Πασέ κο 1940, μο ντατ ντα μι ντάι κερένας μελέτη κατά Γραφή ι Ιεχωβάσκε Μαρτυρέντζαρ. Η μελέτη τσσινάντιλι, αλλά μι ντάι να τσσιναντάς τι λελ ο περιοδικά Σκοπιά ντα Ξύπνα! Κο 1950, αβιλί διεθνής συνέλευση κι Πόλη κι Νέα Υόρκη ντα γκιλάμ σαρ φαμιλί.

Χάνικ βακίτι σοράν, ο πφραλ Λόρενς Τζέφρις αβέλας τι ντικχέλ-αμέν. Προσπαθιντάς πο μπουτ τι βοηθίνελ μαν. Κι αρχή, πακιάβας ότι ο Μάρτυρες ι Ιεχωβάσκε έπρεπε τι ανακατούντιβεν κο πολιτικά ντα τι τζαν κο τζένγκι. Βακερντόμ λέσκε ότι, άμα σαρέ κι Αμερική να μανγκένας τι τζαν κο τζένγκι, ο ντουσμάνια κα μπορίνενας τι αβέν ντα τι λεν σαρό ο τθεμ. Ντιπ ήρεμος, ο πφραλ Τζέφρις βακερντάς ακαβά: «Σο αμντίνεσα ότι κα κερέλας ο Ιεχωβά Ντεβέλ άμα σαρέ ο τζενέ κι Αμερική υπηρετίνενας-λες ντα ο ντουσμάνια αβένας τι τζαν λέντζαρ κόντρα;» Λέσκε λάφια σο τθερένας τι κερέν ανταλέσαρ ντα γιαβερέ πραγματέντζαρ βοηθιντέ-μαν τι αγαβάβ ότι κεράβας λάθος. Ανταβά κερντάς-μαν τι μανγκάβ τι σικλιάβ ι αλήθεια.

Διαβάναβας σαστέ σαάτια πουρανέ Σκοπιές ντα Ξύπνα! σο μι ντάι τσσουντάας κι αποθήκη. Καζόμ νακχέλας ο βακίτι, αγαντόμ ότι ανταλά σο σικλιάβας ισινέ η αλήθεια. Οτθάρ, δεχτιντόμ τι κεράβ μελέτη ι πφραλέσαρ Τζέφρις. Ντα αρχισάλομ τι τζαβ σαρέ κο συναθροίσεις. Η αλήθεια πφερντάς μο γκι ντα αβιλόμ μπίμπολντο ευαγγελιζόμενος. Οντουλά σο μανγκάβας τι κεράβ αλλαξάλε κάνα αγαντόμ ότι «ο μπαρό ντιβές ι Ιεχωβάσκο [ισινέ] πασέ». (Σοφ. 1:​14) Ακανά οντουβά σο μανγκάβας ισινέ, όχι τι σπουδάναβ, αλλά τι βοηθίναβ γιαβερέν τι σικλιόν ι αλήθεια ι Γραφιάκι.

Μπιτισκιαρντόμ ο σχολείος 13 Ιουνίου 1956 ντα τριν ντιβές πο σοράν μπολντιλόμ κι συνέλευση περιοχής. Να νακχέλας μι γκοντιάταρ καζόμ  ευλογίες κα τθεράβας επειδή κα ντάβας μι ζωή για τι σικλιάβ ντα τι σικλιαράβ ι Ιεχωβάσκε.

Σιοβ μάσεκ σοράν μι μπολντιμάσταρ, αβιλόμ τακτικός σκαπανέας. Αμαρί Διακονία της Βασιλείας κο Δεκέμβριος 1956 τθερέλας ο θέμας «Μπορίνενα τι Υπηρετίνεν Οτθέ σο Ισί πο Μπαρί Ανάγκη;» Οντιά πρόσκληση ισινέ μάνγκε-ντα. Μανγκάβας τι βοηθίναβ οτθέ σο να ισινέ μπουτ τζενέ για τι βακερέν ο λατσσέ αμπέρια.​—Ματθ. 24:14.

Γκιλόμ τι μπεσάβ κο Έτζφιλντ της Νότιας Καρολίνας. Η κχανγκιρί οτθέ τθερέλας σάντε σταρέ πφραλέν. Μάντζαρ αβιλέ παντς. Κεράας ο συναθροίσεις κο σαλόνι εκχέ πφραλέσκο. Κάθε μάσεκ, κεράβας 100 σαάτια κο έργος. Ισινόμας μπουτ απασχολημέ με το ευθύνες σο τθεράβας κο έργος ντα κο συναθροίσεις, αλλά καζόμ πο μπουτ κεράβας, αζόμ πο μπουτ σικλιάβας ι Ιεχωβάσκε.

