Ipeujyan 1940, iteixpantijkauan Jehová opeuj kinmachtiaj notajuan. Sakin okikajkaujkej ika nomachtiaj, maski ijkon, nonan kinseliaya revistas Amatl Tekakistilijketl niman ¡Xtlachiakan! Ipan 1950, nejua iuan nochanejkauan otiajkej ipan se ueyi tlanechikojli imiuan miyekej países tlen onopanolti Nueva York.

Sakin, tokniuj Lawrence Jeffries opeuj techontlajpaloua niman opeuj nechmachtia. Kachtopa, nejua xnikuelitaya ika iteixpantijkauan Jehová xnokalaktiaj ipan política nion xkinekij yaskej ipan guerra. Nejua nikijliaya tokniuj ika tla nochimej akin chantij Estados Unidos xkinekiskiaj yaskej ipan guerra, totlauelikniuan ueliskiaj kalakiskej ipan topaís. Tokniuj Jeffries melak nechijyouiyaya niman nechtlanemililtiaya. Yejua nechijliaya: “¿Tlenon kichiuaskia Jehová tla nochimej akin chantij Estados Unidos kitekichiuiliskiaj niman uajlaskiaj intlauelikniuan?”. Nochi tlen onechijli onechititi ika ninopopolojtoya, niman yejon onechpaleui más manikneki maninomachti.

Melak oniuejkauj onikinamapouj revistas Amatl Tekakistilijketl niman ¡Xtlachiakan! tlen nonan yokinmeyeujka. Sakin, onikasikamat ika tlen niueltoya yejon tlen melauak, ika yejon, oniknek manechmachti tokniuj Jeffries. Noijki opeuj niauj ipan nochi tlanechikoltin. Melak nikuelitaya tlen ninomachtijtoya, niman sakin oninochiuj tenojnotsketl. Ijkuak onikasikamat ika “itonal Jehová iyejkotika”, onopatlak tlen kachtopa niknekiya nikchiuas (Sof. 1:14). Aman xok niknekiya nias universidad, aman niknekiya nikinpaleuis oksekimej mauelikan tlen melauak temachtia Biblia.

Otlan ninomachtia ipan escuela ipan 13 de junio de 1956 niman yeyi tonajli sakin oninoapolakti ipan se ueyi tlanechikojli. Ijkuakon nion xniknemiliaya kenon nechteochiuaskia Jehová pampa oniktlapejpeni  ninomachtis Biblia niman nitemachtis tlen melauak.

Ijkuak oninoapolakti opanok chikuasen metstli niman oninochiuj precursor. Ipan amatlajkuilojli Totekiyo itech Tekiuajyotl tlen okis ipan diciembre de 1956 ika inglés, kipiaya se tlamachtijli kampa kinyolchikauaya nochimej tokniuan matlapaleuitij kampa nonekiyaj más tenojnotskej. Yejon tlen nejua niknekiya, niknekiya nontlapaleuis kampa xmiyekej nemiyaj akin tenojnotsayaj (Mat. 24:14).

Kuakon oniaj Edgefield (Carolina del Sur) ipan se tlanechikojli kampa san nemiyaj nauimej tenojnotskej. Ijkuak ompa onajsik, timakuiltin katkaj. Tikinpanoltiayaj tlanechikoltin ichan se tokniuj niman nochi metstin nitenojnotsaya 100 horas. Nochipa nitenojnotsaya, nikchiuaya tekitl tlen nechmakayaj ipan tlanechikojli niman nikinyektlaliaya tlamachtiltin tlen nikinpanoltiaya. Ijkuak más niktekichiuiliaya Jehová, más itech niueliya.

Nikmachtiaya se siuatsintli akin kipiaya se funeraria ne Johnston, se kalpan tlen nisiuj onkatka kampa ninemiya. Yejon siuatsintli onechmakak tekitl niman otechtlaneujti se ikal para ompa matosentlalikan.

