Puku tempu dipus di 1940, ña pape ku ña mame kumsa studa Biblia ku Tustumuñas di Jeova. E ka kontinua studa Biblia, ma ña mame kontinua risibi rivistas Sintinela ku No Korda! Na 1950, i fasiduba un kongresu internasional na sidadi di Nova York, i ña familia bai mati es kongresu.

Puku tempu dipus, ermon Lawrence Jeffries kumsa ku visitanu. I tenta judan aprindi bardadi. Na kumsada, N ka konkordaba ku el pa manera ku Tustumuñas di Jeova ka ta nvolvi na asuntus pulitiku ku militar. N falal kuma, si kada kin na Amerika nega bai gera, inimigus pudi bin ataka no tera i toma konta del. Ku pasensa ermon Jeffries fasin un purgunta ku pun pa N pensa: “Ke ku bu pensa Jeova Deus na fasiba, si tudu jintis na Amerika staba na sirbil i inimigus bin ataka elis?” Kusas ki fala aserka des asuntu ku utrus asuntus judan oja di kuma, ke ku N staba na pensa i eradu. Es pui pa N staba mas nteresadu na aprindi bardadis di Biblia.

N ta pasaba manga di tempu na lei rivistas antigu di Sintinela ku No Korda!, ku ña mame rakadaba na kuartu ku sta bas di con. Ku tempu, N nota di kuma N staba na aprindi bardadi, pa kila, N seta studa Biblia ku ermon Jeffries. Tambi N kumsa ku mati tudu runions. N gosta di ke ku N staba na aprindi, i N pasa sedu publikadur di bon noba. Ña objetivus muda oca N ntindi di kuma “garandi dia di SIÑOR sta pertu”. (Sof 1:14) N ka misti ja mas bai universidadi. En ves di kila, N misti juda utrus aprindi bardadi di Biblia.

N kaba liseu na dia 13 di Juñu di 1956, i tris dia dipus, N batisadu na un asembleia di sirkuitu.  N ka sibiba kuma N na risibi manga di bon kusas di Jeova, pabia N disidi usa ña vida pa aprindi i nsina utrus aserka del.

Seis mis dipus di ña batismu, N kumsa sirvisu di pioneru regular. Ministério do Reino di Dizembru di 1956 teneba un artigu ku tene tema: “Sera ki bu pudi sirbi nunde ki ten mas nesesidadi?” Es konviti i pa mi tambi. N mistiba bai juda nunde ki ten puku jintis ku staba na prega bon noba. — Mat 24:14.

N munda pa Edgefield, na sul di Karolina. Kongregason ku staba la teneba so kuatru publikaduris. Suma N bai pa la, numeru aumenta pa sinku. No ta fasiba runion dianti di kasa di un ermon. Kada mis, N ta fasiba 100 ora na pregason. N staba okupadu, pabia N ta tomaba diantera na pregason i fasi diskursus na kongregason. Nteresanti i di kuma, mas ki N staba na fasi tarbaju na kongregason, mas N staba na aprindi aserka di Jeova.

Un minjer ku N ta studaba Biblia ku el tene un kasa nunde ke ta fasiba funeral, na Johnston, un sidadi ku ka staba lunju. Ku bondadi i dan un tarbaju ku N ta fasi alguns dias na semana, tambi i pirmitinu pa no usa un kausiñu ki kumpu suma no Salon di Renu.

Ermon Jolly Jeffries, fiju di ermon ku studaba Biblia ku mi, bin di Brooklyn, Nova York, i pasa sedu ña kumpañer di sirvisu di pioneru. No moraba na un karu pikininu ku tene kuartu, ku un ermon pistanu.

Na sul, tarbajaduris ta risibiba puku diñeru. Kada dia ku no tarbajaba, no ta risibiba dus o tris dolar. Un dia, N kaba di usa ña ultimu moedasiñu ku N teneba pa kumpra kusas di kume na supermerkadu. Oca N sai fora, un omi pertusi di mi i puntan: “Bu misti un tarbaju? N na pagau un dolar kada ora.” I dan tris dia di tarbaju pa limpa un kau di konstruson. I staba klaru di kuma Jeova staba na judan pa fika na Edgefield. Ma, na 1958, N bai pa kongresu internasional na sidadi di Nova York.

