Iti nasapa a paset ti 1940’s, nagpayadal iti Biblia dagiti nagannakko kadagiti Saksi ni Jehova. Naisardeng ti panagadalda, ngem umaw-awat latta ni Nanang kadagiti magasin a Ti Pagwanawanan ken Agriingkayo! Idi 1950, adda naangay nga internasional a kombension idiay New York City ket naawis ti pamiliami nga umatender.

Kalpasan dayta, sinarungkarannakami ni Brother Lawrence Jeffries. Tinulongannak a mangammo iti kinapudno. Idi damo, diak nagustuan ti imbagana a dagiti Saksi ni Jehova ket saan a makiramraman iti politika ken panagsoldado. Inrasonko a no saan nga agsoldado ti amin nga umili ti America ket umay dagiti kalaban, masakupda no kuan ti intero a pagilian. Siaanus nga insungbat ni Brother Jeffries: “Panagkunam, ania ngata ti aramiden ni Jehova a Dios no agserserbi kenkuana ti amin nga umili ti America sa umay umatake dagiti kalaban?” Nakatulong dagiti imbagana tapno maawatak nga awan ti nakaibasaran dagiti argumentok. Isu a lallalo a naginteresak a mangammo iti kinapudno.

Adu nga oras a binasbasak dagiti daan a ruar Ti Pagwanawanan ken Agriingkayo! nga inkabil ni Nanang iti basement ti balaymi. Di nagbayag, naawatak a daytoy ti kinapudno, isu nga inakseptarko ti awis ni Brother Jeffries nga iyadalannak iti Biblia. Regular metten nga immatenderak kadagiti gimong. Magusgustuak dagiti maad-adalko, isu a nagbalinak nga agibumbunannag iti naimbag a damag. Nagbalbaliw dagiti kalatko idi naawatak nga “asidegen ti dakkel nga aldaw ni Jehova!” (Sof. 1:14) Imbes nga ageskuelaak iti unibersidad, kayatkon a tulongan dagiti tattao a mangammo kadagiti kinapudno nga isursuro ti Biblia.

 Naggraduarak iti hayskul idi Hunio 13, 1956, ket kalpasan ti tallo nga aldaw, nabautisaranak iti asamblea sirkito. Diak pulos impagarup a nagadu a bendision ti masagrapko iti panangusarko iti biagko nga agsursuro ken mangisuro maipapan ken Jehova.

Innem a bulan kalpasan a nabautisaranak, nag-regular pioneer-ak. Mabasa iti December 1956 a Kingdom Ministry ti artikulo a “Can You Serve Where the Need Is Great?” Karamanak met iti dayta nga awis. Kayatko ti tumulong iti lugar a manmano dagiti manangaskasaba iti naimbag a damag.​—Mat. 24:14.

Immakarak idiay Edgefield, South Carolina. Uppat laeng ti agibumbunannag iti dayta a kongregasion ket siak ti maikalima. Aggigimongkami iti makinsango a kuarto ti balay ti maysa a kabsat. Kada bulan, 100 nga oras ti us-usarek iti ministerio. Nakaad-adu ti ar-aramidek a mangidaulo iti panangasaba ken kadagiti gimong. Bayat nga ar-aramidek dagita, immadu ti nasursurok maipapan ken Jehova.

Inyadalak iti Biblia ti maysa a babai a makinkukua iti maysa a puneraria iti ili ti Johnston, a sumagmamano a kilometro ti kaadayona. Nakaim-imbag ta inikkannak iti kasapulak unay a part-time a trabaho ken adda bassit a pasdekna nga impausarna kadakami kas Kingdom Hall.

Nagbalin a partnerko iti panagpayunir ni Brother Jolly Jeffries, nga anak ti kabsat a nangyadal kaniak. Naggapu ni Jolly idiay Brooklyn, New York. Nagyankami iti bassit a trailer nga impabulod ti maysa a kabsat.

Nababa ti sueldo iti South. Dua wenno tallo laeng a doliar ti tangdanmi iti agmalem. Naminsan, napanak gimmatang iti makan iti maysa a tiendaan. Inggatangko ti nabatbatin a kuartak. Idi rimmuarak, adda lalaki nga immasideg ket dinamagna: “Kayatmo ti trabaho? Tangdananka iti maysa a doliar kada oras.” Pinagtrabahonak iti tallo nga aldaw nga agdalus iti maysa a construction site. Nalawag a tultulongannak ni Jehova nga agtalinaed iti Edgefield. Nakaatenderak pay ketdi iti internasional a kombension idiay New York City idi 1958.

Iti maikadua nga aldaw ti kombension, adda espesial a napasamak. Naam-ammok ni Ruby Wadlington a regular pioneer idiay Gallatin, Tennessee. Agpada a kayatmi ti agmisionero, isu a nakimitingkami para iti Gilead iti dayta a kombension. Idi agangay, nagsinsinnuratkamin. Kalpasanna, naawisak nga agpalawag idiay Gallatin. Innalak dayta a gundaway tapno kiddawek ken Ruby a makikallaysa kaniak. Immakarak iti kongregasion da Ruby, ket nagkasarkami idi 1959.

