ˈDhɛ ˈkwa ˗ʒiö ˗kwɛ 1940 ˈgü ˈdɛdɛ ˈka, n ˗mɛn ˗nu ˗ya Biblö draansü ˗bha Zoova ˗bha ꞊Gbɛkiö ˗nu ˈˈpiʋ̈. ˗An ˗bha Biblö ꞊klaŋ ˈyii ˈdho ˈˈdhiʋ̈. ˈˈKɛɛ n dhe ˗zë ˗yö ˗kun ˈˈGlaadhiʋ̈ ˗tɔn waa Réveillez˗vous ! ˗nu ˈsü ˗ni ˈgü ˗kplawo. ˗Kwɛ 1950 ˈgü, ˈˈsɛ ˗gɔ ꞊va ˗bha ˗bhɔkwëë ˈkpii˗ do ˈö ˗kë Nuyɔɔkö yaa n ˗mɛn ˗nu yi ˗dho ˗a ˗ta.

˗A ˗dhɛ ˈti ꞊gwëë ˈyö kwa ꞊dhegblü Larɛnsö Ʒefrizö ˗yö ˗ya ˗wo yi ˗dhɛ ˗sü ˗bha, ˈö˗ ˈˈslö ꞊mɛɛn kö ˈö n ˗takun gagade dɔ ˗sü ˗bha. ˗A züdɔdhɛ ˈgü, ˈdhɛ˗ pö n ˗dhɛ ꞊dhɛ Zoova ˗bha ꞊Gbɛkiö ˗nu ˈwaa wo ˗kɔ ˗da ˈˈsɛkɔɔwɔn ˈgü ɛɛnˈˈ ˈwaa kë ˈˈsɔdha ˗nu ˈka, ˗yö ˈti n ˗zokun. ˈYö ˈa˗ pö ˗a ˗dhɛ ˗ya kë ꞊dhɛ Amedhikö ˗mɛn ˗nu ˈˈpɛpɛ ˈwii ˈˈwɩ˗ ˗bha kö ˈwo ˈdho ˗gblü ˈˈpiʋ̈, yi ˈyɔɔ˗ ˗nu ˗dho yi ˗bha ˈˈsɛ ˈsü. Kwa ꞊dhegblü Ʒefrizö ˗yö ö zuʋ̈ˈˈ ˗kë ˗saa ˈö˗ pö: «Ü ˗bha ˈgü, ˗ya kë ꞊dhɛ Amedhikö ˗mɛn ˗nu ˈˈpɛpɛ ˗wo Zoova ˗dhɔkëmɛn ˗nu ˈka ˗be, ˗an ˈyɔɔ˗ ˗nu ˗wa nu ˗an ˗gɔ, ˈmën Zoova dho ˗a kë?» ˈWɔn ˈö ˗gban dhɛɛˈˈ bhë ˗a ˗bha waa pë ˗nu ˈö˗ ˗zɔn n ˗dhɛ ˗wo n ˗takun ˈa˗ yö ꞊dhɛ n ˗man ˈwɔn yö ˗kɔ ˈyaa kun ˗së. ˗Ya ˗kë ˈö Biblö draansü ˗dhɔ ˗yö n ˗kë ꞊dedewo.

ˈˈGlaadhiʋ̈ ˗tɔn waa Réveillez˗vous ! zii ˗nu ˈwo kun n dhe ˗gɔ ˈkɔɔ a ˈˈlɛlɛ ꞊va ˗kë ˗an ˗wopösü ˗bha. ˈDhɛ ˈˈtʋ̈ŋ ˈbha ˗yö ˗ʒiö, ˈa˗ yö ꞊dhɛ pë ˈa kun ˗a draanˈˈ ˗ni ˈgü bhë gagade ˗mü, ˈyö ˈa ˗wɩ Biblö draansü ˗bha kwa ꞊dhegblü Ʒefrizö ˈˈpiʋ̈. A ˗ya ˈzü ˗dho ˗bhɔkwëë ˗nu ˗ta ˗sü ˗bha zoodhö zoodhö. Gagade ˗yö ˗pa n zuʋ̈ˈˈ ˈka, ˈa ˗kë ˗zlanwopömɛn ˈka. ˈDhɛ ˈa˗ man ꞊dhɛ «Zoova ˗bha ˗dhɛkpaɔyi ˈkpii˗ ˗ya yö ꞊klöö˗,» ˈpë ˈa˗ ˗ya n ˗zo ˈˈpiʋ̈ ˗be a˗ ˗bho ˈˈgblʋʋ. (Soph. 1:14) ˈMaan kun ˗a ˈˈpiʋ̈ ˈzüdho kö ˈa ˈdho ꞊klaŋ ˈkɔ ˈkpii˗ ˈgü, ˈpë ˈa kun ˗a ˈˈpiʋ̈ ꞊taabha ˈyö ˗tɔ ˈa mɛn ˗nu ˗takun gagade ˗nu ˈwo Biblö ˈgü, ˗an dɔ ˗sü ˗bha.

