1940 huatapimi ñuca taitacunaca testigo de Jehovacunahuan Bibliamanda estudiai callarirca. Aunque jipacunaman estudianata saquishca cashpapashmi ñuca mamaca La Atalaya y ¡Despertad! revistacunata chasquishpa catirca. 1950 huatapica Nueva York llactapimi shuj asamblea internacional tiarca. Chai asambleamanmi ñuca familiaca rirca.

Asha tiempo jipaca huauqui Lawrence Jeffriesmi ñucanchita visitashpa, ñucamanga Bibliamanda yachachi callarirca. Callaripica Testigocuna politicapi, ni guerracunapi na participan cashcata yachashpaca na alicachircanichu. Huauquigumanga Estados Unidosmanda tucui gentecuna guerraman na ringapaj munajpica contracunaca llactataca atacai ushanmanmi nircanimi. Huauquiguca pacienciahuanmi explicahuan carca. Paica: “Pero tucui gentecuna Jehovata sirvijpi y cai gentecunata contracuna atacangapaj shamujpica ¿imatashi Jehová Diosca ruranman? nihuanmi carca”. Cai yuyaimanda y shuj yuyaicunamandapash ashtahuan explicajpimi pandarijushcata cuenta japircani. Y ashtahuanmi yachajungapaj munarcani.

Ñuca mama alichishpa charishca La Atalaya y ¡Despertad! revistacunatami liishpa yalin carcani. Tiempohuanga Taita Diosmanda cabalta yachajujushcata cuenta japishpami huauqui Jeffries Bibliamanda yachachihuachun mañarcani. Reuniongunamanbashmi seguido ri callarircani. Bibliapi yachajujushcata ninanda gushtaimandami predicangapaj publicador tucurcani. Shinallata ‘Mandaj Dios shamuna jatun punlla ña chayamujujta’ cuenta japimandami ñuca causaipi metacunata cambiarcani (Sof. 1:14). Universidadpi estudianapa randica shuj gentecunaman Bibliamanda yachachingapami munarcani.

Colegiotaca 13 de junio de 1956 huatapimi tucuchircani. Y quimsa punllacuna jipaca shuj asamblea de circuitopimi  bautizarircani. Jehovamanda yachajushpa, paimanda shujcunaman yachachishpa causajpi Jehová ñucata ninanda bendicianataca yaitapash na yashcarcanichu.

Bautizarishca 6 quillacuna jipaca precursor regularmi tucurcani. Ministerio del Reino de diciembre de 1956 huatapi, inglés shimipi llujshishca hojapica publicadorcunataca minishtirishca pushtupi ashtahuan sirvichunmi animajurca. Chaita liinaca ashalla publicadorcuna tiaj pushtupi predicangapaj richunmi animahuarca (Mat. 24:14).

Chaimandami Edgefield pushtuman causangapaj rircani. Chai congregacionbica solo cuatro publicadorcunallami tiarca. Ñucandimi cincopura carcanchi. Reuniongunataca shuj huauquigupa huasipimi ruran carcanchi. Ñucaca cada quillami 100 horascunata predicashpa yalin carcani. Predicashpa, congregacionbi asignaciongunata pactachishpa y discursocunata cushpami ocupado yalin carcani. Congregacionbi asignaciongunata pactachishpaca Jehovamandapashmi ashtahuan yachajun carcani.

Shuj señoragumanmi Bibliamanda yachachijurcani. Paica Johnston nishca pushtupi ataudcunata jatuj shuj funerariapa dueñami carca. Chai señoraguca medio tiempota trabajachunmi saquihuarca. Shinallata pai charishca shuj uchilla edificiogutaca reuniongunapa utilizachunmi saquirca.

Ñucaman Bibliamanda yachachishca huauquipa churi Jolly Jeffriesca ñuca causajushca Brooklyn pushtupi causangapami shamurca. Paica ñuca compañeromi carca. Shuj huauqui mañachishca carro cuenda uchilla huasigupimi causarcanchi.

Estados Unidos llactapa sur ladomanga trabajocunapica baratotami pagan carca. Tucui punlla trabajashpapash ishcai o quimsa dolarcunatallami ganan carcanchi. Shuj viajeca ñuca charishca último culquigutami micunaguta randishpa gastarcani. Y tiendamanda llujshijujpimi shuj mishuguca quimirishpa: “¿Trabajota mascajunguichu? Trabajajpica por horami shuj dolarta pagasha” nihuarca. Quimsa punllacunatami construinajuj shuj alpata limpiashpa trabajarcani. Edgefield pushtupi quidachun Jehová ayudajushcatami cuenta japircani. Culqui faltalla cashpapashmi 1958​pica Nueva York llactapi shuj asamblea internacionalman rircani.