Kampa tichantiyaj xueyi techtlaxtlauiliayaj ipan se tonajli. Techtlaxtlauiliayaj san ome noso yeyi dólar. Sejpatsin, onikouato tlen nijkuas niman ompa otlan nochi notomin. Ijkuak oniuajkis kampa onitlakouj, se tlakatsintli onechnisiui niman onechtlajtolti: “¿Tikneki titekipanos? Ipan se hora nimitstlaxtlauilis se dólar”. Yeyi tonajli onikpaleui. Onitlachipauj kampa nokaltijtoya. Nochi yejuin onechititi ika Jehová kinekiya manitlapaleui Edgefield. Maski ouijtika ken tichantiyaj, ouel oniaj ipan ueyi tlanechikojli iuan miyekej países tlen onopanolti ipan 1958 ne Nueva York.

Ika ome tonajli itech toueyitlanechikol opanok itlaj tlen xkeman nikilkauas. Onikixmat Ruby Wadlington, akin noijki precursora regular katka ne Gallatin (Tennessee). Tiomemej tiknekiyaj tiyeskej misioneros, ika yejon, otiajkej kampa okinsentlalijkaj akin kinekiyaj yaskej Galaad. Sakin opeuj totlajkuilouiliaj. Sejpatsin onechnotskej manikpanoltiti se tlamachtijli ne Gallatin. Ijkuak ompa oniaj, xoniometlamat, nimantsin oniktlajtolti Ruby tla kinekiya nouan nonamiktis. Sakin, onipanok ipan itlanechikol, niman otonamiktijkej ipan 1959.

Nikpiaya 23 xiuitl ijkuak onechtlalijkej ken siervo de congregación (noso ken aman noixmati akin kixeloua tekitl itech tlayekankej) ne Gallatin. Ijkuakon okinpatlakej tlayekankej akin kintlajpalouaj tlanechikoltin, niman tokniuj Charles Thompson yejua akin kachtopa otechtlajpalo. Yejuin tokniuj melak youejkaujka ipan ikalpan toTajtsin. Maski ijkon, onechtlajtolti tlenon kinpolouaya tokniuan niman tlenon okichiujkej oksekimej tlayekankej akin kintlajpalouayaj para kinpaleuiskej. Yejua onechmachti ika melak tepaleui tla titetlajtoltiaj achto itlaj tikchiuaskej.

 Ipan mayo de 1964, onechnotskej ipan Tlamachtijli itech iTekiyo Tekiuajyotl tlen ouejkauj se metstli niman onopanolti ne South Lansing (Nueva York). Akin onechmachtijkej onechpaleuijkej más manikneki niuelis itech Jehová niman más manikchikaua notlaneltok.

Ipan enero de 1965, onechnotskej manitlapaleuiti ken tlayekanketl ipan circuito iuan Ruby. Melak miyek tlanechikoltin tikintlajpaloskiaj pampa tipeuaskiaj desde Knoxville (Tennessee) niman titlamiskiaj hasta Richmond (Virginia). Noijki tikintlajpalouayaj tlanechikoltin Carolina del Norte, Kentucky niman Virginia Occidental. San tikintlajpalouayaj tlanechikoltin kampa nemiyaj tokniuan kapotstikej pampa nikan Estados Unidos melak nochikoitayaj. Tokniuan kapotstikej xueliyaj nosentlaliayaj imiuan tokniuan akin chipaujkej. Tokniuan xmiyek tlen kinopiliayaj, ika yejon, otikitakej ika nonekiya tikinmakaskej seki tlen tikpiayaj. Se tokniuj akin youejkaujka tlapaleuiaya ken tlayekanketl ipan circuito onechmachti itlaj tlen ueyi kijtosneki. Onechijli: “Ijkuak tajsis ipan se tlanechikojli xkita ika maka mamitsitakan kentla tla tejua tikinyekana, pampa san uelis tikinpaleuis tokniuan tla mitsitaj ken imikniuj”.

