Aum Aunfank von de 1940ja Joaren fungen Jehova siene Zeijen aun, met miene Elren de Bibel to studieren. Dee studieeden dan oba nich wieda, oba miene Mame kjrieech wieda dän Woaktorm un daut Woat waka!. Aune 1950 jeef daut en New York City eenen internazionalen Kongress, un miene Famielje neem de Enlodunk aun, doa hantowanken.

Fuaz no dän Kongress funk Brooda Lawrence Jeffries aun, ons to besieekjen. Hee proowd, mie von de Woarheit to lieren. Oba ieeschtlich wia ekj doa nich met envestonen, daut Jehova siene Zeijen biejlikj nuscht met de Politikj to doonen haben un nich dän Kjrich lieren. Ekj säd to am: “Wan kjeena enne Stäts wudd em Kjrich gonen, dan kunnen de Fiend komen un daut gaunze Launt ennämen!” Brooda Jeffries säd gaunz jeduldich to mie: “Waut denkjst du, waut wudd Jehova Gott doonen, wan aule Menschen enne Stäts am deenden, un de Fiend dan kjeemen dee auntojriepen?” Daut, waut hee äwa dit un äwa aundre Sachen säd, muak mie kloa, daut ekj em orrajchten wia. Dan wull ekj mea von de Schreft lieren.

Ekj läsd stundenlank de elre Tietschreften De Woaktorm un Woat waka!, waut miene Mame em Kjala haud. Met de Tiet kunn ekj enseenen, daut et de biblische Woarheit wia, waut ekj lieed. Dan wia ekj doamet envestonen, daut Brooda Jeffries met mie de Bibel studieed. Ekj funk uk aun, räajelmässich no de Toopkomes to wanken. Ekj jleicht daut  sea, waut ekj lieed, un ekj wort dan een Vekjindja von de goode Norecht. Daut, no waut ekj en mien Läwen sträwd, endat sikj, aus ekj enwort, daut “de groota Dach fa däm HARN . . . dicht bie” wia (Zef. 1:14). Enne Städ daut ekj mie wull huach utlieren loten, sträwd ekj doano, aundre de biblische Woarheit to lieren.

Dän 13. Juni 1956 wia ekj met de School derch, un dree Doag lota leet ekj mie opp eenen Kongress deepen. Don wist ekj noch nich, woo väl Säajnungen ekj von Jehova kjrieen wudd, wäajen ekj mie eenich jeworden wia, mie selfst un aundre von Jehova to lieren.

Sas Moonat no miene Doop funk ekj met dän Pioniadeenst aun. De Kjennichrikjsdeenst von Dezamba 1956 haud eenen Artikjel: “Kaust du doa deenen, wua mea Help fält?”. (Bloos opp Enjlisch to haben.) Ekj haud de Omstend, daut to doonen! Ekj wull doa methalpen, wua mau weinich wieren, waut prädjen deeden (Mat. 24:14).

Ekj trock no Edgefield, South Carolina. De Vesaumlunk doa haud bloos vea Vekjindja. Ekj wia de Fefta. Wie hauden Toopkomes en de meddelste Stow von eenen Brooda sien Hus. Jieda Moonat wia ekj 100 Stund em Deenst. Ekj wia sea drock, wäajen ekj jinkj em Prädichtdeenst de Breeda veraun un hilt Räden enne Toopkomes. Daut intressaunte wia, je mea ekj deed, je mea lieed ekj äwa Jehova.

Eene Fru, met dee ekj de Bibel studieed, haud en Johnston eene Kompanie, waut fa aundre Bejrafnisen utreed. Daut wia gaunz dicht bie. See wia soo goot un leet mie een poa Doag enne Wäakj fa ar schaufen. See jeef ons uk een Jebied, waut wie aus Vesaumlungshus brucken kunnen.

Brooda Jolly Jeffries, de Sän von dän Brooda, waut met mie de Bibel studieed, trock von Brooklyn, New York wajch un wie wieren toop Pionia. Wie wonden en eenen kjlienen Husträla, waut een Brooda ons lied.

De Dachloon wia em Sieden sea billich. Wie vedeenden bloos twee ooda dree Dola dän Dach. Opp eene Sauz koft ekj mie bie een Stua von mien latstet Jelt een bät Äten. Aus ekj rut jinkj, kjeem een Maun no mie un fruach: “Fält die Oabeit? Ekj tol die 1 Dola de Stund.” Fa dän kunn ekj dan dree Doag bie een Buwoakj schaufen un doa aules reinmoaken. Fa mie wia daut dietlich, daut Jehova mie holp, daut ekj kunn en Edgefield bliewen. Un ekj kunn aune 1958 mau rajcht no dän internazionalen Kongress en New York City wanken.

