1940 huata qꞌuipaca ñuca yaya mamaca testigo de Jehovacunahuanmi Bibliamanta yachai callarircacuna. Qꞌuipaca Bibliata yachanata saquishpapish ñuca mamaca La Atalaya y Despertad nishca revistacunatami chasquishpa catirca. 1950 huatapica Nueva York llajtapimi shuj asamblea internacional tiyarca. Chaimanca tucuicunami rircanchij.

Asha tiempo qꞌuipaca huauqui Jeffriesca Bibliamanta yachachingapajmi ñucata visitai callarirca. Callaripica ñucaca Testigocuna politicapi, guerracunapi mana chagrurishcamantami mana de acuerdo carcani. Chaimantami ñucaca “Estados Unidos llajtamanta tucuicuna ejercitoman mana rijpica contracunaca ñucanchijtami llaquichi pudin” nij carcani. Pero cai huauquica ñucamanca pacienciahuanmi yachachij carca. Shuj cutinca paica: “¿Canca imatataj yuyangui? ¿Estados Unidos llajtamanta tucuicuna Jehová Diosta sirvijpi, contracuna llaquichisha nijpica Jehová Diosca imatataj ruranga?” nishpami tapurca. Chashna alajata intindichijpica ñucaca pandata yuyacushcatami cuentata curcani, Bibliamanta ashtahuan yachanatapishmi munarcani.

Chaimi ñuca mama huaquichishca La Atalaya y Despertad revistacunata achca horascunata liyishpa pasaj carcani. Tiempohuanca Bibliamanta verdadta yachacushcatami cuentata curcani. Chaimantami huauqui Jeffrieshuan Bibliamanta estudiai callarircani. Tandanacuicunamanpishmi ri callarircani. Qꞌuipaca publicadorpishmi tucurcani. Jehová Diospaj jatun punlla cꞌuchullapi cashcata intindishpacarin shujtaj metacunatami churarircani (Sofonías 1:14). Universidadman rinapaj randica cunanca gentecunaman Bibliamanta yachachinatami munarcani.

13 de junio de 1956 huatapimi colegiota tucuchircani. Quimsa punllacuna huashallami shuj jatun tandanacuipi bautizarircani. Jehová  Diosmanta yachashcamanta, paimanta yachachishcamanta achca bendicioncunata chasquigrishcataca manataj yuyarcanichu.

Ñuca bautizarishca seis quilla huashaca precursor regularmi tucurcani. Diciembre de 1956-pi llujshishca Ministerio del Reinopica, huillajcuna minishtirin congregacioncunapi sirvichunmi animarca. Chaimi ñucaca shujtaj congregacionpi sirvinaman rinata munarcani (Mateo 24:14).

Chaimantami Carolina del Sur Edgefield nishca llajtapi saquirij congregacionman rircani. Chaipica cinco publicadorcunallami carcanchij. Tandanacuicunataca shuj huauquipaj huasipimi charircanchij. Cada quillami ñucaca 100 horascunata predicaj carcani. Chashna predicashpa, asignacioncunata, conferenciacunatapish preparashpami ocupado pasaj carcani. Jehová Diosta ashtahuan sirvishpaca paimantami ashtahuan yachai tucurcani.

Johnston nishca cꞌuchulla pueblopica funerariata charij shuj huarmimanmi Bibliamanta yachachi callarircani. Paica huaquin punllacunata chaipi trabajachunmi nirca. Shinallatajmi tandanacuicunata rurachun shuj uchilla huasitapish mañachirca.

Huauqui Jolly Jeffriesca ñucaman yachachijpaj churimi carca. Paica Nueva York llajtamantami ñuca causacushca llajtaman shamurca. Paihuanmi siempre predicaj carcani. Shinallataj shuj huauqui mañachishca remolque carropimi paihuan causarcani.

Ñuca causacushca ladopica shuj punllata trabajajpipish ishqui o tres dolarcunallatami pagajcuna carca. Shuj cutinca micunata randishcamantami cullqui illaj saquirircani. Pero chai tiendamanta llujshijpica shuj runaca: “¿Ñucahuan trabajasha ninguichu? Cada horasmantami shuj dolarta pagasha” nircami. Paipajca allpata pꞌichashpami quimsa punllacunata trabajarcani. Chaita ricushpaca chaipi sirvishpa saquirichun Jehová Dios munashcatami cuentata curcani. Qꞌuipacarin 1958 huatapi Nueva Yorkpi tiyaj asamblea internacionalmanmi ri tucurcani.

Chai asambleapaj ishqui punllapica Ruby Wadlington shuti precursoratami rijsircani. Paica Tennessee, Gallatin nishca llajtapimi sirvij carca. Chai asambleapica ishquindijmi escuela de Galaadman ringapaj tandanacuiman rircanchij. Chai huashaca cartacunata rurashpami escribiri callarircanchij. Shuj cutinca Gallatin llajtapi tiyaj congregacionpi shuj conferenciata cuchunmi invitarcacuna. Chai congregacionman rishpaca Rubytaca: “¿Ñucahuan cazarasha ninguichu?” nishpami tapurcani. Qꞌuipaca paipaj congregacionpi sirvinamanmi rircani. Ñucanchijca 1959 huatapimi cazararcanchij.

