Tatasneyqa 1940 watas chaynejta Jehovaj testigosninwan Bibliamanta yachakuyta qallarerqanku. Chaymanta qhepaman manaña estudiajtinkupis, mamayqa Torremanta Qhawaj revistata, ¡Rijchʼariy! revistata saqechikullajpuni. 1950 watapi uj asamblea internacional Nueva York llajtapi ruwakorqa. Chaymantaj familiaywan rerqayku.

Pisi tiemponmantaj hermano Lawrence Jeffries visitariyta qallariwarqayku. Payqa mayta kallpachakorqa cheqa kajta yachachinawanpaj. Qallariypi manapuni allinchu rijchʼawarqa Jehovaj testigosnin mana politicaman chhapukusqanku, nitaj cuartelmanpis risqanku. Hermanoman nej kani: “Estados Unidosmanta tukuynin runas mana guerraman riyta munajtinkoqa, enemigosqa suyunchejman yaykuykamullankuman”, nispa. Hermano Jeffriestaj pacienciawan sumajta tʼukurichiwaj. Pay niwarqa: “Estados Unidosmanta tukuynin runas Jehovata sirvejtinku, enemigostaj yaykuykamojtinku, ¿nichu Jehovaqa yanapanman?”, nispa. Chayta, waj imastawan sutʼinchariwasqanqa, reparachiwarqa pantasqa kashasqayta. Chayrayku Bibliamanta astawan yachakuyta munarqani.

Mamayqa ñaupa watasmanta Torremanta Qhawaj revistasta, ¡Rijchʼariy! revistasta wasi urapi jallchʼasqa. Chay revistastataj ashkha horasta leej kani. Tiemponmanqa repararqani cheqa kajta yachakushasqayta. Chayrayku hermano Jeffrieswan Bibliamanta yachakuyta qallarerqani. Payqa ñaupajtaña Bibliamanta yachachiyta munawarqa. Chantapis sapa semana reunionesman riyta qallarerqani. Cheqa kajta yachakushasqayqa mayta gustawarqa. Chayrayku predicayta qallarerqani. ‘Jehová Diospa jatun pʼunchaynin qayllapiña’ kashasqanta yachaspa, imatachus ñaupajpi ruwayta munarqani chaykunata saqeporqani (Sof. 1:14). Universidadllapi yuyanaymantaqa, wajkunaman Bibliamanta cheqa kajta yachachiyta munarqani.

 Colegiota tukorqani 13 de junio de 1956 watapi. Kinsa dianmantaj uj jatun tantakuypi bautizakorqani. Ni yuyallarqanipischu ima bendicionestachus japʼinayta Jehovamanta yachakuyta, yachachiyta ima kausayniypi ñaupajman churaspa.

Bautizakusqaymanta sojta killanman precursor regular karqani. Diciembre de 1956 watamanta Reinomanta Willayninchej nisqa hojitapi inglés parlaypi uj yachaqana llojserqa. Chay yachaqanaqa hermanosta kallpacharqa, maypichus pisi willajkuna tiyan chaypi yanapakamunankupaj. Chayqa noqapajpis kashanman jina karqa. Chayrayku noqapis chaypi yanapakamuyta munarqani (Mat. 24:14).

Chayrayku Edgefield llajtitaman riporqani, chayqa Carolina del Surpi kashan. Chaypeqa uj congregación tiyarqa, tawa hermanosllataj karqanku. Noqawantaj phishqa karqayku. Reunionestaqa uj hermanoj wasinpi ruwaj kayku. Sapa killa 100 horasta predicaj kani. Predicacionmanta encargakuspa, congregacionmanta ruwanasniyta ruwaspa, discursosniyta wakichispa ocupasqa karqani. Jehovapaj astawan ruwaspaqa paymanta astawan yachakorqani.

Uj señoraman Bibliamanta yachachej kani. Payqa Johnston llajtitapi pʼampanapaj cajonesta vendej. Chayqa mana ancha karupichu karqa. Payqa kʼacha kasqanrayku khuskan tiempota trabajachiwarqa, saqewarqaykutaj ujnin wasinpi tantakuykunata ruwanaykuta.

