Gugisendeselo gia 1940, mvuaji jiami jiasendesele gulonguga Biblia nu Matemue a Yehowa. Abembele gawo gulonguga Biblia, uvi mama wakhalele muheta ba copie a Inzo Yaleha ya Mutaledi nu Réveillez-vous ! Mu givo 1950, tuayile gu assemblée internationale akalegewe gu New York.

Tangua diazonda gungima, phangi Lawrence Jeffries wasendesele guza gututala. Wakhalele mutshita ngolo hagula ngujiye giamatshidia. Thomo, tuakhalelego gudivua n’enji hakhalele muzuela muene egi Matemue a Yehowa ana gudinginyisa ndo mu ndaga jia politike nu ana tshita ndo mudimo wa gisuta. Ngamuwambelele egi gula athu agasue gu Amerika atuna guya mulua ita, mbalagaji jiajiya guza mutambula gifutshi. Phangi Jeffries wanguhudile egi: “Udi mutangiza egi gula athu agasue gu Amerika asendesa gukombelela Yehowa, muene mbawubemba egi mbalagaji jize jialuise ba?” Mvutu yanguhanele muene mu ndaga yene nu mu ndaga jiko, yangukuatesele ha gukotelesa egi matangi ami akhalele abola. Ndaga yene yangukuatesele ha gusuanguluga nu giamatshidia gia Biblia.

Ngakhalele mutanga muavula Inzo Yaleha ya Mutaledi nu Réveillez-vous ! jia mualeha, jinyi jiakhalele fundo mama wakhalele mubamba mikanda. Gungima, ngakotelesele egi ndaga ngakhalele mutanga jiakhalele jia giamatshidia, hene ngatshiginyile gulonguga Biblia nu phangi Jeffrie. Ngasendesele nji guya mu gudibungisa gua mu hungu phoso nu phoso. Ngasuangulugile nu ndaga ngakhalele mulonguga, hene ngasendesele guya mu mudimo wa gulongesa. Ngasombegesele desizio diami, tangua ngakotelesele egi ‘lusugu luakoma lua Yehowa [luakhalele] hehi.’ (Sef. 1:14) Ngakhalelego luko mutshigina guya gu université. Ngakhalele mutshigina gukuatesa athu ha gujiya giamatshidia gia Biblia.

 Ngazudile diplome mu 13 Juin 1956. Gungima dia masugu thathu ngabatijiwe. Ngakhalelego mujiya egi mbanguheta gubonga guavula luholo ngadihanele ha gulonguga ndaga jiatadila Yehowa nu gulongesa athu ako ndaga jiene.

Mbeji samano gungima dia gubatijiwa guami, ngabuile mumvudji wa njila wa tangua diagasue. Mudimo wa Ufumu wa Decembre 1956, wakhalele nu longo diakhalele muzuela egi: “Wajiya Guhana Mago Fundo adi nu Funu ya Alongeshi Avula ba?” Ame nji ngakhalele mukatshi dia athu akhalele naye gutshita ngenyi. Ngakhalele mutshigina guya fundo akhalele nu funu ya alongeshi avula.—Mat. 24:14.

Ngayile mu dimbo dia Edgefield gu Caroline du Sud. Hungu diene diakhalele nu alongeshi phamba nguana. Tangua ngahetele guene, tuabuile thano. Tuakhalele mutshita gudibungisa mu inzo ya phangi mumoshi. Mbeji yagasue, ngakhalele mulongesa matangua 100. Ngakhalele nu ndaga jiavula jia gutshita handaga ngakhalele mutuameza mudimo wa gulongesa nu gutshita ba diskur. Luholo ngakhalele mutshita muavula mu hungu, yangukuatesele ha gujiya ndaga jiavula jiatadila Yehowa.

