Na ebandeli ti bulu ti 1940, Atɛmwɛ tɛ Yehova ndo mandandó Ngbangɔ na awa dũngɔ mbi. Kanda ala ziandó mandangɔ ye ni, abɛse ngaso ko, mama tɛ mbi ngbãndó lá kwɛ mungɔ Linɔngi ti Sinzili ná Lamuka! Mbi ná azi ti ndasewa tɛ e, e yendó gwengɔ kota bombi mɛndó ali tɛrɛ lo ka États-Unis na bulu ti 1950.

Nyi ngoi yakere na pɛ ni, nyita Lawrence Jeffries bandandó gangɔ fangɔ tɛ ka tɛ e. Lo bandandó zangɔ mbi ya mbi hĩnga mbilimbili. Na ebandeli, mbi pandó hɛ̃ lo ya, ale Atɛmwɛ tɛ Yehova ndo hɛ̃ nga ti la na ya kpale ti politikɛ wa ala ndo gwe nga to, ta mbi ndo yendó ndenge mɛ ala ndo kɛ̃ gwengɔ to ma. Mbi pandó hɛ̃ lo ya, se azi zu mɛ ndo du ge Amerika akɛ̃ gwengɔ to, awa kula na mungɔ kɔdɔrɔ tɛ e, wa la nga na kongɔ ndo e. Na yɔngɔrɔ bɛ zu nyita Jeffries hũndandó mbi ya: “Mɔ da bɛ mɔ ya nɛ, se du ya, azi zu mɛ ndo du ge ya kɔdɔrɔ ti Amerika ati awa kwa tɛ Yehova, ye mɛ lo na lingɔ se awa kula abi to tɛrɛ la nɛ?” Dangɔ bɛ tɛ lo na ndo kpale niko nga na akpale mɛndɛ̃ azandó mbi, mbi hũ ya, ta mbi na rɛzɔ̃ ma. Ni lindó ya, mbi banda hɛ̃ngɔ tɛrɛ mbi gba na ya kpale mɛ aba mandangɔ mbilimbili ti ya Ngbangɔ.

Mbi mundó ngoi gba ti dingɔ Linɔngi ti Sinzili ná Lamuka! mɛndó mama tɛ mbi kpã ni kaya shambrɛ ti da tɛ e mɛ ka gbɛ sese. Na ya ngoi niko, mbi gbɔ̃ndó ndani ya, mbi ndo manda mbilimbili, ni la mbi yendó mandangɔ Ngbangɔ ná nyita Jeffries. Mbi banda ngandó gwengɔ bombi bi zu. Mbilimbili ti ya Ngbangɔ agbɔ̃ndó bɛ mbi, na lo ni la, mbi tindó wa fangɔ tɛnɛ. Mbi gbinyangbindó mikanɔ tɛ mbi na ngoi mɛndó mbi gbɔ̃ nda ni ya “kota bi tɛ Yehova angba dã.” (Sef. 1:14) Na se lɛ gwengɔ univɛrsite ko, mbi mundó ekateli ti zangɔ azi ya, ala hĩnga mbilimbili ti ya Ngbangɔ.

 Mbi mundó diplome tɛ mbi ti Ecole sɛgɔ̃dɛrɛ na 13/06/1956, wa bi taa na gesi mbi mundó batisimɔ na kota bombi kɔi ti kɛlɛ kɛlɛ. Mbi hĩngandó ya, mbi na luangɔ anzɔ̃ kpale gba ka tɛ Yehova na lo mɛ ya, mbi mu ekateli ti hɛ̃ngɔ dungɔ lɛ ngɛ̃́ tɛ mbi so mandangɔ nga na hangɔ na azi mɛndɛ̃ kpale mɛ aba lo

Nzɛ mana na pɛ batisimɔ tɛ mbi, mbi tindó wa sungɔ lége ti ngoi zu. Kaya Mosala ya Bokonzi ti 12/1956 bɛli tɛnɛ kɔi pandó ya, “Okoki kokende kosakola na esika oyo mposa ya basakoli ezali mingi?” Mbi hũndo ya, kpale niko aba nga mbi. Mbi ndó na gwɛ̃ ti hɛ̃ngɔ ti mbi kaya kɔdɔrɔ mɛndó ta awa fangɔ tɛnɛ da gba ma.​—Mat. 24:14.

