Lè lézanné 1940 koumansé, paran an mwen étidyé Labib èvè Témwen a Jéova. Yo arété étid-la, men manman-mwen kontinyé rèsèvwa sé Tou dè Gad la é sé Réveillez-vous ! la. An 1950, yo envité fanmi an mwen adan on lasanblé entèwnasyonal ki té kay fèt Nouyòk, é yo aksèpté envitasyon-la.

Tibwen tan apré, frè Lawrence Jeffries koumansé rann-nou vizit. I éséyé édé-mwen aprann konnèt lavérité. Odépa, an pa té dakò èvè lèfètkè Témwen a Jéova pa ka mélanjé-yo adan lapolitik é kè yo pa ka fè lawmé. An té ka di-y kè si toutmoun o Zétazini té ka rèfizé fè lagè, lènmi an nou té’é pé pran tout péyi-la. Men èvè onlo pasyans, frè Jeffries fè-mwen rézonné. I mandé-mwen : « Dapré-w, ka Jéova té’é fè si toutmoun o Zétazini té ka sèvi-y é kè lènmi té ka vin ataké-yo ? » Sa i di-mwen asi kèsyon-lasa é asi dòt kèsyon ankò édé-mwen vwè kè an té ni tò. Sa ban-mwen anvi dékouvè plis biten asi sé vérité-la ki an Bib-la.

Adan on pyès anba kaz-la, manman-mwen té ranjé plizyè Tou dè Gad é plizyè Réveillez-vous ! ki té ja ni on laj é an pasé onlo tan ka li-yo. Pi tan té ka pasé é pi an té ka rann-mwen kont kè an té touvé lavérité. Kifè, an aksèpté étidyé Labib èvè frè Jeffries. An koumansé vin réinyon chak simenn osi. An té enmé sa an té ka aprann é an vin pwoklamatè. Lè an byen konprann kè « gran jou a Jéova toupré », òbjèktif an mwen chanjé (Sof. 1:14). An pa té vlé ay linivèwsité ankò. An té vlé édé lézòt aprann konnèt sé vérité-la ki an Bib-la.

Lè 13 jen 1956, an fin lékòl an mwen, é 3 jou apré, an pran batèm adan on lasanblé siwkonskripsyon. An pa té ka imajiné an té’é rèsèvwa  tousa bénédisyon davwa an chwazi itilizé vi an mwen pou aprann konnèt lavérité asi Jéova é pou anségné-y.

Sis mwa apré batèm an mwen, an vin pyonyé pèwmanan. Té ni on awtik ki té ni pou tèm : « Pouvez-vous aller là où on a besoin de renfort ? » adan Le ministère du Royaume a désanm 1956. Sa tonbé an jaden an mwen. An té vlé préché on koté yo té bizwen plis pwoklamatè (Mat. 24:14).

An ay rété Edgefield, an Caroline du Sud. Té ni enki 4 pwoklamatè adan lasanblé-la. Kifè lè an rivé nou té a 5. Nou té ka fè sé réinyon-la aka on frè, adan salon a-y. Chak mwa, an té ka pasé 100 è-d-tan ka préché. Sé mwen ki té ka òwganizé prédikasyon-la é an té ka bay onlo diskou adan lasanblé-la. Anfèt, pli an té ka ba kò an mwen bann é pli an té ka aprann asi Jéova.

On madanm ki té ka étidyé Labib èvè mwen té ni on antrèpriz a ponp finèb a Johnston, a déotwa kilomèt dè Edgefield. Èvè onlo jantiyès, i pwopozé-mwen travay déotwa jou an simenn-la. Sa té ka tonbé kòtòk. É i pèwmèt-nou sèvi èvè on ti batiman i té ni pou nou té fè réinyon an nou.

Frè Jolly Jeffries, gason a frè-la ki té ka étidyé Labib èvè mwen la, lésé Brooklyn, a Nouyòk é i vin la an té yé la. Nou mèt-nou ka préché toutlè ansanm. Nou té ka viv adan on ti karavàn kè on frè té ka prété-nou.

