Jiñi c papá yicʼot c mamá tsaʼ cajiyob ti estudio yicʼotob jiñi i testigojob Jehová tiʼ tejchibal majlel 1940. Ti wiʼil tsiʼ cʌyʌyob jiñi estudio, pero jiñi c mamá tsaʼʌch i bej chʼʌmʌ jiñi revista Lac Tsictesʌbentel yicʼot ¡Jamʌx a wut! Ti 1950, tsaʼ mejli jumpʼejl colem tempa bʌ internacional bʌ ti Nueva York, i tsajñi jiñi c familia.

Ti wiʼil, jiñi hermano Lawrence Jeffries tsaʼ caji i julaʼtañon lojon i tsiʼ chaʼle wersa chaʼan miʼ pʌsbeñon jiñi i sujmlel. Ti ñaxan, mach weñic mij qʼuel cheʼ jiñi i testigojob Jehová maʼañic miʼ yotsañob i bʌ ti política i mi muqʼuicto i majlelob ti guerra. Tsaʼ c sube jiñi hermano chaʼan cheʼ tiʼ pejtelelobic jiñi añoʼ bʌ ti Estados Unidos maʼañic miʼ jacʼob majlel ti guerra, jiñi lon j contrajob miʼ mejlelob ti ochel yaʼ ti país. Jiñi hermano Jeffries wen jach bajcheʼ tsiʼ coltayon c chʼʌmben i sujm. Miʼ subeñon: «¿I chuqui miʼ mel (chaʼlen) Jehová maʼ wʌl cheʼ luʼ Testigojobic jiñi chumuloʼ bʌ ti Estados Unidos i miʼ tilelob ti contrajintel?». Jiñi tsaʼ bʌ i subeyon chaʼan bʌ iliyi yicʼot yan tac bʌ tema tsiʼ coltayon j qʼuel chaʼan mach weñic bajcheʼ mic ñaʼtan, i jiñi tsiʼ coltayon chaʼan mic ñumen mulan j cʌn.

Tsaʼ c wen pejca jiñi ñoxix bʌ revista tac Lac Tsictesʌbentel yicʼot ¡Jamʌx a wut! lotbil bʌ i chaʼan jiñi c mamá. Ti wiʼil, tsaʼ j qʼuele chaʼan woli (choncol) j cʌn jiñi i sujmlel, jin chaʼan tsaʼ c jacʼʌ jiñi estudio tsaʼ bʌ i subeyon jiñi hermano Jeffries. Cheʼ jaʼel, tsaʼ cajiyon ti majlel ti tempa bʌ tac. Jiñi i sujmlel tsiʼ yʌqʼueyon c tijicñʌyel, i tsaʼ sujtiyon bajcheʼ publicador. Tsaʼ qʼuextʌyi jiñi c meta tac cheʼ bʌ tsaʼ c chʼʌmbe i sujm chaʼan «lʌcʼʌlix jini bʌbʌqʼuen bʌ qʼuin» (Sof. 1:14). Tsaʼ j cʌyʌ c ñaʼtan jiñi universidad, i comix j coltan yañoʼ bʌ chaʼan miʼ cʌñob jiñi i sujmlel am bʌ ti Biblia.

Tsaʼ cujtesa j clase ti 13 chaʼan junio ti 1956, i tiʼ yuxpʼejlel qʼuin tsaʼ c chʼʌmʌ jaʼ ti jumpʼejl asamblea chaʼan circuito. Maʼañic tsaʼ c ñaʼta bajcheʼ  cʼamel bendición mi caj c taj cheʼ woli (yʌquel) j cʌn Jehová yicʼot cheʼ mic pʌs jiñi i sujmlel.

Tsaʼ sujtiyon ti precursor regular cheʼ bʌ añix 6 mes c chʼʌmʌ jaʼ. Yaʼ ti Ministerio del Reino chaʼan diciembre 1956 am bʌ ti inglés tsaʼ loqʼui jumpʼejl tema baqui miʼ subentel jiñi hermanojob chaʼan miʼ majlelob baqui ñumen yomto coltʌntel. C chaʼañʌch tsaʼ cubi jiñi come com majlel ti coltaya baqui anto yom xsubtʼañob (Mat. 24:14).

Tsaʼ majliyon ti Edgefield (Carolina del Sur), ti jumpʼejl congregación baqui an jach chʌntiquil publicador. Joñon jiñi i joʼticlel. Jiñi tempa bʌ mi lon c mel tiʼ yotot juntiquil hermano. Ti jujumpʼejl uw mic chaʼlen subtʼan 100 hora. Cabʌl chuqui mic mel come mij qʼuel jiñi subtʼan, jiñi c asignación tac yicʼot mic ñusan discurso tac ti tempa bʌ. Tsaʼ j qʼuele chaʼan cheʼ bʌ mic ñumen melben i yeʼtel Jehová, ñumen cabʌl chuqui mij cʌn tiʼ tojlel.

