Bas awal tahun 1940-en, erlajar Pustaka orang tuaku ras Saksi Jahwe. Dungna ngadi kalak e erlajar, tapi lalap Mamak langganen majalah Sora Ermomo ras Perdiatekenlah! Bas tahun 1950, ikut keluargaku bas pertemuan internasional i New York City.

La ndekah kenca si e, Senina Lawrence Jeffries reh ndahi kami. Usahakenna nampati aku erlajar kebenaren. Tangtangna, la aku setuju ras Saksi Jahwe perban kalak e la nggit terlibat bas politik janah la nggit ikut dinas militer. Kukataken man bana uga adi kerina kalak bas Amerika la nggit erperang, banci kari reh musuh janah rebutna negara e. Tapi sabar Senina Jeffries nampati aku, nina, “Menurutndu, adi kerina kalak si lit bas Amerika ngelayani Jahwe, sinik saja nge Jahwe adi lit musuh si nyerang kalak e?” Kai si katakenna e ras penjelasenna si deban nampati aku meteh maka salah cara rukurku e. Enda erban reh merhatna aku erlajar kebenaren.

Erjam-jam aku mbaca majalah Sora Ermomo ras Perdiatekenlah! terbiten si ndekah si itama Mamak bas ruangen si lit i teruh taneh. Dungna sadar aku maka kebenaren me si sangana kupelajari, emaka nggit aku erlajar Pustaka ras Senina Jeffries. Reh ka aku ku perpulungen alu ratur. Keleng kel ateku kai si enggo kupelajari, janah jadi perberita si meriah me aku. Cita-citaku pe enggo berubah sanga kuangka maka “wari Jahwe si mbelin enggo ndeher!” (Sep. 1:14) Lanai ateku kuliah, tapi kusampati ateku kalak si deban erlajar kebenaren.

Bas tanggal 13 Juni 1956, lulus aku SMA. Telu wari kenca si e, iperidiken aku bas pertemuan  wilayah. Kugunaken ateku geluhku erlajar kerna Jahwe ras ngajari kalak kerna Ia. Kepeken, keputusenku e erban mbue kudat pasu-pasu arah Jahwe.

Enem bulan kenca aku iperidiken, jadi perintis biasa aku. Bas Pelayanenta man Kinirajan Dibata Desember 1956, lit artikel si judulna “Banci nge kam ngelayani bas ingan si merluken terbuen perberita?” Teriahken aku ngelakokenca. Nggit aku nampati runggun si sitik denga perberitana.​—Mat. 24:14.

Pindah aku ku runggun i Edgefield, Karolina Selatan. Bas runggun e empat kalak ngenca perberitana. Kami perpulungen bas rumah sekalak turang seninata. Tiap bulan 100 jam aku erberita. Sibuk kel aku mpeseh melala bagin bas perpulungen. Reh buena si kulakoken, reh buena ka si kupelajari kerna Jahwe.

Lit sekalak diberu si erlajar Pustaka ras aku. Lit rumah dukana i Johnston, la ndauh arah Edgefield nari. Mehuli kel ia, berekenna aku dahin si tuhu-tuhu kuperluken paksa si e. Berekenna ka pake kami sada ruangen si kitik bas ingan e jadi ingan kami perpulungen.

Jolly Jeffries eme anak senina si mbarenda nampati aku erlajar Pustaka. Pindah ia arah Brooklyn, New York, janah ia me temanku merintis. Kami tading bas motor si ipinjamken turang senina man kami.

Sitik kel gaji bas Amerika Serikat bagin Selatan. Gaji sada wari, dua ntah pe telu dolar ngenca. Bas sada waktu, sitik nari ngenca tading senku. E pe enggo keri nukur pangan bas sada toko. Sanga ndarat aku toko e nari, lit si ndeheri aku janah sungkunna aku, nina, “Perlu kam dahin? Kubere kari gajindu sada dolar sada jam.” Kualoken dahin e, erdahin aku mbersihken sada ingan pembangunen telu wari dekahna. Banci kugejapken maka sampati Jahwe aku tetap ngelayani i Edgefield. Amin pe la mbue senku, banci aku ikut ku pertemuan internasional i New York City bas tahun 1958.

Wari peduaken bas pertemuan e istimewa kel kuakap. Jumpa aku ras Ruby Wadlington. Ia ngelayani jadi perintis biasa i Gallatin, Tennessee. Duana kami merhat jadi utusen injil, emaka ikut kami bas pertemuan guna Sekolah Gilead. Kenca si e, sikirim-kirimen surat kami. Bas pudi wari, iundang aku mpeseh khotbah i Gallatin. I je me kulamar Ruby. Dungna pindah aku ku runggun Ruby, janah erjabu kami bas tahun 1959.