Ñuca 23 huatacunata charishpaca Gallatinpi tiyaj congregacionpica ancianocunata pushajmi tucurcani. Chai congregaciontaca por primera vez mushuj superintendente de circuito Charles Thompsonmi visitagrirca. Paica achca experienciatami charirca. Shinapish congregacionman chayashpaca ñucataca huauqui panicunata ima shina ayudana cashcata, shujtaj superintente de circuito  paicunata ima shina ayudashcatami tapurca. Chaita ricushpaca ñucaca imata manaraj decidishpa huauqui panicunata tapuna cashcata, ima tucucushcata alli yachana cashcatapishmi paimanta yacharcani.

Mayo de 1964 huatapica South Lansing, Nueva York llajtapimi escuela del Ministerio del Reinoman ñucata invitarcacuna. Chai escuelapica shuj quillatami yacharcani. Chaipi yachachij huauquicunaca Diosmanta ashtahuan yachana munaita charichun, espiritualmente sinchiyachina munaita charichunpishmi ayudarcacuna.

Enero de 1965-pica ñucataca superintendente de circuito cachunmi invitarcacuna. Chaimi ñuca huarmihuanca Tennessee Knoxville llajtamanta, Virginia Richmond llajtacama tiyaj congregacioncunata visitana carcanchij. Carolina del Norte, Kentucky y Virginia Occidental nishca llajtacunapi tiyaj congregacioncunatapishmi visitana carcanchij. Pero chai tiempopica Estados Unidos llajtapica yanacunahuan blancocunahuan tandanacuchunca mana saquircacunachu. Chaimantami yana huauqui panicuna tiyaj congregacioncunallata visitaj carcanchij. Chai huauqui panicunaca pobrecunami carca. Chaimantami ñucanchij charishca cosascunahuan paicunata ayudaj carcanchij. Achca experienciata charij shuj superintendente de circuitoca ñucataca: “Congregacioncunata visitashpaca jatun tucushca, shuj jefe shinaca mana canachu cangui. Ashtahuanpish huauqui panicuna shina humildemi cana cangui. Chashnami huauqui panicunata ayudai tucungui” nircami.

Shuj cutinca shuj congregacionta visitashpaca ñuca huarmi Rubyca shuj joven huarmimanmi Bibliamanta yachachi callarirca. Paica shuj huatata charij ushushitami charirca. Huauqui panicuna cai huarmiman Bibliamanta mana yachachi pudishcamantami ñuca huarmica cartacunata quillcashpa paiman yachachirca. Chai congregacionta cutin visitajpica chai huarmica tucui tandanacuicunamanmi rirca. Qꞌuipaca ishqui precursoras especialesmi cai huarmi bautizaringacama Bibliamanta yachachishpa catircacuna. 30 huatacuna huashaca 1995 huatapica Pattersonpi tiyaj Betelpimi shuj joven panica ñucatapish, ñuca huarmitapish saludangapaj cꞌuchuyarca. Chai panica 30 huatacuna huashaman Rubyhuan yachacujpaj ushushimi carca. Paica paipaj cusahuanmi escuela número 100 de Galaadman rishca carca.

Qꞌuipaca Floridapi tiyaj congregacioncunatami visitana carcanchij. Chaipajca shuj carrotami minishtircanchij. Chaimantami shuj baratolla carrota randircanchij. Pero callari semanallapitajmi carropaj yacuta churana bombaca dañarirca. Chaita allichingapajca cullquitaca mana charircanchijchu. Chaimi carrota allichichun shuj huauquipajman rircanchij. Chai huauquica paipaj trabajadortami ñucanchij carrota allichichun nirca. Qꞌuipacarin imata mana cobrashpami cullquitaraj convidarca. Chai huauqui chaita rurashpaca Jehová Dios ñucanchijta cuidacushcata, ñucanchijpish huauqui panicunata chashnallataj ayudana cashcatapishmi yuyachirca.

Congregacioncunata visitashpaca huauqui panicunapaj huasipimi saquirij carcanchij. Chaimantami achca amigocunata charircanchij. Shuj cutinca shuj congregacionpaj informetami ruracurcani. Pero ruranataca na tucuchircanichu. Informeta ruranaman tigrajpica chaipi tiyaj shuj huahuami informeta tucuchishcarca. Chaita yuyarishpami chai huahuahuan asij carcanchij.