Idi 23 ti tawenkon, naapointaranak kas adipen ti kongregasion (maawagan itan iti koordineytor ti bagi dagiti panglakayen) iti Gallatin. Dakami ti damo a kongregasion a binisita ti manangaywan iti sirkito a ni Charles Thompson. Eksperiensiado  isuna; ngem dinamagna latta ti opinionko maipapan kadagiti kasapulan dagiti kakabsat ken no kasano nga inasikaso dagita dagiti napalabas a manangaywan iti sirkito. Nasursurok kenkuana a nasayaat ti agsaludsod ken ammuen nga umuna ti amin nga impormasion sakbay nga agdesision.

Idi Mayo 1964, naawisak nga ageskuela iti Kingdom Ministry School iti makabulan a naangay idiay South Lansing, New York. Dagiti brother a nangisuro iti daytoy nga eskuelaan pinaregtadak nga ad-adda pay nga agsursuro ken rumang-ay iti naespirituan.

Idi Enero 1965, naawiskami ken Ruby nga agserbi iti trabaho iti sirkito. Naglawa ti teritoria ti sirkito, manipud Knoxville, Tennessee, a gistay dumanon iti Richmond, Virginia. Karaman kadagita dagiti kongregasion iti North Carolina, Kentucky, ken West Virginia. Dagiti laeng kongregasion dagiti nangisit a kakabsat ti binisitak. Kadagidi ngamin a tiempo, adda dagiti linteg iti abagatan a United States a mangiparit nga agkakadua dagiti nangisit ken puraw. Marigrigat dagiti kakabsat, isu a nasursuromi nga iranud ti aniaman nga adda kadakami. Adda napateg nga insuro kaniak ti maysa a nabayagen a manangaywan iti sirkito: “No bisitaem ti maysa a kongregasion, dika agtignay a kasla sika ti boss. Ipariknam a kabsatdaka. Matulongam laeng ida no mariknada a kabsatdaka.”

Bayat a bisbisitaenmi ti maysa a bassit a kongregasion, inrugi ni Ruby nga iyadalan ti maysa nga agtutubo nga ina nga adda anakna a babai a maysa ti tawenna. Idi awan ti makaiwaya iti kongregasion a mangyadal kenkuana iti Biblia, ni Ruby ti nangyadal babaen ti surat. Iti simmaruno nga ibibisitami, makigimgimongen ti babai. Idi adda dua nga special pioneer a naidestino sadiay, isudan ti nangituloy a nangyadal. Idi agangay, nabautisaran. Idi 1995, kalpasan ti agarup 30 a tawen, adda sister a nakiam-ammo ken Ruby idiay Patterson Bethel. Anak gayam dayta ti babai nga inyadalan idi ni Ruby. Dayta a sister ken ni lakayna ket estudiante iti maika-100 a klase ti Eskuelaan ti Gilead.

Ti central Florida ti maikadua a sirkitomi. Iti dayta a tiempo, kasapulanmi ti lugan. Isu a gimmatangkami ket naglaka ti presiona. Ngem iti umuna a lawas pay laeng, addan naperdi a paset ti makinana. Awanen ti kuartami a pagpatarimaan. Isu a nagpatulongak iti maysa a brother. Impatarimaanna dayta iti maysa kadagiti trabahadorna ken dina kayat ti agpabayad. Imbagana: “Bay-amon.” Inikkannakami pay ketdi iti kuarta! Nagsayaat dayta nga ebidensia no kasano nga ay-aywanan ni Jehova dagiti adipenna. Dayta met ti nangipalagip nga agbalinkami a naparabur.

Kada bumisitakami iti maysa a kongregasion, agdaguskami iti balay dagiti kakabsat. Isu a nagadu ti nagbalin a nasinged a gagayyemmi. Naminsan, nabatik iti makiniliak ti ar-aramidek a report maipapan iti kongregasion. Karabiyanna, “nalpasen” ti report. Ti makiniliak ket inay-ayam gayam ti tallo ti tawenna nga anak ti pamilia a nagdagusanmi. Iti panaglabas dagiti tawen, angawek no kua ti anakda maipapan iti dayta.

Idi 1971, nakaawatak iti surat a mangipakpakaammo a naapointaranak nga agserbi kas manangaywan iti distrito iti New York City. Nasorpresakami! Agtawenak la idi iti 34. Apagsangpetmi sadiay, sibabara a pinasangbaydak dagiti kakabsat kas ti kaunaan a nangisit a manangaywan iti distritoda.

