Ekuqaliseni kwabo-1940 abazali bami babefunda iBhayibhili laboFakazi bakaJehova. Lanxa bacina beyekelile ukufunda, umama wayelokhu ethola iNqabayokulinda le-Vukani! Ngo-1950 mina lemuli yangakithi sangena umhlangano wezizwe eNew York City.

Ngemva kwalokho saqalisa ukuvakatshelwa ngumfowethu uLawrence Jeffries. Wazama ukungifundisa iqiniso. Sakhuluma ngokuthi oFakazi bakaJehova abangeni kwezombusazwe futhi abayi empini. Ngaqalisa ngingavumelani laye. Ngangisithi nxa wonke umuntu e-America angayekela ukuya empini izitha zazingabuya zithathe ilizwe lethu. Umfowethu uJeffries wangibuza wathi: “Ubona angani aluba wonke umuntu e-America ubemkhonza uJehova, uJehova ubengenzani nxa izitha sezibuya ukuzohlasela ilizwe?” Indlela achasisa ngayo indaba le lezinye indaba eziseBhayibhilini yangenza ngabona ukuthi engangikucabanga kwakungayisikho. Lokhu kwangenza ngafuna ukufunda okunengi.

Okwamahola amanengi ngangibala omagazini bakudala ababegcinwe ngumama, iNqabayokulinda le-Vukani! Ngananzelela ukuthi engangikubala kwakuliqiniso yikho ngavuma ukufunda iBhayibhili lomfowethu uJeffries futhi ngaqalisa ukungena yonke imihlangano. Ngangikuthanda engangikufunda njalo ngacina sengingummemezeli wezindaba ezinhle. Ngathi sengizwisisa ukuthi ‘usuku lukaJehova olukhulu seluseduze’ ngatshintsha engangifuna ukukwenza. (Zef. 1:14) Ngasengifuna ukuncedisa abantu ukuthi bafunde iBhayibhili kulokuthi ngiye eyunivesithi.

Ngaqeda isikolo ngoJune 13 1956 futhi ngemva kwamalanga amathathu ngabhabhathizwa  emhlanganweni wesiqinti. Ngangingakwazi ukuthi ukukhetha ukufunda ngoJehova lokufundisa abanye ngaye kwakuzakwenza ngithole izibusiso ezinengi.

Ngaba liphayona lesikhathi sonke ngemva kwezinyanga ezingu-6 ngibhabhathiziwe. INkonzo YoMbuso kaDecember 1956 yayilesihloko esithi “Ungayancedisa Yini Endaweni Elabamemezeli Abalutshwane?” Ngananzelela ukuthi lami ngangingakwenza lokho ngoba ngangivele ngikufisa.—Mat. 24:14.

Ngathuthela e-Edgefield eseSouth Carolina. Ibandla elalilapho lalilabamemezeli abangu-4 kuphela, mina ngaba ngowesi-5. Sasingenela imihlangano endlini yomzalwane. Ngangitshumayela amahola angu-100 inyanga ngayinye. Ngangihlala ngilokunengi kokwenza ngoba ngangikhokhela ekutshumayeleni futhi nginika izinkulumo ebandleni. Ngananzelela ukuthi ukwenza okunengi ebandleni kwakunginceda ngifunde okunengi ngoJehova.

Kulomunye umama engangifunda laye iBhayibhili owayele-funeral parlor eJohnston, idolobho elaliseduze nje khonapho. Wayengiqhatshe ukuthi ngimsebenzele okwamalanga athile ngeviki njalo wayesivumela ukuthi singenele imihlangano kwesinye isakhiwo sakhe.

Umfowethu okuthiwa nguJolly Jeffries, indodana yomfowethu owangifundisa iBhayibhili wathutha esuka eBrooklyn eNew York wabuya wazophayona lami. Sasihlala kukharavani esasiyibolekwe ngomunye umzalwane.

Endaweni leyo abantu babeholiswa imali encane. Sasiholiswa i-$2 loba i-$3 ngelanga. Ngelinye ilanga ngathenga ukudla esitolo ngemali yokucina engangilayo. Ngathi ngiphuma omunye ubaba wangilanda wathi: “Uyawufuna yini umsebenzi? Ngizakubhadala i-$1 ngehola linye oyabe ulisebenza. Wangiqhatsha ukuthi ngisebenze okwamalanga amathathu ngiklina lapho okwakusakhiwa khona. Kwakuzikhanyela ukuthi uJehova wayengincedisa ukuze ngiqhubeke ngise-Edgefield. Lanxa ngangihola imali encane ngenelisa ukuhamba emhlanganweni wezizwe owawuseNew York City ngo-1958.

