Smɔl tɛm afta 1940, mi mama ɛn papa bigin stɔdi di Baybul wit Jiova Witnɛs dɛn. Pan ɔl we di stɔdi nɔ bin kɔntinyu, mi mama bin kɔntinyu fɔ de gɛt Wachtawa ɛn Awake! magazin dɛn. Insay 1950, dɛn bin ol wan intanashɔnal kɔnvɛnshɔn na Nyu Yɔk Siti, ɛn mi famili bin gri fɔ atɛnd di program.

Sɔm tɛm afta dat, Brɔda Lɔrɛns Jɛfriz bin bigin fɔ kam fɛn wi. I bin tray fɔ ɛp mi fɔ lan di trut. Fɔs, a bin tink se Jiova Witnɛs dɛn fɔ put an pan pɔlitiks ɛn jɔyn soja. A tɛl am se if ɔlman na Amɛrika nɔ gri fɔ go fɛt wɔ, wi ɛnimi dɛn go kam ɛn tek ova di wan ol kɔntri. Brɔda Jɛfriz bin tek tɛm aks mi dis kwɛstyɔn se: “Wetin yu tink se Jiova Gɔd go du if ɔl di pipul dɛn na Amɛrika bin de sav am ɛn ɛnimi dɛn kam fɔ atak dɛn?” In ansa pan dis ɛn ɔda tin dɛn bin ɛp mi fɔ si se a bin rɔng. Dat mek a bin rili want fɔ no mɔ.

A bin de spɛn bɔku tɛm fɔ rid di ol Wachtawa ɛn Awake! magazin dɛn we mi mama bin de put na di ɔndasela. As tɛm de go, a kam fɔ si se a de lan di trut, so a gri fɔ lɛ Brɔda Jɛfriz stɔdi di Baybul wit mi. Dɔn bak, a bigin fɔ atɛnd ɔl di mitin dɛn. A bin rili lɛk wetin a de lan, ɛn a bi pɔblisha. Mi gol dɛn bin chenj we a ɔndastand se “di big big de we PAPA GƆD [“Jiova,” NWT] de kam dɔn kam nia.” (Zɛf. 1:​14) Bifo a pe atɛnshɔn fɔ go na yunivasiti, a bin want fɔ ɛp ɔda pipul dɛn fɔ lan bɔt di tru na di Baybul.

A dɔn sɛkɔndari skul Jun 13, 1956, ɛn tri dez afta dat, a bin baptayz na wan sakit  asɛmbli. A nɔ bin no da tɛm de se a go gɛt bɔku gud tin dɛn frɔm Jiova bikɔs a bin disayd fɔ yuz mi layf fɔ lan ɛn tich ɔda pipul dɛn bɔt am.

Siks mɔnt afta a baptayz, a bi rɛgyula payɔnia. Di Disɛmba 1956 Kingdom Ministry bin gɛt di atikul we gɛt di taytul “Can You Serve Where the Need Is Great?” A go ebul du dat. A bin want fɔ ɛp usay bɔku pipul dɛn nɔ de fɔ prich di gud nyuz.—Mat. 24:​14.

A muf go Ɛjfil, na Sawt Karolayna. Na 4 pɔblisha dɛn nɔmɔ bin de na di kɔngrigeshɔn we de de. Na mi mek fayv. Wi bin de ol wi mitin dɛn na wan brɔda in pala. Ɛni mɔnt, a bin de spɛn 100 awa fɔ prich. A bin bizi de kɔndɔkt mitin fɔ fil savis ɛn du pat dɛn na mitin. Di tin we a kam fɔ no na dat, di mɔ we a de wok na di kɔngrigeshɔn, na di mɔ a bin de lan bɔt Jiova.

Wan uman we a bin de stɔdi di Baybul wit bin gɛt wan fyuniral om na Jɔnstin, we na wan tɔŋ we nɔ de fa frɔm usay a bin de. I bin gi mi pat-taym wok we a bin rili nid, ɛn i bin alaw wi fɔ yuz wan smɔl bildin as wi Kiŋdɔm Ɔl.

Brɔda Joli Jɛfriz, we na di brɔda we stɔdi mi in pikin, bin kɔmɔt na Bruklin, Nyu Yɔk, ɛn kam de wit mi ɛn bi mi payɔnia patna. Wi bin de na wan smɔl trela we wan brɔda lɛnt wi.

