Ekiseló mwirin ewe ier 1940, semei kewe me inei ra káé ewe Paipel ren Chón Pwáraatá Jiowa. Nge rese sópweló ar káé, nge inei we a chúen sópweló le angei ekkewe magazine Watchtower me Awake! Lón 1950 a fis eú mwichelapen aramas seni sókkopaten fénú lón New York City, me ai we famili a etiwa ewe etiwetiw ám aupwe fiti.

Ekiseló mwirin Pwiich Lawrence Jeffries a poputá le chuurikem. A awora an fansoun le álisiei le káé ewe enlet. Me akkomwan, use tipeeú ngeni án Chón Pwáraatá Jiowa rese angolong lón mwékútúkútún ei fénúfan, me rei itá repwe fiti pekin politics me soufiu. Ua erá ika meinisin chón Merika rese fiti maun, iwe chón oputer kewe repwe liapeni unusen Merika. Pwiich Jeffries a mosonottam le áwewe ngeniei: “Met óm ekiek, met Jiowa Kot epwe féri ika meinisin aramas lón Merika ra angang ngeni me chón oputer ra etto me mauner?” Met a áweweei usun ena mettóch me pwal ekkewe ekkóch mettóch a álisiei le weweiti pwe mi mwáál ai ekiek. Iwe, ina met a amwékútúei le káé usun ewe enlet lón Paipel.

Ua áeá watteen ai fansoun le álleani ekkewe Watchtower me Awake! minen lóóm inei we a chék isoniir lón sooko. Iwe mwirin, ua mirititi pwe met ua kákkáé ina ewe enlet, ina popun ua etiwa án Pwiich Jeffries epwe káé ngeniei. Ua pwal poputá le fiffiti ekkewe mwich iteitan. Ewe enlet a achchúngú letipei, me ua wiliti emén chón afalafala ewe kapas allim. Ua siwili met ua achocho ngeni lón manawei atun ua mirititi pwe “ewe rän mi lap, ränin ewe Samol mi Lapalap a arapoto.” (Sef. 1:14) Use chúen mochen fiti university, nge ua mochen álisi ekkewe ekkóch le káé usun ewe enlet lón Paipel.

 Ua sochungio seni high school lón June 13, 1956, me úlúngát rán mwirin ua papatais lón eú circuit mwichelap. Use tepereni pwe chómmóng feiéch upwe kúna lón manawei seni Jiowa pokiten ai filatá le áeá manawei le kákkáé me asukula aramas usun i.

Wonu maram mwirin ai papatais, ua wiliti emén regular pioneer. Lón ewe Kingdom Ministry minen December 1956 a wor ei lesen itelapan “Can You Serve Where the Need Is Great?” Iwe, ngang emén ua tongeni féri ena. Ua mochen álillis ikewe a osupwangen chón afalafala ewe kapas allim ie.​—Mat. 24:14.

Ua mwékút ngeni Edgefield, South Carolina. A chék wor fémén chón afalafal ikkena ie. Pokiten ua mwékút ngeni ikena, iwe a wor nimmén chón afalafal. Aua kan mwich lón imwen emén pwiich. Iteiten maram ua néúni 100 awa lón ewe angangen afalafal. Ua kan emmweni ewe angangen afalafal me wisen eáni afalafal lón mwich. Iwe, lapólóón ai angang fán iten ewe mwichefel, pwal ina lapólóón ai sissilei Jiowa.

Emén fefin ua kákkáé ngeni a wor eú an funeral home lón Johnston. A kirekiréch le mut ngeniei ai upwe angang ren part-time, me a pwal mut ngenikem ám aupwe áeá eú an kúkkún imw fán iten ám Leenien Mwich.

Pwiich Jolly Jeffries, néún ewe a wisen káé ngeniei, a mwékút seni Brooklyn, New York, me aua angangfengen lón ám angangen pioneer. Aua nóm lón eú sókkun imw mi wor taian aramas ra tongeni uweifetálei emén pwiich a ngenikem ám aupwe imweni.

Peioffun aramas me éérún Merika a mmen kúkkún. Lón ám angang unusen eú rán a ruu are úlúngát chala liwinim. Eú atun, ua kamé enem lón eú sitowa wóón nei we lusun senis. Atun ua towu, emén mwán a fós ngeniei me eisiniei: “Ka mochen kopwe angang? Upwe peioffek wóón eú chala iteiten awa.” Ua angang lón úkúkún úlúngát rán le limeti eú leeni epwe kaútá imw ie. A mmen ffat ngeniei pwe Jiowa a mochen álisiei le nóm lón Edgefield. Nge ua pwal ló fiti ewe 1958 mwichelapen aramas seni sókkopaten fénú lón New York City.