Juntiquil xʼixic muʼ bʌ cʌqʼuen estudio i yum jumpʼejl funeraria ti Johnston, jumpʼejl tejclum lʌcʼʌl jach bʌ an. Tsiʼ yʌqʼueyon jumpʼejl queʼtel ojlil qʼuin jach bʌ i tsiʼ majñʌbeyon lon jumpʼejl i yotot chaʼan mi lon j cʼʌn bajcheʼ i Yotlel tempa bʌ.

Jiñi hermano Jolly Jeffries, i yalobil jiñi hermano tsaʼ bʌ i yʌqʼueyon estudio, tsaʼ loqʼui ti Brooklyn (Nueva York) chaʼan miʼ majlel yaʼ baqui chumulon i tsaʼ sujti tic piʼʌl ti precursor. Tsaʼ chumleyon lojon ti jumpʼejl alʌ remolque tsaʼ bʌ i yʌqʼueyon lon ti majan juntiquil hermano.

Tiʼ surlel Estados Unidos mach letsic lac tojol. Mic tojtʌl lon chaʼpʼejl o uxpʼejl dólar chaʼan jumpʼejl qʼuin eʼtel. Ti jumpʼejl bʌ qʼuin cheʼ bʌ woli c loqʼuel ti jumpʼejl tienda i tsaʼix c luʼ cʼʌñʌ jiñi c taqʼuin chaʼan mic mʌn chuqui mij cʼux, tsiʼ lʌcʼtesa i bʌ juntiquil wiñic i tsiʼ cʼajtibeyon: «¿Woli a sʌclan eʼtel? Mic tojet jumpʼejl dólar chaʼan jujumpʼejl hora eʼtel». Uxpʼejl qʼuin tsaʼ c chaʼle chobal ti jumpʼejl lum baqui miʼ mejlel otot tac. Tsiquil chaʼan Jehová woliʼ coltañon chaʼan mij cʌytʌl ti Edgefield. Anquese wocol chaʼan mic taj taqʼuin, tsaʼʌch mejliyon ti majlel ti jiñi colem tempa bʌ internacional bʌ tsaʼ bʌ mejli ti 1958 ti Nueva York.

Cheʼ tiʼ chaʼpʼejlel qʼuin jiñi colem tempa bʌ an chuqui tsaʼ ujti. Tsaʼ j cʌñʌ Ruby Wadlington, juntiquil precursora regular ti Gallatin (Tennessee). Ti lon c chaʼticlel com lojon sujtel ti misionero, jin chaʼan tsajñon lon ti jiñi tempa bʌ tsaʼ bʌ mejli chaʼan jiñi yomoʼ bʌ majlel ti Galaad. Ti wiʼil, tsaʼ caji c tsʼijbuben lon c bʌ. Ti jumpʼejl bʌ qʼuin tsaʼ pʌjyiyon cʌcʼ jumpʼejl discurso ti Gallatin, i tsaʼ j cʼajtibe Ruby mi yom ñujpuñel yicʼoton. Tsaʼ cʼaxiyon tiʼ congregación, i tsaʼ ñujpuñiyon lon ti 1959.

An 23 c jabilel cheʼ bʌ tsaʼ ochiyon ti siervo de congregación (ili ora cʌmbil bajcheʼ coordinador chaʼan ancianojob) ti Gallatin. Joñon lon jiñi ñaxam bʌ congregación tsaʼ bʌ i julaʼtayon lon jiñi tsijib circuito i cʼabaʼ Charles Thompson. Juntiquilʌch wiñic wen añix bʌ i ñaʼtʌbal. Pero tsiʼ cʼajtibeyon  chuqui i cʼʌjñibal i chaʼan jiñi hermanojob yicʼot chuqui tsiʼ meleyob jiñi yambʌ viajantejob chaʼan miʼ coltañob. Tiʼ tojlel tsaʼ j cʌñʌ chaʼan cheʼ bʌ an chuqui mi caj lac mel, yomʌch mi lac ñaxan mel cʼajtiya tac yicʼot mi lac wen cʌn jiñi muʼ tac bʌ i yujtel.

