Sa sayong bahin sa katuigan sa 1940, ang akong ginikanan giestadihan sa mga Saksi ni Jehova. Miundang sila sa pag-Bible study, pero si Mama padayong midawat ug mga kopya sa Bantayanang Torre ug Pagmata! Niadtong 1950, dihay gihimong internasyonal nga kombensiyon sa New York City, ug mitambong ang among pamilya.

Human adto, ginabisita na mi ni Brader Lawrence Jeffries. Naningkamot siya nga tabangan ko nga makakat-on sa kamatuoran. Sa primero, wala ko mouyon sa baroganan sa mga Saksi ni Jehova nga dili mag-apil-apil sa politika ug dili magsundalo. Ako siyang giingnan nga kon ang tanan sa America dili magsundalo, mosulong ang mga kaaway ug sakopon ang nasod. Si Brader Jeffries mapailobong nangatarongan: “Sa imong hunahuna, unsa kahay buhaton ni Jehova nga Diyos kon ang tanang tawo sa America moalagad niya unya mosulong ang mga kaaway?” Ang iyang giingon bahin adto ug sa ubang isyu nakatabang nako nga makita nga sayop ko. Tungod adto, mas nainteres ko sa kamatuoran.

Daghang oras ko nga nagbasa sa karaang mga isyu sa Bantayanang Torre ug Pagmata! nga gibutang ni Mama sa silong sa among balay. Sa ngadtongadto, naamgohan nako nga ang akong nakat-onan mao ang kamatuoran, maong nagpa-Bible study ko kang Brader Jeffries. Regular na pod kong magtambongan sa tigom. Ganahan kaayo ko sa akong nakat-onan, ug nahimo kong magmamantala sa maayong balita. Nausab ang akong mga tumong dihang nasabtan nako nga “ang dakong adlaw ni Jehova duol na.” (Sof. 1:14) Dili na ko gustong moeskuwela sa unibersidad kay gusto na nakong tabangan ang uban nga makakat-on sa kamatuoran sa Bibliya.

 Migraduwar ko sa hayskul niadtong Hunyo 13, 1956, ug tulo ka adlaw sa ulahi nabawtismohan ko sa sirkitong asembliya. Adtong tungora, wala ko kaamgo nga daghan diay kaayo kog madawat nga panalangin kay gigamit nako ang akong kinabuhi sa pagkat-on ug pagtudlo sa uban bahin kang Jehova.

Unom ka bulan human sa akong bawtismo, nagregular payunir ko. Ang Disyembre 1956 nga Kingdom Ministry naay artikulo nga nag-ulohang “Can You Serve Where the Need Is Great?” Mahimo nâ nako. Gusto kong motabang sa lugar nga diyutay ra ang nagsangyaw sa maayong balita.​—Mat. 24:14.

Mibalhin ko sa Edgefield, South Carolina. Upat ra ang magmamantala sa kongregasyon didto. Ako ang ikalima. Nagtigom mi sa sala sa balay sa usa ka brader. Kada bulan, naggugol kog 100 ka oras sa ministeryo. Busy ko sa pagpanguna sa pagsangyaw ug paghatag ug mga bahin sa tigom. Sa nagkadaghan ang akong ginahimo sa kongregasyon, nagkadaghan sab ang akong nakat-onan bahin kang Jehova.

Naa koy giestadihan nga babaye nga tag-iyag punerarya sa lungsod sa Johnston, nga pipila ka kilometro ang gilay-on. Buotan kaayo siya kay iya kong gihatagag part-time nga trabaho nga gikinahanglan kaayo nako. Ug iyang gipagamit namo ang usa ka gamayng bilding aron himoon namong tigomanan.

Si Brader Jolly Jeffries, ang anak sa brader nga nag-study nako ug gikan sa Brooklyn, New York, mibalhin sa among kongregasyon ug nahimong partner nako sa pagpayunir. Mipuyo mi sa gamayng trailer nga gipahulam sa usa ka brader.

Gamay ang suweldo didto sa South. Mokita mig dos o tres dolyares sa usa ka adlaw. Dihay higayon nga gamay na lang ang nabilin nakong kuwarta, ug gipalit nako tog pagkaon. Paggawas nako sa tindahan, dihay tawo nga miduol nako ug nangutana: “Gusto nimog trabaho? Suweldohan ti kag usa ka dolyar kada oras.” Tulo ka adlaw ko niyang gipalimpiyog construction site. Klaro nga gitabangan ko ni Jehova nga magpabilin sa Edgefield. Bisag gamay ra kog kita, nakatambong ko sa 1958 nga internasyonal nga kombensiyon sa New York City.