Εκ τζουβέλ σο κεράβας-λα μελέτη κατά Γραφή τθερέλας γραφείος τελετών κο Τζόνστον, εκ κωμόπολη χάνικ χιλιόμετρα ντουρ. Ισινέ μπουτ λατσσί ντα ντινάς-μαν μπουτί χάνικ σαατίντζαρ, σο τθεράβας-λα μπουτ ανάγκη, ντα μουκχέλας-αμέν τι κεράς συναθροίσεις εκχέ χουρντέ τθανέστε σο τθερέλας.

Ο πφραλ Τζόλι Τζέφρις, ο τσσαβό ι πφραλέσκο σο κερντάς-μαν μελέτη, νασλό κατά Μπρούκλιν σο ισί κι Νέα Υόρκη ντα αβιλό μο συνεργάτης κο σκαπανικός. Εκ πφραλ ντινάς-αμέν εκ χουρντό τροχόσπιτος για τι μπεσάς.

Κο Νότος, ο τζενέ νικαβένας χάνικ λοβέ πουμαρέ μπουτιάταρ. Νικαβάας ντούι ή τριν δολάρια κάθε ντιβές. Εκ φαρ, μόλις χαλαντόμας κο μπακάλι ο τελευταία λοβέ σο τθεράβας για τι κινάβ μερικά πράγματα χαμάσκε. Κάνα νικίστιλομ αβρί, αβιλό εκ τζενό ντα πουτσλάς-μαν: «Μανγκέσα μπουτί; Κα νταβ-τουτ εκ δολάριος κο σαάτι». Λιντάς-μαν τρινέ ντιβεσένγκε για τι καθαρίναβ εκ εργοτάξιος. Ντικχίντιβελας ξεκάθαρα ότι ο Ιεχωβά βοηθίνελας-μαν τι ατσσάβ κο Έτζφιλντ. Αλλά κο 1958 γκιλόμ κι διεθνή συνέλευση σο αβιλί-πες κι Πόλη της Νέας Υόρκης.

Κο δεύτερος ντιβές ι συνελευσιάκο, αβιλό-πες κάτι ξεχωριστός. Γνωριντόμ εκχέ πφενιά σο βακερένας λάκε Ρούμπι Γουάντλινγκτον, σο κερέλας τακτικός σκαπανικός κο Γκάλατιν σο ισί κο Τενεσί. Επειδή ο ντούι-ντα μανγκάας τι υπηρετίνας σαρ ιεραπόστολοι, γκιλάμ κι συνάθροιση οντουλένγκε σο μανγκένα τι νακχέν ι Γαλαάδ σο αβιλί-πες οντουλέ συνελευσιάτε. Οτθάρ μπερί, αρχισάλαμ τι μπουτσσαβάς γράμματα ο εκ κο γιαβέρ. Σοράν, βακερντέ μάνγκε τι κεράβ εκ δημόσια ομιλία κο Γκάλατιν. Κάνα γκιλόμ οτθέ, μανγκλόμ κατά Ρούμπι τι παντρίνας. Γκιλόμ λάκε κχανγκιριάτε ντα παντρισάλαμ κο 1959.

Κάνα ισινόμας 23 μπρεσένγκο, αβιλόμ υπηρέτης εκκλησίας (ακανά βακέρντιβελα συντονιστής του πρεσβυτερίου) κο Γκάλατιν. Ισινάμας η πρώτη κχανγκιρί σο αβιλό ο Τσαρλς Τόμσον σαρ επίσκοπος περιοχής. Παρόλο σο τζανέλας μπουτ πράγματα,  πουτσλάς-μαν σο ανάγκες τθερένας ο πφραλά ντα σαρ αρακχαβένας γιαβερά επίσκοποι περιοχής ο κχανγκιριά. Λέσταρ, σικλιλόμ ότι ισί λατσσό τι πουτσάς ντα τι σικλιάς σαρέ ο πράγματα πριν τι λας εκ απόφαση.