Mukhetu mumoshi ngakhalele mulongesa Biblia, wakhalele nu inzo athu akhalele muza mudila mvumbi jiawo (funérarium) mu dimbo dia Johnston hehi nu fundo tuakhalele. Wanguhanale mudimo wa masugu azonda mu phoso nu watuhuile nji inzo yazonda ha gukalegela gudibungisa gua mu hungu.

Phangi Jolly Jeffries, mun’a phangi wangulongesele Biblia, wakatugile gu Brooklyn gu New York waza fundo ngakhalele. Muene nji wakhalele mumvudji wa njila. Tuakhalele mujinga mu inzo yazonda yatuhanele phangi mumoshi.

Gu Sud akhalelego mufuta athu makuta avula. Mu lusugu tuakhalele muheta 2 nga 3 dollars gungima dia mudimo. Lusugu lumoshi, ngayile nu ndambo ya makuta ngasalele nawo ha gusumba ima ya gudia. Tangua ngakhalele muvutuga, muthu mumoshi wasuenele hehi nu ame, wanguhudile egi: “Udi nu funu ya mudimo? Mbagungufuta dollars imoshi mu tangua dimoshi.” Wanguhanele mudimo wa masugu thathu mu phoso. Ngakhalele muweva fundo akhalele mutunga inzo. Ngamonele diago egi Yehowa wakhalele gungukuatesa hagula ngulandule gukhala gu Edgefield. Gungima mu givo 1958, ngayile gu assemblée internationale akalegewe gu New York.

Mu lusugu lua mbadi lua asamble ene, ndaga imoshi ya ndando yakalegewe. Ngataganele nu Ruby Wadlington, wakhalele mumvudji wa njila wa tangua diagasue gu dimbo dia Gallatin gu Tennessee. Gu asamble ene, tuanginyile mu gudibungisa guakhalele muzuelela khalasa dia Gileade handaga esue mbadi tuakhalele muzumba mudimo wa gimisionere. Gungima, tuasendese gudisonegela. Lusugu lumoshi, angutamegele ha guya mutshita diskur gu Gallatin. Ngakalegele okazio wene ha guhula Ruby ha gudizula n’enji mu ulo. Gungima ngayile mu hungu diakhalele Ruby, mu 1959 tuadizudile mu ulo.

Tangua ngataganesele ivo 23, ngabuile serviteur de congrégation (mangino ana tamegewa egi mutuameji wa hunji dia akulu) mu hungu dia Gallatin. Tangua phangi Charles Thompson wabuile mutadi muwendji, hungu dia thomo diatalele muene diakhalele dietu. Wakhelele nu ekseperianse yavula; uvi wanguhudile ha gujiya ndaga aphangi akhalele najio funu nu luholo atadi awendji ako a akuatesele gale. Gifezegeselo gienji giangukuatesele ha gujiya egi ngudi naye thomo guhula mihu ha gujiya ndaga jiagasue gutuama dia guzula ba desizio.

Mu Mai 1964, nganginyile École du ministère du Royaume gu South Lansing gu New York mukunda nu mbeji imoshi. Phangi wakhalele mutuameza khalasa diene, wanguhanele gikhesa ha gulonguga ndaga jiavula nu ha gukula mu nyuma.

Ame nu mukaji’ami Ruby tuasendesele mudimo wa mutadi muwendji mu Janvier 1965. Terituare atuhuile yakhalele yakoma, yakhalele musendesa gu dimbo dia Knoxville gu Tennessee uu nu gu dimbo dia Richmond gu Virginie. Tuakhalele nji mutala mahungu a gu Caroline du Nord, a gu Kentucky nu a gu Virginie occidentale. Ngakhalele mutala phamba mahungu a aphangi a ilema ya muila yabuita. Handaga mu tangua diene gu Sud ya États-Unis, atunyishile mindele nu athu abuita ha gudibungisa fundo dimoshi. Aphangi akhalelego nu makuta avula, hene tuakhalele muhana aphangi akhalele nu funu ya ukuateshi ima tuakhalele nayo. Mutadi muwendji mumoshi wakhalele nu eskperianse wanguwambelele egi: “Khala phangi. Tangua udi muya mu mahungu, ukhadigo gudimonesa gifua udi fumu. Gula udi mutshita ngenyi, mbawukuatesa diago aphangi.”