Bibliamanta yachachiwarqa chay hermanoj wawan Jolly Jeffriesqa, Brooklynmanta (Nueva Yorkmanta) tiyakusharqani chayman jamporqa, khuskataj precursores karqayku. Paywanqa uj hermano mañariwarqayku chay auto wasisitupi tiyakorqayku.

Estados Unidospa sur ladonpeqa trabajadoresman pisillata pagaj kanku. Uj día trabajomantaqa iskay dolaresta chayri kinsa dolaresta jinalla ganakoj kayku. Uj pacha uj mashkha qolqesituy kapuwasqanta mikhunata rantikuspa tukuykorqani. Tiendamanta llojsimushajtiytaj uj caballero qayllaykamuwaspa tapuriwarqa: “¿Trabajotachu maskʼashanki? Sapa horamanta uj dolarta pagasqayki”, nispa. Paypaj kinsa diasta trabajarqani, wasita ruwasharqanku chayta pichapuspa. Chaypi sutʼita repararqani Jehová yanapashawasqanta Edgefieldpi qhepakunaypaj. Ajinapi rikukuspapis asamblea internacionalman riyta aterqani 1958 watapi, Nueva York llajtaman.

Chay asambleapi, iskay kaj diapi Ruby Wadlington hermanata rejserqani. Payqa Gallatin llajtapi precursora regular jina sirvisharqa (Tennesseepi). Iskayniyku misioneros kayta munarqayku. Chayrayku Galaad Escuelaman riyta munajkunapaj tantakuyman rerqayku. Aswan qhepamantaj escribinakorqayku. Uj pacha Gallatin llajtapi discursota qonaypaj invitawarqanku. Chaypi Rubyta tapurerqani noqawan casarakuyta munasqantachus manachus. Chantá congregacionninman riporqani, 1959 watapitaj casarakorqayku.

23 watasniyoj kashajtiy, Gallatin llajtamanta congregacionpi ancianosta umachajta jina churawarqanku. Charles Thompson sutiyoj hermanoqa congregacionesta waturej jina llankʼayta qallarisharqa,  congregacionniykutataj ñaupajta waturerqa. Payqa ashkha experienciayoj hermano karqa. Chaywanpis tapuriwarqa imastachus hermanos necesitasqankuta, imatatajchus ñaupajta congregacionesta waturej hermanos ruwasqankuta chay necesitasqankupi yanaparinankupaj. Paymanta yachakorqani tapurikunapuni kasqanta, niraj imatapis ruwashaspataj allintapuni qhawaykurina kasqanta.

Mayo de 1964 watapi, Ñaupajman Apajkunapaj Escuelaman invitawarqanku. Chay escuelaqa uj killata kaj, South Lansing llajtapitaj apakorqa (Nueva Yorkpi). Yachachejkunaqa yanapawarqanku Jehovamanta astawan yachakuyta munanallaypajpuni, astawan ñauparinallaypajpunitaj.

Enero de 1965 watapi, señoraywan khuska congregacionesta waturinaykupaj invitawarqayku. Congregacionesta visitarinaykupaj kachawarqayku chaypeqa, allin karusta rinayku karqa. Knoxvillemantapacha (chayqa kashan Tennesseepi), casi Richmondkama (chayqa kashan Virginiapi). Waturej kayku chay congregacionesqa kasharqanku Carolina del Nortepi, Kentuckypi, Virginia Occidentalpi ima. Visitaj kayku chay congregacionespeqa puro yana hermanitos karqanku. Estados Unidospa sur ladonpeqa leyes prohibisqanrayku yana runitus mana riyta atejchu kanku yuraj runaspa tantakuyninkuman. Hermanosqa wajchaslla karqanku, chayrayku imachus kapuwasqaykuta necesitajkunaman qoriyta yachakorqayku. Unayña congregacionesta waturej ujnin hermanomanta maytapuni yachakorqani. Pay niwarqa: “Hermanos paykunamanta ujninkuta jinalla qhawasunankupaj kallpachakuy. Congregacionesmanqa ama jefenkupis kawaj jinachu chayay. Paykunataqa yanapariyta atinki hermanonkuta jina qhawasojtillanku”.

