem go long yunivesiti, be mi wantem halpem ol narafala blong oli lanem trutok blong Baebol.

Mi finis long sekendri skul long 13 Jun 1956, mo tri dei biaen mi baptaes long seket asembli. Long taem ya, mi no save nating se bambae mi kasem plante blesing, from mi yusum laef blong mi blong  kasemsave mo tijim ol narafala long saed blong Jehova.

Sikis manis afta we mi baptaes, mi kam wan fultaem paenia. Long Kingdom Wok blong Disemba 1956, i gat wan haf we i se: “Can You Serve Where the Need Is Great?” Mi luk se mi naf blong mekem samting ya. Mi wantem prij long ol ples we i gat smol man nomo blong talemaot gud nius.—Mat. 24:14.

Mi muv i go long Edgefield, long South Carolina. Long kongregesen ya, i gat fo pablisa nomo, mo taem mi go, naoia mifala faef. Mifala i stap mekem ol miting long haos blong wan brata. Evri manis mi spenem 100 aoa long wok blong prij, mo mi bisi blong lukaot long wok ya mo blong mekem ol haf blong miting. Taem mi mekem moa wok long kongregesen, mi stap kasemsave moa long saed blong Jehova.

Mi stap stadi wetem wan woman we i stap long Johnston, wan taon we i no longwe tumas. Woman ya i gat wan haos we ol man oli stap yusum blong mekem ol funerol long hem. Mo hem i kaen tumas blong letem mi mi wok haftaem blong hem. Mo tu, hem i letem mifala i yusum wan smol haos blong hem, olsem Haos Kingdom.

Brata Jolly Jeffries, we i boe blong brata we i bin stadi wetem mi, i aot long Brooklyn, Niu Yok i kam, mo hem i kam paenia patna blong mi. Mitufala i laef long wan smol haos trak we wan brata i letem blong mitufala i yusum.

Long Saot, salari i smol we i smol. Pei we mifala i kasem long wan dei, hem i samwe tu handred o tri handred vatu. Wan taem, mi yusum olgeta mane blong mi blong pem kakae long wan stoa. Mo taem mi kamaot, wan man i askem mi se: “?Yu wantem wok? Bae mi pem yu wan handred vatu long wan aoa.” Man ya i mekem mi wok tri dei blong klinim wan ples blong konstraksen. Mi luksave klia se Jehova i stap halpem mi blong mi stap nomo long Edgefield. Nating se salari blong mi i no bigwan tumas, be yet mi naf blong go long intenasnal asembli long Niu Yok, long 1958.

Long nambatu dei blong asembli, wan nambawan samting i hapen. Mi mitim Ruby Wadlington, we hem i wan fultaem paenia long Gallatin, Tennessee. From we mitufala tugeta i wantem kam misinari, mitufala i joen long miting blong olgeta we oli intres blong go long Gilead, long asembli ya. Samtaem afta, mitufala i stat raetem leta long mitufala. Biaen, oli askem mi blong go givim wan pablik tok long Gallatin. Long taem ya, mi tekem janis blong askem hem blong i maredem mi. Afta, mi muv i go long kongregesen blong Ruby, mo mitufala i mared long 1959.

Taem mi gat 23 yia, oli putumap mi olsem jeaman blong kampani blong ol elda (we naoia yumi singaot se kodineta blong bodi blong ol elda) long Gallatin. Taem Charles Thompson i stat blong mekem wok blong eria elda, faswan  kongregesen we hem i visitim hemia blong mifala. Nating se hem i gat plante ekspiriens, be hem i askem tingting blong mi long saed blong ol samting we ol brata mo sista oli nidim, mo samting we ol narafala eria elda oli mekem taem oli visitim mifala. Mi lanem wan impoten lesen long hem, hemia se i gud mi askem kwestin mo kasem ol stret infomesen, bifo we mi mekem wan desisen.

