Kölö sö baka di jaa 1940, hën mi mama ku mi tata bi bigi lei soni u Bëibel ku dee Jehovah Kotoigi. Hii fa de bi tapa ku di lei di de bi ta lei soni u Bëibel, tökuseei de bi ta manda dee Hei Wakitimawosu ku dee Ontwaakt da mi mama jeti. A di jaa 1950 dee Jehovah Kotoigi bi hoi wan gaan könklësi a di foto de kai New York City, nöö dee sëmbë u mi wosudendu bi go nëën.

Kölö sö baka di gaan könklësi dë, hën Baaa Lawrence Jeffries bi bigi ko ta lei u soni u Bëibel. A bi ta mbei möiti u heepi mi u mi fusutan di tuutuu lei. Bigibigi ma bi ta fusutan faandi mbei dee Jehovah Kotoigi an ta nama ku politiki soni u köndë, söseei faandi mbei de an nango a sodati. Fëën mbei mi bi piki Baaa Jeffries taa, ee na wan sëmbë fu Amëëkanköndë kë go a feti, nöö dee felantima sa ko tei hii di köndë. Baaa Jeffries bi abi pasensi ku mi seei. A bi taki taa: „Boo taa hii dee sëmbë fu Amëëkanköndë bi ta dini Jehovah Gadu, nöö andi i pakisei taa Jehovah bi o du ee dee felantima bi o ko u ko feti ku de?” Di soni aki ku dee woto soni dee a bi piki mi, bi heepi mi u mi ko fusutan taa di fasi fa mi bi ta si soni an bi bunu. Di soni aki bi mbei taa mi bi kë ko sabi möön soni u di Bëibel.

Mi bi ta puu sömëni juu longi ta lesi dee awoo Hei Wakitimawosu ku dee Ontwaakt! dee mi mama bi ta buta a wan kamba. Te u kaba fëën, mi bi ko fusutan taa mi bi ta lei soni u di tuutuu lei, nöö fëën mbei mi bi bigi ta lei soni u Bëibel ku Baaa Jeffries. Mi bi bigi nango a dee Komakandi tu. Mi bi lobi dee soni dee mi bi ta lei. Fëën mbei mi bi ko toon wan peleikima di an dopu jeti. Mi bi ko ta si soni woto fasi di mi bi ko fusutan taa „di gaan daka u Jehovah dë zuntu” (Sef. 1:14). Ma bi kë go a universiteit möön, ma mi bi kë heepi woto sëmbë u de ko sabi soni u Bëibel.

 Mi bi kaba di siköö ka mi bi dë a 13 u höndima-liba u di jaa 1956, nöö dii daka baka di dë, hën mi dopu a wan keling-komakandi. A di ten dë ma bi sabi seei taa sö Jehovah bi o mbei mi feni gaan bunu u di mi bi ta lei soni fëën, söseei u di mi bi ta lei wotowan soni fëën.

Sikisi liba baka di mi dopu, hën mi bigi du di pioniliwooko. Mi bi lesi di woto “Can You Serve Where the Need Is Great?” di dë a di Kingdom Ministry u tuwalufumu-liba u di jaa 1956. Di woto aki bi kai ku mi. Mi bi kë go peleiki ka möön hia peleikima bi dë fanöudu.​—Mat. 24:14.

Mi bi foloisi go a di foto de kai Edgefield di dë a Carolina, ka fö peleikima nöö bi dë a di kemeente. Mi bi mbei di u feifi peleikima. Nöö u bi ta hoi komakandi a wan u dee baaa pisi. Mi bi ta peleiki söwan 100 juu hiniwan liba. Mi bi ta abi sömëni soni u du, u di mi bi ta tei fesi a di peleikiwooko, söseei mi bi ta hoi taki a di kemeente. Möön mi bi ta du soni a di kemeente, möön mi bi ta ko sabi Jehovah möön bunu.

Mi bi ta lei wan mujëë soni u Bëibel, nöö a bi abi wan pei këë wosu a di foto Johnston. A bi seeka soni da mi sö taa mi bi sa ta wooko wantu daka a di wiki dendu dëën, söseei a bi da u pasi fuu sa ta hoi komakandi a wan u dee piki wosu fëën.

