Ԝәкә сала 1940, де-баве мьн тʹәви Шәʹдед Йаһоԝа һинбуна Кʹьтеба Пироз дәстпекьрьн. Рʹаст ә, ԝана һинбуна Кʹьтеба Пироз данә сәкьнандьне, ле дийа мьн диса жи журналед «Бьрща Ԛәрәԝьлийе» у «Һʹьшйар Бьн!» дьстандьн. Сала 1950-да, гава щьвата мәзьнә һʹәмдьнйайе бажаре Нийу Йоркеда дәрбаз бу, әм чунә ԝедәре.

Паши ве щьвата мәзьн, бьре Лаԝренс Щефриз дәстпекьр сәрледана мә бькә. Әԝи али мьн дькьр кӧ әз рʹастийе һин бьм. Серида, әз тʹәви ньһерʹандьнед Шәʹдед Йаһоԝа ԛайил нәдьбум, кӧ әԝана хԝә жь политике дур дьгьрьн у начьнә шәрʹ. Мьн ԝирʹа гот кӧ һәрге Америкайеда тʹӧ кәс ԝәлате хԝә нәпарезә, дьжмьн ԝе һеса һʹьщуми сәр мә бькьн у ԝәлате мә зәфт бькьн. Бьре Щефриз бь сәбьр ӧса щаб да: «Һәла бьфькьрә, һәрге Америкайеда һәр кәс Йаһоԝа бьһʹәбанда, гәло Йаһоԝа ԝе изьн бьда кӧ дьжмьн һʹьщуми сәр мә бькьн?» Щабед ԝи сәр ве тʹеме у тʹемед дьн, нишани мьн кьрьн, кӧ ньһерʹандьна мьн шаш бу. Ве йәке дина мьн кʹьшандә сәр рʹастийе.

Мьн бь сьһʹәта готаред кәвьн жь «Бьрща Ԛәрәԝьлийе» у «Һʹьшйар Бьн!», дьхԝәндьн, йед кӧ дийа мьн сәр ԛате жере вәшартьбун. Ԝәʹдә шунда, мьн фәʹм кьр кӧ рʹасти әв ә, ләма мьн тʹәглифа бьре Щефриз, кӧ һинбуна Кʹьтеба Пироз дәстпекьм, ԛәбул кьр. Ӧса жи, әз һәр һʹәфте дьчумә щьвина. Рʹастийа Кʹьтеба Пироз кʹәтә дьле мьн у әз бумә мьзгинван. Гава мьн фәʹм кьр кӧ «рʹожа мәзьн йа Хӧдан незик ә», нетед жийина мьн һатьнә гӧһастьне (Сефанйа 1:14). Дәԝса кӧ һәрʹьм занингәһе, мьн сафи кьр рʹастийа Кʹьтеба Пироз мәрьва һин кьм.

Сала 1956, 13 Һʹәзиране, мьн мәкʹтәб хьлаз кьр. Се рʹож шунда, әз сәр щьватәкә мәзьн  һатьмә ньхӧмандьне. Мьн хԝә ль рʹийа һинбун у һинкьрьна дәрһәԛа Йаһоԝа гьрт, ле мьн нә жи дькарьбу бьда бәр чʹәʹве хԝә, кӧ чьԛас кʹәрәм һивийа мьн бун.

Шәш мәһ шунда паши ньхӧмандьне, әз бумә пешәнге һәртʹьм. Бәрнама «Ԛӧльхкьрьна Мәйә Пʹадшатийе» йа мәһа Кануна Пешьн, сала 1956-да, һәбу готарәкә бь наве «Гәло Тӧ Дькари Дәрбаз би Дәштәкә кӧ Һʹәԝще Аликʹарийе йә?» Мьн хԝәрʹа гот: «Әз жи дькарьм ве йәке бькьм». Мьн дьхԝәст дәрбази щики ӧса бума, кʹидәре кӧ мьзгинван һьндьк бун (Мәтта 24:14).