Sa ikaduhang adlaw sa kombensiyon, dihay nahitabo nga dili gyod nako malimtan. Nailaila nako si Ruby Wadlington, usa ka regular payunir sa Gallatin, Tennessee. Kay parehas mi nga gustong magmisyonaryo, mitambong mi sa miting para sa Gilead niana nga kombensiyon. Sa ulahi, nagsulatanay mi. Dayon giimbitar ko nga magpakigpulong sa Gallatin. Gipahimuslan nako to nga higayon nga ingnan siya nga makigminyo ko niya. Mibalhin ko sa kongregasyon ni Ruby, ug nagminyo mi niadtong 1959.

Niadtong 23 anyos ko, gitudlo ko ingong congregation servant (karon gitawag nag koordinetor sa  lawas sa mga ansiyano) sa Gallatin. Kami ang unang kongregasyon nga giduaw ni Charles Thompson dihang nahimo siyang tigdumala sa sirkito. Eksperyensiyado kaayo siya, pero nangutana siya sa akong opinyon kon unsay panginahanglan sa mga igsoon ug kon giunsa ni pag-atiman sa ubang tigdumala sa sirkito. Nakat-onan nako niya nga maayong mangutana ug hibaloon ang mga impormasyon sa dili pa mohimog mga desisyon.

Niadtong Mayo 1964, giimbitar ko nga moeskuwela sa Kingdom Ministry School sulod sa usa ka bulan didto sa South Lansing, New York. Ang among mga instruktor nakadasig nako nga mokat-on pag dugang ug mouswag sa espirituwal.

Kami ni Ruby nakadawat ug imbitasyon nga mag-alagad sa sirkitong buluhaton niadtong Enero 1965. Giasayn mi sa lapad kaayong sirkito, gikan sa Knoxville, Tennessee, ug halos moabot na sa Richmond, Virginia. Sakop niini ang mga kongregasyon sa North Carolina, Kentucky, ug West Virginia. Ang kongregasyon sa mga itom lang ang among ginaduaw kay adtong panahona, dili puwedeng mag-uban ang mga itom ug puti sa Southern United States. Pobre ang mga igsoon, ug naningkamot mi nga motabang niadtong nanginahanglan. Usa ka dugay nang tigdumala sa sirkito ang nagtudlo nakog importanteng leksiyon: “Kon moduaw kag kongregasyon, ipabati nila nga igsoon ka, dili boss. Makatabang ka nila kon isipon ka nila nga igsoon.”

Dihang miduaw mi sa usa ka gamayng kongregasyon, nasugdan ni Ruby ug Bible study ang usa ka batan-ong babaye nga naay bata nga usa ka tuig ang edad. Kay wala may igsoon nga makadumala sa pagtuon, giestadihan siya ni Ruby pinaagig sulat. Sa sunod namong duaw, ang babaye mitambong sa tanang tigom. Dihang miabot ang duha ka sister nga espesyal payunir, ilang gipadayon ang pag-Bible study ug sa ngadtongadto, nabawtismohan siya. Mga 30 ka tuig sa ulahi niadtong 1995, sa Patterson Bethel, dihay batan-ong sister nga nakig-estorya kang Ruby. Anak diay siya sa babaye nga giestadihan ni Ruby. Siya ug ang iyang bana mga estudyante sa ika-100 nga klase sa Gilead School.

Ang sunod namo nga sirkito mao ang central Florida. Anang panahona, nagkinahanglan mig sakyanan, ug naa mi napalit nga barato kaayo. Pero usa pa lang ka semana, naguba na ang water pump sa makina. Wa na mi kuwarta nga ikapaayo ini. Nagpatabang ko sa usa ka brader. Iyang gisugo ang iyang tawo nga ayohon ang sakyanan, ug dili siya magpabayad. Gihatagan pa gani mi niyag kuwarta! Nindot to nga pamatuod nga giatiman gyod ni Jehova ang iyang mga alagad. Nagpahinumdom to namo nga angay pod ming magmahinatagon sa uban.

Kada mobisita mig kongregasyon, mosaka mi sa balay sa mga igsoon. Tungod ana, daghan mig nasuod. Usa ka adlaw, naghimo kog report bahin sa kongregasyon, ug wa pa nako ni mahuman maong gibilin nako ni sa typewriter. Pagkagabii, nahibaloan nako nga ang tres anyos nga anak sa pamilya nga akong gisak-an nagtulpoktulpok diay sa typewriter! “Gitabangan” ko niya nga mahuman ang akong report. Daghang tuig nako siyang gisungog bahin ana.

Pagka-1971, naasayn ko nga mahimong tigdumala sa distrito sa New York City. Nakurat mi kay 34 anyos pa lang ko adto. Giabiabi gyod ko pag-ayo sa mga igsoon. Ako ang ilang unang itom nga tigdumala sa distrito.