Ngelanga lesibili lomhlangano ngabona udade okwakuthiwa nguRuby Wadlington, owayeliphayona lesikhathi sonke eGallatin, eTennessee. Sonke sasifuna ukuba ngabanali yikho sangena umhlangano walabo ababefuna ukuya eGiliyadi owenziwa emhlanganweni lo. Ngemva kwalokho saqalisa ukubhalelana izincwadi. Ngacelwa ukuthi ngiyenikela inkulumo eGallatin. Ngathi ngifika lapho ngahle ngamcela ukuthi atshade lami. Ngemva kwalokho ngathuthela ebandleni likaRuby futhi satshada ngo-1959.

Ngathi ngileminyaka engu-23 ngabekwa ukuba yinceku yebandla (khathesi esibizwa ngokuthi ngumhleli wequla labadala) eGallatin. Umfowethu  uCharles Thompson wathi eqalisa ukuhambela waqala ngebandla lethu. Lanxa wayelolwazi olunengi wangibuza ukuthi kuyini okwakunganceda abazalwane lokuthi abanye ababonisi beziqinti babelincedisa njani ibandla. Ngafunda kuye ukuthi kuhle ukuqala ubuze imibuzo njalo uyizwisise kuhle indaba ungakenzi isinqumo.

NgoMay 1964, ngaya eSikolo Senkonzo SoMbuso esasithatha inyanga eyodwa esasisenziwa eSouth Lansing, eNew York. Abazalwane ababesifundisa esikolo lesi banginceda ukuthi ngibe lesifiso sokufunda okunengi ngoJehova njalo ngisondele kuye.

Ngo-1965 mina loRuby sacelwa ukuthi siqalise ukuhambela. Sanikwa isiqinti esasiqa- lisela eKnoxville, eTennessee size siyefika duze leRichmond, eVirginia. Sasilamabandla aseNorth Carolina, eKentucky laseWest Virginia. Ngangi- hambela amabandla alabantu abamnyama kuphela ngenxa yokuthi ngalesosikhathi eningi- zimu ye-United States abantu abamnyama babengavunyelwa ukuhlangana labantu abamhlophe. Abazalwane babezidubekela njalo sasibanika okuncane esasilakho. Omunye umzalwane owayeselesikhathi eside engumbonisi wesi- qinti wangifundisa isifundo esiqakathekileyo. Wathi: “Ungafiki ebandleni uziphakamise. Kodwa zehlise ukuze bakubone ufanana labo. Ungenza njalo uzenelisa ukubancedisa.”

Sathi sivakatshele elinye ibandla uRuby waqalisa ukufunda lenye intombazana eyayilomntwana olomnyaka owodwa. Ngesikhathi kungelamuntu owayesenelisa ukufunda lentombazana le iBhayibhili, uRuby wayefunda layo ngokubhala incwadi. Ngohambo olulandelayo intombazana le yangena yonke imihlangano. Kwathi sekufike odade ababili abangamaphayona aqakathekileyo ebandleni lelo baqhubeka befunda layo njalo ngesikhatshana yabhabhathizwa. Sathi siseBhetheli ePatterson sokudlule iminyaka engu-30 omunye udade wabuya wazobingelela uRuby. Kwakuyindodakazi yentombazana leyana eyayifunde loRuby. Indodakazi le lomkayo babeseklasini yeGiliyadi yesi-100.

Isiqinti sesibili esasihambelayo sasiseFlorida. Ngalesosikhathi kwasekudingeka ukuthi sibe lemota yikho sathola eyinye eyayitshiphile. Kodwa ngeviki yokuqala nje imota le yaba lohlupho. Sasingelamali yokuyilungisisa. Ngafonela omunye umzalwane engangicabanga ukuthi angasincedisa. Watshela esinye isisebenzi sakhe ukuthi siyilungise njalo wala ukuthi sibhadale. Waphinda wasinika lemali yokuthi sithenge esikufunayo. Lesi kwakuyisibonelo esihle esitshengisa indlela uJehova anakekela ngayo izinceku zakhe. Safunda ukuthi kumele sibe lomusa kwabanye.

Sasihlala ezindlini zabazalwane nxa sihambela amabandla. Lokhu kwenza saba labangane abanengi. Ngelinye ilanga ngatshiya umbiko webandla uphakathi kwe-typewriter. Ngathi ngiphenduka ngafica indodana yemuli esasihlala layo eyayileminyaka emithathu isihlabe yahlaba amabhathani e-typewriter. Ngangihlala ngimqala ngisithi wangincedisa ukuqedisa umbiko wami.

Ngo-1971 samangala sithola incwadi yokuthi ngibe ngumbonisi wesigodi edolobheni leNew York. Sathi siqalisa umsebenzi lo ngangileminyaka engu-34 kuphela. Lanxa ngangingumbonisi wesigodi wokuqala ongumuntu omnyama endaweni le, abafowethu bangamukela kuhle.       