Lón ewe oruuen ránin mwichelap, eú mettóch mi aúchea a fis. Ua chuuri Ruby Wadlington, i emén regular pioneer lón Gallatin, Tennessee. Pokiten aua mochen aupwe fiti ewe angangen misineri, aua fiti ewe mwich fán iten Gilead lón ena mwichelap. Mwirin, aua kkan mammakfengen. Mwirin ua ketiw ai upwe eáni ewe afalafal fán iten aramas meinisin lón Gallatin. Ina ewe atun ua tingorei ám aupwe pwúpwúlú. Ua mwékút ngeni án Ruby mwichefel, me aua apwúpwúlú lón 1959.

Atun a 23 ieri, ua kefil ai upwe wiseni ewe wis mi iteni lón ei fansoun chón akkót lón ewe kúmiin mwán mi ásimaw lón Gallatin. Charles Thompson  a kerán wiliti emén circuit overseer atun a chuuri ám we mwichefel. I a watte silean, nge a eisiniei ika met ai ekiek usun met a lamot ngeni ewe mwichefel, me ifa usun ekkóch circuit overseer ra tongeni túmúnú ewe mwichefel. Ua káé seni pwe a éch án emén epwe eáni kapas eis me silei minne mi lamot lón an angang mwen epwe filatá minne epwe féri.

Lón May 1964, ua ketiw le fiti ewe Sukul fán Iten Mwán mi Ásimaw me Chónálillisin Mwichefel lón South Lansing, New York lón úkúkún eú maram. Ena sukul a álisiei le ámááraatá ai mochen alapaaló ai káé usun Jiowa me akkarap ngeni.

Ám me Ruby aua ketiw le féri ewe angangen circuit lón January 1965. Aua kewis ngeni eú circuit ám aupwe chuuri ekkewe mwichefel, seni Knoxville, Tennessee, tori arapakkan Richmond, Virginia. A kapachelong ekkewe mwichefel lón North Carolina, Kentucky, me West Virginia. Ua chuuri ekkewe chék mwichefel chón black pún ewe allúkún káimulóón aramas lón éérún Merika, ese mutatá án ekkewe black repwe mwichfengen me ekkewe white. Pwiich kewe ra mwelele, me aua mochen álisi chókkewe iir mi osupwang. Emén circuit overseer a fen wiseni ena wis ren fitu ier a áiti ngeniei eú lesen mi lamot: “Kopwe emén pwiir, nge kosap nikinikin emén boss. Ka tongeni álisiir ika ra ekieki pwe en pwiir.”

Atun aua chuuri eú kúkkún mwichefel, Ruby a poputá le káé ngeni emén fépwúl mi wor emén néún nengngin eú ierin. Ika ese wor emén lón ewe mwichefel a tongeni káé ngeni, Ruby a mak taropwe ngeni me tiinaaló lón posto. Atun aua chuursefáli ena mwichefel, ena fépwúl a fiti ekkewe mwich. Atun rúúemén special pioneer fefin ra mwékút ngeni ena mwichefel, ra sópweló le káé ngeni me a papatais. Ina epwe 30 ier mwirin, lón 1995 me Patterson Bethel, emén fépwúl a fós ngeni Ruby. I néún ewe fépwúl Ruby a káé ngeni. I me pwúlúwan we ra fiti ewe ipúkúen classin Sukulen Gilead.

Lón ám oruuen circuit aua chuuri ekkóch mwichefel lón Florida. Lón ei atun, a lamot an epwe wor wáám tarakú, iwe aua mééni efóch wáám mi chék mékúkkún. Iwe nge, lón chék ewe áeúin wiik ewe mwesinan a ta. Ese wor néúm moni an epwe fférsefál. Ua kéri emén Chón Kraist mwán ua ekieki pwe epwe tongeni álisikem. A ewisa ngeni emén néún chón angang an epwe wisen angang wóón wáám we me ese mochen ám aupwe mééni. A erá: “Kosap pwal i mééni.” A pwal mwo nge liffang ngenikem moni! Ina usun amwararen án Jiowa túmúnúéchú néún kewe chón angang. A áchema ngenikem ám aupwe fangafangéch ngeni ekkewe ekkóch.

Iteiten aua chuuri eú mwichefel, aua nóm ren imwen pwiich kewe. Ena a atufichikem ám aupwe chiechiéch ngeni chómmóng pwiich kewe. Eú rán, ua likiti eché repot fán iten ewe mwichefel lón ai we typewriter nge esaamwo wes me taip. Atun ua liwiniti lón ena pwinin, ewe át úlúngát ierin néún ewe famili aua nóm rer a sótun ttiki mettóch wóón ewe typewriter pwe usun itá a mochen áwesi ewe repot. Ren fitu ier, ua urumwotei ren ai áchema ngeni met a féri.

Lón 1971, a toriei eché taropwe pwe ua kewis ai upwele wiseni ewe wis district overseer lón New York City. Aua fókkun máirú! Atun aua mwékút ngeni ikena, a chék 34 ieri. Pwiich kewe ra fókkun tongeei me awasélaei, ngang ewe áeménún néúr district overseer black.