O Sid a Lézétazini, sé moun-la pa té ka touché onlo lajan. Nou té ka gangné 2 ou 3 dola pou on jouné travay. On jou, an té sòti dépansé sé dènyé ti pyès-la an té ni la pou achté manjé adan on ti lolo. É a menm moman-la, on misyé vin owa mwen é i mandé-mwen : « Ou vlé travay ? An ké péyé-w 1 dola pou inè-d-tan. » I mandé-mwen nétwayé on chantyé a konstriksyon ; sa té’é pran 3 jou. Sa té ka montré on mannyè ki klè kè Jéova té vlé an rété Edgefield. Magré an pa té ka touché granzafè, an rivé ay adan lasanblé entèwnasyonal la ki fèt a Nouyòk an 1958.

Dézyèm jou a lasanblé-la, ni on biten èspésyal ki fèt. Jou-lasa, an kontré Ruby Wadlington, ki té pyonyé pèwmanan a Gallatin, o Tennessee. Konm nou toulédé té anvi vin misyonè, nou ay adan réinyon-la ki té ka bay enfòwmasyon asi Lékòl a Galaad. Plita, nou koumansé ékri-nou. Aprésa yo envité-mwen Gallatin pou an té pé sa bay on diskou. An pwofité pou mandé Ruby si i té vlé mayé èvè mwen. An chanjé lasanblé pou ay adan ta-y, é nou mayé an 1959.

Lè an té ni 23 an, yo nonmé-mwen sèwvitè a lasanblé-la (jòdijou yo ka kriyé frè-lasa koòwdinatè a komité a sé ansyen-la) adan lasanblé a Gallatin. Lasanblé an nou, sé té prèmyé lasanblé  kè Charles Thompson vizité antankè rèsponsab a siwkonskripsyon. I té ni onlo èkspéryans, men magrésa i té vlé ni avi an mwen. I mandé-mwen ka sé frè é sè la té bizwen, é ka sélézòt rèsponsab a siwkonskripsyon la té ka fè pou édé-yo. Grasa-y, an aprann kè sa byen dè pozé kèsyon é dè sanblé tout sé enfòwmasyon-la avan ou pran on désizyon.

An mé 1964, yo envité-mwen a fè Lékòl pou ministè a Wayòm-la, ki té’é diré on mwa é ki té’é fèt a South Lansing, a Nouyòk. Grasa sé fòwmatè-la, an té toujou anvi aprann konnèt Jéova pibyen é vin pibon zanmi èvè-y.

An janvyé 1965, yo nonmé-mwen rèsponsab a siwkonskripsyon é yo voyé-nou, mwen é Ruby, vizité sé lasanblé-la. Téritwa a siwkonskripsyon an nou té gran toubònman. I té ka pati dépi Knoxville, o Tennessee, pou rivé jis owa Richmond, an Virginie. Adan-y té ni osi plizyè lasanblé a Caroline du Nord, a Kentucky é a Virginie-Occidentale. An té ka vizité enki sé lasanblé-la ki té ni frè é sè a po nwè adan yo, pas o Sid a Lézétazini, lwa-la té ka séparé sé moun-la sèlon koulè a po a yo. A lépòk, Blan é Nwè pa té pé sanblé ansanm. Sé frè é sè la pa té ni onlo lajan, é nou aprann pawtajé sa nou té ni èvè sa ki té bizwen. On frè ki té rèsponsab a siwkonskripsyon dépi lontan aprann-mwen on lèson enpòwtan. I di-mwen : « Fò ou sé on frè pou frè é sè a-w. Pa aji èvè yo konsi ou sé on patron. Ou ké pé édé-yo enki si yo ka vwè-w kon frè a yo. »

