Kumatachikilu ayaaka yamuma 1940, anvwali jami atachikili kuyidizisha Bayibolu kudi aYinsahu jaYehova. Atwalekelihu wanyi kudiza, ilaña amama atwalekelihu kutambwila magazini yaKaposhi Kakutalila niAwake!. Mu 1950 kwadiña kupompa kwanyuza muNew York City, nawa chisaka chami chetejeli mutambi wakuya nakupompa.

Kufuma hohenohu, Manakwetu Lawrence Jeffries watachikili kwinza nakutudizisha. Watachikili kunkwasha. Hakusambila, namukaanini nanochu aYinsahu jaYehova chabulaña kudiñijawu mujamatuña nachiyuulu niwushidika. Namutadikili nami neyi antu ejima muAmerica akaana kuya kunjita, ayilumbu akwinza nakutambula ituña dejima. Manakwetu Jeffries wadiwunjikili nakuñihula nindi: “Wunakutoñojoka neyi Yehova Nzambi wukwila ñahi, neyi antu ejima muAmerica amukalakelaña nawa ayilumbu enza nakuyilukuka?” Mazu ahosheliyi haniyi nsañu nihansañu yikwawu ankwashili kwiluka nami nsañu yinahosheleña yadiña yidana wunsahu walala. Chumichi chankwashili kwikala nampwila yakudiza.

Nombileña mpinji yeneni kutaña magazini akunyima aKaposhi Kakutalila niAwake! ashiliwu amama mukapeka kaheshina. Mukuhita kwampinji, nenjili nakwiluka nami nadizileña chalala, dichi netejeli Manakwetu Jeffries kundizisha Bayibolu. Nawa natachikili kupompa mpinji yejima. Chalala chanshikili hamuchima nawa nekalili mukakushimwina nsañu yayiwahi. Yuma yinafwilileña yahimpikili chinelukili nami “ifuku deneni daYehova [dadiña] kwakwihi.” (Zef. 1:14) Nalekeli kufwila kuya univesiti nawa nafwilileña kukwasha antu adizi chalala chamuBayibolu.

Namanishili shikola ha 13 June, 1956, nawa  chimwahitili mafuku asatu, napapatisheweli hakupompa kwañinza. Nelukili wanyi nami nkisu yayivulu yikenza neyi nizatisha chihandilu chami kudiza nikudizisha antu amakwawu kulonda amwiluki Yehova.

Chimwahitili tukweji 6 kufuma hinapapatisheweli, nekalili payiniya wampinji yejima. Mumudimu waWanta waDecember 1956 mwadiña chibaaba chahosheleña nawu “Munateli Kuzatila Kudi Kukankila?” Ninami nateleleli. Nakeñeleña kuya nakukwasha kwadiña akakushimwina ansañu yayiwahi antesha.—Mat. 24:14.

Nabukilili kuEdgefield, South Carolina. Chipompelu chadiña kweniku chadiña hohu nawakakushimwina awana. Chinashikili twashikili atanu. Twapompeleleña mukapeka kakushakama mwitala damanakwetu. Kakweji nikakweji, nazatileña maora 100 mumudimu wakushimwina. Nalombweleña mudimu wakushimwina nikuhana jimpanji hakupompa. Chantiyishileña kuwaha, neyi inakuzata iyi nyidimu namwilukilileñaku chikupu Yehova.

Mumbanda wumu inadizishileña Bayibolu wadiña netala mwakwikalila chipenji muJohnston, mbaka yadiña hahalehi chanti. Wanyiñijili mudimu wakuzataku mafuku amakwawu nawa watwitejeleña kuzatisha kaditala kanyanya kulonda tupompeleñamu.

Manakwetu Jolly Jeffries, mwana kamanakwetu wandizishileña, wabukili kufuma Brooklyn, New York, nawa twatachikili kuzatila wupayiniya hamu. Twashakamineña mukaditala kanyanya katwinkeli manakwetu.

Nfwetu yadiña yantesha kuSouth. Twatambwileña mali 2 hela 3 dola hefuku. Mpinji yimu, nazatishili mali ejima inadiña nawu kulandamu yakuda musitolu. Chinedikileña iyala wumu wawanini nakuñila nindi: “Wunakukeña wanyi mudimu? Nukukufwetaña dola yimu haora.” Wanyinkeli kuzata mafuku asatu kuwahisha heluña dakutuñila. Chamwekeni hatooka nawu Yehova wankwashileña kulonda nishakami muEdgefield. Hela chochu, nayili kukupompa kweneni kwanyuza mu 1958 kwadiñaku muNew York City.

