Gupheyani nya 1940, vavelegi vangu va di hevbula Bhibhiliya ni Dzifakazi dza Jehovha. Khu gu landreya, va di ema gu hevbula ganiolu, mamayi wangu a di gu simama gu hakha dzikopya nya Mukhedziseyi ni Khendzugani! Khu 1950 eni ni ndranga yangu hi di hongola avbo nya Kongresu Internacional wu nga girega dhoropani ga Nova Iorque.

Khu hwane, ndriyathu Lawrence Jeffries a di pheya gu nyi foneya. Uye a di zama gu nyi phasa gu hevbula lisine nya Bhibhiliya. Gupheyani eni kha nya nga ba nyi dzumeleyana ni Dzifakazi dza Jehovha kholu dzi nga ba dzi si dzi bedzedzeyi omu nya politika ni gu bomba gu hongola wusotshwatunu. Eni nyi di mu embeya gu kheni nari khatshi vatshavbo América va ngu bomba gu hongola nyimbitunu, valala vathu va di hadzi guta dhumeya litigu lathu va bwe va hi fuma. Khu gu dzinogisa ndriyathu Jeffries a di nyi wudzisa gu khuye: “Ginani egi Jehovha a nga hadzi gira, nari khatshi vatshavbo América va ngu mu thumeya, ganiolu va ta dhumedwa khu valala vawe?” Giwudziso gegi, gi nyi phaside gu tugula gu kheni nyi di gu wona silo khu ndziya nya gu hosege. Nigu gi nyi giride nyi dogoreya gu hevbula lisine nya Bhibhiliya.

Nyi vbedzide dziora nya dzingi na nyi gu leri Mikhedziseyi ni Mikhendzugani! ya gale, eyi mamayi wangu a nga ba a yi vegide. Ndrani nya tepo yoyo, nyi tugude gu kheni nyi di gu hevbula lisine, khu kharato nyi di dzumeya gu hevbula Bhibhiliya ni ndriyathu Jeffries. Nigu gambe nyi di pheya gu hongola mitshanganoni tepo yatshavbo. Eni nyi di gu si gola esi nyi nga ba nyi si hevbula, khu kharato nyi di hunga gu khala muhuweleyi nya mahungu nya yadi. Misuwo yangu yi di vbindrugedza tepo nyi nga pwisisa gu kheni “Li ngu vboha litshigu nya likhongolo la PFHUMU Nungungulu”. (Sof. 1:14) Vbavbandze nya gu vege gupima avbo nya univhersidhadhi eni nyi di gu vbweta gu hevbula lisine nya Bhibhiliya.

 Eni nyi di vbedza gu hevbula khu 13 nya Junho nya 1956, khu hwane nya matshigu mararu nyi di bhabhatiswa avbo nya tshangano nya gipandre. Eni nyi di si dziti gu kheni nyi di hadzi hakha silo nya singi nya sadi si nga hadzi guta khiyo ga Jehovha, kholu eni nyi di hathide gu thumisa womi wangu gasi gu hevbula ni gu hevbudza vambe maningano ni Jehovha.

Hwane nya 6 migima na nyi gu bhabhatisidwe, eni nyi di khala piyonero nya tepo yatshavbo. Ministério do Reino nya 1956 wu di gu ganeya khu ndrima yi gu khiyo “Ina u nga thuma umo gu vbwetegago ngudzu giphaso?” Eni nyi diri moyo nya ava va nga hadzi gira thumo wowo. Eni nyi di gu vbweta gu phasedzeya umo mahungu nya yadi ma nga ba ma tshumayedwe vbadugwana. — Mat. 24:14.

Eni nyi di fuluga nyiya vbanya Carolina do Sul, eyi libandla li diri ni 4 vahuweleyi basi ni eni hi di khala 5. Hi di gu gira mitshangano ndrangani ga ndriyathu moyo. Ngima ni ngima, nyi di gu vbedza 100 dziora thumoni nya gu tshumayele. Eni nyi di gu khala na nyi gu pharegide khu gu thangeya thumo nya gu tshumayele ni gu khathaleya sipandre nyo khaguri nya mitshangano. Egi gi samadzisago khu gu tepo nyi ngaya nyi pharega khu mithumo yeyi nyi di gu hevbula nya singi khu Jehovha.

Nyamayi moyo nyi nga hevbula naye Bhibhiliya, a diri ni ndranga Johnston lidhoropa la vbafuvbyana mule. Uye khu wuwadi, a nyi ningide thumo wu nga ba wu si nyi dzegeyi tepo nya yingi nigu a hi dzumelede gu thumisa mweyo nya dzinyumba dzaye gasi gu beya umo mitshangano.

