1940 wichan taytäcunaga Jehovapa testiguncunawan Bibliapita yachacur galaycärergan. Ichanga tiempuwanga mana yachacurgannachu, chayno captinpis mamänëga jinalami chasquiycargan La Atalaya y ¡Despertad! revistacunata. 1950 watacho, taytäcunawanmi jatun asambleaman Nueva York marcacho aywargä.

Nircur Lawrence Jeffries waugui watucamajcanchi y calpachacurgan rasunpa cajta yachachimänanpaj. Nogaga “imanir-raj Jehovapa testiguncunaga politicawan talucanchu ni ejercitumanpis aywanchu” nir yarpaj cä. Chaymi wauguita nergä: “chiquicojcuna marcanchiman shamuptenga chipyaj ushacächimashwanmi guerraman mana aywaptinchega” nir. Chaymi, Jeffries wauguiga pacienciawan cayno tapucuycunawan tantiachimargan. “¿Estados Unidos naciuncho lapancuna Jehovata sirviptenga y chiquicojcuna shamuptin manachuraj chapaycunman?”. Aumi, pay yachaycächimashganga rasunpami cargan y cuentata gocurgä noga pantacashga caycashgäta.

La Atalaya y ¡Despertad! unay revistacunata mamänë churarächicushganta shumaj leir galaycurgä. Tiempuwanga rasunpa cajta yachacuycashgäta cuentata gocur galaycurgä, chaymi Jeffries waugui Bibliapita yachachimänanpaj nimaptin chasquicushcä. Jina lapan reuniuncunamanpis aywar galaycurgä. Chaymi rasunpa cajta masraj yachacuptë y convencido caycaptëmi yachachicurpis galaycurgä. Imata ruranäpaj musyargä “TAYTA DIOS jusganan junaj chayamunanpäga wallcanami pishin” Bibliapita yachacushgämi (Sof. 1:14). Universidäman yarpanäpaj trucan, waquincunata Diospita yachachicunäpäna munargä.

1956 watacho junio quilla 13 junajcho colegiuta ushargä, nircur quimsa junajcuna pasariptin asamblea de circuito nishgancho bautizacurgä. Manami  yarpargächu imayca bendiciuncunata chasquinäpaj cajta, Jehovapita yachacunäpaj y waquincunata Palabranpita yachachicunäpaj calpachacushgäraycur.

Bautizacushgäpita sojta quillacuna pasarcuptin, precursor regularno yanapacur galaycurgä. Inglés rimaycho Ministerio del Reino nishgan 1956 watapita shacyächergan más yachachicojcuna necesitaycashgan sitiucunacho aywanapaj. Chayga nogapämi caycargan, chaymi yachachicoj necesitaycashgan sitiuman aywargä (Mat. 24:14).

Chauraga Edgefield (Carolina del Sur) marcacho caycaj congregaciunman aywargä, chaychoga nogawanrämi pichga publicadorcunala carganchi. Reuniuncunataga juc hermanupa wasinchomi rurajcanchi. Cada quillami 100 horapitapis masrämi yachachicoj cä. Ocupadumi caycargä wasin wasin yachachicunapaj pushacur y congregaciuncho discursucunawan yachachicurpis. Jehovata masraj sirviptëga, paypita masrämi yachacoj cä.

Caycashganchipita cercalancho Johnston marcacho, juc warmita Bibliapita yachaycächergä. Payga funeraria nishgan negociuyoj cargan, y semanacho juc ishcay junajcuna paypaj arunäpaj aunimargan. Jina juc cuartutapis mañamarganchi reuniuncunata ruranapaj.

Bibliapita yachachimashgan wauguipa wamran Jolly Jeffries Brooklyn (Nueva York) marcapita noga cajman shamurgan, paywanmi yanagänacur precursorno cawarganchi juc waugui mañamashganchi carro niraj tacsha wasicho.

Estados Unidos naciunpa sur caj laduncho, arushganchipitaga ishcay o quimsa dolarcunatami cada junaj pagamajcanchi. Chaymi tiendacho micuyta rantir lapan guellaynëta ushargä, yarguycaptëmi juc runawan tincuycuptë tapumargan: “¿Aruyta ashiycanquichu?, arupämay cada horami juc dolarta pagashayqui”. Chauraga quimsa junajcuna juc lotincho wasita sharcachinanpaj pichapacur arurgä. Edgefield marcacho yachachicur siguinäpaj Jehová yanapaycämashganta clarumi ricargä. Guellaynë walcala captinpis 1958 watacho Nueva York marcacho asamblea internacional nishganman aywargä.

