1940 wata qipamanmi tayta-mamay biblia estudiayta qallaykurqaku testigokunawan, ichaqa saqirurqakum. Chaywanpas mamayqa hinallam La Atalaya hinaspa ¡Despertad! qillqakunata sapa killa chaskikuq. 1950 watapim huklaw nacionmanta kaq iñiqmasinchikkunawan huñunakurqaniku Nueva York llaqtapi, chaymanmi lliw familiaywan rirqaniku.

Asamblea pasaytam Lawrence Jeffries sutiyuq iñiqmasinchik watukamuwaykuta qallaykurqa. Paywanmi biblia estudiayta qallaykurqani. Testigokuna politicaman mana yaykusqankumanta hinaspa militar kayta mana munasqankumantam mana allinta piensarqani. Yachachiwaqniytam niq kani: “Estados Unidospi runakuna guerraman mana riyta munaptinkuqa huklaw nacionmanta kaqkunachiki munaychakuruwasun”, nispay. Lawrenceqa mana piñakuspanmi yuyaymananaypaq niwarqa: “Estados Unidospi lliw runakuna Jehova Diosta serviptin enemigonkuna paykunawan peleananpaq hamuptinqa, ¿imatataq Diosqa ruwanman?”, nispa. Chayna sumaqta yachachiwasqanraykum astawanraq yachayta munarqani.

Mamaypa churakusqan La Atalaya hinaspa ¡Despertad! qillqatam leeyta qallaykurqani. Cuentatam qukururqani Diosmanta imam kaqta testigokuna yachachisqankuta. Chaymi Lawrencewan biblia estudiayta qallaykuspay huñunakuykunaman riyta qallaykurqani. Yachasqaykuna sunquyman chayaruptinmi Diosmanta willakuyta qallaykurqani. Diospa piñakuynin punchaw kayllapiña kasqanmanta yacharuspaymi universidadpi estudianaypaq tantiakusqaytaqa saqirurqani (Sof. 1:14). Astawanqa munarqani runakunaman bibliamanta yachachiytañam.

 1956 watapim junio killapi colegioyta tukuruspay kimsa punchaw pasayllata hatun huñunakuypi bautizakururqani. Chaymanta qipamanmi Diosta servinaypaq astawan kallpanchakurqani.

Bautizakusqaymanta suqta killa pasaytam precursor regular kayta qallaykurqani. 1956 watapim diciembre killapaq Ministerio del Reino qillqanchik nirqa, aslla iñiqmasinchikkunapa kasqanman rispa Diosmanta willakunaykupaq. Chaymi kallpanchawarqa huklawman rinaypaq (Mat. 24:14).

Edgefield sutiyuq llaqtamanmi rirqani, chayqa kachkan Carolina del Sur lawpim. Chaypiqa karqa 4 iñiqmasinchikkunallam. Ñuqawanñam 5 karqaniku. Huk iñiqmasinchikpa wasinpim huñunakurqaniku. 100 horatam sapa killa Diosmanta willakuq kaniku.Yanapakurqanitaqmi huñunakuykunapi yachachispa hinaspa ima ruway kasqanpipas. Chaywanmi Diosman astawan asuykurqani.

Wañusqakunapaq cajonta rantikuq señoramanmi bibliamanta yachachirqani. Chay señoram niykuwarqa chawpi punchawkama llamkapakunaypaq. Niykuwarqakutaqmi wasinpi kaq huknin cuartopi huñunakunaykupaqpas.

Kasqay llaqtamanmi Brooklyn llaqtamanta iñiqmasinchik Jolly Jeffries hamurqa, payqa karqa bibliamanta yachachiwaqniypa churinmi. Paywanmi precursor karqaniku. Huk iñiqmasinchikpa uchuy wasichanpim yacharqaniku.

Tukuy punchawmi llamkaq kaniku iskay utaq kimsa dolar qullqillapaq. Huk punchawllapaqñam qullqichay karqa. Chay punchawpi rantipakusqaymanta lluqsiramuptiymi huk runa niwarqa: “¿Llamkapakuwankimanchu? Huk dolartam sapa hora pagasqayki”, nispa. Wasita ruwanankupaq terrenota limpiaypim chay runapaq kimsa punchaw llamkarqani. Chaynatamá Jehova Diosqa yanapawarqa chaypi hinalla yanapakunaypaq. Qullqiy pisilla kaptinpas 1958 watapim huklaw nacionmanta kaq iñiqmasinchikkunawan hatun huñunakuypi kanaykupaq Nueva York llaqtaman rirqani.