 A n ˗bo kolɛʒiö ꞊klaŋ ˈka ˗kwɛ 1956 Ʒuɛn 13 ˈgü. ˈDhɛ ˗dhɛkpaɔyi ˗yaaga ˗ʒiö, a ˗bɔ ˈˈyi ꞊bhaa ˈpian do ˈˈpiʋ̈ ˗bhɔkwëë do ˗ta. Yi ˈö bhë ˗a ˈka, ˈyaa kun n ˈˈɲaan ꞊dhɛ n ˗de ˗nu Zoova ˗dhɛ ˗sü kö ˈwɔn ˈö ˗gban ˗a ˗bha ˈa˗ draanˈˈ, ˈa mɛn ˈˈwɛɛ ˗nu ꞊klaŋkë ˗a ˈka bhë, ˗yö ˗dho ˈwɔn ˗së ꞊va ꞊dede ˗kë n ˗dhɛ.

ˈDhɛ ˈa bɔ ˈˈyi ꞊bhaa ˈö ˈˈsu ˈˈsɔɔdo ˗ʒiö, a ˗kë ˈˈtʋ̈ŋ ꞊gban ˈgü ˗yödhiʋ̈ ˈka. ˈWɔn ˗gɔ do ˈbha ˗kun ˗kwɛ 1956 Desanblö ˈˈsu ˗bha ˗Gblüdëdhɛ ˗yö ˈsëëdhɛ ˈgü, ˈö˗ ˗gɔ ˗kë: « Pouvez-vous aller là où on a besoin de renfort ? » ˈka. A˗ ˗yö ꞊dhɛ ˗yö ˗gban n ˗bha. A ˗kun ˗a ˈˈpiʋ̈ kö ˈa ˈdho ˈa ˗ya ˗dhɛ ˈö ˗zlanwopömɛn ˗nu ˈwaa˗ ˗bha ꞊va, ˗a ˈgü.—Mat. 24:14.

A ˗dho ˈa ˗ya Karolinö di sidö ˈˈkwipö ˈwo˗ ˗dhɛ Ɛʒöfidö ˗a ˈgü. Mɛn ˗yiishiö ˈˈkpaan ˈnën ˈwo kun ˗zlanwopömɛn ˗nu ˈka mü, ˈa ˗da ˗an ˈˈpiʋ̈ ˈyi ˗kë ˈˈsoodhu. Yi ˗kun ˗bhɔkwëë ˗nu kë ˗ni ˈgü kwa ꞊dhegblü do ˗gɔ ˈkɔɔ. ˈˈSu ˈˈpɛpɛ ˈka, ˈˈlɛlɛ 100 ˈnën ˈa˗ ˗kë ˗zlanwopösü ˈgü. Man ˈnën ˈa kun ˈˈdhiʋ̈sü ˗ni ˈgü ˗zlanwopösü ˈka, ˈa ˈˈdhɛɛtadhiaŋ˗ ˗nu zë ˗zlanwokɔdhi ˈgü. ˗A ˈdhɛ kun ˗së ˈyö ˗tɔ yö ˗nu ˈwo ˈˈdhʋ̈ a ˗an kë ˗ni ˈgü, a pë ꞊va ˗draan ˈö ˗gban Zoova ˗bha.

Dhebɔnën do ˈa kun Biblö ˗zɔn ˗ni ˈgü ˗a ˗dhɛ ˈˈkwipö ˈwo˗ ˗dhɛ Ʒɔnŋsɔnö ˈö ˈyaa kun yi ˈka ꞊gblɛɛn ˗a ˈgü, ˗zokë mɛn ꞊gee ˈˈpiʋ̈ ˗sü soete do ˗kun ˗a ˗gɔ. ˗Yö yö ˈdɛdɛ ˗nu n ˗dhɛ ö ˗bha soete ˈgü, ˈö ˈkɔ ˈnën ˈˈtɩtɩ do ˈbha nu yi ˗dhɛ kö ˈyi ˗bhɔkwëë ˗nu kë mü.