Chay asambleapa ishcay caj junajcho cushicuypämi cargan. Ruby Wadlington precursora panita reguiycurgä, payga Gallatin (Tennessee) marcapitami cargan. Ishcäcuna misioneruno yanapacuyta munapäcuptëmi, Galaad escuelaman aywayta munajcunapa reuniunman aywapäcurgä. Nircur cartacamurmi galaycärergä. Tiempuwanga Gallatin congregaciuncho discursanäpaj invitapäcamargan, chauraga discursanäpaj aywarmi Rubyta tapurgä: “¿Nogawan casaracuyta munanquichu?” nir. Chaypita marcancho caycaj congregaciunman aywargä y 1959 watacho casaracärergä.

23 watayoj caycaptë Gallatin congregaciuncho siervo de congregación nishganno yanapänäpaj nimargan (cananga ancianucunacho juc pushacoj nirmi reguinchi). Waugui Charles Thompson congregaciuncunata watucamojno chaylaraj galaycamushganpita punta caj congregación watucashganmi capäcurgä. Ali tantiaj y yachaj cristiano caycarpis  tapumargan, ¿congregaciuncho hermanucunaga imataj necesitarcaycan?, y ¿pasashgancho congregaciuncunata watucamojcuna imatataj rurargan chaycho yanapacunanpaj? Paypita yachacurgä imatapis decidinapäga puntataga shumaj tapucushwan y tantiacushwanpis.

Mayo quilla 1964 watapita, Escuela del Ministerio del Reino nishganman invitapäcamargan, juc quilla yachacunäpaj y chayga ruracargan South Lansing (Nueva York) marcacho. Chaychoga yachachicojcuna shumaj yanapämargan Jehovapita cada cadala yachacunäpaj y paywan más amigo canäpäpis.

Enero quilla 1965 watacho nogata y Ruby warmëwan congregaciuncunata watucamunäpaj invitapäcamargan. Watucamunapäga ricachipäcamargan Knoxville (Tennessee) marcapita Richmond (Virginia) marcacama, aypalami cargan. Chay marcacunachoga caycargan Carolina del Norte, Kentucky y Virginia Occidental congregaciuncuna. Chay wichan Estados Unidos naciunpa sur caj ladunchoga yana runacuna yuraj runacunawan shuntacärejchu, chaymi yana caj hermanucunalata watucärej cä. Hermanucunapa imaycancunaga walcalami cargan, chaymi necesitaycajcunawanga imatapis raquipänacur yanapacärejmi cä. Congregaciuncunata watucamoj juc ali yachaj waugui consejamargan: “Leon, congregaciuncunata watucar chayamuptiqui juc hermanuno comportacäriy y juc jefinoga mana, chaynopa paycuna juc hermanutano ricashuptiquega alimi yanapacunquipaj”.

Juc cuticho juc tacsha congregaciunta watucamur, Ruby juc jipash wamrayoj warmita Bibliapita yachachir galaycurgan, wamranga juc watayojlarämi cargan. Congregaciuncho pipis yachachinanpaj mana captinmi, Rubyga cartalapa yachachir siguirgan. Chay congregaciunta yapay watucamuptëna, chay warmiga lapan reuniuncunaman shamurgan. Nircurpis, lapan tiempuncunawan yachachicojcuna ishcay precursoracunami chayargan y paycunanami chay warmita yachachirgan bautizacushganyaj. 30 watacuna pasashganchomi 1995 watacho Patterson Betelcho caycaptëmi, juc jipash pani Ruby cajman aywar saludaycurgan. Chay panimi cargan Ruby yachachishgan warmipa wamran. Pay runanwanmi 100 caj clase Galaad escuelaman invitashga cargan.

Florida marcachona caycaj congregaciuncunata watucanäpaj juc carruta necesitaycargä, chaymi jucta rantirgä. Ichanga, juc semanala manijaycaptë malogracargan y alchachinäpäga guellaynë manami carganchu. Chaymi yanapämänanpaj juc wauguita gayargä. Paynami empleadunta mandargan cärrüta alchananpaj. Paynami arreglayta usharcur mana cobramarganchu, chaypa trucanga guellayta garamargan. Chayga ricachimargan Jehová sirvejnincunata imano cuidashganta, jina garacoj cashganchega alapa ali cashganta.

Congregaciuncunata watucaptëga imaypis hermanucunapa wasincunachomi posadacärej cä, chaynopa ali amigucunata rurargä. Juc cuticho watucashgä congregaciunpa informita manaraj ushar escribiycashga maquinalacho jaguiycushcä. Tardipa cutimuptëmi, posadacushcä familiapa quimsa watayoj juc wamranmi chay informita escribiyta “yanapamargan”. Chaypitami paywan tincurir achca watapa asicärej cä.

1971 watacho nipäcamargan, Nueva York marcacho caycaj circuitucunata watucamunäpaj. Almiracärirgämi. Chayman aywacäriptëga 34 watayojlarämi cargä. Chayno watucamoj wauguiga yana cajcunapita punta cajmi cargä, ichanga cushi cushilami hermanucunaga chasquipäcamargan.