Dɛn nɔ bin de pe pipul dɛn bɛtɛ na di Sawt. We wi kin dɔn wok fɔ di wan ol de, na tu ɔ tri dɔla dɛn kin pe wi. Wan tɛm, a bin jɔs dɔn yuz di las kɔyn dɛn we a gɛt fɔ bay it na wan shɔp. We a kɔmɔt na do, wan man kam aks mi se: “Yu want wok? A go pe yu wan dɔla fɔ wan awa.” I gi mi wok fɔ klin wan kɔnstrɔkshɔn sayt fɔ tri dez. Dis bin mek a no klia wan se Jiova bin de ɛp mi fɔ mek a kɔntinyu fɔ de na Ɛjfil. Bɔt insay 1958, a bin go di intanashɔnal kɔnvɛnshɔn we dɛn bin gɛt na Nyu Yɔk Siti.

Insay di sɛkɔn de na di kɔnvɛnshɔn, sɔntin spɛshal bin apin. A mit Rubi Wadlintin, we na bin rɛgyula payɔnia na Galatin, Tɛnɛsi. Bikɔs wi ɔl tu bin want fɔ bi mishɔnari, wi bin atɛnd di Giliad mitin na di kɔnvɛnshɔn. Leta, wi bigin fɔ rayt to wisɛf. Dɔn dɛn invayt mi fɔ go na Galatin fɔ gi wan pɔblik tɔk. A bin yuz da tɛm de fɔ aks Rubi fɔ mek i mared mi. A muf na Rubi in kɔngrigeshɔn, ɛn wi bin mared insay 1959.

We a bin ol 23 ia, dɛn bin pik mi fɔ bi di kɔngrigeshɔn savant na Galatin (naw dɛn de kɔl di kɔngrigeshɔn savant di kɔdinetɔ fɔ di ɛlda dɛn). Na wi kɔngrigeshɔn fɔs  Chals Tɔmsin bin sav we i bi sakit ovasia. I bin rili gɛt ɛkspiriɛns, bɔt i bin de aks mi bɔt wetin a tink bɔt wetin di brɔda dɛn nid ɛn aw ɔda sakit ovasia dɛn dɔn de tek kia ɔf di kɔngrigeshɔn dɛn. A lan frɔm am se i fayn fɔ de aks kwɛstyɔn ɛn tray fɔ no ɔltin bifo yu disayd fɔ du sɔntin.

Insay Me 1964, dɛn bin invayt mi fɔ atɛnd di Kiŋdɔm Ministri Skul we dɛn bin ol na Sawt Lansing, Nyu Yɔk fɔ wan mɔnt. Di brɔda dɛn we bin de tich na dis skul bin mek a rili want fɔ lan mɔ bɔt Jiova ɛn go nia am mɔ.

Insay Janwari 1965, mi ɛn Rubi bin gɛt wan inviteshɔn fɔ bigin fɔ du di sakit wok. Wi fɔs sakit bin rili big. I go frɔm Nɔksvil, Tɛnɛsi, sote i ɔlmost rich Richmɔnd, Vajinia. Di kɔngrigeshɔn dɛn na Nɔt Karolayna, Kɛntɔki, ɛn Wɛst Vajinia bin de insay di sakit. Na blak kɔngrigeshɔn dɛn nɔmɔ a bin de sav bikɔs di lɔ dɛn na di sawt pat na Amɛrika nɔ bin de alaw blak pipul dɛn fɔ go na mitin wit wayt pipul dɛn. Di brɔda dɛn bin po, ɛn wi bin lan fɔ sheb wetin wi gɛt wit di wan dɛn we nɔ gɛt. Wan sakit ovasia we bin dɔn sav fɔ lɔng tɛm bin tich mi wan impɔtant lɛsin. I tɛl mi se: “Bi dɛn brɔda. Nɔ go na di kɔngrigeshɔn ɛn biev lɛk se yu na dɛn bɔs. Yu go ebul ɛp dɛn if dɛn si yu as dɛn brɔda.”

