آپبیتی
مینوں یہوواہ بارے سکھن تے دُوجیاں نُوں اوہدے بارے سکھان چ بڑا مزہ آیا
میری پرورش امریکہ دی ریاست پینسلوانیا دے شہر اِسٹن چ ہوئی۔ میرا پورا دھیان بس ایس گل تے سی کہ میں یونیورسٹی جاواں تاکہ میں وڈا ناں کما سکاں۔ مینوں پڑھن لکھن دا بڑا شوق سی تے میں سائنس تے حساب چ بڑا تیز ساں۔ سن 1956 چ لوکاں دے حق لئی کم کرن والی اِک تنظیم نے مینوں 25 امریکی ڈالر دِتے کیونکہ میں سیاہ فام طالب علماں چوں سب توں زیادہ نمبر لئے سن۔ پر اَگے چل کے میرے سارے منصوبے بدل گئے۔ آؤ میں توانوں دَسنا واں کہ ایہہ سب کجھ کیویں ہویا۔
میں یہوواہ بارے کیویں سکھیا؟
سن 1940 دے کجھ عرصے بعد میرے امی ابو نے یہوواہ دے گواہواں نال بائبل کورس کرنا شروع کیتا۔ بھانویں کہ بعد چ اوہناں نے بائبل کورس کرنا چھڈ دِتا پر میری امی نُوں گواہواں وَلّوں ”مینارِنگہبانی“ تے ”جاگو“ دے رسالے مِلدے رہندے سن۔ سن 1950 چ شہر نیویارک چ یہوواہ دے گواہواں دی اِک بینالاقوامی کنونشن ہوئی تے میرے امی ابو وی اوتھے گئے۔
ایہدے کجھ عرصے بعد ای بھرا لارنس جیفریس بائبل چوں گل بات کرن لئی ساڈے گھر آن لگ پئے۔ اوہناں نے مینوں بائبل سچائیاں سکھان لئی بڑی کوشش کیتی۔ شروع شروع چ مینوں لگدا سی کہ یہوواہ دے گواہواں نُوں وی سیاسی معاملیاں چ حصہ لینا چاہی دا اے تے فوج چ بھرتی ہونا چاہی دا اے۔ میں بھرا لارنس نُوں کہیا کہ جے امریکہ چ ہر کوئی جنگ چ جان توں منع کر دَوے گا تے دُشمن آ کے ساڈے ملک تے قبضہ کر لین گے۔ اوہناں نے بڑے پیار تے صبر نال مینوں سمجھایا کہ جے امریکہ چ سارے لوک یہوواہ دی عبادت کرن لگ پین تے دُشمن اوہناں تے حملہ کر دین تے تیرے خیال چ یہوواہ کیہہ کرے گا؟ اوہناں دِیاں ایہناں گلاں توں میں ویکھ پایا کہ میرا اِعتراض بالکل غلط سی۔ اِنج میرے دل چ پاککلام دِیاں سچائیاں سکھن دی خواہش ودھی۔
میرے بپتسمے دی تصویر
میں کئی کئی گھنٹے ”مینارِنگہبانی“ تے ”جاگو“ دے اوہ پرانے رسالے پڑھنا ساں کہ جیہڑے میری امی کول سن۔ وقت دے نال نال مینوں محسوس ہون لگ پیا کہ میں سچائیاں سکھ رہیا واں ایس لئی میں بھرا لارنس نال بائبل کورس کرن لئی تیار ہو گیا۔ نالے میں باقاعدگی نال عبادتاں تے وی جان لگ پیا۔ میں جیہڑیاں نوِیاں گلاں سکھ رہیا ساں اوہ مینوں بوہت چنگیاں لگ رہیاں سن۔ ایس لئی میں مبشر بن گیا۔ جدوں میں ویکھیا کہ یہوواہ دا دن نیڑے وے تے میرے منصوبے بدل گئے۔ (صفنیاہ 1:14) ہُن میں یونیورسٹی بالکل وی نئیں جانا چاہنا ساں سگوں میں پاککلام دِیاں سچائیاں سکھن چ دُوجیاں دی مدد کرنا چاہنا ساں۔