Chay huñunakuypi kachkaspaymi riqsirurqani Ruby Wadlington sutiyuq iñiqmasinchikta. Payqa precursora regularmi karqa Gallatin llaqtapi, chayqa karqa Tennessee lawpim. Iskayniykum munarqaniku misionero kayta, chaymi galaad escuelaman riqkunapaq huñunakuyman rirqaniku. Chaymantam riqsinakunaykupaq cartata apachinakurqaniku. Huk kutipim niykuwarqaku Gallatin llaqtapi yachachinaypaq. Chaypim Rubyyta nirqani ñuqawan casarakunanpaq. Chay llaqtaman astakuruptiymi 1959 watapi casarakururqaniku.

Gallatin llaqtapim 23 watallaypiraq kachkaptiy niykuwarqaku siervo de congregacion kanaypaq, kunan tiempopim ninku punta apaqmasinkunata yanapaq nispa. Chaypi kachkaptiykum  llaqtan-llaqtan watukuq Charles Thompson watukamuwarqaku. Payqa unay wataña Jehova Diosta serviqmi karqa. Paymi tapuykuwarqa iñiqmasinchikkunata imaynata astawan yanapanamanta chaynataq paymanta ñawpaqta hamuq llaqtan-llaqtan watukuqkuna imaynata yanapasqankumantapas. Chaywanmi yacharqani imapaqpas allinta tantianapaqqa tapurikunamanta.

1964 watapim mayo killapi Escuela del Ministerio del Reino sutiyuq escuelaman rirqani. Chayqa karqa killantinmi South Lansing llaqtapi Nueva York lawpi. Chaypi yachachiqkunam anchata kallpanchawarqaku Diosmanta astawan yachanaypaq, chaynapi iñiyniypi astawan ñawparinaypaq.

1965 watapi enero killapim niykuwarqaku señoraypiwan llaqtan-llaqtan watukunaykupaq. Chaymi achka llaqtakunaman rirqaniku. Chay tiempopiqa yana kasta iñiqmasinchikkunallamanmi watukuq kaniku. Autoridadkunam mana munaqkuchu yana kastakunawan gringo kastakuna hukllawakunankuta. Chaylawpi iñiqmasinchikkunaqa wakcham karqaku, chaymi imachallatapas quykanakuq kaniku. Unay wataña llaqtan-llaqtan watukuq iñiqmasinchikmi kaynata niwarqa: “Iñiqmasinchikkunamanqa amayá patronninku hinaqa chayaychu, aswanqa wawqinku, turinku hinayá. Chayna kaspaykiqa atinkim paykuna yanapayta”, nispa.

Watukusqaykupim señoray Ruby bibliamanta huk señoraman yachachiyta qallaykurqa, paypam karqa huk watachayuq warmi warmachan. Chay señoramanmi cartata apachispan señorayqa yachachirqa. Chay llaqtaman hukpi watukuptiykum chay señoraqa huñunakuykunaman hamurqa. Chaymantaqa precursor especial kaq iñiqmasinchikkunañam bautizakunankama yanaparqaku. Chaymanta yaqa 30 wata pasaytam 1995 watapi Patterson llaqtapi betel wasipi kachkaptiyku huk iñiqmasinchik señoray Rubyyta saludananpaq asuykurqa. Payqa kasqa señoraypa yachachisqan señorapa wawanmi. Payqa qusanpiwanmi galaad escuelapi kanankupaq hamusqa.

Chaymantaqa Florida lawmanñam watukuyta qallaykurqaniku. Chaypiqa carrotam necesitarqaniku, chaymi as qullqillawan huk carrochata rantirurqaniku. Ichaqa punta kaq semanallapim malograkururqa. Manam qullqiyku karqachu arreglachinaykupaq. Chaymi huk iñiqmasinchikta qayarqani yanapawanankupaq. Paymi llamkapuqninta nirqa carroykuta arreglapuwanankupaq. Pagapuyta munaptiykupas “amaña” nispam niwarqaku. Chaymantapas qullqitam quykuwarqaku. Chaywanmi cuentata qukurqaniku Jehova Dios yanapawasqankuta hinaspa qukuykuq kayqa ancha allin kasqanta.

Maylaw llaqtamantapas watukuq rispaykuqa iñiqmasinchikkunapa wasinpim samapakuq kaniku, hinaspam paykunawan astawan riqsinakuq kaniku. Huk kutipim iñiqmasinchikkuna imayna tarikusqankumanta willakunaypaq maquinaypi qillqarqani. Ichaqa manaraq tukuchkaspaymi saqiykurqani. Kutimuspa qawaykuptiymi wasiyuqpa warmachan pukllakurusqa qillqasqaywan. Chayta yuyarispaykum sapa kuti asikuq kaniku.

1971 watapim cartata chaskirurqani Nueva York llaqtapi llaqtan-llaqtan watukuqkunata watukunaypaq. Chay watapiqa 34 watallaypiraqmi kachkarqani. Chaypiqa gringo kasta iñiqmasinchikkunamanmi watukuyta qallaykurqaniku. Paykunaqa yana kasta kaptiykupas kuyakuwanmi chaskiykuwarqaku.