Κο Μάιος 1964, βακερντέ μάνγκε τι νακχάβ ι Σχολή Διακονίας της Βασιλείας, σο ατσσικιαρέλας εκ μάσεκ ντα αβέλας-πες κο Σάουθ Λάνσινγκ σο ισί κι Νέα Υόρκη. Ο πφραλά σο σικλιαρένας κερντέ-μαν τι μανγκάβ τι σικλιάβ πο μπουτ ι Ιεχωβάσκε ντα τι αβάβ πο πασέ λέστε.

Κο Ιανουάριος 1965, βακερντέ μάνγκε ντα ι Ρουμπιάκε τι κεράς ο έργος περιοχής. Μπουτσσαντέ-αμέν εκχέ μπαρέ περιοχιάτε, σο ασταρέλας κατά Νόξβιλ σο ισί κο Τενεσί μέχρι κο Ρίτσμοντ σο ισί κι Βιρτζίνια. Τθερέλας κχανγκιριά κι Βόρεια Καρολίνα, κο Κεντάκι ντα κι Δυτική Βιρτζίνια. Τζάας σάντε κο κχανγκιριά κι καλένγκε, επειδή οντουβά βακίτι ο νόμος κο νότιες Ηνωμένες Πολιτείες να μουκχέλας ι καλέ τζενέν τι γκιντίντιβεν ι παρνέ τζενέντζαρ. Ο πφραλά ισινέ τσορορέ, ντα σικλιλάμ τι ιλιαβάς σο-ντα τθεράας οντουλέντζαρ σο τθερένας ανάγκη. Εκ πφραλ σο ισινέ μπουτ μπρεσά επίσκοπος περιοχής σικλιαρντάς-μαν εκ σημαντικός μάθημας: «Τι αβές πφραλ. Μα τι τζας κι κχανγκιρί σαρ αφεντικός. Κα μπορίνες τι βοηθίνες σάντε άμα ντικχένα-τουτ σαρ πουμαρό πφραλ».

Εκ φαρ, κάνα γκιλάμας εκχέ χουρντέ κχανγκιριάτε, η Ρούμπι αρχισάλι τι κερέλ μελέτη εκχέ τερνέ τζουβλιάσαρ σο λάκι χουρντί ισινέ εκχέ μπρεσέσκι. Κάνα καέκ κι κχανγκιρί ναστί κερέλας ι μελέτη, κερέλας-λα η Ρούμπι αντράλ κατά γράμματα σο μπουτσσαβένας η εκ ι γιαβεριάκε. Ι γιαβέρ φαρ σο γκιλάμ κι κχανγκιρί, οντιά τζουβέλ τζάλας σαρέ κο συναθροίσεις. Κάνα γκιλέ οτθέ ντούι ειδικές σκαπάνισσες, κερντέ-λα βον μελέτη ντα μπουτ σουγκό μπολντιλί. Σοράν από περίπου 30 μπρεσά, κο 1995, κο Μπέθελ κο Πάτερσον, εκ τερνί τζουβέλ γκιλί κι Ρούμπι ντα βακερντάς λάκε πο ναβ. Ισινέ η τσσάι οντουλέ τζουβλιάκι. Βόι ντα λάκο ρομ νακχένας ι Σχολή Γαλαάδ τάξη 100.

Η δεύτερη περιοχή σο γκιλάμ ισινέ κι κεντρική Φλόριντα. Περίπου οντουβά βακίτι χρειαζίντιβαας εκ αυτοκίνητος. Οτθάρ, κιντάμ εκ τανό χάνικ λοβέντζαρ. Όμως, κι πρώτη εβδομάδα, η αντλία ι πανίσκι χαλάντιλι. Να ατσσιλέας-αμέν λοβέ για τι κεράς-λα. Λιντόμ τηλέφωνος εκχέ πφραλέστε σο σκεφτιντόμ ότι μπέκιμ μπορίνελα τι βοηθίνελ-αμέν. Βοβ μπουτσσαντάς εκχέ τζενές οντουλένταρ σο κερένας λέσκε μπουτί τι λατσσαρέλ ο αυτοκίνητος ντα να μανγκλάς ιτς λοβέ ι λατσσαριμάσκε. Βακερντάς απλώς: «Ισινάμ εντάξει». Ντα εκτός ανταλέσταρ, ντινάς-αμέν χάνικ λοβέ σαρ δώρος! Ανταβά ισινέ εκ μπουτ σουκάρ παράδειγμας σο σικαβέλα σαρ αρακχαβέλα ο Ιεχωβά πι υπηρετόν. Αντάς αμαρέ γκοντιάτε τι ντας αμέν-ντα κο γιαβερά αντράλ αμαρέ γκίσταρ.