13 جون 1956 نُوں میں سکول دی پڑھائی ختم کیتی تے ایہدے تِن دن بعد اِک کنونشن تے میں بپتسمہ لے لیا۔ اوہدوں مینوں اندازہ وی نئیں سی کہ جے میں یہوواہ بارے سکھن تے دُوجیاں نُوں اوہدے بارے سکھان چ محنت کراں گا تے مستقبل چ مینوں کِنّیاں برکتاں مِلن گیاں۔
پہلکار بن کے یہوواہ بارے سکھنا تے دُوجیاں نُوں سکھانا
بپتسمہ لین دے 6 مہینے بعد میں پہلکار بن گیا۔ دسمبر 1956 دی ”ہماری بادشاہتی خدمتگزاری“ چ اِک مضمون آیا سی جدے چ ایس بارے گل کیتی گئی سی کہ اَسی کسے ایہو جہے علاقے چ جا کے خدمت کر سکنے آں جِتھے مبشراں دی زیادہ ضرورت اے۔ میں اِنج کر سکنا ساں تے میں دِلوں چاہنا ساں کہ میں اِک ایہو جہے علاقے چ جا کے خدمت کراں جِتھے بادشاہی دا پیغام سُنان لئی زیادہ مبشر نئیں۔
میں امریکہ دی ریاست جنوبی کیرولائنا دے شہر ایج فیلڈ ٹُر گیا۔ میرے جان توں پہلاں اوس کلیسیا چ صرف 4 مبشر سن۔ اَسی عبادتاں اِک بھرا دے گھر چ کرنے ساں۔ میں ہر مہینے 100 گھنٹے مُنادی کرنا ساں۔ ایس کلیسیا چ جان توں بعد میں بوہت مصروف ہو گیا کیونکہ میں مُنادی لئی اجلاساں دی پیشوائی کرنا ساں تے عبادتاں چ وی حصے پیش کرنا ساں۔ دلچسپی دی گل اے کہ جِنّاں زیادہ میں ایہناں کماں چ مصروف رہیا اوناں ای زیادہ میں یہوواہ بارے سکھدا گیا۔
میں اِک بیوہ نُوں بائبل کورس کرانا ساں۔ جدا کجھ ایمیل دُور شہر جانسٹن چ اِک چھوٹا جیہا کاروبار سی۔ اوہنے مینوں پارٹ ٹائم نوکری دِتی تے اِک چھوٹی جہی عمارت نُوں عبادتگاہ دے طور تے استمال کرن لئی وی دِتا۔
بھرا لارنس دا پُتر جولی امریکہ دے شہر بروکلن توں میرے کول آ گیا۔ اوہ میرے نال مِل کے پہلکار دے طور تے خدمت کرن لگ پیا۔ اِک بھرا نے رہن لئی سانوں اِک جگہ کرائے تے دے دِتی۔
جنوبی علاقیاں چ تنخواہواں بوہت گھٹ سن۔ اَسی پورے دن چ بس دو یاں تِن ڈالر ای کما پانے ساں۔ اِک وار تے میرے کول بس کجھ ای سکے رہ گئے سن جنہاں نال میں کھانا خرید لیا۔ جدوں میں دُکان چوں باہر نکل رہیا ساں تے اِک بندہ میرے کول آیا تے مینوں پچھیا: ”کیہہ تینوں نوکری چاہی دی اے؟ میں تینوں اِک گھنٹے دا اِک ڈالر دَواں گا۔“ میں ہفتے چ تِن دن اوہدے لئی اِک ایہو جہی جگہ تے صفائی دا کم کرنا ساں جِتھے اِک عمارت بن رہی سی۔ ایہہ گل بالکل صاف سی کہ یہوواہ میری مدد کر رہیا سی تاکہ میں ایج فیلڈ چ ای رہواں۔ 1958 چ میں شہر نیویارک چ ساڈی اِک بینالاقوامی کنونشن تے گیا۔