Ingong tigdumala sa distrito, nalipay kong magtudlo bahin kang Jehova kada Sabado ug Dominggo sa sirkitong asembliya. Daghang tigdumala sa sirkito ang mas eksperyensiyado kay kanako. Usa nila maoy nagpakigpulong dihang nabawtismohan ko. Ang laing brader, si Theodore Jaracz, sa ulahi nahimong membro sa Nagamandong Lawas. Daghan pog eksperyensiyadong brader ang nag-alagad sa Brooklyn Bethel. Mapasalamaton kaayo ko sa mga tigdumala sa sirkito ug Bethelite kay buotan sila nako maong dili ko kulbaan. Nakita gyod nako nga sila mahigugmaong mga magbalantay nga nagsalig sa Pulong sa Diyos ug maunongong nagsuportar sa organisasyon. Tungod sa ilang pagkamapainubsanon, wala ko malisdi sa pag-alagad ingong tigdumala sa distrito.

Niadtong 1974, ang Nagamandong Lawas nag-asayn ug laing grupo sa mga tigdumala sa sirkito nga mag-alagad ingong tigdumala sa distrito, ug naasayn kog balik ingong tigdumala sa sirkito​—niining panahona, sa South Carolina. Nindot kaayo kay adtong panahona, ang mga kongregasyon ug mga sirkito sa mga puti ug itom puwede nang mag-uban, ug nakapalipay to sa mga igsoon.

Sa kataposang bahin sa 1976, giasayn ko sa usa ka sirkito sa Georgia nga gitaliwad-an sa Atlanta ug Columbus. Dili gyod nako malimtan dihang nagpakigpulong ko para sa lima ka itom nga bata nga namatay kay gisunog ang ilang balay. Ang ilang mama naospital tungod sa mga injury. Daghang itom ug puti nga mga Saksi ni Jehova ang nangadto sa ospital aron hupayon ang mga ginikanan. Nakita nako kon unsa ka dako ang gugma sa mga igsoon. Dihang ang mga alagad sa Diyos magpakita ug ingon niini nga kaluoy sa usag usa, makalahutay sila sa kinalisdang mga situwasyon.

Niadtong 1977, gihangyo mi nga motabang sa usa ka proyekto sa Brooklyn Bethel sulod sa pipila ka bulan. Sa hapit na ming mahuman, duha ka membro sa Nagamandong Lawas ang nakig-estorya namo ni Ruby ug nangutana kon gusto ba ming magpadayon sa pag-alagad sa Bethel. Misugot mi.

Sulod sa 24 ka tuig, nag-alagad ko sa Service Department, ug apil sa buluhaton didto ang pagtubag sa lisod nga mga pangutana. Sa daghan nang katuigan, ang Nagamandong Lawas naghatag ug giya base sa mga prinsipyo sa Bibliya. Gigamit ni nga basehanan sa pagtubag sa mga pangutana, pero gigamit pod ni sa pagbansay sa mga tigdumala sa sirkito, mga ansiyano, ug payunir. Kini nga giya nakatabang sa daghang igsoon nga mas mohamtong sa espirituwal. Tungod ana, mas milig-on ang organisasyon ni Jehova.

Gikan sa 1995 hangtod sa 2018, daghan kog naduaw nga mga sangang buhatan ingong representante sa hedkuwarter, nga sa una gitawag ug zone overseer. Nakigmiting ko sa mga Komite sa Sangang Buhatan, mga Bethelite, ug mga misyonaryo aron dasigon sila ug tabangan sa ilang mga problema. Kami pod ni Ruby nadasig sa ilang mga eksperyensiya. Pananglitan, miduaw mi sa Rwanda niadtong 2000. Nakahilak gyod mi pagkahibalo namo sa naeksperyensiyahan sa mga igsoon ug sa pamilyang Bethel panahon sa genocide (pagpuo sa rasa) niadtong 1994. Daghan ang namatyan ug mga minahal. Bisan pa sa ilang kaagi, wala mawala ang ilang pagtuo, paglaom, ug kalipay.

Karon, kapin na mig 80 anyos, ug 20 ka tuig na kong nag-alagad ingong membro sa Komite sa Sangang Buhatan sa United States. Wala ko makaeskuwelag unibersidad, pero nadawat nako ang kinatas-ang edukasyon gikan kang Jehova ug sa iyang organisasyon. Tungod ani, natudloan nako ang uban bahin sa mga kamatuoran sa Bibliya nga makahatag nilag kaayohan hangtod sa hangtod. (2 Cor. 3:5; 2 Tim. 2:2) Nakita nako nga ang mensahe sa Bibliya nakapausab gyod sa kinabuhi sa mga tawo ug nakapasuod nila sa Diyos. (Sant. 4:8) Hangtod karon, naningkamot mi ni Ruby nga padayong dasigon ang uban nga pabilhan ang pribilehiyo sa pagkat-on bahin kang Jehova ug pagtudlo sa mga kamatuoran sa Bibliya ngadto sa uban. Kini ang kinadak-ang pribilehiyo sa usa ka alagad ni Jehova!