Dän tweeden Dach opp dän Kongress passieed waut gaunz besondret. Ekj lieed Ruby Wadlington kjanen, waut en Gallatin, Tennessee Pionia wia. Wäajen wie ons beid fa dän Missionoadeenst intressieeden, jinj wie no daut Toopkomen opp dän Kongress, waut fa de Gilead-School wia. Lota schreew wie ons dan omzajcht Breew. Opp eene Sauz looden se mie en, eene Räd to hoolen en de Vesaumlunk en Gallatin. Dee Jeläajenheit neem ekj dan woa un fruach Ruby, aus see sikj met mie befrieen wull. Ekj trock dan om no äare Vesaumlunk, un aune 1959 befried wie ons.

Aus ekj 23 Joa wia, wort ekj de Leida von de Eltestasch (vondoag dän Dach Plona von de Eltestasch) en Gallatin. Wie wieren de ieeschte Vesaumlunk, waut von Charles Thompson besocht worden aus Kjreisoppsechta. Hee haud väl Erfoarunk, oba hee fruach mie doawäajen no miene Meenunk äwa waut de Breeda fäld un woo aundre Kjreisoppsechtasch sikj om de Vesaumlungen kjemmaden. Von am lieed ekj, daut et emma goot es, ieescht to froagen un om de gaunze Sach omtoweeten, ea eena waut entscheiden deit.

En Mei aune 1964 wort ekj no de Kjennichrikjsdeenst-School enjelot, waut en South Lansing, New York wia un eene Moonat dieed. De Liera von de School holpen mie, daut ekj noch mea von Jehova lieren un stoakja em jeisteljen woaren wull.

En Jaunewoa aune 1965 kjrieejen Ruby un ekj de Enlodunk, em Kjreisdeenst to sennen. Wie kjrieejen eenen sea grooten Kjreis, waut von Knoxville, Tennessee meist bat Richmond, Virginia wia. Doatoo jehieeden Vesaumlungen en North Carolina, Kentucky un West Virginia. Oba ekj besocht bloos de Vesaumlungen met de schwoate Breeda, wiels to dee Tiet wia daut em Sieden vonne Stäts veboden, daut de schwoate un witte kunnen toop sennen. De Breeda hauden sea weinich em tieteljen, un wie lieeden daut, ons unjarenaunda uttohalpen. Een Kjreisoppsechta, waut aul lang en disen Deenst jewast wia, säd to mie: “Sie een Brooda fa dee. Wan du eene Vesaumlunk besieekjst, dan vehool die kjeenmol soo, aus wurscht du dee äa Wieet sennen. Du kaust dee bloos halpen, wan du an daut Jefeel jefst, daut du een Brooda fa dee best.”

Aus wie eemol eene kjliene Vesaumlunk besochten, funk Ruby aun, met eene Fru to studieren, waut een eenjoaschet Mejalkje haud. Aus dan kjeena von de Vesaumlunk met ar wiedastudieren kunn, deed Ruby daut wieda äwa Breew. Aus wie dan daut näakjste Mol de Vesaumlunk besochten, kjeem de Fru no jieda Toopkomen. Dan worden twee Sestren, waut Sondapionia wieren, no dise Vesaumlunk jeschekjt, un dee studieeden wieda met dise Fru. Nich lang no daut leet see sikj deepen. Rom 30 Joa lota, aune 1995, wia wie opp eene Sauz en daut Betel en Patterson. Dan kjeem doa eene junge Sesta Ruby bejreessen. Daut wia ea daut kjliene Mejalkje von dee Fru, met dee Ruby studieren deed! See wia met äaren Maun toop jroz bie de 100. Klauss von de Gilead-School.

Ons tweeda Kjreis wia enne Medd von Florida. To dise Tiet fäld ons eene Koa, un wie kunnen ons dan gaunz billich eene kjeepen. Oba en de ieeschte Wäakj, wua wie dee hauden, jinkj de Wotapomp twei. Wie hauden kjeen Jelt toom dee repäaren. Doawäajen fond ekj eenen Brooda, wua ekj docht, daut dee mie wudd kjennen halpen. Sien Oabeida kunn de Koa dan fiksen un hee säd, wie brukten am doa nuscht fa jäwen. Hee säd eefach: “Jie sent mie nuscht schuldich.” Hee jeef ons mau rajcht noch waut Jelt aus een Jeschenkj! Dit wees ons sea dietlich, woo Jehova fa siene Deena sorcht. Daut holp ons uk to vestonen, daut wie uk musten emma friejäwrich sennen.

Emma wan wie eene Vesaumlunk besochten, bleew wie bie de Breeda to Nacht. Doaderch kjrieej wie väl goode Frind. Opp eene Sauz haud ekj dän Berecht von de Vesaumlunk en miene Drekjmaschien jeloten, waut noch nich gaunz foadich wia. Aus ekj dän Owent trigjkjeem, haud de Famielje äa kjliena dreejoascha Jung dän Berecht gaunz volljeschräwen. Ekj nerkjt dän noch Joaren doamet.

Aune 1971 kjrieech ekj eenen Breef, daut ekj sull von nu aun aus Distrikjtoppsechta deenen en New York City. Wie wieren gaunz vebleft! Aus wie doa hantrocken, wia ekj noch mau 34 Joa! Ekj wia dee äa ieeschta schwoata Distrikjtoppsechta un de Breeda doa säden mie sea welkom.