ساڈی شادی دی تصویر
کنونشن دے دُوجے دن میری ملاقات اِک پہلکار نال ہوئی جدا ناں رُوبی ولنگٹن سی۔ رُوبی ریاست ٹینیسی دے شہر گیلیٹن چ خدمت کر رہی سی۔ اَسی دونویں مشنری بننا چاہنے ساں۔ ایس لئی اَسی کنونشن تے اوس اجلاس چ شامل ہوئے جیہڑا ایہو جہے بھین بھراواں لئی سی جیہڑے گلئیڈ سکول جانا چاہندے سن۔ بعد چ وی اَسی خطاں دے ذریعے رابطے چ رہے۔ مینوں شہر گیلیٹن دی کلیسیا چ عوامی تقریر کرن دی دعوت مِلی۔ ایس موقعے تے میں رُوبی نُوں پچھیا کہ کیہہ اوہ میرے نال ویاہ کرے گی۔ میں اوہدی کلیسیا چ شفٹ ہو گیا تے 1959 چ اَسی شادی کر لئی۔
کلیسیا چ یہوواہ بارے سکھنا تے سکھانا
جدوں میں 23 سال دا ساں مینوں شہر گیلیٹن دی کلیسیا دا نگہبان (جنہوں ہُن بزرگاں دی جماعت دا منتظم کہیا جاندا اے) مقرر کیتا گیا۔ بھرا چارلس تھامسن حالے حلقے دے نگہبان بنے ای سن تے اوہناں نے سب توں پہلا دورہ ساڈی کلیسیا دا ای کیتا۔ بھانویں کہ اوہناں نُوں بوہت تجربہ سی پر فیر وی اوہناں نے مینوں پچھیا کہ بھراواں نُوں کیہڑیاں چیزاں دی ضرورت اے تے دُوجے حلقے دے نگہبان کلیسیاواں دا خیال کیویں رکھدے نیں۔ اوہناں توں میں سکھیا کہ سوال پچھنا بوہت چنگی گل ہوندی اے تے کسے وی معاملے نُوں حل کرن توں پہلے اوہدے بارے ساریاں گلاں جان لینا ضروری ہوندا اے۔
مئی 1964 چ مینوں اِک مہینے لئی بادشاہتی خدمتی سکول جان دی دعوت مِلی جیہڑا امریکہ دے شہر جنوبی لانسنگ چ ہویا۔ جنہاں بھراواں نے ایہہ سکول کرایا اوہناں نے میرے دل چ یہوواہ بارے ہور سکھن تے اوہدے نال اپنی دوستی مضبوط کرن دی خواہش نُوں ودھایا۔
صوبائی تے حلقے دے نگہبان دے طور تے سکھنا تے دُوجیاں نُوں سکھانا
جنوری 1965 چ برانچ نے مینوں حلقے دے نگہبان دے طور تے مقرر کیتا۔ میرا تے رُوبی دا پہلا حلقہ ریاست ٹینیسی دے شہر ناکسویل توں لے کے تقریباً ریاست ورجینیا دے شہر رِچمنڈ تک پھیلیا ہویا سی۔ ایہدے چ شمالی کیرولائنا، کینٹیکی تے جنوبی ورجینیا دِیاں کلیسیاواں شامل سن۔ اوس ویلے جنوبی امریکہ چ سیاہ تے سفید فام لوکاں دے اِک جگہ کٹھے ہون تے پابندی سی۔ ایس لئی میں صرف اوہناں کلیسیاواں دا دورہ کر سکنا ساں جِتھے سیاہ فام بھین بھرا سن۔ ایہہ بھین بھرا بوہت غریب سن پر اَسی سکھیا سی کہ سانوں ضرورتمند بھین بھراواں نال اپنیاں چیزاں ونڈنیاں چاہی دِیاں نیں۔ اِک وار اِک تجربےکار حلقے دے نگہبان نے مینوں اِک بوہت خاص گل دَسی جیہڑی اَگے چل کے میرے بڑے کم آئی۔ اوہنے کہیا: ”کسے وی کلیسیا دا دورہ کردے ویلے ایہہ ظاہر نہ کرو کہ تُسی اوہناں دے باس او۔ تُسی اوہدوں ای اوہناں دی مدد کر پاؤ گے جدوں اوہناں نُوں لگے گا کہ تُسی اوہناں دے بھرا او۔“
