Ftit wara l-​1940, il-​ġenituri tiegħi bdew jistudjaw il-​Bibbja max-​Xhieda taʼ Ġeħova. Huma waqfu jistudjaw, imma ommi baqgħet tirċievi t-​Torri tal-​Għassa u Stenbaħ! Fl-​1950 kien hemm konvenzjoni internazzjonali fi New York, u jien u l-​familja morna.

Ftit wara, Ħuna Lawrence Jeffries beda jiġi d-​dar biex jgħinni nitgħallem il-​verità. Għall-​ewwel ma kontx naqbel miegħu li x-​Xhieda taʼ Ġeħova ma jiħdux sehem fil-​politika u ma jidħlux fl-​armata. Jien għedtlu li jekk ħadd fl-​Amerika ma jmur jiġġieled fil-​gwerra, taʼ kontrina jistgħu jidħlu fil-​pajjiż u jibdew jikkontrollawna. Ħuna Jeffries bil-​paċenzja kollha qalli: “Kieku n-​nies kollha li jgħixu l-​Amerika jaqdu lil Ġeħova u l-​għadu jiġi jattakkahom, Alla x’se jagħmel?” B’dak li qalli dwar dan u affarijiet oħra għenni nifhem li kelli żball. Allura xtaqt nitgħallem iktar dwar il-​verità.

Kont nagħmel sigħat naqra r-​rivisti antiki taʼ It-​Torri tal-​Għassa u Stenbaħ! li ommi kienet tefgħet fil-​kantina. Maż-​żmien indunajt li qed nitgħallem il-​verità, allura aċċettajt li nistudja l-​Bibbja maʼ Ħuna Jeffries. Wara bdejt immur il-​laqgħat b’mod regulari. Bdejt nieħu pjaċir ħafna b’dak li kont qed nitgħallem, u sirt pubblikatur. Meta fhimt li ‘l-​jum il-​kbir taʼ Ġeħova kien fil-​qrib,’ il-​miri tiegħi nbidlu. (Sof. 1:14) Ma bqajtx nixtieq immur l-​università, imma minflok ridt ngħin lil oħrajn jitgħallmu l-​Bibbja.

Fit-​13 taʼ Ġunju 1956 spiċċajt mill-​iskola sekondarja, u tlett ijiem wara tgħammidt f’assemblea tas-​circuit. Dak iż-​żmien ma kontx naf li Ġeħova se jberikni daqshekk talli  għażilt li nuża ħajti biex nitgħallem u ngħallem lil oħrajn dwaru.

Sitt xhur wara li tgħammidt sirt pijunier regulari. Fil-​Ministeru tas-​Saltna taʼ Diċembru 1956 kien hemm l-​artiklu “Tistaʼ Taqdi Fejn Hemm Iktar Bżonn?” Jiena stajt u xtaqt immur ngħin fejn kien hemm ftit aħwa jippritkaw l-​aħbar tajba.—Mt. 24:14.

Jien mort noqgħod Edgefield, South Carolina. Fil-​kongregazzjoni konna ħames pubblikaturi biss. Il-​laqgħat konna nagħmluhom fid-​dar taʼ ħu. Kull xahar kont nagħmel 100 siegħa fuq is-​service. Kelli ħafna x’nagħmel għax kont nipprova nkun t’eżempju tajjeb għall-​aħwa u kont nagħti t-​taħditiet fil-​laqgħat. Iżjed ma bdejt naħdem fil-​kongregazzjoni, iktar bdejt nitgħallem dwar Ġeħova.

Mara li kont nistudja l-​Bibbja magħha kellha ħanut tat-​twiebet f’Johnston, raħal ftit ’il bogħod. Jien bdejt naħdem magħha part-​time, u hi ħallietna nużaw post żgħir bħala Sala tas-​Saltna.

Ħuna Jolly Jeffries, it-​tifel tal-​ħu li kont studjajt miegħu, ġie minn Brooklyn, New York, u bdejna naħdmu flimkien bħala pijunieri. Aħna konna noqogħdu f’karavan żgħir li sellfilna ħu.