Әз дәрбази бажаре Ещфилде бум (Каролинайа Башуре). Ԝедәре тʹәне 4 мьзгинван һәбун у әз жи йе 5 бум. Мә щьвинед хԝә, мала бьраки мәда отʹахәкеда дәрбаз дькьрьн. Һәр мәһ, мьн хьзмәтийеда 100 сьһʹәт дәрбаз дькьр. Мьн гәләк ԝәʹде хԝә хәрщ дькьр, ԝәки хьзмәтийе организә кьм у пе готара дәрем. Ле әз чьԛас зәʹф шьхӧлед Йаһоԝава мьжул дьбум, һаԛас һе зедә әз дәрһәԛа ԝи педьһʹәсийам.

Щонстонеда, бажарәкида кӧ незики мә бу, мьн тʹәви жьнькәке һинбуна Кʹьтеба Пироз дәрбаз дькьр. Ве жьньке хәбатәкә ниврʹожи да мьн, ль ода бона шине, у әԝе изьн да ԝәки әм щьвинед хԝә авайикә ԝейә бьчʹукда дәрбаз кьн.

Щоли Щефриз, кӧрʹе ԝи бьрайи, йе кӧ тʹәви мьн һинбуна Кʹьтеба Пироз дәрбаз кьрьбу, жь Бруклине (Нийу Йорке) һат, ԝәки тʹәви мьн ча пешәнг хьзмәт кә. Әм тʹәвайи траилера бьракида дьман.

Һәрема мәда, һәԛе хәбате бьчʹук бу. Мә рʹожәкеда тʹәне 2-3 долар ԛазанщ дькьрьн. Щарәке, гава мьн пе пʹәред хԝәйә пашьн хԝарьн хԝәрʹа кʹьрʹи, мерькәк незики мьн бу у мьн пьрси: «Хәбат тәрʹа лазьм ә? Әзе сьһʹәтәкеда доларәк бьдьмә тә». Әԝи щийе авакьрьнеда хәбат да мьн, ԝәки әз се рʹожа ԝедәре паԛьж кьм. Әз баԝәр бум кӧ Йаһоԝа али мьн дькьр, ԝәки әз бькарьбьм Ещфилдеда бьминьм. Ле сала 1958-да, әз бона щьвата һʹәмдьнйайе чумә бажаре Нийу Йорке.

Рʹожа дӧда йа щьвата мәзьн, тьштәк хԝәш ԛәԝьми. Мьн хушкәкә бь наве Руби Ԝадлингтон нас кьр. Әԝ ль бажаре Галлатинда (Тенеси) ча пешәнга һәртʹьм хьзмәт дькьр. Жь бәр кӧ мә дьхԝәст ча мисйонер хьзмәт бькьн, әм һәрдӧ жи чун щьвина бона мәкʹтәба Гиләде, йа кӧ ԝәʹде ве щьвата мәзьн дәрбаз дьбу. Паши ве йәке, мә һәвдӧрʹа нәʹмә дьньвиси. Рʹожәке, щьвата Галлатин бона готаре гази мьн кьрьн. Ижар мәщал кʹәтә дәсте мьн, кӧ әз Рубийе пьрс кьм һәла әԝ дьхԝазә бьбә жьна мьн. Әз дәрбази щьвата Рубийе бум, у сала 1959-да, әм зәԝьщин.

Чахе әз 23 сали бум, әз щьвата Галлатинеда бумә хьзмәткʹаре щьвате (иро те навкьрьне координаторе кʹома рʹуспийа). Гава бьре Чарлс Томпсон сәрледана щьвата мә  кьр, әԝи тʹәзә дәстпекьрьбу ча бәрпьрсийаре мьһале хьзмәт кә. Әԝ бьраки щерʹьбанди бу, ле диса жи, әԝи жь мьн пьрси һәла һʹәԝщед хушк у бьра чь нә, у бәрпьрсийаред дьн щабдарийед хԝә чаԝа тиньн сери. Әз жь ԝи һин бум, ԝәки пешийа кӧ әз сафикьрьнәке бькьм, гәрәке әз пьрса бьдьм у епʹещә избатийа дәрһәԛа ве йәке пебьһʹәсьм.

