Aba hagumeserun nagübürigu aturiahoun Bíbülia hama gefentiña luagu Heowá lidan lagumeseha irumu burí bián wein. Dan lárigiñe aba meha hígiruni haturiahan, ánhounti núguchu sigitu eresibiroun Garüdia Awisahatu tuma Agaguduabá! Lidan irumu 1950, aba ladügǘniwa aban adamurini uburugu Newayóru, le ñein lubéi hachülaagua íbirigu ha lídangiñetiña ámuñegueinarügü ageiraü ani ñǘdüntiña niduheñu.

Murusun dan lárigiñe, aba lagumeserun íbiri Lawrence Jeffries abisidahawa ani aba láfaagun lun larufudahani inarüni nun. Wuribati meha narihin lun masudarahan hamá gefentiña luagu Heowá ani mádaragun hagía houngua lidoun polítika. Aba meha nariñagun lun íbiri Lawrence Jeffries, ánhaña hamuga amahada sun merigana houdin awuribuha, hebeluruba hamuga áganiñu árügüdei ageiraü. Lau gurasu, adügati íbiri Jeffries lun nasaminarun lau ladügün álügüdahani burí nun. Aba lálügüdünina: “Saminabá luagu le, kaba hamuga ladüga Heowá lun hamuga sun lan gürigia ha yáabaña Meriga eseriwida lun lárigiñe aba hábürühan áganiñu luagu ageiraü?”. Le lafuranguagüdübei nun luagu katei le luma burí luagu amu, íderagua lumutina lun narihini luagu chará lan ligaburi nisaminan ani adügati lira lun nabusenrun naturiahanu Bíbülia.

Sügütina saragu oura aliihoun binadu Garüdia Awisahatu tuma Agaguduabá! to meha tareidahaboun núguchu lidan rumu le tábugiñebei muna. Lau lásügürün dan, aba níchugun fe luagu nafurendeiruñein lan inarüni, ligíati nánharunbei lun líchugun íbiri Jeffries aturiahani nun. Aba giñe nagumeserun abasiiha adamuridagua. Aba lachülürün inarüni tidoun nanigi, ani aba giñe nagumeserun apurichihei uganu buiti. Aba lasansirun le nabusenrubei nadügün dan le gunfuranda nubalin “yarafaali lan lanarime luéyuri Aburemei” (Sof. 1:14). Lubaragiñe meha nasigirun asaminara tuagu luba furendei íñuti, guentó busenhadina meha níderagun amu lun hafurendeiruni inarüni le tídanbei Bíbülia.

Gumú numuti naturiahan 13 lidan sisi-hati irumu 1956 ani ǘrüwa weyu lárigiñe aba nabadiseirun lidan aban adamurini sirkuitu. Masaminaruntina yebe neresibiruba  lan saragu abiniruni lau nederegeruni nibagari afurendeira luagu Heowá luma narufudahani inarüni.

Sisi hati lárigiñe nabadiseirun, aba nadügagun nungua prekursorume. Anihein aban aturiahani tidan Ministerio del Reino to lánina duusu-hati irumu 1956 le ínchahabaliña íbirigu lun heseriwidun lidan fulasu le ñein lubéi mégeiwa hamá hanwoun apurichihatiña. Sanditina kamá hamuga nun lariñawagúa katei le; lugundun busentina meha nídehan le ñein lubéi lougua hamá apurichihatiña uganu buiti (Mat. 24:14).

Aba náguyun Edgefield (Karolina le Suru), lidoun aban damuriguaü le ñein habéi gádürü apurichihatiña. Numoun seingü. Aba wadügüni adamuridaguni lúbiñe aban íbiri. Sagü hati nadügün 100 oura lidan ministeriu. Bereseguñadina meha lidan apurichihani etenira lun nidasin luma íchiga yanu lidan adamuridaguni. Wéiritu nanigi, dan narihin eibu lan naganwoundagüdüni neseriwidun lun Heowá, éibutima nafurendeirun luagu.

Anuhein meha aban gürigia to unboun níchiga aturiahani tabureme meha aban talugurahagüle ganhun Johnston, lidan aban aüdü yarafati. Ma meha lubuidun tigaburi rutu wadagimanu nun lun meha nawadigimaridun fiu oura ani ígiratu meha lun wayusurunu aban tiraüraü muna to túmaboun lun gayara lan wanügünu keisi Luban Wadamuridagun.