Hemmhekk il-​pagi kienu baxxi. F’ġurnata konna naqilgħu żewġ dollari jew tlieta. Darba, użajt l-​aħħar ftit flus li kelli biex nixtri xi ikel. Xħin ħriġt mill-​ħanut, ġie raġel fuqi u staqsieni: “Għandek bżonn xogħol? Intik dollaru fis-​siegħa.” Għamilt tlett ijiem innaddaf f’post fejn kienu qed jibnu. Kont ċert li Ġeħova kien qed jgħinni biex nibqaʼ Edgefield. Avolja ma kontx naqlaʼ ħafna flus, fl-​1958 xorta stajt immur il-​konvenzjoni internazzjonali fi New York.

Fit-​tieni ġurnata tal-​konvenzjoni ġrat xi ħaġa sabiħa. Iltqajt maʼ Ruby Wadlington, li kienet pijuniera regulari f’Gallatin, Tennessee. Aħna t-​tnejn xtaqna nkunu missjunarji, allura morna l-​laqgħa taʼ Gilegħad f’dik il-​konvenzjoni. Iktar tard, bdejna nibagħtu l-​ittri lil xulxin. Imbagħad stidnuni biex nagħti taħdita pubblika f’Gallatin. Hemmhekk staqsejtha biex tiżżewwiġni. Jien bdejt immur fil-​kongregazzjoni taʼ Ruby u żżewwiġna fl-​1959.

Meta kelli 23 sena sirt il-​qaddej tal-​kongregazzjoni (illum hu l-​koordinatur tal-​ġemgħa tal-​anzjani) f’Gallatin. Aħna konna l-​ewwel kongregazzjoni li Charles Thompson żar meta sar indokratur li jżur il-​kongregazzjonijiet. Hu kellu ħafna esperjenza, imma xorta kien isaqsi għall-​opinjoni tiegħi dwar x’kellhom bżonn l-​aħwa u kif indokraturi li  jżuru l-​kongregazzjonijiet oħra ħadu ħsieb il-​kongregazzjoni. Hu għallimni kemm hu importanti li ssaqsi mistoqsijiet u tkun taf il-​fatti kollha qabel tieħu deċiżjoni.

F’Mejju tal-​1964 ġejt mistieden għall-​Iskola tal-​Ministeru tas-​Saltna f’South Lansing, New York. L-​iskola damet xahar. L-​aħwa li kienu qed jgħallmuna għenuni nkun irrid nitgħallem iżjed dwar Ġeħova u nersaq qrib tiegħu.

Jien u Ruby ġejna mistidnin biex nibdew nagħmlu x-​xogħol tas-​circuit f’Jannar tal-​1965. Ġejna assenjati f’circuit kbir ħafna, minn Knoxville, Tennessee, sa kważi Richmond, Virginia. Kien jinkludi wkoll il-​kongregazzjonijiet f’North Carolina, Kentucky, u West Virginia. Jiena kont inżur biss il-​kongregazzjonijiet tal-​aħwa suwed għax il-​liġi fin-​naħa t’isfel tal-​Istati Uniti ma kinitx tħalli lin-​nies suwed jattendu l-​laqgħat man-​nies bojod. L-​aħwa kienu foqra u aħna tgħallimna naqsmu dak li kellna maʼ dawk li kienu fil-​bżonn. Ħu li kien ilu jaqdi bħala indokratur li jżur il-​kongregazzjonijiet għallimni lezzjoni importanti ħafna: “Qatt iżżur kongregazzjoni u tqis lilek innifsek bħala l-​imgħallem tal-​aħwa. Tistaʼ tgħinhom biss jekk huma jqisuk bħala ħuhom.”