Ti mayo ti 1964, tsajñon ti jiñi Escuela chaʼan bʌ i Yumʌntel Dios, muʼ bʌ i jalʼan jumpʼejl uw i tsaʼ mejli ti South Lansing (Nueva York). Jiñi tsaʼ bʌ i chaʼleyob cʌntesa tsiʼ coltayoñob chaʼan mic mulan c ñumen cʌn Jehová yicʼot chaʼan mic chʌn chaʼlen wersa.

Ti enero chaʼan 1965, joñon quicʼot Ruby tsaʼ sujtiyon lon bajcheʼ superintendente chaʼan circuito. Tsaʼ chojquiyon lon majlel ti jumpʼejl circuito wen colem bʌ, miʼ tejchel ti Knoxville (Tennessee) cʼʌlʌl ti Richmond (Virginia). Yaʼ ochem congregación tac chaʼan bʌ Carolina del Norte, Kentucky yicʼot Virginia Occidental. Jin jach mic julaʼtan lojon jiñi congregación tac chaʼan bʌ jiñi hermanojob iʼicʼoʼ bʌ, come ti jimbʌ ora mach junyajl weñic miʼ qʼuejlel tiʼ surlel Estados Unidos cheʼ miʼ tempañob i bʌ jiñi mach bʌ lajalobic i colorlel i pʌchʌlel, jin chaʼan jiñi iʼicʼoʼ bʌ maʼañic miʼ mejlel i tempañob i bʌ yicʼotob jiñi sʌcoʼ bʌ. Jiñi hermanojob yaʼi pʼumpʼuñob, jin chaʼan tsaʼ lon c tʼoxo chuqui an lon c chaʼan. Juntiquil superintendente chaʼan circuito wen añix bʌ i ñaʼtʌbal an chuqui wen ñuc bʌ i cʼʌjñibal tsiʼ pʌsbeyon. Tiʼ subeyon: «Mele a bʌ bajcheʼ juntiquil hermano. Cheʼ bʌ maʼ cʼotel ti jiñi congregación tac mach a mel a bʌ bajcheʼ i yum jiñi hermanojob. Mi caj a mejlel a coltañob mi mucʼʌch i qʼueletob bajcheʼ juntiquil i yermañu».

Ti jumpʼejl bʌ qʼuin, cheʼ bʌ woli c julaʼtan lon jumpʼejl congregación mach bʌ colemic, Ruby tsaʼ caji i yʌqʼuen estudio juntiquil xʼixic am bʌ juntiquil i yalʌ chʼoc an jaxto bʌ jumpʼejl i jabilel. Ruby tsaʼ caji i bej acʼ jiñi estudio ti carta come yaʼ ti congregación maʼañic majqui miʼ mejlel i yʌcʼ jiñi estudio. Cheʼ bʌ chaʼ tsajñon lon ti julaʼ, jiñi xʼixic tsajñi ti jiñi tempa bʌ tac. Ti wiʼil, chaʼtiquil precursora especial tsaʼ majliyob ti chumtʌl yaʼ ti tejclum, i tsaʼ caji i bej aqʼueñob estudio jiñi xʼixic jinto tsiʼ chʼʌmʌ jaʼ. Tsaʼ ñumi cheʼ bʌ 30 jab i ti 1995, yaʼ ti Betel am bʌ ti Patterson, juntiquil hermana xchʼocto bʌ tsaʼ cʼoti i pejcan Ruby. Jiñʌch i yixicʼal jiñi xʼixic tsaʼ bʌ i yʌqʼue estudio Ruby. Jiñi xchʼoc yicʼot jiñi i ñoxiʼal añob ti jiñi clase 100 chaʼan Galaad.

Jiñi i chaʼpʼejlel circuito tsaʼ bʌ c julaʼta lojon an ti Florida. Ti jimbʌ ora i cʼʌjñibal c chaʼan lojon juncojt carro. Jin chaʼan, tsaʼ c mʌñʌ lojon juncojt juben jach bʌ i tojol. Pero cheʼ ti ñaxam bʌ semana tsaʼ asiyi jiñi i bombajlel i yaʼlel, i maʼañic lon c taqʼuin chaʼan mi cʌcʼ lojon ti tojʼesʌntel. Tsaʼ c ñaʼta juntiquil hermano muʼ bʌ i mejlel i coltañon lojon i tsaʼ c pejca. Jiñi hermano tiʼ sube juntiquil i yaj eʼtel chaʼan miʼ tojʼesan jiñi lon j carro i maʼañic tsiʼ jacʼʌ i chʼʌm i tojol. Tsaʼ jach i yʌlʌ: «Laʼto ajñic». Tsaʼto i yʌqʼueyon lojon taqʼuin. Jiñi tsiʼ pʌsbeyon lojon chaʼan Jehová miʼ cʌntan jiñi i wiñicob yicʼot tsiʼ cʼajtesʌbeyon chaʼan ñuc i cʼʌjñibal cheʼ mi lac tʼox chuqui an lac chaʼan.