Aba giñe láguyun Jolly Jeffries, liráü íbiri le meha íchugubei aturiahani nun Brooklyngiñe (Newayóru), lidoun meha fulasu le ñein lubéi neseriwida ani ligía aban hádangiñe nupaaná dan le prekursoru nubéi. Tidan meha aban tiraüraü karü to ayusurúboun kei muna wawinwanda to lafuredeihaboun aban íbiri woun.

Ǘnabuti meha fáyeiti suru Meriga. Biama o ǘrüwa meha dólarü nagañeirun luagu weyu. Aban weyu, sun liña meha nagastaruni lagumuhóun gáwanaü le númabei lun nagañeihan éigini; dan le náfuridunbei tídangiñe chapu, aba layarafadun aban gürigia nun ani aba lálügüdünina: Báluahaña san wadagimanu? “Nafayeirubadibu aban dólarü luagu oura”. Nadagimeintina lun, luagu ǘrüwa weyu arumadahei aban fulasu lun bunaguaü. Furanguti meha narihini líderaguñadina lan Heowá lun nerederun Edgefield. Íbini sügǘ le gádanbalina ñǘdüntina meha lidan aban adamurini le adügǘbei uburugu Newayóru lidan irumu 1958, ñein lubéi hachülüra íbirigu lídangiñetiña ámuñegueinarügü ageiraü.

Lidan libiaman weyu lani adamurini aba lasuseredun aban katei espechaliti. Weyu ligía, ligía nasubudirunu Ruby Wadlington, prekursora meha Gallatin (Tennessee). Kei le biángubei lan wagía busentiwa meha lun misionérugu wamá, ligía woudibei lidan adamurini houn ha busenbaña houdin tidan Leskuela Galaadü. Dan lárigiñe, aba wagumeserun abürüha gárada wámagua. Aba nagunbirahoun lun nidin íchiga yanu Gallatin, meferidirun numuti chansi ligía aba nálügüdünu Ruby anhein busén tubéi tamarieidun numa. Aba náguyun lidoun damuriguaü le ñein tubéi, ábati wamarieidun lidan irumu 1959.

Wein-ǘrüwa meha irumu nau dan le niridúnbei Gallatin lun narihin lau damuriguaü, uguñe weyu wáwati houn ha arihibaña lau dasi le (íbiri le arihibei lau hadasin wéiyaaña). Wagía meha furumiñeti damuriguaü le lunbei labisidahani aban óunigiruti sirkuitu iserigili le gíribei Charles Thompson. Aban meha wügüri gíbeti  lisubudin. Íbini ítara, álügüdagua lumutina ka lan hemegeirubei íbirigu ani ka lan hadügübei amu óunigirutiña sirkuitu lun haransehani ítaga turobuli. Furendeitina lúmagiñe buidu lan lálügüdaha gürigia luma lun lasubudiruni katei buidu lubaragiñe lanúadiruni le lunbei ladügüni.

Lidan seingü-hati irumu 1964, aba nagunbirahoun lun nidin tidan Escuela del Ministerio del Reino, to aduraruboun aban hati ani uburugu South Lansing (Newayóru). Ha meha arufudahabaña tidan leskuela to adügatiña lun nasigirun afurendeira saragu lúmagiñe Heowá luma lun naganwoundagüdüni numadagua luma.

Lidan eneru irumu 1965 aba nagunbirahoun eseriwida kei óunigiruti sirkuitu úara tuma Ruby. Aba wóunahouniwa eseriwida lidan aban sirkuitu le wéiriti, lagumesera lúmagiñe Knoxville (Tennessee) darí Richmond (Virginia). Lidan sirkuitu ligía anihein damuriguaü le Karolinabei nórute laganagua luma le Kentuckybei luma giñe damuriguaü le Virginia Occidentalbei. Damuriguaü le ñein habéi íbirigu wuritiña ligía meha nabisidahanbei, ladüga dan meha ligía hanarimeti meha fánreinguaü lani rasa suru libiti Meriga, ligíati siñati meha hadamuridagun wuritiña úara hama harutiña. Gudemetiña meha íbirigu ha ñéinbaña, ligía wafurendeirubei afanreinhei wámati hama ha mégeibaña. Arufudahati aban óunigiruti sirkuitu le barühalibei saragu dan eseriwida lun Heowá aban katei súdiniti nun. Aba lariñagun nun: “Óuseraba kei aban íbiri. Machülürabá lidan damuriguaü kamá hamuga ábuti amürü houn íbirigu. Gayaraati bíderaguniña súnwandan dan le harihinibu kei aban íbiri”.