Waqt li konna qed inżuru kongregazzjoni żgħira, Ruby bdiet studju tal-​Bibbja maʼ mara żagħżugħa li kellha tifla taʼ sena. Meta ma kien hemm ħadd fil-​kongregazzjoni li setaʼ jagħmel l-​istudju magħha, Ruby kompliet tagħmel l-​istudju bl-​ittri. Meta rġajna żorna dik il-​kongregazzjoni, din il-​mara attendiet kull laqgħa. Meta żewġ aħwa pijunieri speċjali marru fil-​kongregazzjoni, hi kompliet tistudja magħhom, u ftit wara tgħammdet. Fl-​1995, kważi 30 sena wara, fil-​Betel taʼ Patterson, oħt żagħżugħa bdiet titkellem maʼ Ruby. Din kienet it-​tifla taʼ dik il-​mara li kienet tistudja maʼ Ruby. Hi u r-​raġel tagħha kienu studenti tal-​100 klassi tal-​Iskola taʼ Gilegħad.

It-​tieni circuit li kellna nagħmlu kien fiċ-​ċentru taʼ Florida. Kellna bżonn karozza u għalhekk xtrajna waħda bi prezz tajjeb ħafna. Imma fl-​ewwel ġimgħa marritilha xi ħaġa mill-​magna. Ma kellniex flus biex nirranġawha. Jien ċempilt lil ħu li forsi setaʼ jgħinna. Il-​ħu qal lil wieħed li kien jaħdem miegħu biex jirranġalna l-​karozza, u hu ma ħadilniex flus tal-​ispejjeż. Il-​ħu qalilna, “Ma rridx niħdilkom flus.” Barra minn hekk, tana xi ħaġa tal-​flus bħala rigal! Dan kien eżempju sabiħ taʼ kif Ġeħova jieħu ħsieb il-​qaddejja tiegħu. Dan fakkarna biex inkunu ġenerużi maʼ oħrajn.

Kull meta konna nżuru kongregazzjoni, konna noqogħdu fid-​djar tal-​aħwa. B’hekk, għamilna ħafna ħbieb. Darba waħda ħallejt ir-​rapport li kont qed nikteb dwar il-​kongregazzjoni fit-​typewriter. Meta mort lura filgħaxija, sirt naf li t-​tifel taʼ tliet snin li kellhom il-​familja li konna qed noqogħdu magħhom beda jagħfas il-​buttuni u “għenni” biex nispiċċa dan ir-​rapport. Biex niċċajta bqajt insemmihielu għal ħafna snin.

Fl-​1971 ġejt assenjat biex naqdi bħala indokratur tad-​distrett fi New York City. Din ma konniex qed nistennewha! Kelli 34 sena meta morna noqogħdu hemm. Jien kont l-​ewwel indokratur tad-​distrett iswed hemmhekk, u l-​aħwa vera laqgħuni.

Bħala indokratur tad-​distrett, kull weekend kont nieħu pjaċir ngħallem dwar Ġeħova f’xi assemblea tas-​circuit. Ħafna mill-​indokraturi li jżuru l-​kongregazzjonijiet kellhom iżjed esperjenza minni. Wieħed minnhom kien ta t-​taħdita tal-​magħmudija tiegħi. Ħu ieħor, Theodore Jaracz, iktar tard sar membru tal-​Ġemgħa li Tiggverna. U kien hemm ħafna aħwa t’esperjenza jaqdu fil-​Betel taʼ Brooklyn. Vera apprezzajt li l-​indokraturi li jżuru l-​kongregazzjonijiet u l-​Beteliti għenuni nħossni komdu. Stajt nara li dawn ir-​ragħajja kienu jħobbu lill-​aħwa, jistrieħu fuq il-​Kelma t’Alla, u jgħinu l-​organizzazzjoni.  L-​umiltà tagħhom għamlithieli faċli biex naqdi bħala indokratur tad-​distrett.

Fl-​1974, il-​Ġemgħa li Tiggverna bagħtet indokraturi li jżuru l-​kongregazzjonijiet biex jagħmlu x-​xogħol tad-​distrett. Jien erġajt sirt indokratur li jżur l-​kongregazzjonijiet f’South Carolina. Sa dak iż-​żmien, l-​aħwa bojod u suwed setgħu jiltaqgħu flimkien fil-​kongregazzjonijiet, u huma kienu ferħanin ħafna.