Baaa Jolly Jeffries, di womi mii u di baaa di bi ta lei mi soni u Bëibel, bi foloisi kumutu a di foto Brooklyn di dë a New York, hën a ko a di foto ka mi bi ta dë. Nöö mi ku ën bi ta du di pioniliwooko makandi. U bi ta libi a wan wagi di dë kuma wosu, di wan baaa bi leni u.

Di möni di u bi ta kisi an bi hia. U bi ta kisi tu nasö dii Amëëkandala wan daka. Wan daka di mi bi bai soni u njan ku dee lasiti möni u mi, hën wan womi ko hakisi mi taa: „I kë wooko u? Mi o ta paka i wan Amëëkandala wan juu.” A bi da mi wan wooko u dii daka. Mi bi musu seeka wan kamian ka de bi ta mbei wosu. Wë a bi dë gbelingbelin u si taa Jehovah hën bi ta heepi mi u mi sa tan a Edgefield. Hii fa ma bi ta kisi hia möni, tökuseei mi bi sa go a di gaan könklësi di de bi hoi a New York City a di jaa 1958.

A di u tu daka u di könklësi, hën wan apaiti soni bi pasa. Mi ku Ruby Wadlington bi miti. A bi ta du di pioniliwooko a di foto de kai Gallatin, di dë a Tennessee. U di mi ku ën tuu bi kë du di sëndëlengiwooko, mbei u bi go a di komakandi di de bi hoi da dee sëmbë dee kë go a di Giliati-siköö. Bakaten, hën u bigi ta sikifi biifi ta manda da useei. De bi hakisi mi u mi go hoi wan taki a Gallatin. Mi bi tei di okasi aki u hakisi Ruby ee a bi o kë tööu ku mi. Baka di dë, mi foloisi go a di kemeente ka a bi dë, hën u tööu a di jaa 1959.

Di mi bi abi 23 jaa, hën mi ko dë fesima u dee gaanwomi u di kemeente a Gallatin. U bi dë di fosu kemeente di Baaa Charles Thompson bi ko luku, di a bi bigi du di keling-wooko. Hii fa Baaa Charles bi abi öndöfeni, tökuseei a bi hakisi mi andi mi bi ta si kuma dee baaa ku dee sisa abi fanöudu, söseei unfa  dee woto keling-gaanwomi bi ta heepi de. Di fasi fa a bi ta du soni bi heepi mi u mi ko fusutan taa a dë fanöudu u mi ta hakisi soni, söseei u mi ko sabi unfa soni dë tuutuu ufö mi hopo go du wan soni.

A sebitaa-liba u di jaa 1964, de bi kai mi u mi go a di Könuköndë Diniwooko-siköö di de bi o hoi wan liba longi a di foto South Lansing, di dë a New York. Dee baaa dee bi ta lei u soni a di siköö, bi heepi mi u mi ko abi di hangi u ko sabi möön soni u Jehovah, söseei de bi heepi mi u mi ko dë wan möön bunu mati fëën.

A jailiba u di jaa 1965, hën dee baaa u di bëikantoo hakisi mi ku Ruby fuu du di keling-wooko. Di pisiwata ka u bi musu du di keling-wooko bi bigi. A bi bigi kumutu a di foto Knoxville di dë a Tennessee, te go dou a di foto Richmond di dë a Virginia. Nöö so u dee kemeente a dee foto u North Carolina, u West Virginia ku Kentucky seei bi dë a dendu tu. Mi bi nango a dee kemeente ka baakama wanwan bi dë, u di gaan lanti u libasë fu Amëëkanköndë bi buta wëti taa baakama ku bakaa an bi musu ta nama ku deseei. Dee baaa ku dee sisa an bi gudu, ma u bi ta paati dee soni dee u bi abi ku de. Wan keling-gaanwomi di du di keling-wooko wan pisiten kaa, bi lei mi wan gaan fanöudu soni. A bi piki mi taa: „Dë kuma wan baaa. Na go a wan kemeente kuma i da de basi. Joo sa heepi de ee de ta si i kuma de baaa.”