Mbi gwendó ka Edgefield kɔdɔrɔ mɛ ka Caroline ti Sud. Bombi niko bondó na awa fangɔ tɛnɛ siɔ gɛgɛrɛ. Na ngoi mɛndó mbi diri kai ko, e tindó kũ. E ndo lindó bombi ka yada tɛ nyita kɔi. Nzɛ zu mbi ndo lindó ngoi 100 na ya kwa ti fangɔ tɛnɛ. Mbi ndó na kwa gba na lo mɛ ya, mbi ndó la mbi ndo tambwisa kwa ti fangɔ tɛnɛ nga lingɔ adiskur. Na lo mɛ ya, mbi ndo lindó kwa gba ko, mbi ndo manda ngandó aye gba na ndo Yehova.

Wali kɔi mɛndó mbi ndo manda na lo Ngbangɔ ko, lo ndó na da kɔi mɛ ando to na kĩnda ka da. Na songo zu, lo hɛ̃ndó mbi kwa kɔi mɛndó ando za mbi gba nvɛ̃ni, wa lo zi ngandó lége ya, e salela da tɛ lo kɔi mabere da ti Lo-lengɔ Gbia.

Nyita kɔli Jolly Jeffries, nyingambi tɛ nyita Lawrence Jeffries mɛndó wa mandangɔ Ngbangɔ na mbi, alondó ka États-Unis aga ti nɛngɔ ya, e li kwa tɛ awa sungɔ lége ndoni kɔi. E ndo dundó kaya da kɔi ti yakere mɛndó nyita kɔi hɛ̃ e

Ka Sud ti États-Unis ko, ando futandó azi na falanga mɛ yakere nvɛ̃ni. A ndo futandó e na dolarɛ sɛ bere taa na lo ti kwa mɛ e li na bi kɔi. Lá kɔi mbi salelandó falanga ti ndani mɛndó mbi na ni ti nɛngɔ ya, mbi vɔ̃ na tɛ ti tɛngɔ kaya butikɛ kɔi. Ngoi mɛndó mbi lo kaya butikɛ ni mbi si ko, kɔli kɔi hũndandó mbi ya: “Mɔ na gwɛ̃ ti kwa ti lingɔ? Mbi na futangɔ mɔ dolarɛ kɔi na pɛ ngoi kɔi ti kwa.” Lo hɛ̃ndó mbi kwa ti yɔngɔ ndo kɔi mɛ ando li na kwa ti kĩngɔ da, mbi lindo na pɛ bi taa. Mbi hũndó yangondo ya, Yehova ndo za mbi ti nɛngɔ ya, mbi ngbã ka Edgefield. Abɛse ta mbi ndó na falanga gba ma ko, mbi gwendó kota bombi mɛ ali tɛrɛ lo ka États-Unis na bulu ti 1958.

Na bi ti sɛ ti kota bombi, ye kɔi ti ngbondoni alindó tɛrɛ lo. Mbi tengbindó na Ruby Wadlington, mɛ ndo li kwa mabere wa sungɔ lége ti ngoi zu ka Gallatin mɛ ka Tennessee. Na lo mɛ ya, e zu e ndó na gwɛ̃ ti lingɔ kwa ti misiɔnɛrɛ ko, e gwendó bombi mɛ ando li ni na lo tɛ azi mɛ aye lingɔ kalasi ti Galaad. Na gesi e bandandó tɛnɛngɔ tɛnɛ na lége ti ambeti. A ilindó mbi ya, mbi gwe mbi li diskur ka Gallatin. Mbi salelandó libaku niko ti nɛngɔ ya, mbi hũnda Ruby ya, e dungbi. Mbi dirindó kaya bombi tɛ a Ruby wa e dungbindó na bulu ti 1959.

Na ngoi mɛndó mbi na bulu 23 ko, ahɛ̃ndó mbi kumba tɛ wa zangɔ bombi (mɛ ndɛ e ndo ili ni ya, wa bangɔ kwa ti bombi tɛ abiazi) kaya bombi ti  Gallatin. E ndó la e du bombi ti uzu mɛ nyita Charles Thompson aga ti bangɔ ni, na ngoi mɛndó lo ti wa bangɔ ndo kɛlɛ kɛlɛ fãnani. Lo ndó na experiãsɛ gba; abɛse ngaso ko, lo hũndandó dangɔ bɛ tɛ e na ndo ye mɛ ayata na gwɛ̃ ni nga na se mɛndó awa bangɔ ndo kɛlɛ kɛlɛ mɛndɛ̃ ali ti nɛngɔ ya, ala za ayata. Mbi luandó wangɔ ka tɛ lo ya, ale zo hĩnga akpale zu nzɔ̃ni uzu ti lo mungɔ ekateli kɔi ngaso.