Long Mei 1964, oli invaetem mi blong joen long Kingdom Ministri Skul blong wan manis, long South Lansing, Niu Yok. Ol brata we oli lidim skul ya, oli tij long wan fasin we i pulum mi blong wantem kasemsave moa long Jehova, mo kam klosap moa long hem.

Long Jenuware 1965, oli askem mi blong mekem wok blong eria elda. Faswan eria we mi mo Ruby i wok long hem i bigwan, i stat long Knoxville, Tennessee, i go kasem klosap long Richmond, Virginia, wetem ol kongregesen long Not Carolina, Kentucky, mo Wes Virginia. Mitufala i visitim nomo ol kongregesen we ol blakman oli stap long hem, from we long taem ya loa blong Yunaeted Stet long saot i no letem ol blakman mo waetman oli joen wanples. Ol brata mo sista oli pua, mo mitufala i lanem blong serem samting wetem olgeta we oli gat nid. Mi lanem wan impoten lesen long wan brata we i mekem wok blong eria elda longtaem, se: “Taem yu visitim ol kongregesen, yu no mas mekem olsem se yu yu bos. Yu save halpem olgeta nomo, sipos oli luk yu olsem wan brata blong olgeta.”

Taem mitufala i visitim wan smol kongregesen, Ruby i stat stadi wetem wan yangfala woman we i gat wan smol gel blong wan yia. Be from we i no gat wan long kongregesen i save mekem stadi blong woman ya, Ruby i mekem stadi blong hem tru long leta. Long nekis visit blong mitufala, woman ya i stat kam long ol miting. Biaen, tu spesel paenia i muv i kam long kongregesen ya, ale tufala i gohed blong stadi wetem woman ya, kasem we hem i baptaes. Teti yia biaen, long 1995, long Betel long Patterson, wan yangfala sista i kam talem halo long Ruby. Sista ya i gel blong woman ya we Ruby i bin stadi wetem hem. Gel ya mo hasban blong hem, tufala i studen blong namba 100 klas blong Gilead Skul.

Nambatu eria we mitufala i wok long hem, hemia long sentrol Florida. Mitufala i nidim wan trak, so mitufala i pem wan long wan gudfala praes. Be long faswan wik, enjin i brok. Mitufala i no gat mane blong riperem. Ale, mi ring long wan brata we mi ting se hem i save halpem mitufala. Hem i askem wan wokman blong hem blong i fiksimap trak, mo hem i no wantem se mitufala i pem hem. Hem i talem se: “Yutufala i no nid blong pem.” !Antap long hemia, hem i givim smol mane long mitufala olsem presen! Hemia i wan nambawan eksampol we i soem se Jehova i stap lukaot gud long ol man blong hem. Hemia i rimaenem mitufala tu se mitufala i mas glad blong givim samting long narafala.

Taem mitufala i visitim ol kongregesen, plante taem mitufala i slip long haos blong ol brata mo sista. Hemia i mekem se mitufala i gat plante gudfala fren. Wan dei, mi stat blong taepem wan ripot long saed blong wan kongregesen, be mi no finisim, so mi lego i stap long taepraeta, nao mi aot. Taem mi kambak, mi faenemaot se smol boe blong famle ya, we i gat tri yia, i bin traem blong “halpem” mi blong taepem flatem ripot ya. Blong plante yia, mi stap jikim hem from.

Long 1971, oli askem mi blong mekem wok blong distrik elda long Niu Yok. !Mitufala i sapraes tumas! Long taem ya, mi mi gat 34 yia nomo. Ol brata mo sista oli welkamem gud mi, from we mi mi faswan blak brata we mi mekem wok blong distrik elda.

Taem mi mekem wok blong distrik elda, evri wiken long wan seket asembli, mi tijim ol man blong saed blong Jehova. Plante eria elda oli gat moa ekspiriens i bitim mi. Taem mi mi baptaes, wan long olgeta i mekem tok blong baptaes. Wan narawan, hemia Theodore Jaracz, samtaem biaen hem i kam wan memba blong Hed Kampani. Mo tu, i gat plante brata we oli gat ekspiriens oli wok long Betel long Brooklyn. Mi glad tumas se ol eria elda mo ol Betelaet ya oli no mekem se mi fraet long olgeta. Mi luksave se ol gudfala man ya blong lukaot long sipsip, oli dipen long Tok blong  God mo oli sapotem gud oganaesesen. From we oli gat tingting daon, hemia i mekem i isi long mi blong mekem wok blong distrik elda.