Aban weyu, wabisidahaña meha aban liraüraü damuriguaü dan le tagumeserunbei Ruby íchiga aturiahani tun aban gürigia nibureintu ani gasaanitu meha aban würi irahü aban irumu tau. Kei ua tan amu gürigia lun tetenirun íchiga aturiahani tun, aba tasigirun Ruby íchiga aturiahani tun tuéigiñe gárada. Dan le wagiribudun abisidahei damuriguaü, ñǘdüntu aturiahatu to lidan sun adamuridaguni. Murusun dan lárigiñe, aba háguyun bián würiña prekursorugu espechalitiña lidoun fulasu ligía aba hasigirun íchiga aturiahani tun gürigia tuguya darí tabadiseirún. Kei burí 30 irumu lárigiñe, lidan irumu 1995, aba tayarafadun aban íbiri nibureintu tun Ruby tidan Beteli Patterson, aba tabusurun tun. Tiráü meha gürigia to aturiahaboun tuma Ruby. Taturiahaña meha irahü to luma tani weiriei lidan külase 100 tidan Leskuela Galaadü.

Florida ligía libiaman sirkuitu le wabisidahabei. Lidan dan ligía, mégeitiwa meha aban karü. Ligía wagañeihabei aban lau aban ebegi buiti. Lidan furumiñeti dimaasu wau ayusuroun aba lagadeirun bonba lani duna ani maseinsuntiwa meha lun waranseruni. Saminatiwa luagu aban íbiri le gayaraabei líderaguniwa, aba nagúarun lun. Aba lariñagun lun aban hádangiñe ha nadagimeinbaña luma lun laranserunu karü ani máhati lun wafayeiruni. Ariñagarügüti: “Madueirun humutina ni kata”. Ani lanwoun lira aba ledewehan seinsu woun. Aban lubuidun hénpulu lira woun luagu ida liña lan lóunigiruniña Heowá lubúeingu ani haritaguagüda lumutiwa luagu lisudinin gíchigadi wamá.

Súnwandan dan meha wabisidahani damuriguaü aba burí werederun hábiñe wábirigu, adügati katei le lun wadügün buiti umadagu hama. Luagu aban weyu, aba nígirun aban gárada lani ariñahani luáguti damuriguaü ligibuagun númahina le abürügülei sin nagumuchunu abuinchagüda. Dan le nagiribudun rábounweyu ligía, aba níchugun fe “íderagua lánina ” irahü le ǘrüwabei irumu lau, le tídanbei muna to ñein lubéi weredera agumuchei ariñahani ligía. Dandu ligía kei au éherahatiwa ladüga katei le luagu saragu irumu.

Lidan irumu 1971, resibitina aban gárada le ñein lubéi lichugúa dasi nun lun nidin eseriwida kei óunigiruti distritu uburugu Newayóru. Adügati katei le lun taweiridun wanigi saragu. Málügili meha lúmagiñe nagunfulirun 34 irumu dan le wáguyun ñeinhin. Au meha furumiñe hani óunigiruti distritu wuriti, lau sun lira resibi hamutina íbirigu lau ugundani.

Lidan nidasin kei óunigiruti distritu hínsiñeti meha nun narufudahani inarüni luáguti Heowá lidan lagumuchagüle dimaasu lidan adamurini sirkuitu. Saragu hádangiñe óunigirutiña sirkuitu gíbeti meha hasubudirun nuéi. Aban hádangiñe ligía íchugubalin yanu lani badisei dan le nabadiseirunbei. Le aban hádangiñe, Theodore Jaracz, lau lásügürün dan ligía aban hádangiñe lílana Musu Úaraguati. Añahein giñe saragu íbirigu hadan subudihaña saragu ha eseriwidubaña Betelirugun Brooklyn. Wéiriti weteingiruni adüga hamá óunigirutiña sirkuitu ha, hama ha eseriwidubaña Betelirugun lun buidu lan nasandiragun nungua. Ariha numuti nungua aban hamá alidihatiña buítiña ani hínsiñehabutiña íbirigu ha, ha afiñebaña tuagu Lererun Bungiu ani ídehatiña lau úaraguni tidan lóundarun Heowá. Ladüga ǘnabugu hamá, ménrenguti nun lun aban nan óunigiruti distritu.

Lidan irumu 1974, aba líchuguni Musu Úaraguati dasi lun aban sétanu óunigiruti sirkuitu lun hóunigirun distritu. Ligía nagiribudunbei nárigoun kei óunigiruti sirkuitu Karolina lani suru. Gúndaatiwa, lugundun dan ligía lídanhaña aban íbirigu wuritiña hama íbirigu harutiña lidan damuriguaü luma lidan sirkuitu ani gúndaatiña giñe íbirigu ladüga katei le.