Сала 1964-да, мәһа Гӧлане, мьн тʹәглифи Мәкʹтәба Хьзмәтийе йа йәкмәһи кьрьн, йа кӧ бажаре Лансинга Башуреда (Нийу Йорк) дәрбаз дьбу. Бьред кӧ мә һин дькьрьн, хԝәстьна дьле мьн ԛәԝи кьрьн кӧ әз һе зедә дәрһәԛа Йаһоԝа һин бьм у һе незики ԝи бьм.

Сала 1965-да, мәһа Чьләйе, әз у Руби, әм һатьн кʹьфшкьрьне кӧ шьхӧле бәрпьрсийартийе бькьн. Дәшта мә йа пешьн гәләк мәзьн бу: Жь Ноксвиле (Тенеси) һʹәта незики Ричмонде (Виржинйа). Дәшта мәда, щьватед жь Каролинайа Бакӧр, Кентуки у Виржинйа Рʹоавайе һәбун. Ԝе дәме, әз дьчумә тʹәне щьватед хушк-бьред чʹәрмәрʹәш, чьмки жь бо сегрегасийайа башура Дәԝләтед Йәкбуйида, ԛәдәхә бу кӧ кәсед чʹәрмәспи у чʹәрмәрʹәш тʹәвайи тʹоп бьн. Хушк-бьред ԝедәре кʹәсиб бун, у әм һин бун һьндава ԝанда дәствәкьри бьн. Бьраки кӧ гәләк сала бәрпьрсийаре мьһале бу, дәрсәкә гәләк фәрз да мьн: «Хушк-бьрарʹа бьбә бьра. Гава кӧ тӧ дькʹәви щьватәке, хԝә мина аха нәдә кʹьфше. Һәрге әԝана бьвиньн кӧ тӧ ԝанрʹа ча бьра йи, һьнге тӧйе бькарьби али ԝан бьки».

Гава мә тʹәсәлийа щьватәкә бьчʹук дькьр, Рубийе тʹәви жьнькәкә щаһьл һинбуна Кʹьтеба Пироз дәстпекьр, кӧ ԛизәкә ԝейә йәксали һәбу. Рʹожед кӧ тʹӧ кәси жь щьвате нькарьбу һинбун дәрбаз кьра, Рубийе һинбуна ԝе бь сайа нәʹма дәрбаз дькьр. Гава мә диса сәрледана ве щьвате кьр, әв жьньк дьһатә һʹәму щьвина. Паше, дӧ хушкед кӧ пешәнгед мәхсус бун, дәрбази ве щьвате бун, у ида ԝана тʹәви ԝе һинбун дәрбаз дькьр. Ԝәхтәкә кьнда, әв жьньк һатә ньхӧмандьне. Сала 1995-да, 30 сал шунда, хушкәкә щаһьл Бәйтʹәла Патерсонеда насийа хԝә да Рубийе. Әԝ хушк, ԛиза ве жьньке бу, йа кӧ Рубийе тʹәви ԝе һинбуна Кʹьтеба Пироз дәрбаз кьрьбу. Ви чахи әв хушк тʹәви мере хԝә Мәкʹтәба Гиләдеда һин дьбу, кʹома 100-да.

Дәшта мә йа дӧда Флоридайа навәндда бу. Мәрʹа әʹрәбәк лазьм бу, ләма мә хԝәрʹа әʹрәбәкә гәләк әрзан кʹьрʹи. Ле паши һʹәфтеке, әʹрәба мә хьраб бу у пʹәре мә бона чекьрьна ԝе тʹӧнә бу. Мьн бьракирʹа тʹеле хьст, чьмки әз дьфькьрим кӧ дьԛәԝьмә әԝе бькарьбә али мә бькә. Әԝи хәбатчики хԝәрʹа гот, ԝәки әԝ әʹрәба мә чекә, у әԝи жь мьн пʹәрә нәхԝәст. Әԝи тʹәне гот: «Проблем сафи бу». Сәрда жи, әԝи пʹәрә да мә! Әԝ йәк рʹьнд әшкәрә кьр, кӧ Йаһоԝа чаԝа хьзмәткʹаред хԝә хԝәй дькә. Ве йәке ани бира мә, кӧ гәрәке әм жи һьндава кәсед дьн дәствәкьри бьн.