Na sugundu dia di kongresu, i kontisi un kusa spesial. N kontra ku Ruby Wadlington, ku staba na sirbi suma pionera regular na Gallatin, Tennessee. Suma no misti sedu misionarius, no mati runion pa skola di Jileadi ku fasidu na kongresu. Mas tardi, no kumsa ku skirbi n̈utru. Dipus, N kumbidadu pa fasi un diskursu publiku na Gallatin. N aproveita ki oportunidadi pa pidil kasamenti. N munda pa kongregason di Ruby, i no kasa na 1959.

Oca N tene 23 anu, N disignadu suma servu di kongregason (gosi i ta comadu kordenadur di korpu di ansions) na Gallatin. No kongregason i purmeru ku Charles Thompson  visita suma superintendenti di sirkuitu. I teneba manga di spiriensia, ma mesmu asin, i pidi ña opinion aserka di nesesidadis di ermons i kuma ku utrus superintendentis di sirkuitu ta kuidaba di kongregasons. N aprindi ku el di kuma i bon fasi purguntas i buska tene tudu informasons antis di toma disisons.

Na Maiu di 1964, N kumbidadu pa mati Skola di Ministeriu di Renu ku dura un mis, i fasidu na sul di Lansing, Nova York. Ermons ku diriẑi skola fasin pa N misti aprindi mas aserka di Jeova i pertusi mas del.

Na Janeru di 1965, ami ku Ruby no kumbidadu pa kumsa tarbaju di sirkuitu. No disignadu pa un sirkuitu ku tene tiritoriu garandi. I kumsa na Knoxville, Tennessee, kuas te na Richmond, Virginia. I nklui kongregasons na norti di Karolina, Kentucky ku oesti di Virginia. N ta visitaba so kongregasons di pretus, pabia leis di siparason na sul di Stadus Unidu ka ta pirmitiba pa pretus mati runions juntu ku brankus. Ermons seduba koitadi, i no aprindi rapati ke ku no tene ku utrus ku staba na nesesidadi. Un ermon ku tarda na sirbi suma superintendenti di sirkuitu nsinan un lison importanti, i falan: “Sedu un ermon. Ora ku bu na visita un kongregason, ka bu aẑi suma si bu sedu se patron. Bu pudi juda elis so si kontra e sinti di kuma bu sedu se ermon.”

Oca no na visitaba un kongregason pikininu, Ruby kumsa studu ku un joven di 17 anu ku kasa i ku teneba un fiju femia di un anu. Ora ku ningin na kongregason ka konsigiba diriẑi si studu, Ruby ta fasilba atraves di karta. Oca no bai visita mas ki kongregason, ki minjer ta matiba tudu runions. Oca dus irmas pioneras spesial disignadu pa ki kongregason, e kontinua studa ku el, i ka tarda i batisa. Serka di 30 anu mas tardi na 1995, na Betel di Patterson, un irma joven bin fala Ruby manteña. I seduba fiju di ki minjer ku Ruby studaba ku el. Es irma joven ku si omi seduba studantis di turma 100 di Skola di Jileadi.

No sugundu sirkuitu seduba na sentru di Florida. Na ki tempu no pirsisaba di un karu, pa kila, no kumpra un son na un bon pres. Ma, na purmeru semana, bumba di yagu di no karu dana. No ka teneba diñeru pa kumpul. N liga un ermon ku N pensa kuma i pudi judanu. Ermon pidi un di si tarbajaduris pa i kumpu karu. Dipus ki kumpudu, i ka misti pa no pagal. I falan so: “Bu ka dibin nada.” Te mesmu i patinu diñeru suma prenda! I seduba un bon isemplu di kuma ku Jeova ta kuida di si servus. I lembrantanu di kuma no dibi di ba ta pati utrus.

Ora ku no na visitaba kongregasons, no ta fikaba na kasa di ermons. Pabia di kila, no tene manga di bons amigus. Un dia, N staba na bati un relatoriu di un kongregason, N disal na ña makina, N sai. Oca N riba ki di noti, N diskubri kuma un mininu di tris anu ku sta na familia ku risibinu, “judan” kabanta bati relatoriu. Pa manga di anus, N gozal pabia di kila.

Na 1971, N risibi un karta ku disignan pa sirbi suma superintendenti di distritu na sidadi di Nova York. No fikaba surprendidu! Oca no bai pa la, N teneba so 34 anu. Ermons risibinba diritu suma se purmeru superintendenti di distritu pretu.