Lidan lagumuchagüle irumu 1976, aba hóunahanina eseriwida kei óunigiruti sirkuitu Georgia, le lamidanguabei Atlanta luma Columbus. Mabulieidun nubéi weyu le ñein lubéi níchiga aban yanu lánina ábunahani hani seingü irahüñü wuritiña ha óunwegubaña lidan tágudun haban. Barüwatu meha giñe háguchu háspitalirugu ladüga giñe tágudun. Meredeti habasiihan íbirigu ha háspitalirugu, lun híchugun dǘgüdaguaü houn íbirigu ha, dandu íbirigu harutiña kei wuritiña. Ariha numuti nungua óunwenbu ínsiñeni le harufudubei wábirigu. Gudemehabu libe le gayaraati líderaguniña lubúeingu Bungiu lun hagagibudagun luma óunwenbu burí lamiselu.

Lidan irumu 1977, aba hamisurahaniwa lun weseriwidun tidan Beteli to Brooklynboun luagu fiu hati lun wídehan lidan aban dasi ñein. Dan le gumumémeeli wadagimanu le wadügübei, aba hóundaragun bián lílana Musu Úaraguati numa aba hálügüdünina anhein aranseñu niña lubéi au tuma Ruby lun werederun eseriwida Betelirugu. Aba wánharun lun agunbirahóuni le.

Wein-gádürü irumu nau awadigimarida lidan Departamentu lani Eseriwiduni, le ñein lubéi hídehan íbirigu óunabaha álügüdahani le hénrenguti. Lau lásügürün irumu, ru hali Musu Úaraguati adundehani le úarabei luma le tariñagubei Bíbülia. Yúsuati adundehani le lun lóunabun álügüdahani, yúsuati giñe lun larufudahóun houn óunigirutiña sirkuitu, wéiyaaña lidan afiñeni luma houn prekursorugu. Arufudahani le íderagua laaña saragu lun haganwoundagüdüni hamadagua luma Heowá ani ídehaali giñe lun lederebudagüdünu lóundarun Heowá.

Lúmagiñe irumu 1995 darí irumu 2018 abisidahaadina saragu sukursáli kei lóunagüle Musu Úaraguati, luagu aban dan subudiwatiña ha adügübalin dasi le kei óunigiruti le abisidahabarun sukursáli. Óundaraguatina hama íbirigu ha lídanbaña sétanu le arihibei tau sukursáli, óundaraguatina giñe hama ha eseriwidubaña Betelirugu luma hama misionérugu lun níchugun dǘgüdaguaü houn luma lun níderaguniña lidan katei le adiheridagüdübaliña. Súnwandan, neresibirun au tuma Ruby dǘgüdaguaü lídangiñe sügǘ le meha habahüdahabei íbirigu burí ha woun. Kei hénpulu, ñǘdüntiwa Ruanda abisidaha lidan irumu 2000. Hingí lumutu wanigi saragu dan le habahüdahabalin íbirigu ha eseriwidubaña Betelirugu ha awinwandubalin áfarahani le asuseredubei lidan irumu 1994. Lidan ageiraü ligía, saragu hádangiñe wíbirigu féridi hamutiña haduheñu. Lau sun lira, arihúati hafiñen, hemenigin luma hagundan íbirigu ha.

Guentó barühadiwa lóugiñe 80 irumu. Lidan lagumuhóun 20 irumu le, neseriwiduña kei lílana Sétanu le arihibei tau sukursáli Meriga. Midingubeitina tidan luban furendei íñuti, gama lumoun resibi naali arufudahani le buídutimabei lúmagiñe Heowá luma túmagiñe lóundarun. Aranse laadina Heowá lun gayara lan narufudahani inarüni le tídanbei Bíbülia houn amu, le gayaraabei lahuudun lun súnwandan (2 Ko. 3:5; 2 Tim. 2:2). Ariha naali ida liña lan líderaguniña uganu le tídanbei Bíbülia gürigia lun habuiduragüdüni habagari luma lun gamadagua hamá luma Heowá (Sant. 4:8). Sagü gachansin wamá, au tuma Ruby ínchaha wamutiña ha híbiri lun gebegi lan le hafurendeirubei luagu Heowá luma inarüni le hafurendeirubei tídangiñe Bíbülia houn... Ligíatima katei le buídutimabei le gayaraabei gama lani aban lubúein Heowá.