Mʉ̃ yibariraba Daizeze Bedʼeata kʼawua jʉ̃drʉsi poaga 1940 tẽã, Jeowa ʉ̃rʉ Kʼawuabipanʉrãbawara. Mamina tẽã Daizeze Bedʼea kʼawuabʉta idubʉsidamina mʉ̃ papaba iduaribisi Jarakabʉ akʉza ¡Despertad! kartarata iyidu erjʉ̃ẽnamarẽã. 1950de Nueva Yorkde osida asamblea pʉwʉrʉ biodebemata, maʉ̃nera mʉ̃ mebẽrãsi jʉ̃ẽsida.

Tẽã mebẽã Lawrence Jeffriesba mʉ̃aʼa Daizeze Bedʼeata jaradia jʉ̃drʉsi. Mamina nããrãra mʉ̃ara bia akʉ ba ẽ basi Jeowa ʉ̃rʉ Kʼawuabipanʉrãra, ãyira politikade eda wã ẽ basi baera akʉza gorogororane eda wã ẽ basi baera. Mʉ̃a iya jarasi mebẽrã Estados Unidosdebemata yõena wã ẽ basibʉrʉ dayirã nejʉraraba jãrĩseabasita dayirã pʉwʉrʉra. Mebẽã Jeffriesba mʉ̃a krĩchabisi akʉza mʉ̃a jarasi: «Ẽbẽra Estados Unidosdebemarata jõmaʉ̃ta Jeowa ʉ̃rʉ Kʼawuabipanʉrãbʉrʉ akʉza ãyi nejʉrarata zera, ¿kʼãrẽta oi Jeowabara?». Iya mʉ̃aʼa jara ũrĩbidaba ũdubisi mʉ̃ara aña krĩchabasita.

Mʉ̃a akʉsi Jarakabʉ akʉza ¡Despertad! kartara mʉ̃ papaba wuaga erbadarata. Maʉ̃ kʼarea ĩjãsi mebẽã Jeffriesba Daizeze Bedʼea jaradiamarẽã akʉza semanaza ãba yi jʉrebarima wã jʉ̃drʉsi, mʉ̃a kʼawuanʉmʉ kʼarea sobiabasi baera jaradia jʉ̃drʉsi Daizeze Bedʼeata. Mʉ̃a nãã oita krĩchabadara awuarabesi kʼawuasi baera «Jeowa ewari zromara» zeita arakʼaitabata (Sof. 1:14). Unibersidaeda wãita krĩchai kaude, krĩchasi awururata kʼarebaita Daizeze ʉ̃rʉ kʼawuamarẽã.

Junio 13 1956de ẽdrʉsi kolegiodeba akʉza tẽã bʉrʉ kʼoesi asamblea sirkuitodebemane. Mʉ̃a krĩcha ẽ basi kʼãrẽaba nebia ũduita Daizeze ʉ̃rʉ kʼawuabʉ kʼarea akʉza Daizeze ʉ̃rʉ jaradiabʉ kʼarea.

Mʉ̃ buru kʼoeda jedeko 6 berabarida tẽã yi nãã edebari 70 ora diabari ba jʉ̃drʉsi. Karta Ministerio del Reino 1956 diciembre ingle bedʼeadebemaba jarasi, awuru pʉwʉrʉeda jaradia wãmarẽã mebẽrãba kʼareba nesidabʉmae. Maʉ̃ra yibiabasi mʉ̃a audre jaradiakĩrãbasi baera nejaradiabarira mejãcha neẽmae (Mat. 24:14).

Mawũẽra mʉ̃ra wãsi pʉwʉrʉ Edgefieldma (Carolina del Sur), mama jʉ̃ẽsi kongregasion aba nejaradiabarira kimare erbʉmae. Mama ãba yi jʉrepanasi mebẽã deda akʉza mʉ̃a jedekoza 100 ora jaradiabasi. Mʉ̃ara nekʼãrẽ mejãcha oibarabasi Daizeze Bedʼeata kʼawuabibarabasi akʉza diskursorata diaibarabasi kongregasione ãba yi jʉrebʉrʉde. Mʉ̃a Jeowade audre obʉrʉde audre kʼawuabasi iyi ʉ̃rʉ.

Mʉ̃a ẽbẽra wẽrã Daizeze Bedʼea kʼawuabibadara funeraria yibaribasi pʉwʉrʉ Johnstonʼne. Iyaʼa mʉ̃a trajota diasi akʉza iduaribisi iyi drʉadebema dede ãba yi jʉredamarẽã.