Pannan nou té ka vizité on ti lasanblé, Ruby koumansé étidyé Labib èvè on jenn madanm ki té ni on tifi ki té ni 1 an. Konm ponmoun adan lasanblé-la pa té pé fè étid-la, Ruby fè-y pa lèt. Lè nou wouvin vizité lasanblé-lasa, jenn madanm-la vin adan tout sé réinyon-la. Aprésa dé sè ki té pyonyé èspésyal rivé adan lasanblé-la. Jenn madanm-la kontinyé étidyé Labib èvè yo, é i pa tadé pou pran batèm. 30 lanné apré apépré, on jenn sè vin palé èvè Ruby adan Bétèl a Patterson. Nou té an 1995. Sé té fi a madanm-la ki té étidyé èvè Ruby la. Li é mari a-y té adan 100^èm klas a lékòl a Galaad.

Dézyèm siwkonskripsyon-la nou vizité la té ka touvé-y anmitan a la Floride. Nou té bizwen on vwati. Nou touvé yonn é pri a-y té entérésan toubònman. Malérèzman, apré déotwa jou, ponp a dlo la pran pann. Nou pa té ni lajan pou réparé-y. An sonjé on frè ki té’é pé édé-nou é an kriyé-y. I mandé yonn adan sé moun-la ki té ka travay ba-y la réparé vwati-la é i rèfizé pran lajan an nou. Sèl biten i di-nou sé : « Zò pa’a doué-mwen ayen. » Mi on bèl ègzanp ki ka montré kijan Jéova ka pran swen a sèwvitè a-y mi ! Sa fè-nou sonjé kè fò nou donan.

Chaklè nou té ka vizité on lasanblé, nou té ka rété aka frè é sè. Sé konsa nou touvé onlo bon zanmi. On jou, an lésé rapò-la an té ka fè la asi lasanblé-la adan machin a ékri la. An po’o té fin tapé-y. Men lèswa-la, an rann-mwen kont kè gason a fanmi-la ki té ka akéyi-nou la é ki té ni 3 an ay asi machin-la é mété-y ka tapé osi. Kifè an té oblijé woufè rapò-la. An fè jé èvè-y asi sa pannan plizyè lanné.

An 1971, an rèsèvwa on lèt ki té ka voyé-mwen sèvi adan distrik a Nouyòk. Nou pa té ka atann-nou a sa ditou ! An té ni enki 34 an. Men sé frè-la akéyi-mwen èvè onlo chalè, alòskè sé té prèmyé fwa yo té ka akéyi on siwvéyan a distrik ki té nwè.

Lè an té siwvéyan a distrik, an té ka anségné lavérité asi Jéova chak wikenn pannan sé lasanblé a siwkonskripsyon la, é sa té ka pwokiré-mwen onlo jwa. Onlo rèsponsab a siwkonskripsyon té ni plis èkspéryans ki mwen. Yonn adan yo té fè diskou a batèm an mwen. É kèlkètan apré, yo nonmé ondòt frè pawmi yo adan Komité santral la. Sé té frè Theodore Jaracz. Té ni onlo frè osi ki té ni onlo èkspéryans é ki té ka travay adan Bétèl a Brooklyn. Men sé rèsponsab a siwkonskripsyon la é sé bétélit-la té ka mèt-mwen alèz. An vwè an 2 zyé an mwen kè yo té dé bèwjé ki té ni onlo lanmou, kè yo té ka apiyé-yo asi Pawòl a Bondyé é kè yo té ka soutyenn òwganizasyon a-y fidèlman. Imilité a yo édé-mwen adan sèwvis an mwen.

An 1974, Komité santral la nonmé ondòt gwoup a rèsponsab a siwkonskripsyon pou yo sèvi antankè siwvéyan a distrik. An wouviré adan sèwvis a siwkonskripsyon la é fwa-lasa an ay an Caroline du Sud. A moman-lasa, Blan é Nwè té pé touvé-yo adan menm lasanblé-la é adan menm siwkonskripsyon-la, kifè sé frè é sè la té kontan toubònman.