Ndriyathu Jolly Jeffries, gyanana gya ndriyathu a nga nyi hevbudza lisine, gi di rura gi ta vbanya Brooklyn Nova Iorque. Nyi di ta thuma nagyo kha nga piyonero. Ethu hi di vbanya umo nya ginyumbana hi nga ba hi lombidwe khu ndriyathu.

Ethu hi di gu hakha dzitsapawu nya dzidugwana, ethu hi di gu hakha dzidholari dzimbili mwendro dziraru khu litshigu. Litshigu limwedo, eni nyi di vbedzisa sitsapawana sangu gasi gu renga guhodza merikadhu. Tepo nyi nga duga vbavbandze, mwama moyo a di nyi hidzimeleya a nyi wudzisa khuye: “U ngu wuna thuma? Eni nyi na gu livba dholari mweyo khu ora”. Uye a di nyi ninga matshigu mararu gasi gu agisa avba va nga ba va vbweta gu vbaha. Eni nyi di tiyisega gu kheni Jehovha a di gu nyi phasa gasi nyi simama Edgefield, Carolina do Sul. Khu 1958, eni nyi di hongola kongresu Internacional wu nga girega dhoropani ga Nova Iorque.

Ga litshigu nya wuvili nya kongresu wowu, gu di girega gilo nyo khaguri nya lisima. Nyi di manana ni Ruby Wadlington, oyu a nga ba a thuma kha nga piyonero nya tepo yatshavbo Gallatin, Tennessee. Ethu ha vavili hi diri ni misuwo nya gu thumi kha nga va misiyonariyu nigu ethu hi manegide avbo nya tshangano wa Gileade avbo nya kongresu wowu. Khu hwane ethu hi di pheya gu loveyana dzimesaji. Khu gu landreya nyi di ranwa gasi guya vega ganelo ya maguagani Gallatin, tepo yile nyi di yi wona kha nga lithomo nya gu mulombe gu tshadha naye. Eni nyi di rura nyi hongola libandlani la Ruby hi bwe hi tshadha khu 1959.

Tepo nyi nga ba nyi ri ni 23 myaga, eni nyi di emiswa kha nga Servo da Congregação muhuno si  thulago (mutshanaganisi nya huwo nya madhota) Gallatin. Umo nya libandla lathu nya gu pheye uye a nga ba ari muwoneleyi nya gipandre adiri Charles Thompson. Uye a di vidzidwe ngudzu khu maliphuvboni, ambari ulolo uye a nyi lombide mawonelo nya edzi vambe vawoneleyi nya sipandre va nga khataleya khidzo libandla. Eni nyi hevbude gwaye edzi si gu sadi khidzo gu gira siwudziso ni vbweta guti satshavbo si pategago na nyi nga si hungi makungu.

Khu Maio nya 1964, ethu hi di konvidarwi guya hevbula Escola do Ministério do Reino yi nga girega South Lansing, Nova Iorque. Mavbanyelo ya vandriyathu va nga thangeya xikola yeyi, ma nyi giride nyi vbweta gu hevbula nya singi khu Jehovha ni gu bwe nyi hidzimeya vbafuvbi gwaye.

Khu Janeiro nya 1965, Bheteli yi di nyi lomba gu khala Muwoneleyi nya gipandre ni gu endreya mabandla ni Ruby. Ga gipandre gyathu nyo pheye gu thuma gi di gu khugeya Knoxville, Tennessee kala Richmond, Virginia. Gi di gu pata mabandla ya Carolina do Norte, Kentucky ni West Virginia. Ethu hi di gu endreya basi mabandla nya valandre, kholu nayo nya gihatheya ga Sul ga Estados Unidos kha wa nga ba wu dzumeya gu valandre ni vatsungu va tshangana gumogo. Vandriyathu va diri sisiwana, khu kharato hi di hevbuleya gu kabana navo esi hi nga ba hiri naso. Ndriyathu moyo a nga ba ari Muwoneleyi nya sipandre khu tepo nya yingi, a nyi hevbudzide gilo nya lisima a di khuye: “Khala muthu nya gu vbevbugi, u nga dzi giri muthu nya lisima libandlani. Wa gu va phasa va na gu wona kha nga ndriyawe.”