Sejpatsin otitetlajpalotoj ipan se pitentsin tlanechikojli niman Ruby opeuj kimachtia se siuatsintli akin kipiaya se ikonetsin de se xiuitl. Pampa ipan tlanechikojli xakaj nemiya akin ueliskia kimachtis, Ruby san kimachtiaya ika cartas. Ijkuak oksejpa otitetlajpalotoj ipan yejon tlanechikojli, yejon siuatsintli touan onosentlali ipan nochi tlanechikoltin. Sakin, omemej precursoras ompa otlapaleuitoj niman yejuamej opeujkej kimachtiaj yejon siuatsintli hasta ijkuak onoapolakti. Opanok 30 xiuitl niman ipan 1995, ne Betel de Patterson, se tokniuj ichpochtli okinisiui Ruby niman okitlajpalo. Yejon ichpochtli ikoneuj katka siuatsintli akin Ruby okimachtijka itech Biblia. Ichpoch yejon siuatsintli niman iueuentsin ompa nemiyaj pampa kiseliskiaj iTlamachtil Galaad número 100.

Noijki otikintlajpalotoj tlanechikoltin tlen onkatkaj ne Florida. Ika yejon, tiknekiyaj se carro. Kuakon, otokouilijkej se tlen xpatioj katka. San ika, ipan kachtopa semana oijtlakauj ibomba kampa yauj atl, niman xtikpiayaj tomin para tikyektlaliskej. Onikilnamik se tokniuj akin ueliskia techpaleuis niman onikonots. Yejua okuajtitlan se itlakeual para makiyektlaliki tocarro niman xokinek matiktlaxtlauilikan. San otechijli: “San ijkon, xtlaj ninechuikiliaj”. Hasta otechtlayokoli tomin. Tlen okichiuj tokniuj otechititi ika Jehová kintlajpiya akin kitekichiuiliaj niman otechilnamikti ika nonekiya tiktemakaskej tlen tikpiayaj.

Ijkuak tikomintlajpalouayaj tlanechikoltin, nochipa tokauayaj inchan tokniuan. Ijkon kuajli otikimixmatkej tokniuan niman kuajli imiuan otouikakej. Se tonajli, nikijkuilojtoya ipan nomáquina de escribir se informe itech se tlanechikojli niman ompa onikaujteuj noamauj. Ika teotlak ijkuak onajsik, onikitak ika konetsintli akin ompa chantiya, akin kipiaya yeyi xiuitl, “yotlanka” kichijchiua informe. Ijkuak iuan nitlajtlajtouaya, nochipa techuetskitiaya tlen okichiuj.

Ipan 1971, onikseli se carta kampa nechijliayaj ika aman nontlapaleuiskia Nueva York ken tlayekanketl ipan distrito. Yejon melak otechmojkatlachialti. Nejua kemach nikpiaya 34 xiuitl ijkuak ompa otiajkej. Maski nejua akin kachtopa onechtlalijkej ken tlayekanketl ipan distrito akin kapotstik, tokniuan kuajli onechselijkej.

Ijkuak nitlayekanketl katka ipan distrito, melak nikuelitaya nitemachtis itech Jehová itlamiyan semana ipan uejueyimej tlanechikoltin. Miyekej tokniuan akin yayaj ipan yejuin uejueyimej tlanechikoltin más youejkaujkaj ken tlayekankej ipan circuito xijkon ken nejua. Se tokniuj hasta okipanolti tlamachtijli ijkuak oninoapolakti. Okse tokniuj, Theodore Jaracz, sakin otlapaleui ipan Grupo akin Tlayekana ipan nochi tlanechikoltin. Noijki ompa nemiyaj miyekej tokniuan akin youejkaujkaj tlapaleuiayaj Betel de Brooklyn. Melak nikintlasojkamachilia tokniuan tlayekankej ipan circuito niman betelitas pampa okichiujkej ika noyojlo maninomachili. Onikitak ika yejon tlayekankej melak tetlasojtlayaj, kineltokayaj iTlajtol toTajtsin niman kipaleuiayaj ikalpan toTajtsin. Pampa yejon tokniuan yolyemankej katka, xouijtika onikitak nitlayekanas ipan distrito.

Ipan 1974, Grupo akin Tlayekana ipan nochi tlanechikoltin okichiuj ika sekimej tlayekankej ipan circuito matlapaleuitij ipan distrito niman nejua oksejpa onechtitlankej ken tlayekanketl ipan circuito, san ika, aman ne Carolina del Sur. Melak otechyolpakti ika ipan yejon tonaltin tlanechikoltin niman circuitos xok xeliujtoyaj, niman tokniuan melak yolpakiyaj.