Kwa ꞊dhegblü Ʒefrizö ˈö Biblö ˗zɔn n ˗dhɛ bhë ˗a gbö do ˈwo˗ ˗dhɛ Ʒoli ˗yö ˗go Bluklinö, Nuyɔɔkö ˈˈkwipö ˈgü ˈö nu n ˈˈpiʋ̈, ˈö ˗kë n yökëyɔɔ ˈka ˗yödhiʋ̈dhɛ ˈgü. ˈKɔnën pë ˈˈtɩtɩ ˈö kwa ꞊dhegblü do ˗ya nu yi ˗dhɛ ˈyö ˈyi kun ˗a ˈgü.

ˈWaa kun mɛn ˗nu ꞊saabho ˗ni ˈgü ˗së ˈka ˈˈsɛ ˈˈpian ˈö bhë ˗a ˈgü. ˗Dhɛkpaɔyi do ˗yö ꞊saa ˈnën ˗tɔ yi ˗bha ˈwëë˗ dolaa ꞊plɛ ɛɛnˈˈ ˗yaaga. Yi do ˈka, ˈdhɛ ˈwëëga ˈö to n ˗gɔ ˈa˗ ˗bhöpë dhɔ, gɔndënën do ˗yö ˗ɲɔɔn n ˗bha ˈö n dhɛɛˈˈ kpɔ ˈö˗ pö: «Ü˗ ˈˈpiʋ̈ ˈü yökë ˗ee? A ˗dho ü ꞊saabho dolaa do ˈka ˈˈlɛlɛ ˗bha.» ˗Ya ˗pö n ˗dhɛ ˈa ö ˗bha ˈkɔ dɔ ˗dhɛ baaˈˈ ˗dhɛkpaɔyi ˗yaaga ˈˈpiʋ̈. A ˗to mü ˈa˗ yö ꞊dhɛ Zoova ˗ya ˈˈpiʋ̈ kö ˈa ˈto Ɛʒöfidö ˈˈkwipö ˈö bhë ˗a ˈgü. ˈKö ˗kë ꞊dhɛ pë ꞊va ˈyaa kun n ˗gɔ, a ˗dho ˗bhɔkwëë ˈkpii˗ ˈö ˗kë Nuyɔɔkö ˗kwɛ 1958 ˈgü bhë, ˗a ˗ta.

˗Bhɔkwëë ˈkpii˗ ˈö bhë ˗a ˗dhɛkpaɔyi ꞊plɛ ˗bha ˗naan ˈka, ˈwɔn do ˗së ˈbha ˗yö ˗kë. A ˗kpan ˈnëndhiëŋ do ˈwo˗ ˗dhɛ Rubi Waliŋtɔnö ˗a ˗bha. ˗Yö ˗kun ˈˈtʋ̈ŋ ꞊gban ˈgü ˗yodhiʋ̈ ˈka ˈˈkwipö ˈwo˗ ˗dhɛ Galatinö ˗a ˈgü. ˈDhɛ ˗kë ꞊dhɛ ˗kɔ ˈyi˗ ˗bha ꞊plɛ yi ˗kun ˗a ˈˈpiʋ̈ kö ˈyi kë bɔmɛn ˗nu ˈka, ˗bhɔkwëë ˈö ˗gban Galaadhö ꞊klaŋ ˗bha, yi ˗dho ˗a ˗ta. ꞊Taabha, yi ˗ya ˈsëëdhɛ ˗nu ˗bɔ yi ˈko ˗dhɛ ˗sü ˗bha. ˈYö yi do ˈka ˈwo n ˗dhɛ Galatinö kö ˈa ˈˈdhɛɛtadhiaŋ˗ zë mü. A ˗to ˗dhɛ ˈö bhë ˗a ˈgü ˈa˗ pö Rubi ˗dhɛ a˗ ˈˈpiʋ̈ kö ˈa˗ ˈsü dhe ˈka. ꞊Taabha, a ˗dho ˈa ˗ya ˗an ˗bha ˗zlanwokɔdhi ˈgü, ˈyö ˗kwɛ 1959 ˈgü, ˈyi yi ˈko sü.