Tepo hi nga wuseya libandla nyo khaguri li nga ba liri ni vathu nya vadugwana, Ruby a di pheya gu hevbula Bhibhiliya ni nyamayi moyo a nga ba a ri ni 17 myaga na tshadhide ni gu nari ni gyanana nya mwaga mowo. Tepo a nga ba a ri mwalo muthu libandlani nya gu gimbidzise gihevbulo, Ruby a di gu gira isoso khu gu thumisa Email. Ga liendro lathu li nga landreya, nyamayi yoyu a di gu manega mitshanganoni tepo yatshavbo. Tepo vandriyathu vavili va nga ba va thuma kha nga vapiyonero nyo hathege va nga ranwa gasi guya thuma ga libandla leli, avo va di simama gu hevbula naye, nigu nya mba hweya uye a di bhabhatiswa. Hwane nya 30 myaga, khu 1995 tepo hi nga ba hi romo Bheteli ya Patterson, ndriyathu moyo nya nyamayi nya muphya a di ta ganeya ni Ruby. Ndriyathu wule, a diri gyanana gya ndriyathu wule a nga gimbidzisedwa gihevbulo khu Ruby. Nigu, ndriyathu yoyu ni mwama waye va diri sihevbuli nya turma número 100 ya Gileade.

Gipandre gyathu nya wuvili hi nga thumeya umo, gu diri Flórida central. Khu tepo yoyo hi di gu vbweta movha, khu kharato hi di renga nigu hi yi manide khu barato. Ambari ulolo, hwane nya semana mweyo movha yi di ghoheka. Ethu hi diri mwalo dzitsapawu nya gu yi lungisise. Hi di ligareya ndriyathu moyo a nga hadzi gu hi phasa. Uye a di rumeya sithumi saye si ta lungisa, nigu kha dzega dzitsapawu. Hwane nya gu ba si vbedzide gu lungisa, uye basi a di ganeya gu khuye: “Movha yi lungide.” Nya mba si vireya, uye a di bwe a hi ninga dzitsapawu. Egi giyeyedzo nya gyadi nya gu Jehovha a ngu khathaleya sithumi saye. Isoso si di nyi dundrugisa lisima nya yeyedze wuhindzi.

Tepo hi nga ba hi endreya libandla nyo khaguri ethu hi di gu khala gaya ga vandriyathu, kha nga handro wakone ethu hi giride dzipari nya dzingi nya dzadi. Litshigu limwedo, nyi di pheya gulova mahungu nyo khaguri maningano ni libandla umo nya máquina yangu nya gu love. Tepo nyi nga bweleya nyi wutshigu, eni nyi di tugula gu kheni gyanana gya ndrangani mule gi nga ba giri ni 3 myaga, gi di tshala gi phwinyedzeya máquina yangu nya gu love. Eni nyi haganide nagyo khu myaga nya yingi.

Khu 1971 ethu hi di hakha thumo nya wuphya, gasi gu thuma kha nga Muwoneleyi nya dhistritu dhoropani ga Nova Iorque. Ethu hi di garadzega. Tepo nyi nga duga kheyi eni nyi diri ni 34 myaga. Vandriyathu va di rumeya Muwoneleyi nya dhistritu nyo pheye nya mulandre gasi gu hi hakha.

Kha nga Muwoneleyi nya dhistritu, eni nyi di gu tsakide khu gu hevbudza khu Jehovha semana ni semana umo nya mitshangano nya gipandre. Vawoneleyi nya vangi nya sipandre, va di gu vidzidwe ngudzu guvbindra eni. Moyo wakone khuye a nga nyi vegeya ganelo nya gu bhabhatiswe. Mumbe ndriyathu nya gu pwani khu Theodore Jaracz, khu hwane a di khala Givbango nya Huwo nya Guthangeye. Nigu vambe vandriyathu va nga ba va vidzidwe va di gu thumeya Bheteli ya Brooklyn. Eni nyi bongide ngudzu olu vawoneleyi nya sipandre ni Vabhetelita va nga nyi gira nyi dzipwa na nyi tshulegide. Eni nyi wonide gu kheni avo va  diri vahavisi nya vadi, nigu va di gu tumba Lito la Nungungulu ni gu seketeya hengeledzano khu gutumbega. Gu dzinogisa gwawe gu nyi phaside gu thuma kha nga Muwoneleyi nya dhistritu.