Aus Distrikjtoppsechta jleicht ekj daut sea, Utgangswäakj opp de Kongressen aundre äwa Jehova to lieren. Väle von de Kjreisoppsechtasch hauden mea Erfoarunk aus ekj. Eena von dee haud mau rajcht miene Doopräd jehoolen. Een aundra Brooda, Theodore Jaracz, wort lota Poat vom Väastaunt. Doa wieren uk väl erfoarne Breeda, waut en daut Betel en Brooklyn deenden. Ekj wia soo dankboa, daut de Kjreisoppsechtasch un de Breeda em Betel mie soo behaundelden, daut ekj mie kunn maklich feelen. Ekj  kunn selfst seenen, waut vonne leeftolje Hoads daut wieren, waut sikj opp Gott sien Wuat veleeten un de Organisazion tru unjastetten. Daut dee soo deemootich wieren, muak mie daut leicht, aus Distrikjtoppsechta to deenen.

Aune 1974 stald de Väastaunt eene aundre Grupp Kjreisoppsechtasch aus Distrikjtoppsechtasch aun, un ekj kunn dan wada em Kjreisdeenst sennen – dit Mol en South Carolina. Daut goode wia, daut to dee Tiet de Vesaumlungen un Kjreisen von de witte un schwoate Breeda wada kunnen toop sennen, un doaräwa wieren dee sea schaftich.

Aum Enj vonne 1976 wort ekj no eenen Kjreis en Georgia jeschekjt, tweschen Atlanta un Columbus. Mie denkjt daut noch krakjt, aus ekj opp eene Sauz de Bejrafnisräd hilt fa fief schwoate Kjinja, waut jestorwen wieren, wäajen se äa Hus aunjestekjt hauden. De Mame lieech velazt em Hospitol. De gaunze Tiet kjeem doa eene Schoa Breeda un Sestren, von de schwoate un witte, no daut Hospitol, om de Elren to treesten. Ekj kunn seenen, waut vonne Leew de Breeda un Sestren hauden. Soon Metjefeel von Gott siene Deena kaun halpen, daut eena de schwanste Loag em Läwen derchstonen kaun.

Aune 1977 fruagen se ons, aus wie wullen fa een poa Moonat no daut Betel en Brooklyn komen fa eene jewesse Oabeit. Aus daut äwa wia, kjeemen twee Breeda vom Väastaunt no mie un fruagen, aus Ruby un ekj wudden reed sennen, fa emma em Betel to schaufen. Wie neemen de Enlodunk aun.

Fa 24 Joa schauft ekj en de Deenstaufdeelunk, wua de Breeda schwoare Froagen beauntwuaten motten. Äwa de Joaren haft de Väastaunt dan Aunwiesungen jejäft, waut sikj opp biblische Gruntsauzen stetten. Daut halpt de Deenstaufdeelunk, Froagen to beauntwuaten, un doaderch woaren uk Kjreisoppsechtasch, Eltestasch un Pionieren utjelieet. Soone Aunwiesungen haben aul väle jeholpen, em jeisteljen to waussen, un daut haft Jehova siene Organisazion sea wiedajebrocht.

Vonne 1995 bat 2018 besocht ekj veschiedne Betels aus Veträda von de Hauptoffiz, waut ea de Zonenoppsechta jenant wort. Ekj kjeem met de Betelkommitees, de Breeda em Betel un de Missionoaren toop, om an Moot tootospräakjen un met irjent Schwierichkjeiten to halpen, waut dee hauden. Ruby un mie jeef daut emma väl Moot, de Erfoarungen to hieren, waut dee ons vetalden. Aune 2000 besocht wie Ruanda. Ons jinkj daut sea to Hoaten, aus wie hieeden, woo de Breeda doa un uk de Betelfamielje daut jinkj, aus doa aune 1994 meist een gaunzet Volkj utjerot wort. Väl Breeda äare Aunjehieeje wieren jestorwen. Oba wan dee uk derch dit schwoare jegonen wieren, hauden de Breeda äaren Gloowen, äare Hopninj un äare Freid nich veloaren.

Wie sent nu aul enne 80. De latste 20 Joa deend ekj en daut Betelkommitee enne Stäts. Ekj hab mie nienich huach utlieren loten, oba ekj hab de baste Belierunk von Jehova un siene Organisazion jekjräajen. Daut haft mie jeholpen, aundre de biblische Woarheit to lieren, waut dee fa eewich togood komen kaun (2. Kor. 3:5; 2. Tim. 2:2). Ekj hab jeseenen, woo de biblische Norecht de Menschen halpt, een bätret Läwen to fieren un Frind met äaren Schepfa to woaren (Jak. 4:8). Wanemma Ruby un ekj de Jeläajenheit haben, rod wie aundre too, daut wieettoschazen, äwa Jehova to lieren un aundre de biblische Woarheit to lieren. Daut es daut jratste Väarajcht, waut een Deena von Jehova haben kaun!