Sanga umurku 23 tahun, ilantik aku jadi si nampati perpulungen (gundari igelari koordinator badan pertua) i Gallatin. Runggun kami me runggun si pertama idahi Senina Charles Thompson sanga ia mulai jadi pertua keliling. Situhuna, mbue kel pengalamenna. Tapi sungkunna pendapatku kerna keperlun turang senina  ras uga cara pertua keliling si sebelumna nampati kalak e. Erlajar aku arah ia maka mejile kel adi nungkun kita lebe ras sidarami lebe kerina faktana sope erban keputusen.

Bas bulan Mei 1964, iundang aku ku Sekolah Pelayanan Kerajaan si iban i South Lansing, New York sada bulan dekahna. Sekolah e erban merhat aku erlajar terbuen kerna Jahwe ras reh deherna ras Ia.

Bas Januari tahun 1965, iundang aku jadi pertua keliling. Mbelang kel daerah tugas kami si pertama, mulai arah Knoxville, Tennessee, si ndeher ku Richmond, Virginia. Termasuk ka runggun-runggun si lit i Karolina Utara, Kentucky, ras Virginia Barat. Runggun si kudahi eme runggun si mbiring kulitna ngenca, perban paksa si e bas Amerika Serikat bagin selatan lit undang-undang si ngelarang kalak si mbiring kulitna pulung ras kalak si mbenter kulitna. Turang senina si i je mesera pergeluhna, emaka mon-mon sampati kami kalak e. Selain si e, lit ka pertua keliling si enggo erpengalamen si mereken sada pelajaren si penting man bangku, nina, “Sanga dahindu runggun ula kam bagi bos, bagi sekalak senina lah kam. Banci sampatindu turang senina, adi anggapna kam seninana.”

Sanga dahi kami sada runggun si kitik, lit sada diberu si nguda denga si erlajar Pustaka ras Ruby, janah lit sada anakna diberu si umurna sada tahun. Perban bas runggun e la lit sada pe si banci ngajarken Pustaka man diberu e, Ruby si ngajarisa arah surat. Bas kunjungen kami berikutna, diberu e enggo ratur reh ku perpulungen. Bas pudi wari, lit dua perintis istimewa pindah ku runggun e, kalak e me si ngelanjutken pelajaren ras diberu e, janah la ndekah kenca si e iperidiken me ia. Kira-kira 30 tahun kenca si e, bas tahun 1995, i Patterson Betel, lit sekalak diberu si nguda denga si njumpai Ruby. Kepeken ia anak arah diberu si pernah erlajar Pustaka ras Ruby mbarenda. Ia ras dilakina jadi siswa bas Sekolah Gilead kelas pe-100-ken.

Daerah kunjungen kami si peduaken eme ku Florida bagin tengah. Paksa si e perlu kami motor, emaka tukur kami motor si murah ergana. Tapi, sada minggu denga pe pake kami, mis lit si ceda bas mesinna. La lit sen kami mpekenasa. Emaka kupindo penampat turang senina si banci kuakap nampati kami. Suruhna si erdahinna mpekena motor kami. Tapi la ia nggit galari kami. Berekenna ka kami sen. Enda bukti si luar biasa maka bereken Jahwe keperlun umatNa. Kami pe erlajar gelah nggit mere man kalak si deban.

Sanga idahi kami sada runggun, erberngi kami bas rumah turang seninata. Emaka melala dungna teman kami. Bas sada wari, tading aku bas rumah sekalak turang senina. Mulai kuketik laporen kerna sada runggun alu mesin tik. Tapi, lenga pe dung kuban laporen e arus aku lawes. Kepeken berngina, sanga mulih aku, anak keluarga ingan kami erberngi e, si umurna telu tahun enggo “nampati” aku ndungi laporenku ndai. Perban main-mainina mesin tik e, dungna arus kuketik mulihi laporen e. Ertahun-tahun kenca si e, tiap jumpa aku ras ia, rusur aku erjagar-jagar kerna si e.

Bas tahun 1971, sengget kel aku sanga kudat surat penugasen guna ngelayani jadi pengawas distrik i New York City. Sanga si e umurku 34 tahun denga, janah aku me pengawas distrik si pertama si mbiring kulitna. Tapi meriah ukur turang senina ngalo-ngalo kami.