Khu 1974 Huwo nya Guthangeye yi di emisa wumbe tsawa nya vawoneleyi nya sipandre gasi gu thuma kha nga vawoneleyi nya dzidhistritu. Nigu eni gambe nyi di ya thuma kha nga mowoneleyi nya gipandre Carolina do Sul. Vandriyathu va di tsakide ngudzu khu kotani nya olu mabandla nya valandre ni vatsungu ma nga ba ma dzumedziswa gu tshangana gumogo.

Guvbeyani nya 1976, nyi di rumedwa guya thumeya gipandreni gya Georgia, Atlanta ni Columbus. Nyi ngu dundruga gwadi tepo nyi nga vega ganelo nya gudzingwe nya 5 sanana nya valandre si ngafa khugu nyumba yaso nari yi di vbiswa. Vavelegi vaso va di romo ospitali kholu va nga bayiswa. Dzifakazi dza Jehovha nya dzingi nya valandre ni vatsungu va di hongola ospitali gasi guya thaveleya vavelegi vale. Eni nyi di li wona lihaladzo la vandriyathu. Tepo sithumi sa Nungungulu si yeyedzago wuwadi ni pweya-wusiwana vambe, avo va na timiseya tepo va tshanganago ni sigaradzo.

Khu 1977 ethu hi di konvhidharwi guya Bheteli ya Brooklyn khu migima nyo khaguri gasi guya phasedzeya projetu nyo khaguri. Tepo projetu yeyi yi nga vbeya, sivbango sivili nya Huwo nya Guthangeye si di tshangana ni eni ni Ruby si hi wudzisa gu khiso hi dzi emisede gani gu simama gu thuma Bheteli. Ethu hi di dzegeya gu dzumeya kovhinti.

Khu 24 myaga, nyi thumide avbo nya Departamento de Serviço omu dzitepo nya dzingi hi phasago vandriyathu gu lulamisa sigaradzo nya sikhongolo. Khu gu gimbiya nya tepo, Huwo nya Guthangeye yi di hi ninga sileletelo si gimbileyanago ni matshina nya milayo nya Bhibhiliya. Isoso si ngu phasa Departamento de Serviço gu hlamula siwudziso ni gu gambe yi ngu si thumisa gasi gu treinari vawoneleyi nya sipandre, madhota ni vapiyonero. Malulamiselo yoyo ma ngu phasa nya vangi gu khala makristo ma vidzidwego nigu isoso si ngu tiyisa hengeledzano ya Jehovha.

Khu 1995 kala 2018, eni nyi wusede dzibheteli nya dzingi kha nga Representante wa tsindza gwathu, gale gu nga ba gu tidwa kha nga Superitendente de zona. Eni nyi di tshangana ni dzikometi nya dzibheteli, vabhetelita ni vamisionariyu gasi gu va tiyisa ni gu va phasa gu lulamisa ni gevbini gigaradzo. Eni ni Ruby hi tiyisidwe khu matshango hi nga bhuledwa khu vandriyathu. Khu giyeyedzo, ethu hi endrede Ruanda khu 2000. Ethu hi kuhidwe ngudzu khesi hi nga sipwa nya edzi vandriyathu ni ndranga ya Bheteli va kuhidwego khidzo khu Genocídio (gu songetedwa nya vathu) yi nga girega khu 1994. Nya vangi va luzide sigodwa sawe. Ambari olu va nga tshangana ni gigaradzo gegi, vandriyathu vovo va simamide gu yeyedza gukhodwa, gutumba ni litsako.

Ethu olu hi na ni 80 myaga. Nyi na ni 20 myaga na nyi gu thuma avbo nya kometi ya Bheteli ya Estados Unidos. Eni gima kha nya hevbula univhersidhadhi, ambari ulolo eni nyi hakhide sihevbulo nya sikhongolo si tago khiyo ga Jehovha ni hengeledzano yaye. Isoso si nyi dongisede gasi gu hevbudza vambe lisine nya Bhibhiliya gasi va wuyedwa khu womi nya mba vbeya. (2 Kor. 3:5; 2 Thim. 2:2) Eni nyi di wona edzi mahungu nya Bhibhiliya ma phasago khidzo vathu gu vbindrugedza womi wawe ni gu tiyisa wupari wawe ni Muvangi wawe. (Jak. 4:8) Eni ni Ruby, ha gu gira satshavbo hi si kodzago gasi hi simama gu tiyisa vambe gasi va ninga lisima lithomo nya gu hevbule khu Jehovha ni gu hevbudza vambe lisine nya Bhibhiliya, a gu lithomo nya likhongolo eli githumi gya Jehovha gi nga dzi buzago khilo.