Iviki ngayinye ngangikholisa ukufundisa emihlanganweni yesiqinti njengoba ngangingumbonisi wesigodi. Kwakulababonisi beziqinti abanengi abasebeleminyaka eminengi ukwedlula mina behambela. Omunye wabo wayenikele inkulumo ngesikhathi ngibhabhathizwa. Kanti njalo omunye kwakungumfowethu uTheodore Jaracz owacina eselilunga leQula Elikhokhelayo. Kwakulabanye abafowethu abasebelesikhathi eside bekhonza ababesebenza eBhetheli yaseBrooklyn. Kwangithokozisa ukuthi ababonisi beziqinti kanye lalabo ababesebenza eBhetheli bangenza ngasebenza ngikhululekile. Ngazibonela ukuthi babengabelusi ababezithanda izimvu zikaJehova njalo ababelithemba iLizwi likaNkulunkulu futhi beyisekela inhlanganiso yakhe. Kwaba lula ukuthi ngibe ngumbonisi wabo wesigodi ngenxa yokuthi babethobekile.

Ngo-1974 iQula Elikhokhelayo lakhetha abanye ababonisi beziqinti ukuthi babe ngababonisi bezigodi. Yikho mina ngabuyela ekubeni ngumbonisi wesiqinti. Kwathiwa siyehambela isiqinti seSouth Carolina. Ngalesosikhathi abafowethu abamnyama labamhlophe basebevunyelwa ukuhlangana ndawonye. Lokhu kwabathokozisa abazalwane.

Ngo-1976 ngaqalisa ukuhambela isiqinti esasiseGeorgia, phakathi kwe-Atlanta leColumbus. Ngisakhumbula nginikela inkulumo yomngcwabo yabantwana abangu-5 abansundu ababefe ngesikhathi indlu yangakibo ijikelwe ibhomba. Unina walimala njalo walaliswa esibhedlela. Abazalwane abanengi abamnyama labamhlophe babebuya esibhedlela ukuzoduduza abazali babantwana laba. Ngazibonela ukuthi abafowethu labodadewethu bayathandana kakhulu. Uthando olunjalo luyanceda ukuthi abazalwane baqinisele nxa besebunzimeni.

Ngo-1977 sacelwa ukuthi siyencedisa eBhetheli eseBrooklyn okwenyanga ezithile komunye umsebenzi owawusenziwa. Umsebenzi lo wathi ususiyaphela, amalunga amabili eQula Elikhokhelayo asicela ukuthi siqhubeke sisebenza eBhetheli. Savuma.

Okweminyaka engu-24 ngasebenza kuHlangothi Lwenkonzo. Izikhathi ezinengi abafowethu abakuhlangothi lolu baphatha izindaba ezinzima njalo baphendule lemibuzo ehluphayo. Kodwa iQula Elikhokhelayo liqhubeka lisinika iziqondiso ezisekelwe eBhayibhilini ezisinceda ukuthi siphendule imibuzo le. Kanti njalo iziqondiso lezo ziyasetshenziswa ukuze kuqeqetshwe ababonisi beziqinti, abadala kanye lamaphayona. Ukuqeqetshwa lokhu sekuncede abazalwane abanengi ukuthi babeseduze kakhulu loJehova njalo sekwenze inhlanganiso kaJehova yathuthuka.

Kusukela ngo-1995 kusiya ku-2018 ngangivakatshela amagatsha atshiyeneyo ngingummeli ovela emawofisini amakhulu. Ngangixoxa labafowethu abakumakhomithi amagatsha, abasebenza eBhetheli kanye labanali ukuze ngibakhuthaze njalo ngibasize kuloba yibuphi ubunzima abahlangana labo. Kusikhuthazile ukuzwa lokho abafowethu labodadewethu abahlangana lakho empilweni. Ngisakhumbula size sivakatshele eRwanda ngo-2000. Sathinteka kakhulu sisizwa abafowethu besilandisela lokho ababekubonile ngesikhathi kubulawa abantu abanengi eRwanda ngo-1994. Abanengi babefelwe yizihlobo zabo kodwa kungelani lobunzima ababedlule kubo babelokhu belokholo, belethemba njalo bethokoza.

Khathesi sesileminyaka edlula 80. Okweminyaka engu-20 edlulileyo bengililunga leKhomithi Yegatsha yase-United States. Lanxa ngingazange ngiye eyunivesithi, sengithole imfundo ephezulu kakhulu enhlanganisweni kaJehova. Lokhu sokungenze ngenelisa ukufundisa abanye iqiniso eliseBhayibhilini elizabanceda kuze kube nini lanini. (2 Khor. 3:5; 2 Thim. 2:2) Ngibonile indlela iBhayibhili elincede ngayo abantu ukuthi baphile impilo engcono kakhulu lokuthi bamthande uNkulunkulu. (Jak. 4:8) Loba nini nxa mina lomkami sithola ithuba, siyabakhuthaza abanye ukuthi baqakathekise isibusiso sokufunda ngoJehova kanye lesokufundisa abanye iqiniso eliseBhayibhilini. Lesi yisibusiso esikhulu inceku kaJehova engaba laso.