Chayno yanapacurmi ushanan semanacunacho asamblea de circuito nishgancho discursucunawan Bibliapita yachachicuytaga gustamajmi. Achcaj congregaciuncunata watucamojcunaga nogapita más yachajmi cargan. Jucnin cajga bautizacunäpäpis discursamurganmi. Juccajga, Theodore Jaracz wauguimi cargan y tiempuwanga Cuerpo Gobernante nishgancho yanapacurgan. Brooklyn Betelcho yanapacoj hermanucunapis carganmi. Agradecicuyculämi watucamoj wauguicuna y betelitacuna ñanpu shongulancunawan ricaycalämashganpita. Cuyapäcoj, Diospa Palabranman yäracoj y Cuerpo Gobernante camacächishgan yachachicuycunata shumaj cäsucoj hermanucunami capäcurgan. Paycuna humilde capäcuptinmi circuitucunata watucamojno yanapacunäpaj facilmi cargan.

1974 watacho Cuerpo Gobernante nishgan congregaciuncunata watucamojcunapita waquincunata acrargan circuitucunata watucamunanpaj. Chaymi  nogata yapay congregaciuncunata watucamunäpaj nipäcamargan, Carolina del Sur particho. Chay wichan cushicuypaj cargan, congregaciuncunacho yana caj y yuraj caj hermanucunaga shuntacärejna, manami raquicashganachu caycargan. Chaynolami cargan circuitucunachopis.

1976 wata ushanancho, Georgia marcaman aywanäpaj nipäcamargan. Atlanta y Columbus marcacunapa chaupincho congregaciunta watucamushgächo, pichga yana wamracunapa discurso de funeral nishganta yachachicushgäta gongayta puedëchu. Wasinmi rupacurgan, chaymi wamracuna wanurgan y mamantaga hospitalman apapäcurgan. Chay wanushga wamracunapa taytancunamanmi achca hermanucuna chayamoj shacyachipäcunanpaj. Chaychomi ricargä yana caj y yuraj caj hermanucuna cuyacoj capäcushganta. Cuyapäcoj captinchega imayca sasacunata aguantanapaj yanapämanchi.

1977 watacho Brooklyn Betelcho juc ishcay quillacuna yanapacunäpaj invitapäcamargan. Nircur yanapacunäpaj nimashganta ushaycaptëna, ishcay wauguicuna Cuerpo Gobernante cajcunapita Rubywan y nogawanpis shuntacargan y tapupäcamargan: ‘¿Betelcho más yanapacunayquipaj quedacunquimanchuraj?’. Chauraga nogacuna ‘aumi’ nipäcurgä.

24 watacunami Departamento de Servicio nishgancho yanapacushcä, chaychoga hermanucunapa sasa tapucuynincunata contestar yanapacärejmi cä. Tiempo pasashganmanno, Cuerpo Gobernante cajcunapita Biblia yachachicushganno yanapacuycunata camacächergan. Chaycunawanmi congregaciuncunata watucamojcunata, ancianucunata y lapan tiempuncunawan yachachicojcunata yanapacärej cä. Chaynopa achca hermanucuna Jehovawan más amigo cananpaj y congregaciunnincho shumaj sirvir caycänanpäpis yanapacurgan.

1995 watapita 2018 watacama Cuerpo Gobernante cajcunapitano (unaycho superintendente de zona nirmi reguipäcoj) achca sucursalcunata watucamushcä. Chaymi sucursalcunata ricajcunawan, betelitacunawan y misionerucunawanpis shuntacar, ima yarpachacächishgancunapita imalachopis yanaparcunäpaj tapucoj cä. Jina, noga Rubywan shacyächishga capäcurgä wilamashgancunata wiyar. 2000 watacho Ruanda naciuncho caycaj sucursalta watucamurgä. Chaycho caycaj betelitacuna y hermanucuna 1994 watacho wanuchicuy wichan, imayca sasacunata aguantapäcushganta wiyar almiracurgä. Chaychicajmi cuyashgan castancuna wanurgan. Chayno captinpis, yäracuycarla, esperanzayoj y cushishgala carcaycan.

Cananga 80 watayoj masna caycä. 20 watacunami Comité de Sucursal nishgancho yanapacuycä, Estados Unidos marcapita. Universidämanga manami aywargächu, Jehovami marcanwan shumaj yachachimargan. Chaynopami waquincunatapis Bibliapita yachachicushcä imaycamapis cawapäcunanpaj (2 Cor. 3:5; 2 Tim. 2:2). Ricashgämi Bibliapita yachacur cäsucojcunaga cawaynincuna aliyashganta, jina Jehovawan amigo cananpäpis yanapacushganta (Sant. 4:8). Nogawan Rubyga imaypis oportunidad captenga pitapis shacyächipäcö cada cadala Jehovapita yachacushganchi y waquincunata yachachicushganchega imawanpis mana tincushganta, chayga Jehovapa sirvejcunapaj alapa alimi caycan.