Kas manangaywan iti distrito, magusgustuak ti mangisuro maipapan ken Jehova iti kada ngudo ti lawas bayat ti asamblea sirkito. Adu a manangaywan iti sirkito ti mas eksperiensiado ngem siak. Maysa kadakuada ti nagpalawag pay ketdi idi nabautisaranak. Ti sabali pay kadakuada ket ni Theodore Jaracz a nagbalin a miembro ti Bagi a Manarawidwid idi agangay. Adu met dagiti eksperiensiado a kakabsat nga agserserbi iti Brooklyn Bethel. Agyamanak unay ta tinulongandak dagiti manangaywan iti sirkito ken dagiti Bethelite a mangipasig iti riknak kadakuada. Nakitak a mismo a nadungngoda a papastor nga agpampannuray iti Sao ti Dios ken simamatalek a supsuportaranda ti organisasion. Napakumbabada isu a saanak a narigatan nga agserbi kas manangaywan iti distrito.

Idi 1974, nangapointar ti Bagi a Manarawidwid iti sabali a grupo dagiti manangaywan iti sirkito nga agserbi iti trabaho iti distrito, isu a nagserbiak manen kas manangaywan iti sirkito idiay South Carolina. Iti dayta a tiempo, makapagkakaduan dagiti kongregasion ken sirkito dagiti nangisit ken puraw iti abagatan a United States, isu a permi ti ragsak dagiti kakabsat.

Iti maudi a paset ti 1976, naidestinoak iti maysa a sirkito iti Georgia iti nagbaetan ti Atlanta ken Columbus. Diak pulos malipatan ti panagpalawagko para iti pumpon ti lima a nangisit nga ubbing a natay gapu ta adda tattao a nangpuor iti balayda. Nadangran ni nanangda isu a nayospital. Kanayon nga agsangpet iti ospital dagiti nangisit ken puraw a Saksi ni Jehova tapno liwliwaenda dagiti nagannak. Nakitak ti nagpaiduma nga ayat dagiti kakabsat. Ti kasta a pannakipagrikna ti tumultulong kadagiti adipen ti Dios nga agibtur kadagiti karirigatan a situasion.

Idi 1977, naawiskami iti Brooklyn Bethel iti sumagmamano a bulan tapno tumulong iti maysa a proyekto. Idi malmalpasen ti proyekto, dua a miembro ti Bagi a Manarawidwid ti nakisarita kaniak ket dinamagda no kayatmi ken Ruby ti permanente nga agserbi iti Bethel. Pinatganmi dayta nga awis.

Iti 24 a tawen, nagserbiak iti Service Department. Masansan a tumulongkami a mangsungbat kadagiti sensitibo ken komplikado a saludsod. Iti panaglabas dagiti tawen, nangipaay ti Bagi a Manarawidwid kadagiti instruksion maitunos kadagiti prinsipio ti Biblia. Dayta ti nausar a pakaibatayan ti panangsungbat kadagiti saludsod ken nausar met iti panangsanay kadagiti manangaywan iti sirkito, panglakayen, ken payunir. Dayta a panangsanay ti nakatulong iti adu tapno rumang-ayda iti naespirituan. Kas resultana, lallalo a timmibker ti organisasion ni Jehova.

Manipud idi 1995 agingga iti 2018, bimmisitaak iti nadumaduma a sanga nga opisina kas pannakabagi ti hedkuarter, a dati a maawagan kas zone overseer. Makisaritaak kadagiti Branch Committee, Bethelite, ken misionero tapno patibkeren ida ken tulongan ida iti aniaman a problemada. Kanayon a naparparegtakami ken Ruby kadagiti kapadasan dagiti kakabsat. Kas pagarigan, bimmisitakami idiay Rwanda idi 2000. Natukay ti pusomi idi naammuanmi no kasano a naibturan ken nalasatan dagiti kakabsat ken Bethelite ti panangikisap iti puli (genocide) idi 1994. Adu ti natayan kadagiti ipatpategda iti biag. Nupay nakaro dagiti inibturanda, saan a napukaw ti pammati, namnama, ken rag-o dagiti kakabsat.

Nasurok nga 80 itan ti tawenmi ken Ruby. Iti 20 a tawen, nagserbiak kas miembro ti Branch Committee iti United States. Saanak a nakapageskuela iti unibersidad; ngem naawatko ti kangatuan nga edukasion manipud ken Jehova ken iti organisasionna. Dayta ti nakatulong tapno maisurok iti dadduma dagiti kinapudno iti Biblia a makagunggona kadakuada iti agnanayon. (2 Cor. 3:5; 2 Tim. 2:2) Nakitak no kasano a ti mensahe ti Biblia ti nakatulong kadagiti tattao a mangpasayaat iti biagda ken maaddaan iti nasinged a relasion iti Namarsua kadakuada. (Sant. 4:8) Agingga a kabaelanmi, itultuloymi ken Ruby a paregtaen ti dadduma a mangipateg iti pribilehioda nga agsursuro maipapan ken Jehova ken isuro dagiti kinapudno iti Biblia. Dayta ti kadakkelan a pribilehio a matagiragsak ti maysa nga adipen ni Jehova!