Na nzɛ ti kũ bulu ti 1964, ailindó mbi ya, mbi li kalasi ti Lo-lengɔ Gbia mɛndó na lingɔ Nzɛ Kɔi ka South Lansing mɛ ka États-Unis. Kalasi niko azandó mbi ya, mbi ti na gwɛ̃ kpengbani ti hĩngangɔ akpale gba na ndo Yehova wa mbi ti nga nyita mɛ kpengbani na ya nyingɔ.

Mbi ná Ruby e luandó kumba ti bangɔ ndo kɛlɛ kɛlɛ na bulu ti 1965. E ndó na kumba ti bangɔ abombi gba bandangɔ ka Knoxville mɛ ka Tennessee tee ka Richmond mɛ ka Virginie. Ni mu ngandó abombi ti Caroline ti Nɔrd ná Kentucky, nga na Ouɛstɛ ti Virginie. Mbi ndo ba bondó bombi mɛ ayata mɛ ambina azi na lo mɛ ya, na ngoi nikondó ko, kangbi mɛ ka popo tɛ ambina azi ná ambuzu alindó ya, ta ala ndo bombi tɛrɛ ndoni kɔi ma. Ta ayata ndó na aye ti mi gba ma, wa e mandandó kangbingɔ aye mɛ e na ni na azi mɛ na gwɛ̃ ni. Nyita kɔi mɛndó ali kwa ti bangɔ ndo kɛlɛ kɛlɛ abulu gba apandó hɛ̃ mbi ya: “Du nyita. Ta mɔ gwe ka tɛ ayata ti ya bombi nga ma patrɔ ma. Mɔ lengbi ti zangɔ ala se du ya ala ndo hũ mɔ ya, mɔ du nyita ani.”

Na ngoi mɛndó e gwe ti bangɔ bombi kɔi ti yakere ko, Ruby bandandó mandangɔ Ngbangɔ na nyi wali kɔi ti palanga mɛndó na nyingambi kɔi ti wali mɛ na bulu kɔi so ti lo. Na lo mɛ ya, ta nyita kɔi ti ya bombi alengbindó ti mandangɔ na lo Ngbangɔ ma ko, Ruby ndo mandandó na lo na lége ti sungɔ hɛ̃ lo ambeti. Ngoi mɛndó e ga ti bangɔ bombi niko fãni mɛndɛ̃ ko, nyi wali niko gandó abombi zu. Ayata wali sɛ mɛ awa sungɔ lége ti ngoi zu adirindó kai, ni la, ala bandandó mandangɔ na lo Ngbangɔ, ngoi yakere so pɛ ni, lo mundó batisimɔ. Na pɛ abulu bere 30 na gesi, na bulu ti 1995, nyita wali kɔi ti palanga fandó tɛrɛ lo na Ruby ka Bethel ti Patterson. Lo du nyingambi tɛ nyi wali mɛndó Ruby manda na lo Ngbangɔ. Nyingambi niko ná kɔ lo aga kalasi ti Galaad ti fãni ti 100.

Ndo ti sɛ mɛndó e li na kwa ti bangɔ ndo kɛlɛ kɛlɛ ka da adu ka kɔdɔrɔ ti Floride. Kai ayɔndó ya, e du na kamiɔ̃, ni la e vɔ̃ndó kamiɔ kɔi na ngele ti nzɔ̃ni nvɛ̃ni. Kanda bo na pɔsɔ ti uzu, karbiratɛrɛ ni agbɛ̃ndó. Ta e ndó na falanga ti lɛkɛngɔ na ni ma. Ni la, mbi ilindó nyita kɔi mɛndó mbi da bɛ mbi ya, lo lengbi ti zangɔ e. Nyita niko tondó wa kwa tɛ lo kɔi ya, lo ga lo lɛkɛ kamiɔ ni wa lo kɛ̃ndó ya, ta e hɛ̃ lo falanga na lo ti kwa ni ma. Lo pa bondó hɛ̃ e ya, “Ta ĩ lengbi ti futangɔ mbi ma.” Kutu lo hɛ̃ndó e falanga! Ni dundó se lɛlo ti nzɔ̃ni mɛ ndo fa se mɛ Yehova ndo kokisa na gwɛ̃ tɛ awa kwa tɛ lo. Ni ndo zandó e ngoi zu ya, e ndo fa songo na azi mɛndɛ̃.