Mʉ̃ nejaradiabaribada warrata Jolly Jeffriesʼta Brooklynʼneba (Nueva York) zesi mʉ̃chuidu, mawũã Daizeze Bedʼea ãbaʉba jaradiaita. Mebẽã abaʉba daiʼa diasi sama kʼãĩta.

Estados Unidos barẽarera dayi trajabʉrʉdera plata mejãcha diapana ẽ basi. Ewari aba mʉ̃a plata erbada jõma gastasibasi yiko edabʉde, maʉ̃ne mʉ̃ tiendadeba ãĩ wãbʉrʉde ẽbẽra abaʉba mʉ̃a widisi: «¿Trajo nesidabʉka? Bʉ ora aba trajabʉrʉ kʼarea dolar aba diayi». Mʉ̃ra ewari ũbeabayeda trajasi de parãbarabʉmae jãrẽnʉmʉne, mʉ̃a ũdusi Jeowaba sãwũã kʼarebasita mʉ̃ta Edgefieldʼde bamarẽã. Mʉ̃ plata mejãcha neẽbasimina wãsi asamblea pʉwʉrʉ biodebema Nueva Yorkde odapeadama 1958de.

Maʉ̃ asambleade mʉ̃a ũdukʼawuasi mebẽã wẽrã yi trʉ̃ Ruby Wadlingtonʼta, iyira yi nãã edebaribasi Gallatinʼne (Tennessee). Daibara awuru drʉade jaradiakĩrãbasi baera, wãsida Galaadma wãkĩrãbʉ ãba yi jʉrebʉma, maʉ̃ tẽã kartata yiya zokʼa bʉepanasi. Ewari aba mʉ̃aʼa jarasida Gallatinma wãmarẽã diskurso diaita, maʉ̃nera mʉ̃a Rubyʼa widisi mʉ̃me juwa jidakĩrãbʉ kʼawuaita. Mʉ̃ra iyi kongregasionma wãsi akʉza 1959de juwa jidasi.

Mʉ̃ra 23 poagabasi zõrãrã ãba yi jʉredabari bʼaita jarasidade Gallatinʼne, mebẽã kongregasionʼra akʉbari zõrãrã Charles Thompsonba dai kongregasionta akʉ jʉ̃ẽsi. Iyara mejãcha kʼawuabasi mawũãsidu iya mʉ̃aʼa widisi mebẽrã kongregasionebemaba kʼãrẽta nesidapanʉta akʉza kʼãrẽta osidata kongregasionʼra akʉbari zõrãrã wuabemaraba mebẽrã kʼarebaita. Mʉ̃a iyideba kʼawuasi yibiata  widita akʉza nekʼãrẽ jõma ʉ̃rʉ kʼawuaita nekʼãrẽ jidai nãã.

Mayo 1964de mʉ̃a jarasida wãmarẽã Escuela del Ministerio del Reinoma jedeko ababayeda, maʉ̃ra osida South Lansingʼne (Nueva York). Maʉ̃ eskuelade jarasida mʉ̃a audre Jeowa ʉ̃rʉ kʼawua wãmarẽã mawũã Jeowa kʼawa bʼaita.

Enero 1965de mʉ̃a jarasida kongregasionʼra akʉbari zõrãrã bamarẽã. Mʉ̃aʼa jarasida naʉ̃ra pʉwʉrʉrata akʉmarẽã Knoxvilleʼdeba (Tennessee) Richmondʼidubayeda (Virginia). Akʉibarabasi kongregasionʼra Carolina del Nortedebemata, Kentuckydebemata akʉza Virginia Occidentaldebemata. Mʉ̃ara akʉbasi kongregasionʼra mebẽrã paimara awa bʉ awa, maʉ̃nera ẽbẽra paimarãra akʉza ẽbẽra torrorãra ãba babe ẽ basi Estados Unidos barẽare. Maʉ̃ra mebẽrãbara nekʼãrẽ mejãcha neẽbasi, daiba kʼarebasi, kongregasionʼra akʉbari zõrãrã abaʉba mʉ̃aʼa nekʼãrẽ yibiata jaradiasi, iya jarasi: «Bʉra mebẽã kĩrãkʼabʉta ũdubira, bʉa kongregasionʼra akʉ jʉ̃ẽbʉrʉdera bʉtrʉ nokʼo kĩrãkʼabʉta ũdubirãra, bʉa mebẽrã kʼarebaira ãyi mebẽã kĩrãkʼabʉta ũdubibara mawũãtrʉ kʼarebayi».