Jajayajl mic julaʼtan lojon jiñi congregación tac mij cʌytʌl lojon tiʼ yotot jiñi hermanojob, i cheʼ bajcheʼ jiñi tsaʼ lon c taja wem bʌ lon camigojob. Ti jumpʼejl bʌ qʼuin tsaʼ j cʌyʌ yaʼ tic máquina de escribir jiñi informe chaʼan bʌ congregación maxto bʌ cujtesa. Cheʼ bʌ tsaʼ cʼotiyon, tsaʼ j qʼuele chaʼan jiñi i yalobil jiñi familia an jaxto bʌ uxpʼejl i jabilel tsaʼ bi i poj «coltayon» cujtesan jiñi informe. Joñon quicʼot jiñi chʼiton cabʌl jab tsaʼ lon c tseʼta jiñi.

Ti 1971, tsaʼ aqʼuentiyon lon jumpʼejl carta baqui tsaʼ subentiyon lojon chaʼan mi lon c majlel bajcheʼ superintendente chaʼan distrito yaʼ ti Nueva York. Jiñi tsiʼ yʌcʼʌ ti toj sajtel lon c pusicʼal. An jaxto 34 c jabilel cheʼ bʌ tsaʼ majliyon lon yaʼi. Joñon jiñi ñaxam bʌ superintendente chaʼan bʌ distrito icʼbʌlan bʌ yaʼi, pero jiñi hermanojob wen tijicñayob cheʼ bʌ tsaʼ cʼotiyon lojon.

Cheʼ bʌ añon bajcheʼ superintendente chaʼan distrito mic wen mulan c pʌs jiñi i sujmlel chaʼan bʌ Jehová ti jiñi colem tempa bʌ tac. Cabʌl superintendentejob chaʼan circuito ñumen añobix i ñaʼtʌbal. Juntiquil jiñʌch tsaʼ bʌ i yʌcʼʌ jiñi discurso cheʼ tsaʼ c chʼʌmʌ jaʼ. Yambʌ, jiñi hermano Theodore Jaracz, tsaʼ ochi ti jiñi Junmojt muʼ bʌ i pʌsob bij ti wiʼil. Cheʼ jaʼel, an cabʌl hermanojob wen añobix bʌ i ñaʼtʌbal añoʼ bʌ ti jiñi Betel ti Brooklyn. Wen tijicñayon cheʼ ili superintendentejob chaʼan circuito yicʼot betelitajob tsiʼ yʌqʼueyoñob cubin c tijicñʌyel. Tsaʼ j qʼuele chaʼan wen añob i cʼuxbiya yicʼot mucʼʌch i ñopob muʼ bʌ i yʌl jiñi i Tʼan Dios i miʼ coltañob muʼ bʌ i yʌl jiñi organización. Mach wocolic tsaʼ cubi chaʼan mic mel queʼtel bajcheʼ distrito come tsiʼ pʌsʌyob i pecʼlel.

Ti 1974, jiñi Junmojt muʼ bʌ i pʌsob bij tsiʼ yotsa bajcheʼ superintendente chaʼan distrito junmojt superintendentejob añoʼ bʌ bajcheʼ circuito. Jin chaʼan, joñon tsaʼ mejliyon ti chaʼ sujtel bajcheʼ superintendente chaʼan circuito, i tsaʼ chojquiyon majlel ti Carolina del Sur. Ti jimbʌ ora jiñi congregación tac yicʼot jiñi circuito tac mach chʌn tʼoxolobix tiʼ caj bajcheʼ yilalob i colorlel, i jiñi hermanojob wen tijicñayob chaʼan jiñi.

Tiʼ yujtibal majlel 1976, tsaʼ chojquiyon majlel ti Georgia, jumpʼejl circuito am bʌ ti Atlanta yicʼot Columbus. Maʼañic miʼ ñajʌyel c chaʼan cheʼ bʌ tsaʼ cʌcʼʌ jumpʼejl discurso cheʼ bʌ tsaʼ mujquiyob cinco alobob iʼicʼoʼ bʌ tsaʼ bʌ chʌmiyob (sajtiyob) tiʼ caj tsaʼ pulbentiyob i yotot. Jiñi i mamájob tsaʼ internarinti ti hospital come tsaʼ wen puli. Yaʼ ti hospital tsaʼ cʼotiyob cabʌl hermanojob iʼicʼoʼ bʌ yicʼot sʌcoʼ bʌ chaʼan miʼ ñuqʼuesʌbeñob i pusicʼal jiñi tatʌlob. Tsaʼ j qʼuele bajcheʼ cʼamel i cʼuxbiya jiñi hermanojob. Iliyi miʼ mejlel i coltan jiñi i wiñicob Dios chaʼan miʼ cuchob jiñi tsʌts bʌ wocol tac.