Ndo zu mɛndó e ndo gwe da ti bangɔ bombi ko, e ndo dundó kaya da tɛ ayata. Ni lindó ya, e ti na akwa ti nzɔ̃ni nvɛ̃ni. Lá kɔi mbi ndo sundó rapɔrt mɛ aba bombi kɔi, mbi ziandó ni so lɛ masini ti sungɔ na mbeti mbi si, ta mbi dɛndó mbi honzi sungɔ ni ma. Na ngoi mɛndó mbi diri kaya da na ndɔ ko, apando hɛ̃ mbi ya, nyingambi kɔi ti kɔli ti bulu taa ti yada mɛndó e ka da ahonzi sungɔ rapɔrt ni hɛ̃ mbi, na ndenge mɛndó lo pɛtɛ lɛ masini kili kili wa rapɔrt ni agbɛndó. Mbi ndo giandó lo na tɔngɔ sasa tɛrɛ lo na lo ti rapɔrt niko na pɛ abulu gba.

Na bulu ti 1971, mbi luandó kumba ti lingɔ kwa mabere wa bangɔ ndo distrikɛ ka kɔdɔrɔ ti États-Unis. Ni kamwisandó e gba nvɛ̃ni! Mbi ndó na bulu 34 gɛgɛrɛ. Ayata yambandó mbi wa bangɔ ndo kɛlɛ kɛlɛ tɛ la uzu mɛ mbina zo na dengɔ bɛ nvɛ̃ni.

Na lo mɛ ya, mbi ndó wa bangɔ ndo distrikɛ ko, mbi ndo mandó dengɔ bɛ ti hangɔ kpale mɛ aba Yehova pɔsɔ zu na ngoi ti kota bombi ti kɛlɛ kɛlɛ. Ambanga awa bangɔ ndo kɛlɛ kɛlɛ mɛndɛ̃ ndó na experiãsɛ gba aɔ tɛ mbi. Kɔi ka popo tɛ la ndó la ali diskur ti batisimɔ tɛ mbi. Na gesi nyita Theodore Jaracz kɔi ka popo tɛ awa bangɔ ndo kɛlɛ kɛlɛ niko, atindó kɔi tɛ ayata ti ya Bombi tɛ Adonzi. Ayata gba mɛndó na experiãsɛ ndo li ngandó kwa ka Bethel ti Brooklyn. Mbi ndo hɛ̃ awa bangɔ ndo kɛlɛ kɛlɛ ná ayata mɛndó ndo li kwa ka bethel sia kɔli na ndenge mɛndó ala Ii ya, ta mbi kpɛ mbɛtɔ ma. Mbi hũndó yangondo ya, ala du awa batangɔ ngasã ti songo mɛ ndo kpã lɛ la na ndo tɛnɛ tɛ Nzapa ti nɛngɔ ya, ala hɛ̃ ti la hɛ̃ linɔ tɛ Nzapa. Seliye tɛ la ti zungɔ na tɛrɛ  azandó mbi ya, mbi li kwa tɛ mbi ti bangɔ ndo kɛlɛ kɛlɛ na ndenge ti nzɔ̃ni.

Na 1974 Bombi tɛ Adonzi ahɛ̃ndó awa bangɔ ndo kɛlɛ kɛlɛ mɛndɛ̃ kumba ti bangɔ ndo distrikɛ, ni la mbi dirindó ka lɛ kwa ti bangɔ ndo kɛlɛ kɛlɛ fãni mɛndɛ̃, atondó mbi ka Caroline ti Sud. Kpale ti dengɔ bɛ, ta kangbindó na popo tɛ ambunzu na ambina azi adi dɛndó da ma, ayata lengbindó ti lingɔ bombi ndoni kɔi, ni hɛ̃ndó ayata dengɔ bɛ gba.

Na nda bulu ti 1976, atondó mbi nga ma wa bangɔ ndo kɛlɛ kɛlɛ ka Georgie. Ayɔndó ya, e li kwa na ya abombi mɛ na popo ti Atlanta ná Columbus. Mbi ndo da bɛ mbi fãni mɛndɛ̃ na lá mɛndó mbi li na diskur ti kwá tɛ ayangambi kũ tɛ ambina azi mɛndó ala kpili na lo mɛ ya, abandi azɔndó da tɛ la. Mama tɛ la lindó da yɔrɔ na lo mɛ ya, lo hɔ̃ndó kã kpengbani. Ayata mɛ ambuzu ná ambina azi ndo gwendó bi zu so bangɔ ala ka darɔrɔ so sangɔ ngunu bɛ la. Mbi hũndo se mɛ ayata ndo fa songo tɛ la yangondo. Na ngoi mɛ ayata ndo fangbi songo ti ngaso na popo tɛ la ko, ala lengbi ti gbengɔ bɛ la na kpengba kpale abɛse adu ti ngasia.