ˈDhɛ n ˗kwɛ ˗kë 23, ˈyö ˈwo n ˗kë mɛn zii ˗nu ˗bha ˈwɔnyëë˗ ˈka Galatinö ˗zlanwokɔdhi ˈgü. ˈDhɛ kwa  ꞊dhegblü Shaalö Tɔmsɔnö ˗kë ˈˈpian do ˈˈpiʋ̈ ˗maankëmɛn ˈka, yi ˗bha ˗zlanwokɔdhi ˈnën ˗wo ˗a ˗dhɛ ˗blɛɛsü. ˈKö ˗kë ꞊dhɛ ˗ya ꞊gwëë ˗Zlan ˗bha yö ˈgü, ˗yö n dhɛɛˈˈ ˗kpɔ kö ˈpë kwa ꞊dhegblü ˗nu ˗bhawɔn ˈdhö˗ ˗bha waa ˗kɔ ˈö ˗maankëmɛn ˈˈwɛɛ ˗nu ˗wa ˗kë ˗a ˈka, ˈa˗ pö ö ˗dhɛ. ˗Yö n ˗takun ˈa˗ yö ꞊dhɛ ˗yö ˗së kö ˈkwa dhɛɛˈˈ ˗nu ˈkpɔ kö ˈkwa ꞊kun ˗da ˈwɔn ˈbha ˗nu ˗ʒian ˗ta.

˗Kwɛ 1964 ˈMɛn ˈˈsu ˈgü, a ˗dho ˗Gblüdëdhɛ ˗yö ꞊klaŋ ˈˈdhiʋ̈ Lansiŋ di sidö, Nuyɔɔkö. ˗A ꞊klaŋ ˈö ˈˈdhʋ̈ yi˗ ˗kë ˈˈsu do ˈˈpiʋ̈. Yi ˗bha ꞊klaŋgɔmɛn ˗nu ˗wo n ˗takun kö Zoova dɔ ˗sü ˗dhɔ ˈö n ˈgü ˗yö ˗dadhiʋ̈, kö ˈa ꞊ɲɔɔn ˗a ˈˈsuee.

˗Kwɛ 1965 Zanvie ˈˈsu ˈgü, yi ˗bha Betɛdhö ˗ya ˗pö n ˗dhɛ ˈa kë ˈˈpian do ˈˈpiʋ̈ ˗maankëmɛn ˈka, kö yaa Rubi ˈyi ˗wo ˗zlanwokɔdhi ˗nu ˗dhɛ. ˗Zlanwokɔdhi ˗nu ˈwo ˗an ˈˈklɔɔn bho yi ˗bha, ˗wo ˗kun ꞊va. ˗A züdɔ Knɔkövilö, Tenesi ˗dhɛ ˈˈpian ˗ta, ˈö dho yö˗ ˈka Rishimɔn ˗dhɛ ˗bha Viiʒini ˗dhɛ ˈˈpian ˗ta. ˗Zlanwokɔdhi ˗nu ˈwo kun Karolinö di nɔɔ, Kɛntuki waa Viiʒini ˈɲënŋ˗ ˗pö ˗ʒian ˈka, ˗an ꞊gban ˗kun yi ˗kɔ ˗ta. ˗Zlanwokɔdhi ˗nu ˈö mɛn tii ˗nu ˈdhö˗ ˈgü, wo dosɛnŋ ˈnën ˈyi kun ˗wo ˗ni ˈgü ˗an ˗dhɛ, ˈyö sü ꞊dhɛ ˈˈtʋ̈ŋ ˈö bhë ˗a ˈka Amedhikö ˗sɛ ˈgü, ˈwaa kun ˈˈwɩ ˗ni ˈgü ˗a ˗bha kö mɛn tii waa ˈˈkwi ˗nu ˗wo ˗ya ˗dhɛ do ˈgü. Kwa ꞊dhegblü ˗nu ˈwo kun mü ˗wo ˗kun ˈˈflɛɛsü. ˗A ˗wɔn ˈgü, pë ˈdɛdɛ ˗nu ˈwo kun yi ˗gɔ yi ˗an ˗nu yi ꞊dhegblü ˗nu ˈwo kun ˗kpla ˈgü, ˗an ˗dhɛ. Kwa ꞊dhegblü do ˈö ˗ya ꞊gwëë ˗maankëmɛndhɛ ˈgü, ˗yö ˗gleŋ do ˗së ˗da n ˗bha. ˗Ya ˗pö n ˗dhɛ: «ˈBha ˈdho ˗wo kwa ꞊dhegblü ˗nu ˗dhɛ ˗zlanwokɔdhi ˗nu ˈgü, ˗bhö kë ˗an ꞊dhegblü ˈka, ˈbha ˈdho kë ꞊dhɛ ˗an ˗gɔmɛn ˈdhö. ˗Wa ü yö ꞊dhɛ wo ꞊dhegblü ˈdhö, ˈyö ˈü dho ˗mɔn ˗an ˗takun ˗sü ˗bha.»