Asambleapa segundo punllapica Ruby Wadlington shuj precursora panigutami rijsircani. Paica Gallatin pushtupimi sirvijurca. Ishcandillatami misionerocuna cangapaj munarcanchi. Chaimandami Galaad escuelaman ringapaj munajcunapa reunionman rircanchi. Asha tiempo jipaca ishcandillatami parlari callarircanchi. Shuj viajeca Gallatin congregacionbi shuj discursota cuchunmi invitahuarca. Y chaiman rishpaca Rubytaca ñucahuan cazarangapaj munanguichu nishpa tapungapami aprovecharcani. Jipaca paipa congregacionmanmi cambiarircani y 1959​pimi cazararcanchi.

23 huatacunata charijpimi Gallatin congregacionbi siervo de congregación cachun nombrahuarca (cunanbica coordinador del cuerpo de ancianos nishpami  rijsin). Cai congregaciondaca chairalla nombrashca superintendente de circuito huauqui Charles Thompsonmi visitagrijurca. Chai huauquiguca ashtaca experienciatami charirca. Experienciata charishpapashmi congregacionmanda huauquipanicuna imata minishtijta y shuj superintendentecuna huauquipanicunata imashna ayudashcata tapuhuarca. Huauquigupa ejemplomandami tapuna importantepacha cashcata y nara imatapash decidishpallata ali ali imatapash ricuna cashcata yachajurcani.

Mayo de 1964​pimi Escuela del Ministerio del Reino nishcaman invitahuarca. Chai escuelaca shuj quillatami paran carca y Nueva York llactapimi carca. Instructorcunaca Jehovamanda ashtahuan yachajushpa catina munaita charichun y espiritualmente ñaupaman catichunmi animahuarca.

Enero de 1965​pica superintendente de circuito cachunmi ñuca huarmigundi invitahuarca. Tennessee pushtumanda Richmond pushtucaman y Carolina del Norte, Kentucky y Virginia Occidental pushtucunamanda congregaciongunata visitachunmi asignahuarca. Chai tiempopica Estados Unidospa sur ladomanga yana gentegucunataca na ricunayachinllu carca. Chaimi solo yana huauquipanicunapa congregaciongunatalla visitan carcani. Yura huauquipanicunahuanga na tandanajui ushanllu carcanchi. Huauquipanicunaca ashalla cosasgucunatami charin carca. Chaimi ima charishcagutaca minishtijujcunahuan compartin carcanchi. Experienciata charij shuj superintendente de circuito huauquiguca cashnami nihuarca: “Congregaciongunata visitajushpaca huauquipanicunapa jefeshnaca na canachu cangui. Paicunata ayudai ushangapaca paicunapa huauqui cashcatami ricuchina cangui” nihuarcami.

Shuj viajeca shuj congregacionda visitajushpami ñuca huarmiguca shuj jovenlla señoraguman Bibliamanda yachachi callarirca. Chai señoraguca shuj añoguta charij huahuagutami charirca. Nipipash chai señoraguta visitai ushashcamandami ñuca huarmiguca paitaca cartacunahuan Bibliamanda yachachishpa catirca. Cutin chai congregacionda visitajujpimi chai señoraguca tucui reuniongunaman ri callarirca. Tiempohuanga ishcai precursor especial panigucunami chai señoragu causajuj pushtuman causangapaj chayarca. Paicunami chai señoragutaca bautizaringacaman Bibliamanda yachachirca. 30 huatacuna jipa, 1995 huatapi Patterson Betelpi cajpimi shuj joven paniguca ñuca huarmiguta saludangapaj quimirirca. Chai paniguca ñuca huarmiguhuan estudiashca señoragupa ushimi carca. Chai paniguca paipa cusandimi Galaad escuelapa clase cienbi carca.

Jipamanga Florida llactapa huaquin pushtucunata visitachunmi asignahuarca. Chaimi shuj carroguta minishtircanchi. Y ali preciopami shuj carroguta randircanchi. Pero primer semanapillatami motorpi imachari dañarirca. Y arreglangapaca na culquiguta charircanchichu. Shuj huauquitami ayudata mañarcanchi. Chaimi paica paipa trabajadorta ñucanchi carrota arreglachun cachamurca y pagachunbash na munarcachu. Huauquiguca: “Na imapash canllu” nircami. Hasta asha culquigutapashmi cararca. Jehová Dios imashna paita sirvijcunata cuidajta ricunaca alipachami carca. Y generosocuna cana importantepacha cashcatami yarichirca.

Congregaciongunata visitanajushpaca siempremi huauquipanicunapa huasicunapi quidan carcanchi. Shinami paicunahuanga alipacha amigocuna tucun carcanchi. Shuj viajeca shuj huauquipanipa huasipimi mingarishca carcanchi. Chaipimi ñucapa escribina maquinapica congregacionba informeta saquircani. Nara tucuchishcarcanichu. Pero chishi tigrajpica quimsa huatata charij huahuagumi informetaca jundachishpa tucuchishcarca. Shina pasashcamandaca ishcandillatami tauca huatacunata yarishpaca asin carcanchi.