Di u bi go luku dee baaa ku dee sisa u wan piki kemeente, hën Ruby bi bigi lei wan njönku mujëë di bi abi 17 jaa, soni u Bëibel. Di njönku mujëë aki bi tööu, nöö a bi abi wan piki mujëë mii u wan jaa. Te na wan sëmbë u di kemeente bi sa lei di mujëë aki soni u Bëibel, nöö Ruby bi ta manda biifi dëën a Internet u lei ën soni u Bëibel. Di u bi go luku di kemeente dë baka, hën di mujëë dë ko a hii dee komakandi. Nöö di tu sisa di bi ta du di apaiti-pioniliwooko bi go a di kemeente dë, hën de lei di mujëë soni u Bëibel go dou u te a dopu. Söwan 30 jaa baka di dë, a di jaa 1995 hën wan njönku mujëë ko fan ku Ruby a di Bëtëli u Patterson. A bi dë di mujëë mii u di mujëë di Ruby bi lei soni u Bëibel. Di mujëë mii ku hën manu bi dë a di u 100 kalasi u di Giliati-siköö.

Di u tu keling di u bi abi u go luku, bi dë a Florida. Di ten dë, u bi abi wan wagi fanöudu. Fëën mbei u bi bai wan di an bi dii seei. Ma a di wiki dë dendu seei, hën wan soni u di masini u di wagi bi booko, nöö wa bi abi möni möön fuu seekëën. Mi bi bëli wan baaa di mi bi si kuma bi o sa heepi u. Nöö di baaa bi hakisi wan u dee wookoma fëën faa heepi u mbei di wagi. Di de kaba mbei di wagi, di baaa an bi kë fuu pakëën. A bi piki mi nöö taa: „An dë fii paka mi.” Boiti di dë, a bi da u möni, hën a taa wan kado a da u! Di soni aki bi lei u fa Jehovah ta sölugu dee dinima fëën tjika, nöö a bi mëni u taa useei musu lo’ u da woto sëmbë soni tu.

Hiniwan juu te u bi go luku wan kemeente, nöö u bi ta tuwë lai a dee baaa ku dee sisa pisi. Di soni aki bi mbei u bi ko abi sömëni bunu mati. Wan daka hën mi bi disa wan soni u di kemeente di mi bi ta sikifi, a di masini di u bi ta sikifi soni. Di mi toona ko a wosu a di sapate, hën mi jei taa di womi mii u di baaa ku di sisa, di bi abi dii jaa, bi go zin soni a di masini, nöö di soni dë bi mbei taa mi bi musu toona sikifi di biifi baka. Mi bi ta deleigi ën ku di soni aki sömëni jaa longi.

A di jaa 1971, mi bi kisi wan biifi ka de hakisi mi u mi go du di pisiwata-gaanwomi wooko a di foto de kai New York City. A bi bigi da u seei! Di u go dou ala, mi bi abi 34 jaa nöö. Nöö dee baaa bi wai ku mi seei. Mi bi dë di fosu baakama di bi ko luku de kuma wan pisiwata-gaanwomi.

Di mi bi dë wan pisiwata-gaanwomi, nöö a bi ta da mi piizii seei taa mi bi ta lei sëmbë soni u Jehovah hiniwan sata ku sonde a dee keling-komakandi fuu. Sömëni u dee keling-gaanwomi bi abi öndöfeni möön mi. Wan u de hën bi hoi di dopu taki di daka di mi dopu. Wan woto baaa, di de ta kai Theodore Jaracz bi ko dë wan u dee baaa u di Tii Kulupu. Söseei so u dee woto baaa bi ta wooko a di Bëtëli u Brooklyn. Mi bi wai seei taa dee keling-gaanwomi ku dee sëmbë dee bi ta wooko a Bëtëli bi ta mbei mi fii bunu seei. Miseei bi ko si taa dee lobihati baaa aki bi dë sëmbë di bi ta futoou di Wöutu u Gadu, söseei de bi ta wooko makandi ku di ölganisasi fëën. Di sakafasi di de bi abi, bi mbei taa an bi taanga da mi u mi du di pisiwata-gaanwomi wooko.

A di jaa 1974, di Tii Kulupu bi hakisi wanlö keling-gaanwomi u de du di wooko u wan pisiwata-gaanwomi, söseei mi bi feni di gaandi u du di keling-gaanwomi wooko baka. Ma di pasi aki mi bi musu go a libasë u di foto Carolina. U bi wai seei taa dee kemeente u libasë fu Amëëkanköndë ka baakama wanwan bi dë, bi sa ko mökisi ku dee kemeente ka bakaa wanwan bi dë. Di soni aki bi mbei dee baaa ku dee sisa wai seei.