˗Dhɛkpaɔyi do ˈka kö yi ˗wo ˗ni ˈgü ˗zlanwokɔdhi ˈˈtɩtɩ do ˈbha ˗dhɛ, Rubi ˗yö ˗ya Biblö draanˈˈ ˗sü ˗bha dhebɔnën do ˈö ˗kwɛ do ˗nën kun ˗a ˗gɔ, ˗a ˈˈpiʋ̈. Mɛn ˈö dho ˈdho ˗a ˗bha ꞊klaŋ ˈka ˈˈdhiʋ̈ ˈyaa kun ˈdhö. ˗A ˗wɔn ˈgü, Rubi Biblö ˗zɔn ˗a ˗dhɛ ˈsëëdhɛ ˗bɔ ˗a ˗dhɛ ˗sü ˈka. ˈDhɛ ˈyi dho ˗wo ˗zlanwokɔdhi ˈö bhë ˗a ˗dhɛ ˈzü, dhebɔnën ˈö ˈˈdhʋ̈ ˗yö ˗nu ˗bhɔkwëë ˈˈpɛpɛ ˗ta. ꞊Taabha, ˈdhɛ ˈwo ˗yödhiʋ̈ ˗detasü ꞊plɛ ˈwo ˗kë dhebɔ ˗nu ˈka ˗an bɔ mü, ˗wo Biblö ˗zɔn ˗a ˗dhɛ ˈö dho ˈö bɔ ˈˈyi ꞊bhaa. ˗Kwɛ 1995 ˈgü, kö ˗kwɛ ˈö ˗mɔn 30 ˗bha ˗ya ʒiö, yi ˗kun Betɛdhö ˈö Patɛɛsɔnö ˗a ˈgü, ˈyö ˈnëndhiëŋ do ö ˗de ˗zɔn Rubi ˗dhɛ. ˗Yö ˗kun dhebɔnën ˈö Rubi kun Biblö ˗zɔn ˗ni ˈgü ˗a ˗dhɛ ˈkpa bhë, ˗a ˈdhu ˈka. ˗A ˈnëndhiëŋ waa ö ꞊gɔɔn ˗wo ˗nu Galaadhö ꞊klaŋkɔdhi 100 ˗bha ˗naan ˗bha.

ˈˈPian ꞊plɛ ˗bha ˗naan ˈwo yi bɔ ˗a ˈgü, ˈyö kun Floridö ˗sɛ ꞊zinŋgüdhɛ ˈka. Yi ˗bhawɔn ˗kun gɔ do ˗bha, ˈyö˗ do ˈö˗ ꞊sɔnŋ kun ˗së ˈyi˗ dhɔ. ˈˈKɛɛ ˈˈdhoogɔ ˗blɛɛsü ˈyi˗ ˗ʒiö ˗a ˈka, pë ˈbha ˗yö ˗shiʋ̈ ˗a motëë˗ ˈgü. ˈWëë˗ ˈyaa kun yi ˗gɔ kö ˈyi˗ baaˈˈ. A kwa ꞊dhegblü do ˈö ꞊mɔɔn˗ ˗bha ˗yö yi ˗takun, ˗a ˗dhɛ. Kwa ꞊dhegblü ˗ya ˗pö ö ˗bha yökëmɛn do ˗dhɛ ˗ya baaˈˈ. ˗Dhɛ ˈö ö bo ˗a baaˈˈ ˗sü ˈka, yö ˈti ˈˈwɩ˗ ˗bha kö ˈyi˗ ꞊saa bho. ˗Ya ˗pö n ˗dhɛ: «꞊Waa˗ ꞊saabho ˈsaadhö.» ˗Yö ˗go mü ˈzü ˈö ˈwëëga ˈbha nu yi ˗dhɛ. ˗Kɔ ˈö Zoova ˗yö ö ˗zokë ˗a ˈka ö ˗dhɔkëmɛn ˗nu ˈˈpiʋ̈, ˗yö ˗a ˈwɔnzuan do ˈka. ˗Yö yi ˗zobö ꞊dhɛ yi dua ˗mü ˈpö kö yi ˈˈgblü kë ˗së.