Itlamiyan 1976, onechtitlankej Georgia, ipan se circuito tlen onkatka nisiuj Atlanta niman Columbus. Xueli nikilkaua ijkuak makuiltin kokonej akin kapotstikej katkaj omijkej pampa okintlatilijkej inkal, niman nejua ononek nikpanoltis tlamachtijli ijkuak okintokakej. Innan kokonej ononek kuikaskej hospital pampa otlatlak. Ipan hospital miyekej tokniuan chipaujkej niman kapotstikej kominyolseuiayaj tajtin. Onikitak ika ipan ikalpan toTajtsin melak notlasojtlaj. Niman pampa totlasojtlaj, yejon tlen techpaleuiya matitlaxikokan ijkuak tikixnamikij tlen ouijtika.

Ipan 1977, otechijlikej tla ueliskia tiaskej Betel de Brooklyn seki metstli para tikonchiuaskej se tekitsintli. Ijkuak ititlamiskiaj yejon tekitsintli, omemej tokniuan akin tlapaleuiayaj ipan Grupo akin Tlayekana ipan nochi tlanechikoltin otechijlikej tla tikuelitaskiaj tokauaskej Betel niman otikimijlikej ika kema.

Ipan 24 xiuitl onitlapaleui ipan Grupo akin kiyekana itech ken notenojnotsa. Yejuin grupo kinankiliaj tlen tetlajtoltiaj oksekimej tokniuan niman miyekpa ouijtika tlen tetlajtoltiaj. Youejkauj ika Grupo akin Tlayekana ipan nochi tlanechikoltin kinmachtia tokniuan kenon kichiuaskej intekiyo niman kenon kikixtiskej itech Biblia tlen kijtoskej ijkuak tenankiliskej. Tlen tokniuan uelij ijkuak kinmachtiaj, kitekitiltiaj ijkuak kinankiliaj tlen tetlajtoltiaj tokniuan niman noijki ijkuak kinmachtiaj tlayekankej ipan circuito, tlayekankej ipan tlanechikoltin niman precursores. Nochimej tokniuan akin kinmachtiaj melak kinchikauiliaj intlaneltok, ika yejon, melak kuajli tlapaleuiyaj ipan ikalpan Jehová.

De 1995 al 2018, Grupo akin Tlayekana ipan nochi tlanechikoltin onechijli manikintlajpaloti seki sucursales. Ijkuak nikomintlajpalouaya, ninosentlaliaya imiuan grupos akin tlayekanaj ipan se sucursal, imiuan betelitas niman imiuan misioneros para nikinyolchikauas niman nikinpaleuis ika itlaj tlen kinajmanaya. Niman Ruby niman nejua noijki techyolchikauayaj yejon tokniuan ipampa tlen techijliayaj. Nikilnamiki ijkuak otitetlajpalotoj Ruanda ipan xiuitl 2000. Melak otechajman ijkuak tokniuan niman betelitas otechijlikej tlen okixnamijkej ipan 1994. Miyekej tokniuan onomijkatijkej. Maski ijkon, tokniuan yolpakiyaj, chikaujtoya intlaneltok niman kimatstoyaj ika oksejpa kimitaskiaj inchanejkauan.

Aman tikpiyaj más de 80 xiuitl. Ipan yejuin 20 xiuitl yonitlapaleui ipan Grupo akin kiyekana sucursal ipan Estados Unidos. Xkeman oniaj universidad, san ika, Jehová niman ikalpan melak kuajli yonechmachtijkej. Ika yejon, youel yonikimititi oksekimej tlen temachtia Biblia, niman yejon nochipa kinpaleuis (2 Cor. 3:5; 2 Tim. 2:2). Yonikitak kenon iTlajtol toTajtsin yokinpaleui tlaltikpakchanejkej mayolpakikan niman manouikakan iuan Jehová (Sant. 4:8). Ruby niman nejua nochipa tikinyolchikauaj oksekimej manomachtikan itech Jehová niman matemachtikan tlen melauak temachtia Biblia pampa yejon se ueyi tetlayokolijli tlen kipiya se itekipanojkauj Jehová.