Ewari aba daiba akʉ jʉ̃ẽsi kongregasion aba, maʉ̃ne mʉ̃ kimaba Daizeze Bedʼeata jaradia jʉ̃drʉsi ẽbẽra wẽrã abaʉʼa. Naʉ̃ wẽrãbara erbasi wũãwũã aba, maʉ̃ kongregasionebemabara mia abaʉba akʉ jʉ̃ẽbe ẽ basi maʉ̃ ẽbẽra wẽrãra, maʉ̃ kʼarea Rubyba kartadeba jaradiabasi. Daiba maʉ̃ kongregasion tẽã jẽda akʉ jʉ̃ẽsidera maʉ̃ wẽrãra daibawara ãba yi jʉresi. Tẽã juneane mebẽã wẽrãrãra ũmeta yi nãã edebari 130 ora diabarirata maʉ̃ pʉwʉrʉidu jʉ̃ẽsida. Ãya jaradiasida maʉ̃ ẽbẽra wẽrã iyi buru kʼoeiyeda. 30 poaga berabarida tẽã 1995de Betel Pattersonʼnebemane, Rubyba ẽbẽra wẽrã jaradiabada kauba orrasi Rubyta, maʉ̃ mebẽã wẽrãra yi kimaʉ̃mera wãsi eskuela Galaadʼeda yi klase 100ma.

Tẽã jarasida akʉmarẽã kongregasionʼra Floridadebemata. Mamina mainʉ wãira karruta nesidabasi, maʉ̃ kʼarea edasida aba. Dai mamabʉta semana aba babʉrʉde dai karrura ãrĩsi, mamina maʉ̃ ara oira plata wiña erbasi, maʉ̃ kʼarea mebẽã abaʉʼa kʼareba widisida. Maʉ̃ mebẽãba karru ara oda tẽã daiba iyaʼa platata diaibasi mamina iya jarasi: «Mʉ̃a bari odiasi, pagaita nesida ẽ». Mõbe daiʼa platata diasi naʉ̃ba kĩrãbebisi Jeowabara akʉbʉta iyi nezokʼarãra akʉza kʼãrẽa yibiata daya erbʉta wuabemara diaita.

Daiba kongregasionʼra akʉ wãpanasidera mebẽrã deda kʼãĩpanasi, mawũã neũdukʼawua biarata ũdusida. Ewari aba mʉ̃a kongregasionebema inpormeta obasi makina ne bʉbaride, maʉ̃ta aña wãibara baera ma oẽ basi. Mʉ̃ jẽda zebʉrʉde ũdusi mebẽrã yi de kʼaʉ wũãwũãba maʉ̃ inpormera ãrĩsita. Daiba maʉ̃ta kĩrãbebʉrʉdera mejãcha ipidapanʉ.

1971ne mʉ̃a jarasida superintendente distrito bʼaita pʉwʉrʉ Nueva Yorkde. Mʉ̃aʼa maʉ̃ jarasidadera mʉ̃ra 34 poagabasi maʉ̃ kʼarea mʉ̃ara jʉ̃ã ẽ basi mama trʉ̃naira. Maʉ̃nera mʉ̃trʉ abapai superintendente distrito paimabasi maʉ̃ pʉwʉrʉde, mawũãsidu mebẽrãbara mʉ̃ra bia edasida.

Mʉ̃ superintendente distritobaside mejãcha sobiabasi asamblea sirkuitode jaradiabasi baera. Kongregasionʼra akʉbari zõrãrãnebema mejãchaʉba, mʉ̃re audre kʼawuapanasi, maʉ̃ranebema abaʉba mʉ̃ buru kʼoeside diskurso diasi. Kongregasionʼra akʉbari zõrãrã mebẽã Theodore Jaraczta, tẽã Zõrãrã Burubiadebemabasi. Adewara basi betelitara Betel Brooklynʼnebemata. Mʉ̃a ũdusi ãya mebẽrãra mejãcha kãgabʉta akʉza Daizeze Bedʼeata wãrĩnu ĩjãbasita, adewara Jeowa organizasionʼare kʼẽrẽpapanʉta. Mawũã ãya edabʉta ũdubisida baera mʉ̃itara zare ẽ basi superintendente distrito bʼaita.

1974de Zõrãrã Burubiaraba jidasida ʉ̃kʉrʉ kongregasionʼra akʉbari zõrãrãta superintendente  distrito bʼaita. Maʉ̃ba mʉ̃ra jẽda kongregasionʼra akʉbari zõrãrãbasi pʉwʉrʉ Carolina del Surde. Maʉ̃ ewaridera mebẽrã paimarata akʉza mebẽrã torrorata ãba yi jʉrepanasi, maʉ̃ba mebẽrãra mejãcha sobiapanasi.