Uj pacha uj juchʼuy congregacionta visitashajtiyku, señorayqa uj joven señoraman Bibliamanta yachachiyta qallarerqa, imillitanqa uj watitallayojraj karqa. Congregacionmanta ni pi yachachiyta atejtintaj, señoray cartasnejta yachachillarqapuni. Qhepan kutipi chay congregacionta visitarishajtiyku, chay señoraqa semanantinta reunionesman jamorqa. Chaymantataj iskay precursoras especiales chay lugarman riporqanku. Paykunataj chay señoraman yachachillarqankupuni bautizakunankama. 30 watasninman jinataj 1995 watapi, Patterson Betelpi uj joven hermana señorayta saludarqa. Estudiacherqa chay señoraj wawan kasqa. Chay joven hermanaqa qosanwan Galaad Escuelapi kashasqanku, clase 100 nisqapi.

Qhepan kaj circuitota waturisqaykutaj Floridapi karqa. Chaypachaqa uj autota necesitarqayku, chayrayku ujta baratollapi rantikorqayku. Jinapis semananman yaku bomban fregarpakorqa, nitaj qolqeyku karqachu arreglachinaykupaj. Yacharqani uj hermano yanapayta atiwasqaykuta, chayrayku payta wajyarerqani. Payqa ujnin trabajadorninta nerqa allinchapunawaykuta, nitaj munarqachu paganaykuta. “Ama hermanóy” nillawarqayku, qolqetawan regalawarqaykupis. Chay hermanopi repararqayku imaynatachus Jehová kamachisninta cuidawasqanchejta, yuyarichiwarqaykutaj qorikuyta yachanapuni kasqanta.

Congregacionesta waturishajtiykoqa hermanospa wasisninkupipuni alojakoj kayku. Chayrayku paykunawan sumaj amigos karqayku. Uj día congregación imaynatachus llankʼashasqanmanta informeta, máquina de escribirpi mana tukuchaspalla saqerparqani. Chay tarde wasiman chayanaykupajtaj, alojakusharqayku chay familiaj kinsa watitayoj yoqallitunku chay informej patanman maquinawan tukuy imata escribiykusqa. Chayta yuyarikuspa iskayniyku ashkha watasta asirikojllapuni kayku.

1971 watapi, uj cartapi niwarqanku Nueva York llajtapi superintendente de distrito jina sirvinayta. Chaytaj mayta tʼukuchiwarqayku. Chayman ripushajtiykoqa 34 watasnillayojraj karqani. Chay circuitota visitajkunamanta noqa ñaupaj kaj yana runa karqani, hermanostaj may kusiywan japʼikuwarqanku.

Superintendente de distrito kashajtiy, mayta gustawaj semana tukukuypi Jehovamanta yachachiy jatun tantakuykunapi. Congregacionesta waturejkunamanta ashkhasqa, noqamanta aswan experienciayoj karqanku. Paykunamanta ujnenqa bautizakushajtiy discursota qorqa. Ujnintaj Theodore Jaracz karqa, tiemponmantaj Diospa Llajtanta Kamachejkunamanta ujnin karqa. Chantapis Brooklynmanta Betelpi experienciayoj ashkha hermanos kallarqankutaj. Maytapuni agradecekuni chay hermanos mana qhawarawasqankumanta. Noqapuni rikorqani chay hermanosqa munakuyniyoj michejkuna kasqankuta. Paykunaqa Diospa Palabranpi atienekoj kanku, Diospa  llajtantataj tukuy sonqo yanapakoj kanku. Paykuna kʼumuykukoj sonqo kasqankurayku superintendente de distrito kayta atillarqani.

1974 watapi Diospa Llajtanta Kamachejkunaqa, congregacionesta waturejkunamanta uj mashkha hermanosta superintendentes de distrito kanankupaj churarqanku. Chayrayku watejmanta congregacionesta waturiyta aterqani, chay kutipitaj Carolina del Surpi. Chay tiempopajqa congregacionespi, circuitospipis yana hermanitos, yuraj hermanitospis manaña waj wajpichu tantakorqanku. Chayrayku hermanosqa may kusisqapuni kasharqanku.