Tangua tuayile mu hungu dimoshi diazonda, Ruby wasendesele gulonguga nu muvuala mumoshi wa mukhetu. Muvuala muene wakhalele nu mona wa mukhetu wa givo gimoshi. Matangua ako gula gushigo nu phangi ya gulonguga n’enji, mukaji’ami wakhalele gumulongesa mu njila ya mesaje. Tangua tuayile mutala luko hungu diene, mukhetu muene wasendesele guza mu gudibungisa guagasue gua mu hungu. Tangua ba pionnière spéciale mbadi ayile mu hungu diene, alanduile gulonguga n’enji, gungima wabatijiwe. Gungima dia ivo 30, lusugu lumoshi mu 1995 gu Betele ya Patterson, muvuala mumoshi wa mukhetu wayile muta maga nu Ruby. Wakhalele mun’a mukhetu munu Ruby wakhalele mulongesa Biblia. Muvuala muene nu mulumi’enji anginyile khalasa dia 100 dia Gileade.

Terituare yetu ya mbadi yakhalele gu Floride centrale. Tuakhalele nu funu ya gamiyo, hene tuasumbile gamiyo gamoshi mu ndando yabonga. Uvi, phoso ya thomo piece imoshi ya moteur yabolele. Tuakhalelego luko nu makuta agulondega gamiyo gene. Ngatamegele phangi mumoshi ngakhalele mutangiza egi wajiya gungukuatesa. Phangi muene wawambelele muenya mudimo wenji ha gutulondela gamiyo gene. Uvi gungima phangi muene gatogelego makuta. Wazuelele egi: “Munguhanyigo nga gima.” Watuhanele nji ndambo ya makuta! Ndaga yene idi mumonesa luholo Yehowa wana kuatesa akombeledi enji. Yatukuatesele ha gukhala nu khadilo dia gukhaphela athu ako.

Tangua tuakhalele muya mu mahungu, tuakhalele mukhala mu jinzo jia aphangi. Hene tuabuile nu mafuta abonga avula. Lusugu lumoshi, ngakhalele musonega rapor yatadila hungu dimoshi, uvi ngayimaneselego, ngayibembele mu mashine. Tangua ngavutugile mu ngueze, anguwambelele egi mona mumoshi wa ivo thathu mu inzo tuakhalele, wasalele mubueta mashine gungima hene ima ngasonegele yabolele. Ndaga yene yakhalele gungulelesa ivo yavula.

Mu 1971, ngabuile mutadi muwendji wa distrike gu New York. Tuadihudile muvuala! Tangua tuayile guene, ngakhalele nu ivo phamba 34. Ngabuile mutadi muwendji wa distrike dia thomo dia aphangi a ilema ya muila ya buita, yakhalele ndaga ya gusuanguluga.

Luholo ngakhalele mutadi muwendji wa distrike, ngakhalele mulongesa ndaga jiatadila Yehowa gu suga ya phoso yagasue gu asamble a circonscription. Atadi awendji avula akhalele nu eksperianse yavula gubalega ame. Mumoshi mukatshi diawo watshitshile diskur dia gubatijiwa guami. Phangi muko mu jina dia Theodore Jaracz, wabuile nji phangi wa Hunji dia Akulu Atuameji. Guakhalele nji nu aphangi akhalele nu eksperianse yavula anyi akhalelegu Betele ya gu Brooklyn. Ngasuangulugile muavula  luholo atadi awendji nu ba Betelite akhalele mutshita yagasue hagula ngukhadigo nu woma. Ngamonele diago egi akulu ene akhalele muhagela Mbimbi ya Nzambi mutshima nu akhalele diago mukuatesa ulondegi wenji. Gudibulumuisa guawo guangukuatesele ha gutshita muabonga mudimo wa mutadi muwendji wa distrike.