Гава мә сәрледана щьватәке дькьр, әм мала хушк-бьрада дьман. Бь сайа ве йәке, әм тʹәви гәләка бунә һәвалед незик. Щарәке, мьн пе мәкʹина нәшьркьрьне дәстпекьр һʹәсабед щьвате бьньвисьм у нивида һишт. Гава әз еваре вәгәрʹийамә мал, мьн дит кӧ кӧрʹе хԝәйе мале йе бьчʹук, ньвисандьна ван һʹәсаба «хьлаз кьрьбу»! Бь гәләк сала, гава әм рʹасти һәв дьһатьн, мьн әв йәк дьани бира ԝи у әм дькʹәнийан.

Сала 1971-да, мьн кʹьфшкьрьнәкә ну станд. Әз бажаре Нийу Йоркеда бумә бәрпьрсийаре нәһийе. Әм мәтʹал ман! Гава әм дәрбази ԝедәре бун, әз 34 сали бум. Ԝедәре, щара пешьн йәки чʹәрмәрʹәш ча бәрпьрсийаре нәһийе һатә кʹьфшкьрьне, у хушк-бьра әз бь дьлгәрми ԛәбул кьрьм.

Әз бәрпьрсийаре нәһийе бум, ләма жи мьн хьлазийа һәр һʹәфтийе сәр щьвата мәзьн готар дьхԝәндьн у мьн шабун дьстанд, кӧ мьн дәрһәԛа Йаһоԝа һин дькьр. Гәләк бәрпьрсийаред мьһале дьһа щерʹьбанди бун, нә кӧ әз. Йәк жь ԝан, готара ньхӧмандьна мьн хԝәндьбу. Бьраки дьн жи, Теодор Йарач, паше бу әндәме Кʹома Рʹебәрийе. Ӧса жи, гәләк бьред дьн жи һәбун, йед кӧ Бәйтʹәла Бруклинеда хьзмәт дькьрьн. Әз гәләк жь ԝан рʹази бум, чьмки мьн хԝә аза тʹәви ԝан тʹәхмин дькьр. Мьн пе чʹәʹве хԝә дьдит кӧ әв шьванед дьлован чаԝа хԝә дьспартьн Хәбәра Хԝәде у бь амьни пьштгьрийа тʹәшкиләте дькьрьн. Мьлуктийа  ԝан али мьн дькьр, ԝәки әз хьзмәта хԝә ча бәрпьрсийаре нәһийе баш биньм сери.

Сала 1974-да, Кʹома Рʹебәрийе һьнә бәрпьрсийаред мьһале ча бәрпьрсийаред нәһийе кʹьфш кьрьн, ле әз диса бум бәрпьрсийаре мьһале, ле ижар Каролинайа Башуреда. Шькьр кӧ хушк у бьред чʹәрмәспи у чʹәрмәрʹәш ида дькарьбун тʹәви һәв тʹоп бьн. Ләма жи һәр кәс ша дьбу.

Хьлазийа сала 1976-да, тʹәшкиләте әз һәремәкә Щорщийайе нав Атланта у Колумбусе, кʹьфш кьрьм. Рʹьнд те бира мьн кӧ Атлантайеда мьн ԝәʹде шине готар хԝәнд, һьнге 5 зарʹед чʹәрмәрʹәш мьрьбун. Әԝана мала хԝәда мьрьбун, йа кӧ жь алийе һьнә мәрьвада һатьбу шәԝьтандьне, у дайика ԝан жи бьриндар бу у кʹәтьбу нәхԝәшхане. Нәхԝәшханә бь хушк-бьред чʹәрмәрʹәш у чʹәрмәспива тʹьжә бу, йед кӧ һатьн ԝәки тʹәсәлийа ԝан бькьн у дьлбинийе бьдьнә ԝан. Һʹьзкьрьна хушк-бьра бь рʹасти жи гәләк мәхсус ә! Дьлрʹәʹмикә ӧса дькарә али хьзмәткʹаред Хԝәде бькә, ԝәки нава тәнгасийада сәбьр кьн.