ˈYa ˈdho ˗wo ˗zlanwokɔdhi ˗nu ˗dhɛ, yi ˗wɔ kwa ꞊dhegblü ˗nu ˗gɔ ˈkɔɔ. ˗Ya ˗kë ˈö ˈyi ˈˈtɔŋdë ˗së ꞊va ꞊slɔɔ. ˗Dhɛkpaɔyi do ˈka, a ˗kun n ˗man ˈˈklɔɔnbho ˈsëëdhɛ ˗bɛnzë ˗ni ˈgü. ˈˈKɛɛ, n ˈti n bo ˈyö ˈa˗ to ˈa yö ˈˈkpɛnŋ. ˈDhɛ ˈa n ꞊yɛɛ˗ ˗kë ˈa nu, ˈkö ˗kwɛ ˗yaaga ˗nën ˈö kun ˈkɔɔ mü ꞊yaa˗ ˈˈdhiʋ̈ pa n ˗dhɛ, ˗ya ö ˗bha ˗bɛnzë ˗a ˗ta. ˗Kwɛ ꞊va ˈˈpiʋ̈, ˈman ˗kpan ˗a ˗bha, ˗a ˈˈyɩɩ ˈnën n ˗kë.

˗Kwɛ 1971 ˈgü, ˗wo n ˗kë ˈˈpian ꞊va ˈˈpiʋ̈ ˗maankëmɛn ˈka Nuyɔɔkö. ˗A ˈwɔn ˗yö yi ˗kun ꞊dedewo. ˈÖ ˗kë ˈˈdhʋ̈ kö n ˗kwɛ ˗yö 34 ˈˈkpaan. ˈˈKɛɛ kwa ꞊dhegblü ˗nu ˈwo kun mü, ˗wo wo ˗kɔ ˗ya wo ˗bha ˈˈpian ꞊va ˈˈpiʋ̈ ˗maankëmɛn ˗blɛɛsü ˈö mɛn tii ˈka ˗a ˗gɔ ˈˈwowosü ˈka.

ˈDhɛ ˈa kun ˈˈpian ꞊va ˈˈpiʋ̈ ˗maankëmɛn ˈka, a ˗kun mɛn ˗nu ꞊klaŋkë ˗ni ˈgü ꞊glooyi ˈˈpɛpɛ ˈka ˈˈpian do ˈˈpiʋ̈ ˗bhɔkwëë ˗nu ˗ta. ˗Yö ˗kun n ˗dhɛ ˗së ꞊dedewo. ˈˈPian do ˈˈpiʋ̈ ˗maankëmɛn ˗nu ˈwo kun mü ˗a mɛn ꞊vadhɛ ˗wa ꞊gwëë ˗Zlan ˗bha yö ˈgü, ˗wa ʒiö ˗a ˈka n ˗ta. ˗A ˗de ˗ʒiaan ˗a mɛn do ˈnën n ˗man ˗bɔyibhaasü ˈˈdhɛɛtadhiaŋ˗ zë. ˗A mɛn do ˈbha ˈwo˗ ˗dhɛ Teodɔɔ Ʒarakö ˗yö ˗dho ꞊taabha ˈö ˗kë kwa ˈˈdhiʋ̈ʒiöwomɛn do ˈka. Kwa ꞊dhegblü ˗nu ˈö ˗wa ꞊gwëë ˗Zlan ˗bha yö ˈgü ˈwo kun Bluklinö Betɛdhö ˗kɔ ˈkpii˗ ˈgü, ˗a mɛn ꞊vadhɛ ˗kun mü. ˈˈKɛɛ ˗wa ˗kë ˈa ˗kë n ˗de ˈgü ˗së. Man ꞊dede a˗ ˗yö ꞊dhɛ  ˗maankëmɛn ˗së ˗nu ˈwo ˈdhaŋ˗ bho ˗Zlan ˗Wo ˈˈdhiʋ̈, ˈwo wo ˗kɔ ˗ya Zoova ˗bha ˗kɔlokota ˗gɔ, wo ˗mü. ˗An ˗bha ˗dekëtɩtɩsü ˗yö n ˗takun n ˗bha yö ˈgü.

˗Kwɛ 1974 ˈgü, kwa ˈˈdhiʋ̈ʒiöwomɛn ˗nu ˗wo ˈˈpian do ˈˈpiʋ̈ ˗maankëmɛn ˈbha ˗nu ˗kë ˈˈpian ꞊va ˈˈpiʋ̈ ˗maankëmɛn ˗nu ˈka. Man ˗zë a ˗kë ˈzü ˈˈpian do ˈˈpiʋ̈ ˗maankëmɛn ˈka Karolinö di sidö. ˈˈTʋ̈ŋ ˈö bhë ˗a ˈka, kö ˈˈkwi ˗nu waa mɛn tii ˗nu ˈwo ˗zlanwokɔdhi ˗nu ˈgü ˗wa ˗ya ˗bhɔkwëë ˗nu kë ˗sü ˗bha wo ˈkwëë˗. ˗Yö ˗kë kwa ꞊dhegblü ˗nu ˗dhɛ ˗së ꞊dedewo.