Na bulu ti 1977 ayɔndó ka ti e ya, e diri ka Bethel ti nɛngɔ ya, e hɛ̃ ti e na ya kwa kɔi ngaso na pɛ nzɛ. Na ngoi mɛndó e onzi kwa niko, ayata sɛ ti ya bombi tɛ Adonzi ahũndandó mbi ná Ruby ya, se ye ko, e ngbã e li kwa ka Bethel. E yendó lingɔ kwa kai.

Mbi lindó kwa ka derpartema ti kwa na pɛ bulu 24, kai ayata ndo li kwa ti hɛ̃ngɔ agbinya na ndo ahũnda ti kpengbani nvɛ̃ni. Abulu gba, Bombi tɛ Adonzi ndo hɛ̃ e andia na landangɔ awangɔ ti ya Ngbangɔ. Ni ndo zandó e ya, e hɛ̃ gbinya ti ahũnda ti kpengbani, wa ni ndo zanga ti nɛngɔ ya, ahɛ̃ fɔrmasiɔ̃ hɛ̃ awa bangɔ ndo kɛlɛ kɛlɛ, abiazi nga na awa sungɔ lége. Andia niko nga na afɔrmasiɔ̃ niko ndo za azi gba ya, ala mai na ya nyingɔ. Ni ndo li ya, linɔ tɛ Yehova adu kpengbani.

Bandangɔ na 1995 tee 2018, mbi ndo bandó abiro ti filiale ndɛ̃ ndɛ̃ ndɛ̃ na lo mɛ ya, mbi ndo lindó kwa mabere momonisi ti biro ti kotani mɛndó ando ili ni ya, wa bangɔ ndo zɔnɛ. Mbi tengbindó na ayata mɛ ndo li kwa ka komite ti filiale, ayata mɛ ndo li kwa ka Bethel, nga na amisiɔnɛrɛ so sangɔ ngunu bɛ la nga zangɔ ala na ya akpale mɛ ala ndo tengbi na ni. Experiãsɛ tɛ ayata mɛndó e tengbi na ala ndo sa ngandó ngunu bɛ mbi ná Ruby. Na ndakisa e gwendó ti bangɔ filiale ti Rwanda na bulu ti 2000. Pandɛ ti se mɛndó ayata ti ndasewa ti Bethel aso kwá na ngoi ti to na bulu ti 1994 agbɔ̃ndó bɛ e nvɛ̃ni. Azi ti ndasewa tɛ ayata gba ka popo tɛ ayata akpilindó. Abɛse na ya kpengba kpale mɛndó ala ndo tengbi na ni ko, ayata ndo fandó loyengɔ, ala ndo kpãndó bɛ la ka tɛ Yehova, wa ala ngandó na dengɔ bɛ.

Ndɛ lo mɛ ko, e na bulu bere ɔngɔ 80. Na ya abulu 20 mɛ alo ti ɔngɔ, mbi li kwa kaya Komite ti filiale ti États-Unis. Na ya dungɔ lɛ ngɛ̃́ tɛ mbi, ta mbi li univɛrsite ma; kanda, mbi lua fɔrmasiɔ̃ ti nzɔ̃ni nvɛ̃ni ka tɛ Yehova ná linɔ tɛ lo. Ni za mbi ya, mbi ha na azi mɛndɛ̃ mbilimbili ti ya Ngbangɔ mɛ na hɛ̃ngɔ ala nzɔ̃ kpale ti bwai na bwai. (2 Kɔr. 3:5; 2 Tim. 2:2) Mbi nvɛ̃ni mbi hũ se mɛ mbilimbili ti ya Ngbangɔ aza azi gba ya, ala lɛkɛ se du tɛ la wa ala ti na mangbi ti nzɔ̃ni ná Wa lingɔ ala. (Zaki. 4:8) Ngoi zu mɛ mbi na Ruby e ndo lua lége ti lingɔ ni ko, e ndo li zu ti sangɔ ngunu bɛ azi mɛndɛ̃ ya, ala mu nzɔ̃ tangɔ li gɛrɛ mɛ ala na ni ti mandangɔ kpale mɛ aba Yehova nga na hangɔ azi mɛndɛ̃ mbilimbili ti ya Ngbangɔ ya, adu ngbondoni​—ni la adu ndima ti kotani mɛ Yehova hɛ̃ awa kwa tɛ lo!