1976 wata tukukuyta Georgiaman kachawarqanku, Atlantamanta Columbusman rinapi kaj circuitoman. Uj pacha phishqa yana wawitas pʼampakunankupaj discursota qosqayta yuyarikunipuni. Paykunaqa sajra runas wasinkuta ruphaykuchisqankurayku wañupusqanku. Mamankutaqa ruphasqa kasqanrayku hospitalman aparqanku. Payta, qosantawan sonqocharejtaj ashkha hermanos hospitalman jamorqanku. Paykunaqa yanitas, yurajkunitas ima karqanku. Chaypi rikorqani hermanospa munakuyninkoqa may jinapuni kasqanta. Hermanos ajina khuyakuyniyoj kasqankoqa, Diospa kamachisninta ima llakiytapis aguantanapaj mayta yanapawanchej.

1977 watapi, Brooklyn Betelpi uj mashkha killata uj trabajopi yanapakunaykupaj invitawarqayku. Chay trabajo tukukunanpajña kashajtintaj, Diospa Llajtanta Kamachejkunamanta iskay hermanos tapuriwarqanku Betelpi señoraywan qhepakuyta munasqaykutachus manachus. Noqaykutaj nerqayku qhepakuyta munasqaykuta.

24 watasta Departamento de Serviciopi yanapakorqani. Chaypi yanapakoj hermanosqa mana kutichiy atina tapuykunaman kutichiyta yachanku. Tiempo pasasqanman jina, Diospa Llajtanta Kamachejkunaqa Bibliaj nisqanman jina yanapasta orqhonku. Chay yanapaswan tapuykunaman kutichinku, wakichinkutaj congregacionesta waturejkunata, ancianosta, precursoresta ima. Hermanosta ajinata wakichisqankoqa, wiñay tukusqa cristianos kanankupaj yanapan, chaytaj Diospa llajtanta sumajta kallpachan.

1995 watamanta 2018 watakama ashkha sucursalesta visitajta kachawarqanku. Chaykunapeqa tantakoj kani sucursalesta kamachejkunawan, betelitaswan, misioneroswanpis paykunata kallpacharinaypaj, llakiykunasninkupitaj yanaparinaypaj. Noqawan señoraywanpis experienciasninkuta willariwajtiyku, kallpachasqasllataj kaj kayku. 2000 watapi Ruandaman rerqayku. Maytapuni sonqoyku nanawarqayku chay lugarmanta hermanos, Betelmanta hermanospis imaynatachus 1994 watapi ashkha runas wañurachisqas kasqankumanta willariwajtiyku. Ashkha hermanospa familiaresninku chaypi wañuchisqas kasqanku. Jinapis chay hermanospeqa sutʼi reparakorqa sinchʼi creeyniyoj kasqanku, suyakuyniyoj, kusisqataj kasqanku.

Kunanqa 80 watas kurajniyojña kayku. 20 watastaña Estados Unidospi Sucursalta kamachejkunamanta ujnin kani. Ni jaykʼaj universidadman rerqanichu. Jinapis Jehová, llajtanpis sumajta yachachiwanku. Chayqa wakichiwan Bibliamanta wajkunaman cheqa kajta yachachinaypaj, chaytaj paykunata wiñaypaj yanapanman (2 Cor. 3:5; 2 Tim. 2:2). Rikuni imaynatachus Biblia runasta aswan sumajta kausakunankupaj, Jehovamanpis qayllaykunankupaj yanapasqanta (Sant. 4:8). Jehovamanta yachakuy, Bibliaj cheqa yachachiykunasninta yachachiypis may sumajpuni. Noqawan señoraywantaj, wajkunaman niykupuni chayta ruwayta jatunpaj qhawanankuta. Chay jina ruwaymanta aswan sumajqa, mana Jehovaj kamachisninpaj kanmanchu.