Llaqtan-llaqtan watukuq kaspaymi semana tukuyta iñiqmasinchikkunata asambleapi yachachiq kani. Chayqa anchatam kusichiwaq. Watukuq wakin iñiqmasinchikkunaqa unay wataña Diosta serviqkunam karqaku. Hukninmi karqa bautizakuptiy yachachiq. Chay tiempopiqa iñiqmasinchik Theodore Jaraczmi llaqtan-llaqtan watukuq karqa. Chaymantam payqa Diospa llaqtanpi huknin punta apaqña karqa. Karqataqmi unay wataña Brooklyn betelpi kaq iñiqmasinchikkunapas. Paykunaqa sumaqllata rimapayawaspankum hawkalla kanaypaq yanapawarqa. Iñiqmasinchikkunatapas Jehova Diospa yachachikuyninman hina yachachispankum allinta yanaparqaku. Chayna humilde kasqankum ñuqatapas  yanapawarqa llaqtan-llaqtan watukuq iñiqmasinchikkunata yanapanaypaq.

1974 watapim Diospa llaqtanpi punta apaqkuna nirqaku llaqtan-llaqtan watukuq wakin iñiqmasinchikkunapas llaqtan-llaqtan watukuqkunata yanapanankupaq. Chaymi ñuqaqa kaqmanta llaqtan-llaqtan watukuq karqani Carolina del Sur lawpiña. Chay tiempopaqqa gringo kastakunam yana kastakunawan kuskaña huñunakurqaniku. Chaywanqa kusikurqanikum.

1976 watapiñataqmi niykuwarqaku Georgia lawman rinaykupaq. Chaypim discursarqani pichqa yana warmachakunapa wasinku kañakuruptin wañuptinku. Chay warmachakunapa mamanñataqmi hospitalpi karqa. Chaymi achka iñiqmasinchikkuna gringo hinaspa yana kastakunapas watuykuq rirqaku. Chayna llakipayakuq kasqankum sasachakuypi kaq iñiqmasinchikkunata kallpanchan Diospi hinalla hapipakunankupaq.

1977 watapim niykuwarqaku Brooklyn betel wasipiña wakin killakuna yanapakunaykupaq. Chaypi yanapakuyta tukuykuchkaptiykuñataqmi Diospa llaqtanpi punta apaqkunamanta iskay iñiqmasinchikkuna niwarqaku betel wasipi hinalla yanapakunaykupaq. Chaymi señoraypiwan chaypiña qiparqaniku.

Chaypim 24 watakuna llamkarqani Diosmanta willakuypi cuentallikuqkunawan. Iñiqmasinchikkunapa tapukuyninkutam contestaq kaniku. Chaytam watakuna pasasqanman hina llaqtan-llaqtan watukuqkunaman, punta apaqkunaman hinaspa precursor regularkunaman yachachinankupaq servichikurqaku. Chaynata yachachisqankuwanmi iñiqmasinchikkunaqa Diospi astawan hapipakunku.

1995 watamanta 2018 watakamam Diospa llaqtanpi punta apaqkunapa rantinpi huklaw nacionkunaman rirqani betel wasipi yanapakuqkunata watukunaypaq. Chaymi huñunakuq kani betelpi cuentallikuqkunawan, chaypi yanapakuqkunawan hinaspa misionerokunawanpas, chaynapi paykunata kallpanchaykunaypaq. Iñiqmasinchikkunata Dios imayna yanapasqanmanta willawasqankum anchata kallpanchawarqaku. 2000 watapim Ruanda nacionman rirqaniku. Chaypim betel wasipi yanapakuq iñiqmasinchikkuna willawarqaku 1994 watapi wañuchinakuy kaptin imayna tarikusqankumanta. Chaypi iñiqmasinchikkunapa wakin ayllunkutapas wañurachisqakum. Chaywanpas paykunaqa mana hukmanyaspankum hinalla Jehova Diospi hapipakurqaku.

Kunanqa 80 wata masniyuqñam kachkaniku. 20 watam Estados Unidos betel wasipi cuentallikuqkunamanta huknin karqani. Universidadmanqa manam rirqanichu, ichaqa Jehova Diosmi allinta yachaykachiwarqa. Chaywanmi runakunaman bibliamanta yachachirqani wiñay kawsayta haypanankupaq (2 Cor. 3:5; 2 Tim. 2:2). Bibliamanta yachachikuykunaqa runakunatam yanapan kusisqa kawsakunankupaq hinaspa Jehova Diosman asuykunankupaq (Sant. 4:8). Señoraywan kuskam runakunata kallpanchaniku bibliamanta imam kaqta yachanankupaq chaynataq hukkunamanpas yachachinankupaq. Jehova Diosta serviyqa anchatamá kusichikun.