An fen a lanné 1976, yo nonmé-mwen rèsponsab a siwkonskripsyon an Géorgie. Nouvo siwkonskripsyon an nou té ka touvé-y ant Atlanta é Colombus. On jou, an bay on diskou pou lantèwman a 5 timoun nwè ki té mò pas plizyè kriminèl té mèt difé adan kaz a yo. An ka sonjé jou-lasa byen menm ! Manman-la té blésé é yo té menné-y lopital. Sé frè é sè la, ki blan ki nwè, té ka monté é désann lopital pou rékonfòwté sé paran-la. Lanmou-la yo montré la té èstraòwdinè ! On konpasyon konsa pé édé sèwvitè a Bondyé andiré sé sitiyasyon-la ki pli rèd la.

An 1977, yo envité-nou adan Bétèl a Brooklyn pou nou té travay déotwa mwa asi on pwojé. Lè pwojé-la té kay bout, 2 frè a Komité santral la fè on ti kozé èvè mwen. Yo mandé-mwen si mwen é Ruby nou té’é dakò pou rété an Bétèl-la. É nou aksèpté envitasyon-la.

Pannan 24 an, an travay adan dépawtèman pou sèwvis-la, la sé frè-la ka okipé byensouvan dè kèsyon ki délika é ki konpliké. Pli sé lanné-la té ka pasé é pli Komité santral la té ka ba sé frè-la enstriksyon ki bazé asi prensip a Labib. Yo ka sèvi èvè sé enstriksyon-lasa pou réponn a kèsyon moun ka pozé-yo é pou fòwmé sé rèsponsab a siwkonskripsyon-la, sé ansyen-la é sé pyonyé-la. Sé enstriksyon-lasa é sé fòwmasyon-lasa édé onlo adan yo pwogrésé pou yo vin pli solid adan lavérité, é sa fòwtifyé òwganizasyon a Jéova.

Ant 1995 é 2018, an vizité plizyè Bétèl antankè rèprézantan a biwo mondyal la (avan, yo té ka kriyé frè-lasa siwvéyan a zòn). An té ka pasé on ti moman èvè Komité a filyal-la, sé bétélit-la é sé misyonè-la pou ankourajé-yo é pou ba-yo konsèy siwvwè yo té ka jwenn difikilté. Men lè nou té ka tann sé èkspéryans-la yo té ka pawtajé èvè nou la, sa té ka ankourajé mwen é Ruby toubònman. Pa ègzanp, an 2000, nou ay o Wannda. Sa touché-nou toubònman lè nou vin sav kijan sé frè é sè la èvè fanmi a Bétèl-la chapé anba masak-la ki fèt la an 1994. Onlo adan yo té pèd moun yo té enmé. Men sé éprèv-la yo té sibi la pa té fébli fwa a yo, èspérans a yo é jwa a yo.

Konnyéla nou ni plis ki 80 lanné. Sa ka fè plis ki 20 an kè an ka fè pati a Komité a filyal a Lézétazini. An pa jen ay linivèwsité, men an rèsèvwa méyè enstriksyon-la ki ni la owa Jéova é owa òwganizasyon a-y. Sa pèwmèt-mwen édé lézòt aprann konnèt sé vérité-la ki an Bib-la ki pé pwokiré-yo byenfé pou touttan (2 Kor. 3:5 ; 2 Tim. 2:2). An vwè an 2 zyé an mwen kè mésaj a Labib ka rann vi a moun pi bèl é ka édé-yo vin bon zanmi èvè Kréyatè a yo (Jak 4:8). Dépi sa posib, mwen é Ruby nou ka ankourajé lézòt aprésyé lèfètkè nou pé aprann dé biten asi Jéova é kè nou pé anségné dòt moun sa. Sé on bèl privilèj toubònman é sé pi bèl lonnè kè on moun pé ni !