Suma superintendenti di distritu, N ta kontentiba di nsina utrus aserka di Jeova kada fin di semana na asembleia di sirkuitu. Manga di superintendentis di sirkuitu teneba mas spiriensia di ki mi. Un delis ku fasiba ña diskursu di batismu. Utru i ermon, Theodore Jaracz, ku mas tardi bin sedu membru di Korpu Guvernanti. I tenba tambi manga di ermons ku tene spiriensia i ku staba na sirbi na Betel di Brooklyn. N gardisi ciu pa manera ku superintendentis di sirkuitu ku betelitas fasin sinti avontadi. N ojaba ku ña propi ujus kuma kes pastoris amorosu ta konfiaba na Palabra di Deus, i apoia organizason ku fidelidadi.  Se umildadi judan sirbi ku fasilidadi suma superintendenti di distritu.

Na 1974, Korpu Guvernanti disigna utru grupu di superintendentis di sirkuitu pa tarbaja na distritu. N riba mas pa tarbaja suma superintendenti di sirkuitu. Es bias i na sul di Karolina. Filismenti, na ki tempu kongregasons di pretus ku brankus ku sta na sul di Stadus Unidu ka sta mas divididu, ermons kontentiba ku kila.

Na fin di 1976, N disignadu pa sirkuitu di Jiorẑia ku staba entri Atlanta ku Kolumbus. N na lembra diritu di un dia ku N fasi diskursu di funeral pa sinku mininus pretu ku muri, oca algin pui fugu na se kasa. Mame tenba di bai ospital pabia i molostra. Manga di ermons ku irmas pretus ku brankus kontinua bai pa ospital pa konsola papes. N ojaba kuma, amor di ermons i kusa ku pudiba notadu. Ora ku servus di Deus mostra es tipu di amor pa n̈utru, e ta konsigi nguenta situasons mas difisil.

Na 1977, no pididu pa bai pa Betel di Brooklyn pa juda na un projetu pa alguns misis. Oca projetu staba kuas pa kaba, dus membrus di Korpu Guvernanti bin papia ku mi i ku Ruby, e puntanu si no misti fika di un bias pa sirbi na Betel. No seta konviti.

Duranti 24 anu, N tarbaja na Dipartamentu di sirvisu, nunde ku ermons ta lida ku asuntus sensivel i komplikadu. Pa manga di anus, Korpu Guvernanti da orientasons di akordu ku prinsipius di Biblia. Es ta usadu suma basi pa ruspundi purguntas, tambi i ta usadu pa trena superintendentis di sirkuitu, ansions ku pionerus. Es orientasons ku ta usadu pa trenamentu juda manga di ermons torna kristons mas maduru. Es ta pui pa organizason di Jeova torna mas forti.

Di 1995 te 2018, N visitaba manga di filialis suma representanti di sedi mundial, ku ta comaduba superintendenti di zona. N ta runiba ku Kumisons di Filial, betelitas ku misionarius pa nkoraẑa elis i juda elis lida ku kualker preokupasons. Pa utru ladu, ami ku Ruby no ta sinti nkoraẑadu pa spiriensias ku ermons ku irmas ta kontanu. Pur isemplu, na 2000 no visita Ruanda. No sintiba tokadu dimas di oja kuma ku ermons ku familia di betel konsigi salva di matansa ku ojadu na 1994. Manga delis pirdi kilis ke ama. Apesar di ke ke pasa, es ermons mostra fe, speransa ku alegria.

Gosi no tene ja mas di 80 anu. Na ultimu 20 anu, N sirbi na Kumison di Filial di Stadus Unidu. N ka ciga di bai universidadi, ma, N risibi minjor edukason di Jeova ku si organizason. Es purparan pa N pudi nsina utrus bardadis di Biblia ku pudi juda elis pa tudu tempu. (2 Kor 3:5; 2 Tim 2:2) N oja kuma ku mensaẑen di Biblia juda jintis minjoria se vida i tene amisadi ku se Kriadur. (Tiagu 4:8) Sempri ku no pudi, ami ku Ruby no kontinua nkoraẑa utrus, pa e da balur pa privileẑiu di aprindi aserka di Jeova i nsina utrus bardadis di Biblia. Es i un privileẑiu mas garandi ku un servu di Jeova pudi tene!