Poaga 1976 jõbodoare mʉ̃aʼa jarasida wãmarẽã pʉwʉrʉ Georgiaeda, mamara akʉibarabasi kongregasion Atlantadebemata akʉza Columbusdebemata. Ewari aba wũãwũãra paimarata juesoma beisi ãyi de bawana kʼarea, maʉ̃nera mʉ̃a diasi diskurso maʉ̃ra wũãwũãra beida kʼarea. Maʉ̃ra wũãwũãra yibarirãra ospitaldebasi mawũã bawana kʼarea akʉza ospitaldera mebẽrã mejãcha jʉ̃ẽsida, naʉ̃ra mebẽrã so zarea diaita. Maʉ̃nera jʉ̃ẽsida mebẽrã paimarata akʉza mebẽrã torrorata, maʉ̃ne ũdusi mebẽrãra ãyirai mejãcha kãgapanʉta. Mawũã so zʉbʉria ũdubibʉba kʼarebaseabʉ mebẽrãba bedʼea zroma ũdubʉrʉde awuantadamarẽã.

1977de daiʼa jarasida Betel Brooklynʼnebemama wãita trajo abaʉde kʼarebaita. Maʉ̃ trajo ma obodoare, mebẽã Zõrãrã Burubiadebema ũmeba ariya Betelde trajabisida.

Mʉ̃ra 24 poagabayeda trajasi Departamento Servisiode, namara mebẽrãbara kʼarebaibarabasi mebẽrãba bedʼea zroma erbʉ ara oita. Poaga berabari wãne Zõrãrã Burubiarabara Daizeze Bedʼearadebemaneba nekʼãrẽta jaradiabʉ. Ãya kʼãwũã nekʼãrẽ jaradiabʉdeba panʉseabʉ mebẽrãba bedʼea widipanʉta akʉza jaradiaseabʉ kongregasionʼra akʉbari zõrãrã akʉza zõrãrã kongregasionebema, adewara yi nãã edebarira. Naʉ̃ba kʼarebabʉ mebẽrãta Jeowa kʼawa bamarẽã akʉza Jeowa organizasionta zarea babibʉ.

1995deba 2018 bayeda sukursalrata akʉ jʉ̃ẽbasi sentral mundialbari. Mʉ̃ra mainʉ jʉ̃ẽbʉrʉdera ãba yi jʉrebasi mebẽrã Betel akʉbarirabawara, betelitarabawara, akʉza misionerorabawara, ãyaʼa so zarea diaita akʉza kʼarebaita ãya nesidabʉde. Mebẽrãba ãyi sãwũã berabaridata nebʉrabʉba so zarea diabasi mʉ̃aʼa akʉza Rubyʼa. Bari jaraita, daira wãsi Ruandaeda poaga 2000de, maʉ̃nera daira mejãcha sopʉasi mebẽrã Beteldebemaba akʉza wuabema mebẽrãba jarasidade kʼãrẽta berabarisidata ẽbẽrarã mejãcha beasidade 1994de. Maʉ̃ra mebẽrãnebema mejãchaʉba aduasi ãyi mebẽrãta, mawũãsidu ãya ũdubisida ĩjãbʉta, nebia jʉ̃ãpanʉta akʉza sobiapanʉta.

Idi daira 80 poaga audrepanʉ akʉza naʉ̃ 20 poaga berabari zebʉrʉdera mʉ̃ra mebẽrã Betel akʉbaridebema Estados Unidosde. Mʉ̃ra unibersidaeda wã ẽ basi, mamina Jeowaba akʉza iyi organizasionba mʉ̃aʼa biʼia jaradiabʉrʉ. Maʉ̃ kʼarea mʉ̃a awurura jaradiabʉ wãrĩnu Daizeze Bedʼeadebemata, mawũã ãyita ewari jõmaʉ̃nẽ kʼarebamarẽã (2 Cor. 3:5; 2 Tim. 2:2). Mʉ̃a ũdu zebʉrʉ sãwũã Daizeze Bedʼeade jarabʉba kʼarebabʉta ẽbẽrarã bia wãmarẽã akʉza Jeowa neũdukʼawua bamarẽã (Sant. 4:8). Daiba oseabʉde ẽbẽrarã so zarea diapanʉ bia akʉdamarẽã ãya Jeowa ʉ̃rʉ kʼawuabʉta akʉza awurura maʉ̃ta jaradiadamarẽã, maʉ̃ oira Jeowa ʉ̃rʉ Kʼawuabipanʉrãitara audre yibia.