We wi bin de sav na wan smɔl kɔngrigeshɔn, Rubi bin stat fɔ stɔdi wan yɔŋ uman we bin gɛt wan smɔl galpikin we ol wan ia. We nɔbɔdi na di kɔngrigeshɔn nɔ bin ebul fɔ kɔndɔkt di stɔdi, Rubi bin de yuz lɛta fɔ kɔndɔkt di stɔdi. Di nɛks tɛm we wi go sav na di kɔngrigeshɔn, di uman bin de atɛnd ɔl di mitin dɛn. We tu spɛshal payɔnia sista dɛn bin go na di kɔngrigeshɔn, dɛn kɔntinyu di stɔdi wit di uman, ɛn i nɔ tu te, i baptayz. Afta lɛk 30 ia insay 1995, na Patasin Bɛtɛl, wan yɔŋ sista bin kam tɔk to Rubi. Na da uman we Rubi bin de stɔdi wit in galpikin. Di galpikin ɛn in man bin atɛnd di 100 klas na Giliad Skul.

Wi sɛkɔn sakit bin de na sɛntral Flɔrida. Bay dis tɛm, wi bin nid motoka, so wi bin bay wan ɛn i nɔ bin dia. Bɔt insay di fɔs wik, sɔntin insay di injin bin pwɛl. Wi nɔ bin gɛt ɛni mɔni igen fɔ mek am. A bin kɔl wan brɔda we a bin tink se go ebul fɔ ɛp wi. I mek wan pan in wokman dɛn mek di motoka, ɛn i nɔ tek ɛni mɔni na wi an fɔ dat. I jɔs tɛl wi se, “Una nɔ nid fɔ pe mi.” I bin ivin gi wi mɔni. Dis na wan fayn ɛgzampul we de sho aw Jiova de kia fɔ in savant dɛn. I mɛmba wi se wisɛf fɔ gɛt fri-an.

Ɛnitɛm wi go na ɛni kɔngrigeshɔn, wi kin de na di brɔda dɛn os. Bikɔs ɔf dat, wi bin gɛt bɔku gud padi dɛn. Wan de, a lɛf mi ripɔt bɔt di kɔngrigeshɔn na mi tayprayta we a nɔ bin dɔn dɔn yet. We a kam bak da ivintɛm de, a si se di tri ia ol pikin we di famili we wi bin de wit gɛt, bin dɔn “ɛp” mi fɔ dɔn di ripɔt. Fɔ lɔng tɛm a bin de provok am fɔ dat.

Insay 1971, a bin gɛt wan lɛta we se a fɔ sav as distrikt ovasia insay Nyu Yɔk Siti. Wi bin shɔk! A bin jɔs ol 34 ia we wi muf go de. Mi na bin dɛn fɔs distrikt ovasia we na bin blakman, ɛn di brɔda dɛn bin rili wɛlkɔm mi.

As distrikt ovasia, a bin de ɛnjɔy fɔ tich bɔt Jiova ɛni wikɛnd na sakit asɛmbli. Bɔku pan di sakit ovasia dɛn bin gɛt mɔ ɛkspiriɛns pas mi. Na wan pan dɛn bin gi mi baptizim tɔk. Wan ɔda brɔda we na Tiɔdɔ Jaraz, bin leta bi Gɔvnin Bɔdi mɛmba. Bɔku ɔda ɛkspiriɛns brɔda dɛn bin de we bin de sav na Bruklin Bɛtɛl. A bin rili gladi we di sakit ovasia dɛn ɛn di Bɛtɛlayt dɛn mek a fil fayn. A kam fɔ si fɔ misɛf se dɛn na shɛpad dɛn we rili lɛk dɛn ship dɛn ɛn we abop pan Gɔd in Wɔd ɛn de sɔpɔt di ɔganayzeshɔn wit ɔl dɛn at. Di we aw dɛn ɔmbul bin mek am izi fɔ mek a sav as distrikt ovasia.

Insay 1974, di Gɔvnin Bɔdi bin pik ɔda sakit ovasia dɛn fɔ bi distrikt ovasia, ɛn a bin bi sakit ovasia bak, bɔt dis tɛm na insay Sawt Karolayna. Da tɛm de, di blak ɛn wayt brɔda dɛn na di kɔngrigeshɔn ɛn sakit dɛn bin de miks togɛda, ɛn dis bin mek wi rili gladi.