Κάνα τζάας εκχέ κχανγκιριάτε, μπεσάας κο κχερά κι πφραλένγκε. Αντικάς, κερντάμ μπουτ φιλίες σο ατσσικιαρένα μπουτ μπρεσά. Εκ ντιβές, μουκχλόμ κι γραφομηχανή ι έκθεση σο αρχισάλομας τι γραφίναβ ι κχανγκιριάκε. Κάνα βουρτισάλομ αρατί, σικλιλόμ ότι ο τσσαβό σο ισινέ τρινέ μπρεσένγκο κι φαμιλί σο μπεσάας, «βοηθιντάας-μαν» τι τελειώναβ ι έκθεση. Πειράναβας-λες ανταλέσκε μπουτ μπρεσά.

Κο 1971, λιντόμ εκ επιστολή σο βακερέλας ότι αβιλόμ επίσκοπος περιφερείας κι Πόλη κι Νέα Υόρκη. Ατσσιλάμ πουταρντέ μόσαρ! Κάνα γκιλάμ οτθέ, ισινόμας σάντε 34 μπρεσένγκο. Ισινόμας λένγκο πρώτος καλό επίσκοπος περιφερείας, ντα ο πφραλά δεχτιντέ-μαν αντράλ πουμαρέ γκίσταρ.

Σαρ επίσκοπος περιφερείας, μπεϊντίναβας τι σικλιαράβ ι Ιεχωβάσκε κάθε σαββατοκύριακος κο συνελεύσεις περιοχής. Μπουτ κατά επίσκοποι περιοχής τθερένας πο μπουτ μπρεσά μάνταρ κο έργος. Εκ τανό λένταρ κερντάας ι ομιλία μι μπολντιμάσκι. Εκ γιαβέρ πφραλ, ο Θεοντόρ Τζάρας, πο σοράν υπηρετιντάς κο Κυβερνών Σώμας. Ισινέ επίσης μπερεκέτι πφραλά σο ισινέ μπουτ μπρεσά κι αλήθεια ντα κερένας μπουτί κο Μπέθελ κο Μπρούκλιν. Εκτιμίναβας μπουτ σο ο επίσκοποι περιοχής ντα ο Μπεθελίτες κερένας-μαν τι νιωθίναβ άνετα. Ντικχλόμ μι γιακχίντζαρ ότι ισινέ λατσσέ τσομπάνια, σο στηρίντιβενας κο Λάφι κι Ντεβλέσκο ντα βοηθίνενας πιστά ι οργάνωση. Επειδή ισινέ ταπεινοί, ισινέ μάνγκε εύκολος τι υπηρετίναβ σαρ λένγκο επίσκοπος περιφερείας.

Κο 1974, ο Κυβερνών Σώμας τσσουντάς εκ γιαβέρ ομάδα επισκοπόνγκι περιοχής κο έργος περιφερείας, ντα με αβιλόμ πάλι επίσκοπος περιοχής, ανταγιά φαρ κι Νότια Καρολίνα. Ο λατσσό ισινέ ότι αζομάν κο νότιες Ηνωμένες Πολιτείες ο κχανγκιριά ι καλένγκε ντα ι παρνένγκε ισινέ γιεκ, ντα ο πφραλά ισινέ μπουτ χαρούμενοι ανταλέσκε.

Κο τέλος κι μπρεσέσκο 1976, μπουτσσαντέ-μαν εκχέ περιοχιάτε κι Τζόρτζια σο ισί κο μασκάρ κι Ατλάντα ντα κο Κολόμπους. Ατζέκ ατζέκ ντάβα-μαν γκοντί εκ φαμιλί καλένγκι σο βακερντάς μάνγκε τι κεράβ ι κηδεία λένγκε παντζέ τσσαβένγκι, σο μουλέ επειδή κάποια τζενέ πφαμπαρντέ λένγκο κχερ. Η ντάι έπρεπε τι τζαλ κο νοσοκομείος επειδή τθερέλας πληγές. Μάρτυρες ι Ιεχωβάσκε, εμ καλέ εμ παρνέ, τζάνας αβένας συνέχεια κο νοσοκομείος για τι λοκχιαρέν ο γκι ι νταντέσκο ντα ι νταγιάκο. Ντικχλόμ σο μπαρό μανγκιπέ σικαβένας ο πφραλά ντα ο πφενιά. Κάνα ο υπηρέτες ι Ντεβλέσκε πφαμπόνα αζόμ μπουτ ο εκ ι γιαβερέσκε, μπορίνενα τι νταϊντίνεν ατζέ-ντα κο πο μπαρέ δυσκολίες.