1971​pimi Nueva York llactapi superintendente de distrito cachun asignajuj shuj cartata chasquircani. Asignacionda chasquijushpaca 34 añoscunatallami charircani. Ñuca yanagu cajpipashmi huauquipanicunaca cushijushpa chasquihuarca.

Superintendente de distrito cashpaca fin de semanacunata asamblea de circuitopi Jehovamanda yachachinataca ninandami gushtan carcani. Ashtaca superintendente de circuito huauquicunaca ñucata yali experienciatami charirca. Paicunamanda shujca ñuca bautizarijujpimi discursota curca. Cutin huauqui Theodore Jaraczca tiempohuanga Cuerpo Gobernantepimi sirvi callarirca. Shinallata huaquin huauquicunaca Brooklyn llactapa Betelpimi sirvinajurca. Superintendente de circuito y betelita huauquicuna ñucata tranquilo sintichishcamandaca ninandami agradicipani. Cai huauquicunaca Jehovapa shimipi confiashpa,  paipa organizacionda tucui shunguhuan apoyajtami ricurcani. Paicuna humildecuna cashcamandami superintendente de distrito canaca fácil cahuarca.

Cuerpo Gobernante huauquicunaca 1974 huatapimi huaquin superintendente de circuito huauquicunata superintendente de distrito cachun asignarca. Chaimi ñucaca cutinllata Carolina del Sur pushtupi superintendente de circuito shina sirvi callarircani. Pero chai huatapaca yana huauquipanicunaca yura huauquipanicunahuanga ñami tandanajui ushan carca. Chaimi huauquipanicunaca cushijushcapacha carca.

1976 huatapimi Georgia llactata visitachun asignahuarca. Shuj viajeca cinco yana huahuacuna huañushcajpimi entierropa discursota curcani. Chai huahuagucunaca paicunapa huasi rupajpimi huañushcarca. Chai huahuacunapa mamatapash incendiopi rupashca cashcamandami hospitalman apashcarca. Chai hospitalmanga ashtaca yana o yura huauquipanicuna cashpapash taitacunata consolangapami chayanajurca. Chaipimi huauquipanicuna randimanda ninanda juyarin cashcata ricurcani. Shina juyashcata ricuchishcamandami huauquipanicunaca ima problemata charishpapash aguantai ushan.

1977 huatapimi Brooklyn llactapa Betelman asha quillacunata sirvichun invitarca. Y ñucanchiman asignashca trabajota ña tucuchigrinajujpimi Cuerpo Gobernantemanda ishcai huauquicunaca ñucahuan parlashpa Betelpi quidangapaj munanguichimanlla nishpa tapuhuarca. Chaimi chaipi quidanata decidircanchi.

24 añoscunatami Departamento de Serviciopi ayudashpa trabajarcani. Chai Departamentopica congregacionmanda huauquicunapa tapuicunatami contestashpa ayudan carca. Tiempohuanga Cuerpo Gobernantemanda huauquicunaca Departamento de Serviciopi sirvij huauquicunataca Bibliapa consejocunahuanmi yachachishpa ninanda ayudashca. Shinami Departamento de Serviciopi sirvij huauquicunaca superintendente de circuito huauquicunata, ancianocunata y precursorcunata paicunapa asignaciongunata ali pactachichun ayudai ushashca. Shina ayudashcamandami huauquipanicunaca espiritualmente ñaupaman catita ushashca. Y Jehovapa organizacionbashmi mirashpa catishca.

1995​mandaca 2018​camanmi jatun Betelmanda representante shina huaquin sucursalcunata visitarcani. Shina visitajushpaca comité de sucursalcunapi sirvij huauquicunahuan, betelitacunahuan y misionerocunahuanbashmi tandanajun carcanchi. Shinami paicunata animashpa, ayudan carcanchi. Ñucanchicunapashmi animarin carcanchi. Por ejemplo, huata 2000​pica Ruanda llactatami visitarcanchi. 1994​pi Ruanda llactapi gentecunata huañuchinajujpi cashca huauquipanicunapa experienciata uyashpaca ninandami animarircanchi. Huauquipanicunaca aunque llaquicunata charishpapash y paicunapa familiacuna huañushca cajpipashmi Jehovapi y paipa promesacunapi confiashpa cushilla Jehovata sirvishpa catinajurca.

Cunanga 80 yali añoscunatami charinchi. Shinallata cai último 20 huatacunataca Estados Unidospa Comité de Sucursalpimi sirvijushcani. Universidadmanga nunca na rircanichu. Pero Jehovapash y paipa organizacionbash universidadta yalimi yachachihuashca. Shina yachachishcamandami shuj gentecunataca Bibliamanda yachachi ushashcani (2 Cor. 3:5; 2 Tim. 2:2). Bibliamanda yachajushpa gentecuna imashna cambiajta y Jehovapa amigo tucujtami ricupashcani (Sant. 4:8). Jehovamanda yachajuna y Bibliamanda shujcunaman yachachina shuj jatun bendición cashcatami ñucapash y ñuca huarmigupash shujcunamanga yarichinchi.