˗Kwɛ 1976 ˈˈdhiʋ̈todhɛ ˈgü, ˗wo n ˗kë ˗maankëmɛn ˈka Ʒɔɔʒi, ˈö ˈa ˗wo ˗zlanwokɔdhi ˗nu ˈwo Atlanta waa Kolɔnbisö ˗an ˗dhɛ. N ˗zo ˗yö ˗bo ˗kplawo mɛn tii ˈnën ˈˈsoodhu ˈö mɛn ˈbha ˗nu ˈˈwo ˗da ˗an ˗bha ˈkɔ ˈgü ˈwo ˗an zë, ˗dhɛkpaɔyi ˈa ˗an ˗wɛɛ bho ˈˈdhɛɛtadhiaŋ˗ zë ˗a ˈka, ˗a ˈka. ˗An dhe ˗kun ꞊dhɔtrɔɔplöö, ˈyö sü ꞊dhɛ yö ˗de ˈpö ˗wo ˗gʋ̈ ꞊dedewo. Kwa ꞊dhegblü mɛn tii ˗nu waa ˈˈkwi ˗nu ꞊va ˗wo ˗kun ˗wo ˗ni ˈgü ˗an ˗dhɛ ꞊dhɔtrɔɔplöö. A˗ ˗yö ꞊dhɛ kwa ꞊dhegblü ˗nu ˗bha ˗dhɔ ꞊zuan ˈyaa kun ˗dhö. ˗Zlan ˗dhɔkëmɛn ˗nu ˗wa ˗dhɔ suu ˈö ˈˈdhʋ̈ ˗a ˗zɔn wo ˈko ˗dhɛ, ˗yö ˗an ˗takun ˈwo bɔ ˈwɔn ˈˈgbɩɩ˗ suu ˈˈoo ˗su ˈgü.

˗Kwɛ 1977 ˈgü, ˗wo yi ˗dhɛ Betɛdhö ˈö Bluklinö ˗a ˈgü kö ˈyi yö ˈbha kë mü ˈˈsu ˈnën ˈbha ˈˈpiʋ̈. ˈDhɛ yö ˈö ˈˈdhʋ̈ ˈö to ˈˈtɩtɩ, yaa kwa ˈˈdhiʋ̈ʒiöwomɛn ˗nu ꞊plɛ yi ˈɲaannu, ˈyö ˈwo˗ pö n ˗dhɛ wo˗ ˈˈpiʋ̈ kö yaa Rubi ˈyi ˈto Betɛdhö. ˗Yö ˗kë yi ˗dhɛ ˗së, ˈyi ˗wɩ ˗a ˗bha.

˗Kwɛ 24 ˈˈpiʋ̈, a yökë ˗Zlan ˗bha yö ˈwɔnyëë˗ ˗nu ˈˈpiʋ̈. ˗Dhɛ ˈö bhë ˗a ˈgü, kwa ꞊dhegblü ˗nu ˗kun ˈwɔn ˈˈgblʋ̈gblʋ̈ ˗nu ˈˈɲan bhɔ ˗ni ˈgü. ˗Kwɛ ꞊va ˈˈpiʋ̈, kwa ˈˈdhiʋ̈ʒiöwomɛn ˗nu ˗wo ˗bɔ Biblö ˗bha ˈtɔŋ˗ ˗gɛngbandhɛ ˗nu ˗ta ˈwo ˈwɔn ˗nu ˈˈɲan bhɔ ˗kɔ ˗nu ˗zɔn. ˗Yö ˗Zlan ˗bha yö ˈwɔnyëë˗ ˗nu ˗takun ˈwo ˈwɔn ꞊vadhɛ ˈˈɲan bhɔ, ˈö go mü ˈzü ˈwo ˈˈpian do ˈˈpiʋ̈ ˗maankëmɛn ˗nu, mɛn zii ˗nu waa ˗yödhiʋ̈ ˗nu ꞊klaŋkë. ˗A ꞊klaŋ ˗nu ˈwo ˈˈdhʋ̈, ˗wo mɛn ꞊vadhɛ ˗takun ˈwo ˗kë kletiɛn ˗kiansü ˗nu ˈka. -Ya ˗kë ˈö Zoova ˗bha ˗kɔlokota ˗gɛn ˗yö ˗gban.