Hefuku damuchiyedi dakupompa, chuma chachiwahi chamwekeni. Twadibulakeni naRuby Wadlington, wadiña payiniya wampinji yejima muGallatin, Tennessee. Chineli wejima wetu twakeñeli mudimu wawumishonali, twayili kukubulakana kwawantu anakukeña kuya kuGiliyadi hakupompa. Kuhiñahu twatachikili kudisonekela nyikanda. Kufumahu, antambikili kuGallatin kuya nakuhana mpanji yawantu amavulu. Nazatishili iyi mpinji kumwihula neyi tunateli kudisumbula. Nabukilili muchipompelu mwadiña Ruby, nawa twadisumbwili mu 1959.

Hinadiña nayaaka 23, antondeli kwikala nkoñi wachipompelu (anakutenawu makonu  nawu nloñeshi wenzanvu dawakulumpi) muGallatin. Chipompelu chetu dichadiña chatachi kwendela kudi nkoñi wañinza Charles Thompson. Wadiña wakulukila chikupu, ilaña wañihwili kulonda nimuleji yuma yinakukeñeka kudi amanakwetu nichazatileñawu ankoñi añinza amakwawu nanoyu yuma. Nadizilili kudi yena nami chachiwahi kwihula malwihu nikwiluka nsañu yejima henohu kanda muzatilihu.

MuMay 1964, antambikili kuShikola yaMudimu waWanta hadi kakweji kamu yadiñaku muSouth Lansing, New York. Amanakwetu adizishileña muniyi shikola ankwashili kwikala neyena dakukeña kudiza nikupama kuspiritu.

Ami naRuby atulejeli nawu tutachiki kuzata mudimu wawunkoñi muJanuary 1965. Atwinkeli ñinza yeneni chikupu, kufuma kuKnoxville, Tennessee, nakushika kwakwihi naRichmond, Virginia. Mwabombeleli niyipompelu yadiña muNorth Carolina, Kentucky, niWest Virginia. Nakalakeleleña hohu yipompelu mwadiña antu eyila muloña haniyi mpinji kukabeta kakuchidiilu kaUnited States kwachidiña chaambu, dichi antu eyila adibombeleña wanyi nawazungu. Amanakwetu adiña ahutwa, dichi twanzañeneña yuma yitwadiña nayu. Manakwetu wadiña nkoñi wañinza hadi mpinji yayilehi wanlejeli chikuma chalema nindi: “Watela kwikala manakwetu wamuwahi. Bayi wikala kapitawu muchipompelu. Neyi akumonaña nawu wudi manakwawu wunateli kuyikwasha.”

Hampinji yitwahempwileña chipompelu chimu chanyanya, Ruby watachikili kudizisha mumbanda wadiña namwana wamumbanda wachaaka chimu. Chineli muchipompelu mwadiña wanyi wakumudizisha, Ruby wamudizishileña kuhitila mukumusonekela nyikanda. Chitwafuntiliku cheñi, iwu mumbanda wenjileña nakupompa mpinji yejima. Chikwenjili ahela apayiniya adimena ayedi, atwalekelihu kumudizisha, nawa hashimbwili wanyi wapapatisheweli. Chimwahitili yaaka 30 mu 1995, kankaña wumu wenjili nakudilumbulula kudi Ruby haBeteli yakuPatterson. Wadiña mwana kanona mumbanda adizishileñawu kudi Ruby. Iwu mwana ninfumwindi adiña atudizi muShikola yaGiliyadi yanaamba 100.

Ñinza yetu yamuchiyedi yadiña mucentral Florida. Haniyi mpinji twakeñekeleña motoka, dichi twalandili yimu hawuseya wawuwahi. Hela chochu, mulungu hohu watachi kufuma hitwayilandili, wota pampu yafwili. Twadiña wanyi namali akuloñesha nachu. Natambikili manakwetu inatoñojokeli nami wukutukwasha. Walejeli mukamudimu windi wumu kwinza nakutuloñeshela motoka chawaana. Wahosheli hohu nindi: “Kwakama nehi.” Nawa watwinkeli nimali! Iyi hinjila yimu yayiwahi Yehova mwakwashilañayi ambuñindi. Chatwanukishili kwikala nachisambu nawantu.

Mpinji yejima yitwendeleleña yipompelu, twashakamineña mumatala awamanakwetu. Twekalili nawamabwambu amawahi. Ifuku dimu, nafuminihu, namanishili wanyi kusoneka lipoti yachipompelu yinasonekeleña hatayipi rayita. Chinafuntili namelela, nawanini mwana kamanakwetu kwitala kutwashakamineña wayaaka yisatu “nankwashiku” kumanisha kuyisoneka. Namusehesheleña haniyi nsañu hadi yaaka yayivulu.

Mu 1971, natambwilili mukanda wakuya nakuzata mudimu wawunkoñi muNew York City. Twahayamini nankashi! Nadiña nayaaka 34 hitwabukilili kwenakuna. Amanakwetu antambwilili nachisambu neyi nkoñi wawu wañinza wiyila.