Long 1974, Hed Kampani i jusum sam narafala eria elda blong mekem distrik wok, mo mi mi gobak long wok blong eria elda, be naoia long Saot Carolina. Long taem ya, ol waetman mo blakman oli save joen wanples long ol kongregesen mo ol seket. Hemia i mekem ol brata mo sista oli glad tumas.

Long en blong 1976, oli sanem mi mi go long eria blong Georgia, we i stap bitwin Atlanta mo Columbus. Mi tingbaot yet taem ya we mi mekem funerol tok blong faef blak pikinini we oli ded taem wan man i bonem haos blong olgeta. Mama blong olgeta i admit long hospital from ol kil we hem i kasem. Plante Witnes blong Jehova, ol blakman mo waetman, oli kam long hospital blong leftemap tingting blong tufala. Lav we ol brata mo sista ya oli soemaot i nambawan tumas. Taem ol man blong God oli soem sore, oli givgivhan long olgeta blong stanap strong long ol had situesen.

Long 1977, oli askem mitufala blong kam long Betel long Brooklyn blong sam manis, blong givhan long wan projek. Taem klosap projek ya i finis, tu memba blong Hed Kampani oli storian wetem mi, mo oli askem sipos mi mo Ruby i glad blong wok fultaem long Betel, mo mitufala i akseptem.

Blong 24 yia, mi wok long Sevis Dipatmen, we plante taem ol brata oli mas ansarem ol had kwestin. Long ol yia we oli pas, Hed Kampani i stap givim ol advaes we i laenap wetem ol rul blong Baebol. Hemia i givhan long Sevis Dipatmen blong ansarem ol kwestin, mo oli yusum tu blong trenem ol eria elda, ol elda, mo ol paenia. Trening ya i bin halpem plante Kristin blong oli gru long saed blong spirit. Mo tu, i halpem oganaesesen blong Jehova blong i kam strong moa.

Stat long 1995 kasem 2018, hedkwota i sanem mi blong visitim plante defren branj ofis, we bifo oli singaot ol brata olsem se, son ovasia. Mi mit wetem Branj Komiti, ol Betelaet, mo ol misinari, blong enkarejem olgeta mo halpem olgeta. Mo oltaem ol brata mo sista oli enkarejem mi mo Ruby tu. Eksampol, taem mitufala i visitim Ruwanda long yia 2000, ol brata sista mo Betel famle oli tokbaot taem ya we wan laen blong man i traem kilim i ded ol man blong wan narafala laen, long 1994. Samting ya i tajem hat blong mitufala. Plante oli lusum ol famle mo fren blong olgeta. Nating se oli gotru long hadtaem ya, be oli soemaot bilif, oli gat hop, mo oli glad.

Naoia mitufala i gat bitim 80 yia. Long ol 20 yia we i pas, mi bin wok wetem Branj Komiti blong Yunaeted Stet. Mi no go long yunivesiti, be mi kasem beswan edukesen long Jehova mo oganaesesen blong hem. Hemia i halpem mi blong tijim ol narafala long trutok blong Baebol we i save givhan long olgeta blong olwe. (2 Kor. 3:5; 2 Tim. 2:2) Mi luk olsem wanem mesej blong Baebol i halpem ol man blong gat wan gudfala laef mo blong oli fren wetem Krieta blong olgeta. (Jem. 4:8) Mi mo Ruby i gohed blong enkarejem ol narafala blong tinghae long blesing ya blong kasemsave long Jehova, mo tijim trutok long ol narafala. !Hemia beswan wok we wan man blong Jehova i save kasem!