ˈÖ go ˗kwɛ 1995 ˗bha ˈö yö˗ ˈka ˗kwɛ 2018 ˗bha, a ˗kun kwa ˈˈdhiʋ̈ʒiöwomɛn ˗nu ˗bha bɔmɛn ˈka, ˈa ˗wo Betɛdhö ꞊vadhɛ ˗dhɛ. A Betɛdhö ˗bha ˈwɔnyëë˗ ˗nu, mɛn ˗nu ˈwo Betɛdhö waa bɔmɛn ˗nu ꞊faanmën, ˈa ˗an ˗takun ˗an ˗bha ˈwɔn ˈˈgbɩɩ˗ ˗nu ˈˈɲan bhɔ ˗sü ˗bha. Kwa ꞊dhegblü ˗nu ˗bha ˗bɔagüwɔn ˗nu ˗wo yaa Rubi yi ꞊faanmën ˈˈtʋ̈ŋ ꞊gban ˈka. ˗A ˈwɔnzuan ˈnën ˗tɔ ˗kwɛ 2000 ˈgü, yi ˗dho Wlanda. ˗Kɔ ˈö kwa ꞊dhegblü ˗nu ˈwo kun Betɛdhö waa˗ mɛn ˗nu ˈwo to ˈwo dha ˗a ˈka ˗gblü ˈö kun mü ˗a ˗gɔ ˗kwɛ 1994 ˈgü, ˗wa ˗blɛɛ yi ˗dhɛ ˈö pa yi zuʋ̈ˈˈ ˈka ꞊dedewo. ˗A mɛn ꞊vadhɛ ˗bha mɛn ˗wɔngbɩɩsu ˗nu ˗wɔn ˗yö ˗kë. ˈKö ˗kë ˈˈdhʋ̈, ˗wo wo ˗bha ˗klu ˗Zlan ˗bha ˗sü, wo ˗bha ˗zoyödhe waa wo ˗bha zuʋ̈gblüdhi ˗zɔn ˗kplawo.

꞊Dɛɛ, yi ˗kwɛ ˗ya ʒiö 80 ˈgü. A Betɛdhö ˈö Amedhikö ˗a ˈwɔnyëë˗ do ˈka ˗a ˗kwɛ ˗ya kë 20. N ˈti ˈdho ꞊klaŋ ˈka ꞊gblɛɛn ˈzüdho, ˈˈkɛɛ ˈman ꞊klaŋ ˈö˗ ˗zɔn ˗a ˈka ˈyaa ˈdhö ˗a kë Zoova waa ö ˗bha ˗kɔlokota ˗an ˈˈpiʋ̈. ꞊Klaŋ ˈö ˈˈdhʋ̈ ꞊yaa˗ kë n ˗kɔ ˗ya ˗mɔn mɛn ˈˈwɛɛ ˗nu ꞊klaŋkë ˗sü ˗bha gagade ˗nu ˈwo Biblö ˈgü ˗an ˈka, kö ˗wo ˈwɔn ˗së ˈö˗ ˈˈdhiʋ̈todhɛ ˈyaa ˈdhö ˗a ꞊slɔɔ. (2 Ko. 3:5; 2 Tim. 2:2) ˈMan˗ yö ꞊dhɛ Biblö ˗yö mɛn ˗nu ˗bha ˗tosɛta ˗kë ˗së, ˈö ˗an ˗takun kö ˈˈtɔŋdëdhɛ ˗së ˗yö kë waa wo ˗Damɛn ˗an ꞊zinŋgü. (Zak. 4:8) ˗A ˈˈsɩ ˗ya kë yaa Rubi yi ˗dhɛ, yi mɛn ˈˈwɛɛ ˗nu ꞊faanmën ˈˈtʋ̈ŋ ꞊gban ˈka kö ˗wo Zoova ˗bha kwa ꞊klaŋkësü waa gagade ˗nu ˈwo Biblö ˈgü ˗an ˗zɔn mɛn ˗nu ˗dhɛ ˗sü ˈsü wo ꞊sɔbhɛɛ ˈka. ˈYö sü ꞊dhɛ ˗yö ꞊bhlëëwɔn ˈkpii˗ ˈka Zoova ˗dhɔkëmɛn ˗nu kwa ˗bha ˈka.