Chineli nadiña nkoñi wankambi, natiyileña kuwaha kutañisha hadi Yehova kunsa yanyilungu hakupompa kwañinza. Ankoñi añinza amavulu adiña akulukila kubadika ami. Wumu hakachi kawu diyi wahanini mpanji hinapapatisheweleña. Manakwetu mukwawu, Theodore Jaracz, wenjili nakwikala membala waMwizanvu Dalombolaña. Kwadiña amanakwetu amakwawu amavulu apama akalakeleleña haBeteli yamuBrooklyn. Natiyileña kuwaha muloña ankoñi añinza niamuchisaka chaBeteli ankwashileña kubula kwakama. Nadimweneni namesu kapu awa atubiña akweti kukeña ashindameneni Hezu daNzambi nawa ankwashileña kuloñesha namuchima wejima. Kudizoza  kwawu kwankwashili kukalakala chiwahi mudimu wawunkoñi wankambi.

Mu 1974 Izanvu Dalombolaña datemesheli izanvu dikwawu dawankoñi añinza mujiñinza, nawa natachikili kuzata mudimu wawunkoñi wañinza, haniyi mpinji nazatilileña muSouth Carolina. Chamuzañalu, hayina mpinji yipompelu nijiñinza jadiña nakudibomba, chuma chayitiyishileña amanakwetu kuwaha.

Kukukuma kwachaaka cha 1976, antemesheli muñinza yakuGeorgia haneli Atlanta iku Columbus iku. Inakwanuka chiwahi nahanini mpanji kumajamu yawanyana eyila atanu afwili netenda nzumbu dashikeneni hetala. Mama yawu amutentekeli muchipateli muloña amukatishili. AYinsahu jaYehova amavulu, eyila niazungu, enjili kuchipateli nakukundeja anvwali. Namweni nami amanakwetu adikeña nankashi. Wushona wamuchidiwu wunateli kukwasha ambuña aNzambi kuumika mumpinji yakala.

Mu 1977 atutambikili kuBeteli yamuBrooklyn hadi tukweji twantesha kulonda tuzati mudimu wumu. Mudimu chiwamanineña, amamembala aMwizanvu Dalombolaña adibulakeni nanami nawa añihwili neyi ami niRuby tunateli kwiteja kutwalekahu kukalakela haBeteli. Twetejeli mwani.

Hadi yaaka 24, nazatilili kuDipatimenti yaMudimu, kwakulañawu amanakwetu malwihu nikwahanjekañawu nsañu yakala nawa yamaneni. Yaaka yejimiyi, Izanvu Dalombolaña dahanaña wunlomboli kushindamena hayishina yamuBayibolu. Dihitwashindamenaña hakwakula malwihu, cheñi dihashindamena nsañu yakudizisha ankoñi añinza, akulumpi niapayiniya. Iyi yitwa yakudizishilamu yinakwashi amavulu kupama kuspiritu. Nawa chumichi chinakwashi kuloñesha kwaYehova.

Kufuma mu 1995 nakushika mu 2018, nahempwileña tusanji twanyitayi twatuvulu neyi ñimenu wakasanji keneni mukaayi, itwateneneña hakusambila netu nkoñi wendelaña nyitayi. Nadibulakeneña namaKometi aMutayi, akaBeteli niamishonali kulonda niyikoleshi nikuyikwasha nakukala kwadiñawu naku. Nawa ami niRuby twakolesheweleña nayuma yatulejeleñawu amanakwetu. Chakutalilahu, mu 2000 twendeleli ituña daRwanda. Twatiyili kuwaha hakutiya amanakwetu niamuchisaka chabeteli chomikiliwu kudijaha kwadiñaku mu 1994. Amavulu ajimbesheli antaña jawu. Hela chakwila amweni kukala kwamuchidiwu, awa amanakwetu amwekesheli chikuhwelelu, kuchiñeja nimuzañalu.

Ichi tunabadiki dehi hayaaka 80. Hayaaka 20 yinahitihu, nakalakali neyi Membala wamuKometi yaMutayi muUnited States. Nayilihu wanyi kuunivesiti, ilaña Yehova nandizishi nikuloñesha kwindi. Chumichi chinankwashi kuyidizisha antu chalala chamuBayibolu kulonda akekali nawumi wahaya nyaaka. (2 Kor. 3:5; 2 Tim. 2:2) Namoni nsañu yamuBayibolu chiyinakwashi antu amakwawu kuwahishaku yilwilu yawu nikwikala nawubwambu wawuwahi naNleñi yawu. (Yak. 4:8) Ami niRuby, twazataña nañovu kuyikolesha akwetu kulonda alemeshi kudiza nikumwiluka Yehova nikudizisha antu amakwawu chalala chamuBayibolu, mudimu wabadika watela kuzatawu ambuña aYehova ejima!