Selaku pengawas distrik, meriah kel kuakap ngajar kerna Jahwe tiap akhir pekan bas pertemuan wilayah. I je, enterem pertua keliling si buen pengalamenna asangken aku. Salah sada arah kalak e eme si mpeseh khotbah sanga aku iperidiken. Selain si e lit ka senina Theodore Jaracz, si dungna jadi anggota Badan Pinpinen. Enterem ka turang senina si mbue pengalamenna si ngelayani i Betel Brooklyn. Ngata bujur kel aku perban amin pe mbue pengalamen kalak e, tetap kalak e meteruk ukur. Meriah kuakap kerja sama ras kalak e. Banci kuidah maka kalak e eme permakan-permakan si perkeleng, ngandalken Kata Dibata, ras setia ndukung organisasi. Emaka meriah kuakap ndahiken tugasku selaku pengawas distrik.

Bas tahun 1974, itugasken Badan Pinpinen piga-piga pertua keliling jadi pengawas distrik, janah aku itugasken mulihi jadi pertua keliling. Daerah tugasku sekalenda eme Karolina Selatan. Paksa si e, bas Amerika Serikat bagin selatan, kalak si mbentar kulitna ras si mbiring kulitna enggo banci ras-ras pulung. Emaka meriah kel ukur turang senina.

Bas pendungi tahun 1976, itugasken aku ku wilayah Georgia si lit antara Atlanta ras Columbus. Jelas denga kel kuinget sanga kupeseh khotbah penguburen paksa lit lima anak si mbiring kulitna mate perban itutung kalak rumahna. Mamak kalak e masuk rumah sakit perban luka-luka. Saksi-Saksi Jahwe mis rehen ku rumah sakit guna ngapuli kalak e, la soal si mbiring kulitna ntah pe si mbentar kulitna. Kuidah alu jelas maka luar biasa kel kekelengen si icidahken turang senina. Kekelengen si bage me si nampati umat Jahwe banci megenggeng ngadapi keadan si seh kel serana.

Bas tahun 1977 iundang kami ngelayani i Betel Brooklyn guna nampati bas sada proyek piga-piga bulan dekahna. Sanga nandangi dung proyek e, ijumpai dua anggota Badan Pinpinen aku janah sungkunna nggit ntah lang aku ras Ruby ngelayani jadi anggota tetap bas Betel. Aloken kami undangen e.

Lit 24 tahun dekahna aku erdahin bas Departemen Dinas. I je rusur kami arus njawap penungkunen-penungkunen si mesera. Tapi, lalap ibereken Badan Pinpinen petunjuk si sesuai ras prinsip Pustaka. Petunjuk e nampati Departemen Dinas njawap melala penungkunen. Petunjuk e pe banci igunaken ngelatih pertua keliling, pertua-pertua, ras perintis. Kerina pelatihen e erban enterem umat Jahwe maju secara rohani janah kalak e banci mpepaguh organisasi Jahwe.

Mulai tahun 1995 seh ku 2018, kudat kesempaten ngelayani jadi wakil kantor pusat (mbarenda igelari pengawas zona). Melala kantor cabang si kudahi guna njumpai Panitia Cabang, anggota Betel, ras utusen injil. Kupegegehi ras kusampati kalak e adi lit masalahna. Aku ras Ruby lalap terpegegehi megi pengalamen turang senina si jumpai kami. Contohna, sanga reh kami ku Rwanda bas tahun 2000. Bas tahun 1994, terjadi genosida bas negri e. Perban si e, mesera kel situasi turang senina i je, termasuk keluarga Betel. Enterem si kebenen kalak si ikelengina paksa si e. Terpegegehi kel kami megi cerita kalak e. Amin pe ngadapi situasi si mesera, turang senina e tetap erkiniteken, erpengarapen, ras ermeriah ukur.

Gundari umur kami enggo 80-en. Enggo lit 20 tahun dekahna aku ngelayani jadi anggota Panitia Cabang bas Amerika Serikat. Memang la pernah aku kuliah, tapi enggo kualoken pendidiken si meganjangna arah Jahwe ras organisasiNa. Enda nikapken aku guna ngajarken kebenaren Pustaka si banci erguna seh rasa lalap. (2 Kor. 3:5; 2 Tim. 2:2) Enggo kuidah uga berita arah Pustaka nampati kalak gelah reh ulina kegeluhenna ras gelah rembak ras Penciptana. (Jak. 4:8) Tiap lit kesempaten, aku ras Ruby rusaha gelah teh kalak maka luar biasa kel kesempaten erlajar kerna Jahwe ras ngajarken kebenaren Pustaka. Enda me hak istimewa si mbelinna si banci idat umat Jahwe!