Mu 1974 Hunji dia Akulu Atuameji atombele atadi awendji ako ha gukalagala mudimo wa distrike, ame ngabuile luko mutadi muwendji gu Caroline du Sud. Gungima, aphangi a mindele nu a ilema ya muila ya buita asendesele gudibungisa hamoshi. Yakhalele diago ndaga yagusuanguluga.

Gungima mu 1976 angutumile mu circonscription ya Géorgie, hakatshi dia Atlanta nu Columbus. Ngudi muwunguluga lusugu ngatshitshile diskur dia mafua dia ana thano a ilema yabuita, anyi afuile tangua muthu mumoshi wambile inzo yawo tshuya. Gin’awo wakhalele gu hôpital. Matemue a Yehowa avula ikhale a mindele nu a ilema ya muila yabuita ayile gu hôpital ha guakolesa. Aphangi ene amonesele diago guzumba guakola. Gumonesela aphangi guzumba gua luholo elu, guajiya guakuatesa ha gukolesela mu malamba.

Mu 1977 atutamegele gu Betele ya gu Brooklyn ha guhana mago mu mudimo umoshi mukunda nu mbeji jiazonda. Tangua mudimo wene wahuile, aphangi mbadi a Hunji dia Akulu Atuameji atutogele gula ame nu mukaji’ami tuajiya gulandula gukalagala gu Betele. Tuatshiginyile.

Ngatshitshile gu département pour le service ivo 24. Matangua avula tuakhalele mukuatesa ha gulondega milonga yakola. Givo nu givo, Hunji dia Akulu Atuameji akhalele muhana malongo mu gudivua nu Biblia. Malongo ene akhalele gutukuatesa ha guhana mvutu gu mihu tuakhalele muheta, nu guhana formasio gudi atadi awendji, akulu nu avundji a njila. Formasio jiene jiakuatesele aphangi avula ha gukula mu nyuma. Gungima ene nji, akhalele mukuatesa ulondegi wa Yehowa.

Sendese mu 1995 uu nu mu 2018, ngakhalele muya mutala ba Betele avula gifua mumoneshi wa Hunji dia Akulu Atuameji (yonu akhalele mutamega egi surveillant de zone). Ngakhalele muta maga nu aphangi ana tshita gu Komite jia Filiale nu ba Betelite nu ba misionere ha guahana gikhesa nu guakuatesa mu ndaga jiko. Ame nu Ruby tuakhalele nji muheta gikhesa mu ba eksperianse a aphangi. Ha gufezegesa, mu givo 2000 tuayile gu Rwanda. Tuadisagesele muavula tangua tuavile luholo aphangi akhalele mujinga mu sungi akhalele mushiya athu nu khuta (génocide) mu 1994. Aphangi avula afuishile athu akhalele muzumba. Ikhale aphangi atagenele nu malamba awa, alanduile gumonesa gutshigina, nu akhalele nu gusuanguluga.

Mangino tudi ivo 80. Mu ivo 20 yabalega ngakhalele mutshita gu Komite ya Filiale ya gu États-Unis. Ngayilego gu université, uvi ngahetele formasio yabonga gudi Yehowa nu mu ulondegi wenji. Formasio yene yana gungukuatesa ha gulongesa athu ako giamatshidia giajiya guakuatesa ha guheta gubonga gua mayilago. (2 Kol. 3:5; 2 Tim. 2:2) Ngana mona luholo Biblia yana kuatesa athu ha gusombegesa monyo wawo, nu gukolesa ufuta wawo nu Yehowa. (Yak. 4:8) Ame nu Ruby tuana tshita yagasue ha gukuatesa athu ako ha gusuanguluga nu luendu lua gulonguga ndaga jiatadila Yehowa nu Iua gulongesa athu ako Biblia. Idi diago luendu luakoma mukunda nu akombeledi a Yehowa!