A kaba pisi u di jaa 1976, de bi manda mi go a wan u dee keling a Georgia. Dee kemeente dee u bi musu luku bi dë a di foto Atlanta ku di foto Columbus mindi. Mi ta mëni jeti di mi bi musu hoi wan taki a di bei u feifi mii di bi dë baakama. De bi lasi libi u di wanlö sëmbë bi ko suti faja a di wosu u de. De mama bi dë a hatiwosu u di a bi kisi makei. Nöö gaan hia baaa ku sisa di bi dë baakama ku bakaa tuu, bi ta ko a di hatiwosu u da di mama ku di tata taanga. Mi bi ko si taa di lobi di dee baaa ku dee sisa bi abi da deseei bi dë wan apaiti soni. Te dee dinima u Gadu ta lei taa de abi tjalihati da de na de a di lö fasi aki, nöö a ta heepi de u de sa hoi dou aluwasi un hogi ta miti de.

A di jaa 1977, de bi hakisi u fuu ko heepi du wan wooko a di Bëtëli u Brooklyn wantu liba longi. An bi fika hia möön ufö di wooko kaba, hën tu baaa u di Tii Kulupu ko hakisi mi ee mi ku Ruby bi o kë fika a Bëtëli. Wë, u bi piki aai.

Mi bi wooko 24 jaa longi a di Diniwooko Komite, ka dee baaa lo’ u heepi piki hii pei hakisi di sëmbë abi. Sömëni jaa kaa di Tii Kulupu ta wooko ku dee mama wëti u Bëibel u lei u soni. Di soni aki heepi di Diniwooko Komite u piki dee hakisi di de bi ta buta da de. Söseei dee lei aki ta heepi dee keling-gaanwomi, dee gaanwomi u kemeente ku dee sëmbë dee ta du di pioniliwooko. Dee lei aki bi heepi sömëni sëmbë u de ko dë gaangaan sëmbë a di biibi. Söseei di soni aki bi mbei taa di ölganisasi u Jehovah ko möön taanga.

Mi bi go luku sömëni bëikantoo sensi di jaa 1995 te go miti di jaa 2018, u di de bi ta manda mi go kuma di baaa di bi ta tei kamian da di hedikantoo. Nöö mi bi ta miti ku dee baaa u di Bëikantoo Komite, dee sëmbë dee ta wooko a Bëtëli, ku dee sëmbë dee ta du di sëndëlengiwooko, sö taa mi bi sa da de taanga, söseei u mi bi sa heepi de ku dee soni dee bi ta taanga da de. Dee baaa ku dee sisa bi ta da u taanga te de bi ta konda dee woto u de da u. Di u bi go a di köndë Luwanda a di jaa 2000, nöö a bi ta bigi da u seei di u bi jei fa dee baaa ku dee sisa bi pasa di kii di sëmbë bi ta kii wan hii kulupu sëmbë a Luwanda a di jaa 1994. Sömëni baaa ku sisa bi abi sëmbë di bi lasi libi a di pisiten dë. Ma hii fa dee fuka aki bi miti de, tökuseei dee baaa ku dee sisa aki bi lei taa de bi abi biibi, söseei de bi ta dë waiwai.

Nöunöu u abi möön leki 80 jaa, nöö a dee 20 jaa dee pasa aki, mi dë a di Bëikantoo Komite fu Amëëkanköndë. Nöiti mi go a universiteit, ma tökuseei mi feni di möön bunu lei a Jehovah ku di ölganisaasi fëën. Di soni aki bi heepi mi u mi bi sa ta lei woto sëmbë soni u di tuutuu lei, di sa mbei de kisi wini u teego (2 Kol. 3:5; 2 Tim. 2:2). Mi bi si fa dee lei u Bëibel bi heepi sëmbë u de tooka soni a de libi, söseei u de ko dë mati ku di Sëmbë di mbei de (Jak. 4:8). Hiniwan juu te u sa, nöö mi ku Ruby ta mbei möiti u da wotowan taanga u de ta tei ën u bigi taa de sa ta lei soni u Jehovah, söseei taa de sa ta lei wotowan soni u di tuutuu lei. Di soni aki da wan gaandi di hii dee dinima u Jehovah abi!