Lón wisei we emén district overseer, ua pwapwa le asukula pwiich kewe usun Jiowa iteiten weekend lón ewe circuit mwichelap. Chómmóng circuit overseer a watte sileer lap seniei. Emén me leir a wisen eáni ewe afalafal atun ai we papatais. Pwal emén, Pwiich Theodore Jaracz, i a wiliti emén chón ewe Mwichen Soupwúngúpwúng mwirin. A pwal wor chómmóng pwiich kewe iir mi lipwákéch me ra angang lón Brooklyn Bethel. Ua fókkun kilisou pwe ekkena circuit overseer me chón Bethel ra álisiei ai upwe meefi kinamwe. Ua pwisin kúna pwe iir chón mas mi tong me ra lúkúlúk wóón án Kot we Kapas me ra álisatá ach we mwicheich fán tuppwél. Pokiten ar tipetekison, ra ámecheresi ai upwe apwénúetá wisei we emén district overseer.

Lón ewe ier 1974, ewe Mwichen Soupwúngúpwúng a ewisa pwal eú kúmiin circuit overseer ar repwele wiseni ewe wis district overseer. Iwe, ua kewis ai upwe wisenisefáli ewe wis circuit overseer lón South Carolina. Lón ena atun, kilisou pwe pwiich kewe black me white ra tongeni mwichfengen lón ewe mwichefel me pwal atun ekkewe circuit mwichelap, iwe ra fókkun pwapwa ren ena.

Lesópwólóón ewe ier 1976, ua kewis le chuuri ekkewe mwichefel lón Georgia, lefilen Atlanta me Columbus. Ua fókkun chechchemeni ewe atun ua eáni ewe afalafal wóón felin nimmén semirit black, ra máló pokiten án ekkóch keni imwer we. Ewe in a lúing pún a pwal feiengaw. Chómmóng pwiich kewe, iir black me white ra ló chuuriir lón pioing pwe repwe oururuur. Ua kúna watteen án pwiich kewe tong, nge ena esin tong a tongeni elikiitú néún Kot kewe chón angang mi nóm fán watteen weires.

Lón 1977 aua ketiw le álillis lón Brooklyn Bethel ren fitu maram fán iten eú angang. Atun a arapakkan an epwele wes ena angang, rúúemén pwiich chón ewe Mwichen Soupwúngúpwúng ra chuuriei me eisiniei ika ngang me Ruby aua mochen ám aupwele nómoló me angang lón Bethel. Iwe aua etiwa ena etiwetiw.

Ren úkúkún 24 ier, ua angang lón ewe Service Department, ikewe pwiich kewe ra kan álillis le pélúweni ekkewe kapas eis mi áweires ach sipwe pélúweniir. Seni ekkewe ier tori ikenái, ewe Mwichen Soupwúngúpwúng a kan awora emmwen mi tipeeú ngeni ekkewe kapasen emmwen lón Paipel. A álisi ewe Service Department le pélúweni ekkewe kapas eis, nge a pwal eú minen álillis fán iten káit ngeni ekkewe circuit overseer, mwán mi ásimaw, me ekkewe pioneer. Ena minen káit a álisi chómmóng ar repwe feffeitá lón pekin lúkú. Iwe a pwal álisatá án Jiowa we mwicheich.

Seni 1995 ngeni 2018, ua tupuni ewe ofesilap atun ua chuchchuuri ekkewe keangen ofesilap, me lóóm ena wis a iteni zone overseer. Ua chuuri ekkewe Kúmiin Chón Túmúnú Keangen Ofesilap, ekkewe chón Bethel, me misineri me ua apéchékkúler me álisiir lón ar osukosuk. Nge ngang me Ruby aua kan meefi péchékkúl seni ar apwóróusa ngenikem pwóróuseer. Áwewe chék, aua ló ngeni Rwanda lón 2000. A chúng letipem atun aua rongorong seni pwiich kewe me ewe familien Bethel, iir kewe mi fen kúna ninniilóón unusen chón eú einang lón 1994. Chómmóng me leir a má seniir attongeer kewe. Nge inaamwo ika ra kúna chómmóng weires, pwiich kana ra pwári ar lúkú, ápilúkúlúk, me pwapwa.

Iei a fen lap seni walik ierim. Ren úkúkún 20 ier, ua kewis le fiti ewe Kúmiin Chón Túmúnú Keangen Ofesilap lón Merika. Use fiti university, nge ua angei eú asukul mi tekia seni meinisin seni Jiowa me an we mwicheich. Ena a atufichiei le áiti ngeni ekkewe ekkóch ewe enlet seni Paipel, mi tongeni efeiéchúúr tori feilfeiló. (2 Kor. 3:5; 2 Tim. 2:2) Ua fen kúna pwe ewe Paipel a álisi aramas le ámúrinnééló manawer me ámááraatá ar riri ngeni ewe Chón Fériir. (Jas. 4:8) Ngang me Ruby, aua chúen achocho le apéchékkúla ekkewe ekkóch ar repwe aúcheani ar kákkáé usun Jiowa me asukula ewe enlet ngeni ekkewe ekkóch, ewe mi fókkun aúchea seni meinisin emén néún Jiowa chón angang a tongeni pwapwaiti.