Fl-​aħħar tal-​1976 bagħtuni f’circuit f’Georgia, bejn Atlanta u Columbus. Għadni niftakar nagħti t-​taħdita tal-​funeral taʼ ħamest itfal suwed li mietu minħabba li xi ħadd ħarqilhom id-​dar. L-​omm weġġgħet ukoll u kellha tmur l-​isptar. Ħafna aħwa bojod u suwed ma waqfux imorru l-​isptar biex jarawhom u jinkuraġġuhom. Stajt nara li l-​aħwa vera jħobbu lil xulxin. Meta l-​qaddejja taʼ Ġeħova jħossu għal xulxin, ikunu jistgħu jissaportu kull prova.

Fl-​1977 ġejna mistidnin għal ftit xhur fil-​Betel taʼ Brooklyn biex ngħinu fi proġett. Meta l-​proġett kien kważi lest, żewġ membri mill-​Ġemgħa li Tiggverna saqsewni jekk jien u Ruby xtaqniex nibqgħu Betel. Aħna aċċettajna.

Għal 24 sena ħdimt fid-​Dipartiment tas-​Servizz. Hemmhekk l-​aħwa spiss jgħinu billi jwieġbu mistoqsijiet diffiċli. Matul is-​snin, il-​Ġemgħa li Tiggverna baqgħet tagħtina għajnuna li taqbel mal-​prinċipji tal-​Bibbja. Din tgħin lid-​Dipartiment tas-​Servizz biex iwieġbu l-​mistoqsijiet, u tgħin ukoll fit-​trejning għall-​indokraturi li jżuru l-​kongregazzjonijiet, anzjani, u pijunieri. Dan it-​trejning għen lil ħafna aħwa biex isiru Kristjani iktar maturi. B’hekk, l-​organizzazzjoni taʼ Ġeħova hi iktar b’saħħitha.

Mill-​1995 sal-​2018, jien żort ħafna uffiċċji tal-​fergħa għax kont rappreżentant tal-​kwartieri ġenerali, li qabel kienu jgħidulu indokratur li jżur il-​fergħat. Kont niltaqaʼ mal-​Kumitati tal-​Fergħa, il-​Beteliti, u l-​missjunarji biex ninkuraġġihom u ngħinhom jekk ikollhom xi problemi. L-​esperjenzi li kienu jaqsmu magħna l-​aħwa dejjem inkuraġġewna. Pereżempju fis-​sena 2000 morna r-​Rwanda. Vera messilna qalbna meta smajna minn xiex għaddew l-​aħwa u l-​Beteliti fl-​1994 minħabba li nqatlu ħafna nies fil-​pajjiż. Ħafna kienu tilfu lil xi ħadd li kienu jħobbu. Avolja batew ħafna, huma wrew fidi, kellhom it-​tama, u kienu ferħanin.

Issa qbiżna t-​80. Għal dawn l-​aħħar 20 sena qdejt fil-​Kumitat tal-​Fergħa tal-​Istati Uniti. Jien qatt ma mort l-​università, imma kelli l-​aħjar edukazzjoni minn Ġeħova u l-​organizzazzjoni tiegħu. Dan għenni biex ngħallem lil oħrajn veritajiet mill-​Bibbja li se jgħinuhom għal dejjem. (2 Kor. 3:5; 2 Tim. 2:2) Jien rajt kif il-​Bibbja għenet lin-​nies ikollhom ħajja aħjar u jkollhom ħbiberija maʼ Ġeħova. (Ġak. 4:8) Kull meta nistgħu, jien u Ruby ninkuraġġixxu lil oħrajn biex japprezzaw il-​privileġġ li jitgħallmu dwar Ġeħova u jgħallmu lil oħrajn dwaru. Dan hu l-​isbaħ privileġġ li jistaʼ jkollu xi ħadd li jaqdi lil Ġeħova!