Κο 1977, μανγκλέ αμένταρ τι αβάς χάνικ μασεκά κο Μπέθελ κο Μπρούκλιν για τι βοηθίνας εκχέ μπουτιάτε. Κάνα οντιά μπουτί μπιτίνελας, ντούι πφραλά κατά Κυβερνών Σώμας πουτσλέ-μαν άμα η Ρούμπι ντα με κα μανγκάας τι υπηρετίνας μόνιμα κο Μπέθελ, ντα αμέν δεχτιντάμ ι πρόσκληση.

24 μπρεσά, κεράβας μπουτί κο Τμήμα Υπηρεσίας, σο οτθέ ο πφραλά έπρεπε τι βοηθίνεν τι λιντιόν δύσκολες αποφάσεις. Σαρέ ανταλά μπρεσά, ο Κυβερνών Σώμας ντέλας οδηγίες αντράλ κατά αρχές ι Γραφιάκε. Ανταλά οδηγίες βοηθίνενα ο Τμήμας Υπηρεσίας τι ντελ απαντήσεις κο ερωτήσεις, ντα ανταλένταρ λένα σικλιαριπέ ο επίσκοποι περιοχής, ο πρεσβύτεροι ντα ο σκαπανείς. Ανταβά σικλιαριπέ βοηθιντάς μπουτέ τζενέν τι μπαριόν πνευματικά, ντα αντικάς η οργάνωση ι Ιεχωβάσκι τι αβέλ πο ζουρανί.

Κατά 1995 μέχρι κο 2018, τζάβας σαρ εκπρόσωπος κατά κεντρικά γραφεία, ή σαρ επίσκοπος ζώνης σαρ βακέρντιβελας ανγκλέ, κο γραφεία τμήματος μπουτέ τθεμέντε. Κεράβας συναντήσεις ι πφραλέντζαρ κατά Επιτροπή του Τμήματος, ι Μπεθελιτέντζαρ ντα ι ιεραποστολόντζαρ για τι νταβ-λεν ζορ ντα τι βοηθίναβ-λεν ι προβληματέντζαρ σο μπέκιμ τι τθερένας. Ο πφραλά ντα ο πφενιά σο βακερένας πουμαρέ εμπειρίες κι Ρούμπι ντα μάνγκε, ντένας-αμέν πάντα ζορ. Για παράδειγμας, κο 2000 γκιλάμ κι Ρουάντα. Πφανγκιλό αμαρό γκι κάνα ασουντάμ σο νακχλέας ο πφραλά κι φαμιλί Μπέθελ κι γενοκτονία κο 1994. Μπουτ τζενέ χασαρντέας πουμαρέ αγαπημέ τζενέν. Παρόλο σο νακχλέ αζόμ μπουτ, οντουλά πφραλά ισινέ πφερντέ πίστη, ελπίδα ντα χαρά.

Ακανά ισινάμ πο μπαρέ από 80 μπρεσένγκε. Ο τελευταία 20 μπρεσά, υπηρετίναβα κι Επιτροπή του Τμήματος σο ισί κο Ηνωμένες Πολιτείες. Να σπουδαντόμ, αλλά λιντόμ ο πο μπαρό σικλιαριπέ σο ισί κατά Ιεχωβά ντα λέσκε οργανωσιάταρ. Ανταβά βοηθιντάς-μαν τι σικλιαράβ ι γιαβερέν αλήθειες ι Γραφιάκε σο μπορίνενα τι βοηθίνεν-λεν για πάντα. (2 Κορ. 3:5· 2 Τιμ. 2:2) Ντικχλόμ σαρ ο λάφια ι Γραφιάκε βοηθιντέ τζενέν τι αλλάνεν πουμαρί ζωή ντα τι αβέν αμαλά πουμαρέ Δημιουργόσαρ. (Ιακ. 4:8) Κάθε φαρ σο ντιντιόλα-αμέν η ευκαιρία, η Ρούμπι ντα με συνεχίνασα τι βακεράς ι γιαβερένγκε τι ντικχέν πολύτιμος ο προνόμιος σο τθερένα τι σικλιόν ι Ιεχωβάσκε ντα τι σικλιαρέν αλήθειες ι Γραφιάκε. Ανταβά ισί ο πο μπαρό προνόμιος σο μπορίνελα τι τθερέλ εκ υπηρέτης ι Ιεχωβάσκο!