Leta insay 1976, dɛn bin sɛn mi na di Jɔjia sakit we de bitwin Atlanta ɛn Kolombɔs. A mɛmba klia wan we a bin gi wan bɛrin tɔk fɔ fayv blak pikin dɛn we bin day bikɔs sɔm pipul dɛn bin sɛt faya na dɛn os. Di mama bin de na ɔspitul bikɔs i bin damej. Bɔku blak ɛn wayt brɔda ɛn sista dɛn bin kam na di ɔspitul fɔ kɔrej di mama ɛn papa dɛn. A bin si klia wan se di brɔda dɛn rili gɛt lɔv. Dis kayn sɔri-at de ɛp Gɔd in savant dɛn fɔ bia we tin nɔ kin rili izi.

Insay 1977, dɛn tɛl wi fɔ kam na Bruklin Bɛtɛl fɔ sɔm mɔnt fɔ ɛp wit wan projɛkt. We di projɛkt bin want fɔ dɔn, tu mɛmba dɛn na di Gɔvnin Bɔdi bin mit mi ɛn aks if mi ɛn Rubi go gri fɔ wok na Bɛtɛl sote go. Wi bin gri fɔ du so.

A bin wok na di Savis Dipatmɛnt fɔ 24 ia, ɛn bɔku tɛm di brɔda dɛn we de na dis dipatmɛnt dɛn wok na bin fɔ fɛn ansa to kwɛstyɔn dɛn we tranga. Fɔ lɔng tɛm naw, di Gɔvnin Bɔdi dɔn de yuz Baybul prinsipul dɛn fɔ sho wetin fɔ du. Dis kin ɛp di Savis Dipatmɛnt fɔ ansa kwɛstyɔn dɛn, bɔt dɛn kin yuz am bak fɔ tren sakit ovasia dɛn, ɛlda dɛn, ɛn payɔnia dɛn. Dis tin we dɛn de yuz fɔ tren dɔn ɛp bɔku fɔ bi machɔ Kristian. Dis dɔn mek Jiova in ɔganayzeshɔn kɔntinyu fɔ go bifo mɔ ɛn mɔ.

Frɔm 1995 to 2018, a bin go na difrɛn difrɛn branch ɔfis dɛn as ɛdkwata rɛprizɛntetiv, we dɛn bin de kɔl trade zon ovasia. A bin de mit wit Branch Kɔmiti mɛmba dɛn, Bɛtɛlayt dɛn, ɛn mishɔnari dɛn fɔ ɛnkɔrej dɛn ɛn ɛp dɛn wit ɛnitin we gɛt fɔ du wit dɛn. Dɔn di ɛkspiriɛns dɛn we di brɔda ɛn sista dɛn kin tɛl wi kin ɛnkɔrej mi ɛn Rubi ɔltɛm. Fɔ ɛgzampul, wi bin go na Ruwanda insay 2000. We wi yɛri aw di brɔda dɛn ɛn di Bɛtɛl famili bin sev di tɛm we dɛn bin kil kil pipul dɛn insay 1994, dis bin rili tɔch wi at. Bɔku pipul dɛn bin dɔn lɔs pipul dɛn we dɛn lɛk. Dɛn brɔda dɛn de bin sho se dɛn gɛt fet, op, ɛn gladi-at, pan ɔl di prɔblɛm dɛn we bin mit dɛn.

Wi dɔn pas 80 ia naw. Fɔ di pas 20 ia, a dɔn sav na Amɛrika Branch Kɔmiti. A nɔ wande go na yunivasiti; bɔt Jiova ɛn in ɔganayzeshɔn dɔn gi mi di bɛst ɛdyukeshɔn. Dis dɔn ɛp mi fɔ tich ɔda pipul dɛn di tru na di Baybul we go bɛnifit dɛn sote go. (2 Kɔr. 3:​5; 2 Tim. 2:​2) A dɔn si aw di Baybul in mɛsej dɔn ɛp pipul dɛn fɔ mek dɛn layf bɛtɛ ɛn fɔ gɛt padi biznɛs wit di Wan we mek dɛn. (Jems 4:​8) Ɛni chans we mi ɛn Rubi gɛt, wi kin kɔntinyu fɔ ɛnkɔrej ɔda pipul dɛn fɔ valyu di ɔnɔ we dɛn gɛt fɔ lan bɔt Jiova ɛn tich ɔda pipul dɛn di tru na di Baybul. Dat na di ɔnɔ we pas ɔl we Jiova in savant go ɛnjɔy.