جدوں اَسی اِک چھوٹی کلیسیا دا دورہ کر رہے ساں تے رُوبی نے اِک کُڑی نال بائبل کورس شروع کیتا جدی اِک سال دی دھی وی سی۔ جدوں کلیسیا چ کوئی ہور اوس کُڑی نال بائبل کورس جاری نئیں رکھ پایا تے رُوبی خطاں دے ذریعے اوہنوں بائبل کورس کراندی رہی۔ ساڈے اگلے دورے دے دوران اوہ کُڑی ساریاں عبادتاں تے آئی۔ فیر جدوں اوس کلیسیا چ دو خاص پہلکار بھیناں آئیاں تے اوہناں نے اوہدے نال بائبل کورس جاری رکھیا تے چھیتی ای اوس کُڑی نے بپتسمہ لے لیا۔ ایہدے تقریباً 30 سال بعد 1995 چ پیٹرسن بیتایل چ اِک جوان کُڑی رُوبی کول آئی تے اوہنے اوہنوں دَسیا کہ اوہ اوسے کُڑی دی دھی اے جنہوں رُوبی بائبل کورس کراندی سی تے ہُن اوہ تے اوہدا شوہر گلئیڈ سکول دی 100ویں کلاس چ طالبِعلم نیں۔
ساڈے دُوجے حلقے چ امریکہ دی ریاست وسطی فلوریڈا شامل سی۔ اوہدوں سانوں اِک گڈی دی ضرورت سی جیہڑی سانوں بڑی سستی مِل گئی۔ پر کجھ عرصے بعد اوہدا اِنجن خراب ہو گیا تے ساڈے کول اوہنوں ٹھیک کران دے پیسے نئیں سن۔ میں اِک بھرا نُوں بلایا جیہڑا ساڈی مدد کر سکدا سی۔ اوس بھرا نے اپنے اِک مکینک نُوں ساڈی گڈی ٹھیک کرن لئی گھلیا۔ بعد چوں اوس بھرا نے ساڈے کولوں پیسے نئیں لئے۔ اوہنے مینوں کہیا: ”مینوں تواڈے کولوں پیسے لین دی کوئی ضرورت نئیں اے۔“ سگوں بعد چ اوس بھرا نے سانوں کجھ پیسے تحفے دے طور تے دِتے۔ اوہدوں سانوں محسوس ہویا کہ یہوواہ اپنے بندیاں دِیاں ضرورتاں دا کِنّاں خیال رکھدا اے تے ساڈی ایہہ خواہش ہور ودھ گئی کہ اَسی وی کُھلے دل دے مالک بنئے۔
جدوں وی اَسی کلیسیاواں دا دورہ کرنے ساں تے اَسی بھین بھراواں دے گھراں چ ٹھہرنے ساں۔ اِنج بوہت سارے بھین بھراواں نال ساڈی بڑی پکی دوستی ہو گئی۔ اِک وار اِک دورے تے اَسی اِک خاندان دے گھر رُکے۔ میں کلیسیا دی رپورٹ ٹائپ کر رہیا ساں تے فیر جدوں میں اَدھی رپورٹ تیار کر لئی تے میں اوہنوں ٹائپرائٹر چ ای چھڈ کے ٹُر گیا۔ شام نُوں جدوں میں گھر واپس آیا تے مینوں پتہ چلیا کہ اوہناں دے تِن سال دے پُتر نے میری رپورٹ دا کم تمام کر دِتا اے۔ میں اوہنوں بوہت سالاں تک ایس گل لئی چھیڑ دا رہیا۔