Сала 1977-да, әм бона проектәке сәр чәнд мәһа һатьнә тʹәглифкьрьне Бәйтʹәла Бруклине. Гава һьндьк ма ԝәки проекта мә хьлаз буйа, дӧ әндәмед Кʹома Рʹебәрийе жь мьн пьрсин, һәла әм дьхԝазьн бьбьнә Бәйтʹәлванед һәртʹьм. Мә әв тʹәглиф ԛәбул кьр.

Мьн 24 сал Идара Хьзмәтийеда хьзмәт кьрийә. Ԝедәре, әз у бьред дьн, әм рʹасти гәләк пьрсед чәтьн дьһатьн. Бь сала Кʹома Рʹебәрийе ль сәр һʹиме принсипед Кʹьтеба Пироз рʹебәри дьдә мә. Әв рʹебәри бона ве йәке нә, ԝәки щаба пьрсед ӧса бьдьн. Ӧса жи, әв рʹебәри бона һинкьрьна бәрпьрсийаред мьһале, рʹуспийед щьвате у пешәнга жи те хәбьтандьне. Бь сайа ве бәрнама һинкьрьне, гәләк кәс алийе рʹӧһʹанива дьһа ԛәԝи бунә у тʹәшкиләта Йаһоԝа дьһа пешда чуйә.

Сала 1995-да һʹәта сала 2018, мьн ча ԝәкʹиле Кʹома Рʹебәрийе сәрледана гәләк филиала дькьр, бәре сәр ве кʹьфшкьрьне дьготьн бәрпьрсийаре кӧ тʹәсәлийа филиала дькә. Мьн тʹәви әндәмед Комитейед Филиала, Бәйтʹәлван у мьзгинванед мисйонера хәбәр дьда у дьле ԝан ԛәԝи дькьр, у мьн али ԝан дькьр, гава ԝана дәрһәԛа проблемед хԝә мьнрʹа гьли дькьрьн. Әз у Руби, мә жь сәрһатийед хушк-бьра гәләк һелан дьстанд. Мәсәлә, сала 2000-да, әм бона сәрледанәке чун Рԝандайе. Хушк-бьра мәрʹа готьн, кӧ ԝәʹде геносиде сала 1994-да чь һатьбу сәре ԝан. Гәләк жь ԝан мәрьвед хԝәйи незик ӧнда кьрьбун. Диса жи ԝана баԝәри, һеви у шабуна хԝә ӧнда нәкьрьбу.

Ньһа әʹмьре мә 80 сал зедәтьр ә. Ида 20 сал ә кӧ әз ча әндәме Комитейа Филиала Дәԝләтед Йәкбуйи хьзмәт дькьм. Әз ԛәт нәчумә занингәһе, ле Йаһоԝа у тʹәшкиләта ԝи һинбуна һәри бьльнд данә мьн. Бь сайа ве һинбуне, әз дькарьм рʹастийа Кʹьтеба Пироз мәрьва һин кьм, йа кӧ кʹара һәрһәйи тинә (2 Корьнтʹи 3:5; 2 Тимотʹейо 2:2). Мьн дитийә кӧ мьзгинийа Кʹьтеба Пироз чаԝа али инсана дькә, кӧ жийина ԝан дьһа баш бә у кӧ чаԝа әԝана дьбьнә достед Хԝәде (Аԛуб 4:8). Чахе мәщал дькʹәвә дәсте мьн у Рубийе, әм кәсед дьнрʹа дьбежьн кӧ ԛәдьрәки мәйә һәри мәзьн әв ә, кӧ әм дькарьн дәрһәԛа Йаһоԝа һин бьн у рʹастийа Кʹьтеба Пироз мәрьва һин кьн.