1971 huatapica Nueva York llajtapi superintendente de distrito cachunmi nombrarcacuna. Chai asignacionta chasquinataca mana shuyarcanchijchu. Ñucaca 34 huatacunallatami charircani. Chai llajtapica ñucaca primer superintendente de distrito yanami cagrircani. Pero huauqui panicunaca ñucanchijtaca allimi chasquircacuna.

Ñucaca superintendente de distrito cashpaca asamblea de circuitopi conferenciacunata cunatami achcata munarcani. Achca superintendente de circuito huauquicunaca ñucata yallimi achca experienciacunata charijcuna carca. Por ejemplo, shuj superintendenteca ñuca bautizarina discursotami cushca carca. Caishuj huauqui superintendenteca Theodore Jaracz shutimi carca. Paica tiempohuanca Cuerpo Gobernantepimi sirvi callarirca. Shinallataj Brooklynpi tiyaj Betelpi sirvij huauquicunaca achca experienciatami charijcuna carca. Pero cai superintendente de circuito huauquicuna,  betelitacunapish ñucataca respetajcuna, alli tratajcunami carca. Paicuna Diospaj Shimipi confiashcata, Diospaj organizaciontapish apoyashcatami ricurcani. Paicuna humildes cashcamantami ñucaca superintendente de distrito cashpaca cushilla sintirircani.

1974-pica Cuerpo Gobernanteca huaquin superintendente de circuito huauquicunatami superintendente de distrito shina sirvichun nombrarcacuna. Chaimantami ñucaca Carolina del Surpi cunanca superintendente de circuito shina sirvi tucurcani. Chai tiempopajca blancocunahuan yanacunahuan ñami tandanacui tucurcacuna. Chaimantami huauqui panicunaca cushilla carcacuna.

1976 tucuri huatapica Georgia llajtata visitachunmi cacharcacuna. Shuj punllaca huaquin huauqui panicunapaj huasicunatami rupachircacuna. Chaimantami pichca yana huahuacuna huañurcacuna. Chaica llaquimi carca. Paicunata pambangapajmi shuj conferenciata cuna carcani. Paicunapaj mamacunaca rupashcamantami hospitalpi carcacuna. Achca yana, blanco huauqui panicunami paicunata animachingapaj rircacuna. Chaipimi Diospaj pueblolla achca cꞌuyaita charishcata ricurcani. Cꞌuyaita ricuchishpaca llaquicunata charijpipish Jehová Diosta sirvishpa catichunmi ayudan.

1977 huatapica Brooklyn llajtapi caj Betelpi huaquin quillacunata trabajachunmi invitarcacuna. Chai trabajo ña tucuricujpica Cuerpo Gobernantepi sirvij ishqui huauquicunaca ñucataca: “¿Nachu canpish, cambaj huarmi Rubypish caipi sirvinata munanguichij?” nishpami tapurcacuna. Ñucanchijca ari nircanchijmi.

24 huatacunatami Departamento de Serviciopi ayudashpa trabajarcani. Chaipica sinchi tapuicunata contestangapajmi esforzarincuna. Cuerpo Gobernanteca chai departamentopi sirvij huauquicuna chai tapuicunata Bibliahuan contestachunmi ayudan. Shinallataj superintendente de circuito huauquicunata, anciano huauquicunata, precursores huauqui panicunata ayudachunmi yachachishcacuna. Chashna yachachishcamantami Jehovapaj organizacionpish, huauqui panicunapish espiritualmente sinchi cancuna.

1995 huatamanta 2018 huatacamaca Brooklyn llajtamantami huaquin sucursalcunata visitachun cacharca. Chaipica chai Comité de Sucursalpi sirvij huauquicunata, betelitacunata, misionerocunata ayudangapaj, animangapajmi paicunahuan tandanacui pudircani. Ñucapish, ñucapaj huarmi Rubypishmi paicunata uyashpaca achcata animarij carcanchij. 2000 huatapica Ruanda llajtatami visitarcanchij. Chai llajtapica 1994-pica shuj jatun macanacuimi tiyarca. Chai macanacuipica huaquin huauqui panicunapaj familiami huañushca carcacuna. Chai llaquita pasashca cashpapish huauqui panicunaca Jehová Diospi crishpa, paita cushilla sirvishpami catircacuna.

Cunanca ñami 80 huatacunata yallita charinchij. Cai tucuri 20 huatacunataca Estados Unidos llajtapi tiyaj Comité de Sucursalpimi sirvi pudishcani. Ñucaca universidadmanca nunca mana rircanichu. Pero Jehovaca paipaj organizacionhuanmi yachachishca (2 Corintios 3:5; 2 Timoteo 2:2). Chashnami shujtaj gentecuna Bibliamanta yachachun, Diostapish sirvichun ayudai tucushcani (Santiago 4:8). Ñucaca ñucapaj huarmindijmi Jehová Diosmanta yachana oportunidadta aprovechachun, shujtajcunaman Bibliamanta yachachina oportunidadtapish aprovechachun animanchij. Chaicunaca achca valishcami can.