1971 چ مینوں برانچ وَلّوں اِک خط ملیا جدے چ لکھیا سی کہ مینوں شہر نیویارک چ صوبائی نگہبان دے طور تے مقرر کیتا گیا اے۔ ایہہ خط پڑھ کے اَسی حیران رہ گئے۔ جدوں اَسی اوتھے شفٹ ہوئے تے میں صرف 34 سالاں دا ساں تے میں اوتھے دا پہلا سیاہ فارم صوبائی نگہبان ساں۔ اوتھے دے بھین بھراواں نے دل کھول کے ساڈا استقبال کیتا۔
مینوں صوبائی نگہبان دے طور تے ہر ہفتے کنونشناں تے یہوواہ بارے تلیم دینا بڑا چنگا لگ رہیا سی۔ بوہت سارے حلقے دے نگہبان بھرا میرے توں کِتے زیادہ تجربےکار سن۔ اوہناں وچوں اِک نے تے میرے بپتسمے دی تقریر وی دِتی سی۔ ایہناں ای بھراواں وچوں اِک بھرا جدا ناں تھیوڈور جیرس سی بعد چوں گورننگ باڈی دے ممبر بن گئے۔ بوہت سارے ہور تجربہ کار بھرا بیت ایل چ خدمت کر رہے سن۔ میں ایہناں بھراواں دا بڑا شکرگزار آں کہ ایہناں نے کدی مینوں ایہہ محسوس نئیں کرایا کہ میں اوہناں توں گھٹ آں۔ میں اپنی اَکھیں ویکھیا اے کہ ایہہ شفیق چرواہے خدا دے کلام تے بھروسا کردے نیں تے وفاداری نال تنظیم دی حمایت کر دے نیں۔ اوہناں دی خاکساری دی وجہ توں میرے لئی صوبائی نگہبان دے طور تے خدمت کرنا بڑا اسان ہو گیا۔
دُبارہ توں حلقے دے نگہبان دے طور تے خدمت
1974 چ گورننگ باڈی نے کجھ ہور حلقے دے نگہباناں نُوں صوبائی نگہبان دے طور تے مقرر کیتا تے مینوں فیر توں حلقے دے نگہبان دے طور تے خدمت کرن لئی کہیا گیا۔ ایس وار سانوں جنوبی کیرولائنا چ خدمت کرنی سی۔ خوشی دی گل اے کہ ایس وار جنوبی امریکہ چ سیاہ فام تے سفید فام بھین بھراواں دِیاں کلیسیاواں الگ الگ نئیں سن تے ایس وجہ توں بھین بھرا بڑے خوش سن۔
1976 دے آخر چ مینوں جارجیا دے حلقے چ خدمت کرن دی ذمےداری مِلی۔ مینوں اَج وی چنگی طرحاں یاد اے کہ اوتھے میں 5 سیاہ فام بچیاں دے جنازے دی تقریر دِتی سی جنہاں دے گھر نُوں کسے نے اَگ لا دِتی سی۔ بچیاں دی ماں زخمی ہون دی وجہ توں ہسپتال چ داخل سی۔ اوہنوں تے اوہدے شوہر نُوں تسلی دین لئی بوہت سارے سیاہ فام تے سفید فام بھین بھرا ہسپتال آندے جاندے سن۔ ایہناں بھین بھراواں نے شاندار مثال قائم کیتی کہ جدوں یہوواہ دے بندے اِک دُوجے لئی ایہو جہی محبت وکھاندے نیں تے اوہ مشکل توں مشکل حالاتاں چ وی وفادار رہ پاندے نیں۔
بیت ایل چ یہوواہ بارے سکھنا تے سکھانا