Ti 1977, tsaʼ pʌjyiyon lojon ti coltaya chaʼpʼej uxpʼejl uw yaʼ ti Betel am bʌ ti Brooklyn. Cheʼ bʌ muqʼuix caj i yujtel jiñi eʼtel, chaʼtiquil ochemoʼ bʌ ti jiñi Junmojt muʼ bʌ i pʌsob bij tsiʼ pejcayon lon i tsiʼ cʼajtibeyon lojon mi com lon cʌytʌl ti Betel. Tsaʼʌch c jacʼʌ lojon.

Veinticuatro jab tsaʼ c chaʼle eʼtel yaʼ ti Oficina chaʼan servicio, baqui jiñi hermanojob miʼ jacʼob jiñi cʼajtiya tac muʼ bʌ i mejlel. Ti wiʼil, jiñi Junmojt muʼ bʌ i pʌsob bij tsaʼ caji i pʌs chuqui tac yom miʼ mejlel cheʼ bajcheʼ miʼ yʌl jiñi Biblia. Iliyi an i colta chaʼan miʼ jajqʼuel jiñi cʼajtiya tac, pero an i colta jaʼel jiñi superintendentejob chaʼan circuito, ancianojob yicʼot precursorob. Ili an i coltayob chaʼan miʼ ñumen chaʼleñob wersa yicʼot an i colta jiñi i yorganización Jehová.

Ti 1995 cʼʌlʌl 2018 jiñi central mundial tsiʼ chocoyon majlel chaʼan mic julaʼtan jiñi sucursal tac. Mic tempan c bʌ quicʼotob jiñi Comité chaʼan sucursal tac, jiñi betelitajob yicʼot jiñi misionerojob chaʼan mij coltañob tiʼ wocol. I joñon quicʼot Ruby mic taj lojon c tijicñʌyel cheʼ bʌ mi cubin lon jiñi experiencia tac muʼ bʌ i yʌlob. Jumpʼejl ejemplo, cheʼ ti jabil 2000 tsaʼ c julaʼta lojon Ruanda. Tsaʼ wen ñijcʌyi lon c pusicʼal cheʼ bʌ jiñi hermanojob yicʼot jiñi añoʼ bʌ ti Betel tsiʼ yʌlʌyob bajcheʼ tsiʼ ñusayob jiñi tsʌnsʌntel tsaʼ bʌ ujti ti 1994. Cabʌlob am bʌ majqui tsaʼ chʌmiyob i chaʼan. Pero, anquese tsiʼ ñusayob jiñi wocol, mucʼʌch i bej ñopob ti Jehová, añob i pijtaya yicʼot tijicñayob.

Wʌle ñumeñix ti 80 lon c jabilel. Ti jiñi 20 jab ñumen bʌ ochemon ti jiñi Comité chaʼan Sucursal am bʌ ti Estados Unidos. Maʼañic tsajñon ti universidad, pero Jehová yicʼot jiñi i yorganización tsiʼ cʌntesayon ti wen. Ili an i coltayon chaʼan miʼ mejlel c pʌsben yambʌlob jiñi i sujmlel am bʌ ti Biblia, muʼ bʌ i mejlel i coltañob tiʼ pejtelel ora (2 Cor. 3:5; 2 Tim. 2:2). Qʼuelbil c chaʼan chaʼan jiñi muʼ bʌ i yʌl jiñi Biblia miʼ coltan jiñi lac piʼʌlob chaʼan wen miʼ chumtʌlob yicʼot chaʼan miʼ sujtelob tiʼ yamigo Jehová (Sant. 4:8). Cheʼ bʌ mucʼʌch i mejlel, joñon quicʼot Ruby mic suben lon jiñi yañoʼ bʌ chaʼan miʼ qʼuelob ti ñuc cheʼ miʼ mejlel i cʌñob Jehová yicʼot cheʼ miʼ mejlel i pʌsob jiñi i sujmlel am bʌ ti Biblia. Jiñʌch jiñi ñumen ñuc bʌ majtañʌl muʼ bʌ i mejlel i taj juntiquil i wiñic Jehová.