1977 چ سانوں کجھ مہینیاں لئی بیتایل چ اِک پراجیکٹ تے کم کرن لئی بلایا گیا۔ جدوں ساڈا پراجیکٹ ختم ہون والا سی تے گورننگ باڈی دے دو ممبر مینوں ملے تے اوہناں پچھیا کہ کیہہ میں تے رُوبی اَگے وی بیتایل چ خدمت جاری رکھ سکنے آں۔ اَسی اوہناں دی دعوت قبول کر لئی۔
میں 24 سال خدمتی شعبے چ کم کیتا جِتھے بھراواں نُوں اکثر بوہت ای نازک تے مشکل سوالاں نُوں حل کرنا ہوندا اے۔ سالاں دے دوران گورننگ باڈی نے بائبل دے اصولاں نال ساڈی رہنمائی کیتی اے۔ ایس رہنمائی دی وجہ توں خدمتی شعبے چ کم کرن والے بھرا نہ صرف سوالاں دے جواب دین دے لائق ہوئے سگوں ایہدی مدد دے نال حلقے دے نگہباناں، بزرگاں تے پہلکاراں نُوں وی تربیت دِتی گئی۔ ایس تربیت دی وجہ توں بوہت سارے بھین بھرا پہلاں توں زیادہ پُختہ مسیحی بن گئے نیں تے اِنج یہوواہ دی تنظیم ہور مضبوط ہو گئی اے۔
1995 توں 2018 تک میں ہیڈکوارٹر دے نمائندے دے طور تے بوہت ساریاں برانچاں دا دورہ کیتا۔ ایس دوران میں برانچ کمیٹی دے بھراواں، بیتایل چ کم کرن والے بھین بھراواں تے مشنریاں دا حوصلہ ودھان لئی اوہناں نُوں ملیا۔ مینوں تے رُوبی نُوں وی بھین بھراواں دے تجربیاں توں بوہت حوصلہ ملیا۔ مثال لئی، سن 2000 چ اَسی روانڈا دا دورہ کیتا تے جدوں اَسی سُنیا کہ اوتھے بیت ایل تے کلیسیاواں چ ساڈے بھین بھرا 1994 چ ہون والے قتلِ عام توں کیویں بچے تے ایہدا ساڈے دل تے بڑا گُوڑھا اثر ہویا۔اوہناں وچوں کجھ بھین بھراواں نے اپنے عزیزاں نُوں کھو دِتا سی۔ اینی زیادہ مشکلاں چوں لنگھن دے باوجود ایہناں بھین بھراواں نے ایمان ظاہر کیتا تے اپنی امید تے خوشی نُوں قائم رکھیا۔
ساڈی شادی دی 50ویں سالگرہ دی تصویر
ہُن ساڈی عمر 80 توں زیادہ ہو گئی اے۔ 20 سالاں توں میں امریکہ دی برانچ کمیٹی دے اِک ممبر دے طور تے کم کر رہیا واں۔ میں یونیورسٹی چوں تے تلیم نئیں حاصل کر سکیا پر میں اوس توں وی ودھیا تلیم حاصل کیتی اے جیہڑی یہوواہ تے اوہدی تنظیم نے مینوں دِتی اے۔ ایس تلیم نے مینوں ایس لائق بنایا اے کہ میں دُوجیاں نُوں بائبل دِیاں سچائیاں سکھا سکاں جدے توں لوکاں نُوں ہمیشاں تک فائدہ ہو سکدا اے۔ میں ویکھیا کہ بائبل دا پیغام لوکاں دِیاں زندگیاں نُوں بہتر بنان تے یہوواہ نال قریبی رشتہ قائم کرن چ اوہناں دی مدد کر دا اے۔ مینوں تے رُوبی نُوں جدوں وی موقع مِلدا اے اَسی دُوجیاں دا حوصلہ ودھانے آں تاکہ اوہ یہوواہ بارے سکھن تے دُوجیاں نُوں سچائیاں سکھان دے شرف دی قدر کردے رہن کیونکہ یہوواہ دے بندیاں لئی ایس توں ودھ کے خوشی ہور کوئی نئیں۔
